UPCNEINEWSSERVICE_18 SEPTEMBER 2026
HRUAITUTE PROGRAM
General Superintendent Rev. Zohmingthanzama leh General Treasurer Rev. R. Laichhingpuia te chuan September ni 19-20, 2026 chhung hian General Sunday School Board, Lawngtlai West District hmuna neih turah an telpui ang.
General Secretary Rev. Lalmalsawma Sailo chuan September ni 19-20, 2026 chhung hian Vairengte IOC Kohhran, North Mizoram District ten Silver Jubilee an hman turah telpuiin rawngbawlna a nei ang.
General Missions Director Rev. C. Vanlalena chuan September ni 20, 2026 hian Bethlehem Kohhran, Aizawl East District ten Chhungkaw Zan an buatsaihah telin thusawi rawngbawlna a nei ang.
General Sunday School Director Rev. Biaksangzuala chuan September ni 19-20, 2026 chhung hian General Sunday School Board, Lawngtlai West District a neih chu a kaihruai ang.
----------
LITERATURE & PUBLICATION BOARD
September ni 17, 2026 Ningani khan UPC North East India Literature & Publication Board chu General Headquarters Office, Mualpui Salem Veng, Aizawl-ah neih a ni.
Literature & Publication Board hian Kohhran Hla Bu thar '8th Edition' kum 2027 a Kohhran mipuite hman theih tur siamin a bawhzui mek a, Hla bu atanga paih ngai leh belh ngai bakah siamrem ngai hrang hrangte siam remin ngawrh takin Edit hna hi thawh mek a ni. Tin, Kohhran hla bu a hla dah belh duh leh rawtna nei duh tan Literature & Publication Board chuan September, 2026 chhung hun a hawng bawk.
----------
GENERAL SUNDAY SCHOOL BOARD
September ni 19-20, 2026 chhung khan General Sunday School Board, Lawngtai West District, Bazar Veng Kohhran Biak In ah neih a ni.
Sunday School Board hi Director, Rev. Biaksangzuala kaihhruaina hnuaiah neih a ni a, General Superintendent leh Treasurer te chuan telpuiin, District hrang hrangin Board member an kal tha hle. An rorel langsar zingah Kum 2027 chhunga General Sunday School Budget ruahman a ni a; tin, General Sunday School Kumpuan 'Thianghlimna - Chhungkaw chhanhimna kawngah' tih chu a bawhzui dan turte rel a ni bawk.
----------
MISSIONARY DAY
September ni 25, 2026 Zirtawpni hi UPC North East India Kohhran ni pawimawh Missionary Day ni a, he mi ni hian Kohhran chuan Program-te siamin, urhsun taka hman thin a ni a, thawhlawm leh thilpekte lakhawm in Missions rawngbawlna atana hman thin a ni.
UPC North East India rorelna sang Executive Board chuan Kum 1945, Septermber ni 25 Khawvel pumpuia UPC din ni chu Missionry Day atan hman nise tiin a rel a, Kum 1976 atang khan kum tin hman niin kumin hi Missionary Day vawi 51-na a ni.
General Missions Director chuan hemi ni pual hian Missionary Day Thuchah siamin tualchhung kohhran hrang hranga chhiar chhuah turin sem a ni bawk.
North East India UPC Kohhran hian tun dinhmunah Mizoram chhung leh State pawnah nen Missionary 260 vel a ruai mek a, Mizoram chhung hmun hrang hrang bakah state pawnah heng : Assam, Upper Assam & East Arunachal, Dimapur, Arunachal, N. Bengal, Sikkim, Bihar & Jharkhand, Odisha, Bhutan, Andaman & Nikobar Island leh Diphu-ah te hian rawngbawlna hna a thawk mek a ni.
----------
AIZAWL CITY PYD PRAISE & WORSHIP
Aizawl City PYD Co-Ordination Committee chuan September ni 20, 2026 Pathianni zan hian Praise & Worship an buatsaih dawn.
He hun hi North Mizoram District Headquarters Biak In, Tuikhuahthlang, Aizawlah neih a ni dawn a; Evan. F. Malsawmdawngliana, Chairman, City PYD Co-Ordination Committee chuan a kaihruai anga, General PYD President Rev. C. Lalmalsawma hnen atangin thuchah ngaihthlak tur niin; General Choir, Pentecostal Choir leh NMD Choir te hnen atangin Pathian fakna hla ngaihthlak a ni anga. General Musician te kaihhruaina hnuaiah zaihona a tam thei ang ber neih a ni bawk ang.
----------
----------
AIZAWL EAST DISTRICT
Bial Sunday School Inkhawmpui:
Aizawl East District chhunga Bial hrang hrangte chuan September 11 atanga 13 chhung khan Bial Sunday School Inkhawmpui hlawhtling taka hman a ni.
Inkhawmpui hi Zirtawp zan atang khan hman tan niin Bial hrang hrang te chuan Inrinni khan mahni bial chhung inawpna leh District-a lut tur agenda te ngaihtuahin rorel Inkhawm an hmang hlawm a, Bial thenkhat chuan Tualchhung Kohhran hrang hrang hnen atangin Report an ngaithla bawk.
Sunday School Inkhawmpui-ah hian Naupang lamin mal zai, thu leh thu inchhang, Recitation leh Group zai bakah Lengkhawm zai te a intihsiakna neiin Bial thenkhat-ah chuan Puitling lamin Lengkhawm zai leh Puitling Zirlaibu atangin Quiz intihsiakna an nei ve bawk a ni.
Bial thenkhat chuan intihsiakna nei lovin meet anga hun hman a ni a, Naupang lam ten Item chi hrang hrang hmangin Pathian fakna an nei thin a ni.
Rev Rosanga Kawlni, District Sunday School Director chuan a Bial vawn mek Bazar Bial-ah a hmang a, Secretary Evan. Lalnunzira’n Inrinni zan khan Bethlehem Bial a hmanpui bawk a ni.
----------
Literature meeting neih a ni:
September 15 & 16 chhung khan District Office-ah Literature & Publication Board thutkhawm neih a ni. Rev. H. Lalropuia, Chairman chuan kaihruaiin member an telkim thawkhat a; he hunah hian Kum 2027 Nilai zan thupui zirtur endikna neih a ni.
Kum 2027 Nilai zan thupui bu atan hian “Ringtu Nun” tih niin Rinawmna, Taihmakna chungchang te, Tawrhna chungchang, Sual khawih leh a nghawng chungchang te bakah ringtu nun thianghlim leh a rah bakah Pathian chibai bukna chungchang te leh Tlawmngaihna chungchang zir tura ruahman a ni. Nilai zan thupui 2027 hi mi hrang hrang mi 7 ziak zir tur a ni dawn a ni.
----------
District Missions Conference:
October 23 atanga 25 chhunga Thingsulthliah Bial ten District Missions Conference an thlen tur atan chak taka inbuatsaihna kalpui mek a ni.
District Missions Conference hi Thingsulthliah Field-ah hman tura ruahman niin pandal hi ft 100 x ft 80-a liana sak tura ruahman niin rorelna hi Community Hall-ah nei turin ruahmanna an siam bawk. Thingsulthliah Field-ah hian Kohhran dangin inkhawmpui an hman ve dawn tho avangin pandal hi la sak ni chiah lo mahse engkim ruahmanna peih fel a ni tawh thung a, remchang hmasa berah pandal hi sak a ni ang.
Kumin District Missions Conference-ah hian thupui hranpa awm lovin mi hrang hrang ten Thusawi rawngbawlna an nei dawn a, District Department hrang hrangte chu thusawi tawi hun pek vek an ni bawk. October 24, Inrinni hian rorel lo tan pandal-ah inkhawm a awm dawn a ni. Inkhawm apiangin mal zai bakah Bial zaipawl ten Pathian fak hla an sa thin dawn a ni.
----------
Zirlai ti tha chawimawina hun hmang:
September 19, Inrinni zan khan District PYD hnuaia Education Sub- Committee te buatsaihin District chhunga zirlai ti tha chawimawina hun an hmang.
He hun hi District Hqrs. Biak inah hman niin Inkhawm hi Bro. Nelson Vanlalneiha, Chairman in a kaihruai a; Bro. Lalrinchhana Zote hnen atangin thusawi ngaihthlak niin Zirlai ti tha chawimawi turte leh an chhungte an tel a ni.
----------
Mi thar:
September 6, Pathianni khan Champhai Bethel Headquarters Kohhrana lawi turin member 3 sengluh an ni a, September 16, Nilai zan khan member 3 bawk sengluh leh an ni. Rev. E. Vanlalpeka Zote, Bialtu Pastor chuan sengluhna neiin nau 1 a hlan nghal bawk.
September 16, Nilai zan khan Mualpui Bial, ITI Kohhranah Mi thar 4 chu Bialtu Pastor R Lalfamkima'n sengluhna a nei.
September 13, Pathianni khan Mualpui Bial, Salem Kohhrana lawi turin chhungkaw khat, Member 3 leh kan kohhran ni sa 1, an vaiin mi 4 chu Upa C. Zahnuna, Church Board Chairman in sengluhna leh lawmluhna a nei. Rev. C. Mawizuala'n nau 2 a hlan nghal bawk.
September 13, Pathianni khan Zuangtui Vengthar kohhran ( Thuampui bial) member ni turin mithar 2 sengluh an ni. Zuangtui Vengthar ah hian Evan Lalchhuanawma District Missions Evangelist in rawngbawlna a nei mek.
----------
Hruaitute Programme:
Rev. H. Lalropuia, District Secretary chuan September 20, Pathianni hmanga Serchhip Town PYD intawhkhawm, Serchhip Dinthar Biakina hman mekah Speaker-ah tangin rawngbawlna a nei.
Rev Rosanga Kawlni, District Sunday School Director chuan General Sunday School Board nei turin September 19, Inrinni khan Lawngtlai a pan a, Pathianni hun hmangin ruahmanna ang chuan September 21, Thawhtanni-ah Aizawl a let leh ang.
----------
----------
NORTH MIZORAM DISTRICT
District LAD Executive Committee Vawi 140-na Rorel
September ni 15, chawhnu Dar 1:00 khan North Mizoram District LAD te chuan Executive Committee vawi 140-na an nei a. District Hruaitu pathum ten an telpui.
He rorelna-ah hian district hmalakna pawimawh tak takte sawiho a ni a, Rorel ṭhenkhatte:
1. District LAD Conference programme tur duan fel a ni.
2. Conference Official Agenda tur sawiho leh rel fel a ni.
3. Sikkim Missions Field-a biak in hawnga kal dan tur chungchang sawiho leh rel a ni bawk.
----------
Rev. Lalremtluanga Pension Thlahna hun hmang
September ni 10, 2026 khan Headquarters Biak In-ah Rev. Lalremtluanga Pension Thlahna Programme hman a ni.
Programme hi chawhma dar 12:00-ah ṭan a ni a, Rev. K. Lalduhsanga, District Superintendent chu Chairman niin, Rev. C. Lalramthanga chuan tawngtaina hmangin programme a hawng a.
Rev. C. Lalthantluanga, District Secretary chuan thusawiin, pension thlahna programme-ah hian Headquarters Bial leh Department hrang hrangte an telin thlana thusawi ngaihthlak a ni bawk.
Rev. Lalremtluanga chu pension dawn tak avangin Diatrict Board in alo rel angin Rev. K. Lalduhsanga, District Superintendent chu Headquarters Bialtu Pastor ni turin charge a hlan nghal a ni.
----------
BIAL SUNDAY SCHOOL INKHAWMPUI HMANG
North Mizoram District chhunga Bial hrang hrangte chuan September 11 atanga 13 chhung khan Bial Sunday School Inkhawmpui an hmang.
Bial tam zawk chuan Inkhawmpui hi Zirtawp zan atang khan an hmang tan a, Inrinni chhunah mahni bial chhung inawpna leh District-a lut tur agenda te ngaihtuahin rorel Inkhawm an hmang hlawm a ni.
Sunday School Inkhawmpui-ah hian Naupang lamin mal zai, thu leh thu inchhang, Recitation leh Group zai, Quiz bakah Lengkhawm zai te a intihsiakna neiin Bial thenkhat-ah chuan Puitling lamin Lengkhawm zai leh Puitling Zirlaibu atangin Quiz intihsiakna an nei bawk.
----------
PG HIGHER SECONDARY SCHOOL AH CAMPAIGN NEI
September 17, 2026(Ningani) khan Health Department hmalakna in min Bialtu Health Sub-Centre hruaituten Malaria leh Dengue chungchanga hriat tur pawimawh te zirtirin Campaign an nei.
Campaigner te hian Malaria leh Dengue laka inven dan tur leh a hlauhawm zia te, fimkhur a tul ziate sawiin zirtirna an pe a ni.
----------
----------
LUNGLEI DISTRICT
H.A., C. LALHUNTHANGI PENSION THLAH A NI.
September ni 11, Zirtawpni chawhnu dar 2:00 khan Lunglei District UPC Office-a Head Assistant (HA) nilai Sis. C. Lalhunthangi chu Superannuation Pensiona a chhuah a lo hun tak avangin, Office Staff Welfare ten, amah thlahna hun hman a ni.
Pension thlahna hi Office-ah hman a ni a. District Superintendent, Rev C. Lalrintluanga'n programme a kaihruai a. Rev C. Lalhriatpuia'n hunserh a hmang thung. Rev K. Vanlalhruaia'n thilpek leh ngaihhruihna a hlan a, Rev Pc Lalfakawma'n a chanchin tlangpui leh a service report a pe bawk.
Staff ten ngaihhruihna thilpek pein, Sis Mahunin Thutawi sawina hun a nei a. Rev C. Lalrintluanga a ṭawngṭai a, pension thlahna chawhlui kil ho a ni. Sis C. Lalhunthangi hi a fate pahnih C. Lalhmingmawii leh C. Lalhruaizela te'n an rawn ṭawiawm thei a ni.
Pension thlah tak Sis. C. Lalhunthangi hian kum 1992 khan LDC niin Officeah a thawk ṭan a. Kum 2021 ah UCD-ah kaiin. Kum 2026 Aprilah khan Head Assistant atan ruat a ni a, a pension thlengin he hna hi a chelh a. Kum 34 chhung a service a ni.
----------
ṬAWIPUI SECTION PYD TEN THISEN AN PE
September ni 12, 2026 (Inrinni) khan Ṭawipui Section PYD te chuan Civil Hospital Blood Bank a dah tur in Thisen Unit 42 an pe.
Civil Hospital Blood Bank a thawk ten Mualcheng South h kal chilhin, Sunday School hall ah hun hman a ni a Rbt H.Lalnuntluanga, Vice President PYD Ṭawipui Section in kaihruaiin, Rev R.Vanlalenga, Bialtu Pastor in hunserh a hmang a. Blood bank Officer Dr.Vanlallawma hnen aṭangin thisen pek dan leh a pawimawhna te ngaihthlak a ni bawk. Ṭawpui bial PYD atang hian Mipa-34 leh Hmeichhia-8 in thisen an pe thei a ni..
----------
PUKPUI LOCAL RAWNGBAWLTU SEMINAR NEIH A NI
September ni 12 Inrinni khan Pukpui Local a Rawngbawltute pualin Seminar neih a ni a, Resource Personah Rev K. Vanlalhruaia, District Treasurer, UPC, Lunglei District chu hman a ni.
Seminar hi ETC Pukpui humnah neih a ni a, Chawhma hun hi Bialtu Pastor Rev H. Rothuama’n a kaihruai a, 'Rawngbawltu nunphung tur' tih thupui zirho a ni a. Chawhnu hun chu Rev Pc Nghakliana, Local Church Board Chairman-in kaihruaiin, 'Rawngbawltu mawhphurna, Kohhranah' tih zirho a ni thung. Tlaiah chawhlui kil ho nghal a ni bawk. Pukpui local-ah hian rawngbawltu 30 an awm mek a ni.
----------
PANGZAWL SECTION PCD RALLY NEIH A NI
September ni 11-13, 2026 chhung khan Pangzawl Section te chuan Bungtlang Local Biak Inah PCD Rally an nei.
Speaker atan Evan Obadia Lalneihtluanga, Rephidim Revival Team chu hman a ni a, Bial chhunga naupang mi 70 kalin, nu leh paten an tawiawm bawk. Inelna hrang hrang neiin, Khuanghlum local chu a pumpuiah pakhatna niin, Bungtlang Local chu Pahnihna an ni a. Pathumna, Rawpui local an ni thung.
Inrinni chhunah Outdoor programme neiin, Inelna hrang hrang neih a ni a, Pathianni chawhnuah Indoor Programme hmangin inelna neih chhunzawm a ni bawk. Pathianni Zan inkhawmah Naupangte pualin Thlarau Thianghlim dilsak a niin thlarau thianghlim dawng thar mi engemaw zat an awm a ni.
----------
SOCIAL WORK DAY HMANNA TUR EN
Ni 14, September Thawhtanni khan Lunglei Town Area PYD ten Ni 2 October a Social Work Day an hmanna tur hmun, Nghasih Lui a hmunah en a ni.
District PYD Board-in a lo rel angin Town Area PYD ten a huhovin Social Work Day hi hman tura ruahman a niin, a hmun atan Nghasih lui niin, Nghasih luia bawlhhlawh awm te thenfai hnatlang neih tur a ni. Organising Chairman, Evan R. Lalsanglura, Upa A. Lalchhuanawma, President Headquarters Local PYD leh Pennet Lunglei Editor te a hmunah hian kalin, Nghasih luia bawlhhlawh awm dan leh hnatlang thawh dan tur an en a ni.
Nghasih lui hi Lunglei khawpui atanga lui luang pahnih Sipai lui leh Aikha lu infinin a siam a ni a. Hetah hian kan bawlhhlawh tam tak a luanglut a. Nghasih lui kalzel hian Lunglei tui lakna Tlawng lui chu a fin leh avangin, thenfai a tul tiin hma lak a ni dawn a ni. Nghasih lui tawntirah hian bawlhhlawh a tamin, thenfai ngai a tam a, Social Work Day-ah pawh local hrang hrang thahnem ngai taka thawk chhuak turin PYD hruaitute chuan min beisei hle a ni. Social Work Day pual hian Town Area PYD Local hrang hrang ten sum an thawhkhawm a ni.
----------
DISTRICT HRUAITUTE HUN HMAN DAN
District Superintendent Rev C. Lalrintluanga chuan Pathianni zing inkhawm Zotlang localah hmangin, Pathian thu a sawi bakah Nau a hlan nghal bawk. Zan lamah a bial enkawl mek Theiriat localah hun a hmang thung.
District Treasurer Rev K. Vanlalhruaia chuan Inrinni chhuna Pukpui local Rawngbawltu Seminar a hman pui hnuaha Pathianni chhun leh zan hun a hmang nghal bawk.
District Missions Director, Rev C. Lalhriatpuia chuan Missions campaign neiin Thingsai bial a tlawh a. District Mission Secretary Evan Saithangpuia leh Treasurer Evan F. Lalhmangaiha ten an ṭawiawm. Pathianni zing hi Thingsai localah Evan F. Lalhmangaihan hun hmangin Rev. C. Lalhriatpuia leh Evan Saithangpuia te Bualpui H local-ah an kal thung.
----------
----------
CHHIMTUIPUI DISTRICT
DISTRICT PYD TEN DIST LAD TAILORING TRAINING CENTER TLAWH
District PYD board in a rel angin Dt 8.9.26 Thawhlehni khan District PYD ten Dist LAD Tailoring Training Center an tlawh.
He hun hi Rbt C Lianhmingthanga, Dist PYD Secretary chuan a kaihruai a, Pastor Robert B Lalnunsiama T, Dist PYD President in fuihna leh ṭawngṭaina a neiin Dist PYD te hian Tailoring Training Center ṭanpui nan Rs.10,000/- an hlan a ni.
Dist LAD Tailoring Training Center aṭang hian mi 20 (Batch 2) in an lo zirchhuak tawh a,tunah hian mi 9 in an zir mek bawk.
----------
KOHHRAN MOTOR THAR HLANNA HUN HMAN A NI
September ni 15, 2026 Thawhlehni khan Kohhran motor thar Bolero Neo (N10 Optional) chu Pathian hnenah hlanna hunserh hman a ni.
Motor hlanna hun hi Rev Kholy Hlychho, Dist. Supt in a kaihruai a, Dist. Treasurer in Motor thar chung chang report tawi a pein, tawngtai rualna neiin motor thar hi Pathian hnenah hlanna an nei a ni.
----------
MITHAR LAWMLUT
September ni 6, 2026 Pathianni khan Evan T Lalhmingthanga'n Riasika Local Church a lawi turin ECM Kohhran aṭang member pakhat a lawmlut.
----------
----------