General Missions Board :
Sept ni 18 leh 19 chhung khan Dibrugarh ah General Missions Board neih a ni a, Board hi General Missions Director Rev. R. Lalhawia’n a kaihruai a. General Treasurer Rev. Zohmingthanzama chuan telpui. An thurel langsar zual te :
1. Kum 2020 General Missions budget atan cheng Nuai 2,96,96,500(Nuai 296, singkua sangruk zanga) an ruahman.
2. General Missions Department Pay Comission din a ni :
Chairman Rev. R. Lalhawia
Secretary Rev. Zohmingthanzama
Member tur te :
Rev. V.L Tluanga sinate
Evan PC Lalrokima
Rev. C. Lalthantluanga
Rev. R. Lianzama
3. Thawktute awm hmun hetiangin sawn a ni :
– Rev. Thangchuanga Arunachal Field Director ah.
– Pastor Benjamin C. Lalthankima – Lankapara atangin Guwahati assam ah
– Pastor Ramesh Biswakarma – Oodlabari atangin Lankapara ah
– Pastor KVL Ruatmawia – Silapathar atangin Bihar MF ah
– Evan. Benjamin Toppo – Tukrajateshwar atangin Targera
Thawktute awmna hmun sawnte hi kum 2020 January ah insawn fel tura tih a ni.
4. Manigong School inkaihrhuaina dan School Managing Board in a duan approve a ni.
5. Upper Assam MF hqrs Dibrugarh atangin silapathar ah sawn a ni.
6. Odhisha fileh thawktu lakbelh nise.
7. Pastor C. Thandawla Bihar and Jharkhan field director atan an dah a ni.
8. Missionary traning na tur buatsaih nise.
—–
Field thar hawng :
Sept ni 18, Nilaini khan Missions Field thar hawn a ni a, Upper Assam and East Arunachal Missions Field tih niin General Missions Director Rev. R. Lalhawia’n Pathian hnenah hlanin a hawng. Field Director hi Rev. Lalsiemlien zote a ni.
——
Biak in hawng :
Sept ni 19, Ningani khan Archi lason Biak in sak thar chu UPC North East India Biak in pakhat ni turin General Treasurer Rev. Zohmingthanzama’n Pathian hnenah hlanin a hawng.
Archi Lason Biak in hi Pukpui Bial Missions Department ten an sak a ni a. Hemi bakah hian Sis. Biaksangi Bawngkawn Kohhrana lawi ten ten cheng sing li an pe tel bawk.
Biak in hawn Programme ah hian Kohhran member thahnemtak kal khawmin hlim takin hun an hmang a ni.
——
General Hruaitute Programme :
General Superintendent Rev. Lalmalsawma sailo chuan Sept ni 21, Inrinni khan Aizawl a chhuahsanin UPCI General Conference na tur Indianapolis, USA a pan.
Kumin 2019 UPCI General Conference hi Sept ni 24 atanga ni 27 chhungin Indiana Convention Center ah neih a ni dawn a, khawvel pum huap Pentecost Kohhran intawhkhawmna lian berah hian Rev. Wayne Huntley, Rev. Jack Cunningham, Rev. Rashidi Collins, Rev. David K. Bernard, Rev. David Brown, Victor Jackson te speaker tur an ni.
Ruahman dan chuan General Suptd Rev. Lalmalsawma sailo chuan Oct 9, Nilainiah Mizoram a pan ang.
General Secretary Rev. R. Lalrinsanga chuan Sept ni 17-20 chhung khan Tripura ah Kohhran rawngbawlna tul buaipuiin hun a hmang.
General Sunday School hruaitute Director Rev. R. Laichhingpuia, Secretary Rev. R. Vanlalawia leh Treasurer Evan F. Lalsangliana te chuan Sept ni 21 leh ni 22 chhunga Barak District Sunday School Meet hmanpuiin rawngbawlna an nei.
——
Missionary Day :
September ni 25, Nilaini hi UPC-NEI Kohhran Missionary Day a nia, Kohhran ni pawimawh a nih avangin kohhran office, Bible College, Bookstall, School leh hmun pawimawhte khar a ni ang.
General Hqrs atangin hemi nia chhiar chhuah turin Tualchhung Kohhran tinah Missionary Day thuchah thawnchhuah a ni.
Aizawl khawpui chhunga kohhran tam zawk chuan hian awmni khamin ruai nen he ni hi an hmang dawn a. Khawpui pawn lam leh thingtlang kohhran te erawh chuan zan lamah hmang turin ruahmanna an siam thung.
Kum tin he ni hi urhsun taka hman thin a ni a, hemi nia thawhlawm leh thilpek dangte pawh Missions rawngbawlna puala lakkhawm thin a ni.
North East India UPC Kohhran hian tun dinhmunah Missionary 244 a ruai mek a, Mizoram chhung bakah state pawn heng :- Delhi, Kolkata, Arunachal, Assam, Upper Assam, Andaman and Nicobar, Bhutan, Dimapur, N. Bengal and Sikkim, Orissa ah te hian rawngbawlna hna a thawk mek a ni.
——-
PYD Memthar lawmluhna nei :
Sept 15, Pathianni khan Delhi kohhran PYD te chuan kumin 2019 a PYD member thar lawmna hun felicitation and Fresher’s meet ang hmang.
He hunah Delhi PYD member zirnaa hlawhtling leh Central Govt a hna hmutharte lawmpuina hun an hmang tel a. Delhi chaplain Pastor Jerry Lalmuanawma’n fuihna thuchah sawiin, Upa Mark Thangtinliana, Sr Adviser in thusawina a nei bawk.
Delhi kohhran ah hian PYD member 80 vel awm mekin kumin hian PYD member thar 34 vel an awm a ni.
——–
Lunglei District ah seminar :
1. Tlabung bial Conference-in a lo rel angin Sept.13 atanga 15 chhung khan bial chhunga rawngbawltute leh Department hruaitute pualin Seminar neih a ni a, Resource Person atan General Superintendent Rev.Lalmalsawma Sailo hman a ni.
Seminar thupui atan hian Hruaitu mawhphurhna leh a tih tur, Accountancy leh rawngbawltu leh a mawhphurhna tih te hman a ni. General Superintendent hi Aizawl East District Superintendent Rev.Rosanga Colney leh Lunglei District Treasurer Rev.C.Lalrintluanga ten an tawiawm a ni. (Pic. General Superintendent Tlabungah)
2. Lunglei District Superintendent Rev.C.Vanlalena chu Sept.15 Pathianni khan Headquarters bial chhunga awm Electric Local Sunday School Department ten Sunday School Kumpuan ‘Kan fate I chhanhim ang u’ tih thupui hmanga Seminar an buatsaihah resource person-ah a tang ang. Kan fate I chhanhim ang u tih thupui hi hlawm hrang hrangah hetiang hian an then a ni.
– Zirtirna diklo leh bumna lakah
– ZU leh ruihhlo, zuk leh hmuam lakah
– MIpat hmeichhiat hman sualna lakah
– Social Media hman dik lohna leh Mobile phone hman sualna lakah
– Hlemhletna thalo corruption leh duhamna diklo lakah. (Pic. Electric Local-ah Seminar)
——-
Bial Missions Conference :
Sept.13-15 chhung khan Chhipphir bial Missions Conference vawi 34-na chu Sekhum Local biak inah neih a ni a, Speaker atan Thenhlum bialtu Pastor PC.Zion Rammawia chu hman niin, Inkhawmpui thupui atan Luka 9:13 ‘Nangmahnin ei tur pe rawh u’ tih chu hman a ni.
Sept.14 inrinni khan rorelna neih a ni a, hetah hian Bualpui V Home Missionary Quarters-ah Sintex dahna tur siam nise an tih bakah bial chhung Local lian pathum ten bial chhung Local te pathumte tlawh chhuak se an tih bakah nakum 2020 Missions Conference-na tur atan Mualthuam N Electric Local nise an ti a, District-a thlen tur thu pawimawh tak tak an rel bawk.
He Conference-ah hian Thlarau lam hla nen hlim taka hun hman a ni a, Chhipphir bial PYD leh Ruthi Lalrampari Lungmawi Local-ten zaiin rawngbawlna an nei thin bawk. Bualpui V Home Missionary Evan.Lalrokhawma chuan Sept.15 Pathianni chawhnuah thusawi rawngbawlna a nei bawk. (Pic. Chhipphir bial Conf.)
——
Lawmthusawi chawimawina :
Sept.21 inrinni hian Rbt.Malsawmtluanga Fanai te chhungkua Pukpui Local-a lawi te chuan Pathian hnena lawmthusawi chawimawina an nei a, Speaker atan Rev.R.Lalrosanga ruaiin hlim takin hun an hmang.
Lawmthusawi chawimawina Programme hi Sept.19, Ninga zan atang khan hman tan a ni a, Pathianni zan thlengin programme an siam a ni.
——
Rammu :
Pangzawl bial Missions Department buatsaihin Rammut Programme Bungtlang Local-a neih mek a ni a, Sept.21 inrinni khan Rev.C.Lalhmingthanga te chhungkua chuan Pathian chawimawina neiin Kohhran hoten hlim takin hun an hmang a ni.
—–
Member thar :
Sept.15 Pathianni khan Zawlpui Local-ah bialtu Pastor Muanpuia Colney chuan mi thar 1 kohhranah a seng lut a, Isua hmingin Baptisma a chantir nghal bawk.
Zehtet Home Missions Field-ah pawh sept 15, Pathianni khan mi thar 1 Kohhranah sengluh niin, Home Missionary Bro.Lalrinzuala chuan Pentecost Kohhrana lawi turin a senglut.
——–
Seminar :
1. Sept.21, inrinni khan Lungsen N Local-ah Rawngbawltu leh an nupuite tan Seminar buatsaih a ni a, Resource Person atan bialtu Pastor K.Vanlalhruaia an hmang.
3. Sept.21 inrinni vek hian Chhipphir Local-ah Upa leh Rawngbawltute leh Department hruaitute pualin workshop buatsaih a ni a, Resource Person atan bialtu Pastor LH.Lalchhandama chu hman a ni.
——
Thianghlimna Campaign :
Sept.22 Pathianni hian Chhipphir bial Thianghlimna Committee-te chuan Chhipphir Local-ah Thianghlimna Campaign neiin hun an hmang ang.
——
Fehchhuak :
Sept.22 Pathianni hian Lungsen N Local LAD te chu Rangte N Local-ah rawngbawlin an fehchhuak ang a, Lungsen S Local PYD te chu Rangte S Local-ah rawngbawlin an fehchhuak bawk ang.
——-
Crusade :
Sept 13-17 chhung khan Thingsai bial missions deptt buatsaihin thingsai local ah crusade neih a ni a, crusade chhungin chawimawina vawi 2 neih a ni.
Revival Crusade ah hian Evan Simona Hmar chu Speaker atana hman a ni a, Rbt Lalrohlua, Estheri leh zaithiam Lalngilneihi ten tawiawmin an rawngbawlna Lalpan mal a sawm a, Thlarau baptisma dawng thar te awmin, Kohhran hoten hlim takin hun an hmang a ni.
——–
Aizawl East District
Literature Committee :
September 18 leh 19 chhung khan Aizawl East District hnuaia Literature Committee meeting neih a ni.
He hun hi Chairman, Rev Rosanga Kawlni chuan kaihruaiin Kum 2020 Nilai zan thupui endikna an nei a ni. Aizawl East District te hian Kum 2020 Nilai zan thupui hi Literature Committee ruahmanna angin Rev VL Hnemtluanga, Champhai Bialtu Pastor ziak an zir dawn a, Thupui hlawm hrang hrang-ah thenin Environment humhalh a nih theihna tur atana zir tur thu pawimawh tak tak pawh dah tel a ni. Tunah hian Editting khawih mek niin kumin chhung ngei hian a bu hi hralh chhuah theih tura peih tum a ni. Aizawl East District Literature Committee te hian an published tur, Rev KVL Hmangaihkima lehkhabu ziak, Chhandamtu leh Chhandamna tih pawh tunah hian peih tep tawh niin Kumin District Missions Inkhawmpui, Thingsulthliah hmuna neih turah tlangzarh tura peih tum a ni bawk.
——
Conference thleng tur inbuatsaihna :
Kumin October 25 atanga 27 chhunga Thingsulthliah Bial ten Aizawl East District Missions Department inkhawmpui an thlen tur atan inbuatsaihna chak taka kalchhohpui mek a ni.
Inkhawmpui hi Thingsulthliah Field-a Pandal sakah hman tur niin Pandal hi a dung ft 90 leh a vang ft 60- a liana sak a ni. Pandal sak hna hi September 16, Thawhtanni khan tan niin Bial chhung khaw hrang hrang atangin member 60 chuang zet an thawkchhuak.
Kumin Aizawl East District Missions Inkhawmpui hi a vawi 25-na, Silver Jubilee a nih angin ropui taka lawm tum a ni a, Inkhawm apiangin District Department hrang hrang ten thutawi sawina hun an hmang bawk ang.
He inkhawmpui turah hian Thupui hranpa nei lovin mi hrang hrang: Rev Pc.Lalnghakliana, Rev Darchhawna, Rev K.Hrangvunga, Rev R.Lalthanzuala bakah Rev HL Thakunga, Rev R.Lalhawia leh Rev Rosanga Kawlni te hnen atangin thuchah ngaihthlak thin a ni anga kum danga tih tawh thin angin rorel lo tan vantlang inkhawm neih leh tur niin hetah hian Evan HK Lalhmangaiha hnen atangin thuchah ngaihthlak a ni dawn a ni.
——
Office khar dawn :
September 25, Nilaini hi North East India Kohhran ten Missionary Day atana kan hman angin Aizawl East District chhunga Tualchhung Kohhran hrang hrangte pawhin he ni hi urhsun takin an hmang hlawm dawn a, Tualchhung Kohhran thenkhat chuan awmni khamin ruai nen hmang tura ruahman siamin Tualchhung Kohhran thenkhat chuan Zan lam hun chauh an hmang thung ang. Missionary Day-ah hian Tualchhung Kohhran thenkhat chuan Speaker bik neiin hun an hmang bawk dawn a ni. Missionary Day a nih angin Kohhran chuan chawlh-ah puangin hemi ni hian Aizawl East District Office pawh khar a ni dawn a ni.
——-
Bial Missions Coference :
September 27 atanga 29 chhung hian Aizawl East District chhunga Bial hrang hrangte chuan Bial Missions Inkhawmpui an hmang dawn.
He inkhawmpui-ah hian Inrinni-ah rorel inkhawm neih a ni ang. Bial thenkhat chuan Thupui hranpa leh Speaker bik neiin hun an hmang anga, Bial thenkhatah chuan Speaker hranpa nei lovin Bial hruaitu leh Bialtu Pastor te hnen atangin thuchah an ngaithla thin dawn a ni. District Missions hruaitute chuan hetiang hian hmun hrang hrangah an hmanpui dawn a ni:
Director, Rev R.Lianzama chuan Champhai Bethel bial-ah a hmang anga
Secretary, Evan Lalramzauva chuan Khawzawl Bial-ah hmangin
Treasurer, Evan Lalthuthlunga chuan Darlawn Bial-ah a hmang ang.
——–
Lawmthusawi chawimawina :
September 14, Inrinni khan Khawzawl Vengthar Kohhrana lawi Sis Siamthangi te chhungkua chuan Pathian hnena lawmthusawi chawimawina an nei a, Speaker-ah Rev C.Lalengliana, Upper Republic Bialtu Pastor chu hman niin Pathian thlarau thianghlim awmpuina hnuaiah hlim takin hun an hmang a ni.
September 21, Inrinni hian Khawzawl Bial, Khawzawl Vengthar Kohhrana lawi T.Upa K.Laltanpuia te chhungkua chuan lawmthusawi chawimawina hi neih chhunzawm lehin Speaker-ah Evan R.Vanchhunga, District Fulltime Evengelist an hmang a ni.
September 21, Inrinni vek hian Thuampui Bial, Muanna Veng Kohhrana lawi Bro. Vanlalchhuanga te chhungkua chuan Pathian chawimawina an buatsaih a, Kohhran ten hlim takin hun an hmang a ni. Speaker-ah Evan K.Vanlaldika hman niin Muanna Vengah hian Pathian chawimawina hi vawi 10 neih lo ni tawhin tunah hian a vawi 11 na atan chawimawina hi neih leh a ni.
——
Member thar :
September 15, Pathianni khan Mualpui Bial, Salem Kohhranah mi pathum in sual ngaihdamna baptisma an chang thar a, an zinga pahnih hi mithar niin Kohhranah sengluh an ni.
Bazar Bial, District Hqrs. Kohhranah pawh September 14, Inrinni zan khan mi 5-in sual ngaihdamna baptisma Bialtu Pastor, Rev HL Thakunga kutah an chang bawk.
—–
Fehchhuak :
September 15, Pathianni hmang khan North Mizoram District, Sihphir Local PYD te chuan Serchhip Biakinpui PYD te tlawhin hun hlimawm tak hman a ni.
He hunah hian Serchhip Biakinpui lam ten inkhawm kaihhruai hna thawkin Sihphir Local te hnen atangin thuchah ngaihthlak thin a ni. Inrinni khan Sport Item Item chi hrang hrang hmangin intihhlimna an nei bawk a ni. North Mizoram District Hqrs. Bial PYD te pawhin Mualpui Bial te September 15, Pathianni hmang tho hian an tlawh a, Bial Hqrs. Mualpui Biakin-ah lo dawng sawngin hun hlimawm tak an hmang a ni.
——–
Sunday School Conference :
September 7 atanga 8 chhung khan Zemabawk bial Sunday school conference vawi-32 na (Beginners – Juniors) Airfield hmunah hman zawh a nih hnuin, September 15, Pathianni khan Zemabawk Bial Sunday School Meet (Intermediate – Doctrinal) chu Zemabawk Vengpui Biakin ah hlawhtling taka hman leh a ni.
He hunah hian chawhma lamah Presentation Vengtin atangin Lengkhawm zai neih a ni a, Rev. R. Lianzama, District Missions Director hnen atangin thusawi tawi hlawk thlak tak ngaihthlak a ni bawk. Chawhnu hunah Solo leh Zaipawl vengtin atangin Presentation nei a hun hman leh a ni a, zaihona hun tha tak neiin thuthlung hla te rimawi chikim (Keyboard, Drums, etc) nen hlim takin sakho a ni a, inkhawm boruak nuam takin an hmang a ni.
Zan lamah Zemabawk NPSS atangin Group singing ngaihthlak ani a, Zemabawk Vengpui atangin Musical drama hmuhnawm tak thlir ho a ni bawk. Evan. F. Malswmtluanga, Bial SS Fin. Secretary hnen atangin thalai te tana hriat tur pawimawh tak tak leh fuihna thu tha takte thusawi ngaihthlak a ni a, lawmman sem nghal a ni bawk.
He hunah hian Sunday School kum 5, 10 leh 15 a zawna kal kim te Certificate hlanna Bialtu Pastor Rev. R. Laltlankima’n a nei bawk a ni. Zemabawk Bial Sunday school conference hi kum 2020 ah chuan Tuirial hmunah neih a a ni anga, Inter. – Doctrinal Meet erawh chu Middle School Veng Kohhran an hman a ni thung ang.
——–
Hruaitute Programme:
Rev Rosanga Kawlni, District Superintendent chuan September 21, Inrinni hian N.Serzawl Biakin sak thatna tur lungphum phumna a neih bakah Sunday School Hall hawnna a nei bawk a, Pathianni hian Darlawn Bial chhungah rawngbawlna a nei chhunzawm ang.
——-
Chhimtuipui District :
Member thar :
Chhimtuipui District huamchhung home mission Field Pangkgua ah Sept 15, Pathianni khan Chungkaw khat member 3 te chu Pentecost Kohhrana lawi turin Evan Khaching Aineh home missionary chuan Kohhranah a seng lut.
——-
Evangelism Tour :
Chhimtuipui District, Sangau Bialah Dist PYD Evangelism tour hlawhtling tak neih a ni.
Dist PYD chuan Sept ni 14-15 hmang khan Sangau II local, Sangau bialah rawngbawlna an nei a, District PYD President Evan K.Rinthara, Niawhtlang bial President Upa VT Lungawia, South Lungpher Bial President Rbt L Dawngliana, Siaha Bial Secretary Rbt L Khai-U leh Rbt LS Lalhmingmuana Siaha bial te chu an fehchhuak a ni.
Tour thawhhnihna hi Sept ni 21-22 chhung hian Siaha bial leh Niawhtlang bial ah an chhunzawm leh a, Siaha bialah hian T.Upa N Lalchhuanmawia Dist Fin secretary leh bial hrang hrang hruaitu ten rawngbawlna an nei ang a, Niawhtlang bialah hian T Upa H Lalduhsanga secretary leh bial hruaitute an fehchhuak ve thung a ni.
———-
North Mizoram District :
Pastor nupui te pualin seminar :
North Mizoram District chhung Bial sawmthuma Pastor Nupui te leh District Pastor Nupui te chuan Sept ni 18, Nilaini khan North Mizoram District Headquarters Kohhran Biak inah Seminar an nei.
Seminar hi hun hnihah thenin hun khatna chawhma dar 10:00 -ah tan a ni a, Dist. Secretary Rev Chhiarpuia’n chawhma hun kaihruaiin “Pastor Nupuite mawhphurhna -Kohhranah” tih chu Dist. Supdt. Rev. Laltluanga’n zirtirin; chawhnu lamah General Superintendent Rev. Lalmalsawma Sailo Paper buatsaih “Pastor Nupuite mawhphurhna-Inchhung khurah” tih chu an zir ho veleh a ni.
Chawhnu inkhawm hi Dist. Treasurer Rev. K. Lalduhsanga’n a kaihruai a, District huam chhunga Pastor Nupuite an kal tha hle bawk a ni.
—–
Disrtrict PYD Executive Committee :
Sept ni 17 thawhlehni khan North Mizoram Disrtrict PYD Executive Committee, Dist. Office Supdt. Chamber-ah neih a ni.
Meeting Dist. PYD Presidetn Evan. F. Lalngaihawma’n a kaihruai a, rorel pawimawh zingah Kawrthah biak in sak tur chungchangah work camp a sak nise tia meeting hmasain a lo rel tawh chu, hun remchang hmuh a nih loh avangin Rengdil PMF ten an sak sak dawn a ni.
Vairengte Bial PYD ten Revival Crusade an nei tura Dist. PYD te an sawmna chu ngaihtuahin Dist. PYD Secretary Evan. K. Rotluanga chu tirh ni se an ti. Gen. PYD Live crusade Lungleia neih tur chu Dist. aiawhin Dist. PYD President Evan. F. Lalngaihawma kal tura tih a ni. (Pic. Dist. PYD Exe)
——-
Rawngbawlin fehchhuak :
N. Mizoram District Hqrs. Bial PYD te chuan Sept ni 15, Pathianni hmang khan Mualpui Bial PYD tlawhin rawngbawlna an nei.
Mualpui Bial PYD te hian Mualpui Kohhran Biak inah an lo thleng a, Pathianni chawhma, chawhnu leh zan thlenga programme buatsaihin hun hlimawm tak an hmang.
N. Mizoram District Hqrs Bial atang hian PYD member 100 chuang an thawkchhuak a, hun hman chhungin Bial Treasurer Bro. B. Lalremruata, T.Upa Zion Ramnghahmawia leh Bial President Evan. R. Vanlalchhanchhuaha ten thusawi rawngbawlna neiin bial zaipawl leh bial pahnih chhunga soloist ten zaia rawngbawlna nung takin an nei bawk.
——–
Member thar :
Sept 15 Pathianni khan Zawlnuam Bial Bungthuam khua District in Evan. H. Lalnunmawia rawngbawla a rawih mekna hmunah Rawngbawltu Evan. H. Lalnunmawia kaltlangin mithar pakhat Kohhranah seng luh a ni a, Sual ngaihdamna baptisma pawh rawngbawltu Evan. H. lalnunmawia’n a chantir nghal.
——–
Lungphum phum :
Sept. 16 Thawhtanni khan, Bilkhawthlir Kanan veng Kohhran te chuan Biak In an sak thar tur Ft 50 leh a vang Ft30-a zau chu sa tha turin Lungphum an phum.
Biak in sak lungphum phum hi zing dar 8:00-ah neiin North Mizoram District Supt. Rev.Laltluanga’n a phum a, Kohhranhote pawh an kal tha hle. Biak in sak lungphum Phum Programme hi UPC NEI Former Gen. Supdt. Rev. K.Darsailova pawhin hovi’n Pathian hnenah tawngtaina neiin hun a hmang bawk. (Pic. BIAK IN LUNGPHUM PHUM)
——-
Thianghlimna Campaign :
August 22nd chawhnu dar 1:00 -a, North Mizoram District Thianghlimna Committee-in a rel angin Pathianni kal ta Sept ni 15 hmang khan NMD huam chhung Thianghlimna Campaign thawhkhatna tluang taka zawh fel a ni.
Thianghlimna Campaign hi kum 2015 District Conference in a lo rel tawh anga, Kohhranhote taksa leh rilru Thianghlimna tur kawng hrang hrang bakah taksa hriselna nasa taka khawih pawi thei zuk leh hmuam laka thianghlimna chu uar taka kalpui a ni a, Pentecost kohhranah Zuk leh hmuam laka filhlim lo te chu tun thleng hian Pulpit-a rawngbawlna neih khap a ni.
Maubawk Bial Thianghlimna Campaign thawh hnihna bul tanna chu Pathianni kalta Sept. ni 15 Pathianni zan khan Bungkawn Local-ah neih a ni.
He Campaign inkhawmah hian Inkhawm kaihhruai hna Evan. Dr. K.Vanlalhruaia’n thawkin, T.Upa Laldawngkima Maubawk chuan Tanna hun a hmang a, Evan. B. Lalbiakthanga, Maubawk Bial Thianghlimna Committee chuan Thuhril rawngbawlna a nei a ni.
Thianghlimna Campaign inkhawmah hian Upa Lalruatsaka, Treasurer Bial Thianghlimna Committee, Upa H.Pangthanga, Committtee Member, Upa K.Zohrangchhuana, Ex-Officio Member, Sist. PC.Vanlalzawni, Bial LAD Secretary ten an tawiawm a, Thlarau boruak duhawm tak hnuaiah hun tha tak an hmang a ni. Program duan lawk angin Thianghlimna Campaign hi Oct 20 Pathianniah Maubawkah Campaign chhunzawm leh a ni ang. ( Pic. MAUBAWK THIANGHLIMNA CAMPAIGN)
——-
Missions Field member zat :
North Mizoram District-ah hian Home Missions Field 11 awmin; Field hrang hrang leh kohhran member neih zat te tarlang ila:-
1) Vawngawnzo 107
2) Rasdali 168
3) West Phulpui 120
4) Tumpanglui 106
5) Persang 52
6) Zomuantlang 67
7) Dilzawl 85
8) Damdiai 154
9) Bajirung 176
10) Kolalian 54
11) Marpara 56
——
Member thar :
Hunthar Bial Rangvamual kohhran te chuan Sept Ni 9- 14 hmang khan tualchhung mipuite pualin Camping an buatsaih a, Speaker Evan R.Lalrinchhana niin mi thar 2 – Pentecost kohhranah senglut an ni.
Kolasib Venglai Bial PYD Music Sub-Committee te chuan Sept 15, Pathianni khan Bairabi Bethel kohhrante tlawhin an fehchhuak a, an rawngbawlna malsawma awmin thlarau lam hlate nen hun hlim takin an hmang.
Kolasib Venglai Bialte hian sept ni 20 atanga sept ni 22 Pathianni hmang khian Bial Inkhawmpui rorel angin Bukvanneiah Bial Revival Crusade an hmang dawn a, thusawi tura ruat mi hrang hrangin hun an hmang dawn a ni.
——-
Seminar :
Sihphir bial conf. in a lo rel tawh angin Sihphir bial chhung local hrang hrangah rawngbawltu seminar tluang taka neih a ni.
Sihphir Bial chhunga Rawngbawltu seminar neih hi hun engemaw chen atanga kalpui tawh niin; Local tam zawk tuam chhuah tawh a ni a, tun Pathianni Sept 21- 22 chhung hian Lungdai kohhranah leh Serkhan kohhranah seminar hi neih chhun zawm leh tur a ni. Seminar-ah hian resource person atan Rev C. Lalrammuana Sihphir Bialtu Pastor an hmang.
Sihphir bial chhung kohhran hrang hrangah Bial Thianghlimna comt hmalaknain Thianghlimna campaign neih chhunzawm an tum a ni bawk a ni.
——-
Member thar :
Sept 18, Nilaini khan District in rawng a bawl mekna hmun Rengdil Bial K.Sarali kohhran ah mithar -8 (chhungkaw khat) chu Pentecost kohhranah sengluh an ni.
Mithar sengluh Prog. hi Bro. K. Lalrindika, K.Sarali rawngbawltuin a nei a, Mi tharte hi K.Sarali khawtlang hruaitu nilai chhungkua an ni.
——–
Biak in sa mek :
North Mizoram District PYD bul tuma rawngbawlna hmun Rengdil Bial Kawrthahah Biak in a dung 36 ft. leh avang 18 ft. a sak hna tan a ni.
Kawrthah khuaah hian kohhranin harsatna a tawh hnuin Biak buk hi tundin a ni tawh lova, tun hi 1994 hnua Biak in tundin vawikhatna tur a ni. Biak in sak hna hi Rengdil Pentecostal Mens Fellowship (PMF) te thawkin hnathawktute’n thahnem an ngaiin mi 18 lai Rengdil PMF te an rawn thawkchhuak a, Kawrthah atangin mi 6 an thawk chhuak bawk.
Biak in sakna tur sum hi District hruaitute ruahman angin North Mizoram Dist chhunga Local tin PYD member-ah sum khawn a ni a, PYD Member te hnen atanga khawn chhuah chu Kawrthah biak in saknan hian pek a ni. Kawrthah kohhrante chuan District PYD member zawng zawng chungah lawm thu an sawi a, Dist PYD leh Dist Kohhranpui board leh Hotu zawng zawng te chungah lawmthu an sawi bawk.
Biak In sak lungphum hi Bialtu Pastor.C.Lalthlengliana chuan a lo phum tawh a, District puiin Biak In hmun hi Rs. 600,000 (Cheng nuai ruk) a a lei a ni.
——-
Joint Meet :
Sept ni 13 Zirtawp zan atanga sept 15 Pathianni zan thleng hmang khan Sihphir Local PYD te leh Serchhip Biak inpui PYD te chuan Serchhip-ah Joint meet an nei.
Bial pahnih te hian zirtawp zanah Programme tanin Fellowship Prog hun hlimawm tak an nei a, Sept ni 14 inrinniah Serchhip stadium-ah infiamna items chi hrang hrang hmangin hun hlimawm tak an hmang a, inrinni zan atanga Pathianni zan thleng Serchhip biak inpui kohhranah revival prog hman a ni. Sihphir Bial PYD te leh Serchhip bial tena Meet an buatsaih hi a hlawhtlingin tisa leh thlarau lamah hlawkna thalaite’n tam tak an chhar a ni.
Thalaite’n Meet an hmanah hian Sihphir Bialtu Pastor Rev C.Lalrammuana leh Serchhip Bialtu Pastor B.Lalengzauva ten an hmanpui bawk a ni.
——-
N. Mizoram District Revival Speaker te rawngbawlna report :
Pentecost Revival Team Speaker Evan. C. Lalruatsanga leh a team te chuan Lengpui Bial Rawpuichhip kohhranah Sept. ni 11Nilaini atang khan rawngbawlna an nei a, an rawngbawlna boruak kal zelah Sept. ni 18 Nilaini khan T.Upa Zoliana te chhungin Pathian chawimawina an nei. (Pic. Pentecost Revival Team )
Jehova Rapha Revival Team Evan. Lalduhsaka Saza leh a team te chuan Dinthar Bial buatsaihin North Mizoram District Camping center-ah an nei. Sept ni 16 leh 17 zan khan rawngbawltute pualin camping buatsaih a ni a, hetah hian rawngbawltute an lut tha hle a, rah tha leh duhawm tak hmuh a ni.
Sept ni 18 zan atangin a duh apiangte luh theihin a chhawng hnihna buatsaih leh a ni a, Campers 23 lutin Mipa 20 leh hmeichheia 3 an lut a, Sept ni 21-ah camp hi khar a ni ang a, a tuk Setp ni 22-ah Camp follow up neih a ni ang…
Sept ni 23 atangin Jehova Rapha Revival Team te hian Mission Vengthlang Kohhranah Revival Crusade an neih chhunzawm dawn a ni.
Apostolic Revival Team Evan. T. Vanlalruata leh a rawngbawlpui te chuan Sept ni 14 atanga 22 chhung Sumsuih Bial Lungseiah rawngbawlna an nei ang.
——-
Music Festival :
Sept ni 21-22 chhung hian N. Mizoram District Music Sub committee buatsaihin Dawrpui Multipurpose Hall ah Music Festival hman mek a ni.
Festival hi Sept 21, Inrinni chawhma dar 10:30 ah tan a ni a, hawnna hla District PYD Choir ten mawi takin an rem a, District PYD President Evan F. Lalngaihawma’n hunserh hmangin
Bro Bro Albert C. Lalfakawma leh Sis Lallawmzuali Fanai ten an host.
Session khatnaah District chhunga Bial Zaipawl, malzai, Piano Solo, Beat Group, Group Singing, Male voice te bakah, Bro Johny Lallawmkima hnen atangin Musical Instrument lama hmasawnna tih thupuia hmangin thutawi ngaihthlak niin Session hnihnaah T. Upa R. Lalthanpuia hnen atangin “Pathian fak nan a zai leh rimawi pawimawhna” tih thupuia hmangin thutawi ngaihthlak a ni bawk.
Zan lamah Bro Zairemmawia’n hun kaihruaiin Zemabawk Bial, Thenzawl Bial, Bazar Bial, Maubawk Bial, North Mizoram District PYD Choir, Lunglei District PYD Choir leh Pentecostal Choir ten zaia rawngbawlna an nei a, malzai a zai mi 8 awmin Male Voice, Beat Group ten items an nei bawk.
Upa C. Lalnunmawia hnen atangin “ Zaipawl hlutna leh pawimawhna” tih thupuia hmangin thutawi ngaihthlak a ni a, Skit Dinthar Bial ten an entir bawk.
Pathianni zing, chhun leh zan hmang hian N. Mizoram District Hqrs Kohhran Biak inah Revival Programme a hun hman chhunzawm tur niin Aizawl East District PYD President Rev. R. Laltlankima Speaker atan an hmang dawn a ni.
Facebook