SOCIAL WORK DAY :
Oct 2, Nilaini kha North East India UPC Kohhran thalai pawl Pentecostal Youth Department (PYD) Social Work Day a ni a, India hmarchhak pum huapa hman a ni.
Pentecost Kohhran thlai pawl rorelna sang; General PYD Conference rorelna chuan Kum 1999 khan Social Work Day neih nise tiin a pass a, Kum 2000 atang khan hman tan nghal niin kum tin Oct ni 2-hi India hmarchhak pum huapin Vantlang tana hna tha thawhna ni atana hman chhoh a lo ni ta a ni.
Social work day ah hian thinsen pek, Damdawiina damlo tana ei tur sem, Vantlang hmun pawimawh Community hall, Damdawi in leh sub center tih fai, Vantlang inthiarna tur siam leh tihfai, khawlai thenfai leh tuiluankawr tihfai bakah thungphun hnatlang te neih thin a ni a. Khawpui lian deuhah chuan sawrkar hotu lian te nena thawk hova, an mamawh anga hna thawh chang a awm bawk.
Kumin hian Aizawl City PYD chuan Save Chite Lui Co Ordination Committee (SCLCC) te nena ruahmanna siam hovin Chite lui leh a chhehvel tihfai hna an thawk a, Aizawl khawpui atangin PYD member 400 chuang an thawkchhuak. Chawhma dar 10:00 ah Chite Mini Sports Complex-ah Evan. Vanlalpeka Fanai chuan hunserh hmangin, Save Chite Lui Co Ordination Committee (SCLCC) Joint Secretary Dr. H. Lalruatsanga’n Chite lui kam leh a chhehfel vawn fai a nih dan leh hmalakna report hrang hrang pein Pu Robert Romawia Royte, Minister of State chuan hnatlang hawnna a nei.
Chite lui kai leh a chhehvela hnatlannaa telve Pu Robert Romawia Royte,Sports Minister leh Chite Area bialtu MLA nibawk chuan Save Chite Lui Coordination Committee, Aizawl City PYD te leh NSS ten Chite Lui thian fai tura hnatlang an nei chu lawmawm a tih thusawiin Zoramah ngei pawh lui tam tak a kang mek a, mipuiin lui hlutna hre thara humhalh tura tanlak tul atih thu leh Lui tibawlhhlawha hriselna khawih pawitu plastics te hnualsuat a tul tawh thu a sawi a. Aizawl East-II bial aiawhin he biala thil tha tiduh mimal leh pawl reng reng chu lo tawiawm an inhuam thu a sawi bawk. Tourism Minister nibawk Pu Robert Romawia Royte chuan hnatlangte leh Mipuite Anthurium Festval ni 4&5 October 2019 a Reiek Tourist Resorts a tel vek turin a sawm a, PYD te hnatlang thingpui in nan Sports Minister hian Rs 10,000/- a pe a ni.
Sports Minister hian PYD te hnatlanna baka hmun hniha a NSS Volunteers te hnatlanna Chite Lui Ramthar Kai leh Chite Lui Bethlehem Vengthlang Kai tepawh a tlawh kual a ni.
Lunglei khawpui chhungah chuan thalaiten Sobji Bazar tihfai hna bakah, Lunglei khawpui chhunga Damdawiinah thingpui leh a hmeh semin an fehchhuak a.
Lawngtlai town PYD ten Lawngtlai District Civil Hospital ah heni pual hian thisen pein; Mipa 20 leh Hmeichhia 4 ten a vaiin thisen unit 24 an pe a. Siaha khawpuichhungah pawh thisen pek runpui buatsaih niin, a mamawh apiangte hman turin thisen unit 29 an pe bawk.
Serchhip-ah chuan Serchhip Bial PYD te chuan bial huapa hmangin Complex Field tihfai hna an thawk a, Serchhip Bial PYD te hian October 1, Thawhlehni khan Social Work Day denchhen hian Serchhip Damdawiin a hman turin Thisen Unit 23, mipa 12 leh hmeichhia 11 ten an lo pe tawh a ni.
Khawzawl-ah chuan Khawzawl bial PYD huaihawtin hman a ni a, zingkarah Khawzawl Damdawiina damlo awmte tan Artui leh bawnghnute an sem bakah poor fund-ah Rs 1000 an hlan a, Khawzawl-a Social Work Day Programme hi Gen.PYD Treasurer Rev C.Lalmalsawma chuan a hmanpui a ni.
N.Vanlaiphai-ah chuan Joint PYD huaihawta hman niin YMA Gen.Conference hmanna tur pandal sak mek chu hnatlangin an sakpui.
Kolasib, Thenzawl leh hmun dang dangah pawh khawpui huapa hman engemaw zat an awm a. Thingtlang lam bial tamzawk chuan khawchhung thenfai, vantlang hmun hma chei that leh tihfai hna thawkin nilengin hun an hmang a ni.
——-
PENNET MEETING :
Oct 1, Thawhlehni khan Kohhran media rawngbawlna kawnga committee pawimawh Pentecostal Network, (Pennet) chuan General Hqrs Office, Mualpui Salem veng Aizawlah meeting an nei.
Meeting-ah hian kum 2020 media budget atan Rs. Nuai 13 leh sing li an ruahman a, Zonet rinna channel-ah programme neih belh dan kawng zawn nise tih te, Thla tin 2nd sunday apiangin News zawhah Missions Department puala hun dah nise tih te, News reader tur ngaihtuah belh nise tih te leh kum thar atana hmalakna tur hrang hrang an ngaihtuah bawk.
Media Secretary Bro. R. Lalbiakfela’n Kum 2019 chhunga media hmalakna report hrang hrang a pe a, Treasurer Bro. C. Lalrammawia hnen atangin sum leh pai report ngaihthlak a ni bawk. Meeting hi Media Chairman Rev. R. Lalhawia’n a kaihruai a ni.
———
General Hruaitute Programme :
United States of America (USA)-a UPCI General Conference a hmanpui hnuin General Suptd Rev. Lalmalsawma Sailo chuan hruaitu liante kawmin America ah hun ala hmang a, Oct 9, Nilainiah Mizoram thleng turin ruahmanna a siam.
General Treasurer Rev. Zohmingthanzama chuan Lengpui Bial Missions Department Conference, Lengpui Kohhran Biak ina neih mekah speaker-ah tangin rawngbawlna a nei.
General Missions Director Rev. R. Lalhawia leh General Missions Secretary Rev. V.L Tluanga sinate te chuan Kawnpui Bial Missions Department Conference Hortoki-a neih mekah Speaker-ah tangin rawngbawlna an nei.
General LAD Secretary Sis. Lalramthangi B/W, Treasurer Sis. F. Rohlupuii te chuan Oct 3, Ningani khan General LAD Conference neihna tur Kolasib Khuangpuilam tlawhin hun an hmang a, Conference thlenna tur pandal te enpuiin Organising hruaitute nen hun an hmang. General LAD conference hi Oct ni 11-13 chhung hian neih tura ruahman a ni.
———
Aizawl East District.
September 27 atanga 29 chhung khan Aizawl East District chhunga Bial hrang hrangte chuan Bial Missions Inkhawmpui an hmang.
He inkhawmpui-ah hian Inrinni khan rorel inkhawm neih a ni a, Bial chhung inawpna leh District-a lut turte ngaihtuahna an nei a, Bial thenkhat chuan Missionary chawm dan tur chungchangte an ngaihtuah a ni. Bial Missions Inkhawmpui-ah hian Bial thenkhat chuan Thupui hranpa leh Speaker bik neiin hun an hmang a, Bial thenkhatah chuan Speaker hranpa nei lovin Bial hruaitu leh Bialtu Pastor te hnen atangin thuchah an ngaithla thin a ni. Bial Missions Inkhawmpui hi District Missions hruaitute leh Kohhranpui hruaitute chuan hetiang hian hmun hrang hrangah an hmanpui a ni:
Director, Rev R.Lianzama chuan Champhai Bethel bial-ah a hmanga
Secretary, Evan Lalramzauva chuan Khawzawl Bial-ah hmangin
Treasurer, Evan Lalthuthlunga chuan Darlawn Bial-ah a hmanpui a
Rev Rosanga Kawlni, District Superintendent chuan Thingsulthliah bial-ah hmangin
Rev Biaksangzuala, District Secretary chuan Khawhai bial-ah a hmang a
Rev Vanlalfela Ramtiam, District Treasurer chuan Bazar bial a hmanpui bawk a ni.
Bial hrang hrangte hman dan tlangpui lo tarlang ila:
North Vanlaiphai Bial te chuan Khawhalilung Bunghmunah Bial Missions Inkhawmpui vawi 19-na an hmang a, Bialtu Pastor H.Lalropuia chuan hawnna neiin Thupui-ah “Krista aia palai” tih II Korinth 5:20 thu hmangin Speaker-ah Bialtu Pastor H.Lalropuia an hmang a ni. North Vanlaiphai Bial te hian Kum 2020-ah Rawlkhang Kohhranah Inkhawmpui an hmang leh dawn a ni. Inrinni khan Khawlailung Kohhran ten Pathian chawimawina neiin Kohhran ten hlim takin hun an hmang a ni.
Thingsulthliah Bial te chuan “i ram lo thleng rawh se” Matthaia 6:10 tih thupuia hmangin Thingsulthliah hmunah Inkhawmpui vawi 26-na an hmang a, Speaker-ah District Superintendent, Rev Rosanga Kawlni an hmang a ni. Pathianni zan inkhawmah khan Speaker hian inkhawm zawng zawngte hriakthih rawngbawlna neiin Kohhran ten hlim takin hun an hmang a ni. Inkhawm neih chhung hian Sis Lalrinhlui, Bial LAD Zaipawl bakah bial chhunga zaimi te hnen atangin fak hla ngaihthlak thin a ni. Report-a a lan danin Thingsulthliah bial chhungah hian mithar sawmhnih leh pakhar Kohhranah sengluh an ni tawh a ni.
Serchhip Bial te chuan Bial Hqrs. Serchhip Biakinpui hmunah Bial Missions Inkhawmpui vawi 42-na hlawhtling takin an hmang a, Thupui-ah “i puan in hmun chu zauh rawh” Isaia 54:2 thu hmangin Speaker-ah Evan Lalchhuanmawia Sailo an hmang a ni.
Upper Republic Bial te chuan Bial Missions Inkhawmpui vawi 24-na, Republic Vengthlang Biakin-ah hmangin Thupui-ah “Chhandamna famkim” tih an hmang a ni. Speaker bik nei lovin Bial hruaituten thusawina an nei thin a, Bialtu Pastor in Pathianni chawhnu khan Sacrament a buatsaih chu an kilho a ni.
Bazar Bial te chuan Bial Hqrs. Kohhran Bazar hmunah Bial Missions Inkhawmpui vawi 26-na hlim takin an hmang a, Thupui-ah “I pianna ramah haw leh tawh rawh” Genesis 31:13 thu hmangin Speaker-ah Evan R.Vanchhunga, District Fulltime Evangelist an hmang a ni. Rev R.Pahlira (Rtd) chuan hawnna neiin Pathianni Chawhma Inkhawmah Rev Vanlalfela Ramtiam, District Treasurer hnen atangin thuchah an ngaithla bawk.
Bethlehem Bial te chuan Bethlehem Kohhranah Bial Missions Inkhawmpui vawi 37-na hlim takin an hmang a, Speaker-ah Evan PC.Lalrokima, General Missions Treasurer chu hmangin Thupui-ah “Chanchintha hi hril rawh u” Marka 16:15 thu an hmang a ni. Bethlehem Bial te hian General hnuaiah Missionary 18 chawm turin ruahmanna an siam mek a ni.
Bawngkawn Bial te chuan Bial Missions Inkhawmpui vawi 24-na, Ramhlun Vengthar Biakin-ah hlawhtling takin an hmang a, Rev R.Lalthanzuala chuan hawnna neiin Thupui hranpa nei lovin Speaker Evan H.Lalremhlua hnen atangin thuchah an ngaithla thin a ni.
Champhai Bethel Bial te chuan Melbuk hmunah Bial Missions Inkhawmpui vawi 12-na hlim takin an hmang a, Thupui-ah “Chhanchhuak thuai rawh” Thufingte 24: 11 thu hmangin Speaker, Rev R.Lianzama, District Missions Director hnen atangin thuchah an ngaithla thin a sis Lalhruaitluangi zemabawk hnen a tang in Pathian fakhla ngaihthlak thin ani bawk.. September 30, Thawhtanni khan Pathian chawimawina neih chhunzawm a ni bawk.
Khawzawl Bial te chuan Hmuncheng hmunah Bial Missions Inkhawmpui vawi 48-na hlim takin an hmang a, Thupui-ah “Nang malsawmna ni ang che” Genesis 12:2 thu an hmang a ni. Khawzawl Bial-ah hian Evan Lalramzauva, District Missions Secretary chuan a hmanpui a ni.
Rabung bial te pawhin Rabung hmunah Bial Missions Inkhawmpui vawi 37-na hlim takin an hmang a, Thupui hranpa nei lovin Speaker-ah Evan Dr.H.Lalrinliana an hmang a ni.
Hnahlan Bial te chuan Hanhlan Darnam Kohhranah Bial Missions Inkhawmpui vawi 40-na hlim takin an hmang a, Thupui-ah “Chanchintha hi hril rawh u” Marka 16:15 thu an hmang a ni.
Serchhip Dinthar Bial te chuan Hriangtlang hmunah Bial Missions Inkhawmpui vawi 18-na hlim takin an hmang a, Speaker-ah Evan T.Vanlalruata an hmang a ni.
Kawlkulh Bial te chuan Kawlkulh Venglai Kohhran ah Bial Missions Inkhawmpui vawi 33-na hlim takin an hmang a, Speaker-ah Evan H.Lalrinawma an hmang a ni.
Zemabawk Bial te chuan Bial Missions Inkhawmpui vawi 31-na Tuirial hmunah hlim takin an hmang a, Thupui hranpa nei lovin Speaker-ah Sis Pc.Lalhmangaihzuali B/W Maubawk an hmang a ni.
Khawruhlian Bial te chuan Kepran hmunah Bial Missions Inkhawmpui vawi 34-na hlim takin an hmang a ni.
Khawhai Bial te pawhin Khawhai hmunah Bial Missions Inkhawmpui vawi 47-na hlim takin an hmang a, Rev Biaksangzuala, District Secretary chuan a hmanpui a ni.
Champhai Bial te chuan Champhai Venglai Kohhranah Bial Missions Inkhawmpui vawi 43-na hlim takin an hmang a, Evan T.Vanlaldika chuan hawnna neiin Thupui hranpa leh Speaker bik nei lovin mi hrang hrang ten thusawina an nei thin a ni. Champhai Bial Missions Inkhawmpui hi Rev R.Lalhawia, General Missions Director chuan a hmanpui a ni.
Thuampui Bial te chuan Bial Missions Inkhawmpui vawi 11-na Falkland Kohhranah hlim takin an hmang a, Thupui-ah “Kei heta hi ka awm, min tir ta che” Isaia 9:6 thu hmangin Speaker-ah Evan HMS Dawngkima an hmang a ni. Rev Darchhawna chuan hlanna neiin Kum 2020-ah Muanna Veng Kohhranah Inkhawmpui an hmang leh dawn a ni.
Ngopa Bial te chuan Mimbung hmunah Bial Missions Inkhawmpui vawi 25-na hlim takin an hmang a, T.Upa H.Vungchhawna chuan hawnna neiin Thupui-ah “Pathian thuruk enkawltu” I Korinth 4:1 thu hmangin Bialtu Pastor K.Vanlalhlimpuia chu Speaker-ah an hmang a ni. Ngopa Bial te hian Damaska Kohhranah Kum 2020-ah inkhawmpui an hmang leh ang.
——–
September 21, Inrinni khan District Superintendent, Rev Rosanga Kawlni chuan Darlawn Bial, N.Serzawl Biakin sak thatna tur lungphum phumna leh S.S Hall hawnna a nei.
He hunah hian Kohhran member engemaw zat telin hlim takin hun an hmang a ni. Biakin hi a dung ft 36 leh a vang ft 21 a liana sak tura ruahman niin S.S Hall hi a dung ft 24 leh avang ft 12 a liana sak a ni bawk. District Superintendent, Rev Rosanga Kawlni hian September 21, Inrinni zan khan N.Serzawl Kohhrana hian mithar pakhat sengluhna a nei nghal a ni.
——–
Member thar :
September 22, Pathianni khan Khawbung bial, Khawbung Kohhrana lawi turin mithar 19 Kohhranah sengluh an ni. Bialtu Pastor HP Ramfangzauva chuan sengluhna neiin mithar te hi chhungkaw 3 niin puitling 14 leh naupang 5 an ni.
Khawzawl Bial ten Hmunchenga Bial Missions Inkhawmpui September 27 atanga 29 chhunga an hman-ah pawh mithar pahnih Kohhranah sengluh an ni.
September 29, Pathianni zan pawh khan Sakawrdai Bial, New Vervek Kohhrana lawi turin mithar paruk Bialtu Pastor K.Lalmuanpuia’n a senglut bawk.
——
Upper Republic PYD te chuan September 22, Pathianni Chawhnu leh zan khan Upper Republic Biakin-ah Sacrifice 2019 hlawhtling takin an hmang.
Pathianni Chawhnu khan Praise & Worship anga hun hmangin mi hrang hrang hnen atangin fuihna thu tha tak tak an ngaithla a, zan lamah Revival Programme in Pathian Thlarau Thianghlim awmpuina hnuaiah hlim takin hun an hmang a ni. Upper Republic PYD ten Sacrifice 2019 an hmanah hian Bawngkawn Bial zaipawl te hnen atangin sawm an nih angin fak hla ngaihthlak thin a ni a, Bial chhung atangin zaia rawngbawlna nei an awm bawk a ni.
——
Seminar buatsaih :
October 8, Thawhleh zan hian Aizawl East District PYD hnuaia Environment Protection Committee te buatsaihin Bawngkawn Kohhran Hall-ah Seminar neih a ni dawn.
He hunah hian Evan K.Lalmuansanga, Upper Republic Kohhran leh Association for Environment Protection (ASEP) President ni bawk chu Resource person-ah hman a ni ang. He hun hmang tur hian Aizawl khawpui chhunga Bial hrang hrangte chu sawm niin Pentecostal Choir leh Bawngkawn Bial Zaipawl te hnen atangin fak hla ngaihthlak a ni bawk ang.
——–
Social Work Day :
October 2, Nilaini kha North East India PYD ten vantlang tana thiltha tihna ni, Social Work Day a nih angin Aizawl East District chhunga Bial leh Tualchhung PYD hrang hrangte chuan hlawhtling takin an hmang a, Joint PYD anga hmang te, Bial leh Tualchhung Kohhran anga hmang an awm bawk a ni. Bial leh Tualchhung thenkhat chuan awmni khama an hman laiin thenkhat chuan zingkarah chauh an hmang thung a ni. District chhunga Bial leh Local hrang hrangte hman dan tlangpui kan hriattheih te lo tarlang ila:
E.Lungdar Bial, Leng PYD te pawhin Social Work Day hlawhtling taka hmangin khawlai dung tihfai hna an thawk a, member engemaw zat an thawkchhuak a ni.
Hnahlan Bial- Hnahlan-ah chuan Hnahlan khawchhung ten Joint-a hmangin member 90 zet an thawkchhuak a, chawhma lamah khawlai bawlhhlawh tihfai hna thawkin chawhnu lamah intihhlimna hun an hmang thung a ni. Vapar PYD te pawhin kawngba sam faiin chawhma lamah hna an thawk a, chawhnu-ah intihhlimna hun an hmang a ni.
Saitual Bial, N.Lungpher PYD te chuan khawchhung zunin chhia siamthat hna an thawh bakah rawng te hnawih tharin Social Work Day an hmang a ni.
Kawlkulh Bial- Kawlkulh Vengthar PYD te chuan zingkarah khawlai tihfai hna an thawk a, Venglai PYD ten vantlang tuikhur tifai hna an thawk bawk a ni.
Chhingchhip Bial, Chhiahtlang Vengpui PYD te chuan khawlai tihfai hna an thawk a, tuikawr thenfai hna an thawk bawk a ni.
Rabung Bial, Rabung PYD te chuan zingkarah vantlang hmun pawimawh tuikhur leh zunin tihfai hna an thawk a ni. Khualen PYd te pawhin zingkarah khawlai tihfai hna an thawk bawk a ni.
Thingsulthliah Bial, Thingsulthliah PYD te chuan nilengin Social Work Day an hmang a, Community Hall, Bazar, BNRGSK Hall leh Sub-Centre leh a chhehvel bakah khawlai dung thenfai hna an thawk a, tlai lamah a duh apiangte in turin theitui leh a hmeh khawdai-ah a thlawnin an sem bawk a ni.
———-
Camping :
Khawhai Bial, Riangtlei Kohhranah September 14 atanga 22 chhung khan Rev R.Sangthanga Speaker-a hmangin Camping hlawhlting taka neih a ni.
He hunah hian Campers engemaw zat lutin Kohhran hoten hlawkthlak an ti hle a ni. Camping boruak kal zelah September 24 khan Kohhrana mi thahnemngaite kaltlangin Pathian chawimawina neih a ni a, mi 9 in sual ngaihdamna baptisma an chang a ni. Khawhai Kohhranah pawh Missionary Day khan Bialtu Pastor E.Vanlalpeka Zote kutah mi 7 in sual ngaihdamna baptisma an chang bawk a ni.
———
Chawimawina :
September 30, Thawhtanni khan Bial Missions Inkhawmpui kal zelah Serchhip Dinthar Bial, Hraingtlang Kohhrana lawi Upa Pc.Lalrinawma te chhungkua chuan Pathian chawimawina an nei a, Kohhran ten hlim takin hun an hmang a ni.
September 30, Thawhtanni vek khan Bial Missions Inkhawmpui kal zelah Khawzawl Bial, Hmuncheng Kohhrana lawi Upa Sangluta te chhungkua chuan Pathian chawimawina an nei bawk a, Kohhran ten hlim takin hun an hmang a ni.
October 1, Thawhlehni pawh khan Upa Thanglianchhunga te chhungkua, North Vanlaiphai Bial, Khawlailung Bunghmun Kohhrana lawite chuan Pathian chawimawina neiin Kohhran ten hlim takin hun an hmang. He hunah hian Speaker-ah Rev H.Vanlalchhana an hmang a ni.
———
Revival Crusade :
Upper Republic Bial PYD te buatsaihin October 4, Zirtawp zan atang khan College Veng Kohhranah Revival Crusade hman mek a ni a, Pathianni zan hian a tiak ang. Speaker-ah Evan HK Lalhmangaiha, Home Missionary chu hman niin Bial zaipawl bakah Bial chhunga zaimite hnen atangin Pathian fak hla ngaihthlak thin a ni.
——–
Seminar :
October 5, Inrinni hian Hnahlan Bial, Hnahlan Hqrs. Biakin-ah Hnahlan bial chhunga rawngbawltute pualin Thianghlimna Seminar neih a ni. He hunah hian Rev C.Lalengliana, District Thianghlimna Committee Chairman chu Resource person-ah hman niin bial chhung atangin member engemaw zat an tel thei a ni.
———–
District Hruaitute Programme:
Rev Rosanga Kawlni, District Superintendent chuan Kalay District, Myanmar Missions Department Inkhawmpui, hman mekah Speaker-ah tangin rawngbawlna a nei mek a ni. District Superintendent hi Rev R.Laltlankima, District PYD President chuan a tawiawm a ni.
Rev Biaksangzuala, District Secretary chuan Pathianni hian District Hqrs. Kohhranah hun a hmang ang.
Rev Vanlalfela Ramtiam, District Treasurer te chhungkua chu District Building-a Quarter-ah an in sawn tak avangin a lawina Bethlehem Kohhran te chuan Pathianni zan hian thlahna hun an hmang dawn a, thuchah sawina a nei bawk ang.
District LAD hruaitute chuan North Bengal Missions field hnuaia PYD leh LAD ten Joint Conference-an hman mekah telpuiin rawngbawlna an nei a ni.
———
North Mizoram District :
Bial Missions Conference :
North Mizoram District chhung Pastor Bial 30-ah, Bial Missions Department Conference a rualin an hmang. Bial Missions conference hian Oct. ni 4- 6 chhung awhin Oct. ni 6 Pathianni zan hian a tiak ang.
Bial Missions Conference, Pastor Bial 30 tena an hman hi District Missions Department Hruaitute leh District hruaitute pawhin Bial thenkhat hmanpui dan tur hetiang hian ruahmanin, District Missions Director Rev. C. Lalthantluanga chuan Thenzawl Bial a hmanpui anga, Evan. RK. Vanlalngaia Dist. Missions Secy in Zawlnuam Bial hmanpuiin; Evan. M.S Dawngliana Dist. Missions Treasurer in Headquarters Bial a hmanpui thung dawn a ni.
District Supdt. Rev. Laltluanga chuan Kolasib Venglai Bial a hmanpui anga, District Secretary Rev. Chhiarpuia chuan Bairabi Bial hmanpuiin; District Treasurer Rev. K. lalduhsanga chuan Maubawk Bial a hmanpui thung ang.
———
Editing Board :
North Mizoram District Literature & Publication Board hmalaknaa Kum 2020 Nilai Thupui zirlai Edit hna chu tum nga Editing Board an thutkhawm hnuin Oct ni 1 Thawhtanni khan zawh fel a ni.
North Mizoram District huam chhunga Kohhrante’n Nilai Thupui an zir turah hian Thupui 44 awmin; Thupui hlawm 44 te hi thupui hlawm 9-ah khaikhawm a ni a, hetiang in:-
1. Thlarau ram Humhalhna
2. Pathian pakhat
3. Zirtirna diklo
4. Kohhran humhalhna
5. Isua Krista lokal lehna
6. Thlarau Rah
7. A zuitute chhinchhiahna te
8. Puithuna leh takna
9. Kristian chhungkua tih te an ni hlawm a ni.
——–
Member thar :
September ni 29, Pathianni khan Damparengpui Bial, Dampa Tlangnuamah Mi thar 2 Kohhranah sengluh niin; Sual ngaihdamna Baptisma chantir nghal a ni a, Nau hlan rawngbawlna nei nghalin Lal Isua hnenah Nau 2 hlan nghal a ni bawk.
Kolasib Venglai Bial Bukvanneiah pawh tirhkoh Evan. R. Lalchhanchhuaha chuan Tuichhuahen luiah mi 10 lai mai sual ngaihdamna baptisma a chantir a, naupang 8 Isua hminga hlanna Biak inah a nei bawk.
——
Revival Crusade :
1. Sept 24-29 chhung khan Bilkhawthlir Bial, Bilkhawthlir Dawrveng kohhran te chuan Revival Crusade an hmang.
Revival Crusade-ah hian District Tirhkoh ramtlan, Evan. C. Zoramthara leh a rawngbawlpui te ruaiin, an rawngbawlna Lalpan mal a sawm hle a, an rawngbawlna rah atangin Sual ngaihdamna baptisma mi 8 in an chang .
2. Lengpui Bial, Rawpuichhip Kohhrante chuan Sept ni 11 atang khan Revival Crusade neiin bul an tan a, Speaker atan Evan. C. Lalruatsanga, Pentecost Revival Team Speaker chu hman a ni.
He Revival Crusade neih hi kohhrante leh Pentecost Revival Team member te thawhrimna kaltlangin Pathianin mal a sawm hle a, Kohhran member chaute’n chakna thar neiin; kohhranah harhna a thleng nasa hle.
Rawngbawlna boruak atangin Pathian chawimawina chanchin hriat chinah tum 6 ngawt neih tawh a ni:- Chawimawina petute tarlang ila
1) T. Upa Zoliana te chhungin chawimawina tum hnih
2) Sis. Rinawmi te chhung tum khat
3) Bro. Lalrotlinga te chhung tum khat
4) Rawpuichhip kohhran tum khat
5) Bro. Kiamlova te chhungin tum khat
He ti hian Rawpuichhip kohhranah Ran talhin ruai nen Pathian chawimawina tum 6 neih a ni ta a ni.
Pentecost Revival Team te rawngbawlna kaltlang hian Sept ni 22 Pathianni khan mi thar 1 Kohhranah sengluh a ni a, Kohhranhote an lawm hle.
Revival Team te hian Pathian thuthlung puangin Mual inkhawm te neih a nih bakah intinah fehchhuakin rawngbawlna a tul anga neiin; Zaikhawmna hmunah te pawh member te pualin kutnghah rawngbawlna neih thin a ni bawk.
Sept ni 28 Inrinni, Pathian chawimawina a tum 5 neih ni ah chhungkaw khat member 5 Kohhranah sengluh leh niin an rawngbawl chhung hian UPC NEI-ah member thar 6 neih belh a ni ta a ni.
3. Evan. Lalduhsaka Saza leh a rawngbawlpuite Jehova Rapha Revival Team te chuan Kar liam ta Sept. ni 23 Thawhtan zan atang khan Hqrs Bial Mission Vengthlang Kohhranah hlawhtling takin rawng an bawl.
An rawngbawlna hian ni 7 leh zan 8 zet awhin Sept 30 Thawhtan zan khan Pathian Thuthlung rawngbawlna pawimawh tak Baptisma rawngbawlna neiin an tiak.
Jehova Rapha Revival Team ten rawng an bawl chhung hian thlarau thianghlim dawng thar bakah Thlaraua siamtharna chang mi engemawzat an awm a… He Crusade hi Missions Dept huaihawt niin, Missions Dept hruaitute duhthusam ang ngeiin Pathian thua revival thleng chu an lawmna a ni.
Crusade hi ruahman dan chuan Sept 29 Pathianni zan thleng neih tur a ni a, Thlarau lam boruak la awm avangin kohhranhoten an chelh a, thawhtan zan thleng rawngbawlna hi an nei.
Thawhtanni Sept ni 30 khan Speaker Lalduhsaka saza leh a rawngbawlpuite chuan inkhawm rawn chhim ve tu tleirawl pakhat chu kawmin, ani hian Pathian thuthlung a hmu a, Pentecost kohhranah lutin Sual ngaihdamna Baptisma rawngbawltu Evan Lalduhsaka kutah a chang nghal a ni.
—————–
Thianghlimna Committee :
September ni 28 Inrinni zan khan, Hunthar bial Thianghlimna Comt hma laknain Thianghlimna beihpui thlakin Hunthar Bial Chhung Local hrang hrangah Thianghlimna campaign neiin hetiang hian an fehchhuak-
1. Hunthar kohhran ah – Upa C.Lalnunmawia Hqrs. NMD.
2. Edenthar kohhhran ah – Rev C.Lalthantluanga
3. Lungverh ah – Evan H. Lalrinngheta
4. Sairang kohhran ah – Evan Pc Lalrokima
An rawngbawlna a ropui tak zet a, Kohhranho pawhin an hlawkpui hle a ni.
———
Committee Room hawng :
Sept ni 29 Pathianni chawhnu khan Chaltlang Bial ten, Bial chhung Kohhranpui leh Bial Department hrang hrang tena mamawha an hman tur Committee room an sak chu Bialtu Pastor Rev C Lalramthanga’n a hawng.
Committee Room hawnna programe hi dar 3 ah chiah tan niin, Pawn lamah Bialtu Pastor Rev C Lalramthanga’n Ribbon Chep chatin Pathian ropuina tur leh Bial hmasawnna tur atan Lalpa Isua Krista hmingin a hawng a ni.
In Chhung lamah Bial Secretary Evan JH Malsawmdawngliana’n hun kaihruaiin Pathian thu Sam No 127 thu chhiarin hunserh hi Sister Vanlalveni Bial LAD President in a hmang a, thlarau lam hla nen hun hman anih hnuah Report hi Bial Treasurer Evan R Lalthangchhuana’n a pe a, Committee room hawn thar hi Pathian hnenah mipuite’n tawngtairualna neiin an hlan bawk.
Committee room hawn Program hi Evan C Hmingchungnunga Bial Missions Directoriin tawngtaina neiin a tin ta a ni. Bial Committee room Hawnna program-ah hian Bial Board member, Bial chhunga Church Board Memberte leh Bial Department OB te an tel Kim hle a .
——-
Thilpek hlan :
Sept ni 25 Missionary Day NEI UPC Kohhrante’n an hman takah khan Chaltlang Bial, Chanmari Kohhran Missions Dept. te chuan Comt in a lo rel tawh angin chhungkaw engemaw zat hnenah tanpuina thil pek an hlan.
He thilpek hi Missionary Day Sept ni 25 zing khan pek a ni a, Chanmari Local Missions Committee member te bakah hruaitute an thawkchhuak tha hle bawk.
Chanmari Local Missions Dept hian vawngawnzo Biak in, PYD ten workcamp-a an sak mek a chhunzawmna atan Rs. 30000 in an pui bawk a, chutiang bawkin Sunday School Dept. pawhin Rs. 10,000 in an pui bawk a ni.
——–
North Mizoram District huamchhunga Social Work Day hman dan report tlangpui :
Mamit Bial PYD te chuan Mamit Field Veng waiting shed-ah Day hawnna neiin, Bial President Bro K. Vanlalnghaka’n Pathian hnenah hlanna a nei a. Field Veng to Charkawn thleng Kawng dunga bawlhhlawh te chhar fai ani a, Social work Day program hi Bungzawl field ah Evan Vanlalzemawia Luangpawl Tirhkoh in akharna Hun tawp hmangin; Program hman zawh hnu hian Volleyball leh futsal te khelh leh a ni bawk.
Kolasib Venglai Bial PYD chuan Kolasib Khuangpuilam hmuna Audrine Scism Children Home kawt leh huan sam fam ngai te an samfai a, member thahnem tak an thawkchhuak a ni.
Sihphir Local PYD te chuan Sihphir khawlai dung tifaiin an hnatlang a, KVK in ei leh in tur tumsakin, KVK hotute leh Bialtu Pastor Rev C.Lalrammuana ten Faina pawimawh zia leh Social Work Day neia PYD te’n khawtlang leh ram tana hna tha tak tak an thawk thin chu an lawmawm an tih thu an sawi.
Sihphir Local PYD te hi PYD Adviser Upa R. lalsawmliana leh Upa Lalhmingthanga ten an ho bawk a, Remchan zawkna avangin Social Work Day hi zingkarah an hmang bawk a ni.
Reiek local PYD te pawhin Reiek khawlai dunga bawlhhlawh awm te tifaiin member engemaw zat Day pual hian an fehchhuak a ni.
Oct. ni 2 Nilaini vek hian Sihphir Kohhrana lawi Bro K.Lalchamliana te chhungkua chuan Kohhran kaltlangin Pathian chawimawina an nei a, Speaker-ah Bialtu Pastor Rev C. Lalrammuana an hmang a, Pathian Thlarau Thianghlim awmpuinain hun hlimawm tak an hmang a ni.
———–
Chhimtuipui District :
Chhimtuipui District huam chhunga Social Work Day hman dan report ngaihthla ve leh ila :
District Hqrs awmna, Siaha bialte chuan Social work Day pual hian Siaha khawpuichhungah thisen pek runpui an buatsaih a, a mamawh apiangte hman turin thisen unit 29 an pe.
Lawngtlai town PYD te pawhin Lawngtlai District Civil Hospital ah heni pual hian thisen pein; Mipa 20 leh Hmeichhia 4 ten a vaiin thisen unit 24 an pe bawk.
Sangau PYD te chuan motor kawngpui khuar zual deuh te chhilh khat in kawng rualrem lo leh Side drain siamthat ngaite siamtha in PYD member mi 30 vel an hnatlang. Nilengin hnatlang hi thawkin Social Work Day hi vantlang tana rawngbawlna ni atan an hmang a ni.
Social Work Day denchhen hian Zingkar ah”No Tobacco Week”hawnna inkhawm tawi neih a ni a. He inkhawm hi Bial President Rbt C Vanlalpeka chuan a kaihhruai a. Bialtu Pastor K.Kawngkharmawia’n hunserh hmangin week hawnna a nei nghal a ni.
Resource person Dr.Noel.Lalremruata Sailo hnen atangin zuk leh hmuam hi mihring hmelma leh mihring tana thalo natna hrang hrang thlentu,zawi zawia mihring nun suat tu a nih ziate ngaihthlak a ni a,tun aia zuk leh hmuam dona kawngah tan lakthar a pawimawh thu te sawiin kalkhawm ten an hlawkpui hle a ni.
S.Lungpher Local te chuan S.Lungpher PHC bawlhhlawh paihna khur (Burial Pit) thuk tha tak lai in, side drain an lai bawk a. Tin, khawchhung kawngdung bawlhhlawh chhar fai na an nei a. Lungtian PYD te pawhin khawchhung kawng dung tih faina an nei bawk.
Cheural Local PYD te chuan Road side plantation sam faina an nei bawk.
——–
No Tobacco to PYD :
Oct 1, Thawhlehni atang khan Chhimtuipui District PYD Conference vawi 42-nain a rel angin; No Tobacco to PYD bawhzuina pakhat atan No tobacco week an hmang tan.
Week bultanna ni khatniah hian week hawnna inkhawm tawi neiin zuk leh hmuam/Vaihlo leh akaihhnawih thatlohna lam inzirtirna neih a ni a. A ni hnihna Oct ni 2, Nilaini khan Dist chhung Bial 6 ah vaihlo leh akaihhnawih thatlohna lam signboard an tar a. A tul angin pamphlets leh poster an semchhuak bawk.
DAY-3 hi Bial leh local ten remchan anga hman tur a ni a.
DAY-4 ah whatsaap group Chhimtuipui Dist PYD NEI ah online in zuk leh hmuam/Vaihlo leh ak aihhnawih thatlohna lam slogan inziahsiak tur a ni.
DAY-5 ah Bial leh local atheithei ten zuk leh hmuam thatlohna lam hawi awareness programme neih tur a ni a.
DAY – 6 ah Chawhnu lamah week kharna neih a ni ang.
——-
Lunglei District :
Lunglei District PYD Social Work Day Committee hmalaknain Lunglei Town area ten a huhovin an hmanga, PYD members 300 chuang an kal khawm. Town area nilo Local hrang hrang pawhin an remchan dan ang theuhin he Social Work day ah hian Vantlang tana thil tha tih nan an hmang.
Town Area PYD te hian Lunglei Super Marker tihfai hnatlang an nei a, Civil Hospital Lunglei ah damlote tan thingpui leh a hmeh an sem bawk.
Town Area ten Social Work Day an hmanna ah hian khuallian atan J.Miahlung District Local Administration Officer chu hman a ni.
Social Work Day hi PYD te hian kum 2000 atang khan hmang tanin kumtinin an hmang chho a, kumin hi an vawi 20 hmanna a ni.
Town Area PYD-te hmalakna hian Tlawng kamah thing engemawzat phun a lo ni tawh a, Thuamluaia Mual, Civil Hospital leh Lunglei khawpui kawng dungte tihfai anih tawh bakah hmun hrang hrangah he Social work day hi midangte tana malsawmna atan hman alo ni tawh thin a ni.
———-
Live Crusade :
Kumin 2019 hi North East India P.Y.D. kum 50-na (Golden Jubilee) a ni a, hemi denchhen hian General PYD hmalaknain Oct.3 nilaithawhtan zan atang khan Rahsiveng UPC Biak inah Live Crusade buatsaih a ni.
He Live Crusade-ah hian Speaker atan Rev.K.VL.Hmangaihkima chu hman niin, Crusade neih chhung hian North East India P.Y.D-a malzai thiam tak tak te an zai dawn bakah, General PYD choir, Lunglei Dist.PYD Choir leh Pentecostal Choir te an zai bawk ang. Tin, Oct.5 (Inrinni) ah Rahsiveng U.P.C. Sunday School Hall-ah Fellowship neih a ni a.He Crusade LDF leh JB Cable Network in Live in a pe chhuak a. Oct.6 Pathianni zan thleng he Crusade hi hman a ni ang.
——-
Joint Conference :
Sept 27-29 chhung khan S.Vanlaiphai bial PYD &LAD Joint Conf chu Muallianpuiah neih a ni a, Speaker atan bialtu Pastor Rochungnunga Renthlei chu hman a ni a, he hun hi zaithiam Zothanmawii Sekhum leh District Thianghlimna Committee Secretary Evan.T.Lalzawmsanga ten an hmanpui bawk. Sept 28-ah rorel inkhawm neih a ni a, PYD-te chuan Pastor qtrs ah Water filter thar leh Blanket dah nise an ti a, Bial leh local hruaitu tan Seminar neih nise an tih bakah bial chanchinbu chhuah chhunzawm nise an ti bawk.
LAD te chuan Pastor Quarters-ah dinning table dah nise an tih bakah mikhual room-ah khum pakhat siam ni se an ti bawk
Tin, PYD leh LAD Joint in Pastor Qyarters-ah Carpet thar phah nise tih te an rel a ni.
——–
Missionary Training :
October 5 inrinni hian Lunglei District Missions Department hnuaia, Home Missionary-te pualin Missionary Training District Conference Hall-ah buatsaih a ni dawn.
He Missionary Training hi 1st Session leh 2nd Session-ah then a ni dawn a, 1st Session-ah hian Rev.C.Vanlalena District Superintendent chuan ‘Missionary Ethics’ tih thupui hmangin zirtirna a pe ang a, 2nd Session-ah Dr.J.Lalnunmawia chuan ‘First-Aid chungchang’ tih thupui hmangin ziritirna a pe bawk ang.
Lunglei District Missions Department hnuaiah Home Missionary 7 an awm a ni.
——–
Home Missionary fehchhuak :
District Missions Department hnuaia Home Missionary 7 te chuan District Missions hruaitute ruahmanna angin Oct.6 Pathianni chhun leh zanah khawpui chhung Local hrang hrangah hetiang hian inkhawmin hun an hmang ang.
1.Evan.K.Lalhlupuia Thiltlang Home Missionary chu chhun lamah Luangmual Local-ah zan lamah Hrangchalkawn Local-ah hun a hmang ang.
2. Evan.Simona Hmar, Chengpui Home Missionary chuan chhun lamah Venglai Local-ah zan lamah Ramthar AOC Local-ah hun a hmang ang.
3. Evan.Rohlupuia Thahlun, Laisawral Home Missionary chuan chhun lamah Zohnuai Local-ah zan lamah Lunglawn Zaia veng Local-ah hun a hmang ang.
4. Evan.PC.Lalremruata Putlungasih Home Missionary chuan chhun lamah Ramthar Local-ah zan lamah Kikawn Local-ah hun a hmang ang.
5. Evan.Lalhriatmawia, Vaisam Home Missionary chuan Chhun lamah Zotlang Local-ah zan lamah Electric Local-ah hun a hmang ang.
6. Evan.Lalrokhawma, Bualpui V Home Missionary chuan chhun lamah College veng Local-ah zan lamah Headquarters Local-ah hun a hmang ang.
7. Bro.C.Lalrinzuala, Zehtet Home Missionary chuan chhun lamah Venghlun Local-ah zan lamah Bazar Local-ah hun a hmang ang.
———
Lawmman dawng :
Oct.1 thawhlehni khan National Voluntary Blood Donation Day Mizoram Polytechnic Lunglei ah hman a ni a, he hunah hian June 2018 – June 2019 chhunga thisen pe tha chawimawina thuziak leh thilpek hlanna neih a ni a, hetah hian PYD LUnglei District chuan Church Base-a thisen pe tam lawmman pahnihna dawngin, thisen hi Unit 131 pek a ni.
——
Seminar :
Lunglei District PYD Conference rorel bawhzuiin Sept.29 Pathianni khan Cherhlun bial PYD te chuan S. Chawngtui Local-ah Seminar an buatsaih.
He Seminar hi Bro.Lalhredika Bial PYD President chuan a kaihruai a, District PYD Vice President Upa C.Lalhmangaiha chuan “Leadership” tih leh “Kohhran dan thianghlima inneih” tih thupui hmangin zirtirna a pe a, bialtu Pastor K.Lalnunpuia kaihhruainain ‘Account vawn dan” zirhona neih a ni bawk.
——-
Rally :
Oct.5-6 chhung hian Headquarters bial PCD te chuan PCD Meet Cum Rally Farm veng local ah an nei
Oct.5 inrinniah bial chhunga Local hrang hrangten Lengkhawm zai, Solfa, Solo, Recitation leh Group Recitation hmang ten inelna an nei a, Oct.6 Pathianni chawhmaah inkhawmna neiin hetah hian District PCD President Rbt.K.Lalrintluanga chuan thusawina a nei ang. Pathianni chawhnuah hian Fellowship-na neiin Quiz leh Special Item hmuhnawm tak takte enho tur a awm dawn a ni.
Facebook