Office khar :
December ni 20, Zirtawpni khan UPC North East India General Hqrs Office, Mualpui Salem veng Aizawl chuan kumin 2019 chhung atana Office kharna hun Committee room-ah an hmang.
Kum 2019 atana General Hqrs Office kharna inkhawm tawi buatsaih hi General Superintendent Rev. Lalmalsawma Sailo chuan a kaihruai a, Rev. H. Lalngailiana Office Administrative Assistant chuan hunserh hmangin General Secretary Rev. R. Lalrinsanga, General Missions Director Rev. R. Lalhawia, General Sunday School Director Rev. R. Laichhingpuia ten thu tawi an sawi a, General Treasurer Rev.Zohmingthanzama’n Office thawktute hnenah Krismas thilpek atan Kum 2019 UPC Diary bu leh Kohhran Calender-a sem theuh bawk. Bro. R. Vanengzauva leh Sis Lalruatpuii ten kalkhawmte zaiin an awi a. Lawmthusawi tawngtainaa inhlan tharna neiin Rev. R. Vanlalawia’n malsawm tawngtaiin he inkhawm hi a tin a ni. General Hqrs Office-hi kum 2020 January ni 6, Thawhtanniah mipuite dawr theih tura hawn leh a ni ang.
General Heaquarters hnuaia Compassion Centre Project, khuangpuilam, kolasib, te pawhin vawiin vek khan Office Closing function a hmang a. Project Director, Rev. Jh. Za Hlunan hun kaihruaiin, Evan C. Vanlalruatan hunserh a hmang a ni. He function ah hian Compassion Centre Project hnuaia thawk tu mi 32 te an tel thei a. Thawktu te hnenah Christmas present te hlanna neiin hun hlimawm tak hman a ni.
Compassion Centre Project hnuaiah hian Project pawimawh tak pahnih : Audrene Scism Children Home leh Susanne Downs Boarding School te kalpui mek niin Centre hnuaiah hian thawktu 38 an awm mek a. Audrene Scism Children Home hnuaiah hian naupang 46 enkawl mekin, Susanne Downs Boarding School ah hian zirlai 560 an awm mek bawk. Tunah hian Hostel building thar peih fel a ni thuak tawh a, kumthar a luahluh tura ruahman a ni. Hostel ah hian kumthar ah chuan naupang 70 dah theih tura ruahman a ni.
————–
Australia UPC Conference hmanpui dawn :
United Pentecostal Church of Australia chuan January ni 2 atanga ni 6 chhung hian National conference, Canberra khawpuiah an hmang dawn a, he hun hmanpui tur hian UPC North East India chu sawm a ni a, General Secretary Rev. R. Lalrinsanga, General Missions Director Rev. R. Lalhawia leh General Sunday School Director Rev. R. Laichhingpuia te an kal dawn a ni.
Ruahman dan chuan Dec ni 28, Inrinni hian Aizawl chhuahsanin Australia an pan ang a, kum thar 2020 January ni 11 ah Aizawl an let ang.
————–
General hruaitute Krismas leh kumthar programme :
General Superintendent Rev. Lalmalsawma Sailo chuan krismas chu North Mizoram Dist. Hqrs. Tuikhuahtlangah a hmang ang a, Ni 28 chhun leh zan ah rawngbawlna a nei ang. Tin, Jan ni 2, 2020 chhun ah Dinthar kohhran, North Mizoram District ah rawngbawlna a nei bawk ang,.
General Secretary Rev. R. Lalrinsanga chuan Krismas zanah Mualpui Kohhranah hun hmangin Dec ni 28, Inrinniah Australia UPC National Conference hmanpui turin Canberra a pan ang. Kum thar hunpui Australia ah a hmang ang.
General Treasurer Rev. Zohmingthanzama chuan Krismas leh kum thar hi a lawina District Hqrs Kohhran, Tuikhuahtlangah a hmang dawn a, kum thar niah thuchah a sawi ang.
General Missions Director Rev. R. Lalhawia chuan Krismas zingah Salem Kohhranah thusawi rawngbawlna a nei ang a, kum thar erawh Australia khawpui Canberra ah a hmang ang.
General Sunday School Director Rev. R. Laichhingpuia chuan Krismas hunpui chhung ITI Kohhranah a hmang dawn a, kum thar erawh Australia khawpui Canberra ah a hmang thung ang.
———–
Lunglei District rawngbawlna chanchin :
District Missions Conf :
Nov. 29 zirtawp zan atanga Dec.1 Pathianni zan chhung khan Lunglei District Missions Department Conference vawi 45-na chu Zotlang Local UPC Biak inah hlim taka hman a ni.
He Conference-ah hian District Missions Department hnuaia Home Missionary pathumte bakah District Missions Conference hmanpui tura lo kal General Missions Director Rev.R.Lalhawia leh General Missions Field Jaigaon, North Bengal & Sikkim Field-a Missionary a awm mek Pastor C.Lallianbuanga ten thusawi rawngbawlna an nei a ni.
Nov.30 inrinni khan District Missions Director Rev.R Vanlalenga kaihhruainain rorel a ni a, an rorel langsar zingah nakum 2020 hian Rammut thla hman nise tih te, District Conference dawltu puihna tihsan te bakah General Missions-a thlen tur thu pawimawh tak tak an ngaihtuah a, kum 2021 Dist.Missions Conference chu Haulawng Section ah nghah nise an ti bawk.
Dec.1 Pathianni zing inkhawmah Chalsa leh Jengraimuk Biak in hmun leina tur atan Appeal in sumtuak a ni. Tin, nakum 2020 Lunglei District Missions Conference vawi 46 na chu ruatlawk angin Venglai Biak inah neih a ni ang.
————–
Dec.3-5 chhung khan Lunglei District Board vawi 198-na chu District UPC Conference Hall-ah neih a ni a, he Board-ah hian nakum 2020 kohhranpui leh Department hrang hrangte budget ngaihtuaha sawi ho a nih bakah thu pawimawh tak tak ngaihtuah a ni.
———
Dec.2 thawhtanni khan Lunglei District Missions Board chu Director Rev.R.Vanlalenga kaihhruainain neih a ni a, General Missions Director, Rev.R.Lalhawia pawhin he Board hi a telpui bawk. An rorel langsar zualte:
-Bualpui V Home Missionary Quarters lungremna tur leh Laisawral Quarters chung rangva leina tur pek tha tih a ni.
-Jaigaon biak in sak chhunzawm nise, Rs.200000 tlin tura pek belh nise.
– Manigong Pastor Quarters sak chhunzawm nan Rs.100000 (nuai khat) pek nise.
-Crusade Fund, Haulawng, Rahsiveng leh Lungsen Section-ah pek nise.
-Aithur khuaah Crusade neih nise, bial hmalaknain tih nise, District-in a tul anga puihbawm nise tha tih a ni.
-Rammut thla neih nise tia, District Missions Conference rorel bawhzuina atan nakum 2020 October thla hian Rammut thla hi hman nise, a hman dan tur erawh District Board leh hunah ngaihtuah nise tha tih a ni.
– Kum 2020 Budget atan Rs.7,110,000 (Nuai sawmsarih pakhat leh singkhat) chu lungrual taka pawm a ni.
———-
Nov.27 nilaini khan Ladies Auxiliary Department, Lunglei District Board chu Conference Hall-ah neih a ni. An rorel langsar zualte :
– Chhungkaw maicham bu chhungkaw tin in nei turin bial tinin mahni bialah theuh hmalak nise tha tih a ni a, nakum 2020 January ral hmain bial tinin chhungkaw maicham mamawh zat District-ah Report nise tha tih a ni.
– General Conf.in Lunglei leh Chhimtuipui District-te Conference in chhim tawn nise a tih chu, District hruaitute leh bial hruaituten Conference hi chhim nise tha tih a ni.
– Kum 2020 District LAD Conference, Rahsiveng Local-a neih tur thlirlawkna neih a ni a, he inkhawmpuiah hian Thupui atan ‘Mei ata lachhuak thuai la, chhandam rawh u’ Juda 1:23 chu hman nise tha tih a ni a, Speaker hrang hrang neih nise, OB ten lo ngaihtuahse tha tih a ni a, Conference Agenda nei turte chuan 1st March 2020 thleng thehluh theih a ni ang.
– Chhungkaw Maicham Survey leh zuk leh hmuam nghei Survey neih tha tih a ni.
– Home Missionary-te tanpuina pek nise tha tih a ni.
– Kum 2020 District LAD Budget atan Rs.11,33,000 (Nuai sawmpakhat singthum leh sangthum) chu pawm a ni.
———-
Nov.29 zirtawpni khan Pentecostal Youth Department, Lunglei District Board chu President Evan.V.Lalduhawma kaihhruainain Conference Hall-ah neih a ni a, an rorel langsar zualte
– Thiltlang biak in sakna tur atan District PYD in Rs.300000 (nuai thum) a ruahman chu Rs.200000 (Nuai hnih) pek a ni tawh a, la pek hmabak Rs.100000 (Nuai khat) hi pek leh nise tha tih a ni.
– CBC Library ami lehkhabu leina pek tha tih a ni.
– Nakum 2020 bial PYD Conference a hranga nei turte chuan February Pathianni hnuhnung berah a rualin nei se tha tih a ni.
– 2020 District PYD Budget atan Rs.10,41,500 (Nuai sawm singli sangkhat zanga) chu pawm a ni.
———–
Dec.6 zirtawp zan khan Lunglei District PYD Music Committee buatsaihin Conference Hall-ah Home Coming Cum Advance Christmas hman a ni. He hunah hian District PYD Choir, Headquarters bial PYD zaipawl, Pukpui bial PYD zaipawl, Rahsiveng bial PYD zaipawl, Haulawng bial PYD zaipawl, Luangmual bial PYD zaipawl bakah District PYD O.B. leh Sub.Comt. hruaitute an tel a, District kohhranpui hruaituten an telpui bawk.
He Home Coming Cum Advance Christmas-ah hian B.Vanlalropeki, C.Hmingthanmawii, C.Lalruatfeli, H.Lalengzami leh CV.Lalrammmuani te an zai bakah Rahsiveng Local PYD Group-te an zai a ni.
————-
Dec.7-15 chhung hian Luangmual Local-te chuan Crusade an buatsaih dawn a,Speaker atan Evan.Hmingtinthanga Niawhtlang chu an hmang ang a, zaithiam Sist.Lalngilneihi chuan zaiin rawngbawlna a nei bawk ang.
————
North Mizoram District rawngbawlna chanchin :
Office khar :
North Mizoram District Office chu December ni 19 Ningani khan Farewell neiin khar a ni.
Farewell Programme chu Dist. Secretary Rev. Chhiarpuia’n hmangin, Rev. K. Lalduhsanga Dist. Treasurer-in hunserh a hmang a, Dist. Supdt. Rev. Laltluanga’n Krismas thuchah a sawi.
Farewell Variety Programme Dist. Missions Director Rev. C. Lalthantluanga’n kaihruai zuiin intihhlimna hrang hrang neih a ni a, Krismas thilpek te inhlanin hlim taka hun hman hnuah inthlahna ruai an kil ho bawk.
———
Dec. ni 11 Nilaini khan Hunthar bial Pastor Quarter hmun tur chu ruahman angin North Mizoram District chuan a lei fel ta. Quarters hmun ram man hi North Mizoram District Supdt. Rev Laltluanga leh District Secretary Rev Chhiarpuia te chuan an hlan a ni.
North Mizoram District Board thukhawm: Dec. ni 6th 2019 khan North Mizoram District Board chuan kumin atana a hnuhnung ber turin Board thutkhawm an nei.
District Board hi Dec. ni 4 Nilaini ah tanin Nov. ni 6 zirtawp zan khan rorel tur agenda chhawpchhuah te zovin; Meeting Dist. Supdt. Rev. Laltluanga’n a kaihruai a, An rorel pawimawh zingah Myanmar Unit-a Kohhranho te Biak in sak tanpuinan Rs. 4,00,000 (Nuai li) pek remtiin an passed a, Kum 2020 chhunga Pastor Quarters Pathum sak te, Kum 2020-a North Mizoram District UPC-in Platinum an thlen turah a lawmna chikhat atan Platinum khuang lei te an passed bawk. Hei bakah hian Home Missions Field pahnih Tumpanglui khua leh South Chhimluang te Home Missions Field atan hawn a nih bakah, Darjeeling Ulubari-a Biak in hmun lei an remti bawk.
———–
North Mizoram District a, District Headquarters Kohhran Ladies Auxiliary Department (LAD) te chuan Dec. Ni 7 Inrinni khan an din champha kum 50-na Golden Jubilee an Lawm.
Jubilee lawm Programme hian Dec. Ni 8 Pathianni zan thleng a awh a ni.
Golden Jubilee lawm bul tannaah Bialtu Pastor Rev. C. Lianchama’n lung phum hawngin, Golden Jubilee baloon chhuah a nih bakah Jubilee dar vuak a ni bawk. Chawhnu inkhawmah Jubilee Mei det a ni a, Souvenir tlangzarh a ni bawk.
Souvenir tlangzarh hnuah North East India UPC General Supdt. Rev. Lalmalsawma Sailovin thuchah tawi sawiin; Rev. Laltluanga North Mizoram Dist. Supdt. Chuan Thuhril rawngbawlna a nei bawk.
Golden Jubilee lawmna Programme hian Dec. ni 7 Inrinni zan atanga Dec. 8 Pathianni zan thleng a awh a, Sister Laldawngliani, North Mizoram Dist. LAD Secretary te, Gen LAD President Sist. Lalchangliani Sailo Bible Women te bakah, Rev. C. Lianchama Hqrs. Bialtu Pastor ten Pathian thuchah an sawi bawk
———-
Kolasib Venglai kohhran te chuan Dec. ni 14 Inrinni khan kum 60 an tlinna Diamond Jubilee an hmang. Jubilee hi Rev. Laltluanga Dist. Supt in hmanpuiin Pathian thuchah a sawi a. Zaipawl, malzai leh Recitation hmang tein Pathian chawimawina neiin; Bialtu Pastor lo ni tawh te leh Upa hmasa berte hnenah Memento hlan a ni. Tlaiah Jubilee lawmna ruai theh a ni bawk.
Kolasib Venglai Kohhran Diamond Jubilee lawmna Programme hian Dec. ni 15 Pathianni zan thleng a awh a ni.
———-
December ni 15 Pathianni khan Rengdil Bialtu Pastor C.Lalthlengliana chuan Sihthiang kohhran tlawhin Mithar -3 a senglut.
Mithar sengluh zingah hian Mi -2 in sual ngaihdamna baptisma an chang a, Nau 1 hlan a ni bawk. Sihthiang kohhran ah hian member -118 awm mekin; Evan F. Lalbiaknia chuan rawngbawlna a nei mek a ni
———-
December ni 9 khan Durtlang Mualveng local Missions Department te chuan Missions Field a miten Krismas an hmanna tur atan Rs. 20600 District Missions hruaitute hnenah an theh lut.
Sist. J. Lalmuankimi Rengdil pawhin Ramthim field a miten Krismas hmanna tur cheng 2500 Field 12 ten Krismas an hmanna turin a hlan bawk.
Chawlhhmun Bial LAD President Sist. Lalzuiliani BW chuan Dampa Tlangnuam Biak In Current la luh lo chu, eng a luh theih nana Connection fee atan Rs. 5000 a pe bawk.
Dinthar local Missions ten Home Missions field 12 leh field dang 5 te pualin Rs. 22500 District ah pein, Bro. Vanlalfaka Saza te chhung pawhin Rs. 12000 an pe bawk.
Chaltlang Bial Missions Dept pawhin Home Missions Field ten Krismas an hmanna tur pualin Rs. 2500 pein Vawngawnzo Biak in sak tanpui nan Rs. 34500 District Missions-ah an hlan bakah Bro. R. Lalduhawma te chhung Vairengte ten Gen. Missions Field-a Christmas hman nan Rs. 1000 thehlut bawk.
Dec. ni 16 khan Headquarters local Missions Department ten Ramendrapur biak in sakna tur Rs. 100,000 (Nuaikhat) bakah Home Missions ten Krismas an hmanna tur pualin Rs. 20,000 (Singhnih) an pek bakah Hqrs. Local Missions Treasurer Sist. Ramtei’n ama pualin Bihar Missions Field-a tanpui ngai te tanpuina tur Rs. 5,000 NMD District Missions Director Rev.C.Lalthantluanga kutah a hlan bawk.
Sist Zamawii Sumsuih chuan Kanhmun kohhran thutthleng man atan sum fai Rs. 10000 a tum sak bawk.
Dec. ni 17 thawhlehni khan Sist. F. Rohlupuii BW, NEI Gen. LAD Treasurer chuan N. Bengol Sikkim Missions Field huam Mesbosti Biak in sak chhunzawmna tur Rs. 50000 North Mizoram Distirct Office-ah pein, S. Chhimluang Missions Field Kohhran te pualin Khuangpui leh Khuang te a pe bawk.
Dec. ni 17 vek khan Evan. PC Lalzuiliana te chhung chuan NMD Home missions pualin Krismas hmanna tur Rs. 3000 District Office-ah a pe bawk.
———-
Bro. David Zodinpuia Bungkawn chuan Sist.. Gomtirung, Dampa Tlangnuam Kohhrana lawi, Cancer natna in a tlakbuak mek enkawl nan 35000/-(Singthum sangnga) Bialtu Pastor pastor R. Thanglura hnenah a hlan a.
Sist. Lalmawizuali Jailveng kohhrana lawi chuan NMD -a Bial naupang ber Damparengpui Bial Pastor Quarter-a dah turin mut bu tha tak tak Bialtu Pastor R. Thanglura a pe bawk. (Mut bu)
——–
Zawlnuam Bial Kanhmun Kohhran Biak in sak thar tan hian Pu H. Remnghakliana (Atea) te nupa Zawlnuam Vengpuia cheng te chua Pulpit set mawi leh tha tak tak an pe.
Kanhmun kohhran te hian thilpekah malsawmna an dawng hle a, Biak in ansak atanga tun hun thleng pawhin thilpek hlu tak tak an dawng a, Biak in luah tur hian thuthleng leh Ceiling siam chiah hmabak a awm tawh a ni.
Kanhmun Biak in thutthleng atan Tun hnaiah hetiang hian tanpuina sum an dawng Sis Zamawii Sumsuih Rs 10000 2. Dr. Lalmalsawmi Zawlnuam Rs 10000 leh Upa J. Thangliana Vairengte Rs 5000
———-
Sumsuih Bial Missions Department te chuan Persang Missions Field Missionary Quarters atan Still Almirah tha tak lei nan District Missions Office-ah sum thahnem tak an pe a, District hruaitute’n lawmthu an sawi.
————-
Chaltlang Bial Missions Department bul tumin Dec. ni 9 Thawhtanni atang khan K. Sarali Kohhran Biak in sakin Work camp-in an thawkchhuak a, Work camp te hi Bialtu Pastor Rev. C. Lalramthanga leh Bial Missions Director Evan. Hmingchungnunga ten an ho va, member thahnem tak an thawk chhuak a, Work camp ten Biak in mawi leh tha tak K. Sarali kohhran tan hian an sak sak a ni. (Pic. Biak in sak workcamp)
————-
Sumsuih Kohhran buatsaihin Dec. ni 9-14 chhung khan N. Mizoram District Tirhkoh Ramtlan Evan C Zoramthara leh a rawngbawlpui te hmangin Beer lahai roi camping neih a ni.
He Camping-ah hian campers thahnem tak lutin sumsuih Biak inah camp hi neih a ni a, camping boruak duhawm tak neiin siamthar lehna duhawm tak a thleng.
———–
Chaltlang Bial Chanmari Kohhrana lawi Bro David Lalfakzuala te chhungkua chuan Pathian chawimawina neiin; Appostolic Revival Team speaker Evan T Vanlalruata’n thuhril rawngbawlna a nei a, Thlarau boruak duhawm tak hnuaiah hun hlimawm tak an hmang a ni.
———–
N. Bengal & Sikkim Missions Field chhunga kohhran ding thar Bedgurri kohhrana Crusade neihna tur pualin Maubawk Kohhrana lawi Upa Zopara te chhung chuan Rs. 40000 (Singli) Dist. Missions hruaitu Evan. RK Vanlalngaia kutah a hlan.
Bedgurri kohhran hi Nov. ni 13-21 chhunga N. Mizoram District Bial Directors 16 leh District Missions hruaitu 3 ten an tlawh tum a, Master Ministry of India (MMI) kohhran atanga mithar 70 an Biak in chawpa an lawmluh niin; Kohhrnahote’n puih an mamawh hle reng a ni.
Field Headquarters Birparra Office-a Lehkhabu dah tur lei nan Sist Lalhmunremi Maubawk chuan Rs. 5000 District hruaitute kutah an hlan bawk.
————
Dec. ni 15 atang khan Damparengpui bial buatsaihin Tuipuibari Center leh Persangah Crusade buatsaih a ni a, thuhriltu Pathian mi hman tak tak ten rawngbawlna neiin; Hindu atangin mithar pahnih Bialtu Pastor R. Thanglura’n lawmlutin thlarau lam hla te nen hun hlimawm tak an hmang a ni.
————–
Dec. ni 9-14 chhung khan Central District Shillong Section te buatsaihin Pine Brook Center, Barapani-ah Camping neih a ni.
He Camp-ah hian North Mizoram District Revival Speaker Evan C. Lalruatsanga leh a hote rawngbawla rawih niin; Camping thupuiah “Be saved” tih hman a ni. Rawngbawltute rawngbawlna Lalpan mal a sawm a, Camp neih atangin Sual ngaihdamna baptisma chang mi 16 awmin; heng zingah hian mithar 2 EAC kohhran atangin an tel a, Thlarau Baptisma chang mi 11 awmin, Siamtharna chang mi 28 an awm bawk. Campers zawng zawng hi mi 39 an ni
Camp Follow up Prog hi Jienking Biak in,-ah Dec. ni 15 Pathianni khan neiin Pathian awmpuinain hlim takin hun an hmang a ni
Pentecost Revival team te hian Hunthar Bial Sairang Kohhrante Krismas leh Kumthar an hmanpui leh ang.
———-
Dec ni 22, Pathianni hian Rengdil bial, New Eden biak in hawn a ni dawn.
Biak in hawn Prog hi Bialtu Pastor C.Lalthlengliana’n kaihruaiin, N. Mizoram Dist Suptd Rev Laltluanga’n hawnna leh Pathian hnena hlanna a nei ang.
Biak in thar lawmna ruai hi tlai lamah an kilho dawn a ni.
———
Dec ni 15, Pathianni khan Damdiai Missions Field-ah mi 27 in Evan MS Dawngliana kutah Sual ngaihdamna Baptisma Isua hmingin an chang.
Damdiai Mission Field kohhran buatsaihin Dec ni 13 atanga 15 chhung khan Damdiai Home Missions Field Biak inah Crusade neih a ni a, Crusade ah hian Dist Missions Treasurer Evan MS Dawngliana chuan rawngbawlna neiin; Speaker hian field member te hriatthiam awlsam turin a lem nena inzirtirin hlawhtling takin hun an hmang a ni.
Dec ni 15 khan Pathianni zing inkhawmah nau 5 Lal Isua hnenah kawltirin nauhlan rawngbawlna neih a ni a, hei bakah hian Hindu sakhua atanga rawn lut thar chhungkaw khat member 4 te Kohhranah sengluh an ni bawk. Inkhawm banah Damdiai Missionary leh kohhran hruaitutena ram an lak Baptisma la chang lo te sual ngaihdamna baptisma dilah chantirin mi 7 laiin sual ngaihdamna Baptisma Evan MS Dawngliana kutah hian an chang a ni.
NMD Treasurer Evan MS Dawngliana rawngbawlna hi Aizawl atangin Maubawk Bial Director Upa B. Vanlalenga, Dinthar Local T.Upa H. Thantluanga leh Bro. Lalbuatsaiha Mission Vengthlang ten an tawiawm a. Pathianni hmangin Mamit Bial Director Upa B. Vanlalauva, Mamit Hqrs Local Missions Director Upa Hmaa te bakah Mamit Bial PYD Secy Bro Valtea ten tawiawm bawk.
Damdia Home Missions Field ah hian Missionary Evan. Lalrampana awm mekin Kohhran member 120 a nei mek a, Krismas leh Kumthar hmang turin inbuatsaihna an kalpui mek a ni. (Video: Damdiai rawngbawlna)
Rawngbawltute hian Damdiai hi Dec ni 16 khan an chhuahsan a, Vawngawnzo Missions Field tlawh chho lehin Biak in an sak mek leh Biak in panna tura kawng laihthar te bakah Biak in hmunhma te an thlir bawk a ni.
————-
Lawngtlai West District hruaitute Krismas leh kum thar programme :
District Suptd Rev.R.Ramthatzawla chuan tunkar chhung hian Khawpui chhungah kohhran tlawh kualin Krismas leh kum thar hunpui Dist.Hgrs Local ah a hmang ang.
District Secretary Pastor Lalsawmliana Sailo chuan Christmas hunpui chhung Diltlang Kohhran te a hmanpui ang.
District Mission Director Rev.F.Lalbiakṭhuama chuan tun Pathianni hian Lawngtlai AOC veng leh Lawngtlai College vengah hun a hmang dawn a, Krismas hunpui chhungin Lawngtlai chandmary Kohhranah rawngbawlna a nei ang.
———
Dec ni 15, Pathianni khan Saikhawthlir local ah pastor K. Lalzawmsanga’n Baptisma rawngbawlna neiin mi 3 in sual ngaihdamna Baptisma an chang a, an zinga pakhat hi member thar niin Kohhrana sengluh nghal a ni.
————
Aizawl East District rawngbawlna chanchin :
Jubilee lawm :
Bawngkawn Kohhran te chuan December 11 atanga 15 chhung khan Biakin hawnna leh an Kohhran Kum 40 tlin, Ruby Jubilee lawmna hun hlim takin an hmang. December 11, Nilai zan khan Evan K Vanramngaia chuan inkhawm kaihruaiin Upa K.Laltlanliana, Secretary hnen atangin report tawi ngaihthlak a nih bakah Bawngkawn Bial LAD Zaipawl te hnen atangin fak hla ngaihthlak a ni.
Bawngkawn Kohhran ten Biakin hawnna leh Jubilee an lawmnaah hian Bawngkawn bialtu Pastor lo ni tawhte atangin thusawi ngaihthlak thin niin Nilai zan khan Rev K.Thanchungnunga leh Rev K.Hrangvunga te hnen atangin thusawi an ngaithla a, Ninga zanah Rev HL Dawngliana leh Rev Pc.Lalnghakliana, Zirtawp zanah Rev Dokhuma leh Rev R.Lianzama ten thusawina nei lehin December 14, Inrinni khan Biakin hawnna leh Jubilee lawmna pui ber hman a ni. Biakin hawnna Biakin pawnah neih niin Rev Rosanga Kawlni, District Superintendent chuan UPC North East India Biakin pakhat ni turin a hawng a, Pathian hnenah hlanna a nei nghal a ni. Biakin chhung inkhawmah Upa HK Lalnunsanga chuan inkhawm kaihruaiin Upa K.Laltlanliana hnen atangin report ngaihthlak leh a ni a, Bawngkawn PYD leh NPSS bakah Sis Mercy Lalmuanpuii ten fak hla sa in Rev Rosanga Kawlni, District Superintendent hnen atangin thuchah ngaihthlak a ni a, tlai-ah Jubilee lawmna leh Biakin hawnna ruai hlim takin Kohhran ten an kilho a ni. Inrinni zan khan Rev C.Lalzuiliana leh Rev Biaksangzuala, District Secretary ten thusawina neiin Pathianni chawhma-ah Rev Lalmalsawma Sailo, General Superintendent, Pathianni chawhnu- Rev C.Mawizuala, Bialtu Pastor bakah Pathianni zanah Rev Rosanga Kawlni, District Superintendent ten thusawina an nei leh bawka ni.
Secretary report atanga a lan danin Bawngkawn Kohhran hi March 14 1979 khan din a ni a, Kohhran a din tirh hian Biakin nei mai lovin hmun hrang hrangah an inkhawm thin a, Kum 1980 khan tuna Biakin awmna hmun hi an nei ta a ni. Kum 1981 khan Biakin hmasa zawk chu sak tan niin hun engemaw chen an luah hnuah tuna Biakin thar hawn tak hi Kum 2006 khan an sa leh a tichuan tunah hawn alo ni ta a ni.
Bawngkawn Kohhran te hian an Kohhran Kum 40 tlin, Ruby Jubilee pawh an lawm nghal a, December 11, Nilai zan atang khan Jubilee hi Bialtu Pastor, Rev C.Mawizuala chuan hawnna a nei a ni. Bawngkawn Kohhran te hi a tirah chuan Chaltlang bial-ah awm thin Kum 15 Chaltlang Bial-a an awm hnuin Kum 1994 khan Bazar bial-ah an awm leh a, tichuan May 12, 1995 khan Bawngkawn bial tih alo ni ta a ni.
————
Pastor Qtrs Hawng :
December 17, Thawhlehni khan E.Lungdar Bial Pastor Quarters chu Rev Rosanga Kawlni, District Superintendent chuan hawnna a nei. Quarters tual-ah inkhawm tawi Pastor K.Lalhmingmawia, Bialtu Pastor kaihhruaia neih niin Rev Rosanga Kawlni, District Superintendent hian UPC-North East India, Aizawl East District hnuaia Pastor Quarters pakhat ni turin hawnna a nei a ni.
E.Lungdar Pastor Quarters tuna hawn tak hi Pastor Quarters pathumna niin Kum 2018 August thla atang khan sak tan a ni a, a dung ft 44 leh a vang 30 a lian a sak niin a saknan hian cheng nuai sawmhnih vel sen a ni. Quarters sak nan hian Bial chhuang atangin hnatlang tha zanga chuang sen a ni bawk.
————
General Sunday School Department kumpuan bawhzui nan Kawlkulh bial te chuan December 13 atanga 15 chhung khan Naupang Sunday School te pualin Crusade cum lang camp hlawhtling takin Kawlkulh hmunah an hmang. He hunah hian rawngbawltu atan Bialtu Pastor R.Malsawma leh Evan Zonunsanga te hmangin hlim takin hun an hmang a ni.
———–
December 20, Zirtawpni khan Kum 2019 atan Aizawl East District Office chu khar a ni. Kharna Inkhawm tawi Office-ah hman niin inhlantharna leh infuihtharna atan hman a ni a, thawktuten hlim takin thingpui ruai an kilho bawk a ni. Aizawl East District Office hi Kum 2020 atan January 6, Thawhtanni-ah Kohhran mipuite dawr theih turin hawn leh a ni ang. Tun dinhmunah Aizawl East District Office-ah hian District hruaitute pathum, Missions Director pakhat bakah H.A pakhat, UDC pahnih, LDC pathum, Driver pali, IV Grade pali bakah Fulltime Evangelist pahnih, an vaiin mi 20 an awm mek a ni.
————–
District Hruaitute Krismas leh kumthar Programme:
Rev Rosanga Kawlni, District Superintendent chuan December 24, Krismas urlawk zan hian Bethlehem Kohhranah rawngbawlna a nei anga, December 25, Krismas Ni-ah Mualpui Kohhran, Zan-ah Salem Kohhranah rawngbawlna nei lehin December 26, Chawhma-ah Bazar Kohhranah rawngbawlna neiin zan-ah I.T.I Kohhranah hun a hmang leh anga, December 31 zan-ah District Hqrs. Kohhranah rawngbawlna a nei leh ang.
Rev Biaksangzuala, District Secretary chuan December 22, Pathianni Chawhma hian District Hqrs. Kohhranah rawngbawlna a nei anga, Krismas vuak vektah N.Vanlaiphai-ah hun a hmang thung ang.
Rev Vanlalfela Ramtiam, District Treasurer chuan December 25, Krismas ni hian Bazar Kohhranah rawngbawlna a nei anga, 26-ah District Hqrs. Kohhranah rawngbawlna nei lehin Kumthar January 1-ah Bazar Bial, Ramthar Kohhranah rawngbawlna a nei leh dawn a ni.
Rev R.Lianzama, Missions Director chuan December 22, Pathianni hian Ramhlun Vengthar Kohhranah rawngbawlna a nei anga, December 25, Krismas Chawhma-ah Zemabawk North-ah rawngbawlna neiin Zanah-ah Bethlehem Vengthlang-ah rawngbawlna a nei anga, Kumthar January 1-ah Zemabawk Vengpui Kohhranah rawngbawlna a nei leh ang.
Facebook