GENERAL NEWS
HRUAITUTE PROGRAMME:
General Superintendent Rev. R. Lalrinsanga chuan July ni 13 leh ni 14 a Chhimtuipui District Board neih chu telpui in July ni 15 khan Chhimtuipui District chhunga License Holder-te pual a Seminar seminar buatsaihah resorce personah a tang bawk a ni.
General Secretary Rev. Zohmingthanzama chuan July ni 15 a Chhimtuipui District chhunga License Holder-te pual a Seminar seminar neih ah telpuiin resorce personah a tang.
———-
GENERAL SUNDAY SCHOOL EXAM BOARD:
July ni 13 Nilaini khan General Sunday School Exam Board chuan General Headquarter Office, Mualpui Salem veng ah meeting pawimawh tak an nei a, he Board hi General Sunday School Director, Rev. R. Laichhingpuia chuan kai hruaiin Sunday School Exam Guideline siam rem ngai te siam tha in, kum 2022 General Sunday School Exam questions set tu tur te an ruat bawk a ni.
———-
KOLKATA MISSIONS FIELD RAWNGBAWLNA:
July ni 8 atanga ni 10 chhung khan UPC, North East India General Superintendent Rev. R. Lalrinsanga chuan Kolkat Mission Field ah rawngbawlna a nei a, ringthar thar mi sawmruk chuang in Isua Krista hming a baptisma changin, UPC North East India kohhranah Isua Krista hming a lawmluh nghal an ni.
General Superintendent hian July ni 9 inrinni khan Ganga Sagar thliarkarah rawngbawlna neiin, “Thuthlung thara vanram kaina chanchintha chu Juda te Pathian kha Isua Krista hi a ni tih rin a, sualte sima sualngaihdamna atana Ama hming ngeia tuia baptisma chan leh Thlarau thianghlim dawn hi a ni” tiin, chanchintha hriaa zawmtu member sawmnga leh panga laiin baptisma an chang nghal a, tlaiah Pathian chawimawina ruai hlim takin an kilho nghal a ni.
July ni 10 Pathianni khan Kolkata, Batanagar Kohhranah rawngbawlna nei leh in, mi parukin Isua Krista hmingin baptisma an chang leh bawk a ni.
General Superintendent rawngbawlna tawiawm hian North Mizoram District Hqrs. Kohhran Tuikhuahtlang, Mission Department atangin member pakua an kal a, tin, Kolkata Missions Field Director Rev. Lalbiaksanga leh Evan Sujit Sinha ten an tawiawm bawk a ni.
———-
———-
CHHIMTUIPUI DISTRICT
CHHIMTUIPUI DISTRICT BOARD:
July ni 13 leh 14 chhung khan Chhimtuipui District Board chu District Committee Room ah neih a ni. District Board hi District Superintendent, Rev.Joseph L.Thlauhthang chuan a kaihruai a, board member te an tel kim thei a ni. Chhimtuipui District Board hi General Superintendent Rev. R. Lalrinsanga chuan tel puiin, Kohhran hmasawnna tur hrang hrang te rel a ni.
———-
MITHAR LEH BAPTISMA RAWNGBAWLNA NEI
July ni 10 Pathianni khan Pangkhua home missionary Evan Jona Lalrintluanga kut ah member pakhat in Baptisma Lalpa Isua Krista hmingin a chang.
July ni 10 Pathianni vek khan Meisatla Local Church ah Siaha West bialtu, Pastor C. Lalchhuanthanga kut ah mipa pahnih leh Hmeichhia pahnih chuan Isua Krista hmingin sual ngaihdamna Baptisma an chang a, Baptisma chang zinga mipa pakhat leh Hmeichhia pakhat hi mithar an ni.
Sentetfiang Local church ah chhungkaw hnih member pasarih te chu Bialtu pastor V. Lalhlimpuia’n kohhran ah Lal Isua hmingin a lawmlut.
———-
CHEURAL PYD TEN SANGAU II TLAWH
July ni 10 Pathianni hmang khan Cheural Local PYD te chuan Sangau ll Local te an tlawh a, hun hlimawm tak Local hnih te hian an hmang a ni.
———-
KUM CHANVE EXAM NEI
Siaha West Bial Sunday school board in a lo rel tawh angin, July ni 10 Pathianni khan Siaha West bial chhunga Local hrang hrang ten Sunday school kum chanve Exam an nei ani.
———-
———-
LAWNGTLAI WEST DISTRICT
LAWNGTLAI WEST DISTRICT BOARD VAWI 11 -NA.
July ni 13 2022 (Wednessday) khan Lawngtlai West District Board Vawi 11 na chu District office ah neih a ni a, an rorel tlangpui te:
1. District Constitution chungchang:
District Constitution Drafting Board in a lo duan tawh chu a bu a siam a nih hma in Editing Board ah thlir leh phawt ni se tih a ni.
District Constitution Editing board member tur hetiang hian ruat a ni.
Chairman – District Superintendent
Secretary- District Secretary
Member – District Board Member te bakah Rev. R. Ramthatzawla leh Upa TT. Nohmung te ruat an ni a, Editing Board te hian December District Board a approve theih turin an lo buatsaih dawn a ni.
2. Library sub committee din niin hruaitu tur ruat nghal an ni.
1) Chairman – Rev. Lalsawmliana Sailo
2) Secretary – Rbt. S. Lalmalsawmsanga
Ex-Officio – District Superintendent leh District Treasurer.
3.Ram lak beihpui thlak nise, August thla a bawh zui turin hetiang hian ruahmanna siam nghal a ni :
1) Bial tin ten rammut Programme siam theuh ni se. District ah report pek theuh ni bawk se.
2) Home Missionary te chu District Mission in programme lo siam sak se.
3)District chhunga Licence Holder zawng zawng te chu mahni remchan dan anga rammu tura beisei an ni a, report pawh District ah pek ve ni se an ti bawk.
4. Section leh District Department Conference hun tur ruahmanna siam a ni.
1)Vathuampui leh Bungtlang South Bial – Dt.20-22.Jan.2023
2) Lawngtlai North Bial – Dt.27-29.Jan.2023
3) Diltlang Bial leh Chawngte Bial – Dt.3-5.Feb.2023
4) Lawngtlai South Bial – Dt.10-12.Feb.2023
5) District LAD – Dt.17-19.Feb.2023
6) District PYD – Dt.24-26. Feb.2023
5. PCES Sabualtlang School Mathematics Teacher tur lak nise tih a ni a, Advertisement te chhuah a, bawhzui ngai te lo bawhzui turin Official te ruat an ni.
6. LDC Cum Computer Operator hna thawk tur in Bro. C. Lalrinngheta S/o Upa C.Lalchhanzova chu kum hnih atan lak a ni.
7. District chhunga Bial hrang hrang ah District board chuan tanpuina he tiang hian a sem chhuak:
1)Chamdur Project Biakin siamthat (Repairing) dilna chu ngun taka ngaihtuah a nih hnu ah, an rawn dil ang hian Rs.50,000/- pek ni se tha tih tlan a ni.
2) Diltlang Bialin Quarters sakna mek chu sak zawh mai theih a ni tawh avangin, Rs.2,00,000/-
(Nuaihnih) pek ni se, A bak tul leh pawimawh dang chu Bial neitu kutah an dah a ni.
3) Ngengpuikai Biakin sak dilna ngaihtuah a ni a, a hma lama hmalak tulna chhan te sawiho a ni a, thingzai te an neih sa a vangin a rang lama hma lak ni se tul leh pawimawh dang chu Official kutah an dah a ni.
4) Saizawh West Local Biakin sak mek chu an sak zawh na tur an rawn dil angin Rs.50,000/- pek ni se an ti a ni.
———-
BIAL PYD HUAIHAWT IN SEMINER NEIH A NI
Chawngte bial conference in a lo rel leh bial PYD board in hun leh ni a ruat angin July ni 9 inrinni khan Chawngte bial huap PYD Seminer chu Chawngte ‘C’ Local church-ah tluang taka neih a ni.
He hunah hian Evan. George Lalawmpuia Dist. PYD Secretary leh Evan. Lalduhkima Dist S.S Secretary te chu resource Person ah hmangin thupui pathum; 1)Leadership chungchang. 2)Media leh PYD. 3)Sum vawn dan (Account training)te hmangin Paper present neiin ngaihthlâk a ni a, kal khawm ten hlâwk thlak an ti hle a ni.
———-
———-
LUNGLEI DISTRICT
AUDIT TLUANG TAKIN NEI:
July ni 12 atanga ni 25 chhung khan Lunglei District kohhranpui, CEC School, Offset press, Department leh Sub. Committee peng hrang hrangte sum kum chanve Audit District Office-ah neih a ni a, Audit hi tluang taka neih a ni. He Audit-ah hian Kohhranpui, CEC School leh Offset Press account-te Evan.C.Lalremchhunga, Evan. Laldinpuia Sailo, Upa C. Lalhmangaiha ten Audit in, Department leh Sub committee-te Pastor K.Vanlalhruaia leh Pastor Jerry Lalmuanawma ten an Audit a ni.
———-
DISTRICT PCD BOARD:
July ni 10 Pathianni chawhnu khan Pukpui Local Committee Room-ah District PCD Board neih a ni a, an rorel pawimawh zualte:
1. District PCD Rally neih leh \ha tih a ni a, Oct 7-8 ah neih tura tih a ni. Intihsiakna tur atan- Drama, Solo, Quiz te thlan a ni.
2. Kum 2023 atana PCD zirlaibu tur Pastor Jerry Lalmuanawma ziak chu Literature Committee-te hnena min publish sak tura ngenna thlen nise. District PCD Rally hunah tlangzarh nise.
3. District PCD hruaitu lo ni tawh zawng zawng te nen PCD hmasawnna atana inrawnkhawmna Consultation Prog. neih nise.
4. District PCD Day vawi 16-na hlung taka hman nise, District huap Programme siam nise, Discussion leh programme dang hmana hun hman nise. Radio ah District PCD pual Programme nei tura hmalak nise. Local tinin Social Work neih nise, District PCD OB leh Pennet te nen hman ho nise.
———-
THUTHLUNG CRUSADE CUM SEMINAR:
July ni 16 Inrinni zan a\ang khan District Secretary Rev.C.Lalrintluanga Speaker-ah hmangin Luangmual Local PYD-te chuan Thuthlung Crusade Cum Seminar an buatsaih a, July ni 17 Pathianni chawhma ah inkhawmna neiin chawhnu lamah Seminar an nei ang a, zan lamah inkhawm in hun an hmang leh ang.
———-
———-
NORTH MIZORAM DISTRICT
GRADUATION DAY HMANG:
United Pentecostal Church of North East India, North Mizoram District hnuaia Pathian thu zirna Pentecostal School of Ministry (PSM) chuan July ni 8 Zirtawpni chawhnu dar 1:00 khan North Mizoram District Headquaters Kohhran Biak in Tuikhuahtlangah Graduation Day an hmang.
Graduation Day hman inkhawm PSM Principal Rev. Chhiarpuia’n kaihruaiin, Secretary Rev. K. Lalduhsanga’n Result a puang a, Kum 2022 PSM session-ah zirlai Naupang mi 34 awmin kuminah Graduate mi 12 an awm a, Graduate zingah Vanlalhmuaki Reiek chu a titha ber a ni.
Graduate te degree hlanna Calvary Bible College Principal Rev. K. Malsawmtluanga’n neiin; PSM zirlaite chu fuihin Midangte zirtir thei tura inbuatsaih chhunzawm zel te, Kohhrante tihmasawntu leh enkawltu tha ni turin a fuih bawk.
Rev. C. Zohmingthanzama Gen. Secretary pawhin thu sawiin; North Mizoram District in Short term Bible Course a neih hian Pathian thutak zirtir tur tam tak a chher chhuak a ni a tib awk.
———-
MI THAR LAWM LUH LEH BAPTISMA CHANG THAR:
July ni 10 Pathianni khan Tumpanglui home Mission field ah mi thar 18 chhungkaw li chu rawngbawltu Siat Khawllianin UPC North Est India Kohhran-ah Isua hmingin a lawm lut.
July ni 10 Pathianni khan Rengtekawn Kohhranah Mi thar -2 sengluh a ni a, Rev C.Lalthlengliana, Bialtu Pastorin Lalpa Isua hmingin a lawmlut a ni,Hetihrual hian, Nau -2 hlan nghal a ni.
July ni 11, 2022 Thawhṭanni khan Aibawk Bial, Kelsih kohhrana lawi tur mithar 1 in Isua hmingin baptisma a chang a, Muallungthu a Tirhkoh rawih mek Evan. Lalramnunsanga Sailovin baptisma rawngbawlna hi a nei a ni.
———-
BAWNGKAWN KOHHRAN RAWNGBAWLNA:
July ni 10 Pathianni khan Chaltlang Bial, Bawngkawn Kohhranah Pathian Chawimawina a vawi-11-na chu Thlarau thianghlim kaihhruaina hnuaiah neih a ni a, Chawimawina petu hi T.Upa Lalpianglawma te chhungkua an ni.
Inkawm kaihruaitu chu Bialtu Pastor Rev. P. Vanlalfela niin, Pathian Chawimawina pe tu te chhungkua ațangin Sist. Lalnunhlimi chuan hun hmasa a hmangin, Thusawi rawngbawlna chu Speaker, Evan C.Lalruatsangan a nei a, Bialtu Pastor Rev. P. Vanlalfela hian Nau Hlan rawngbawlna nei bawk a ni.
———-
N. MIZORAM DISTRICT OFFICE TLAWH
July ni 12 Thawhlehni khan Lengpui Bial Church Board Member leh Department OB ten North Mizoram District Office an tlawh.
Kum 2019 Lengpui bial Inkhawmpui chuan Aizawl khawpuia Kohhran pisa-te tlawh nise tiin a rel a. Hripui leng avangin tihhlawhtlin mai theih a nih loh hnuah July ni 12 khan Kohhran pisa hrang hrangte tlawh a ni a.
Lengpui bial chhung tualchhung hrang hrang aṭangin Upa, T. Upa leh Bial Department OB te mi 24 lai kal thei in, Kohhran pisa tan hian Hmunphiah 10 vel ṭheuh kan pe bawk a ni.
———-
———-
AIZAWL EAST DISTRICT
District Board:
Aizawl East District hnuaia rorelna sang, kum chanve District Board chu tluang takin July 14, Ningani khan zawh fel a ni. District Board hi District Committee room-ah Rev KVL.Hmangaihkima, District Superintendent kaihhruaiin July 12, Thawhlehni atang khan neih tan a ni. Aizawl East District Board-ah hian thu ngaihtuah tur engemaw zat lutin he thu buatsaih lai hian an thu pass kan hre hman lova, karleh lamah tihchhuah tum a ni. District Board-ah hian Bial atangin Board member an telkim thei a ni.
———-
Seminar hlawhtling takin nei:
July 15, Zirtawpni khan Lushai Hills Residency Conference Hall-ah Aizawl East District hnuaia Pastor nupuite pualin Seminar hlawhtling taka neih a ni. He Seminar-ah hian Rev KVL.Hmangaihkima, District Superintendent leh Sis.Dr.Lalhmasai BW te resource person-ah hman niin an ni hnen atangin thu pawimawh tak tak ngaihthlak a ni a, Pastor nupuite tih tur leh tih loh turte bakah rawngbawlna kawnga tangkai tak tak thu an ngaihthla a ni. He hunah hian Pastor nupui an kal tha thawkhatin hlawk takin hun an hmang a ni.
———-
Live Crusade nei dawn:
Aizawl East District Media Cell, Pennet buatsaihin August 1 atanga 5 chhung hian zantin Live Crusade neih tura ruahmanna kalpui mek a ni. He Live Crusade-ah hian Speaker-ah Rev.KVL.Hmangaihkima, District Superintendent chu hman tur niin Sis. Pc.Lalthansangi, Sis. F.Lalhriatchhungi leh Sis.Lalhmangaihzuali ten zaia rawngbawlna an nei thin dawn a ni. Live Crusade hi District Hqrs. Biak In-ah neih tur niin Zonet leh LPS-ah te Live-a pekchhuah a ni dawn a ni.
———-
TIH DAM RAWNGBAWLNA:
UPC North East India, Bethlehem Kohhran ah Evan. Dr. Lalsawivela kal tlangin Taksa leh Thlarauva natna nei te tan “Tihdam rawngbawlna” neih mek a ni.
He rawngbawlna hi June ni 14, 2022 a tang khan chawllova la kalpui chhun zawm zel a ni a, Pathian hnathawh ropui tak lang chho zelin Thlarau malsawmna dawng dawng tam tak an awm tawh bakah Taksa Damlohna nei Beng ngawng, Tawngtheilo, Cancer leh Stroke te Nerve thalo leh Spinal code tha lo ect… ten Lal Isua tih Damna an chang mek zel a ni.
Tihdam rawngbawlna chhim tur te tan zing Dar 8-9 chhung in registration tih tur a ni a, Dar 10:30am atangin Sermon Inkhawmna neih thin niin inkhawm ban hnuah damlo khawih thin an ni.
Damna duh a piangte he rawngbawlna ah hian lo kal zel turin Lal Isua hmingin sawm kan ni e.
———-
Lengpui Bial ten District Office tlawh:
July 12, Thawhlehni khan Lengpui Bial, North Mizoram District te chuan an rorel bawhzuiin Aizawl East District Office an tlawh a, Office -a hman atan Hmunphiah an hlan nghal. District Office-ah hun tawi an pual hian hman a ni a, District Board neih lai a nih avangin Pastor K.Lalawmpuia, Office Head Assistant chuan lo dawngsawngin Lengpui Bial ten Aizawl East District Office an tlawhnaah lawmthu a sawi a, District report hrang hrang a pe nghal bawk a ni. Lengpui Bial atangin Bialtu Pastor R.Thanglura chuan tawngtaina hun hmangin inhmelhriattirna a nei nghal a, report tawi a pe bawk a ni. Lengpui Bial atang hian mi 24 vel kalin hun hlimawm tak an hmang a ni.
———-
Pathian chawimawina nei:
July 9, Inrinni khan Evan HK.Lalhmangaiha leh a Team te rawngbawlna kaltlangin Kohhrana mi thahnemngai leh Kohhranpui kaltlangin Pathian chawimawina neih a ni a, Kohhran ten hlim takin hun an hmang a ni. Evan HK.Lalhmangaiha leh a Team te hian Mualpui hmunah hian hun engemaw chen rawngbawlna an kalpui a, Thalai leh Naupang-ah hlimna nasa tak thlengin naupang teah Thlarau Thianghlim dawng engemaw zat an awm bawk a ni. Evan HK.Lalhmangaiha te hian July 10, Pathianni zan thleng khan rawngbawlna hi an nei a ni.
July 9, Inrinni vek khan Kawlkulh Bial, Chhawrtui Kohhranah Bro.J.Lalrinkima te chhungkaw kaltlangin Pathian chawimawina neih a ni bawk a, Kohhran ten hlim takin hun an hmang a ni. Chhawrtui Kohhranah hian District kohhranpuiin rawngbawltu an dah Bro. Malsawmdawnga’n rawngbawlna a nei mek a, chawimawi ni-ah khan Bialtu Pastor R. Lalfamkima’n inkhawm kaihruaiin chawimawitute chhungkua malsawm hriakthihna a nei a, nau pakhat a hlan nghal bawk. Rawngbawltu Bro. Malsawmdawnga hnen atangin Pathian thu ngaihthlak a ni.
July 8, Zirtawpni khan Armed Veng Kohhranah Evan R.Vanchhunga chuan rawngbawlna a nei a, Upa C.Lalrama te chhungkua chuan Pathian chaiwmawina neiin Kohhran ten hlim takin hun an hmang a ni. Thalai rual tam takin Thlarau thianghlim baptisma an dawng thar a ni.
———-
Mithar leh baptsima chang thar:
July 10, Pathianni chawhma inkhawmah khan Serchhip Dinthar Biak Inah Bialtu Pastor, Rev.C.Laldintluanga chuan chhungkaw khat member panga chu Kohhranah sengluhna a nei a, inkhawm bakah Evan Zarzoliana kutah baptisma an chang nghal a ni.
Khawzawl Bial, Lungvar hmunah pawh chhungkaw khat member 2 te chu Kohhranah sengluh an ni bawk. Lungvar hmunah hian Evan.H.Lalhlimpuia’n rawngbawlna a nei mek a ni.
Ngopa Bial, Kawlbem Kohhranah pawh Evan Lalamena rawngbawlna kaltlangin chhungkaw khat member 9 chu Kohhranah sengluh an ni bawk. Evan Lalamena hian sengluhna neiin tawngtaisakna a nei nghal bawk a ni. Kawlbem hmunah hian Evan Lalamena hian rawngbawlna a nei mek a ni.
Bazar Bial, Armed Veng South-ah July 10, Pathianni khan Bialtu Pastor, Rev.C.Lalmalsawma chuan rawngbawlna a nei a, mi 5 in sual ngaihdamna baptisma an chang.
July 13, Nilai zan khan Keifang Bial, Keifang hmuna Sis Vanlalpari rawngbawlna kaltlangin mithar 2 Kohhranah sengluh an ni bawk.
Facebook