PENTECOST DAY 2023
May ni 28, 2023 Pathianni hi Kohhran ni pawimawh Pentecost Day a ni a, he ni hi UPC North East India Kohhran chuan urhsun takin a hmang thin a ni. Pentecost Day-ah hian Tualchhung Kohhran thenkhat chuan tisa lam ruai nen hmangin thenkhatin thingpui leh chhang ruai an kilho a, Tualchhung Kohhran thenkhat chuan Speaker bik neiin hun an hmang bawk a ni.
UPC North East India Media rawngbawlna PenNet chuan Pentecost Day pual hian Programme siamin, Kohhran mipuite leh a duh a piang te tan en theih a ni ang. May ni 27 Inrinni zan Dar 7:00 pm ah te, May ni 28 Pathianni zing 7:00an leh chawhnu 1:00 pm ah te Zonet Rinna leh LPS 11 ah a chhuak a nga, Pennet Youtube Channel-ah a en theih bawk ang.
———-
GENERAL HRUAITUTE PROGRAMME:
General Secretary Rev. Zohmingthanzama chuan May ni 27 hian Lunglei District, Headquarters Bial Rawngbawltute Seminar, LDF Park Pukpui a neih chu hmanpuiin resource Person ah a tang a, Pentecos Day Programme hmang chhun zawmin Ramthar Local, Electric Local leh Farm Veng Local ah te Thusawi rawngbawlna a nei ang.
General Treasurer Rev. Lalmalsawma Sailo chuan May ni 27 leh 28 hian Lunglei District, Pukpui Kohhran ah Rawngbawltu pual Seminar leh Department hruaitute Seminar a neih pui a, Pentecost Day ni Chawhma Inkhawm ah Thusawi rawngbawlna a nei bawk ang.
General Sunday School Director, Rev. Biaksangzuala chuan May ni 28 Pentecost Day hian College veng Kohhran, Aizawl East District ah Thusawi rawngbawlna a nei ang.
———-
GENERAL SUNDAY SCHOOL QUIZ ORGANISING COMMITTEE
May ni 26 Zirtawp ni khan General Sunday School Quiz Organising Committee te chuan General Headquarters Committee Room, Mualpui Salem Veng, Aizawl ah Meeting an nei.
He meeting hi Organising Chairman Rev. JH. Zahluna chuan kaihruaiin hmalak dan tur hrang hrang sawi ho a ni a, Quiz hi North East India Level a buatsaih tur niin District leh Field hrang hrang a tangin Team 2 theuh chhuah theih niin Team 1 ah hian mi 2 zel tel tur a tih a ni.
———-
———-
LUNGLEI DISTRICT
C.E.C. SCHOOL A|ANGA PAWL 12 EXAM TEN HLAWHTLINNA AN CHANG VEK.
Mizoram Board of School Education (MBSE) in Class XII ( HSSLC) result a tih chhuah ah Lunglei District UPC-in a enkawl Christian Education Centre (CEC) School a tanga exam mi 12 te chuan an zavaiin hlawhtlinna an chang, hlawhtlinna changte hi Distinction ah 1, first division ah 5, Second Division ah mi 4, Third Division ah mi 2 an ni a, Letter hmu hi mi 4 awmin Mizo ah hian mi 4 ten Letter an hmu a, Education ah hian mi 2 ten hmuin, Political Science ah hian mi 1 in Letter hi a hmu bawk. Kumin hi kum li a zawna C.E.C. School in HSSLC-ah 100% result a neih na a ni.
Hlawhtlinna chang te:
– Dina Hlychho I L in Mizo
– F. Malsawmtluangi I L in Mizo
– H. Malsawmkimi II
– Lallawmchhungi III
– Lalnuntluangi I L in Mizo, Edu
– Lalramchuani II
– Lalrotluangi Pachuau II
– Nancy Zairempuii I
– T. Lalruatsai I
– FC.Vanlalruatmawia III
– Ramluahpuia D L in Mizo, Pol.Sc. Edu
– Rochanhlua II
Hlawhtlinna chang zawng zawngte kan lawmpui tak meuh meuh a,result tha tak an neih theih nana rim taka thawk thin Principal, zirtirtute leh Staff zawng zawngte kan chhuangin kan lawmpui tak meuh meuh e.
———-
PA KHAWI TRAINING:
Pentecostal Social Ministry (PSM) Lunglei District hmalaknain May ni 26 Zirtawpni khan District UPC Conference Hall-ah Pa khawi Training neih a ni dawn.
He Pa khawi training ah hian Town Area-a Local hrang hrang aiawh mi 40 chuang an kal khawm tura ngaih a ni a, Training te hnenah hian Pa chi pek theuh an ni bawk ang.
———-
CEC SCHOOL IN ANNUAL SPORT AN TAN:
May ni 22 Thawhtanni atang khan Lunglei District UPC School enkawl Christian Education Centre (CEC) School chuan Thuamluaia Mualah Annual Sport an tan.
Sport bultanna ah hian Principal P.Samson Vanlalfela chuan thutawi sawina a nei a, Pi V.Zothanbuangi, District Sport & Youth officer chuan hmanpuiin Football leh Volleyball a Present a ni.
He Sport hi May ni 22-23 ah te Thuamluaiah mual ah hman a ni ang a, May ni 24 ah Lena Stadium ah hman chhunzawm niin, May ni 25 ah Chanmari Hall ah neih lehin May ni 26 Zirtawpni ah Closing Function chu District UPC Conference Hall-ah hman a ni ang.
———-
P.C.D. LANG CAMP HLAWK TAKA NEIH A NI.
Chawngte bial PCD rorel bawhzui nan May 20-21, 2023 khan Lungrang South Local ah PCD Lang Camp neih a ni. Speaker ah Rbt.C.Lalramluahpuia, District PCD President hman a ni a, Sis.Elizabeth Zothansangi, District PCD Fin.Secy leh Rbt Pc Ramngaihzuala, President Headquarters bial PCD ten an tawiawm a ni.
Inrinni chawhma lamah Pathian Pakhat thu, Baptisma pawimawhna leh a hlutna Projector hmanga zir ho niin, Quiz hlimawm tak tak neih a ni bawk. Chawhnu lamah Chhandamna chungchang zir ho leh niin Pathian thlarau thianghlim dilna tawngtai neih a ni a, PCD member engamawzat leh Executive Commiittee member atangin Thlarau dawng an awm a, Thlarau lam zai nen hlim taka hun hman a ni.
Inrinni zan atangin Revival programme hman niin Inrinni zan leh Pathianni zing ah Rbt.Pc Ramngaihzualan Pathian thuchah a sawi a, Pathianni chawhnu ah Rbt.Lalthazauva Sailo Chawngte Bial PCD President inpawlhona a kaihruai a, hun hlimawm tak hman a ni.
Pathianni Sunday School banah Baptisma khur hawn a ni a member 11 in tui Baptisma Evan.Lalramchhana kutah an chang. Pathianni zan ah Rbt. C. Lalramluahpuian Pathian thuchah a sawi a, inkhawm banah PCD puala tawngtai hona neih a ni bawk.
———-
———-
NORTH MIZORAM DISTRICT
DISTRICT HRUAITUTE PROGRAMME:
DISTRICT SUPERINTENDENT: Dist. Sudpt. Rev. Chhiarpuia chuan Pentecost Day may ni 28 Pathianni zingah Tuikual N. Kohhranah rawngbawlna neiin; Zan lamah Dinthar Kohhranah rawngbawlna a nei thung ang.
SECRETARY: District Secretary Rev. K. Lalduhsanga chuan Pentecost Day Chanmari West kohhrante hmanpuiin May ni 27 Inrinni zan atangin rawngbawlna neiin, a tuk May ni 28 Pathianni nilengin rawngbawlna a neih chhunzawm ang.
TREASURER : District Treasurer Rev. C. Lalthantluanga chuan Pentecost Day Zohmun kohhrante hmanpuiin may ni 26 Zan atangin Programme tan a ni ang a, A tuk May ni 27 Inrinni-ah pathian chawimawinaah Speaker niin; Pentecost day thlengin Zohmunah hian rawngbawlna a nei ang.
———-
DEPARTMENT HRUAITU PROGRAMME HRIAT THEIH TE
LAD PRESIDENT: District LAD President Sist. K. Kalhmachhuani chuan Pentecost Day-ah Bukpui Bial N. Hlimenah rawngbawlna neiin hun a hmang ang.
CHANMARI WEST BIAK IN LUAH LUT: Pathianni kalta May ni 21 khan kum 27 chuang Biak in NEI-UPC tena an luah tawh loh chu NEI-UPC Chaltlang Bial Chanmari West kohhrante chuan an luahlut leh ta. District leh Kohhrante ruahmannain Programme siamin Biak Inluahluhna inkhawm khunkhan tak siam a ni a, Rev. P. Vanlalfela Bialtu pastor in kaihruaiin, Rev. Chhiarpuia, NMD Supdt. Chuan rawngbawlna a nei, Thusawitu thusawi bakah hian District hruaitu Secertary Rev. K. lalduhsanga leh Dist. Treasure Rev. C. Lalthantluanga ten thusawi tawi ngaihnawm tak sawi bawkin. Thusawitu te thusawiah Lalpan N. Mizoram District te thil tam tak zirtir kan nih thu leh hmalam hun local zel turah Lalpa chauh en a, fimkhur taka kawngzawh turin mipuite an fuih a ni.
Hengbakah hian Rawngbawltu pawimawh tak tak hnen atangin thusawi ngaihnawm tak tak ngaihthlak ni bawk in, inkhawm boruak thlarauthianghlimin a awm pui a, Fakna hlapui te hun hun hlimawm tak hman a ni a, Tlaiah Biak in luahluh lawmna ruai kilho a ni bawk.
Zanah inkhawm hman chhunzawmin Rev. R. lalrinsanga Gen. Supt chuan rawngbawlna a neih chhunzawm bawk.
———-
PENNET COMMITTEE NEI:
May ni 23 thawhlehni chawhma dar 11:00 khan, UPC-NEI, North Mizoram District chuan PenNet hmalak zel dan tur chungchanga Meeting neiin; Rev. C. Lalthantluanga, Dist. Treasurer in meeting a kaihruai a, Dist. Supdt. Rev. Chhiarpuia’n a ho bawk.
Meeting thurel pawimawh zingah Media rawngbawlna hmasawn zelah PenNet bungraw mamawh lei ngai awm te relin, Video, Still Cam etc leh a kaihhnawih thil te lei nise tih a ni a, Hun remchang hmasa berah North Mizoram District huapin Media Training neih tha tih a ni bawk. Hei bakah hian PenNet buatsaihin thupui leh Zirtir nei Shorth Film siam-a intihsiakna District huap neih nise tih a ni bawk a, hemi chungchanga hma lo la turin Implementing Committee siam nghal a ni.
———-
AIBAWK KOHHRANAH REIEK BIAL FEHCHHUAKIN RAWNG AN BAWL:
Aibawk Kohhran te Reiek Bialte’n Pathianni kal ta May ni 20- 21 hmang khan tlawhin, mi 32 lai an lo fehchhuak.
Inrinni zan aṭanga Pathianni zan thlengin Thlarau malsawmna leh awmpuina hnuaiah hun hman niin zaithiam tak takten zaia rawngbawlna neiin T Upa Lalrammawia, Rev. Lalchuailova (bialtu Pastor), T Upa Lalhmunsiama (bial missions Secy.) leh Upa R Kapdailova (Bial Missions Director) ten thusawi rawngbawlna nung tak an nei a. Pathianni zan inkhawm pawh dar 11 velah bâng fel chauhvin Thlarau boruak a ṭha hle a ni.
———-
KOHHRAN DING THAR BETHLEHEM KOHHRAN TLAWH:
May ni 22 thawhtanni khan Kol Rengtekawn Bial chhunga awm Pangbalkawn kohhran atanga ding thar Bethlehem Kohhran te District Missions hruaitute’n an tlawh.
Bethlehem kohhran dingthar te hi District kohhranpuite chuan District Missions Dept te enkawl turin mawhphurhna a pe a. Bethlehem kohhran te enkawl hna hi District Missions kutah a awm a ni. Dist. Missions Exe Committee thu angina Bethlehem kohhranah hian rawngbawltu Bro. Jonathaa Bualpui chu a awm dawn a ni.
Bethlehem Kohhran te tlawh hian Director Rev. C. Lalramthanga leh Dist. Missions Treasurer Evan. M.S Dawngliana te fehchhuakin Kohhrante’na biak in leh Quarters hmun hma tura an lo zawn te a hmunah an hmuhpui a, thutihtlukna tur chu District Mission OB kutah dah a ni.
District hruaite pahnih hian Bethlehem kohhran ten Lalpa Maicham an buatsaihna hmun te tlawhin tawngtaina neiin kohhranhote hi an tinsan a ni. District Hruaitute hi Pangbalkawn kohhran leh Bethlehem kohhran hruaitute’n lo dawngsawngin tukthuan tui tak an lo buatsaih sak a ni.
District hruaitute hian Sihthiang Missions Field-a Biak in leh quarters sak dan tur ruahmanin Sihthiang hmun an pan nghal a, tihtur tul hrang hrang te an ti bawk. Sihthiang Biak in hi North Mizoram District Missions Dept. Bial 16 tena an sak tur niin; Hqrs Bial Missions Dept kaihhruaiin hma an la dawn a ni. Sihthiang hmunah hian District Missions hruaitute ruahmanin hmarua leh tul pawimawh te a hmunah dah fel a ni tawh bawk.
———-
REVIVAL CRUSADE HMANG ZO:
Ni 19-21 May, 2023 (Zirtawpni zan – Pathianni zan) chhûng khan Dinthar Local ah Revival Crusade Dinthar Bial PYD ten hman a ni a, he hun ah hian Pentecost Apologetics Team te rawih niin zirtawpni zan atanga pathianni zan thleng hun hman a ni.
A tan tirh zan aṭang in Pathian Thlarau Thianghlim awmpuina hnuai ah hun hman a ni a. Thlarau lam hla te sa in hlim takin hun hman a ni. Speaker Evan. H. Zoramsanga chuan a țan tirh zàn aṭang in hetiang hian thûpui hrang hrang hmangin thû a sawi a ni:
Zirtawpni zan – “Rinna avanga khawngaiha chhandam”
(Kohhran mite’n rinna nghet hriatfiahna atanga kan neih hi a tawk mai lova, chhandam kan nih theihna tur a thupek zawma tui leh thlarauva pian hi Chhandamna kawng awmchhun a ni.)
Inrinni zan – “Eng ti tur in nge min tirh”
(Lal Isua Krista chanchințha hriatfiahna ațang a Baptisma kan chan a ngaih thu te, chanchințha hril hi kan tihmakmawh a ni a, UPC te hi Baptist tur a tirh kan ni lova Chanchintha hril tur a tirh kan ni.)
Pathianni zing – “Ṭawng dang”
(Lalpa Thlarau Thianghlim dik tak dawng thei ngei turin kan inbuatsaih tur a ni a, kan tisa rilțam kan hre thei ang hian kan thlarau lam rilțamna te pawh hi kan hre thei ngei tur a ni)
Pathianni chawhnû – “Isua kha tunge kalsan”
(Mathaia 27:45-50, Sam 22:1, thu behchhanin kan Pathian neihchhun pakhat thu leh a thuthlung ropui tak a rawn puang chhuak a ni.)
Pathianni zán – “Petera’n Isua thû a zâwm em”
(Bible thû ang zelin Pentecost kohhran te kan kal a țul a, kan rinna mil hian Bible thlâk danglam tum lova Bible chhûng ami ang a Thuthlung mite hi kan kal a țul a ni.)
Inkhawm hi Bial PYD President Bro. H. Lalmalsawma’n kaihruai ṭhin in, Pathian ni chawhnû erawh Bial PYD Vice President Bro. Lalruatkima’n inkhawm a kaihruai ve thung a ni. Inkhawm apiang in Fakna hla heng kan Unau te: Sis. Lalrochhungi, Sis. C. Lalngaihawmi Sis. H.T. Lalhmachhuani te hnên aṭang ngaithlak ṭhin ani a, Tin, Bial PYD Zaipawl te hnen aṭang pawn Zirtawp zan leh Pathianni zan ah te fakna hla ngaihthlak a ni. Speaker in a team member zing ami Sis. R. Lalsiamthari fakna hla sa turin a sawm ṭhin bawk a ni.
Speaker hi a team member te bak ah hmun hrang hrang atanga lo ṭawiawm tu a nei bawk a ni.
He Crusade ah h ian Rev. Laltluanga Bialtu Pastor in Kan Speaker lehkhabu ziah PENTECOSTAL DOCTRINE tih chu tlangzarhna a nei bawk
He revival crusade kan neih chhung hian Thlarau dawng thar kan Unau te mi 34 lai an awm bawk a ni.
Speaker tur atana kan dil angin kan District hruaitu ten speaker țha tak min pek avangin District hruaitute chungah Dinthar Bial PYD ten lawmthû kan sawi tak meuh meuh ani.
———-
TUIKUAL KOHHRAN BIAK IN HAWN A NI.:
May ni 22.05.23 (Thawhṭanni) hian District hruaitute pathum kaihhruai na in Tuikual Kohhran Biak In hawn a ni. Tin. District lam atangin hnatlang thingpui inna tur pawisa an pe bawk a ni.
———-
Mithar nei:
May ni 21, 2023 khan Lalthanmawia chu Meidum tirhkoh, Evan. VLMS Dawngkima’n Lal Isua hmingin sual ngaihdamna baptisma a chantir a. Zan inkhawmah lawmluh nghal a ni. Ani hi Presbyterian kohhran atanga rawn lut a ni a, Aizawl lama awm a ni.
———-
THIANGHLIMNA CAMPAIGN RUNPUI NEI:
Kawnpui Bial Thianghlimna Committee buatsaihin, May ni 21, 2023 Pathianni chawhma inkhawmah, bial chhung local hrang hrangah THIANGHLIMNA CAMPAIGN RUNPUI neih a ni. Hemi rual hian zuk leh hmuama fihlim tura intiamna ‘Signature Campaign’ neih nghal a ni bawk.
‘Zuk leh hmuamin kan taksa a tihchhiat theih dan te; tihchhin a pawizia leh, kan inthiar fihlim thiam a pawimawhzia bakah chhunglama thianghlim hi pawnlamah a lang chhuak tur a ni’ tih sawiin local hrang hrangah heng mite hi an fehchhuak a ni.
Kawnpui Venglai (Bial Hqrs.) ah :Upa C Vanlalruata & T. Upa F Zonunsanga
Kawnpui Chhimveng-ah :Upa Lalruatkima & T. Upa Lalmuansanga
Kawnpui Banglaveng-ah : Evan. PC Lalnunmawia & Upa Laihmingthanga
Bualpui Venglai-ah : Evan. F Lalnunhlua & Sis. Lalchhuani
Bualpui Hmarveng-ah : Upa Vanlalthanga & T. Upa Lalchhuanawma Royte
Hortoki-ah : Upa Vanlalfela Royte & T. Upa CVL Malsawmtluanga
Khamrang-ah :Rev. PC Laltlankima & Bro. PC Suakkunga
Kawnpui Kanan PP-ah : Upa H Lalthlamuana
Local hrang hrangah zuk leh hmuama fihlim tura intiam a, hming sign hi mi 81 an awm a ni.
———-
———-
AIZAWL EAST DISTRICT:
Pentecost Day:
May 28, Pathianni hi Pentecost Day a nih angin Aizawl East District chhunga Tualchhung Kohhran hrang hrangte chuan urhsun taka hmang turin ruahmanna an siam. Pentecost Day-ah hian District atangin a hman dan turah ruahmanna hranpa siam ni lovin Church Board Committee ten an remchang angin Programme an ruahman a, tualchhung Kohhran thenkhat chuan awmni khamin Pathianni chawhma, chawhnu leh zan hun an hmang anga, Tualchhung thenkhat chuan Pathianni chawhma leh zan hun an hmang bawk ang. Pentecost Day hi hetiang hian District hruaituten hmun hrang hrangah an hmang a ni.
Rev KVL. Hmangaihkima, District Superintendent chuan Bawngkawn Bial, Peniel Kohhranah Evan H. Lalsiamliana te chhungkua in Pathian chawimawina an neihah Speaker-ah tangin rawngbawlna a nei ang. Chawimawina leh Pentecost Day programme hi May 26, Zirtawp zan atang khan an hmang tan a ni.
Rev R. Laltlankima, District Secretary chuan Pentecost Day hian Upper Republic Kohhranah Speaker-ah tangin rawngbawlna a nei.
Rev H. Lalropuia, District Treasurer chuan Pentecost Day Programme-ah District Hqrs. Kohhranah Speaker-ah tangin rawngbawlna a nei.
———-
OTS te class tan dawn:
Kumin 2023 Session atan June 1, Ningani atang hian Aizawl East District hnuaia Short Term Course Pathian thu zirna, Oneness Theological Seminary (OTS) chuan class an tan leh dawn ta a, May 31, Nilaini-ah Kum 2023 atan Opening day an hmang dawn a ni. Kumin OTS-ah hian zirlai 30- 1st Year-ah zirlai 13 awmin 2nd year-ah 9 leh 3rd year-ah 8 an awm dawn a, Rev.Rosanga Kawlni, Rev. Vanlalfela Ramtiam, Rev. VL. Hnemtluanga, Pastor Laltlanhlua Hnamte leh Rev.C.Lalmalsawma ten zirtirna an pe thin ang.
———-
Sialhau Kohhranah PYD din a ni:
May 21, Pathianni khan Sialhau Kohhran, Serchhip Bial-ah PYD din a ni. Hruatu atan heng mite hi ruat an ni :-
President : Bro PC Ramdinmawia
Secretary : Sis Lalawmpuii
Asst Secretary : Sis Zothankimi
Treasurer : Bro Lalnunfela
Fin. Secretary : Bro Moses Malsawmzuala
Sialhau kohhran hi 2009 kum a din niin tun dinhmunah chhungkaw pali (4) an awm mek a, Chhungkaw tinah member panga (5) zel awmin kohhran member hi an vaiin 20 an awm mek a, chung zingah chuan PYD member 12 an awm dawn a ni.
———-
OTS kal turte support hlanna hun hmang.
May 21, Pathianni khan Bialtu Pastor C. Lalchhuanga hovin Serchhip Bial PYD OB ten Kum 2023 a OTS kal turte support hlanna hun an hmang. Bial PYD hruaitu te atangin fuihna thusawi ngaihthlak a ni a. Bialtu Pastor in fuihna thu sawiin, OTS kal turte Support hlanna a nei a, tawngtaina hun a hmang nghal a ni. Kumin 2023 a Serchhip Bial PYD nember atanga OTS kal turte hi:- Bro. Lalbiakenga College Veng, Bro. Lalchhantluanga Biakinpui leh Bro. H. Lalruatsanga Biakinpui te an ni.
———-
Mithar leh baptisma chang thar:
May 20, Inrinni zan inkhawmah khan Keifang Kohhranah Keifang Bialtu Pastor J Lalhmingsanga chuan member 4 Kohhranah sengluhna a nei a, an fate 2 hlanna a nei nghal bawk. Heng mithar te hi Sis. Vanlalpari BW chu Saitual ah sawn ni tawh mahse, a rawng bawl tawhna sulhnu rah an seng a ni.
May 21, Pathianni Chawhma inkhawmah khan Bethel Bial, Melbuk Kohhranah Evan H Malsawmthanga (District Full-time Evangelist) chuan mithar 4 Kohhranah sengluhna a nei.
Evan HK. Lalhmangaiha leh a Team te chuan Hnahlan hmunah May 16-20 chhung khan Camping neiin Pathian malsawmna nasa tak Kohhran hoten an dawng. Camping ah hian mi 29 in Isua hmingin Baptisma an chang a, May 29, Thawhtan zan khan Bialtu Pastor Albert Chanchinmawia’n mithar 3 Kohhranah sengluhna a nei bawk.
May 21, Pathianni khan Thingsulthliah Bial, Tlungvel Kohhrana lawi turin nupa tuak khatte Kohhranah sengluhna neih a ni. Tlungvel hmunah hian Evan Lalbiakmuana leh a Team ten rawngbawlna an nei mek a ni.
Kawlkulh Bial Dulte hmunah pawh May 21, Pathianni khan mithar pakhat Kohhranah sengluh a ni bawk. Dulte hmunah hian District Missions Evangelists Bro. Lalzuisangan rawngbawlna a nei mek a ni.
May 21, Pathianni vek khan Champhai Bethel Bial, Zotlang ah mithar pakhat Kohhranah sengluh a ni bawk. Zotlangah hian Evan C Lalzidinga (Dingtea) hian rawngbawlna a nei mek a ni.
Facebook