Pennet News Service : September 3 -9
Executive Board :
Sept ni 5 leh ni 6 chhung khan North East India UPC Kohhran rorelna sang Executive Board, Favang thutkhawm neih a ni.
Board hi General Headquarters Office, Mualpui Salem vengah neih niin General Superintendent Rev. Lalmalsawma Sailo chuan rorel inkhawm a kaihruai a. General Secretary Rev. R. Lalrinsanga’n kumin chhunga Kohhran rawngbawl dan report hrang hrang a pe a, kumin January atanga August thla inkar chhungah member thar 1500 chuang Pentecost Kohhranah seng tawh niin hmun thenkhata pawlchhuak lamin an tihbuai Kohhran Biak In kalh te pawh a neitu diktak hnenah court in a hlan tak zel avanga lawmawm a tih thu te a sawi a ni.
An thurel langsar zual te :
1. North East India UPC Kohhran rorelna sang ber General Conference rorelnain Fa nei tam tura inzirtirna uar nise a tih bawhzuina tura Draft siam chu thlir hovin pawm a ni a, India hmarchhak pum huapa hmalak dan tur ruahmanna an siam anga a hma thei ang bera bawhzui turin an pass.
2. Full time Worker leh Licence Holder te tana conduct rule an buatsaih pawh phahrin Executive Board member te la zir chian leh turin dah a ni.
3. Rawngbawlna Licence dilna form leh Inneih Certificate te ennawnin; a tul anga siam that a ni ang.
4. Kum chanve Audit report thlir ho a ni a, sum leh pai lama Kohhran hmasawnna a lawmawm an ti hle.
5. Bihara member tharte hnenah Rawngbawlna Licence issue sak ni se tih a ni.
6. General Missions Department thawktute service enfelsak an ni bawk.
—-
CBC Annual Sport :
August ni 28-31 chhung khan Calvary Bible College, Shillong chuan kum tina an hman thin angin Annual Sport an nei.
Annual Sports ah hian Foot ball, volleyball, sepaktakraw, tug of war, intlansiak chi hrang hrang, high jump, shot put, table tennis, indoor games hrang hrang, arm wrestling, elocution, talent show, quiz, leh a dangte hmangin zirlai ten intihsiakna an nei a. Hlim takin hun an hmang.
—-
Bial Missions Conference hmanpui dawn :
North Mizoram District Missions Executive chuan kumin 2018 Oct. ni 5-7 chhunga North Mizoram District huam chhung Bial hrang hrang ten Missions Conference an neih turah Bial atanga sawmna an hmuh angin hetiang hian District hruaituten conference an hmanpui ang.
1. Rev C Lalthantluanga, District Mission Director-in Kawnpui Bial
2. Evangelist RK Vanlalngaia, District Mission Secretary in Sialsuk Bial
3. Evangelist JH Malsawmdawngliana, Dist. Mission Treasurer-in Chaltlang Bial
4. Rev Laltluanga, District Superintendent in Sumsuih Bial
5. Rev Chhiarpuia, District Secretary in Zawlnuam Bial
6. Rev K Lalduhsanga, District Treasurer in Bairabi Bial.
—–
North Mizoram District Board :
Sept ni 4 Thawhlehni khan North Mizoram District chuan Emergency board neiin Board meeting Rev. Laltluanga Dist. Supdt.-in a kaihruai.
Board meeting-ah hian North Mizoram District Pastor thenkhat te, hun engemaw chen atang tawha Ramthianghlima (Israel) zin tura ruahmanna siam tawh, an zinna tur hmun lama remchanlohna awm avanga pending chu zin theihna boruak tha a awm avangin kumin 2018 Dec thla chawhnu lam hian zin tura ruahmanna siam nise an ti.
—–
Solfa Training :
North Mizoram District Music Committee in Solfa training a buatsaih chu Zirtawpni kal ta Aug ni 31 khan District Hqrs. Biak in Committee room-ah zirna hmawr an bawk.
Solfa training kharna inkhawm ni Aug. ni 31 Zirtawpni zing khan Dist. PYD Mucis Commmittee kaihhruaiin hun hman a ni a, District PYD President Evanlist. F. Lalngaihawma pawhin a ho bawk.
Solfa training hi August ni 7 khan t anin August thla chhung neih a ni a. Class hi Zingkarah nei thinin. Solfa training-ah hian Member 30 an inziaklut bawk. Solfa zir Member 21 ten exam hmachhawnin hetiang hi an dinhmun a ni:-
1. Bro. F.Lalramdinthara – Chaltlang
2. Bro. Lalropuia – Chawlhhmun
3. Bro. Lalramnghaka- Rengdil
Solfa zirlaite hi Bro. Zairemmawia (District PYD Choir Conductor) & Bro. Johny Lallawmkima ten an zirtir thin a ni.
—-
Chawimawina :
Aug ni 31, Zirtawpni khan Kolasib Diakkawn Biala Vengthar Kohhrana lawi Tual Upa Biakzuala te chhung chuan Pathian hnenah lawmthu sawiin Kohhran hote kaltlangin Pathian hnena lawmthusawi Chawimawina an buatsaih.
Tual Upa Biakzuala hi Assam Police pension niin; Halflong vengchung kohhran din tirh atanga rawngbawltu pawimawh tak ni chhovin; Kolasib Vengthar Kohhranah a rawngbawlna a chhunzawm a ni.
Lawmthusawi chawimawina Programme neihah hian Bialtu Pastor Rev. C. Lianchama’n thuhrilh rawngbawlna neiin; thlarau boruak duhawm tak hnuaiah hun hman a ni a, Bial chhung leh pawn bakah Aizawl lam atanga chawimawina chhim mi thahnem tak an awm bawk. Chawimawina Programme hian zan thleng a awh a ni.
—–
Intlawh tawn :
Rengdil Bial Zamuang Local PYD te chuan Aug. ni 30 atanga Sept. ni 2 chhung khan Sihthiang kohhran tlawhin rawngbawlna an nei.
Zamuang Local PYD te hian Sihthiang kohhran Biak in sak mekah a chung tur dap chikpuiin; thlarau lam rawngbawlna bakah tisa lam hna pawh nasa takin an thawhpui a, zan lamah inkhawmna nei thinin Bro. VL Hmangaihsanga Zamuang Local PYD Secretary te, Evan H. Lalnunmawia Sihthiang rawngbawltu leh Bro. Lalremtluanga local PYD vice president ten thuhril rawngbawlna an nei thin bawk.
—–
Revival crusade :
Chaltlang Bial Bawngkawn Kohhrante chuan Aug ni 31, Zirtawpni zan atang khan Revival crusade hmang tanin Speaker atan Evan C Zoramthara District Tirhkoh ramtlan an ruai.
Sept ni 2 Pathainni khan Sis Lalbiakliani chuan Pathian hnena lawmthusawi chawimawina neiin; Aug.ni 26 khan Sis Vanlalfeli te chhungin Pathian chawimawina an lo nei tawh bawk.
Thlarau boruak a nuamin Kohhran hote an hlim hle a ni.
——-
Mi thar :
1. August Rammut thla chhung khan Lengpui bial chhungah member thar 29 lai Kohhranah an senglut.
Lengpui local ah Mi thar 5 neiin, Dapchhuahah 12 an nei a, he hmunah hian Maubawk bial Mission Dept. ten rawngbawltu an rawih Bro. Vanlalawia’n rawngbawlna a nei mek a ni. Tin, Dilzawl-ah mithar 12 sengluh an ni bawk. Dilzawlah hian Evan. H. Lalnunzira rawngbawlin a awm mek a ni.
2. August ni 2 Pathianni khan Zawlnuam bial Bawrai kohhranah mithar pakhat sengluh niin bialtu Pastor K.Malsawmkima’n sual ngaihdamna Baptisma a chan tir.
3. Pathianni kalta Sept ni 3 chawhma inkhawm khan Mamit Bial chhunga awm Damdiai Missionary Sist Lalsiamlian chuan Hindu sakhua atangin mithar chhungkaw khat member 4 chu Pentecost kohhran a seng lut.
4. North Mizoram District Tlangnuam Bial Missions Department buatsaihin Aug ni 11 atanga Sept. ni 2 thleng khan rawngbawltu Evan. R.C Lalrinchhana ruaiin Saikhamakawnah rawngbawlna neih a ni. He rawngbawlnaah hian mi 10 in sual ngaihdamna Baptisma changin Thlarau Thianghlim dawng thar 2 an awm a. Member thar 6 seng luh an ni bawk.
——
Missionary chawm :
1. Dinthar Bial Headquarters, Dinthar Kohhran Department leh mimal ten kumin 2018 chhungin Missionary 27 an chawm.
September ni 2 Pathianni zan khan District Missions Director Rev. C. Lalthantluanga chu Dinthar kohhranah inkhawmin Dinthar kohhrante’n a hmaa Missionary an lo chawm tawh 14 bakah Dist. Missions Director rawngbawlna kaltlangin mi 13 Missionary chawmtu hmuh belh leh a ni a, Hetianga Ramthim hmangaihna kohhran hoteah a intuh thar zel hi Dist. Missions hruaitute pawh an lawm hle a ni. Dinthar kohhran atang hian Ramthim sum Rs. 19,400 lai Dist. Missions Director hian a dawng lawk bawk.
2. Sept. ni 3 thawhtanni khan Headquarters bial Kohhranpui Treasurer Evan Lalchhuanmawia Sailo chuan Headquarters Bialte’n Missionary chawmna tura an ruahman Rs. 50,000.(Singnga) chu District Missions ah a chhung lut.
District Missions hruaitute te hnen atanga PenNet in thu a dawn danin tun dinhmunah Bial anga Missionary chawmna pe hnem ber chu Headquarters bial an ni.
—-
Diamond Jubilee sawmna :
September 21-23, 2018 chhung hian North Mizoram District Headquarters Local PYD te chuan Headquarters Biak In, Tuikhuahtlangah Diamond Jubilee lawman hun an hmang dawn a. He hun hmanpui tur hian Hqrs PYD member lo ni tawh bakah veng hrang hranga Pentecost thalai member te an sawm a ni. September 21 zirtawp zanah Jubilee hawnna leh hruaitu hluite pualin an thlalak thlir hona neih tur a ni a. September 22 inrinni ah Jubilee puala thisen pek tur a ni bawk. September 23 Pathianni zing inkhawmah Jubilee pual hian Revival service neih tur niin, Speaker atan Pastor Lalsawmliana Sailo chu hman a ni ang.
—–
Financial Campaign :
September ni 1 Inrinni khan North Mizoram District Secretary Rev. Chhiarpuia chuan Tlangsang Bial kohhran hote tlawhin Financial Campaign a neihpui.
Tlangsang Biala a cham chhung hian Zomuantlang, Behliangchhip leh Tlangsang kohhran hote a inkhawm pui a, Sept ni 2 Pathianni khan mithar 2 Pentecost kohhranah lawmluh a ni bawk. Lawmluh inkhawm hi Zomuantlangah neiin inkhawm banah Dist. secretary hian Baptisma mi 5 a chantir bawk a ni. District Secretary hi Upa Ziona, Ailawng khua kum 74, kum 38 lai Upa lo ni tawh in a tawiawm bawk.
Rev. Chhiarpuia hian Tlangsang Biala a cham chhung hian Zomuantlang Biak in sak mek leh Tlangsang Kohhran Biak in sak mek a en nghal bawk a ni. (Pic. Tlangsang Bial)
—–
Thilpek pe :
Sept ni 3 thawhtanni khan Sis. Maveni W/O Pu Duata Chaltlang leh leh Sist. Laldawngliani Dist. LAD Secretary te chuan tunhnaia New Eden hmuna kohhran ding thar, kohhran hote leh a mamawh apiangte tana sem turin thawmhnaw bag 5 lai an pe a, hei bakah hian Kohhran ding thar te hian khuang an nei lo tih hriatin Bro. Vanlalduata Chaltlang chuan Khuang thar pahnih a pe bawk.
—–
Rammut Report :
1. Chhimtuipui District, Diltlang Kohhranin Rammut beihpui thlakna atan Crusade a buatsai kalzelah sept ni 1, Inrinni khan Pastor Lalsawmliana Sailo Diltlang south bial tu chuan lawmthusawi chawimawina atan Bawng leh vawk a thawh a, he chawimawina chhim tur hian hmun hrang hrang atangin thlaraumi thahnem tak kal khawmin District Superentendent Rev.Thanchunga Sailo pawhin he hun hi a hmanpui a, Kohhan hoten hlim takin hun an hmang. He Crusade-ah hian speaker atan Sis. Lalthanzami (Senpuii) an ruai.
2. Chhimtuipui District, Meisatla Local chuan Aug ni 22 atanga Sept ni 4 chhunga Rammut Crusade
an buatsaihah mi thar 2 Kohhranah an senglut.
He Crusade ah hian Evan. N. Thanghuna, Dist.Evangelist, chu Speaker ah an hmang a, Kohhran chhungkaw zingah Thlarauva siamtharlehna chang engemawzat an awm bawk. Sept ni 3, Thawhtan zan khan Baptisma khur hawn niin mi 5 in sual ngaihdamna Baptisma an chang a, an zing 2 hi mi thar niin Kohhranah sengluh nghal an ni.
3. Sept ni 1, Inrinni khan Niawhtlangah chhungkaw khat member 7 Kohhranah sengluh niin; Sectional Pastor Rev.F.Lalbiakthuama’n Kohhranah a senglut.
4. Tun hnaia Kohhran dinna Riasikah ah pawh Sept ni 2, Pathianni khan mi thar pakhat kohhranah sengluh a ni bawk.
——
Thlaithar kut :
Chhimtuipui District chhunga Local hrang hrang ten kum tina an neih thin angin Thlaithar kut an hmang.
Thlai thar kutah hian Kohhran hoten an thlai thar neih ang angte lakhawmin Pathian hnenah an hlan a, a tihralna buatsaihin an sum hmuh tlingkhawmte hi Ramthim pual, Building fund, Chhiatni thatnia tanpuina atan an dah thin a ni.
—-
PCD Thuzirbu tlangzarh :
Chhimtuipui District Pentecostal Children Department (PCD) thuzir tur chu Aug ni 31, Zirtawpni khan tlangzarh a ni.
Pentecostal Children Department (PCD) thuzir tur hi District PCD Secretary Bro.L.Khai-U ziak niin a bu hmingah “PCD THUZIR BU & HLA BU” tih a ni a, Aug ni 31, Zirtawpni khan Chhimtuipui District Secretary Rev.Joseph.L.Thlauhthang chuan Pathian hnenah hlanin a tlangzarh.
He Thuzir Buah hian Zirlai(thu) Bung-20 awmin, Hla 33 a awm bawk. Thuzir bu hi Rs.70 man a ni.
—–
Chhimtuipui District hruaitute ; Dist Suptd Rev.Thanchunga Sailo, District Secretary Rev.Joseph L. Thluahthang leh District Treasurer Rev. WL.Thanghre te chuan General Hqrs Office ah Executive Board -ah telin hun an hmang.
—–
Chawimawina :
Sept 1, Inrinni khan T/Upa Vanlalhruaia, Hmarkhawlien te chhungkua chuan Pathian hnena lawmthusawi chawimawina an buatsaih.
He chawimawina programme ah hian Barak District Suptd Rev.H.Lalramlien chuan Kohhran hote Hriak thih rawngbawlna a nei a, Dist Treasurer Evan. Hmangaithang hnen atangin Pathian thu tha tak “I THIL NEIHIN LALPA CHAWIMAWI RAWH” tih thupuia hmangin ngaih thlak a ni a. Rev. H.L.Vunga’n hun khar tawngtai na a nei a, a tawngtai mek lai hian, thlarau malsawmna rawn thlengin boruak a nuam hle. Inkhawm ban lamah pawh zaikhawmna neiin thlarau boruak nuam tak hnuaiah lawmthusawi chawimawina programme ah hian Pathian fakin hun an hmang a ni.
—–
Bial Sunday School Inkhawmpui :
Aizawl East District chhunga Bial hrang hrang te chuan September 7, Zirtawp Zan atang khan Bial Sunday School Inkhawmpui an hmang mek a, he Programme hian Pathianni Zan thleng a awh ang.
Bial Sunday School Inkhawmpui-ah hian Bial hrang hrang te chuan Inrinni khan mahni bial chhung inawpna leh Districta lut tur agenda te ngaihtuahin rorel Inkhawm an nei.
Sunday School Inkhawmpui-ah hian Naupang lamin mal zai, thu inchhang, Recitation leh Group zai tea intihsiakna neiin Bial thenkhat-ah chuan Puitling lamin Lengkhawm zai leh Puitling Zirlaibu atangin Quiz intihsiakna an nei ve bawk.
Tun dinhmunah Aizawl East District chhungah hian Bial 30 awm mekin Puitling leh Naupanga Sunday School hming ziak singkhat leh sangriat vel an awm mek a ni. District Sunday School hruaitute District S.S Director Rev C.Mawizuala leh Treasurer, Upa Rodailova Zote te chuan Zohmun Bial an hmanpui a, District S.S Secretary Evan Hr.Lalrindika chuan Bawngkawn bial-a hmanpui bawk.
—–
District LAD Conference inbuatsaihna :
Kumin October ni 5 atanga ni 7 chhunga Khawzawl bial ten Aizawl East District LAD Conference vawi 25-na an thlen tura atan inbuatsaihna kalpui tan a ni.
District LAD Conference an thlen tur atan hian September 3, Thawhtanni khan Khawzawl Zuchhip Veng Field No 1-ah Pandal sak hna an thawk tan a, mi 50 chuang an thawkchhuak thei a ni. Hnatlang an thawh hma hian hunserh tawi hman niin Khawzawl bialtu Pastor C.Lalmalsawma’n hunserh a hmang. Pandal hi a dung ft 90 leh a vang ft 70-a liana sak tur niin a hming-ah “Thlarau Inpui” tih vuah a ni.
Kumin District LAD inkhawmpui hi a vawi 25-na, Silver Jubillee a nih angin inbuatsaihna pawh chak taka kalpui mek zel a ni a, Kumin Kum chanve District LAD Board chuan “Thlarauva khatin awm rawh u” Ephesi 5:18 tih thupuia hman turin alo rel tawh a, Speaker bik awm lovin mi hrang hrangin hun hman ni se, General LAD Hruaitute bakah Kalay District, Myanmar PLM Hruaitute Inkhawmpui hmanpui tura sawm ni se an tih bakah Pathian thlarau thianghlim awmpuina hnuaia hman a nih theih nan September 30, Pathianni tlaiah Tualchhung tinah chawnghei tawngtai neih turin alo rel tawh a. District LAD Hruaitu lo ni tawh zawng zawng leh tuna ni lai mekte hnenah chawimawina citation hlan ni se tiin ruahmanna a siam bawk.
—
Biak in lungphum phum :
September 4, Thawhleh zingkar khan Thuampui bial, Falkland Biak In sak tur lungphum Rev Rosanga Kawlni, District Superintendent chuan a phum.
Falkland Biak In sak tur lungphum phumna Programme ah hian Bial hruaitute, Kohhran member te leh Local Council aiawh ten an telpui a, Rev. Rosanga kawlni chuan Biak In sak lungphum phumin Pathian hnenah a hlan. Biak In hi a dung ft 40 leh a vang ft 20-a liana sak tura ruahman niin a sak hna hi an thawk nghal dawn a ni. Falkland Kohhranah hian tun dinhmunah member 200 vel an awm mek a ni.
—–
District LAD Executive board :
September 4, Thawhlehni khan District Superintendent room-ah Aizawl East District LAD Executive board neih a ni a, Baord hi Sis.F.Lalawmpuii B/W, President chuan a kaihruai.
Board-ah hian October ni 5 atanga 7 chhunga Khawzawl bial-a District LAD Inkhawmpui vawi 25-na hman tur chungchang thlir lawkna an neih bakah Programme tlangpui turte an ngaihtuah a, Conference agenda Bial atanga lut te thlir lawkna an nei bawk a ni. District LAD Executive board-ah hian District LAD hruaitute an telkim bakah District Kohhranpui hruaitute pawhin an telpui bawk.
—–
Aizawl East District Revival Crusade report :
Bawngkawn bial, Peniel Kohhran ten Evan.Hmingchungnunga, District Revival Speaker-a hmanga August 28, Thawhleh zan atanga Revival Crusade an buatsaih chu September 4, Thawhleh zan kan a tiak.
Crusade neih chhung hian September 2, Pathianni khan T.Upa JH Hrangvunga te chhungkua chuan Pathian hnenah lawmthu sawina neiin September 4, Thawhlehni khan Rev K.Hrangvunga te chhungkaw kaltlangin lawmthusawi chawimawina hi neih leh a ni a, Kohhran hoten hlim takin hun an hmang a ni. He Crusade-ah hian Thlarau Thianghlim dawngthar engemaw zat awmin siamtharlehna chang pawh mi engemaw zat an awm bawk. September 4, Thawhleh zan khan Speaker, Evan Hmingchungnunga kutah hian mi 8 in sual ngaihdamna baptisma an chang.
Rabung bial, Khualen Kohhrana Evan H.Lalhlimpuia, Speaker-a hmanga Revival Crusade hman pawh Pathian Thlarau thianghlim awmpuina hnuaiah hlim taka hman a ni a, September 4, Thawhlehni khan Upa Zakhara te chhungkua chuan Pathian chawimawina neiin Kohhran hoten hlim takin hun an hmang a, September 8, Inrinni khan Upa Rinthanga te chhungkaw kaltlangin Pathian chawimawina neih a ni bawk a ni. He Crusade-ah hian hun engemaw chen Biakin pan ngai tawhlo ten Biakin panin Kohhran dang atang pawhin chhimtu an awm mek zel a ni.
Chhingchhip bial, Thentlangah August 25 atanga September 2 chhung khan Crusade buatsaih a ni a, Crusade-ah hian Rev VL Hnemtluanga, Speaker-ah hmangin mi 10 in sual ngaihdamna baptisma an chang a,mi 15 in Thlarau thianghlim an dawng thar bawk. September 1, Inrinni khan Sis Ziakkungi te chhungkua chuan Pathian chawimawina an buatsaih a, hlim takin hun an hmang.
Serchhip biakinpui Kohhrana Crusade buatsaihah pawh September 1, Inrinni khan Bro Zairemmawia te chhungkua chuan Pathian hnena lawmthusawi chawimawina neiin Kohhran hoten hlim takin hun an hmang a, hun remchang hmasa berah Evan Lalthankima Ralte te chhungkua chuan Pathian chawimawina an nei dawn bawk a ni. He Crusade ah hian Evan H.Lalrinfela, Speaker ah an hmang.
—–
Pentecostal Music School :
Aizawl East District PYD hnuaia Music & Sound Sub-Committee te buatsaih Pentecostal Music School chu September 3, Thawhtanni atang khan zir tan leh a ni.
He Music School hi District Hqrs. Sunday School Hall-ah Class kal niin Music School-ah hian Tonic Solfa zir a ni a, Bro Lalthansanga Colney chuan zirtirna a pe thin a ni. Pentecostal Music School hi Kum 2016 atang khan bul tan a ni a, hemi kum hian zirlai engemaw zatin tha takin an zir chhuak a ni. Class hi October 20 thleng kal tura ruahman niin zing Dar 6:30 atanga 7:30 thleng an kal thin a ni.
—-
Mi thar senglut :
August Thla, rammut rawngbawlna chuan rah duhawm tak chhuah mek zelin; Serchhip bialah sual ngaihdamna baptisma mi 52 in an chang a, Thlarau thianghlim mi 35 in dawng tharin mithar 12 Kohhranah sengluh an ni a, naupiang 5 hlan an ni bawk.
Rammut chhung hian Serchhip Biakinpui-ah Evan H.Lalrinfela Speaker-a hmangin Crusade an nei a, New Serchhip-ah Bro Lalrinnunga, Speaker-a hmangin Crusade neih ni bawkin Pathian chawimawina vawi 3 neih a ni bawk.
Aizawl East District, Darlawn Kohhrana Rammut denchenna Evan Dr.Lalsawivela rawngbawlna kal zelah September 4, Thawhleh zan khan chhungkaw khat, member 6 awmna chu Kohhran-ah sengluh an ni.
Darlawn hmunah hian Evan Dr.Lalsawivela hian tihdam rawngbawlna te neiin Crusade hman chhoh mek zel a ni a, Rammut Crusade chhungkhan Kohhranah mithar 14 sengluh niin mi 9 in sual ngaihdamna baptisma an chang bawk a ni. Darlawn Bial-ah hian Rev T.Lalbiakliana chu Bialtu Pastor in a awm mek a ni.
Thuampui bial, Muanna vengah pawh September 2, Pathianni khan mi 7 in sual ngaihdamna baptisma changin an zinga 2 hi mithar an ni a, Kohhranah sengluh nghal an ni.
—–
Thisen pe :
September 1, Inrinni khan Upper Republic bial PYD te chuan ruahmanna an lo siam tawh angin Aizawl Civil Hospital-a hman turin a thlawnin thisen an pe.
He hunah hian Bial chhunga PYD Member engemawzat an kal khawm a, Rev C.Lalengliana’n hunserh a hmangin; Mipa 10 leh hmeichhia 3 ten avaiin thisen unit Unit 13 an pe a ni.
——
Silver Jubilee lawm :
September 5, Nilaini khan Luangmual Local PYD te chuan an Local PYD dincham vawi 25-na Silver Jubilee an lawm.
Jubilee lawmna inkhawm neih hmain biak in kawtah Jubilee lung hawnna neih a ni a, Lunglei District PYD President Evan.V.Lalduhawma chuan he lungphun hi a hawng a, hruaitu hlui mi 25 ten Jubilee dar vuakna an neih chhunzawm bawk.
Jubilee lung hawnna neih a nih hnu hian biakin ah Silver Jubilee lawmna inkhawm neih chhunzawm a ni a, inkhawm hi Organising Comt.chairman Lalhmingsangan a kaihruai a, hruaitu hlui mi 4 hnen atangin thusawi ngaihthlak niin, zai thiam F.Lalhriatchhungi, Pastor T.Zahmingliana, Lunglei District PYD Choir bakah Jubilee zaipawlte an zai bawk. Local Church Treasurer Upa LH Lalrinmawia chuan Jubilee Souvenir tlangzarhin, Local PYD Secretary K.Lalremruata chuan Local PYD CHanchin a sawi bawk. Luangmual Local-a kum 10 chuang hruaitu lo ni tawh mi 5 te hnenah hruaitu hlun chawimawina Citation hlan an nih bakah, hruaitu hlui hmun danga awm, Jubilee hmang tura lo kal te hnenah thilpek pek theuh a ni bawk.He inkhawm ah hian Village Council Luangmual leh Branch YMA Luangmual te chuan Luangmual Local PYD hnenah hian thilpek an hlan a, P.C.D. ten mawi takin worship dance an entir bawk.
Inkhawm neih zawh hnu hian Jubilee lawmna ruai kilho a ni a, zan lamah Silver Jubilee kharna inkhawm neih leh a ni.
Luangmual Local PYD te hian an silver Jubilee hi Aug.12 Pathianni atanga September ni 5 chhung khan chawl lovin ni 25 an hmang a, chawnghei tawngtai, crusade, TNT tanpuina pek, Sport, Jubilee Night, Social work leh Urlawk zan te hmangin an silver jubilee hi an lawm a ni.
—-
Lehkhabu tlangzarh :
Sept. 3 thawhtanni khan Pentecostal Network Studio, Lunglei ah Evan. F.Lalsanglura ziah ‘Johana bung-3 thu a piantharna chungchang leh tlanna leh chhandamna’ tih bu chu Lunglei District Treasurer Rev. C. Lalrintluanga chuan a tlangzarh.
He lehkhabu hi a duh apiang tan Lunglei Dist. UPC office-a ah bu khat Rs. 70 in a lei theih a ni.
Facebook