General Sunday School Board :
Oct ni 24, Ningani khan Central District, Tura-ah General Sunday School Board neih a ni.
General Sunday School Board hi General Sunday School Director Rev. R. Laichhingpuia’n a kaihruai a, General Kohhranpui hruaitu atangin General Suptd Rev. Lalmalsawma Sailo leh General Secretary Rev. R. Lalrinsanga ten an telpui. North East India UPC hnuaia District 12 atangin Board member te pawh an kal kim hle. Board hian kum 2020 a General Sunday School Budget pharh a ni a, budget atan hian Rs. Nuai 38 ruahman a ni. Missions Field-a Sunday School zirlaibu lehlin chungchang, Calvary Bible College puala Budget pek nise tih te, Sunday School Examination Board chungchang leh Zirlaibu ziak tute honorarium pek dan chungchang te a ngaihtuah a, thu chhuak kimchang erawh karleh lamah tihchhuah a ni ang.
————
Khawvel huap rawngbawlna thuthar :
1. Leadership conference :
Oct ni 16-18 chhung khan Africa khawmualpuia UPC hruaitute intawhkhawm All Africa Leadership Conference, Ghana ramah neih a ni.
All Africa Leadership Conference ah hian Africa region chhunga UPC awmna ram 41 a ram 38 aṭangin hruaitu mi 300 vel an pungkhawm a, UPCI General Supdt Rev. David K. Bernard leh Global Missions Director Rev. Bruce Howell hovin hruaitu lian ten hun an hmang a, thupui Apostolic till the End tih lam hawiin ‘Restoration, refocus, re-energize’, ‘Spiritual vs Religion’, ‘Spiritual vs materialism’, ‘Spiritual vs sensationalism’, ‘Apostolic Relationships’, ‘They turned their world upside down’ tih bakah thupui hlawm té pawimawh tak tak hmanga thusawi leh zirtirna ngaihthlak ṭhin a ni a, hnam hrang kalkhawm an nih avangin thusawi/zirtirna pawh Portuguese, French, Swahili, Malagasy ṭawnga lehlin ṭhin a ni.
2. October ni 18 -19 chhung khan Canada ram khawpui pakhat Toronto-a, First Church United Pentecostal kohhranah Worldview 2019 Conference hlawhtling tak neih a ni a, he hunah hian Rev. Bryan Abernathy, Rev. Michael Tuttle, Rev. James Corbin, Rev. Charles Robinette te speaker atan hman an ni.
—–
General hruaitute Programme :
General Superintendent Rev. Lalmalsawma Sailo, General Secretary Rev. R. Lalrinsanga te leh General Sunday School hruaitu Director Rev. R. Laichhingpuia, Secretary Rev. R. Vanlalawia, Treasurer Evan F. Lalsangliana te chuan Central District Tura-ah General Sunday School Board neiin hun an hmang mek a, Sunday School Board hi Oct ni 24, Ningani khan an nei a ni. Oct ni 26 leh ni 27 hian Dimapur Missions Field tlawhin rawngbawlna an neih chhunzawm nghal a, Dimapur Field chhunga Rongtharbong Biak in leh Khatkhati Biak in hawnna an neih chhunzawm dawn a ni. Ruahman dan chuan Oct ni 29, Thawhlehniah Aizawl an thleng ang.
General Treasurer Rev. Zohmingthanzama chuan Oct ni 25 atanga ni 27, chhunga North Mizoram District Missions Conference, Dist Hqrs Biak in Tuikhuahtlanga neih mek chu a hmanpui.
General Missions Director Rev. R. Lalhawia chuan Arunachal Field Director mawhphurhna a lak tel avangin Oct ni 15 atanga ni 23 chhung khan Field tul leh mamawh hrang hrang buaipuiin hun a hmang a, Oct ni 19 atanga ni 21 chhung khan Manigong ah hun hmangin Oct ni 24, ninga ni khan dam takin Aizawl a thleng.
———–
District hrang hrang rawngbawlna chanchin :
Lunglei District :
Oct.18-19 chhung khan Pentecostal Children Department (P.C.D) Lunglei District buatsaihin Meet hlawhtling takin neih a ni a, Quiz Competition leh Worship Dance Competition hmang ten inelna neih a ni.
Oct.18 zirtawp zan khan U.P.C. Conference Hall, Chanmari-ah Meet thawhkhatna hi Quiz Competition hmangin neih a ni a, he hun hi District P.C.D. Asst.Secretary R.Laldinmawia chuan a kaihruai a, Local pakua ten Bible (Tirhkohte Thiltih), Countries and Capital leh PCD zirlaibu ( a lian) atangin intihsiakna an nei a, hetiang hi Result a ni.
1-na Luangmual Local P.C.D.
2-na Venghlun Local P.C.D.
3-na Bazar Local P.C.D.
Pakhatna Luangmual Loccal-te hian Rs.5000 leh Certificate an dawng a, Pahnihna Venghlun Local-te hian Rs.3000 leh Certificate dawngin Pathumna Bazar Local-in Rs.2000 leh Certificate an dawng bawk.
Mimala chhang dik hnem ber Remruatsangi, Venghlun Local hnenah Rs.500 pek a ni a, intihsiakna a tel zawng zawngte hnenah Rs.500 theuh pek a ni bawk.
Pakhatna Luangmual Local P.C.D.aiawha tel te hi C.Vanlalnghaka leh Jenny Hmingtanmawii te an ni.
Oct.19 inrinni khan Lunglei Gov’t College Multipurpose Hall-ah Meet thawh hnihna hi Worship Dance Competition hmangin neih leh a ni a, he hun hi District P.C.D. President Rbt.K.Lalrintluanga chuan a kaihruai a, District P.C.D. Treasurer Jacob Ramengmawia chuan hunserh hmangin, nikum 2018 PCD Meet ‘Worship Dance Competition’-a pakhatna Bazar Local P.C.D-te an lam bakah, 2018 PCD Meet ‘Solo Competition’-a pakhatna PC.Lalrengpuii, Zobawk Local chuan mawi takin kalkhawmte zaiin a awi bawk. Tin, District Child Protection Unit (DCPU) atangin Pi S.Lalrotluangi, Legal Cum Probation Officer chuan naupangte himna tur leh inven dan tur hrang hrangte zirtirna a pek bakah District P.C.D. Adviser Rev.PC.Lalfakawma chuan thusawina a nei bawk. Hetiang hi Worship Dance Competition Result a ni.
1-na College veng Local P.C.D.
2-na Rahsiveng Local P.C.D.
3-na Bazar Local P.C.D.
Pakhatna hian Rs.6000 leh Certificate an dawng a, Pahnihna hian Rs.4000 leh Certificate dawngin Pathumnain Rs.3000 leh Certificate an dawng bawk. Intihsiakna a tel zawng zawngte hnenah hian Rs.1000 theuh pek an ni.
————-
Study Tour :
Kum tina anlo tih thin angin Christian Education Centre (C.E.C) School-te chuan Study Tour nei turin Oct.21 thawhtanni khan Lunglei an chhuansan a, Shillong leh Guwahati hmun pawimawh hrang hrangte an tlawh ang a, ruahman lawk ang chuan Oct.30 nilaini ah Lunglei an let ang.
Study Tour nei tur hian zirlai naupang 28 leh zirtirtu 4, an vaiin 32 an kal a ni.
————
Rawngbawltu ni :
Oct.26 inrinni khan Lunglei District UPC Conference Hall-ah Headquarters Local-te chuan rawngbawltu ni an hmang a, Resource Person atan District Superintendent Rev.C.Vanlalena leh Rev.R.Lalrosanga te hman an ni a, thupui atan ‘UPC khawvel chanchin’ leh ‘Isua lo kal lehna’ tih hman a ni.
He rawngbawltu niah hian upa, rawngbawltu leh an nupuite bakah Department hruaitute an tel a ni.
———–
Thianghlimna Campaign :
Lunglei Distirct chhunga Pastor Bial hrang hranga Thianghlimna Committee ten Campaign neiin hma an la kal mek.
(i) Oct.20 Pathianni khan Haulawng bial Thianghlimna Committee hruaitute chuan Haulawng Lamthuamthum Local-ah Campaign an nei.
Campaign hi chawhma inkhawmah Evan.Simona Hmar, bial Thianghlimna Committee Secretary chuan neiin, zan lamah Evan.R. Lalhmingthanga bial Thianghlimna Committee Chairman chuan a nei bawk.
Haulawng bial Thianghlimna Committee-te hian November 17 Pathianni hian Zotuitlang Local-ah Campaign hi an nei leh ang.
(ii) Oct.20 Pathianni khan Pangzawl bial chhunga Thianghlimna Committee-te chu hmun 7 ah inthenin bial chhung Local hrang hrangah Campaign neiin hun an hmang bawk.
iii) Oct.20 Pathianni khan Chhipphir bial Thianghlimna Committee hmalaknain Sekhum Local-ah leh Mualthuam N Electric Local-ah te Campaign neih a ni a, Sekhum Local-ah hian bialtu Pastor LH.Lalchhandama chuan ‘Eirukna kawnga Thianghlimna’ tih thupui hmanga thusawiin, Mualthuam N Electric Local-ah hian Evan.R.Lalrokhawma, Bualpui V Home Missionary chuan ‘Zuk leh hmuama thianghlimna’ tih thupui hmangin Campaign a nei bawk.
———-
Bial Missions Conference :
Oct.18-20 chhung khan Lungsen bial Missions Conference vawi 36-na chu Lungsen N Local biak inah neih a ni a, Speaker atan Evan.F.Lalsanglura chu hman a ni, thupui atan I Kor.9:16 ‘Chanchin tha hril suh ila, ka chung a pik dawn si a’ tih chu hman a ni a, Oct.19 inrinniah rorelna neih niin, an rorel langzar zingah bial huapin Crusade neih nise an tih bakah nakum inkhawmpuina tur hmun atan Rangte N Local nise an ti bawk.
———–
Joint Conference :
i) Oct. 25 zirtawp zan atang khan Zawlpui bial PYD & LAD Joint Conference chu Zawlpui Local-ah neih tan a ni. He Conference-ah hian Speaker atan Haulawng bialtu Pastor Rev.R. Lalsangzuala chu hman a ni a, Thupui atan ‘I din thar leh ang u’ tih chu hman a ni. He inkhawmpui hi zai thiam Laldinpari chuan a hmanpui bawk.
Joint Conference lai Oct.27 Pathianni chawhnu hian District Thianghlimna Committee-te chuan Thianghlimna Campaign an nei bawk ang. (Pic. Rev.R.Lalsangzuala)
ii) Oct.25 zirtawp zan atang vek khan Chawngte bial P.Y.D. leh L.A.D. Joint Conference chu Lungrang S Local-ah neih tan a ni a, Speaker atan Luangmual bialtu Pastor Rev.Lalbiakdika Chawhte chu hman a ni a, Thupui atan ‘Thuthlung kha rawn pawisa ang che’ tih chu hman a ni.
Oct.26 inrinniah rorel a ni ang a, Oct.27 Pathianni chawhnu inkhawmah bialtu Pastor Rev.B.Kamliana chuan Sacrament rawngbawlna a nei bawk ang. (Pic.Rev.Lalbiakdika Chawhte)
iii) Oct.18-20 chhung khan Sertlangpui bial P.Y.D. leh L.A.D. Joint Conference chu Thuampui Local-ah neih a ni a, Speaker atan bialtu Pastor T.Zahmingliana chu hman a ni a, Thupui atan ‘Mawhphurhna hlen’ tih hman a ni. Oct.19 inrinni khan rorel a ni. An rorel tlangpuite.
P.Y.D.-te chuan Bible ralchhan tih kal zel nise, HIV Awarness Campaign neih nise, bial huapin Intodelh tih thupui hmangin Article in ziah siak nise an tih bakah Target tlak hmasa lawmman siam nise an ti bawk.
L.A.D.-te chuan Bible ralchhan tih kal zel nise, ASC Home naupang Rs.5000 in kum 2020 chhung atan Sponsore leh nise, Pastor Quarters-ah Dunlop 3×6 ft. pahnih dah nise an tih bakah bial Conference-ah rorel palai kum 70 chin chawimawina Rs.200 pek thin nise an ti bawk.
He Conference hi District P.Y.D. Secretary Evan.Laldinpuia Sailo leh Treasurer Evan.Lalringzuala Pachuau ten an hmanpui.(Pic. Sertlangpui bial PYD& LAD joint Conf.)
——–
Oct.16-22 chhung khan College veng Local PYD-te buatsaihin Crusade neih a ni a, Speaker atan Rev.K.Malsawmtluanga, Vairengte bial (North Mizoram District) chu hman a ni. Crusade hi hlim taka hman niin Oct.22 thawhlehni khan Pi C.Thanghnuni te chhungkuain Rs.50000 an thawh hmangin Pathian chawimawina neih a ni a, hlim takin hun an hmang.
———-
Lunglei District chhunga Bial hrang hrang rawngbawlna chanchin :
i) Oct 12-20 chhung khan Tlabung bial Mission Department leh District Mission Department bultumin Chawnpui Local-ah Crusade /rammut na neih a ni a, bial chhung Local tin ten Biakin khar in he hun hi an hmanpuia, Oct.20 Pathianni khan bialtu Pastor R.Lalremsiama chuan mi thar 1 a lawm lut a, mi 4 in baptisma an chang bawk. Baptisma rawngbawlna hi Crusade Speaker Evan C.Remruatkima chuan neiin kohhran hote an hlim hle.
ii) Oct.19 inrinni atanga tanin Pangzawl bial kohhranpui hmalaknain rammut beihpui thawh hnihna chu Rawpui Local-ah neih tan a ni a, Speaker atan Vaisam Home Missionary Evan. Lalhriatmawia chu hman a ni.
(iii) Oct.22 thawhlehni khan Bunghmun Local-ah Pathian chawimawina neih a ni a, Speaker atan bialtu Pastor Lalengzauva chu hman a ni a, hlim takin hun an hmang.
(iv) Oct.21 thawhtanni khan Bunghmun bial L.A.D.te chuan Seminar Bunghmun Local-ah an buatsaih a, Resource Person atan bialtu Pastor Lalengzauva chu an hmang a, thupui atan ‘Thianghlimna’ ‘Nute mawhphurhna’ leh ‘Chhungkaw maicham’ tih te an hmang a ni.
———-
Golden Jubilee :
Lunglei Venglai Local-te chuan an Local kum 50 tlinna Golden Jubilee lawmna programme Oct.16-20 chhung khan hlim takin an hmang.
Oct.16 nilai zan khan Jubilee hawnna leh Souvenir tlangzarhna inkhawm Pandal-ah hman a ni a, he hun hi Evan.C.Lalremchhunga chuan kaihruaiin Jubilee hawnna Sist.C.Lalkhawmi chuan a nei a, District Superintendent Rev.C.Vanlalena chuan Souvenir a tlangzarh.
Oct.17 nilaithawhtan zan khan Pandal-ah vek hian thin zan hman a ni a, he hun hi Rbt.K.Lalremruata chuan kaihruaiin, kaltate hriatrengna hun hman anih bakah PYD,LAD leh PCD ten Special item hmuhnawm tak tak an entir. Oct.18 zirtawpni chhun leh zan lamah te hian Variety Programme hman a ni a, he hunah hian Venglai kohhran chanchin thlir hona neih a nih bakah Special Item hmuhnawm tak tak thlir ho a ni.
Oct.19 inrinni khan Golden Jubilee lawmna pui ber chu neih a ni a, he hunah hian Jubilee lungphun hawnna District Superintendent Rev.C.Vanlalena chuan neiin, Baloon chhuah leh Jubilee dar vuakna neih chhunzawm a ni. Hemi hnu hian biak inah Jubilee inkhawmna neih chhunzawm niin, he hun hi Upa Vanmawia, Chairman Venglai Local chuan kaihhruaiin Upa Zoramdina Ralte, Secretary Venglai Local chuan report a pe a, Venglai Local PCD, PYD, LAD bakah Pukpui bial PYD, District PYD choir-te bakah Vanlalpari Ralte te chuan zaiin rawngbawlna an nei a, Rev.C.Lalrintluanga, District UPC Treasurer chuan Jubilee thuchah puanchhuahna neiin tlai lamah Jubilee lawmna ruai kilho a ni.
Oct.19 inrinni zan lamah leh Oct.20 Pathianni ah te Jubilee hi Revival inkhawma chhunzawm a ni a, he Revival inkhawmah hian Rev.PC.Lalfakawma District UPC Secretary leh Rev.C.Lalrintluanga District UPC Treasurer-te chu Speaker-ah hman an ni.
———-
Member thar :
Oct.20 Pathianni khan Laisawral Home Missions Field-ah bialtu Pastor Lalengzauva chuan mi thar 3 Kohhranah a senglu.
——-
Fehchhuak :
Oct.25-27 chhunga hun hmang turin Thenhlum bial PYD-te chu rawngbawlin an fehchhuak a, Tlabung bial PYD-te Tlabung Local-ah an tlawh.
———-
Intuaitharna Programme :
Oct.19-20 chhung khan Mualthuam Venglai Local P.Y.D.te chuan intuai tharna programme an hmang a, Oct.19 inrinni zan atanga Oct.20 Pathianni zan inkhawmah te P.Y.D. ten inkhawm programme zawng zawng changin Bro.R.Lalmuanpuia, Bro.A.Lalhmunmawia leh Bro.Joel Lalhmuaksanga ten thusawina an nei a ni. (Pic. Intuaitharna)
————–
Aizawl East District :
District Missions Conference :
Aizawl East District Missions Conference vawi 26-na Thingsulthliahah October 25, Zirtawp zan atang khan tan a ni ta.
Inkhawmpui hi Rev H.Dingliana chuan hawnna neiin Pathian hnenah hlanna a nei a, Kumin District Missions Inkhawmpui-ah hian Thupui hranpa nei lovin heng mite hnen atang hian thusawi ngaihthlak thin a ni:
Zirtawp zanah: Evan H.Kristiana leh Rev R.Lalthanzuala
Inrinni zanah: Rev Pc.Lalnghakliana leh Rev Darchhawna
Pathianni chawhma: Rev R.Lalhawia, General Missions Director
Pathianni Chawhnu: Rev HL Thakunga
Pathianni zan: Rev Rosanga Kawlni, District Superintendent
Inrinni nileng khan Thingsulthliah Biakin-ah rorelna Rev R.Lianzama, Director kaihhruaiin neih a ni a, rorel ve lo tan Inkhawmpui neihna hmunah vantlang inkhawm neih a ni a, Evan TC Kapzathanga chuan inkhawm kaihruaiin Evan HK Lalhmangaiha hnen atangin thuchah ngaihthlak a ni.
Aizawl East District Missions Inkhawmpui-ah hian inkhawm apiangin mal zai bakah zaipawl hnen atangin fak hla ngaihthlak thin a ni bawk. Kumin hi Aizawl East District Missions Department Kum 25-na, Silver Jubilee a nih angin a lawmna neih nghal a ni a, Silver Jubilee pual hian pen sem a nih dawn bakah Department hrang hrang te pualin thusawi tawi minute 10 chhung pek an ni a, Inrinni zan-ah District PYD, Pathianni Chawhma-ah District LAD bakah Pathianni chawhnu-ah District S.S aiawh ten thusawina an nei ang. Pathianni chawhma-ah District Treasurer kaihhruaiin lawmman semna neih a ni anga, Pathianni chawhnu-ah District Secretary kaihhruaiin chawimawina sem a ni bawk ang.
———
Kumpuan Nite :
October 18, Zirtawp zan khan Aizawl East District PYD hnuaia Kumpuan Sub-Committee te buatsaihin ITI YMA Hall-ah Kumpuan Nite hlawhtling taka hman a ni.
Kumpuan nite session khatna Bro. Vanlalhruaia, Kumpuan Chairman chuan kaihruaiin Sis Pc.Lalremruati’n hunserh a hmang a, Bro HK Lalneihsanga, Secretary hnen atangin District PYD Kumpuan Committee ten hma an lakna leh hmachhawp hrang hrangte ngaihthlak a ni a, Evan C.Lalremruata, District PYD Asst.Secretary, Kumpuan OB Incharge hnen atangin thutawi ngaihthlak a ni.
Session hnihna Bro. R. Lalbiakfela’n host in; District PYD President Rev R.Laltlankima’n thalaite intodelh tura tan la zel turin a sawm a, Kumpuan pual Short Clip tlangzarhna a nei nghal. Short clip hi Kumpuan, Intodelh tura infuihtharna lamhawi niin whatsapp status tur tawk chiaha siam a ni a, Kohhran Group hrang hrangah tlangzarh nghalin PYD member leh a duh apiangte status atana hmang theuh turin min ngen a ni.
Aizawl East District PYD ten Kumpuan Nite-an hmanah hian Intodelh tih thupuia hmangin Seminar neih a ni a, hetah hian Resource person-ah Sis Betty H.Lawmsangpuii chu hman niin ani hnen atang hian Intodelhna tura hmalak a tulna hrang hrang bakah Intodelh tura thawhrimna leh taima taka thawh a tul thute, mahni hnathawh-ah chian a tul thute sawiin thalai kalkhawmte chu thahnemngai taka Intodelh tura hna thawk turin a fuih a ni.
District PYD Kumpuan Committee ten Short Film competition an buatsaih result puanna leh lawmman semna neih nghal a ni a, pakhatna: Upper Republic Bial niin pahnihna: Bazar bial niin pathumna: Mualpui bial an ni a, Pakhatna Upper Republic Bial Short film siam hi enhona neih nghal a ni. He hunah hian Aizawl khawpui chhunga Bial hrang hrang bakah Kawlkulh bial atangin PYD member an kalkhawm a member kalkhawm te hi an vain 200 chuang an ni
District PYD Kumpuan Committee te hian October 20, Pathianni hmang khan Kawlkulh bial-ah rawngbawlna an nei chhunzawm a, Inrinni zanah hun hmasa Bro. HK. Lalneihsanga’n hmangin Bro. R. Lalbiakfela’n hun hnuhnung a hmang a, Pathianni chawhnuah Bro. Vanlalhruaia leh Bro. PC Lalbiakdika ten hmang ve lehin; Pathianni zanah Bro. Cs. Lalrothuama’n hun a hmang bawk. Campaign-a hun hman chhungin Bro. Lalmuanpuia leh Kawlkulh Bial Zaipawl ten zaia rawngbawlna an nei thin bawk.
He hun an hman chhung hian District Kumpuan Committee te hian Kawlkulh khawchhunga PYD member mahni eizawnna hnaa intodelh, mi entawn tlakte kawmna hun an hmang bawk a ni.
———
Thianghlimna Campaign :
October 20, Pathianni hmang khan District Thianghlimna Committee tirhin Darlawn bial-ah Upa H.Thanhlira chuan Thianghlimna Campaign hlawhtling takin a nei.
October 19, Inrinni zan khan Darlawn Kohhranah Campaign hi neiin Pathianni chawhma khan Ratu Vengpuiah leh Pathianni chawhnu-ah Ratu Melkawn-ah neiin Pathianni zan-ah Darlawn-ah bawk Campaign hi a nei leh a ni. Rawngbawlna hlawhtling taka neiin Darlawn bial ten an hlawkpui hle a ni. Upa H.Thanhlira te hian Darlawn Kohhran tan Chawhtawlh pahnih, Kohhran ten a tul anga an hman atan an hlan bawk a ni.
October 20, Pathianni hmang vek hian Evan Lalramthara chuan District Thianghlimna Committee tirhin Suangpuilawn Bial-ah Thianghlimna Campaign hlawhtling takin a nei bawk a ni.
——-
School Establishment Committee :
October 19, Inrinni khan Aizawl East District PYD School Establishment Committee neih a ni.
Committee hi District Committee room-ah Rev R.Laltlankima, Chairman kaihhruaiin neih a ni a, hunserh Rev Rosanga Kawlni, District Superintendent chuan a hmang a ni. Kumin 2019 District PYD Inkhawmpui-in District chhungah School din ni se a tih angin District Board chuan School din chungchang ngaihtuah turin School Establishment Committee a din a, Committee chuan District PYD Education Sub-Committee te zirchiang tura a tih angin Education Sub-Committee te hian an zirchianna an thehluh chu School Establishment Committee hian ennnawnna an nei leh a, Committee chuan zirchianna chu tha tawk thawkhat-ah ngaiin District chhungah School din chu tha tih a ni a, District Kohhranpui Board-ah hriattirna leh din phalna thehluh ni se an ti a ni. School Establishment Committee-ah hian District PYD OB te bakah District Kohhranpui hruaitute leh Aizawl East District chhunga School enkawlna lama tawn hriat nei tawhte ruat an ni a, Committee-ah hian member an kal tha hle a ni.
———
Sunday School Seminar :
October 20, Pathianni Chawhnu khan Serchhip Dinthar Bial Sunday School Department buatsaihin Bial huap Sunday School Seminar neih a ni.
Evan Hr.Lalrindika, District S.S Secretary chu Resource person-ah hman a ni. Resource person hnen atang hian Zirtirtute mawhphurhna hrang hrang bakah Zirtirtute tana tangkai tur thu tha tak tak ngaihthlak niin Zirtirtute chu hna ropui tak thawktu an nih avanga inthlahdah hman an nih loh thute, zuk leh hmuam leh ruihtheihthil laka fihlim a tul thute ngaihthlak a ni bawk. Sawihona hun tha tak neih niin Seminar-ah hian bial chhung atangin member 50 chuang ab kalkhawm a, hlawk takin hun an hmang a ni. District S.S Secretary hian Inrinni zan atanga Pathianni zan thleng khan Serchhip Dinthar Bial-ah hian rawngbawlna a nei chhunzawm nghal a ni.
Serchhip Bial leh Bazar Bial Sunday School Department te pawhin Kumpuan pualin hma an la chho mek zel a, October 20, Pathianni chawhma leh zan hmang khan Serchhip Bial te hian Serchhip khawpui chhunga Bial chhungah Sunday School Kumpuan pualin Campaign hlawhtling takin an nei a, Bazar bial te pawhin Campaign hi nei chho zelin Bial chhunga Local 6-ah Campaign hi nei tawhin Local khat an la hmabak a ni.
———
Free Health Check up :
Aizawl East District Hqrs. Kohhran te chuan N.O.A Olympic programme kal zelah October 20, Pathianni Chawhma Inkhawm ban khan District Committee room kawtah Free Health Check Up hlawhtling takin an nei. He hunah hian Sis Dr. Grace Lalruatfeli bakah Nurse pahnih Sis Lalremruatfeli leh Sis Melody Lalduhawmi ten damlo en in BP Check, Blood Sugar Test te neih a ni bawk. He hunah hian mi 70 chuang an inentir a ni.
———–
Member thar :
Serchhip Biakinpui PYD leh Kohhranpui hmalaknaa August 10.2019 atanga Serchhip Bial, Sialhau hmuna rawngbawlna chuan rah duhawm a chhuah mek zel.
Rawngbawlna hi Evan Philip VL Hmuchhuaka chuan neiin August thla khan mithar pakhat Kohhranah sengluh a ni. Rawngbawlna kal zelah Lang Camp te neiin Kohhran member ni sa mi pathum ten sual ngaihdamna baptisma an chang tawh a ni. Sialhau hmuna rawngbawlna hi chhunzawm mek zel niin he rawngbawlna hian Serchhip Dinthar Bial, Hriangtlang thlengin nghawng a nei chho mek zel a, rawngbawltute tawiawmin vawi hnih an kal tawh a, Pathian chawimawina pawh vawi hnih neih a ni tawh a ni. October 19, Inrinni khan Hriangtlang Kohhrana lawi Upa Pc.Lalrinawma te chhungkua chuan Pathian chawimawina hi neiin Pathianni zan inkhawmah khan Chawimawina boruak kal zelah mi 2 in Thlarau thianghlim an dawng thar a, October 21, Thawhtan zan khan mithar pakhat Kohhranah sengluh leh a ni bawk.
————–
Lawngtlai West District r :
Joint Conference :
Oct ni 25-27 chhung hian Lawngtlai North bial PYD&LAD Joint Conference Lawngtlai Council veng Local church ah hman mek a ni a, Speaker ah Lunglei District PYD President Evan.V. Lalduhawma chu ruaiin Conference thupui ah I ram lo thleng rawhse tih hman a ni.
———-
Seminar Cum Account training :
Lawnglai South Bial chuan Oct ni 26 – 27 chhung hian hian bial rorel angin Sihtlangpui hmunah Thianghlimna seminar Cum Account training neih a ni dawn a ni.
———–
District hruaitute Programme :
District.Supdt. Rev.R.Ramthatzawla chuan Oct 25-27 chhunga Lawngtlai North bial PYD & LAD joint conference neih mek chu a hmanpui.
Dist.Secretary Pastor Lalsawmliana Sailo chuan Oct ni 22, Thawhlehni khan Bialah rawngbawlna neiin Chamdurtlang, chikhurlui, Vathuampui leh Vaseikai te tlawhin rawngbawlna a nei kalmek.
District Mission Director Rev.F.Lalbiakṭhuama chuan Oct ni 26 – 27 chhunga Lawngtlai South section ten Sihtlangpuia Thianghlimna seminar Cum Account training neihna ah a telpui ang a, training na ah hunserh a hmang ang.
—————
North Mizoram District rawnbawlna chanchin :
Pastor Quarters hawng :
Oct ni 23, Nilaini chawhnu dar 1:00 khan North Mizoram Dist, Chawlhmun Bial Pastor quarters thar chu Dist Supt. Rev Laltluanga’n Pathian hnenah hlanin a hawng.
Qtrs Hawnna inkhawm hi hun hnihah thenin pawn Prog. Bialtu Pastor Rev. Lalramthanga Kawlni in a kaihruai a. Rev. Laltluanga Dist. Supdt chuan Pathian thu chhiarin Lal Isua hmingin a hawng a. Qtrs Inchhungah lutin chawlhhmun Bial Secy Evan. R. Lalthlamuanan kaihruai lehin Upa Lalhmuakan Technical report a pe, chawllhmun qtrs hi kum 1992 ah Bial hawn niin, rs Nuai 49 in kumin July thlaah Dist in a hmun in ding sa a lei a ni.
Quaters Lenzawng
Frontage: 33ft
Depth: 80ft
Quarter hawnnaah hian District Official Rev. Chhiarpuia Dist. Secy. leh Rev. K. Lalduhsanga ten tawiawmin an ni bakah han Aizawl khaw chhung atangin Maubawk Bial Pastor Rev. R. Lalhmangaiha, Dinthar Bial Pastor Rev. C. Laltlanchhuaha ten an ho bawk a, Pastor Pension Rev. C. Challianngena’n tawngtainain Quarter hawn, inchhung Programme hlanna a nei bawk.
District hruaitute thusawiah Lalpan N. Mizoram District tam taka mal a sawm dan te, Kohhranhote thilpek leh an thahnem ngaihna avanga hmun lo ram neih kawnga District in hma a sawn dan te tarlangin; NMD Pastor Bial hawn tawhah Hunthar Bial chauh chu Pastor Quarters la neih lohna Bial a nih thu an sawi.
Quarters hawn zawh hian Chawlhhmun Hall-ah Sawrchhiar leh thingpui tui tak ei leh in ho ani
————
District Missions Conference :
North Mizoram District chuan Oct. ni 25-28 hmangin District Missions Department confe. vawi -39-na Headquarters Biak inah an hmang mek.
District Missions Conferece hi Zirtawp zan Oct. ni 25 zanah Palai lawm inkhawm neiin, inkhawm Rev. C. Lalthantluanga Dist. Missions Director in a kaihruai a, Rev. K. Lalduhsanga Dist. Kohhranpui Treasurer chuan Inkhawmpui hi a hawng a ni.
Confe.-ah hian Thupui “Chanchin tha hi hril rawh u” tih hman niin; thupui then 5-ah thenin thuhriltu hrang hrang heng mite hian an sawi:-
1) Engtin nge kan hril ang – Pastor SR lalhualhima, Field Treasure, Arunachal Missions Field
2) Tute nge hril ang – Rev. K. Malsawmtluanga, Director Sunday School Dept.
3) Tu hnenah nge kan hril ang – Rev. Laltluanga, Supdt. North Mizoram Dist.
4) Thilpek in – Evan. RK vanlalngaia, Secretary, Dist. Missions Dept.
5) Chanchin tha hi hril rawh u – Rev. C. Lalthantluanga, Director, District Missions Dept.
Conference neih chhung hian District Missions hruaitu pathum Rev. C. Lalthantluanga Missions Director, Evan. RK Vanlalngaia Missions Secretary leh Evan. MS Dawngliana Missions Treasurer ten an kaihruai a ni.
Oct. ni 26 chawhma dar 10: 30Am-3:00PM chhung khan Conference rorel neiin; rorel hun chhung hian Secretary Report, Financial report bakah Missionary Report te ngaihthlak a ni a, Missions Revival Speaker Evan. Lalthianghlima hnen atangin Report ngaihtlak a ni bawk.
Confe. rorel-ah hian Agenda Bial atanga lut 5 bakah Official Agenda 2 ngaihtuah a ni a, chanchin buatsaih lai hian rorel kimchang hriat a ni rih lo a ni.
District Missions Conference-ah hian Home Missionary North Mizoram District hnuaia thawk mi 10 te an kim thei a, hei bakah hian Casual worker chhawr lai thawktu mi 3 te an tel thei bawk. Conference hi General Missions hruaitute atangin Evan. PC Lalrokima General Treasurer bakah hruaitu pawimawh tak tak ten an ho thei bawk a ni.
Facebook