Pennet News Service : September 23 -30

Pennet News Service : September 23 -30

——

Missionary Day :

September ni 25, Thawhlehni kha North East India UPC kohhran Missionary Day a nia, Kohhran ni pawimawh a nih avangin kohhran office, Bible College, Bookstall, School leh hmun pawimawhte khar a ni.

Aizawl Khawpui chhunga Tualchhung kohhran tam zawk chuan awmni khamin ruai nen he ni hi hlim takin an hmang a. Khawpui pawn lam leh thingtlang kohhrante chuan zan lamah an hmang thung. Kum tin he ni hi urhsun taka hman thin a ni a, hemi nia thawhlawm leh thilpek dangte pawh Missions rawngbawlna puala lakkhawm thin a ni.

North East India UPC Kohhran hian tun dinhmunah Missionary 174 a ruai mek a, Mizoram chhung bakah state pawn heng :- Delhi, Kolkata, Arunachal, Assam, Upper Assam, Andaman and Nicobar, Bhutan, Dimapur, N. Bengal and Sikkim, Orissa ah te hian rawngbawlna hna a thawk mek a ni.

 General Hruaituten heng hmunah te hian an hmanpui :

Rev. Lalmalsawma Sailo – Tuikhuahtlang kohhranah

Rev. R. Lalrinsanga – Mualpui kohhranah

Rev. Zohmingthanzama – Tuikhuahtlang kohhranah

Rev. R. Lalhawia – Salem kohhranah

Rev. R. Laichhingpuia – ITI Kohhranah

———-

Tawngtai Tlaivar :

Sept ni 25, Thawhleni zan khan General PYD Conference rorelnain a lo ruahman angin India hmarchhak pum huapin tawngtai tlaivar programme buatsaih a ni.

Report hrang hrang kan dawn atanga  a lan danin tawngtai tlaivar programme hian ngaihpawimawh a hlawh hle a, rokhawlhna avanga hmang ve thei lo Local tlem azawng an awm  tih lovah chuan he programme hian ngaihhlut a hlawh hle a, Aizawl khawpui chhunga hmangtu tamzawk chuan tawngtai programme bakah Praise and worship programme buatsaihin hlawhtling takin hun an hmang a ni. General PYD in he programme a ruahman tihhlawhtling tute zawng zawng chungah Geneal PYD President Pastor H. Lalropuia  chuan lawmthu a sawi a ni.

Tin, Hemi zan hian thawhlawm lakkhawm te hi Sheaves for Christ Account-ah dah luh tur a ni a, Bial hrang hrang ten, District kaltlangin General-ah chhunluh tur a ni.

———-

UPCI General Conference :

Khawvel pum huap UPC Kohhran inkhawmpui lian  General Conference 2018 chu Sept ni 25 atanga ni 28 chhung khan Kentucky International Convention Center-ah neih a ni.

UPCI General Conference ah hian chhun lamah Ministry hrang hrang meeting, Khawvel hmun hrang hranga UPC te nena thawh hona thazawk ngaihtuaha inhmuhkhawm, seminar, workshop, Traning neiin nilengin hun an hmang thin a, zan lamah praise and worship programme leh sermon inkhawm a hun hman thin a ni. Zan tin inkhawm service apiangin World Network of Prayer leh UPCI Music Ministry ten rawngbawlna an nei thin bawk. Conference chhunga speaker te :

September 25, Thawhleh zan

  Global Missions Service – Speaker: Terry Shock

—

September 26, Nilai zan

  North American Missions Service – Speaker: Jack Cunningham

—

September 27, Ningani chawhnu

  Children’s Ministries Service – Speaker: Wayne Huntley

Zirtawp zan

  General Conference Service – Speaker: Jerry Jones

—

September 28, zirtawp chawhnu

  Youth Ministries Service – Speaker: Chantry Dean

Zirtawp zanah :

General Superintendent’s Message – David K. Bernard

Asia Regional Director Rev. Lynden Shalm-a’n General Suptd Rev. Lalmalsawma Sailo hnena UPCI General Conference report a rawn thawna langsar zingah hruaitu thenkhat thlan thar chungchang telin; Global Missions Secretary thar atan Scotty Slaydon thlan chhuah a ni a, UPCI General Secretary thar atan Scott Graham an thlang thar bawk. Rev. Lynden Shalm pawh term khat chhung chu Asia Region RD tura ruat nawn leh a ni. Hemi bakah hian Global Mission pual appel ah Dollar  maktaduaih 2 chuang an hmu nghal bawk.

–

Khawvel pumpuiah ram bung 190 ah UPC Kohhran hi din ni tawhin Ram pakhat chhunga luhchilh bikna ( territory ) 35, avaiin countries and Territories 225 ah din a ni tawh a,

UPC in rawng a la bawl lohna ram  hi 20 awmin chungte chu

Africa khawmualpuiah  – ram 8

Asia khawmualpuiah – ram 3

Central America and Caribbean khawmualpuiah  –  ram 1

Europe and Middle East khawmualpuiah – ram 5

Pacific khawmualpuiah  – ram 3

(PIC: UPCI General conf)

 ———–

Social Work Day hman dan tur chungchang hriattirna :

October 2, Thawhlehni hi India hmarchhak Pentecost thalai PYD ten Kum tina kan hman thin a nih angin kumin pawh hian vantlang tana tha leh tangkai thei ang bera hmang tura inbuatsaih leh mekin; Aizawl City PYD chuan Aizawl khawpui chhunga Bial hrang hrangte chu a huhova hmang leh turin ruahmanna a siam a, Aizawl Civil Hospital tihfai hna thawh tur a ni dawn a, Hospital tan thutthleng present a ni bawk ang.

He ni hian Aizawl khawpui chhunga thalai member a tam thei ang ber hnatlanga thawkchhuak turin City PYD chuan min ngen a, chawhma Dar 10:30-ah tan tur niin, Civil Hospital main building kawtah hunserh hman tur a ni a, bial hrang hrangte inchhiarna neih nghal a ni ang.

Hnatlang tur ten Collin bur leh pawnchhia a tam thei ang ber ken tur a ni.

————

 General Hruaitute kartawp Programme :

General Suptd Rev. Lalmalsawma Sailo chuan Tuikhuahtlangah hmangin Sunday School ah zirtirna a pe ang.

General Missions Director Rev. R. Lalhawia chuan Thingsulthilah bial Missions Conference Sesawng vengtharah hmanpuiin Speaker-ah a tang ang.

———-

Joint Conference :

            Sept ni 21-23 chhung khan Lunglei District, S. Vanlaiphai bial LAD & PYD Join Conference vawi – 4 na chu Darzo Local-ah hlawhtling takin neih a ni a. Putlungasih Home Missionary, Evan Simona Hmar chu Speaker ah hman a ni.

 Sept.ni 22 inrinni a an rorel thuchhuak langsar zualte:

LAD :

– Bial buhfaitham tha lawmman siam leh nise.

– Pastor Quarter Side Table siam leh inchhung Parda siam nise.

– Bial huap seminar neih nise.

– 2019 bial LAD budget atan Rs. 12000 pawm a ni.

PYD :

– 2019 Dist. PYD Conference bial huapin kal nise.

– Bial huapin PYD Day hman pahin Sport Meet neih nise.

– Laptop computer lei  nise.

– Pastor Quarters ah Centre Table set dah nise.

– 2019 bial budget ah Rs.19250 pass a ni.

2019 bial LAD & PYD Inkhawmpuina hmun atan Muallianpui Local ruat a ni.

———-

Lawmthusawi chawimawina :

Sept.29, inrinni khan Lunglei District, Thenhlum  Kohhran chuan Pathian hnena lawmthu sawi chawimawina an buatsaih a, Speaker atan District Treasurer Rev.C.Lalrintluanga chu hmangin, hlim takin hun an hmang a, Speaker hi Rev.P.Lalthanga chuan a tawiawm.

——-

Seminar :

 Sept.30 Pathianni chawhnu hian Pukpui bial PYD buatsaihin Venglai Local-ah Leadership tih thupui hmangin Seminar neih a ni dawn a, Resource Person atan District PYD Treasurer Evan.Laldinpuia Sailo chu hman a ni ang.

——–

 Mi thar :

            Sept.23 Pathianni khan Zawlpui Local-ah member thar 2, Kohhranah senglut in sual ngaihdamna Baptisma an chang nghal.

———

PCD Rally :

Lunglei District, Hnahthial leh Theiriat ah Pentecostal Children Department (PCD) ten rally an buatsaih.

1. Sept.29 inrinni khan Hnahthial bial PCD leh Sunday School rally chu Hnahthial Electric biak in ah an buatsaih a, bialtu Pastor Rochungnunga Renthlei chuan Rally hi hawngin a telpui. Rally ah hian Quiz, Lengkhawm zai leh Item hrang hrang hmangin inelna an nei a, Pathianni zan thleng hian hun an hmang dawn a ni.

2. Sept.29 inrinni khan Theiriat bial PCD Sport cum Rally chu Dawn Local-ah neih an a ni a, bialtu Pastor Rev.R.Vanlalenga chuan he hun hi hawngin bial chhung Local hrang hrang PCD ten Sport Item 8 hmangin intihhlimna an nei a, Sept.30 Pathianni hian inkhawm leh Fellowship ten hun an hmang chhunzawm leh ang. District P.C.D. hruaitute pawhin he hun hi an hmanpui a ni.

——

Revival Crusade :

1. Sept.27, Ninga zan atang khan  Rahsiveng bial Missions Department hmalaknain Venghlun Biak in ah Revival Crusade neih a ni a, Speaker atan bialtu Pastor Rev.C.Lalhriatpuia an ruai.

2. Theiriat Local Missions Department hmalaknain Sept.22-25 chhung khan Crusade buatsaih a ni a, Speaker atan bialtu Pastor Rev.R.Vanlalenga leh Local-a Licence Holder awmte hman an ni.

3. Sept.ni 29, Inrinni zan atang khan Thingsai bial PYD te chuan Social Work Cum Revival Bualpui H Local-ah an hmang tan a, Revival Speaker atan bialtu Pastor H.Lallawmsanga an ruai. Thingsai bial PYD te hian a huhoin Oct.2-a Social Work Day lo thleng tur hi an hmang dawn a ni.

———-

Thisen pe :

            Sept.22 inrinni khan Headquarters bial PYD-te chuan Lunglei Civil Hospital-ah thisen Unit 29 an pe. Thisen hi Mipa 27 leh Hmeichhia 2 ten pe in, Civil Hospital-ah an pek chilh a ni.

——-

Pension tur thlahna :

Barak District Silchar Section te chuan an bialtu pastor Rev. Lalthanmawia, October thla a pension dawn tak avangin Sept ni 23, Pathianni khan Bial Hqrs Local -Noksatilla Kohhranah ah bial huapin a thlahna programme ruai nen an hmang.

Rev. Lalthanmawia  Thlahna programme hi Evan. Pauzakhupa, Silchar Bial Secretary chuan a  kaihruai a, Bial chhung Local tin leh Bial Department aiawh ten thlahna thuchah sawiin  thlahna thilpek hran hrang an hlan a, bial chhunga Kohhran hote pawhin thlahna leh duhsakna thilpek thahnem tak an hlan bawk . Bial Kohhranpui chuan Lalpa tana thang a chhuah a ni tih entir nan Thangchhuahpuan sintirin, thuziak (citation) mawi tak an hlan bawk.

Rev. Lalthanmawia hi kum 1992 ah service tanin, Barak District bial zawng zawng – Hqrs Bial, Muolhoi Bial, Silchar Bial, Haflong Bial, Jiribam Bial leh Vangai bial te a bial kim vek tawh a, a vawi hnihna atan Silchar Bialah hian November 2016 khan rawn transfer in hetah hian a pension dawn ta a ni.

License hi kum 38 chhung a kawl tawh a, full time a a thawh hun chhung hi kum 27 ani a, Nauhlan rawngbawlna vawi 252, Baptisma hi 304 chantirin, kohhran hi hmun li heng : Bethel, Boroarkap, Lalpani leh Lalpiengpunji (Zoar) ah te ah Lalpan a dinsak a ni.

Rev. Lalthanmawia hian Bialtu Pastor hna bakah hian District level ah District Treasurer, District Superintendent, Sunday School Director, Missions Secretary, Missions Treasurer leh District Missions Director hna te a lo chelh tawh a ni.

——–

Fehchhuak dawn :

Sept ni 28, Zirtawpni hian Silchar bial Noksatilla Local  chuan Khangbor Local (Vangai Bial) tlawhin an  fehchhuak dawn a, work camp an nei pah nghal dawn a ni.

Tan zan, Zirtawp zan khan T/Upa Lalhmachhuana’n thusawi rawngbawlna a nei a, Inrinni chhunah Biakin sak Hnatlang neiin zan lamah Upa P.K.Vaiphei chuan thusawi rawngbawlna a nei thung.

Pathianni Zing ah Evan. Raldoliana leh zan lamah Evan. Pauzakhupa ten hun an hmang ve leh thung dawn a ni.

————

North Mizoram District hruaitute Programme :

District Superintendent Rev. Laltuanga chuan Sept ni 27, Ningania District rawngbawltu Tirhkoh te puala Retreat buatsaihah Resources person-ah tangin rawngbawlna a nei.

Dist. Treasurer Rev. K.Lalduhsanga chuan Sept. ni 29 Inrinni hian Chanmari kohhrana Pathian chawimawina awma Speaker niin rawngbawlna a nei.

——

Sunday School campaign :

General Sunday School kumpuan “Kan fate i chhanhim ang u” tih chu North Mizoram District Sunday School hruaitute chuan Khawpui chhung kohhran hrang hrangah Campaign nei mekin Pathianni kalta Sept ni 23 khan District SS Secretary Evan. H. Lalrinngheta chuan Hqrs. Bial Mission Vengthlang kohhran tlawhin rawngbawlna a nei a, Dist. SS Director Rev. K. Malsawmtluanga’n Hqrs. Bial vek Nursery kohhranah rawngbawlna a nei bawk.

——-

Seminar :

Mamit Bial LAD buatsaihin Sept. ni 22- 23 chhung khan Mamit Bial Headquarters kohhranah Seminar cum Revival meet buatsaih a ni.

He hunah hian District LAD hruaite te  paper buatsaih zir hovin “Thianghlimna” Sist. Laldawngliani Dist. LAD Secy. buatsaih te, “Buhfaitham” tih Sist. K. Lalrokimi Dist. LAD Treasurer paper buatsaih leh “Chhungkaw Maicham” tih Sist. P.C Lalromawii  Dist. LAD President paper buatsaih te an zir ho.

Inrinni zan atangin Revival Programme hmanga chhunzawmin a tuk Pathianni zan thleng Revivala hun hman a ni. (Pic. Mamit LAD)

——–

Fehchhuak dawn :

District in rawngbawltu Evan. Lalrinzuala  ruaia rawng a bawl mekna hmun Zawlnuam Bial Thinghlunah Bairabi Bial Bethel kohhran te an fehchhuak dawn.

Bairabi Bethel kohhrante hian an kohhran atanga rawngbawla fehchhuak Evan. Lalrinzuala chu, rawng a bawl mekna hmun Thinghlun kohhrante’n an mamawh em em Pulpit leh Thutthleng siam chu hnatlanga tihsak turin kohhranhote’n an rel a, a hun atan October ni 2 thawhlehni hi an ruat a ni. Bairabi Hqrs. Local-a lawi Bro. J-a pawhin Thinghlun kohhran te tan Khuang pek alo tiamsak bawk a ni.

——-

Mi thar :

Sept ni 20 Ninga zan khan Pangbalkawn Local.ah Bialtu Pastor B. Vanlalruata’n mithar 5 Kohhranah a senglut.

Heng mithar sengluh zingah hian Naupang 3 awmin Bialtu pastor hian Pathian hnenah hlanin rawngbawlna a nei nghal bawk. Hei bakah hian Chhungkhat nu leh an fanu tleirawl chu Lalpa Isua hming in baptisma chantir nghal a ni. (Picture: Pangbalkawn)

——-

Diamond Jubilee :

North Mzioram District Headquarters Kohhran PYD te chuan Sept. ni 21-23 hmang khan PYD kum 60 a tlin lawmna Diamond Jubilee an lawm.

 Diamond Jubilee hi North Mizoram District Headquarters Biak in, Tuikhuahtlangah hmangin sept. Ni 21  Zirtawp zanah Jubilee hawnna leh Jubilee mei detna Bialtu Pastor H.Zabiaka’n neiin bul an tan a, hemi zan hi Hruiatu hluite puala hun hman a nih angin PYD lo hruai tawhtute hnen atangin thusawi tawi ngaihnawm tak tak an ngaihthla a ni. Diamond Jubilee lawm tan zan Inkhawm hi President tang lai Bro.Lalvensanga’n kaihruaiin Bro.Lalduhawma Ralte hnen atangin welcome speech leh inhmelhriattirna hun neih anih bakah Evan.C.Lalruatsang hnen atangin Hqrs.Local PYD din kum an chhui dan report ngaihthlak a ni bawk. Hqrs. Local PYD Jubilee Zaipawl zaiin; Thusawi tawi Rev.K.Darsailova Tlangnuam, Rev.Rohmingliana Thingsulthliah, Bro. Lalthanmawia Venghnuai ten thu tawi chibaibukna ngaihnawm tak tak an sawi bawk. Hemi zan vek hian Headquarters pyd din tirh lam atanga tun hun thleng PYD hlimthla Projector-a thlir ho ni bawkin PYD Hruaitu hlui te Bro.H.Lalrinmawia, Republic, T.Upa R.Lalthanpuia Khatla/Hqrs. leh Bro.Lalramzauva Venghnuai/Hqrs. ten chibaibukna thutawi an sawi bawk a ni.

Mal zai Bro.Lalrinawma hnen atangin zai ngaih thlak niin; Hqrs.bial Zaipawl ten fakhla an rem bawk.

Hqrs. Local PYD te hian Jubilee pual hian Sept ni 22 Inrinni khan Aizawl Civil Hospital-ah Dam lo mamawh tena an hnman atan Thisen Unit 22 pein mipa 17 leh hmeichhia 5 ten thisen hi an pe a ni.

Sept. ni 22 Inrinni zan atangin Jubilee Revival Programme-a hman chhoh niin; Speaker Pastor Lalsawmliana Sailo hnen atangin Pathian thuchah ngaihthlak a ni.

Jubilee lawmna pui ber Sept. ni 23 Pathianni zing dar 10:15-ah tanin Jubilee dar PYD hruaitu hlui te leh rawngbawltu pawimawh ten vawi 60 an vua a, chumi hnuah Biak inah revival inkhawm nei lehin tlaiah Jubilee lawmna ruai theh a ni bawk. Pathianni zan hian jubilee Speaker atana sawm pastor Lalawmliana Sailo hnen atang Pathian thuchah ngaihthlak leh a ni.

———

Joint Revival :

North Mizoram District Board rorel anga hun engemaw chen North Mizoram District huam chhunga Bial Joint Revival neih thin chu Mamit Zone-a neih tur Joint revival inbuatsaih  nan Mamit Bial chhunga kohhran mipuite chuan Sept. ni 22 inrinni khan hnatlang pui neiin sumtuak nan kawngkam an sam  a, member 70 chuang an thawk chhuak.

——–

Biak In hawng :

North Mizoram District Supt. Rev. Laltluanga chuan Pathianni kal ta Sept. ni  23 khan United Pentecostal Church :North Mizoram District, Serkhan Biak In chu Pathian hnenah hlanin a hawng.

Biak in hawn Programme hi chawhma dar 11-ah tanin Biak In kawtah kohhran mipuite an kal khawm a, Dist. Supdt. chuan Sam 100:1-5 thu chhiarin  Biak In chu Lalpa Isua hmingin a hawng.

Biak In hawn Inkhawm hi Rev. C.Lalrammuana Bialtu Pastorin a kaihruai a, Evan.R. Lalchhanchhuaha Serkhana rawngbawltu hnen atangin Technical Report ngaihthlak a ni bawk. Technical report atangin  Serkhan Biak In chu February thla atang sak tan niin; Biak in chu a dung 30ft. leh avang 18ft  niin; Tha 150 sen a ni. Biak in sak tanpuina Dist. atangin Rs. 1,50,000 hmuh niin; Bial leh kohhran ten Rs. 40000 chuan an tuak bawk.

Biak in hawn programme hmanah hian Sis. Lalhlupuii zai rawngbawlna neiin; Dist. Supdt. Rev.Laltluanga chuan Pathian thu chah sawiin Upa Vanlalauva’n tunhma chanchin sawiin thu tawi a sawi bawk a ni.

Tlaiah Biak in thar lawmna Ruai hlim takin an kil ho.

——

Revival Camping :

Dinthar Bialtu Pastor Rev. C. Laltlanchhuaha chu Lunglei District Cherhlun Biala awm S. Chawngtui Local Missions Department tena an buatsaih Revival Camping-ah Speaker-ah tangin rawngbawlna a nei.

He rawngbawlna hian Sept. Ni 19-23 chhung awhin hlawhtling taka hun hman a ni a, campers  45 lutin Thlarau thinghlim dawng thar leh Siamtharna chang engemaw zat awmin, mi 3 in Isua hmingin baptisma an chang bawk.  Camp follow-up prog atang pawhin  siamtharna  dawng zelin  kohhran hote an hlawk hle.

Speaker hi  zaithiam  Machhani,  Evan C Vanzeizuala sumsuih, Lalbiakhluna (Mabuanga) Dinthar leh  Zion Lalramngaia  Phainuam ten an puibawm a ni.

——–

Missionary Retreat :

North Mizoram District in rawngbawlna beihpui a thlak bawhzui nana District in rawngbawltu tirhkoh mi 21 khaw hrang hranga a rawih mek te pualin  Sept. ni 27 Ningani khan nileng khan Missionary retreat an buatsaih.

Retreat hi North Mizoram District Headquarters Biak in Tuikhuahtlangah neiin; District superintendent Rev. Laltluanga’n inkhawm a kaihruai a, Rev. Chhiarpuia  District Secretary  leh Rev. K. Lalduhsanga Dist. Treasurer ten zirtirna an pe.

Rawngbawltu kalkhawmte hi an vaiin mi 19 niin; harsatna avanga thei lo an awm bawk.

——-

Bial Missions Conference :

    Aizawl East District hnuaia Bial hrang hrang te chuan September 28, Zirtawp Zan atang khan Bial Missions Department Inkhawmpui an hmang mek a, Pathianni  Zan thleng a awh ang.

Khawmpui hi Bial thenkhat chuan Inrinni atang khan rorel inkhawmin an hmang  tan thung.  District Missions Department leh District Kohhranpui hruaituten hetiang hian hmun hrang hrangah Bial Missions Inkhawmpui hi an hmanpui:

District Missions Director Rev R.Lianzama, chuan Serchhip Bial-ah

District Missions Treasurer Evan Lalthuthlunga chuan Bazar leh Upper Republic Bial

District Kohhranpui hruaitute : Rev Rosanga Kawlni, Superintendent chuan Bazar Bial-ah

Rev Biaksangzuala, District Secretary in Champhai Bialah

Rev Vanlalfela Ramtiam, District Treasurer chuan Bethelhem bial-ah a hmanpui bawk.

Aizawl East District Missions Department hian kumin October 26 atanga 28 chhung hian Khawhai Bial-ah District Inkhawmpui an hmang dawn a, tunah hian a thlengtu tur Khawhai Bial te pawh nasa takin an inbuatsaih chho mek a, he Inkhawmpui hmang tur hian Kohhran member zawng zawngte kal vek turin min sawm a ni.

——–

T-Shirt tlangzarh :

September 23, Pathianni chawhnu khan Kum 2019-a Aizawl East District PYD Conference Kum 25-na, Silver Jubilee puala District PYD Fund Raising Committee ten T-Shirt an siam tlangzarh a ni.

Jubilee T-shirt Tlangzarhna inkhawm hi Bro R.Vanlalpeka, District PYD Treasurer chuan kaihruaiin Fund Raising Committee Chairman T.Upa F.Lalthlangliana chuan  a tlangzarhna a. T Shirt hi rawng chi thum: Grey, Blue leh Maroon a siam niin Collar (a nghawng nei) leh round neck (a nghawng neilo) niin Collar hi Rs 350 man tur niin, round neck hi Rs 300 man tura ruahman a ni. T Shirt hi October thla atang hian Aizawl east District Office, Ramhlun S ah lei thei a ni ang.

District PYD Fund Raising Committee te hian sum tuaknan Kum 2019 Calendar siam turin hman an la mek a, NEI PYD Logo thar nemkaina Bial leh Tualchhung hman tur PYD Flag an siam a, a duh tan la order thei reng a ni.

——

Pension in thlah :

September 25, Thawhlehni khan Aizawl East District Missions Director Rev Darchhawna chu Kum 30 chuang Fulltime-a rawngbawl hna a thawh hnuah Pension-in thlah a ni.

Rev. Darchhawna thlahna hi September 24, Thawhtan zan khan Thuampui Biakin-ah hman a ni a, Rev Biaksangzuala, District Secretary chuan inkhawm a kaihruai. He hunah hian Rev KVL Hmangaihkima, Thuampui bialtu Pastor chuan hunserh hmangin Sis.Laldinpari leh Sis Lalhriatchhungi te hnen atangin fak hla ngaihthlak a ni.

Pension thlahna thilpek District aiawhin Rev Vanlalfela Ramtiam, District Treasurer-in a hlan bakah District chhunga Department hrang hrang, Bial Missions aiawh bakah Tualchhung leh mimal atangin thlahna thilpek engemaw zat hlan a ni bawk. Rev Darchhawna thlahna hunah hian Rev Rosanga Kawlni, District Superintendent, Rev R.Lalhawia, General Missions Director, Rev R.Lianzama, District Missions Secretary leh mi engemaw zat hnen atangin thusawi ngaihthlak a ni a, thusawitu te hian an ui thu leh Pathian tana mi inpe, rawngbawlnaa mi thahnemngai tak a nih thute, theihtawpa Lalpa rawngbawl mi a nih thu an sawi hlawm a ni.  Rev Darchhawna pension thlahna hun hi Rev HL Thakunga, Bazar bialtu Pastor chu malsawm tawngtaiin a titawp a ni. He hunah hian Bial chhung mai bakah bial pawn atang pawhin amah ngainatu mi engemaw zat an tel a ni.

Rev Darchhawna hian Kum 1982 khan Local License la in 1986-ah General License ala leh a, Kum 1990 khan Ordination License a nei leh a ni. Kum 1988 khan bialtu Pastor atan lak niin a Service chhung hian Suangpuilawn bial, Chhingchhip bial, Bazar bial, Khawzawl bial, Suangpuilawn bial bakah Bethlehem bial leh Thuampui bial te a vawng hman a ni.

 Kum 2016 khan District Missions Director mawhphurhna chelh tanin Pension-a a chhuah thleng hian Missions Director mawhphurhna hi a chelh a ni. Rev Darchhawna hian mi 2015 sual ngaihdamna baptisma chantirin nau 1250 a hlan a, nupa tuak 250 inneih tir hmanin Kohhran 5 a phun a, Kohhran tluchhe tawh 3 tundin hna a thawk hman a ni. Heng bakah hian Kum 2009 – 2010 chhung khan Executive Board member niin 2010 atanga 2011 chhung District Revival Committee Chairman a nih bakah District Motor Board Chairman, Building Committee member, Theological Board member leh Thianghlimna Committee member te alo ni tawh bawk a ni.

———

Silver Jubilee lawm :

September 21 atanga 23 chhung khan Hnahlan bial, Khuangphah Kohhran te chuan an Kohhran Kum 25 tlin, Silver Jubilee an lawm.

 Silver Jubilee lawmna hun hi September 21, Zirtawp zan khan tan niin a lawmna pui ber chu September 22, Inrinni khan hman a ni a, Jubilee lungphun hawnna Rev Rosanga Kawlni, District Superintendent chuan neiin Biakin chhungah a lawmna hun hman chhunzawm a ni a, tlai-ah Jubilee lawmna ruai hlim takin Kohhran hoten an kilho a ni.

Khuangphah Kohhran Silver Jubilee lawmna hunah hian Rev Rosanga Kawlni, District Superintendent, Pastor R.Lalfamkima, Hnahlan bialtu Pastor, Rev C.Lalzuiliana, Bawngkawn bakah Pastor K.Lalhmingmawia, E.Lungdar Bialtu Pastor leh Evan Chinngaihdama, USA te hnen atangin thusawi an ngaihthla thin a ni a, Sis Lalnunpuii leh Bial chhung atanga zaimi te hnen atangin fak hla ngaihthlak thin a ni bawk. Khuangphah Kohhran te hi tunah hian member 80 chuang awrh chauh niin Biakin thar an sa mek bawk a ni. Silver Jubilee an lawmnaah hian Bial chhung atangin telpuitu engemaw zat awmin Kohhran hoten hlim takin hun an hmang a ni.

——–

Charge hlan :

September 26, Nilaini khan District Office-ah District Missions Department hruaitu tharten charge inhlanna hun an hmang.

He hun hi Rev Rosanga Kawlni, District Superintendent chuan kaihruaiin Rev Biaksangzuala, District Secretary hnen atangin thutawi ngaihthlak a ni a, tawngtaina hun a hmang bawk a ni. Thusawi tawi District Missions Director kalchhuak Rev Darchhawna, Rev R.Lianzama, Missions Secretary kalchhuak bakah Rev Lalrema, Evan Lalramzauva, Upa Rodailova Zote, Evan Lalthuthlunga, Missions Treasurer te hnen atangin ngaihthlak a ni bawk. Hengtiang hian Charge inhlanna neih  a ni:

Rev Darchhawna, Missions Director kalchhuak chuan Rev R.Lianzama, Director thar hnenah Charge hlanin Rev R.Lianzama, Secretary kalchhuak chuan Evan Lalramzauva, Bethlehem hnenah Secretary mawhphurhna a hlan bawk a ni.

Kumin kumchanve District Board khan District Missions Director Rev Darchhawna pension-a a chhuah dawn avangin District Missions hruaitute hi alo ruat tawh a, heng hruaitu tharte hian Rev Darchhawna, September 25-a pension-a a chhuah tak avangin September 26, Nilaini khan Charge inhlanna an nei ta a ni.

District Missions Department hruaitu thar charge inhlanna neih rual hian District Motor Board in alo ruahman tawh angin District Driver te pawhin charge inhlanna hetiang hian an nei nghal bawk. Superintendent Driver Bro C.Lalpianthanga chuan Superintendent Driver thar Bro Lalnuntluangfela hnenah hlanin Bro Lalnuntluangfela, Treasurer Driver chuan Bro Lalhruaitluanga hnenah a hlan a, Bro R.Lalengliana, Secretary Driver chuan Bro C.Lalpianthanga hnen hlanin Bro Lalhruaitluanga’n Missions Driver mawhphurhna chelh thar tur Bro R.Lalengliana hnenah a hlan bawk a ni. Charge Inhlanna hunah hian District Office staff te an telkim hle a ni.

——–

District LAD conf inbuatsaihna :

October 5 atanga 7 chhunga Khawzawl bial ten Khawzawl Zuchhip Field No-1-a Aizawl East District LAD Inkhawmpui an thlen tur atan inbuatsaihna peih thawkhat a ni ta.

 He Inkhawmpui thlengtu tur Khawzawl Bial te pawh nasa taka inbuatsaihin Pandal sak pawh pum a ni tawh a, tunah hian a chei mawi hna an thawk chho leh mek a ni.  Pandal hi a dung ft 90 leh a vang ft 70-a liana sak niin a hming-ah “Thlarau Inpui” tih vuah a ni. October 4, Ninga Zan-ah Pandal hlanna Inkhawm, Pandal-ah hian an nei dawn bawk a ni. Tarlan tawh angin Kumin-ah hian Thupui-ah “Thlarauva khatin awm rawh u” Ephesi 5:18 thu hman tur niin Thupui thensawm hmangin Sis Merry Lalnunsangi B/W, Sis Zaithangliani B/W, Sis Dr.Lalhmasai B/W bakah Sis Lalchangliani Sailo B/W leh Rev Biaksangzuala, District Secretary te hnen atangin thusawi ngaihthlak thin a ni dawn a ni. Kumin District LAD Inkhawmpui hi a vawi 25-na, Silver Jubilee a nih angin ropui taka lawm tum a ni a, District LAD Board Kumin June 15-a neih chuan Conference, Silver Jubillee pual hian Ballpen siam, Lantern/ Ballon chhuah bakah a duh apiang in theih turin theitu siam ni se tiin alo rel tawh a, September 30, Pathianni tlaiah Tualchhung tinah chawnghei tawngtai neih tura tih niin District LAD Hruaitu lo ni tawh zawng zawng leh tuna ni lai mekte hnenah chawimawina citation hlan ni se an ti bawk. Aizawl East District LAD Inkhawmpui hi Myanmar PLM Hruaitute pawhin an telpui dawn bawk a ni.

——-

Aizawl East Dist chhunga Revival Crusade leh Lawmthusawi Chawimawina :

1. September 25, Thawhlehni khan Serchhip Chanmari Kohhrana lawi Sis Hmangaihthangi te chhungkua chuan Pathian chawimawina an buatsaih a, Kohhran hoten hlim takin hun an hmang.  Speaker-ah Evan H.Lalrinfela an ruai a ni.

—

2. September 24, Thawhtanni khan Bro C.Lalrinfela te chhungkua, Khawzawl Kawnzar te chuan Pathian hnena lawmthusawi chawimawina an buatsaih a, September 25, Thawhlehni khan Sis Laltlanmawii te chhungkua chuan chawimawina hi chhunzawmin, Speaker-ah Pastor C.Lalmalsawma an hmang a ni.

——-

3. Zemabawk Vengpui Kohhran te chuan September 15 atanga 23 chhung khan Rev. K. VL Hmangaihkima Speakera hmangin Revival Crusade an buatsaih.

Crusade kal zelah September 23, Pathianni khan Kohhran chuan lawmthusawi chawimawina neiin hlim takin hun an hmang a ni. Crusade neih chhung hian sual ngaihdamna baptisma mi 7 in changin Thlarau thianghlim mi 1 in a dawng thar bawk a ni.

——-

4. September 16, Pathianni khan N.Khawlekah Rev H Vanlalchhana rawngbawlna kal zelah Upa Lalhmunmawia te chhungkua chuan Pathian hnena lawmthusawi chawimawina an nei a, September 18, Thawhlehni khan Upa Zamuanga te chhungkua chuan chawimawina hi an nei leh bawk. Hemi zan hian mithar 1 chuan Suangpuilawn bialtu Pastor Laltlanhlua Hnamte kutah sual ngaihdamna baptisma a chang a ni.

Rev H Vanlalchhana rawngbawlna atang hian mithar 5 Kohhranah sengluh an ni.

——

5. September 23, Pathianni khan Champhai Bethel Kohhrana lawi turin mithar 1 sengluh a ni a, Bialtu Pastor Lalhmangaihawma kutah sual ngaihdamna baptisma a chang. Evan HK Lalhmangaiha te rawngbawlna Armed Veng Kohhran-ah pawh September 23, Pathianni zan khan mi 2 in sual ngaihdamna baptisma changin an zinga pakhat hi mithar a ni.