Pennet News Service : September 17 -23
——
Missions Field-ah mi thar seng :
Sept ni 17, Thawhtanni khan Dimapur Missions Field, Diphu bial chhunga Donsing Terang khuaah member thar 57 Kohhranah sengluh an ni.
Mi tharte hi General Missions Director Rev. R. Lalhawia’n Kohhranah senglutin rawngbawlna hun tha tak an hmang a ni.
—–
Tawngtai tlaivar :
General PYD Conference vawi 40-na April 20th in arel angin, NEI Unit chhunga PYD Member zawng zawng tan September ni 25, Thawhleh zan hian Tawngtai tlaivar Programme a buatsaih dawn a, he hun hi ngai pawimawha tha hnem ngai tak a lo bawhzui turin General PYD President Pastor H. Lalropuia chuan min ngen a ni.
Tawngtai Thupui tur te :
1) NEI hnuaia Missionary zawng zawng te tan
2) NEI Kohhranpui leh Department hruaitu te tan.
3) District tin Kohhranpui leh Department hruaitute tan.
4) Bial Kohhranpui leh Department hruaitute tan
5) Local Kohhranpui leh Department hruaitute tan
6) UPC NEI Unit a Kohhran member zawng zawng tan
7) Pathian thlarau thianghlim a lo thlen zel theih nan
8) NEI huamchhunga ram hruaitu te tan.
9) Khawvel ram pum puia Pentecost Kohhran member zawng zawng tan
10) Local PYD ten tul leh pawimawh an tih apiangte leh adangte.
Hemi zan hian thawhlawm lakkhawm tur niin, Sheaves for Christ Account-ah dah luh tur a ni a, Bial hrang hrang ten, District kaltlangin General-ah chhunluh tur a ni.
——
Missionary Day :
Tukar thar Thawhlehni Sept ni 25 hi Kohhran ni pawimawh Missionary day a ni a, he ni hian Kohhran Office, Kohhran zirna in, Book Stall leh Kohhran hmun pawimawh dangte pawh khar a ni ang. Hemi puala thawhlawm leh thilpek lakkhawmte hi District kaltlangin General-ah chhun luh tur a ni.
Kumim 2018 Missionary Day hi tlangtin leh mual tina Kohhran ho ten hlim tak a an hman theih nan NEI UPC, Gen. Superintendent Rev. Lalmalsawma Sailo chuan duhsakna a hlan a ni.
—–
Chawnghei tawngtai runpui :
India hmarchhak pum huapa Chawnghei tawngtai runpui buatsaih chu vawiin tlai September 23 hian hman zawh a ni ang.
North East India UPC Kohhran rorelna sang, General Conference in a lo pass angin September ni 17 atanga tanin zanin tlai thleng a chawnghei tawngtai hun hman chu tualchhung Kohhran tin ten anbawhzui tha hle a, heng thupui hrang hrang hmang hian tlai tin chwnghei tawngtainahun an hmang thin a ni:
Sept ni 17, Thawhtan zan: Sual thupha chawia tawngtaina:
Sept ni 18, Thawhleh zan: Pathian ngaihdamna leh Malsawmna dila tawngtaina.
Sept ni 19, Nilaini Zan: Kan ram chhiatna lo thleng thei laka Pathian venna dila tawngtaina
Sept ni 20, Ningani zan: Thlarau thianghlim harhna lo thlen theihnan.
Sept ni 21, Zirtawpni zan: Thianghlimna kawnga Kohhranten chak lehzuala ke kan pen theihnan.
Sept ni 22, Inrinni zan: Ram lak rawngbawlnaa chak zawka ke pen a nih theihnan.
Sept ni 23, Pathianni zan: Inremna leh thawh hona tha a awm zel theihnan tih te a ni.
—-
Hruaitute Programme :
Rev. Lalmalsawma sailo, General Superintendent leh Rev. Zohmingthanzama, Genral Treasurer-te
chuan North Mizoram District Headquarters Local PYD ten kum 60- an din champha an lawman ah telpuiin, Rev. Lalmalsawma sailo hian Jubilee souvenir a tlangzarh.
Rev. R. Laichhingpuia, Gen. SS. Director chuan, Lunglei Rahsi veng Bial ten Ni 22 Sept. 2018 a Seminar an neihna ah resource person ah tangin rawngbawlna a nei.
——
Lehkhabu tlangzarh :
Sept ni 14, zirtawpni khan Lunglei District UPC Office-ah District Literature Committee buatsaih ‘INDIA KOHNA’ tih lehkhabu tlangzarh a ni.
Lehkhabu tlangzarh inkhawm hi Lunglei District Literature Committee Chairman Rev.Ralkapkunga Khiangte chuan a kaihruai a, District Secretary Rev.C.Vanlalena chuan hunserh hmangin, Literature Committee Secretary Evan.C.Lalremchhunga chuan Literature Committee hmalakna hrang hrang report-a pe a, Lunglei District Superintendent Rev.R.Lalrosanga chuan lehkhabu hi a tlangzarh a ni.
He Lehkhabu tlangzarh inkhawmah hian Rev.Saidawla, Rev.C.Zohmingliana, Rev.C.Darkhuma leh Evan.R.Ropianga ten thusawina an nei bawk.
He lehkhabu ‘INDIA KOHNA’ tih hi Rev.Ellis Luther Scism-a ziah niin Lalhmangaiha Chawngthu lehlin a ni a, kum 1986 khan UPC NEI Literature Committee chuan a lo published tawh a, he lehkhabu hi lei tur a awm tawh loh avangin UPC NEI Literature Committee phalnain Lunglei District Literature Committee chuan a reprint leh ta a ni.
He lehkhabu hi District Office ah a duh apiang tan Rs.50/- in lei theih a ni.
———
Seminar :
September 22 inrinni khan Haulawng bial buatsaihin Seminar Zotuitlang Local-ah neih a ni a, resource person atan District Treasurer Rev.C.Lalrintluanga leh bialtu Pastor R.Lalsangzuala te hman an ni.
——-
Joint Conference :
Sept ni 21, Zirtawp zan atang khan S.Vanlaiphai bial PYD leh LAD Join Conference vawi 4-na chu Darzo Local-ah neih a ni.
Conference ah hian Speaker atan Putlungasih Home Missionary Evan.Simona Hmar an ruai a, September ni 22 Inrinni nilengin LAD leh PYD te hian rorelna an nei a, bial in relbawlna leh District-a thlen tur thu pawimawh tak tak an ngaihtuah.
S.Vanlaiphai ah hian Pastor Jerry Lalmuanawma chu bialtu Pastor-in a awm mek a ni.
——
Thisen pe :
Sept.22, inrinni khan Lunglei District Headquarters bial PYD te chuan mamawh apiangte hman turin Lunglei Civil Hospital-ah thisen an pe.
Thisen an pek hma hian Headquarters biakin tualzawl ah inkhawm tawi buatsaih hmasak niin bialtu Pastor Rev.C.Hmingthanfala chuan hunserh a hmang a, Bial chhunga PYD member thahnem tak an kalkhawm. Thisen hi Civil Hospital-ah an pek chilh a. Chanchin buatsaih lai hian report kimchang kan hre hman lo a ni.
—–
Lawmthusawi chawimawina :
Sept.15 inrinni khan Hnahthial Electric Local-ah Bro.Lalnuntluanga te chhungkua chuan Pathian hnena lawmthu sawi chawimawina an buatsaih.
Thlarau boruak nuam tak hnuaiah hlim takin hun an hmang a, September 17 thawhtanni khan chawimawina hi neih chhunzawm lehin Kohhran hote an hlim hle. He chawimawina ah hian Speaker atan Rev.PC.Lalrosanga an ruai a ni.
———
Aizawl East District
———
Dist OB Fehchhuak :
Aizawl East District PYD OB meeting in alo rel tawh angin September ni 15 leh 16 chhung khan Serchhip Bial leh Serchhip Dinthar Bial-ah rawngbawlin an fehchhuak.
Serchhip bial te hian Bial Hqrs. Biakinpui-ah lo dawngsawngin Serchhip Dinthar bial te pawhin Bial Hqrs. Dinthar-ah an lo thleng a, Pathianni Chawhma leh chawhnu-ah Serchhip Dinthar bial-ah hian rawngbawlna an nei a Serchhip bial-ah hian Inrinni zan leh Pathianni zanah rawngbawlna an nei bawk.
Serchhip bial-a rawngbawlna an neihah hian Inrinni zan khan Evan C.Lalremruata, Asst.Secretary chuan thusawi rawngbawlna neiin Pathianni zan-ah Evan F.Malsawmtluanga, Secretary in rawngbawlna a nei thung.
Serchhip Bialah hian Bial PYD Hruaitute nen Biak inpui Committee room-ah inkawmkhawmna neiin Serchhip bial in hma a lak mekna leh hmachhawp a neih te leh Sub-Committee peng hrang hrang report ngaithlain an inkawm khawm.
Serchhip Dinthar bialah Pathianni chawhma leh chawhnu-ah rawngbawlna an nei a, Chawhma lamah Evan C.Lalchhuanga, Vice.President chuan thusawi rawngbawlna neiin Chawhnu-ah Bro.R.Vanlalpeka, Treasurer in rawngbawlna a nei thung.
Aizawl East District PYD OB te hian July 14 leh 15 hmang khan Chhingchhip Bial-ah fehchhuah programme hmangin rawngbawlna an lo nei tawh a, remchang hmasaberah Sakawrdai bial-ah rawngbawlna nei turin ruahmanna an siam leh mek a ni.
———
Thianghlimna Committee :
September 15 leh 16 hmang khan Aizawl East District Thianghlimna Committee hruaitute chuan Champhai Bial-ah Thianghlimna Campaign neiin hun an hmang.
September 15, Inrinni zan khan Bial Hqrs. Kahrawt Kohhranah Campaign bul tanin Pathianni chawhma khan Electrict Kohhranah neih leh a ni a, zan-ah Venglai Kohhranah an nei leh bawk.
District Thianghlimna Committee hruaituten Champhai Bial-a Campaign an neihah hian Rev C.Lalengliana, District Thianghlimna Committee Chairman chuan thusawi rawngbawlna nei thinin Thianghlimna Committee Treasurer, Bro K.Lalbiaknunga leh Driver Lalnuntluangfela ten an tawiawm a ni. Champhai biala hun an hman chhung hian hun rei tak chhung zuk leh hmuam lo ti tawh, Kohhran rorel zah avanga nghei ta, Upa Dr.Romalsawma, kawmna hun an hmang nghal.
September 15 leh 16 vek khan District Thianghlimna Committe tirhin Upa Thanhlira, Upper Republic chuan Rabung Bial Aiduzawl leh Rabung Kohhranah Thianghlimna Campaign hi a nei bawk.
District Thianghlimna Committee hian District chhung hmun hrang hrangah Campaigner tir kualin hma a la kalmek a, August ni 18 atanga 26 chhung khan N.Vanlaiphai Bial Khawlailung Dinthar, Khawlailung Bunghmun, N.Vanlaiphai Hqrs. Local bakah Rawlkhang Local, Lungkawlh Local leh Leilet Local-ah te Evan Lalramzauva chuan Campaign hi alo nei tawh a. August 4 atanga 13 chhung khan Evan K.Lalzarliana pawhin Zohmun bial leh Sakawrdai Bial-ah Campaign hi a nei tawh bawk a ni.
——-
Lawmthusawi chawimawina :
September 15, Inrinni khan Upa C Liansiama te chhungkua, Thingsulthliah bial, Tlangnuam Kohhrana lawi te chuan Pathian hnena lawmthusawi chawimawina buatsaihin Kohhran ten hlim takin hun an hmang.
Hetah hian Speaker-ah Rev Rosanga Kawlni, District Superintendent chu hman a ni a, Pathianni zan thleng khan Revival Crusade-a hun hman chhunzawm a ni. September 15, Chawimawini hian mithar 1 in sual ngaihdamna baptisma changin Kohhranah sengluh nghal a ni. September 17, Thawhtanni vek khan T.Upa Lalfakawma te chhungkua chuan Pathian chawimawina hi an nei chhunzawm leh a, Speaker-ah Rev Rosanga Kawlni, District Superintendent bawk hman leh niin chawimawina programme neih chhung Pathianni leh Thawhtanni khan mi 2 in sual ngaihdamna baptisma Rev Rosanga Kawlni kutah hian an an chang leh bawk a ni.
——-
Fehchhuak :
September 16, Pathianni chawhnu leh zan hmang khan Bawngkawn bial, Peniel PYD te chu North Mizoram District Tlangnuam PYD te tlawhin an fehchhuak.
He hunah hian Inkhawm kaihhruai Tlangnuam PYD te chuan thawkin Pathianni chawhnu khan Bro R.Lalrammuana, Peniel PYD chuan tanna hun a hmang a, Bro David Lalhnehzova hnen atangin thusawi ngaihthlak a ni a, Peniel PYD leh Tlangnuam PYD Secretary te hnen atangin report ngaihthlak a ni bawk. Zan Inkhawmah Bro Lalchhaimawia’n tanna hun hmangin Bro Lalchhuansanga, Peniel leh Sis Lalfakzuali, Tlangnuam PYD ten fak hla sa in Bro Kros Lalchawisanga, Peniel hnen atangin thusawi ngaihthlak a ni a, Peniel Zaipawl ten fak hla an sa bawk a ni. Pathianni chawhnu inkhawm ban khan Fellowship Programme hlim taka hman niin hetah hian Itemn hrang hrang hmangin intihhlimna neih a ni a, kalkhawm ten hlawkthlak an ti hle a ni. Peniel PYD ten fehchhuah programme an hmanah hian PYD member 30 chuang an kal thei a ni.
——-
Hla kutpui Org Comtt :
September 11, Thawhlehni khan Peniel Sunday School Hall-ah Aizawl East District PYD 2018 Hla Kutpui Organising Committee, Evan C.Lalchhuanga Chairman kaihhruaiin neih a ni.
Kumin October 20 atanga 21 chhunga Zemabawk Vengpui Biakin-a District huap Hla Kutpui hman tura Programme tlangpui enhona neih niin Hla kutpui hawngtu atan Pastor Laltlanhlua Hnamte chu ruat a nih bakah inkhawm apianga thusawi tu tur ruat nghal an ni a, Inrinni zanah Evan F.Lalsangliana, Mualpui. Thupui: Music lama hmasawnna; Pathianni chawhma-ah Bro Lalthansanga Colney, Bethlehem. Thupui: Solfa lama hmasawnna; Pathianni chawhnu-ah Evan H Lalrinawma, Upper Republic. Thupui: Hla phuah leh zai lama hmasawnna bakah Pathianni zanah Rev R.Laltlankima, District PYD President te chu ruat an ni.
——
Rev. C. Chhuanvawra Lalpa hnenah a chawl ta :
September 15, Inrinni chawhnu Dar 1:45 khan hun rei tak chhung Cancer natna a vei hnuah Rev C.Chhuanvawra chuan van kohna chhangin Lalpa hnenah a chawl ta.
Rev C.Chhuanvawra hi Evan Biaksanga leh Sis Biakluti te inkarah September 16.1940 khan Zuchhip khuaah alo piang a, unau pasarih zinga a upa ber a ni. A nupui Sis Hrangthanchhungi nen March 1960 khan Rev H Sangkhuma kutah Zemabawkah inneiin fa 10, mipa 5 leh hmeichhia 5 an nei a ni. Rev C.Chhuanvawra hian Kum 1964 khan rawngbawlna License la in Kum 1968 khan North Mizoram District PYD President hna alo thawk tawh a, Kum 1980 khan Pastor atan lak a ni. Bialtu Pastor hna a thawh chhung hian Lengpui bial, Bairabi bial, Thingsulthliah bial, Darlawn bial bakah Sakawrdai bial, Bethlehem bial leh Bazar bial te vawngin Kum 2005 September khan Pension in a chhuak ta a ni.
Rev C.Chhuanvawra hi hun rei tak atang khan natna in a tlakbuaka, Damdawiin hmun hrang hrangah an inenkawl hnuah August 15.2018 khan Grace Nursing Home-ah admit a ni a, theihtawpa enkawl a nih hnuah alo beisei thin, a rawng a bawlsak Lalpa chuan natna tuar tawh lo turin September 15, Inrinni chawhnu Dar 1:45 khan a hnena chawl turin a hruai ta a ni. September 16, Pathianni Chawhnu Dar 12:30 khan Rev R.Lalrinsanga, General Secretary chuan vuina hun a hmangin Salem veng mipui bakah hmun hrang hrang atangin a mah thlahliamtu an thahnem hle a ni.
——-
Aizawl East District Hruaitute Programme:
Rev Rosanga Kawlni, District Superintendent chuan September 22, Inrinni-a Hnahlan bial, Khuangphah Kohhran ten an Kohhran Kum 25 tlin, Silver Jubilee lawmna an hmanah telpuiin Pathianni zan thlenga Revival Programme an hman chhunzawm-ah Speaker-ah tangin rawngbawlna a nei.
Rev Biaksangzuala, District Secretary chuan Bro Vanlalduhawma te chhungkua, Armed Veng Kohhrana lawi ten Pathian chawimawina an neihah a telpui.
——
CHHIMTUIPUI DISTRICT
——–
Mi thar seng :
Sept ni 16, Pathiannni khan Vahai Missions Field-ah chhungkaw khat member 5 te Tuipang Bialtu Pastor MH.Robin Lalthanmawia chuan UPC (NEI) member ni turin Isua hmingin a senglut a, nau hlan nghal a ni bawk.
—–
Baptisma chang :
Sept ni 16, Pathianni khan South Lungpher Kohhran chuan Baptisma khur hawnna neiin mi-3 in Lalpa Isua hmingin sual ngaihdamna baptisma an chang a, Baptisma rawngbawlna hi Evan K.Rinthara Local Chairman chuan a nei a ni.
——-
Home Mission field tlawh :
Chhimtuipui District District Hqrs Local, New Siaha kohhran chuan Sept ni 16, Pathianni khan Amobyu Vaithie(Zero) Home Mission field tlawhin rawngbawlna an nei.
He intlawhtawn Programme ah hian Dist Hqrs local kohhran member thahnem tak kalkhawmin, Rev.Hc.Mangliana leh Evan.T.Vanlaltana ten thusawi rawngbawlna an nei a ni. Zero Biak In sak tanpuinan hian
Dist Hqrs local chuan kohhran aiawhin Rs.5000 an hlan a, Upa.C.Ngurchhawnmawia’n Rs.1000 hlanin T.Upa.C.Lalchansanga’n sanapui tha tak a hlan bawk.
———
Thilpek hlan :
Sept ni 15, Inrinni khan Siaha bial LAD te chuan Sofa set Sectional pastor Quarters Siahatla local ah an dah a. Siaha College Veng local LAD te pawhin Biak ina hman turin Water cooler thar an dah bawk.
——–
CENTRAL DISTRICT
——–
District LAD Conference :
Sept ni 14-16 chhung khan Central District LAD Conference vawi-46 na chu tluang takin neih zawh a ni.
Speaker atan hian Evan C. Zoramthara North Mizoram District-in tirhkoh ram tlan atana an hman lai mek chu hman niin, a naute 2 in an tawiawm a, Zaithiam K. Rodingliana’n zaia rawngbawlna a nei bawk a.
Thupui atan hian “I rawngbawlna kha hlen rawh” (2 Timothea 4:5) thu hman niin, Thlarau lam malsawmna pawh an dawng nasa hle a ni. Pathianni chawhnuah hlim takin tisa ruai an theh a ni bawk. Khawmpui ah hian Central District puipa ten kim takin an hman pui, home missions field atang pawhin Evangelist ten an hmanpui bawk a ni.
——
BARAK DISTRICT :
——
Lawmna Maicham :
Sept 15, Inrinni khan Jiribam Biala Mongbung Kohhranah Upa S.K.Hao Haokip te chhungkua chuan LAWMNA MAICHAM tiin Bawngpa pakhat leh vawk pahnih talhin Pathian hnena lawmthu sawi chawimawina an buatsaih.
He lawmthusawi chawimawina kaltlang hian Kohhran hoten thlarau thianghlim awmpuina thar duhawm tak an chang a, an lawm hle. Rev. H. Lalramlien, Barak Dist Superintendent leh Rev. Lalthanmawia, Dist Missions Director te pawhin he chawimawina hi an hmanpui a ni.
——-
N. MIZORAM DISTRICT :
——-
North Mizoram District hruaitute Programme :
District Superintenddent Rev. Laltluanga chuan Sept ni 22 leh 23 Inrinni leh Pathianni hmang hian Sihphir Bial Serhkhanah Biak in hawnna a nei ang.
District Missions Director Rev. C. Lalthantluanga chuan tun Pathianni Sept ni 23 hmang hian Kanghmun Bialah Missionary Support a zawng ang.
District Sunday School Director Rev. K. Malsawmtluanga chuan Sept. ni 23 Pathianni zing hian Hqrs. Bial Nursery kohhranah Sunday School kumpuan “Kan fate i chhanhim ang u” tih thupui hmangin campaign a nei anga, Pathianni zanah Tuikual S kohhranah campaign hi a neih chhunzawm ang.
——
Diamond Jubilee lawm dawn :
September 21-23, 2018 chhung hian North Mizoram District Headquarters Local PYD te chuan Headquarters Biak In, Tuikhuahtlang ah Diamond Jubilee an lawm a, September 21 zirtawp zan khan Jubilee hawnna leh hruaitu hluite pualin hun an hmang.
September 22 inrinni ah Jubilee pualin PYD ten thisen an pe a, September 23 Pathianni zing inkhawmah Jubilee dar vuak niin, Jubilee pual hian Revival service neih a ni bawk a. Speaker atan Pastor Lalsawmliana Sailo an ruai.
——
Bial seminar :
Sept. ni 22 Inrinni khan mamit Bial LAD ten ruahmanna an siam angin, Bial huap seminar an buatsaih a. North Mizoram District LAD hruaitu pahnih Sist. Laldawngliani Dist. LAD Secretary leh Sist. K. Lalrokimi Dist. LAD Treasurer ten zirtirna an pe.
——
Lawmthusawi chawimawina :
North Mizoram District Superintendent Rev. Laltluanga chuan Sept. ni 14 -16 hmang khan Kawnpui Venglai kohhran Church Board Treasurer Upa H. Lalzarliana te chhungkuain Kohhran kaltlanga Pathian Chawimawina an neih leh Revival Programme kohhranhote’n an buatsaihah Speaker-ah tangin rawngbawlna a nei.
Rev. Laltluanga hi Sis. Lalngaihawmi Lengpui, Bro. Lalhawngliana, Chamring leh Bro. R. Lalnuntluanga ten an tawiawm a ni.
Chawimawina leh Revival Programe hi Sept. ni 14 Zirtawpni zanah tanin Chawimawina petu Upa H. Lalzarliana te chenna inah inkhawm a ni a, Speaker Rev. Laltluanga hnen atangin Pathian thuchah ‘Engkim tan hunruat a awm’ tih thu hmangin Pathian thu ngaihthlak a ni
Sept. ni 15 Inrinni chawhma dar 11:00 ah Chawimawina hunserh tanin, Upa H. Lalzarliana te inah vek Pathian Chawimawina Inkhawm hman chhunzawmin; Bialtu Pastor Rev. C. Lalramthanga’n inkhawm a kaihruai a, Chawimawina petu chhungkua te tan Dist. Supdt. Rev. Laltluanga chuan hriakthih rawngbawlna a neihsak a, Pathian thuchah ropui tak a sawi bawk. Chawimawi ni hian thlarau lam hlapuite nen hlim takin hun hman a ni a, Sunday School Naupang zingah thlarau dawngthar engemaw zat awmin; Inkhawm banah zaikhawmna neih a ni bawk.
Inrinni zan atanga Pathianni zan thlengin Kawnpui Venglai Biak Inah revival programme-a hun
——-
Ram lei :
Sept ni 14 Zirtawpni khan Hunthar Bial Lungverh hmunah North Mizoram District chuan kohhran ram atan ram tha tak mai Rs. 300000-in an lei.
——
Sunday School Hall hawng :
Sept. ni 16 Pathianni zing khan Tlangnuam Bial chhung Melthum Kohhran SS Hall chu Dist SS Director leh Tlangnuam Bialtu Pastor ni bawk Rev. K. Malsawmtluanga chuan a hawng.
Hemi rual hian Tlangnuam Bialte’n kumtina an lo tih thin angin Melthum Kohhran tanpuina sum Rs.15000 chuang an hlan bawk. Sunday School Hall hawn leh Bial tanpuina sum hlan prog ah hian Bialpui OB Bial SS Director leh Secy bakah Tlangnuam Kohhran Vice Chairman Upa Liankhuma te an tel a. Sunday School Hall thar lawmna thingpui inho a ni bawk.
——–
Chawnghei tawngtai :
Hunthar Bial Headquarters Kohhran Hunthar local LAD ten an rorel bawhzuiin Sept ni 14 zirtawpni tlai khan zanriah chawi ngheiin tawngtaina an nei a, Hemi zan hian member 38 lai chhuakkhawmin tawngtaiin an tlaivar a ni.
LAD te Programme siamah hian Kohhran hruaitu leh thalai then khat ten an telpui bawk.
——–
Mi thar seng :
Zawlnuam bial Luimawi ah rawngbawltu Bro Lalramchhuanmawia rawngbawlna Lalpan mal a sawm zel a, Sept ni 16, Pathianni khan member thar pahnih Pentecost kohhranah seng luh an ni. Rawngbawltu Bro. Lalramchhuanmawia’n Kohhranah a senglut a, Bialtu pastor K. Malsawmkima’n nau pakhat a hlan a, mithar pahnihte Lalpan Isua hmingin baptisma an Chantir bawk.
——
Crusade :
Chaltlang kohhrante’n ruahmanna an neih angin Sept Ni 14 Zirtawp Zan atang khan Chaltlang Biak in ah Crusade neiin Crusade Speaker ah Gen Superintendent Rev Lalmalsawma Sailo hman a ni.
Sept. ni 15 Inrinniah lawmthusawi Chawimawina Sist Ramngaii te chhungin Kohhrana an pek hmangin Chawimawina Programme hman zawm a ni a, Speaker hnen atangin thuchah tha tak ngaihthlak a ni. Chawimawina petu Sist. Ramngaii hi Pathianin a kut hmanga tihdam rawngbawlna ropui tak a pek mek niin; taksa damna beiseiin mi tam takin an pan mek a ni.
Crusade hi Pathianni zan thleng neih niin Pathian thlarau awmpuina hnuaiah hun hlimawm tak hman a ni a, Crusade neih chhung hian Baptisma rawngbawlna neiin mi pahnihin Lalpa Isua hmingin Sual ngaihdamna Baptisma an Chang bawk a ni. (Pic. Chaltlang Crusade)
———-
Doctrinal & Senior Dept MEET :
Thenzawl Bial Sunday School Department hmalaknain Sept. ni 15 leh a tuk Pathianni (Sept16) khan Doctrinal & Senior Dept MEET an buatsaih.
Meet hi Thenzawl Vengthar local ah hlawhtling taka hman niin; intihsiakna item hrang hrang1.Changsawirual“2.
Meet buatsaih hi Bial chhung mipui ten an hlutin hlawkthlak an ti hle a ni.
——
Missions Field tlawh :
Kolasib Venglai Bial PYD te chuan Sept ni 14-16 chhung khan Assam Missions Field, “Gossaigaon Section” tlawhin an fehchhuak.
He an kalna tur puala budget siam hmangin Gossaigaon Section chhunga biakin la sak zawh loh, “Chaudhurighat” a biakin bang chu tile bel niin, tin a chhuat pawh cement a zut ani bawk ani. Ahmun hma hi ahlat deuh avangin hmanrua leh tul leh pawimawh ang te leiin, a hnathawh hi Gossaigaon Bialtu, Pastor M. S. Dawngliana leh Pastor Thangchuanga field Director ten an lo thawk a ni.
Gossaigaon Bial chhunga local hrang hrang leh Preaching point te tlawhkual niin, PYD member kal khawm te hian Biakin a phah tur pher (carpet) neilo te an awm avangin ahmunah hian carpet leina tur te thawhkhawm nghal bawk. He Field visit ah hian member 19 an kal a ni.
Facebook