———-
UPC NEI GENERAL OFFICE KHAR:
UPC North East India General Headquarters Office chu Covid 19 hrilengin zual lam a pan zel avanga Mizoram Sawrkarin inkharkhip a puan avangin April 20 atanga 23 chhung khar a ni.
———-
———-
CHHIMTUIPUI DISTRICT
HRUAITUTE PROGRAMME:
1.DISTRICT SUPERINTENDENT – REV.JOSEPH L.THLAUHTHANG
Tialdawnglung Kohhran ah Pathian Ni a hmang. Church Administration leh Bible Doctrine thupui hmangin Seminar a neihpui.
2.DISTRICT SECRETARY – REV.W.L THANGHRE
Bualpui NG Kohhran ah Pathian Ni a hmang. Church Administration leh Bible Doctrine hmangin Seminar a neihpui.
3.MISSIONS DIRECTOR – REV.DR.C.SIHMO
Archhuang Kohhran ah Pathian ni a hmang. Church Administration leh Bible Doctrine hmangin zirtirna a pe.
———-
TANPUINA PE:
April ni 16, 2021 khan Chhimtuipui District chuan Calvary Bible College zirtirtu te leh zirlai te Covid 19 hri leng in a man avanga enkawl mek te an tawrhpui zia lan tir nan Rs.10000/- Rev.Lalpeklien Sungte hnenah Bank kaltlangin an pe.
———-
RAM MU:
Chhimtuipui District Conference vawi 46-na rorel bawhzuina in April ni 18-20 chhung khan Phalhrang/Thiahra hmunah Rev. H. Lalhnehchunga, Pastor V Lalhlimpuia, Evan L Khailawng home missionary leh T. Upa H. Lalduhsanga, Dist. PYD Secretary te chuan ram mut beihpui an thlak a, Hripui leng avangin hun rei zawk rawngbawlna kalpui theilo mahse an theih chin chinah home crusade neiin ṭawngṭaina nen hun an hmang.
———-
MISSION FIELD AH RAWNGBAWLNA NEI
Siaha Bial PYD chuan April ni 17-18 hmang khan Riasikah Home mission field ah rawngbawlna an nei.
Pastor C. Lalchhuanthanga Siaha sectional pastor leh T Upa N Lalchhuanmawia ten hovin Bial chhung PYD hruaitute leh member ṭhahnem ngaite an an tawiawm bawk. Evan L Khailawng te nupa chuan Riasikah hmunah hian awm chilh in rawngbawlna an nei mek a ni.
———-
MEMBER THAR:
April ni 18 Sunday zan khan Phura Local Chair man Upa F. Lawmaa chuan chhungkaw 1 member 3 awmna chu UPC NEI member ni turin Lalpa Isua hmingin a lawmlut.
———-
———-
LUNGLEI DISTRICT
1.KUMPUAN HAWNNA NEIH A NI
April ni 18 Pathianni chawhnu dar 1:30 khan Lunglei District Thianghlimna Committee buatsaihin Headquarters Local biak inah Lunglei District UPC in kumpuan atana a neih ‘ZUK LEH HMUAM DO’ chu a hawnna neih a ni.
He Kumpuan hawnna inkhawm hi District Thianghlimna Committee Chairman Rev.C.Lalhriatpuia chuan kaihruaiin District Thianghlimna Committee Secretary Evan.T.Lalzawmsanga chuan Report pein kumin chhunga Thianghlimna Committee-te hmalakna tur ruahman hrang hrangte a puang chhuak bawk.
He kumpuan ‘Zuk leh hmuam do’ hi Rev.C.Lalrintluanga, District Treasurer chuan hawngin fuihna thuchah ropui tak a puang chhuak bawk.
He hun hi Headquarters bial Thianghlimna Committee Chairman Rev.Saidawla chuan tawngtainain a titawp a ni.
———-
2. LUNGLEI DISTRICT PYD CONFERENCE THULH A NI
Lunglei District PYD Conference vawi 53-na chu April ni 25 Pathianni hian Hnahthial Venglai biak inah rorel inkhawma neih tum a ni a, amaherawhchu Mizoramah Covid-19 hri kai an pun zel avang leh sawrkarin SOP thar a tih chhuah leh tak avangin thulh a ni a, Conference neih hun tur chu Executive Board in ala ruahman ang.
———-
———-
NORTH MIZORAM DISTRICT
CBC Covid Victim te tanpuina pe:
UPC-North Mizoram District chuan vawiin April ni 15 ningani khan, North East India- UPC Bible zirna Calvari Bible College, Shillong Campus-a Covid 19 hri kai CBC Faculty chhungkaw engemaw zat leh CBC zirlai te tanpuinan Rs. 20000 CBC Principal Rev. Lalpeklien Sungte a hlan.
———-
Lengpui Bial News:
Lengpui bial PYD te chuan April ni Ni 9-11 khan, Meet cum revival Dapchhuah preaching point ah an hmang.
Lengpui Bial PYD te hian Meet Programme chhunah hmangin zan lam programme bakah Pathianni chhunah Revival an hmang thung. He Meet buatsaih hi a hlawhtling hle a, Lengpui Bial PYD ten thlarau malsawmna tam tak an dawng a ni. Meet inkhawm neih chhunga thawhlawm tlingkhawm te Dapchhuah Kohhran puala dah vek a ni a, hei bakah hian Dapchhuah Preaching Point hi Lengpui Bial PYD in Dekchi lian an pe a, Lengpui local in ceiling fan a pe bawk a, District Treasurer Rev. K. Lalduhsanga chuan Meet pualin Rs. 2000/- a thawh bawk.
———-
Mithar nei:
April ni 11 Pathianni khan North Mizoram District in rawngbawlna beihpui thlak kalpuia rawngbawltu a rawih John Gabriel-a rawngbawlna hmun Rengdil Bial, New Eden-ah mithar chhungkaw 3, Member 10 Pentecost kohhranah lawmluh a ni.
Thinglianah mithar: North Mizoram District- Officer meeting in ruahmanna a siam anga Thinglian khuaa tirhkoh dah Evan Hlima chuan April ni 14 Nilaini zan khan Pentecost kohhrana awm turin mithar chhunkaw khat member 6 awmna chu a lawmlut.
———-
KAWRTHAH-ah mithar:
April ni 18 Pathianni kalta khan North Mizoram District PYD hmalaknaa rawngbawlna hmun Kawrthah Preaching Point-ah mi thar -6 ( chhungkaw khat) UPC-NEI, Kohhtanah sengluh a ni a, member tharte hi Rengdil Bialtu Pastor C.Lalthlenglianan Lalpa Isua hminga lawm lutín; nau – 2 hlan nghal a ni. bialtu Pastor hi Rengdil kohhran atangin mi -14 zetin an tawiawm bawk.
Kawrthah Preaching Point Biak ina hman tur hian thutthleng thar siamin, April ni 18 vek hian thutthleng thar hlanna Bialtu Pastor hian a nei nghal bawk. Kawrthah khuaah hian North Mizoram District PYD rawihin Evan Isaak Lalhmingliana a rawngbawlna Pathianin mal a sawm hle.
———-
Tirhkoh Seminar nei:
UPC, North Mizoram District Board rorel angin, North Mizoram District chhunga District in rawngbawl tura a rawih Tirhkoh te, April ni 20 thawhlehni khan, District Hqrs. Biak in Tuikhuahtlangah Seminar a neihpui.
Tirhkoh Seminar-ah hian Dsitrict hruaitu 3, Rev. Laltluanga Dist. Supdt, Rev. Chhiarpuia Dist. Treasurer leh Rev. K. Lalduhsanga Dist. Treasurer ten Paper present in zirtirna tha tak tak an pek bakah tirhkoh lam atang tein sharing hlawkthlak tak tak neih a nib awk.
———-
Districrt LAD sum hmangin Pentecostal Gateway Higher Secondary School thuam tha:
North Mizoram District LAD ten Confe rorel anga Pentecostal Gateway Higher Secondary School room chhung Partition leh thildang te thuam thatna tura Rs. 100000 a pek chu, Aril ni 19 thawhtanni atang khan School thuamthat hna hi tan a ni. PGHSS te an LAD tena an sum pek hmang hian Room Partition siam that ngai te siamthain an hna hi a rang thei ang bera zawh an tum.
———-
N. Thinglian kohhran inkhawm hun hmanpui:
Bilkhawthlir Bial LAD te chuan April ni 18 Pathianni hmang khan, an Bial chhunga District in rawngbawlna a nei mekna hmun N. Thinglian Preacfhing Point kohhranah inkhawmin hun an hmanpui a, N. Thinglian kohhrante’n an lo lawmin, Bilkhawthlir bial LAD te chungah lawmthu an sawi.
———-
HQRS BIAL PYD KUMPUAN HAWNNA:
April ni 18 Pathianni khan North Mizoram District Hqrs. Bial PYD te chuan NEI-PYD Kumpuan ‘Thuthlung Puan Uar’ chu Bial Kumpuan sub Commtt. Hmalaknain Mission Vengthlang Biak inah an hawng.
Kumpuan hawn inkhawm hi chawhnu dar 2:00Pm-ah tannin Bro. Lalvensanga Chawngthu, Chairman Hqrs. Bial PYD Kumpuan sub commtt. chuan a kaihruai a, Bro.Lalthanpuia, Treasurer chuan hun hmasa a hmang.
Kumpuan hawnna hi Evan R. Vanlalchhanchhuaha, NMD PYD Kumpuan sub-Commtt, Chairman chuan Marka 16:15 thu chhiarin Lal Isua hmingin NEI huap PYD tena kumpuan atana a nei “Thuthlung puan uar” tih chu hawngin PYD Member te Pathian Thuthlungah rinawm taka awm tur leh mite tan malsawmna ni turin a chah a, PYD Motto anga Krista tana sengkhawm hna thawhna kawngah theih tawk chhuah fo turin kalkhawmte a fuih bawk.
Bial kumpuan hmalakna te Kumpuan Secy hnen atangin report ngaihthlak a ni a, hemi hnu hian Evan. T. Vanlalruata’n tawngtai na a hmang a, inkhawm tin a ni.
———-
AIBAWK BIAL PYD CHOIR 2021-2022 INDUCTION SERVICE NEIH A NI:
April ni 18th Pathian chawhnu khan Aibawk Bial PYD Choir 2021-2022 Induction Service chu Bial Headquarter, Aibawk Biak Inah tluang taka neih a ni. Member inlawm luhna inkhawm hi Bial Music Committee Secy, T. Upa HP Rodingliana’n kaihhruaiin, Bialtu Pastor, Pastor PC Lalrokima’n member lawmluhna a nei a, Zaipawl memberte fuihna thu tha tak taka sawi bawk. He hunah hian Zaipawl report te ngaihthlak niin, zaipawl member tinte kawl turin File sem a ni bawk. Bial zaipawl member te hi mi 25 an ni.
Aibawk Bial PYD choir te hi heng mite hian an enkawl mek a ni:-
Conductor : Bro. C. Lalhmachhuana
Asst. Conductor : T. Upa MS Dawngliana
———-
𝙈𝙄𝙏𝙃𝘼𝙍 𝙇𝘼𝙒𝙈𝙇𝙐𝙃𝙉𝘼 𝙇𝙀𝙃 𝘽𝘼𝙋𝙏𝙄𝙎𝙈𝘼 𝙍𝘼𝙒𝙉𝙂𝘽𝘼𝙒𝙇𝙉𝘼 𝙉𝙀𝙄:
Pathianni kal ta April ni 18 khan Bairabi Bialtu Pastor Lalhmuakliana hnamte chuan, UPC-NEI, Bairabi Bethel Kohhrana lawi turin mithar lawmluhna a nei.
Mithar lawmluh te hi kohhran hrang hrang atanga lo lut niin; an vaiin member 4 an ni. Bialtu Pastor Nau 1 hlanin rawngbawlna a nei nghal a, inkhawm banah Sual ngaihdamna Baptisma chantirin rawngbawlna a nei zui nghal a, mi 6 in Lalpa Isua hmingin Sual ngaihdamna Baptisma an chang a ni.
———-
SIHPHIR BIAL MISSIONS DEPARTMENT CHUAN TUMPANGLUI M.F. MISSIONARY QUARTER EXTENT IN WORK CAMP NEI:
Dt. 14. 4.2021 ( Nilaini) ah North Mizoram District missions department ruahmanna siam angin , Sihphir bial missions department te chu Tumpanglui M.F missionary Quarter extent a work camp turin an lo kal a, work camp zawng zawng hi mi -15 an ni a, Rev.C.Lalrammuana ,bialtu Pastor in work camp te hi a rawn ho a ni.
An rawn thlenni Dt 14.4.2021 Dar 3:30 P.M atangin work camp hna chu tan nghal a ni a , hemi ni ah hian ..a ban phun kim nghal vek a ni a , Missionary Quarter hi 8 ft× 12 ft a zau a extent a ni a,Tumpanglui M.F.ah hian sist H.Khawlliani chu missionary in a awm mek a ni
Dt.15&16.4.2021 chhungin work camp chhunzawm a ni a, work camp te hian thahnem an ngai hle mai a, Dt 16.4.2021 phei chuan dar 11:00 P.m thleng an thawk a ni,a va ropui em.
Hetih rual hian, sist.Lalzikpuii : Maubawk chuan Tumpanglui Missions field missionary Quarter a dah turin , Thutthlengsei -2 ( a cushion tel nghalin ) a rawn donate a , kan lawm hle mai.
Tluang taka work camp hi zawh a nih hnuin , Dt. 17.4.2021 ( Inrinni ) tuk thuan eikhamah Sihphir lam panin an hawng ta a ni, Rengdil bial aiawhin Sihphir bial missions department chungah lawmthu thinlung takin Lalpa Isua hmingin kan sawi a, An rawngbawl zelna turah Pathianin malsawm zel rawh se.
———-
RENGDIL KOHHRAN : RENGDIL BIAL
Bial conference rorel bawhzuiin, Dt. 11.4.2021 hmangin Rengdil Church board committee chin te BiakIn ah serh leh sang chungchang ah trainning neih a ni a, resource person ah Bialtu Pastor C.Lalthlengliana chu hman a ni a, hlawk thlak an ti hle.
Rengdil kohhran hian V.C ah ram dilin , sum ke nghet atan huan tur vatin an vah belh zel a, thlai sum chang thei chite phun in, hnatlang chhuak an tha thin hle.
Kumtin a project an neih thin angin, Project atan Committee room sak leh Generator lei nise an ti a , Building committee leh department hrang hrangte nen tang kawpin ..chak tak a hmalak mek a ni bawk.
Rengdil kohhran ah hian bialtu Pastor C.Lalthlengliana leh Upate rawngbawlna kal tlangin mithar chhungkaw – 12 sengluh a ni tawh a, kohhran hoten lawmawm an ti hle.
Tunah hian Rengdil P.M.F ten BiakIn hungna gate siam tumin hma an la mek a , hetih rual hian Rengdil L.A.D ten BiakIn carpet phah tumin hma an la mek bawk a ni, Rengdil P.Y.D ten kohhran mamawhna a pianga hman turin thir leihlawn -2 kohhran ah an rawn pe bawk a, Biakin compound ah Toilet leh ZunIn tha tak church board hmalakna in siam a ni bawk a ni.
———-
MAUBAWK VENG KANG TUAR TE TAN TANPUI NA HLAN…
Dated 21 April,2021 District Building Commiitee in Bairabi Bial Pastor Quarters sak mek endik tura an rawn tirh Rev. R.Lalhmangaiha leh a thian te lokal chu Bairabi Bial Tualchhung Kohhran hrang hrang leh Bial Kohhran pui thawhkhawm atangin Bial aiawh in Bialtu Pastor Lalhmuakliana Hnamte in Maubawk Bialtu Rev. R.Lalhmangaiha hnenah Maubawk veng kan Kohhran kang tuarte tanpui nan Rs. 12,000 a hlan. Hetianga kan Bial chhung Pastor Quarters sak mek dinhmun te min rawn enpui hi Bairabi Bial mipui te kan thlamuangin ka lawm tak zet zet a ni..
Tin, Pastor Quarters sak mek ah hian Bial PYD in hnatlang a nei tawh a, Bial chhung Thalai Bairabi Bethel PYD leh Bairabi South PYD ten zan hnatlang an nei tawh bawk…
Sist. Vartlingi (Vari) Bairabi North Kohhran a mi in Quarters sakna a hman turin Balu 6 mts a pe bawk, hetianga mi in phal leh thahnem ngai Bial in kan nei hi a lawmawm in a thlamuan thlak hle mai.. Bairabi Bial te Lalpan min awmpui na leh District hruaitu ten min duh sakna ah lawmthu kan sawi mawlh mawlh a ni…
———-
HRATTIRNA
Vawiin Dt 20.4.2021 atanga Dt 26.4.2021 4am thleng sawrkar in lockdown a puan a vangin UPC NEI North Mizoram District Office Tuikhuahtlang chu lockdown chhung zawng khar a ni dawn a,. office staff zawng zawngte office kal loh tur a ni a, Mipui te tan office dawr loh theih loh thil a awm a nih chuan Dist hruaitute hnenah hriattir mai tur a ni e.
Rev chhiarpuia
Secretary
NMD UPC NEI
Tuikhuahtlang
Aizawl
———-
Thenzawl Bial PYD fehchhuak:
Thenzawl Bial PYD te chuan Confe rorel bawhzuiin April ni 19 thawhtanni khan midangte tana malsawmna ni turin an fehchhuak.
Thenzawl Bial PYD te hian sumsuib Bial chhunga awm Chawilung Kohhran Biak in sak mekah hnatlangin Biak inchhun siam bakah Biak in chung an chih bawk a, chokut siamin engemaw zat an tun hman bakah ACC Block rem hna pawh an thawk zo hman bawk. Heng bakah hian rawra thiar leh thil dang Biak in sakna atana pawimawh leh tul thawkin nileng hun hlim takin an hmang a ni.
Thenzawl Bial PYD atang hian mi 58 lei an thawkchhuak bawk.
———-
———-
AIZAWL EAST DISTRICT
District Board:
Aizawl East District hnuaia rorelna sang, District Board April 8, Ningani-a tan chu District Conference neih a nih hnuah April 12, Thawhtanni khan chhunzawm leh a ni a, April 15, Ningani khan tluang takin zawh a ni. District Board hi Rev Biaksangzuala, District Superintendent chuan kaihruaiin Rev R.Lalrinsanga, General Superintendent pawhin Board neih chhung zawng hian a telpui a ni. Board-ah hian Board memberte an telkim thei a ni.
District Board-ah hian thu ngaihtuah tur engemaw zat lutin an thu passed langsar zualte:
1. Champhai Bial tih thin chu Kahrawt Champhai Bial tia thlak a ni.
2. District Conference 2021 in kumin 2021 hi ramlak beihpui thlak kumah a puan angin hemi atana rawngbawl hna thawk turin Evan H.Lalbiakzauva leh Evan V.Kamneihthanga te chu lak thar an ni.
3. Delhi Chaplain turin Rev PB.Chawngtinliana, Chhingchhip bialtu Pastor chu kal remtih niin Chhingchhip bial hi Rev. Biaksangzuala, District Superintendent chuan a hmui rih dawn a ni.
4. Bialtu Pastor, an Term hmangzo tawhte chu hetiang hian an awmhmun sawn a ni.
Rev Pc.Lalnghakliana, Saitual Bial chu Darlawn bial-ah dah niin
Rev T.Lalbiakliana, Darlawn Bial chu Saitual bial-ah dah a ni.
———-
Office khar:
Mizoram Sawrkarin Covid-19 hrileng tih ziaawmna atana Lock Down a puan avangin Aizawl East District Office pawh April 20 atanga 23 chhung khan khar a ni. Office khar chhunga Office dawr duh, harsatna tawk an lo awm chuan hruaituten hriatthiamna an ngen a ni. Office hawn leh hun emaw khar zel thu emaw chu Sawrkar thuchhuak ngaichang chunga la inhriattir leh tur a ni tiin District Secretary chuan thuchhah a siam a ni.
———-
District PYD OB fehchhuak:
Aizawl East District PYD OB te chuan ruahmanna an lo siam tawh angin April 18, Pathianni khan Suangpuilawn Bial tlawhin rawngbawlna an nei. Suangpuilawn bial te hian Vanbawng hmunah District PYD hruaitute hi lo dawng sawngin hun hlimawm tak an hmang a ni. District PYD Hruaitute atangin Upa F.Lalthlangliana, Vice President, Evan R.Vanlalpeka, Secretary leh Evan Zothansiama, Fin. Secretary te kalin Pathianni chawhm leh chawhnu khan an puala inkhawmna neih a ni a, hetah hian Upa F.Lalthlangliana, Vice President leh Evan Zothansiama, Fin. Secretary te hnen atangin thuchah an ngaithla a ni.
———-
Kumpuan hawng:
Upper Republic Bial PYD te chuan April 18, Pathianni chawhnu khan College Veng Biakinah Kumpuan hawnna an hmang a, Upa C.Zamawia chuan kaihruaiin Sis Lalruatfeli’n hunserh a hmang a ni. Bro. CS Lalrothuama, District PYD Kumpuan Sub-Committee Secretary chuan kumpuan hawnna hi a nei a ni. Fuihna thu tawi, Bial PYD President T.Upa R Lalrintluanga chuan neiin Kumpuan pual Bible quiz neih chhunzawm a ni.
Bethlehem Bial PYD Kumpuan Committee te pawhin April 18, Pathianni chawhnu vek khan Bethelhem Vengthlang Biakin-ah Kumpuan hawnna hi an hmang a, Bro Lalhmingmawia, Bial Kumpuan Chairman in kaihruaiin Bialtu Pastor, Rev Rohmingliana’n hunserh a hmang a ni. Bro Danny R Lalmuansanga, Bial Kumpuan Secretary in Report a pe bawk. Kumpuan hawnna Evan H Lalhlimpuia, District PYD Kumpuan Chairman chuan neiin Bible Quiz hmanga in elna neih zui a ni. Kumpuan hawnna hi Bethlehem Vengthlang PYD ten hripui leng karah SOP tha taka zawm chung in anlo thleng a ni.
———-
Revival Committee:
April 17, Inrinni zingkar khan District Revival Committee, Rev KVL Hmangaihkima, Chairman kaihruaiin neih a ni a, hetah hian thu pawimawh tak tak ngaihtuah niin District Revival Speaker te term chu alo tawp tak avangin a thar lak tha tih a ni a, Revival Speaker lak tur hi Advertisement chhuah ni se tih niin May 6, Ningani chawhma dar 11-ah District Committee room-ah interview ni se tih a ni. Hei bakah hian Speaker leh Team memberte lawmman pawh tihpun a ni bawk.
———-
Mithar leh baptisma chang thar:
April 18, Pathianni khan hetiang hian Mithar leh baptisma chang thar neih a ni.
Zemabawk bial, Zemabawk Vengpui Kohhranah chhungkaw khat member 3 te chu Kohhranah sengluh an ni a, an naute Pathian hnenah hlan nghal a ni.
Thuampui Bial, Muanna Vengah mi 1 in sual ngaihdamna baptisma Rev KVL Hmangaihkima, Bialtu Pastor kutah changin Muthi Kohhranah pem thar chhungkaw khat member 5 lawmluhna neih niin Kohhran dang atangin mi 1 sengluh a ni bawk.
Evan Thangneihsanga rawngbawlna kal zelah Mualmamah mithar 1 in sual ngaihdamna baptisma a chang.
Zohmun bial, Zohmun Kohhranah chhungkaw khat, member 5 sengluh an ni.
Khawzawl bial, Hmuncheng Kohhrana Bro.H.Lalrinfela rawngbawlna kal zelah mi 17 in sual ngaihdamna baptisma an chang tawh a, mithar 7 April 19 khan sengluh an ni.
Facebook