Manigong School Manging Board meeting :
Sept 11, Nilaini khan General Hqrs Office, Mualpui Salem veng Aizawlah Manigong School Manging Board meeting neih a ni.
Meeting ah hian School inenkawlna dan chungchang ruahmanna thlir hovin General Missions Board ah approve tura thlen turin an pass a, School Peon cum Chokider tur an la thar bawk.
——
General Missions Field thuthar :
Sept ni 18 ataanga 19 chhung hian Dibrugarh ah General Missions Board neih a ni dawn a, General Official leh Board member te Sept 16, Thawhtanni hian Board na hmun tur panin an chhuak ang.
North Bengal and Sikkim Missions Field huamchhung Darjeeling field thawktu atan Bro. Dothanglian Haokip chuan Avenger bike thar tha tak a leisak a. Field thawktute an lawm hle.
—–
Bihar field Director te hman turin mi inphalten sum an thawhkhawm a, Air Conditioner thar tha tak lei niin, Sept ni 11 zan khan fit fel a ni a, field thawktute an lawm hle.
Bihar Field ah hian tun dinhmunah thawktu 16 awm mekin Kohhran member 2145 an awm tawh a. Sept 18, Nilaini hian thawktu intuaitharna programme an buatsaih dawn a ni.
—-
Assam Missions Fielh huamchhung, Gossaigaon Section Alinager khuaa Bro. Ranjit Mardi chuan a ram tha tak mai sq ft 80 a zau chu Kohhran hmun a tan a pe a, Kohhran hote an lawm hle.
Sept 8, Pathianni khan Dekhiajuli Section, Assam Missions Field Pastor Daniel Lalthukhawla rawngbawlna atangin mi 6 in sual ngaihdamna Baptisma an chang a, an zinga 2 mi mi thar niin Kohhranah sengluh nghal an ni.
Pastor Daniela rawngbawlna atan hian Sis. Kimkim, Shillong chuan Guitar thar a leisak bawk.
——-
Home tana thilpek :
Sept 10, Thawhlehni khan Audrine Scims Children Home tan Hunthar Bial PYD te chuan sum fai Rs. 11,000 leh thilpek thahnem tak an pe a, Sept ni 14, Inrinni khan Republic bial PYD te chuan thuamhnaw leh sum fai Rs.20,000 zet an hlan bawk.
Heng thilpek te hi Project Director Rev. Jh Zahluna chuan lo dawngin; hmangaihna thilpek petute zawng zawng chungah thinlung takin lawmthu a sawi a ni.
——-
Theological Education Board :
Sept 5, Ningani khan General Hqrs Office, Mualpui Salem veng Aizawlah Theological Education Board meeting neih a ni a, meeting hi Board Chairman Rev. Lalmalsawma Sailo chuan a kaihruai. An rorel tlangpui te :
1. Kum 2020-a Calvary Bible College (CBC) Golden Jubilee hriat rengna atana B.D. programme hawn tha tih a ni a. Kum 2020 General Conference-ah B.D. programme hawnna neih a ni ang.
2. Pathian thu (Theology) lama degree neite’n oneness theology tihhmasawn nan lehkhabu ziah lamah hma lak ni se, chu chu ‘Oneness Theological Publication Project’ tiha a hming vuah ni se tha tih a ni a, a tul anga lo buaipui turin CBC Faculty te ruat an ni.
3. District Bible School-a zirlai subject-te hi ennawn nise tha tih a ni a, ennawn turte ruatin kum 2020 January meeting-a final tura tih a ni.
——-
Delhi Kohhranah chawimawina :
September thla bul atang khan Delhi Kohhranah thlarau thianghlim harhna a thleng chho mek a, Sept 1, Pathianni khan Evan Laremkhum te chhungkua chuan Pathian hnena lawmthusawi chawimawina neiin, Kohhran hoten hlim takin hun an hmang a. Thlarau thinghlim Baptisma dawng thar an awm nual. Chawimawitu chhungkhua hi Pastor Jerry Lalmuanawma, Chaplain in hriakhnawih rawngbawlna a neihsakin, thusawi rawngbawlna a nei nghal a ni.
Sept ni 8, Pathianni khan Evan Dr.P.Lengen te chhungkua chuan lawmthusawi chawimawina hi an chhunzawm leh a, Chaplain Pastor Jerry Lalmuanawma’n thuchah sawiin Kohhran hoten hlim takin hun an hmang. Hetiang boruak a nih chhoh avang hian Sept ni 27-29 chhung hian revival Crusade nei turin ruahmanna an siam a ni.
——
General hruaitute Programme :
General Suptd Rev. Lalmalsawma Sailo chuan Sept 13-15 chhung hian Tlabung bial ten bial chhunga rawngbawltu leh Kohhran upate puala Seminar an buatsaihah resources person-ah tangin rawngbawlna a nei dawn a, Pathianni zan thleng hun a hmang ang.
——
Lunglei District :
Sept.9 thawhtanni khan Lunglei District chhunga awm, Pukpui Local-te chuan kum 60 an tlinna, Diamond Jubilee hlim takin an hmang.
Diamond Jubilee lawmna hi chawhma dar 9:45 ah tan niin, Diamond Jubilee Hall hawnna bialtu Pastor Rev.PC.Nghakliana chuan a nei a, hemi hnu hian Jubilee lung Dist.Superintendent Rev.C.Vanlalena chuan hawng chhunzawmin mi 60 thlan chhuah ten Jubilee dar an vuak hnuah Pukpui Local LAD President hmasa ber Sist.Danziri chuan Jubilee Cake zaiin, biak inah Diamond Jubilee lawmna inkhawm neih chhunzawm a ni.
He inkhawm hi Local chairman Evan.C.Rolianan a kaihruaia, District PYD choir bakah Pukpui bial PYD zaipawl, Local PYD,LAD,PCD leh Lalngilneii ten zaiin rawngbawlna an nei a, kohhranpui Secretary leh Jubilee Org.Comt.Secretary-te hnen atangin report ngaihthlak a ni bawk. He Diamond Jubilee lawmnaah hian District Superintendent Rev.C.Vanlalena chuan Jubilee thuchah puanchhuahna neiin tlai lamah Jubilee lawmna ruai kilho a ni.
Zan lamah pawh Diamond Jubilee pual inkhawm hi neih chhunzawm niin Headquarters bialtu Pastor Rev.C.Hmingthanfala chuan inkhawm a kaihruai a, District Treasurer Rev.C.Lalrintluanga chuan thusawiin, Local LAD leh PYD zaipawlte an zai bakah Sist.Lalngilneii leh Sist.Lalbiaksangi ten zaiin rawngbawlna an nei a, Thlarau lam hla nen hlim takin Jubilee pual inkhawm hnuhnung ber hi neih a ni.
——-
Social work day hman dan tur :
Sept.8 Pathianni khan Dist.PYD-in Social work day hmanna tur atana Committee a din a hruaitute leh Local PYD aiawhte chuan Dist.UPC Conference Hall-ah Social work day hman dan tur an ngaihtuah a, Oct.2 Social work day hian Sobji bazar chhung leh a vel tihfai hnatlang neih nise an tih bakah Damdawiin ah thingpui leh a hmeh sem nise an ti bawk.
——-
Seminar :
Sept.8 Pathianni khan Sertlangpui bial LAD hmalaknain Dengsur Local-ah Thainghlimna Seminar neih a ni a, resource person atan bialtu Pastor T.Zahmingliana chu hman a ni. Hemi rual hian bial Missions hruaitute chuan Dengsur Local-ah hian Financial Campaign neiin hun an hmang bawk.
———
Thlaithar kut :
Thingsai Local-te chuan kumtin September inrinni hmasa bera an lo tih thin angin September 7 inrinni khan Thlai thar kut an hmang a, kohhran hoten an thlai thar neih te keng khawmin sumah chantir a ni a, cheng engemawzat an hmuh chhuah a ni. He thlai thar kut hmanna ah hian bialtu Pastor H.Lallawmsanga chuan ‘Thilpek rawngbawlna’ tih thupui hmangin thuchah puanchhuahna a nei bawk.
——-
Crusade :
Sept.13 zirtawp zan atang khan Thingsai Local Missions Department buatsaihin Crusade neih a ni a, hetah hian Speaker atan Evan.Simona Hmar Chengpui Home Missionary chu hman a ni a, Lalngilneii chuan zaiin rawngbawlna a nei bawk ang. He Crusade hi ruahmanlawk ang chuan Sept.15 Pathianni zan thleng neih a ni ang.
—-
Thianghlimna Committee :
Sept.8 Pathianni khan District Thianghlimna Committee chuan Campaign Chawngtui S Local-ah an nei leh a, Evan.Lallawmsiama leh Thianghlimna Committee Secretary Evan.T.Lalzawmsanga ten hun an hmang a, HC.Lalengzamin zaiin rawngbawlna a nei bawk. He Campaign-ah hian zuk leh hmuam nghei tur a intiam mi 2 an awm a ni.
——–
Biak in lungphum phum :
Sept 10, Thawhlehni khan Chhimtuipui District home mission field Amobyu Vaihthie/Zero Biak In sak bultanna tur lungphum Rev.Thanchunga Sailo Dist superintendent chuan a phum.
Dist chhunga kohhran hote pawhin theihtawp an chhuah tlang a, hun reilote chhunga sak zawh thuai an tum a ni.
Pangkhua Biak In sak kallai mek atanah pawh Kohhran hoten theihtawp chhuahin mi inphal ten hetiangin tanpuina an pe :
(1) T.Upa.M.Buichung te chhungkua Rs.5000/-
(2) Upa V Hnakung techhung Rs.3000/-
(3) Rbt L Khaichyu MDC techhungkua Rs.2000/-
(4) Sist Ngunsuii MDC techhungkua Rs.2000/-
(5) Sist T Vannei Rs.500/-
(6) Bro.Michael Zomawia Rs.1000
(7) Sist C Remsiami Siahatla Rs.500/-
(8) Dist Mission Dept Rs.50000/-
(9) Sist T.Lianmawi BW Rs.1000/-
(10) Sist.Chuangtei Siahatla Rs.1000/-
(11) Madini Siahatla Rs.500/-
Tanpuina sum tehi Evan.Khaching Aineh henah hlan a, Pangkhua kohhrante an lawm hle.
——
Evangelism Tour :
Sept 7 atanga ni 8 chhung khan Tuipang L, Tuipang Bial leh Bualpui NG local Bualpui NG Bial ah Dist PYD Evangelism tour hlawhtling taka hman a ni.
Tuipang Bial ah Evan.Robert Lalawmpuia Vice President South Lungpher bial, Rbt.RL.Hmingthanzuala Secretary SLP bial, Rbt.Jona Lalrintluanga Siahatla, Rbt.LS Lalhmingmuana Dist Hqrs local, T.Upa.N.Lalchhuanmawia Dist Fin leh T.Upa.Lalduhsanga te Siaha lam atanga kalin. Tuipang bial hruaitute, bial chhung local hrang hrang hruaitute, Bial puipa leh Bialtu Pastor Robin MH Lalthanmawia tepawn he hun hi abul atanga atawp thlengin an hmanpui bawk a ni.
He hunah hian Rbt Jona Lalrintluanga,Rbt RL Hmingthanzuala leh Rbt LS Lalhmingmuana ten Pathian thuchah sawiin Kohhran ten an hlut hle.
Bualpui NG Bialah Evan.T.Vanlaltana President Siaha Bial, Evan.K.Rinthara President Dist PYD, Sist Lalchansangi Treasurer South Lungpher bial leh Rbt.Hmangaihzama ten hun hmangin, Bialtu Pastor H Hnehchunga leh David Laldinpuia President Bualpui NG Bial ten hun an hmanpui bawk.
Sept ni 14 atanga ni 15 chhung hian Sangau Bial chhung Sangau II localah Dist PYD Evangelism tour hi chhunzawm tur niin District PYD President Evan.K.Rinthara, South Lungpher bial President Rbt.L.Dawngliana, Siaha Bial Secretary Rbt.L.Khaiu, Rbt.LS Lalhmingmuana te Rbt.RL Hmingthanzuala te an fehchhuak.
——-
North Mizoram District :
District Hruaitute Programme:
Dist. Supdt. Rev. Laltluanga chu Sept ni 11 Nilaini khan tunhnaia Pentecost kohhrana mithar 106 an rawn luhna khua Tumpanglui khuaah kohhran hna tul pawimawh buaipuiin a fehchhuak.
Dist. Secretary Rev. Chhiarpuia pawh Sept. ni 10 Thawhlehni khan Thenzawlah a fehchhuak.
Dist. Missions Director Rev. C. Lalthantluanga chuan Sept ni 12 thawhlehni khan Serchhip-ah rawngbawlna pawimawh buaipuiin a zin chhuak a, Sept ni 16 thawhtanni hian Gen. Missions Board Diblugarh-a neihturah a kal ang.
——
Bial Sunday School Conference :
North Mizoram District huam chhunga pastor Bial 30 zinga Bial 29 te chuan Pathianni kalta Sept ni 8 hmang khan Bial Sunday School Conference an hmang.
Bial Conference-ah hian Naupang chang, Thu inchhang, Solo leh Recitation hmang te leh Lengkhawm leh zai pawl hmangtein intihsiakna neih a ni a, Naupang talent hai chhuahna tur programme tha tak tak duang an awm bawk. Chanchin hriat theih chinah Bial Sunday Confe an hman zah leh an hmanna hmun te tarlang ila:
– Bukpui Bialte’n Conference vawi 21 na, North Hlimen kohhranah an hmang.
– Bilkhawthlir Bialte’n Confe. vawi 37 Kharzawl kohhran biak inah an hmang.
– Chawlhhmun Bialte’n Conf vawi 27-na Chawlhhmun kohhranah an hmang.
– Dinthar Bial ten Bial Confe. 39 –na Zotlang Biak inah an hmang.
– Headquarters Bialte’n Confe vawi – 54-na Headquarters Kohhran Biak inah an hmang
– Kawnpui Bial ten Confe. vawi 60 na-Kawnpui kohran ah an hmang
– Kolasib Venglai Bialte’n Confe vawi – 53na Kolasib venglaiah
– Lengpui Bialte’n Confe. vawi -35-na Lengte Biak inah an hmang.
– Mamit Bialte’n Confe. vawi 26 -na hmangin Confe. thupuiah “Kan fate i chhanhim ang u” tih an hmang a, Mamit Hqrs. Kohhranah an an hmang a ni.
– Maubawk Bialte’n Confe. vawi 10 Bungkawn Biak inah an hmang.
– Phainuam Bialte chuan Confe. Saipum kohhranah Bial SS Confe. vawi – 10 neiin; Pathianni chawhnu inkhawm banah Thuthlung rawngbawlna neiin; mi pakhatin sual ngaihdamna Baptisma Bialtu Pastor Rev. R. Lalnithanga kutah a chang.
– Reiek Bialten Confe. vawi – 50na Reiekah
– Sialsuk Bialte’n Confe. vawi – 51 na Sialsukah
– Vairengte Bialte’n Cone vawi 26, Vairengte Hqrs. Biak inah an hmang bawk
——-
Nilai thuzir tur edit :
North Mizoram District Literature Board te chuan Committee thu bawhzuiin Thawhlehni kalta Sept ni 10 khan 2020 Nilai Thupui tur Edit hna an thawk tan.
North Mizoram District Literature Board hian kum 2020 Nilai zan thupui zir atan hian Thupui hlawm 9 chhawp chhuakin Thupui 44-ah thensawm a ni. Thupui hlawm 9 leh a ziaktute tarlang ila
1. Thlarau ram Humhalhna : Rev. RC Puia
2. Pathian pakhat : Rev. B. Vanlalruata
3. Zirtirna diklo : Rev. C. Lalmuanpuia
4. Kohhran humhalhna : Rev Zohmingthanzama
5. Isua Krista lokal lehna : Rev. Lalmalsawma Sailo
6. Thlarau Rah : Rev. R. Lalhmangaiha
7. A zuitute chhinchhiahna te : Rev. Laltluanga
8. Puithuna leh takna : Evan. H. Zoramsanga
9. Kristian chhungkua : Rev. K. Malsawmtluanga
——
District Thianghlimna Committee :
August 22nd chawhnu dar 1:00 -a, North Mizoram District Thianghlimna Committee-in a rel angin Sept ni 14-15 chhung hian Thianghlimna Campaign thawhkhatna, North Mizoram Distirct huam chhung Bial 4-ah neih mek a ni.
Thianghlimna Campaign hi kum 2015 District Conference in a lo rel tawh anga, Kohhranhote taksa leh rilru Thianghlimna tur kawng hrang hrang bakah taksa hriselna nasa taka khawih pawi thei zuk leh hmuam laka thianghlimna chu uar taka kalpui chhoh zel a ni a, Pentecost kohhranah Zuk leh hmuam laka filhlim lo te chu tun thleng hian Pulpit-a rawngbawlna neih khap a ni.
Thianghlimna Campaign neia fehchhuakte leh an kalna hmun te tarlang ila:-
(a) Vairengte Bialah
1. Rev. Chhiarpuia : Vairengte Headquarters leh Chhimveng Local
2. Evan. KL Dawla : Vairengte Field Veng Local
3. Evan. Pahnuna : Vairengte IOC Veng Local
(b) Bukpui Bialah
1. Rev. K. Lalduhsanga : North Hlimen leh Thingthelh
2. Evan. RC Lalrinchhana : North Chaltlang-ah
3. Evan. M.S Dawngliana: Lungmuat-ah
(c) Kolasib Venglai Bialah
1. Rev. C. Lalthantluanga : Kolasib Venglai Local leh Rengtekawn Local
2. Upa. RC Hriatpuia : Tuithaveng Local
3. Rev. Lalchuailova : Tumpui Local
4. Pastor Lalhmuakliana Hmante : Pangbalkawn Local
(d) Kolasib Diakkawn Bial:
1. Rev. Laltluanga : Diakkawn Local leh New Builum Local
2. Evan. Challiana : Thingdawl Venglai Local
3. Evan. Vanrammawia : Thingdawl Vengthar Local leh Thingdawl Tlangnuam Local
4. Sist. Lalchangliani B/W : Khuangpuilam Local
—–
Joint Revival :
District ruahman anga Bial 4 inkawp- Maubawk, Dinthar, Reiek leh Kanghmun Bialte chuan Sept ni 10 Thawhlehni dar 10:30 Amkhan Joint Revival neih tur chungchangah Maubawk Bialtu Pastor Quarters-ah Committee an nei.
Committee hi a thlengtu tur Bial maubawk Bialtu Pastor Rev. R. Lalhmangaiha’n kaihruaiin kum 2020 Revival Confe. Budget tur an rel bakah kum 2020 Joint Revival neihna tur atan Kanghmun Bialah an nghat bawk.
——-
Biak in lungphum :
Sept ni 10 thawhlehni khan Damparengpui Bial Sidon Biak in sakna tur Lungphum chu Bialtu Pastor R. Thanglura’n a phum; Biak in sak Lungphum phumna hmunah hian Bial Secretary bakah bial chhunga Tirhkoh zawng zawng leh Upa te an tel a ni.
Biak in hi Dinthar Kohhrante’n Work camp-a sa turin an inbuatsaih a, an fehchhuah hma kohhranhote’n hna tul zual an lo thawh lawk nan Rs. 20000 Dinthar kohhran te hian an pe lawk tawh bawk.
Sept ni 11 khan Sidon Biak in sak hna hi an tan nghal a ni.
——
Seminar cum Revival :
Tlangsang Bial buatsaihin Bial huap Thianghlimna Seminar cum Revival chu Tlangsang kohhran biak inah Sept ni 7 atanga ni 8 chhung khan Pathian thlarau awmpuinain hlawhtling takin neih a ni.
Sept ni 7 Inrinni nileng khan Seminar hi neih a ni a, Resource person ah Rev C. Lalthantluanga, Dist Missions Director hman a ni a bial chhung kohhrante’n Seminar programme an hlut hle a, fakhla sak rawngbawlna Sis Hmangaihpuii, Sis Ramdanmawii leh Bro Isak Lalhmingliana ten an nei thin bawk. Speaker hi a thiannu Sis Lalfakawmi (Mafaki) leh T. Upa H. Thantluanga ten an tawiawm bawk.
Tlangsang Bial thianghlima Comt hmalaknain bial chhungah Thianghlimna kawngah awareness campaign lo neih chhuah tawh a ni a. Zuk leh hmuam nghei tura intiam Behliangchhip ah 1, Tlangsang kohhran puitling ah 12, Naupang SS ah 22 leh Zomuantlang ah 7 an vaiin mi 42 an lo awm tawh a ni.
———
Induction :
Sept ni 8 Pathianni zan inkhawm khan District in Tlangsang Bial Vanghmuna Rawngbawl tura a dah Bro Isak Lalhmingliana, Vaivakawn, Hunthar bial chu Rev C. Lalthantluanga Dist. Missoins Director chuan rawngbawl hna thawk turin induction a nei.
——
Kohhran tan ram pe :
Zomuantlang Mission Field a member thar Bro C. Sangliana te chhungkua chuan Zomuantlang a kawngpui an ram tha tak 6400 sq ft vel lai mai chu Rev C. Lalhmingthanga kaltlanga Pathian tihdamna an chan avangin Pathian hnena lawmthu sawi nan a thlawnin kohhrahote’n an duhna apianga hman turin kohhran tan a pe. Ram in hlanna hun hi Sept 8 Pathianni zan inkhawm banah Upa Rinkima in Tlangsangah neih a ni a. A hlantu lamah Bro C. Sangliana leh a fapa John Calvin-a ten hming an signed a. N.Mizoram Dist aiawhin Tlangsang bialtu Pastor K. Ainawna leh Rev C. Lalthantluanga, Director, Missions Dept ten an signed a. Hriatpuituah Bro Lalthana, Zomuantlang VCP in a signed bawk.
——–
Member thar :
Bro. C. Sangliana, Zomuantlang Believers kohhran chairman leh bial chairman ni bawk leh Mamit Dist puma an hotu ber ni bawk chuan Pathian thuthlung hmuin Pentecost kohhran a zawm.
Bro. C. Sangliana hi Zomuantlang Mission field-ah member thar duhawm tak niin; Tuipuibari Centre a Believers Church member 100 chuang a kaihhruai thin te chu Pathian thuthlung hrilh turin leh rawngbawlna kawnga Damparengpui bialtu pastor te pui turin tirh chhuah a ni.
Bro. C. Sangliana hi Tlangsang Bial tangka vawngtu T. Upa Vanlalruala chuan bial kaltlangin Rs.1000 hlanin, Dist Missions hmingin Dist Missions Director in Rs.2000 a hlan bawk.
Dist. Supdt. Rev. Laltluanga chuan Sept ni 11 Nilaini hian tun hnaia Tumpanglui khuaa kohhran ding thar biak In hmun tur en leh a tul anga biak In hmun lei turin Rengdil Bial, Tumpanglui khua a tlawh.
North Mizoram District Missions Department rawih Evan. Lalthianghlima Bru Revival Team leh a rawngbawlpui te chuan Sept ni 11-15 chhung Kolalian Missions Field Missionary Sist. H. Khawlliani B/w awmna chu tlawhin rawngbawlna an nei dawn a ni.
Hriphaw Local PYD te chuan Bro. K. lalrindika rawngbawla a awmna hmun K. Sarali chu Sept ni 14-15 hmang hian an tlawh bawk dawn a ni.
——-
Thilpek pe :
Sept ni 10 Thawhlehni zan khan Evan. Lalchhuanmawia Sailo te chhung chuan Sihphir Bial Nisapui Biak In Thutthleng tur siamna atan sum thahnem tak Nisapui rawngbawltu Evan. Lalhmudika hnenah an hlan. Evan. Lalchhuanmawia leh a chhungte chungah Sihphir Bial hruaitute leh Nisapui Preaching Point Kohhranhote an lawm hle. (Pic. Biak in sakna thilpek pe)
——–
District Revival Speaker rawngbawlna :
North Mizoram District Tirhkoh Ramtlan Speaker Evan. Zoramthara leh a rawngbawlpuite chuan kar thar zirtawpni Sept. 13 atangin Chawlhhmun kohhranah Pathian chawimawina neih turah rawngbawlna an nei dawn a, Chawimawina Programme hian Pathianni zan Sept. ni 15 thleng a awh ang.
2. Apostolic Revival Team Speaker Evan. T. Vanlalruata (Valtea) leh a rawngbawlpuite chuan Sept. ni 13 Zirtawpni atangin Sialsuk Bial Lungseiah rawngbawlna an nei ang.
3. Jehova Rapha Revival Team Speaker Evan. Lalduhsaka Saza leh a rawngbawlpui te chuan Sept. 16 atanga 22 thleng Dinthar kohhranah Camp neiin rawngbawlna an nei ang a, Sept. ni 23 thawhtanni atang 29 thleng Mission Vengthlang kohhranah rawngbawlna an nei leh ang.
4. Pentecost Revival Team Speaker Evan. C. Lalruatsanga leh a rawngbawlpui te chuan Sept. 10 atang hian Aizawl East District Thuampui Bial, Zuangtui Kohhranah rawngbawlna an nei ang.
——–
Aizawl East District :
Aizawl East District hnuaia Bial hrang hrang ten September 6, Zirtawp Zan atanga Bial Sunday School Inkhawmpui an hman chu September 8, Pathianni Zan khan Pathian Thlarau Thianghlim awmpuina hnuaiah hlim taka hman zawh a ni.
Inkhawmpui tan zan, Zirtawp Zan khan Bial thenkhatah chuan Tualchhung Kohhran hrang hrang ten report pe in Puitling lamin intihsiakna an nei tan a, Bial thenkhat erawh chuan Inrinni rorel inkhawm neihah Tualchhung report an pe thung a ni. September 7, Inrinni nileng khan mahni Bial inawpna leh District-a lut turte ngaihtuahin rorel inkhawm neih a ni.
Sunday School Inkhawmpui-ah hian Naupang lamin mal zai, thu leh thu inchhang, Recitation, Lengkhawm zai leh Group zai tea intihsiakna neiin Bial thenkhat-ah chuan Puitling lamin Lengkhawm zai leh Puitling Zirlaibu atangin Quiz intihsiakna an nei ve bawk a ni. Bial thenkhat chuan intihsiakna nei lovin meet anga hun hman a ni a, Naupang lam ten Item chi hrang hrang hmangin Pathian fakna an nei thin a ni.
Tarlan tawh angin tun dinhmunah Aizawl East District chhungah hian Bial 30 awm mekin Puitling leh Naupanga Sunday School hming ziak singkhat leh sangriat dawn an awm mek a. District Sunday School hruaituten hetiang hian inkhawmpui an hmanpui a ni: District S.S Secretary Evan Hr.Lalrindika’n Mualpui Bial a hmanpui a, Treasurer Upa Rodailova Zote chuan Sakawrdai Bial a hmanpui bawk a, Kohhranpui hruaitute Rev Rosanga Kawlni, Superitendent chuan a bial hmui mek, Mualpui Bial-ah hmangin Rev Biaksangzuala, Secretary chuan N.Vanlaiphai Bial-ah a hmang a, Rev Vanlalfela Ramtiam, Treasurer chuan Bawngkawn bial a hmanpui bawk. Bial hrang hrang ten Bial Sunday School Inkhawmpui an hman dan kan hriattheihte lo tarlang ila:
Bawngkawn bial te chuan Inkhawmpui vawi 25-na, Silver Jubilee hi Bawngkawn Biak-inah September 6, Zirtawp zan atang khan an hmang tan a, Rev Vanlalfela Ramtiam, District Treasurer chuan Pathian hnenah hlanna a nei a ni. Inrinni nileng khan rorel inkhawm an nei bawk. Bawngkawn Bial ten Bial Sunday School Inkhawmpui an hman hi a vawi 25-na, Silver Jubilee a nih angin Pathianni chawhma inkhawm banah khan inkhawm zawng zawng te hnenah thilpek hlan niin Pathianni chawhnu khan Bial hruaina hna lo thawk tawhte hnenah chawimawina hlan an ni a, tlai-ah ruai hlim takin an kilho a ni. Bawngkawn Bial te hian intihsiakna lama kal lovin meet angin an hmang a, naupangte hnen atangin thu leh thu inchhang, zaipawl leh mai zai bakah worship dance hmangte in Pathian fakna neih niin Puitling lamin Lengkhawm zai leh Quiz hmangin Item an nei ve bawk. Pathianni zan khan Rev Vanlalfela Ramtiam, District Treasurer hian thuchah sawina a nei bawk a ni. Bawngkawn Bial te hian Kum 2020-ah Ramhlun Vengtharah Inkhawmpui an hmang leh dawn a ni.
Bethlehem Bial te chuan Bial Sunday School Inkhawmpui Vawi 37-na hi thawh hnihin an hmang a, a thawhkhatna hi September 1, Pathianni khan hmangin Chawhma lamah Hermon Kohhranah Intermediate leh Senior Department ten Thu leh Thu inchhang hmangin intihsiakna an nei a, Bro TC Vanlalruata, Bial Asst.Secretary chuan thusawina a nei. Chawhnu-ah Bethlehem Vengthlang Biakin-ah Primary leh Junior Department ten intihsiakna an nei bawk a, hetah hian Sis Dr.Lalhmingchhuani, Bial S.S Fin.Secretary chuan thusawina a nei bawk. A thawh hnihna hi September 6 atanga 8chhung khan Bethlehem Biakin-ah hmangin Rev Ellic Hnehzova Fanai chuan hawnna a nei a, Puitling lamin Lengkhawm zai leh Quiz bakah Doctrinal Department ten Quiz hmangin inelna an nei a, Beginners Department ten thu leh thu inchhang hmangin inelna an nei bawk. Inrinni zan inkhawmah Upa K Lalbiakthanga chuan Kan fate i chhanhim ang u- Zuk leh hmuam ruihtheihthilah tih thupui hmanga thusawina neiin Pathianni chawhma khan Pastor K Lalawmpuia hnen atangin Incheina leh nungchangah tih leh Pathianni chawhnu-ah Evan Lalchhuanmawia Zote hnen atangin IT leh Media tih leh Pathianni zanah Rev Lalrema, Bialtu Pastor hnen atangin Thuthlungah tih hmangin thusawi ngaihthlak a ni bawk. Bethlehem Bial te hian Kum 2020-ah Bethlehem Biakin-ah Inkhawmpui an hmang leh dawn a ni.
E.Lungdar bial te chuan Leng Kohhranah September 8, Pathianni hmang khan an nei a, Bialtu Pastor K.Lalhmingmawia chuan hlanna neiin Thu leh thu inchhang bakah recitation leh hla hmangin intihsiakna an nei a ni. Inkhawmpuiah hian mi 200 vel kalin Kum 2020-ah Sailulak hmunah Inkhawmpui an nei leh dawn a ni.
Zemabawk Bial te chuan Airfield Biakin-ah Inkhawmpui vawi 32-na hi September 7 atanga 8 chhung khan hlawhtling takin an hmang a, rorel inkhawma bul tanin Rev R.Laltlankima, Bialtu Pastor chuan hawnna a nei a ni. Inrinni zan khan Puitling lamin Lengkhawm zai leh Bible Quiz hmanga intihsiakna neiin naupang lamah erawh intihsiakna awm lovin meet angin an kal a, thu leh hla hmangin naupang lamin Item an nei bawk a ni. Pathianni chawhnu khan lawmman semna neih a ni a, hetah hian Sunday School Kum 5, Kum 10 leh Kum 15 chhung kaikim hnenah Bialtu Pastor chuan lawmpuina a hlan bawk. Pathianni zanah Revival Inkhawma hun hman niin Bialtu Pastor, Rev R.Laltlankima hnen atangin thuchah ngaihthlak a ni. Zemabawk Bial te hian Kumin hian Inkhawmpui kal dan tidanglamin tun tum inkhawmpui-ah hian Beginners atanga Junior thleng ten item neiin September 15, Pathianni hmang hian Zemabawk Vengpui Biakin-ah Intermediate atanga Doctrinal te pualin meet an hmang leh dawn a ni.
Zohmun Bial te chuan Zohmun-ah September 7 atanga 8 chhung khan Inkhamwpui hlawhtling takin an hmang a, Evan Lalsanglura, Bial Secretary chuan hlanna a nei a ni. Intihsiakna hi Group 3-ah thenin Group 1-ah hian Beginners leh Primary awmin Group 2-ah Junior leh Intermediate te an awm a, Group 3-ah Senior leh Doctrinal an awm bawk a ni. Group tinte hian Thu, Thu inchhang, lengkhawm zai, Solo leh Recitation hmangin intihsiakna a nei a ni.
Serchhip Bial te chuan Electric Biakin-ah Inkhawmpui vawi 40-na hlawhtling takin September 6 atanga 8 chhung khan an hmang a, Bialtu Pastor B.Lalengzauva chuan hlanna neiin Puitling lamin Lengkhawm zai leh Quiz hmanga intihsiakna an nei a, Naupang lamin Thu, thu inchhang leh hla hmangin intihsiakna an nei bawk a ni. Inrinni nileng khan rorel inkhawm an nei a, Pathianni zan khan Result puanna an neih bakah Bialtu Pastor B.Lalengzauva hnen atangin thusawi ngaihthlak a ni bawk.
Upper Republic Bial te chuan Upper Republic Biakin-ah Inkhamwpui vawi 24 na hlim takin an hmang a, September 7, Inrinni rorel inkhawm atanga bul tanin Inrinni zan atang khan Naupang lamin Thu leh hla hmangin intihsiakna an nei a, hetah hian A lian pawl leh a te pawla thenin Pathianni zan khan Rev R.Laichhingpuia, General Sunday School Director hnen atangin Kan fate i chhanhim ang u tih thupui hmangin thusawi an ngaithla bawk a ni.
Darlawn Bial te pawhin Inkhamwpui vawi 35-na Ratu Vengpui hmunah hlim takin an hmang a, hetah hian Thu leh hla hmangin naupang ten intihsiakna an nei a, Ratu Vengpui pakhatna niin Darlawn pahnihna an ni a, Ratu Melkawn ten dawtin Sunhluchhip palina an ni bawk.
Serchhip Dinthar Bial te pawhin September 6 atanga 8 chhung khan Bungtlang Bazar Biakin-ah Inkhamwpui vawi 19-na hlawhtling takin an hmang a, Naupang ten Thu leh hla hmangin intihsiakna an nei a ni. Pathianni chawhnu atanga Zan thlengin intihsiakna item awm lovin Revival Inkhawmin hun an hmang a ni.
Bazar Bial te chuan Armed Veng Kohhranah Inkhawmpui vawi 27-na September 6 atanga 8 chhung khan hlawhlting takin an hmang a, Bialtu Pastor Rev HL Thakunga chuan hlanna neiin Inrinni nileng khan rorel inkhawm an nei a ni. Naupang lamin thu leh hla hmanga Item neiin Puitlingin Quiz hmangin item an nei bawk a ni.
Champhai Bial te chuan Venglai Biakin-ah September 6 atanga 8 chhung khan Inkhawmpui vawi 43-na hlawhtling takin an hmang a, Thu leh hla hmangin naupang ten intihsiakna neiin hlim takin hun an hmang a ni.
Khawhai Bial te chuan Inkhamwpui vawi 36-na New Chalrang hmunah September 7 atanga 8 chhung khan hlawhtling takin an hmang a, Bialtu Pastor E.Vanlalpeka Zote chuan hlanna a nei a ni. He inkhawmpui-ah hian naupang ten thu leh hla hmangin intihsiakna an nei a ni.
Mualpui Bial te chuan Salem Veng Kohhranah Inkhawmpui vawi 5-na September 6 atanga 8 chhung khan an hmang a, Bialtu Pastor, Rev Rosanga Kawlni chuan hlanna a nei a ni. Mualpui Bial Inkhawmpui hi Evan Hr.Lalrindika, District Sunday School Secretary chuan hmanpuiin thusawina hun a hmang bawk a ni.
Hnahlan Bialte chuan Hqrs. Biakin Hnahlan hmunah Inkhawmpui vawi 29-na September 6 atanga 8 chhung khan an hmang a, Bialtu Pastor R.Lalfamkima chuan hawnna neiin inrinni nileng khan conference rorel an nei a ni. Zirtawp zan atanga Inrinni zan khan naupang ten intihsiakna neiin Pathianni Chawhma khan Bialtu Pastor R.Lalfamkima chuan thusawina neiin chawhnu-ah Evan Vanlalthlamuanpuia leh zanah Evan Lalzarzoliana Parte te hnen atangin thusawi an ngaithla bawk a ni.
Khawzawl Bial te chuan Vengthar Biakin-ah Inkhawmpui vawi 48na hlawhtling takin an hmang a, Naupang lamin thu leh hla hmanga intihsiakna an neih bakah Puitling lamin Puitling Zirlaibu atangin Quiz-ah inelna an nei bawk a ni.
N.Vanlaiphai Bial te chuan Bial Sunday School Inkhawmpui vawi 60-na, Golden Jubilee chu September 6 atanga 8 chhung khan Lungkawlh hmunah hlim takin an hmang a, he inkhawmpui hi Rev Biaksangzuala, District Secretary chuan a hmanpui a ni. September 6, Zirtawpni chawhnu khan rorel neih niin Kum 2020 Inkhawmpui chu Hqrs. Kohhranah an nghat a ni. September 7, Inrinni khan Conference Diamond Jubilee pual inkhawm neih a ni a, ruat bik mi 60 ten Jubilee dar vawi 60 vuain Jubilee lawmna inkhawmah Rev Biaksangzuala, District Secretary chuan thuchah sawina a nei a, Upa R.Lalhminghlua, Bial S.S director-in Bial Sunday School chanchin tlangpui a sawi a, tlaiah ruai hlim takin an kilho a ni. Inrinni zan atanga Pathianni chawhnu thleng khan intihsiakna neih a ni a, Pathianni zanah Rev Biaksangzuala leh Bialtu Pastor H.Lalropuia ten thuchah sawina an nei bawk a ni.
Sakawrdai Bialte chuan New Vervek hmunah Bial Sunday School Inkhawmpui vawi 62-na hlawhtling takin September 7, Inrinni rorel atangin an tan a ni. He inkhawmpuiah hian naupang lamin thu leh hla hmangin intihsiakna an nei a ni. Upa Rodailova Zote, District Treasurer chuan hmanpuiin Pathianni zan khan thuchah sawina a nei bawk a ni.
Saitual bial te chuan Lungpher hmunah Inkhawmpui vawi 31-na hlim takin an hmang a, Bialtu Pastor Rev Pc.Lalnghakliana chuan hawnna neiin naupang lamin Thu leh hla hmangin intihsiakna an nei a ni. Kum 2020-ah Tualbung hmunah inkhawmpui hi an nei leh dawn a ni. Saitual Bial ten Bial S.S inkhawmpui an hmanah hian Thlarau lam boruak tha tak hnuaiah hun an hmang a ni.
Thuampui Bial te chuan Thuampui Biakin-ah September 6 atanga 8 chhung khan Bial S.S Inkhawmpui hlim takin an hmang a, Bialtu Pastor, rev KVL Hmangaihkima chuan hlanna neiin Inkhamwpui tan zan khan Tualchhung report ngaihthlak a ni. He inkhawmpui-ah hian Naupang lamin Thu leh hla hmanga intihsiakna neiin Puitling lamin Lengkhawm zai leh Quiz hmangin intihsiakna an nei ve bawk a ni. Pathianni chawhnu khan lawmman semna neiin zanah Bialtu Pastor, Rev KVL Hmangaihkima hnen atangin thuchah an ngaithla a ni.
——–
Member thar :
September 8, Pathianni khan Kawlkulh Bial Dulte hmunah mithar pakhat Kohhranah sengluh a ni. Dulte hmunah hian Sis Lalthanpari B/W chu District Missions tirhin rawngbawlin a awm mek a ni.
Thuampui-ah pawh September 8, Pathianni khan mithar 4 in sual ngaihdamna baptisma Bialtu Pastor, rev KVL Hmangaihkima kutah an chang.
Khawruhlianah September 8, Pathianni vek khan mithar 2 Kohhranah sengluh an ni bawk.
September 4, Nilai zan khan Sesawng Kohhranah Apostolic Herald Revival Team Speaker Evan Vanlalruatsaka leh Team memberte rawngbawlna kaltlangin mi 4 in sual ngaihdamna baptisma an chang bawk a ni.
—–
Bial Sport :
September 10, Thawhlehni khan Upper Republic Bial PYD te chuan a thawhnihna atan Hualngo field-ah Bial huap sport hlawhtling takin an hmang.
Sport-ah hian Outdoor Item chi hrang hrang, Football, Volleyball, Deathball leh inhruipawhah te intihsiakna neih a ni a, Bial chhung atangin PYD member 100 chuang an kalkhawm a ni. Upper Republic Bial PYD te hian July 15 khan Sport thawhkhatna, Indoor Item chu Upper Republic Kohhran Hall-ah an lo nei tawh a, kumin kumtawp hian Sport kharna leh result puanna hun hmang turin ruahmanna an siam bawk a ni.
——
Chawimawina :
September 14, Inrinni hian Aizawl College Veng Kohhrana lawi Bro Pc.Lalthangliana te chhungkua chuan Pathian hnena lawmthusawi chawimawina neiin Kohhran ten hlim takin hun an hmang. He hunah hian Speaker-ah Evan R.Vanchhunga, District Fulltime Evangelist chu hman niin Chawimawina programme denchhen hian September 13, Zirtawp zan atang khan Revival Inkhawm neih a ni a, ruahmanna ang chuan Pathianni zan thleng hun an hmang dawn a ni.
——
District Hruaitute Programme:
Rev Rosanga Kawlni, District Superintendent chuan Pathianni hmang hian Lunglei District, Tlabung hmunah rawngbawlna neiin hun a hmang anga, ruahmanna ang chuan Thawhlehni-ah Aizawl a rawn let leh ang.
Rev Biaksangzuala, District Secretary chuan September 11, Nilaini khan Aizawl Club-a Consultation meeting on Special Eradication of Illiteracy Project- Mizoram sawrkar School Educatioon buatsaihah Kohhran aiawhin a tel.
Rev R.Lianzama, Missions Director chuan karleh Nilaini leh Ningani-a General Missions Board, Dibrugarh hmuna neih tura tel turin Thawhtanni hian Aizawl a chhuahsan ang.
Facebook