UPCI CONFERENCE 2022
UPCI General Conference 2022 chu October ni 4, 2022 Thawhlehni zan khan Orange County Convention Centre, Orlando, Florida hmunah tan a ni ta. Conference theme atan MAKE HIM KNOWN tih hman a ni.
A tan zan inkhawm hi Global Missions pual inkhawm niin Speaker Pastor Joel Urshan chuan thuchah nung takin a sawi a. Nilai zanah North American Missions pual inkhawm neih leh niin Pastor Tim Gaddy-an thusawi rawngbawlna a nei thung. Ningani chhunah Children Ministry pual inkhawm buatsaihah Pastor Jonathan MCDonald-an thu a sawi a, zanah General Superintendent Rev. David K. Bernard an thu a sawi ve thung.
Zirtawpni chhun Youth Ministries pual inkhawmah Pastor Darrel Bates-an rawngbawlna a nei a, zan inkhawmah speaker hrang hrang – Nick Mahaney, Mark Morgan, David Norris, Jason Sciscoe, Art Wilson ten thusawi rawngbawlna an nei thung.
Inkhawm kar lakah rorel leh hruaitu inthlan a awm a, kumin hi Secretary leh Treasurer te thlan kum a ni, hruaitu thlan thar te:
UPCI Gen Secy Trea : Rev. Scott Graham
Gen Secy of Global Missions: Scotty Slaydon
Gen Secy of North American Missions : William Hobson
Gen Secy of Children Ministries : Robbie Knox
Gen Youth Secy : Jeremy Stafford
Gen Secy of Ladies Ministries: Jane Buford
Report-a lan danin tun dinhmun UPC ten rambung nations & Territories 238 ah rawng kan bawl mek a, local church 43000 chuang awmin member hi nuai 55 chuang hret kan ni.
———-
GENERAL SUNDAY SCHOOL EXECUTIVE COMMITTEE
October ni 5 Nilaini khan General Sunday School Executive Committee chuan meeting pawimawh tak General Headquarters Committee Room Mualpui Salem vengah an nei a, General Sunday School Director Rev. R. Laichhingpuian meeting hi a kaihruai a ni. An thurel Langsar zual te:
1. Sunday School Registration Day January ni 1 2023 chu Kumthar ni a nih avangin January ni 8 2023 Second Sunday ah sawn ni se tih a ni a, Chawhma Thawhlawm hi Registration pual ni se tih a ni bawk.
2. Sunday School Day Programme Pennet a chhuah tur in saim ni se.
3. Tobacco chung chang ah Seminar neih ni se, District Sunday School OB te nen tangkawp a hmalak ni se…tih te an rel a ni.
———-
GENERAL MISSIONS BOARD:
October ni 6 leh ni 7 chhung khan UPC North East India General Missions Board chu General Headquarters Committee room, Mualpui Salem veng, Aizawl ah thu khawmin Board hi General Missions Director Rev. Biaksangzuala’n a kai hruai a, General Official te bakah Board member-te an telkim thawkhat hle a ni.
General Missions Board ah hian UPC North East India hnuai a District leh Field hrang hrang a tanga Agenda lo kal te bakah kum 2023 General Missions Department Budget tur te an sawi ho a ni.
———-
———-
BARAK DISTRICT
REVIVAL CRUSADE:
September ni 30 – October ni 2 chhung khan Barak District Revival vawi 9 na chu Hmarkhawlien Local ah hman a ni a, General Superintendent Rev. R. Lalrinsanga chu Speaker ah hman a ni.
———-
SUNDAY SCHOOL SEMINAR:
October ni 4 Thawhleh ni khan Hmarkhawlien Local Sunday School Department buatsaihin Seminar neih a ni a, Resource Person Sis. Dr. Lalthakim Asst. Prof. A.U niin, Thupui – “Teaching Technique” tih chu hlawhtling tak a zir ho a ni.
———-
KOHRAN THILPEK INHLAN
October ni 5 NIlai ni khan Upa B. Lalhmangai te nupa chuan an fanu Sis. Fimrokim Hmar hriatreng nan Saron Local ah Steel Almirah an hlan a ni.
———-
———-
LAWNGTLAI WEST DISTRICT
District Hruaitute Programme:
District Superintendent, Rev.F.Lalbiakthuama leh District secretary, Rev.Lalsawmliana Sailo te chuan Lawngtlai South bial PYD leh LAD join conference an hmanpui ang.
———-
BIBLE QUIZ COMPETITION
Date 29-30.Sept.2022
September ni 29 -30 chhung khan Lawngtlai North bial PYD buatsaihin Bible Quiz Competition neih a ni.
Bible Quiz Competition ah hian Exodus bu pumpui hmanga inelna buatsaih a ni a, bial chhung Local te an telkim thei vek a ni. Pastor S.Vanlallunghnema Dist.PYD President, Lawngtlai North bialtu ni bawk chuan hunserh hmangin, District PYD Secretary Evan George Lalawmpuia pawh a telpui bawk a ni.
Result
1st.Lawngtlai AOC Local
2nd.Lawngtlai bazar Local
3rd.Lawngtlai council veng Local
4th.Lawngtlai vengpui(Dist.Hqtrs) Local
Judge te leh Bial hruaitu te atangin thusawi ngaihthlak niin lawmthusawina te neiin he Quiz programme hi ti khar a ni.
———-
HNATLANG THAWK LEH THILPEK PETUTE HNENAH LAWMTHUSAWINA NEI
Dt.30.Sept.2022 Friday ni in Ngengpuikai home mission field Biakin sak hna thawh chhunzawm leh niin District Superintendent Rev.F.Lalbiakthuama leh District Treasurer Pastor S.Vanlallunghnema te leh Lawngtlai North bial lam atangin mi enge mawzatin biakin sak hnatlang hi an thawhpui leh a ni. Tukverh frame vuah leh Biakin rawnghnawih te thawh a ni.
Biakin sakna kawngah hian mi in phal tak² ten thilpek thahnem tak an pe bawk
Thilpek petute :
1. Rbt.Sist. C Zathangi Bazar local chuan Buhfai Kg 25 Ngengpuikai Biakin saknan a thawh a.
2. Mampui local ten Pulpit tha tak mai Ngengpuikai a hman tur an pe bawk a..
3. Chandmary local ten Hording board Biakin chhunga tar tur Ngengpuikai local hnenah an hlan bawk a.
4. Bro C Lalawmpuia college veng local-in, Biakin chhung hnawih tur rawng a tum bawk.
5. Ngengpuikai transformer current a chhiat avangin hna thawh theih a nih loh laiin Khawmawi Branch YMA ten an Generator a thlawnin min hman tir a, an chungah lawmthu an Sawi ani e.
———-
MITHAR LAWMLUT
Date 01.Oct.2022
October ni 1 inrinni khan Pastor K.Lalzawmsanga Bungtlang South bialtu chuan Darnamtlang Home Mission field ah mithar chhungkaw khat(1) member pathum(3) awmna chu Lalpa Isua hmingin Kohhranah lawm luhna a nei a ni.
Darnamtlang field ah hian Evan Lalrindika chu field worker in a awm mek a ni.
———-
SOCIAL WORK DAY HMANG
October ni 3 Social Work Day Lawngtlai West District chhungah Bial leh Local in an hman dan tlangpui:
Lawngtlai South bial
Lawngtlai South bial te chuan mahni Local theuh ah mahni rem chan anga hman nise an ti. Local hrang² an hman dan tlangpui.
Chandmary PYD
V.President bro T.Sangheian tawngtaina neiin Chandmary PYD chuan an veng chhunga Biakin hrang² hnaiha Sidrain tih fai hna an thawk a ni.
College veng PYD
College veng PYD chuan biakin leh a chheh vel tihfai hna neiin hun an hmang a ni.
Mampui PYD te pawn biakin hmun hma leh a chheh vel tihfai hna an thawk a ni.
Saizawh East PYD
Saizawh East fielda PYD te pawh Social workday hmang ve in Evan Eliazar K.Vanlalvena Field worker chuan hunserh hmangin Biakin bul leh a vel thenfai hna tlang thawh a ni.
Bethèl Local PYD
Bethel Local te chuan biakin kawng leh a vel te thenfai hna thawkin hun an hmang a ni.
Lawngtlai North bial
General PYD ruahmanna in, Bial leh Local hrang htangah te hnatlang thawh a ni a, Lawngtlai North Bial PYD leh Swach Bharat Mission, UD&PA Lawngtlai te bakah Sanitation Department, LADC te chuan Khawlai Areopagi atanga Chandmary inkar Bawlhhlawh tihfai hnatlang an nei a ni.
Hnatlang thawh hma hian Areopagi ah inkhawm tawi neih a ni a, Evan.GB.Lalawmpuia Dist.PYD Secretary in hun a kaihruai a, Pastor.S.Vanlallunghnema District PYD President in hunserh hmanna a nei a, UD&PA lam atangin Bawlhhlawh sawngbawl dan inzirtirna te neih zui a ni a, Glove leh Garbage bag semna te neih nghal a ni a hnatlang tan nghal a ni.
Chawngte bial
chawngte Bial PYD social work day hman dan tlangpui
Dar 10.00am ah civil hospital chawngte (CHC) ah chawngte Bial PYD President. Bro Jeho Lalrinhlua’n hun kaihruaiin, hunserh hmanna nei turin Bialtu Pastor T. Ngurchhuana tawngtaina nei turin a sawm a chumi hnuin hna tawh tan a ni.
Chawngte Hospital (CHC) ah Hordingboard tarna neih a ni.
Chawngte hospital (CHC) Building leh compound vel tihfai-na neih a ni bawk.
Chawngte hospital (CHC) ah damlo leh thawktute ei leh in tur semna neih a ni bawk.
Chawngte police station building leh a vel-te tih faina neih niin Chawngte police staff-te hnenah ei leh in turte semna neih nghal a ni.
Bial PYD Vice President Rbt. Maldinthanga’n tawngtaina in hun tawp khar-na a neih sak a ni.
Tin, zanlam program hi Bial huapa hman ni leh in chawngte c local-ah hman a ni.
Program tlangpui-te chu:-
Chairman : Bro Jeho Lalrinhlua ( chawngte Bial PYD President)
Speaker : Pc Remruatdika (chawngte ‘p’ local pyd president)
Local tin atangin secretary report ngaihthlak na neih a ni bawk
Diltlang south bial
Diltlang bial PYD te pawhin mahni Local ah theuh a rem chang dan ang zela hman nise an ti
Diltlang Local
Diltlang Local Chuan Bro.J.Remnalala in chu Social work day pualin thawh ngai ang² te thawkin hnatlang ani.
Khawmawi Local
Khawmawi Local pawhin he social workday pualin kohhran chhunga Raltlan damlo eitur neilo hnenah Buhfai Kg 50 leh Pawisa enge mawzatin tanpuina an hlan bawk.
Bungtlang south bial
Sabualtlang Local PYD te pawn social workday hi hmangin school ram leh hmun hma te tihfaia samfai hna thawkin waiting shed leh motor kawng kam te samfai a ni bawk.
School naupang te nen an hnatlang hi an thawk a ni.
Lawngtlai North bial chuan date 07-09.Oct.2022 hmangin Khawmawi Local tlawhin Fehchhuahna hun an hmang.
———-
BIAL CONFERENCE HMANG
October ni 07-09.2022 chhung hian Lawngtlai South bial PYD chuan Chandmary biakin ah Bial Conference an hmang.
Conference thupui atan Siamtharlehna Galatia :6:15 chu hmangin Speaker ah Evan T.Vanlalruata N.Mizoram Dist.chu an hmang a ni.
———-
HOME MISSION FIELD TAN THILPEK PE
Rbt Laldiliana leh Bro David Lalnuntluanga te chuan Darnamtlang Home mission field tan Inverter Batery leh Celling fun tha tak an pe a, Kohhran chhungkua ten an chungah lawmthu an sawi tak meuh meuh a ni.
———-
———-
LUNGLEI DISTRICT:
TOWN AREA P.Y.D. TEN SOCIAL WORK DAY AN HMANG:
Oct 2, hi North East India UPC Kohhran Thalai pawl Pentecostal Youth Department (PYD) Social Work Day a ni a, India hmarchhak pum huapa hman a ni.
Kumin 2022 Social Work Day October ni 2 hi Pathianni anih avangin General PYD Executive Committee chuan October ni 3 Thawhtanni ah Social Work Day hi hman nise a ti a, Kohhran ni pawimawh anih angin Kohhran Office zawng zawng leh a kaihnawih Zirna In zawng zawng pawh khar a ni.
He Social Work Day hi Lunglei District PYD ruahmannain Town Area PYD-te chuan a huhoin an hmang a, Town Area ni lo Local-te chuan an remchan dan ang Theuhin vantlang tana thil tha tih nan he hun hi an hmang bawk. Tin, remchan zawkna avanga October ni 1, Inrinnia hmang pawh an awm a ni.
Town Area PYD-te chuan Sobji Bazar leh a vel tih fai nan an hmang a, hna thawh tan anih hma hian Sobji Bazar kawt zawlah hunserh tawi hman hmasak a ni a, he hun hi Upa C. Malsawmkima, Chairman, Social Work Day Committee-in a kaihruai a, Evan. Laldinpuia Sailo, Secretary District PYD chuan hunserh hmangin, Rbt. H. Lalhmingmawia, Secretary Social Work Day Committee chuan Report a pe a, Pi Vanthangpuii DUDO Lunglei chuan thusawina neiin, Two bin system hman dan inzirtirna neih chhunzawm a ni bawk. He hunah hian Sobji Bazar leh a vel bawlhhlawh leh thenfai ngai hrang hrangte tifaiin PYD members 160 chuang an kal khawm a ni.
Pentecost Kohhran thalai pawl rorelna sang General PYD Conference rorelna chuan Kum 1999 khan Social Work Day neih nise tiin a rel a, Kum 2000 atang khan hman tan nghal niin kum tin Oct ni 2-hi India hmarchhak pum huapin Vantlang tana hna tha thawhna ni atana hman chhoh a lo ni ta a ni.
Social work day-ah hian thisen pek, Damdawiina damlo tana ei tur sem, vantlang hmun pawimawh Community hall, Damdawi in leh Sub Center tih fai, vantlang inthiarna tur siam leh tihfai, khawlai thenfai leh tui luan kawr tihfai bakah thingphun hnatlang te neih thin a ni.
———-
P.C.D. MEET:
Pentecostal Children Departmetn (PCD) Lunglei District buatsaih PCD MEET chu October ni 7 (Fri) zan hian District UPC Conference Hall-ah Quiz Competition hmangin neih \an a ni dawn a, hetah hian Local 11 an tel ang.
Tin, October ni 8 Inrinni ah Saikuti Hall-ah he Meet hi neih chhunzawm leh a ni ang a, Solo Competition Top 10 leh Drama Competition hmangin intihsiakna neih leh a ni ang, Drama-ah hian Local 6 an tel dawn a ni.
———-
JOINT CONFERENCE :
September ni 30 a\anga October ni 2 chhung khan Tawipui Section LAD & PYD Joint Conference vawi 47-na chu Mual\huam ‘S’ ah hman a ni. He Joint Conference ah hian |awipui bialtu Pastor K.Vanlalhruaia chu Speaker ah hman niin thupui atan “Thuthlung kha rawn pawisa ang che” (Sam 74:20) chu hman a ni. Inkhawm a piangin Sist. Zionpari (Niawhtlang Local) leh Sist Lalthanzuali Fanai (Thingfal Local) te hnen aṭang in Pathian fakna hla ngaihthlak ṭhin a ni.
October ni 1 Inrinniah LAD leh PYD ten rorelna an nei a. PYD-te hian Biak in ah rorelna an nei a LAD-te hian Primary School ah rorelna an nei.
October ni 2 Pathianni inkhawmnaah Tawipui Section PYD Environment Protection Committee buatsaih ‘Environment Humhalh’tih thupui hmanga Essay in ziah siak lawmman sem a ni a. Lawmman dawngtute:
1-na : Bro. Th. Vanlalhmangaiha, Mualcheng ‘S’ Local.
2-na : Sist Lalrothangpuii, Thingfal Local
3-na : Bro Vanlalhriatrenga Hnamte, Mual\huam ‘S’ Local
Tin, LAD te’n Taget tlak hmasa lawmman an sem a, Target tlak hmasa lawmman dawng te:
1-na Mualcheng ‘S’ local
2-na Ṭawipui N-I Local
3-na Mualṭhuam ‘S’ local.
Tin, Sist B.Hmingthanpuii leh Sist Lalnghinglovi Mualcheng ‘S’ te hnen ah hruaitu hlun chawimawina hlan an ni bawk. He Conference-ah hian Palai k hi mi 107 an kal thei a ni.
———-
———-
NORTH MIZORAM DISTRICT:
DISTRICT HRUAITUTE ROGRAMME:
NMD Hruaitu Pathum Rev. Chhiarpuia, Rev. K. Lalduhsanga leh Rev. C. Lalthantluanga te chuan Oct. ni 7-9 chhunga Dist. LAD Confe Bilkhawthlir a
hman turah an kal.
———-
DISTRICT LAD CONFERENCE HMANG MEK:
UPC NEI North Mizoram Distict LAD conferene vawi 54-na chu Bilkhawthlir-ah hman a ni.
He Confe-ah hian Thupui ‘Chithlah Pathian ngaihsak a zawng a ni’ tih chu then darhin i) Mimal nunah ii) Chhungkuaah iii) Kohhranah iv) Khawtlangah titea thendarh niin; heng thupui hrang hrang te Speaker tura ruat Sist. Krosschhuanawmi, Dist. LAD Secy, Rev. K. Lalduhsanga dist. Secretary, Sist. K. Lalhmachhuani, Dist. LAD President, Sist. Zionparmawii, President AED LAD leh Rev. Chhiarpuia, Dist. Supdt. NMD ten an sawi dawn a ni.
Dist. LAD Confe. Atanga a lan danin NMD chhungah LAD dinna zat local 174 awmin Member 5601 an awm mek ni.
———-
NMD BIAL MISSIONS CONFERENCE REPORT
Sept Ni 30 atanga Oct. ni 2 chhung-a NMD District huam chhunga Bial Missions Conference a ruala neih chu tluang taka zawh a ni ta: North Mizoram District chhunga Bial 31 te chuan Missions Conference tluang takin an zo.
Bial Missions confe report dawn chin te tarlang ila-
KAWNPUI BIAL: Kawnpui Bialte chuan Bial Missions Confe vawi 47-na hmangin Rev. Chhiarpuia Dist. Supdt. Chuan a hmanpui.
Kawnpui Bialtena Confe an hman an hlim hle a, Speaker hnen atangin Pathian thu ropui leh ngaihnawm tak tak ngaithlain, conf chhungin siamtharna chang member engemaw zat an awm bawk. Rorel pawimawh zingah= Kum 2023 Inkhawmpui lehna tur : Bualpui ‘N’ Venglaiah nghatin Missionary chawm leh ni se Gen Field-ah 1, Dist-ah 2 Missionary challenge neih leh ni se. Home Missions Field Zomuantlang Bial huapa tlawh ten rel a ni bawk.
———-
HQRS BIAL: Confe Mission vengthlangah hmangin rorel pawimawh zingah General leh District Missions Dept ah Missionary Pathum chawm leh nise. 2023 chungn Work Camp neih leh nise. North Mizoram District Home Mission field Member ten thlarau thianghlim an dawn theih nan a ruala Chawnghei tawngtai runpui neih nise. District Missions Dept hian kum 2023 leh 2024 chhungin General field ah Biak In sak nise..
———-
Bilkhawthlir Bial: Bilkhawthlir Bialte chuan Missions Confe vawi 40-na hmangin NMD Secretary Rev. K. Lalduhsanga chu Confe Speaker-ah an hmang.
1. Bairabi Bial: Bairabi Bial Missions Department te chuan Conferernce Bairabi South Biak Inah hmangin; Conference speaker Rev. C. althantluanga, Treasurer, NMD chu hman a ni. confe kan rorel tlangpui te: Kum 2023 Bial Missions Conference vawi 42-na Saikhawthlir kohhranah nghah hman tur niin; Marpara Home Missions Field hmun tlawh te, Bial chhunga kan home mission field, Rasdali Home mission field tlawh te an rel a ni.
Inkhawmpui chhung hian mithar 1 neih a ni a, Rev. C. Lalhmunliana Bialtu Pastorin baptisma a chanter a ni.
———-
Bukpui Bial: Bukpui Bial ten Confe. 32-na Bukpui Kohhranah hmangin District Missions Director Rev. C. Lalramthanga’n a hmanpui Speaker-ah a tang. Conference Rorel pawimawh zingah Kum 2023 Bial Missions Conference Lungmuatah nghatin; kum 2023-ah Bial hmingin Missionary pakhat chawm te, Bukpui Bial atanga Missionary chhuak teBial hminga ṭanpuina pek te bakah Kum 2023 chhung hian bial pawn fehchhuah te an rel.
———-
Dinthar Bial: Dinthar Bial Missions Department Inkhawmpui chu Zotlang Biak inah neih a ni a,Cone Rorel pawimawh zual te: 1) 2023 Inkhawmpuina hmun Dawrpui Vengtharah nghah a ni. 2) Kum 2023 ah Bial Missions Department Meet neih nise 3) Kum 2023 chhungin Home Mission Field tlawha fehchhuah nise 4) Kum 2023 chhungin General Mission Field emaw Home Mission Field ah Biak in/Quarter sak nise. 5) Kum 2023 aṭangin Home/General Missionary Damlo Aizawl Damdawiina awm te kanna atan Relief Fund dah ṭhin a ni ang.
———-
Aibawk Bial: Aibawk Bial te chuan Bial Missions Inkhawmpui vawi 33-na Aibawk Kohhran Biak inah hmangin, thupui atan ‘Chanchin tha hril rawh u tih an hmang. Confe Speaker atan Pastor Titus Munda, Siliguri leh Pastor C. Lallianbuanga, Jaigaon te hman an ni.
Confe rorel pawimawh zual te:
1. Kum 2023 inkhawmpui chu Falkawn kohhranah nghah a ni.
2. Kum 2023 chhungin Local tinin mithar 2 tal seng lut tura hmalak nise.
3. Kum 2023 atangin Bial chhung kohhran tinah Missions Department pual sermon thlakhatah vawi khat tal neih ṭhin ni se.
———-
Lengpui Bial: Lengpui Bial Mission confe chu Lengpui kohhran ten thlengin confe Speaker-ah Rev. Biaksangzuala, Gen. Mission Director hman a ni a
Confe chung hian Dilzawl Mission Field Biak in Ceiling siamna appeal neih a ni a, Pathianni chawhma inkhawmah Rs. 17000/-
khawn chhuah a ni bawk.
———-
Chaltlang Bial: Chaltlang Bialte chuan Bial Missions Confe vawi 33-na, Ramhlun Kohhran hmangin, Confe Speaker-ah Evan. Isak Lalrohlua Marapa Missionary hman a ni. Confe rorel pawimawh te 1. Chanmari Kohhranin 2023 Missions Department Conference vawi 34-na nghah a ni 2) 2023 chhungin chaltlang Bial atanga Missionary chhuak te an awmnaah tlawhchhuan ni se. 3) Bial huapin Bial pawn lamah feh chhuah ni se.
———-
Thenzawl bial: Thenzawl Bialte chuan Bial Missions Confe hermon Biak inah hmangin; Rev. C. lalrammuana Bialtu Pastor chun confe speaker atan hman a ni. Confe rorel pawimawh te: 1. Kum 2023 Bial Missions Dept. Conf. Chu Bial headquarters Vengpui-ah nghah a ni. 4. Thenzawl Bial atanga rawngbawltu kalchhuak awmna 2023 atan Krismas thilpek pek nise. (5. 2023 atan Local tinte member thar target insiam nise. 7) Kum 2023 ah Home Missioanry pakhat chawm nise.
———-
Kolasib Venglai: Kolasib Venglai Bial conference rorel pawimawh zual te:- Kum 2023 Conference chu Tumpui Local nghah niin; General leh District ah Missionary 1 ve ve chawm tura passed a ni. Home Missions Field a Member ten Thlarau Thianghlim an dawn ngei theih nan thawktu ten hma la tura Passed niin Bial Kohhranpuiin Tuithaveng, Hebron a Kohhran din tura hma an lakna chu theih tawp chhuah a thawhpui bakah Kum 2023 ah Bial hmalakna a Bethelpui neih leh Bial huap Revival/Crusade nei leh tura Passed a ni.
———-
Rengtekawn Bial: Rengtekawn Bial Missions Dept te chuan Conference vawi 1-na chu Saihapui ‘K’ Kohhranah hmangin; Confe Speaker atan Evan JH Malsawmdawngliana District Missions Secretary leh Bialtu Pastor Rev C.Lalthlengliana te hman an ni. Confe rorel pawimawh zingah Kum 2023-ah Bial Missions Conference chu Bukvannei P.P ah nghah niin; Bial hminga Missionary -1 chawm an rel a, Bial chhung Home Missions field leh Casual Worker awmna hmunah Thlarau thianghlim la dawnglo ten an dawn theihna tura hmalak an rel bawk. S.Chhimluang Home Missions Field leh N.Thinglian Home Missions field ah Property dah te, Kum 2023 Bial Missions Conference ah Conference Report bu siam an rel bawk.
Kolasib Rengtekawnn bial hi 2023 kumtir maia din niin; Bial Mission Dept hian District Target Rs 39,100 neiin Rs. 100 in an target an khum a ni.
Conference chhung hian ,Thlarau bo seng khawm tura hmalak a ni a, Mi thar -5 (chhungkaw khat) sengluh niin, Rev C.Lalthlengliana Bialtu Pastor chuan Lalpa Isua hmingin a lawm lut a ni
———-
Rengdil Bial: Rengdil Bialte’n Conference vawi 18-na Kolalian Missions Field-ah hman niin; Evan. MS Dawngliana, Dist. Missions Treasurer chu Speaker niin conference a hmanpui; Confe rorel pawimawh zingah Kum 2023-ah Sihthiang missions Field-ah Confe nghah a ni a, Bial hminga Missionary 1 chawm te an rel bakah Kohhran ding thar W. Mualthuam Biak in sak mekah a tul anga kohhran mamawh tihsak ni se tih te an rel a ni. Rengdil Bialah hian Kohhran dinna khaw 12 awmin, Dist. Mission Dept enkawl Field 4 awmin; Casual worker awmna hmun 2 bakah Dist. PYD enkawl 1 leh District Kohhranpui enkawl lai 1 a awm bawk.
———-
Maubawk bial: Maubawk Bialte’n Bial Missions Confe Vawi 13na Bungkawn local-ah hmangin Confe Speaker atan Evan Isak Lalhmingliana. (Maranatha revival team) chu hman a ni a, Confe thupuiah Chanchintha hi hril rawh u tih an hmang Confe. Rorel pawimawh te:- Kum 2023-ah Lawipu Kohhranah conf nghatin, Kum 2023 hian home missionary pahnih chawm te, Kum 2023 bial conf ah hian missionary thawklai ngei speaker-a hman te, kum 2023 chhungin Bial huapa Home mission field tlawh te, Kum 2023 chhungin bial mission dept bul tumin revival crusade neih te an rel bawk.
———-
West Phaileng Bial: West Phaileng bialte’n Bial Missions Conference vawi 37-na hmangin, Phaileng Hqrs. Localah Confe an hmang. Confe- Speaker ah Upa Liansuaka, Evan Lalramthara Sailo, Evan H. Lalnunzira, Evan Lalthapuia leh bialtu Pastor K. Ainawna te hman an ni.Confe rorel pawimawh zual te:-
1. Kum 2023 West Phulpui Mission Field-ah Confe nghah a ni.
2. Bial chhung mission Field tan luan nise.
3. Kohhran la din lohna hmunah kohhran a din theih nan hma lak ni se.
4. Missionary te intuai tharna programme neih pahin, bial chhung kohhran din tawhna hmunah Revival neih ni se tih te confe hian a rel.
———-
MAMIT BIAL: Mamit Bial Missions Department chuan Conference High School Veng Kohhran Biak Inah hmangin Conference thupui atan “Chanchintha hi hril rawh u” Marka 16:15 thu hman a ni. Bial confe rorel pawimawh zualte:
Kum 2023-ah conference Luangpawl local ah neih tur a ni, Bial chhunga Home Mission Field-ah harhna a thlen theih nan Crusade neih, Mamit Bial chhunga Mission Field-te Pathian thu zir tur bu II-na buatsaih leh nise. Bial Missions hminga luanchhuahna atan bial chhunga Preaching Point leh Home Mission field ah te Pulpit Bible leh Hlabu dah te leh District kaltlanga Missonary Chawm te an rel.
Mamit Bial Conference ah hian Mamit Bial in Bial chhunga Mission Field leh Preaching Point a zir tur atan a buatsaih Lehkhabu “Kawng dik hriattirtu” tih Evan. Lalrampana ziak chu Pastor Vanlalruata’n a tlangzarh bawk a ni.
———-
Reiek Bial: Reiek Bial ten Conference vawi 34-na Ailawng-ah hmangin Rev Lalmalsawma sailo General Treasurer chu Conf. Speaker a tan hman a ni. Speaker hi Assam field Director Rev Lalmuanpuian a ṭawiawm bawk.
Reiek Bial Confe-ah hian Assam field chhung Hatisar khuaa kohhran member thar bro Ajoy Nursery te chhungkaw insakna tur ₹ 31250/- khawn sak a ni a, Field Director Pastor Lalmuanpuia hnenah hian Reiek Bial Missions Department ten ṭanpuina hi an hlan a ni. Confe rorel pawimawh zingah kum 2023 ah khawmpui Reiek kohhranah nghatin, Missionary 1 chawm tura pass a ni bawk a, Home Missions field ah bungrua eng emaw ber dah an tum bawk.
———-
Zawlnuam Bial: Zawlnuam bial Missions Conference vawi 6-na chu Bajirung ah hman niin; confe chhung hian Tirhkoh thawklai ten, Pathian chung chang (Tirhkohte 17:23) thupuia hmangin sermon ngaihthlak thin a ni.
Rorel tlangpuite :- 2023 Conference Zawlnuam ah nghah niin; Vitor leh Lungtir ah Crusade nei tura Bru Revival Team chah bakah Kum 2023 atan Bial hminga Missionary support neih nise tih te an rel bawk
———-
ACTIVITIES REPORT
MUALTHUAM WEST WORK CAMP THAWH 4-NA:
NMD Mission Director Rev. C. Lalramthanga, T.Upa H Thantluanga leh Sist. Maneihi of Rawpuichhip leh kohhran member thenkhat te chuan Oct. ni 5 atang khan Rengdil Bial chhunga awm Mualthuam West kohhran hote lawina tur Biak in an sak chu a thawh 4-na atan an tan leh a, a Liang beam an chhung zo thei a ni. West Mualthuamah hian Casual worker Bro. Lalsawmliana awmin a ni hian in sakna tur chak engkim lo la khawmin rim takin hna a lothawk thin a ni. (Mualthuam W)
———-
SOCIAL WORK DAY HMANG:
North East India PYD ten kum 2000 atanga Social work Day Vantlang tana thil tha tih ni atan Oct. ni 2 an lo hman thin chu, kuminah pathianni a a tlak avangin thawhlehni kal ta Oct. ni 3 hian Social work Day hman a ni a, Bial thenkhat hun hman dan hetiang hi a ni:-
Aibawk Bial PYD: Aibawk Bial PYD te chuan Oct. ni 3 thawhtanni khan Bial huapin Hualngohmunah Social Work Day an hmang. Local hrang hrang atangin member 40 vel an thawk chhuak a ni.
Programme hi Hualngohmun kawnah Dar 10:30 a.m ah hman a ni a, Bial PYD President-in Prog kaihruaiin Bialtu Pastor PC Lalrokima’n hunserh a hmang a, Hualngohmun VC ten thusawina hun an hmang bawk. Hnathawh tur hi VC te ruahman angin Hualngohmun Middle School Compound samfai leh School bul tifaia hun hman a ni.
Phainuam Bial: Joint PYD Phainuam chuan Social Work Day denchhanin Vantlang hmun pawimawh Community Hall, Sub Centre, School te bakah khawchhung lunlai deuhtea Bawlhlawh te an char bakah samfai ngai te an samfai a, Phainuam Community Hall ah leh Sub Centre a dah tur Bawlhlawh bawm (Dustbin) tha tak an pe bawk a ni.
Phai Bial chhung hi Khaw thum khaw inhlat tak takte a nih avangin Bial huapa hman ho a harsa a, Phainuam Local thum (Headquarters, Bethel Phainuam, Upper Phainuam) ten Joint in an hmang ho a ni.
Zan lamah Headquarters Biak In ah Joint a inkhawm buatsaihin hun hlim takin an hmang
Phainuam Bial vek Saipum local te pawhin Social Work Day denchhenin, vengchhung hmun hulum laia bawlhhlawh awmte chharin thenfai hnatlang an nei a, zan lamah Worship service hun hman a ni a, he tah hian Saipum PYD President Bro. Laldingliana’n Social work day lo awm dan leh a pawimawhna te a sawi bawk.
———-
District PYD Education Campaign:
Oct. ni 3 zan khan district PYD Education Committee hmalaknain Campaigner engemaw zat te’n Aizawl chheh vel khuaah Educatin Campaign an nei; Chanchin hriattheih chinah Aibawk Bial, Hualngohmun localah Zan lam hun Education Campaigner ten an hmang a, he hunah hian District PYD Education Commitee member pahnih, Bro. K. Lalremmawia, Tlangnuam chuan thusawiin, Sist. Lalchhanhimi, Zonuam in hun hmasa a hmang bawk a ni.
Hemi zan vek hian Lengpui Kohhranah Bro. Andy Lalramnghaka leh a tawiawmtute fehchhuakin Education campaign hi neih a ni bawk a, member ten an hlawkpui hle a ni.
———-
CHAWLHHMUN BIALTE’N HNATLANG RUNPUI NEI:
Thla kal ta Sept ni 7-a India ram rorelna sang Supreme court in NEI UPC te thiam a chantir avanga an Biak in hmun kum tam tak an khawih theih tawh loh chu oct ni 5 khan hmun samfai leh a tul tul tiin Bial huapin an hnatlang a, kohhranhote an hlim hle a ni
———-
THIL PEK PE REPORT
Oct. ni 4 thawhlehni khan Sept ni 5-a kangmei avanga an in leh lo chan Tuipuibari Centre Pentecost Kohhran Upa Bindu- Rai chu an chenna inah NMD Missions Director Rev. C. Lalramthanga’n hetiang hian tanpuina a hlan:-
1. Chaltlang Bial LAD thilpek = mutbu, Buhfai, bungbel, thawmhnaw leh pawisa Rs 3000
2. Hqrs. Kohhran Tuikhuahtlang = thawmhnaw, bungbel buhfai, mutbu, buhfai, eitur leh pawisa Rs11250
3. Hunthar Bial Mission Dept = Tangkafai Rs 10000 North Mizoram District hruaitute leh Bindurai-a te chhung hian anmahni hmangaiha chhawmdawlna leh tanpuina petute chungah lawm thu an sawi bawk.
———-
RAWNGBAWLNA LEH MITHAR:
Bairabi S ah mithar: Oct ni 02 Pathianni chawhnu inkhawm ban khan Salvation kohhran atangin Sis. Lalhmuchhuaki chuan Pahian thuthlung hmuin Bairabi South Kohhran, UPC member ni turin kohhranah lawmluh a ni a, Bialtu Pastor Rev. C. Lalhmunliana kutah sual ngaihdamna baptisma a chang a ni.
Pukzing vengthar-ah mithar: Sept ni 29 Ningani khan West Phaileng bial chhung Pukzing Vengtharah Evan C. Sangliana, Dist Missions Dept Casual Workers rawngbawlna atangin member thar chhungkaw hnih an vaiin mi 10 chu UPC –ah lawmluh an ni. He hun Pastor K. Ainawna leh Evan LalramtharaSailo ten an hmanpui a ni.
———-
———-
AIZAWL EAST DISTRICT
District LAD Conference:
Aizawl East District LAD Inkhawmpui lian, District Conference vawi 29-na chu September 30 atanga October 2, Pathianni zan thleng khan Zohmun Bial, Zohmun Local-ah hlim taka hman a ni. Conference-ah hian Thupui-ah “I dinthar leh ang u” I Samuela 11:14 thu hman niin Thupui thensawm hmangin mi hrang hrang hnen atangin thusawi ngaihthlak thin a ni. He Conference hi Rev H.Lalropuia, District Treasurer chuan Pathian hnenah hlanin Bialtu Pastor Vanlalnghaka hnen atangin palai lawmna thu ngaihthlak a ni. Conference tan zan hian Rev.R.Laltlankima, District Secretary hnen atangin Thlarau Thianghlim siamthar lehna-ah tih hmangin thusawi ngaihthlak a ni. Inrinni nileng khan Sis Zionparmawii, B/W, District LAD President kaihhruaiin palai mi 600 chuangin ten rorel inkhawm neih a ni a, hetah hian Bial atang leh Official atanga agenda lut engemaw zat ngaihtuah a ni. District LAD Conference-ah hian Sis.Zionparmawii B/W, District LAD President chuan Inrinni zan khan “Thianghlimnaah” tih hmangin thusawi rawngbawlna a nei a, Pathianni chawhma-ah Sis. Zoramthari, Kenter Doje, Arunachal Missionary chuan thusawina nei bawkin, Pathianni chawhnu-ah “Chhungkaw Maicham” tih hmangin Sis. Lalhmachhuani B/W President Dist LAD N.Mizoram hnen atangin thuchah ngaihthlak leh a ni a, Rev KVL Hmagaihkima, District Superintendent chuan Pathianni zan khan “Thuthlung hmangin” tih hmangin thusawi rawngbawlna a nei leh bawk a ni. Pathianni chawhma inkhawmah Rev.VL.Hnemtluanga, District Missions Director kaihhruaiin member boral sunna a neih bakah Sis. Prof. Lalhmasai B/W, Editor in Chief, P.Lady chuan chibai bukna thu a sawi bawk a ni. Pathianni chawhnu inkhawmah khan hruaitu hlui chawimawina hlan niin lawmman chi hrang hrang sem a ni bawk.
Aizawl East District LAD Conference-ah hian inkhawm apiangin mal zai bakah Bial hrang hrang LAD, General Choir leh Pentecostal Choir te atangin zaipawl zai ngaihthlak thin a ni bawk.
District LAD Conference rorel thu passed langsar zualte:
1. Kum 2024 District LAD Conference chu Kawlkulh Bial-ah nghah a ni.
2. Thla tin Pathianni hmasa berah Chawnghei tawngtaina neih tura tih a ni.
3. Cancer natna tuar tanpuina tur khawn thin chu khawn chhunzawm zel tura tih a ni.
4. LAD hruaitu, chawl lova kum 25 chhung hruaitu hna thawkte chawimawina Citation District LAD in hlan thin tawh tura tih a ni.
5. District LAD-in Puanthui zirna neih ve tura tih a ni.
6. Kum 2023 LAD Day thawhlawm District-in a chan chu LAD ten project an neih tih changtlun nan hman ni se tih a ni.
Heng bakah hian General LAD-a thlen tur thu pawimawh tak tak passed a ni bawk.
October 2, Pathianni zingkarah khan District Board neih chhunzawm nghal niin an thu passed langsar zualte:
1. Oneness Theology Seminary (OTS) Graduation Dayah Graduate Student te hnenah thilpek pek tur tih a ni.
2. Itanagar, Arunachal Missions Field-a Pastor Quarter Quest Room sak zawh theihna tur leh a chhunga khum leh mutbu dahna turin Rs 100,000 pek ni se tih a ni.
3. District Conference in Thla tin Pathianni hmasa berah Chawnghei tawngtaina neih tura tih chu Kum 2023 January atanga December chhung hman ni se tih a ni.
4. District Conference in District LAD-in Puanthui zirna neih ve tura a tih chu Executive Board-in Tailoring Board lo din se, an nin District Board-ah a hmunhma turte dilna lo siam se tih a ni.
———-
Music Class tan:
October 4, Thawhleh zing atang khan AED- PYD, Music & Sound Committee buatsaihin Kum 2022 atan Music zirna class tan leh a ni. Dist.Hqrs.S.S Hall-ah Class hi kal niin Tonic Solfa, Guiter leh Keyboard te zir a ni dawn a ni. Instructor atan Bro.Nelson KVL.Chhandama leh Bro.Laltanpuia Khiangte te hman an ni ang. Music hi thla hnih (Oct.&Nov.) chhung zir tur niin zirlai 20 chuang an awm a ni. Class kal tanna hi Music & Sound Committee hruaituten an telpui a ni.
AED PYD Music & Sound Committee te hian kum dangah pawh Music Class hi an lokal pui tawh thin a, mi tam tak chuan lo zirchhuak tawhin tangkai takin an hmang mek zel a ni.
———-
Social Work Day hmang:
Oct.3, Thawhtanni kha North East India PYD Social Work Day a nih angin AED chhunga bial leh local hrang hrangte chuan a theih ang angin vantlang tan thil tha tiin Social Work Day an hmang.
Kum dangah chuan Oct.2-ah Social Work Day hi hman thin niin kuminah erawh Pathianni a nih avangin Gen.PYD chuan Oct.3, Thawhtanni-ah hman ni se a ti a. Hemi ang hian hmun hrang hrangah Oct.3, Thawhtanni khan bial leh local te hian Social Work Day hi an hmang hlawm a ni.
Aizawl khawpui chhungah chuan City PYD huaihawta hman thin ni mahse kuminah erawh City PYD chuan bial kutah a dah angin Aizawl khawpui chhung bial hrang hrang ten a theih ang angin an hmang hlawm a, thlanmual samfai te, Damdawiina damlo tan ei tur pek te, UPHC-a thutthleng dahte, Cancer hospital-a poor fund atana sum pek te bakah mahni veng chhung thenfai hnate thawh a ni. Khawpui pawn Bial leh local te pawhin a theih ang anga hmangin thisen pek te, veng chhung tihfai te, sub-centre building tihfai hna te leh tul ang ang an thawk hlawm a ni.
Bawngkawn Bial Bawngkawn PYD te chuan zing karah khan Bawngkawn thlanmual Step tihfai hna an thawk a, member engemaw zat an thawkchhuak a ni. Ramhlun Vengthar PYD te chuan Nazareth Hospital-ah damlote ei tur atan Artui an hlan a ni.
Saitual Bial PYD te chuan Tamdil leh a chhehvel tifaiin Social Work Day hi an hmang a, member 80 chuang an thawkchhuak a ni.
Mualpui Bial PYD te chuan an bial chhunga Damdawiin, ITI UPHC-ah thutthleng pahnih an dah a ni.
Zemabawk North Bial PYD te chuan Bial hmingin Cancer Hospital-ah poor fund atan Rs 3000 an hlan a, Lungbial bial venga SIRIOUS Home-ah artui case 1 leh bawnghnute case 2 an pe bawk. Hei bakah hian veng chhung tifaiin hun an hmang bawk a ni.
Rabung bial chuan mahni local theuhah hun an hmanga, Rabung Local ten S. S Hall hmun an tifai a, Murlen PYD ten khawlai tifaiin Khualen PYD ten Thlanmual an tifai bakah Hliappui PYD ten Sub Centre building leh a chheh vel an tifai bawk a, Aiduzawl PYD ten khawlai an tifai bawk a ni.
Khawhai Bial, Riangtlei PYD te pawhin zingkarah khawlai an tifai bawk a ni.
Serchhip Bial PYD te chuan Serchhip Damdawiina hman atan a thlawnin thisen an pe a, thisen hi mipa 9 leh hmeichhia 7, a vaiin unit 16 an pe thei a ni. Thisen pe tur hian PYD member 50 chuang an thawkchhuak a ni.
———-
Mithar leh baptisma chang thar:
October 2, Pathianni khan Zembawk Bethel Vengah chhungkaw khat, member 4 chu Kohhranah sengluh an ni.
———-
General PYD Conference atan inbuatsaihna chak taka kalpui mek a ni:
November 10 atanga 13 chhunga General PYD Conference hman tur atan a thlengtu Aizawl East District- Khawzawl Bial te chu nasa takin an inbuatsaih mek a, pandal pawh ngawrh taka sak mek zel a ni. Pandal hi Zuchhip Field-ah sak niin a sak hna hi Bial chhunga Tualchhung Kohhran hrang hrang ten an in thawh chhawk thin a ni. October 1, Inrinni khan Champhai Joint PYD- Kahrawt Bial leh Champhai Bethel Bial ten General PYD Conference pandal sak hna hi thawhpuiin Champhai atang hian PYD member engemaw zat an thawk chhuak a ni. October 3, Thawhtanni khan Khawzawl Zuchhip Branch YMA te pawhin pandal sak hnatlang hi an pui bawk a, mi 30 chuang an hnatlang a ni. October 5, Nilaini khan Kawlkulh Bial PYD te pawhin pandal sak hnatlang hi an pui bawk a ni. Pandal hi a dung ft 120 leh a vang ft 80-a liana sak niin Khawzawl Bial te nasa takin an inbuatsaih mek zel a ni.
Kumin General PYD Conference-ah hian “I pianna ramah haw leh rawh” Genesis 31:13 thu hman tur niin mi hrang hrang ten thusawi rawngbawlna an nei thin dawn a ni.
———-
Filter donate:
Bazar Bial, Armed Veng Kohhran te chuan District Office-a dah turin Filter tha tak an donate. Filter hi cheng singhnih chuang man a ni.
———-
Hruaitute Programme:
Rev KVL.Hmangaihkima, District Superintendent chuan Chhimtuipui District ten S.Lungpher hmuna Revival Crusade a hmanah Speaker-ah tangin rawngbawlna a nei a, ruahmanna ang chuan October 11, Thawhlehni-ah Aizawl a let leh ang.
Rev R.Laltlankima, District Secretary chuan Saitual bial, N.Lungpher hmuna rawngbawltute pual Seminar neiah Resource person-ah tangin Pathianni thleng hun a hmang anga, ruahmanna ang chuan Thawhtanni-ah Aizawl a let leh ang.
Rev H.Lalropuia, District Treasurer chuan Rabung Bial PYD Seminar cum Revival Crusade Rabung hmuna hmanah Resource person leh Speaker-ah tangin rawngbawlna a nei a, ruahmanna ang chuan October 11, Thawhlehni-ah Aizawl a let leh ang.
Rev VL.Hnemtluanga, Director; Evan C.Lalremruata, Secretary leh Evan C.Lalchhuanga, Treasurer- District Missions Department te chuan Burma border Survey neia a tul anga hmalakna tur enin Khawbung, Farkawn leh Tiau-ah hun an hmang a, ruahmanna ang chuan Thawhtanni-ah Aizawl a let leh ang.
District PYD hruaitute Evan R.Vanlalpeka, Evan Lawmsangkima leh Evan C.Lalropuia te chuan Tripura District PYD Conference- Darchawi hmuna hman mekah rawngbawlna neiin hun an hmang a, Thawhtanni-ah Aizawl an let leh ang. District PYD Ob te hi Evan Lalhmachhuana Varte, District Office staff chuan a hruai a ni.
Facebook