GENERAL HRUAITUTE PROGRAMME:
General Superintendent Rev. Zohmingthanzama chuan May ni 24, 2024 Zirtawp ni khan, ASC Home, Kolasib khuangpuilam – ah Compassion Center Project Director, Rev. R. Vanlalawia chu induction neiin he mi hnu hian Staff meeting a neihpui bawk.
General Secretary Rev. Lalmalsawma Sailo chuan May ni 26, 2024 Pathian ni chawhnu hian Bazar Bial, Bazar Local-ah Bial chhung rawngbawltute seminar neihpuiin resource person-ah a tang ang.
———-
CBC Guest Lecturer la thar:
May ni 21, 2024 Thawhleh ni khan UPC North East India Pathian thu zirna, Calvary Bible College a thawk tur Guest Lecturer lak thar a ni.
General Superintendent leh TEB Chairman ni bawk Rev. Zohmingthanzama hona hnuaiah CBC Faculty Committee meeting chuan Interview neiin Calvary Bible College (CBC) Guest Lecturer a tan Evan. Samuel Laldinsánga s/o Rev. Rohmingliana, Thuampui, Aizawl chu lak a ni.
CBC Guest Lecturer a tan lak thar Evan. Samuel Laldinsánga hian June ni 1, 2024 ah CBC Principal hnen ah Joinning report a pe ang.
———-
———-
LUNGLEI DISTRICT
HSSLC LEH HSLC-A C.E.C. RESULT :
Mizoram Board of School Education (MBSE) in May ni 14 Thawhlehni a H.S.L.C. result a tihchhuak leh May 21 Thawhlehni a HSSLC result a tih chhuah ah Lunglei District U.P.C. ten kan school enkawl, Christian Education Centre (CEC) School result hetiang hi a ni.
HSLC : Appear-31, Pass-19, Distinction – 1 First Division – 2 Second Division – 16 Percentage 61%
Letter hmuh dan- Mizo ah 10 – English ah 1- Science ah 1- S.S ah 1
HSSLC : Appear – 16, Pass – 16, First Division – 7 Second Division – 8, Third Division – 1, Percentage 100%
Kumin hi kum nga a zawna C.E.C. School in HSSLC-ah 100% result a neih na a ni.
———-
PCD PUAL SUNDAY VAWI 1-NA HMAN A NI:
UPC Lunglei District Conference chuan May Pathianni vawi 3-na hi PCD pual Sunday atan hman nise tia a lo rel angin May ni 19 Pathianni kha PCD pual Sunday atan hman a ni.
May ni 19 Pathianni hi Pentecost Day anih avangin Local tam zawk ah PCD bilin hun hman theih a ni lova, PCD-ten programme pawimawh tak tak an hmang a, PCD President Rbt.C.Lalramluahpuia chuan thuchah a tichhuak a, heihi Local tinin an chhiar chhuak bawk.
PCD pual Sunday a inkhawm thawhlawmte hi Local PCD-te chan turin District Conference-in a rel tel angin PCD-te kutah a lut bawk a ni.
PCD pual Sunday hi May Pathianni vawi 3-na ah kumtin hman tawh tur a ni.
Lunglei District-ah hian District huapin PCD hi kum 2006 December ni 13 atangin din a ni a, December ni 13 hi District PCD Day a ni. Kohhran ni pawimawh anih avangin kohhran Calendar-ah pawh tih lan a ni.
———-
HEADQUARTERS BIAL PYD TEN THISEN AN PE:
May ni 18 Inrinni khan Lunglei District PYD Conference-in Blood Donation neih nise tia a lo rel bawhzui nan Headquarters bial PYD-te chuan thisen Unit 36 Lunglei Civil Hospital tan an pe.
Headquarters bial PYD-te hian thisen an pek hma hian Civil Hospital Blood Bank-ah hunserh tawi an hmang hmasa a, he hun hi bial PYD President Evan.H. Lalhmingmawia chuan a kaihruai a, bialtu Pastor Rev. LH. Lalchhandama chuan tawngtaina neiin District PYD Vice President Upa C.Malsawmkima leh Blood Bank aiawhin Pi Pc. Lawmzuali, Counsellor ten thu an sawi bawk.
Headquarters bial PYD atanga thisen Unit 36 petu te hi mipa 25, Hmeichhia 11 an ni.
———-
FIELD MEET NEI :
May 18-19, 2024 chhung khan Putlungasih Field, Zehtet field, Tlabung Dinthar te chuan, Zehtet hmunah Field Meet hlim takin an nei a, mikhual pawh an kal tha in 80 chuang an ni.
Heng field-te hi Bru Area chhunga mite niin, meet neih chhung hian Items hrang hrang an hnen atangin thlirho a ni a, Kohhran awmzia nihphung leh kalphungte Seminar neih niin, zirho a ni bawk. Thlarau Thianghlim hnathawh ropui tak a thleng bawk a ni.
Field Meet atan hian District Missions Dept. chuan meet fund a pe a ni.
———-
LAMTHUAMTHUM LOCAL PYD TEN GOLDEN JUBILEE AN LAWM :
May ni 17-19 chhung khan Haulawng Lamthuamthum Local PYD-te chuan an kum 50 tlinna Golden Jubilee lawmna hun an hmang.
May ni 18, Inrinni khan Jubilee lawmna pui ber neih a ni a, chawhnu dar 1-ah ‘Hruaitu chawimawi inkhawm’ neih a ni. He hun hi Vice President Bro.Samuel Lalnuntluanga chuan a kaihruai a, bialtu Pastor Lallawmsanga chuan hunserh a hmang. Bro. C. Remsangpuia leh Sist. LP. Hmangaihzuali te kaihhruainain hruaitu ni tawhte chawimawina Memento hlan an ni a, hruaitu hluite atangin thusawi ngaihthlak a ni.
Inkhawm banah Treasurer Bro.TC.Eden Lalhuanmawia kaihhruainain Jubilee dar mi 50 ten an vua a, bialtu Pastor Lallawmsanga chuan Jubilee lung hawng chhunzawmin, Jubilee lawmna ruai an kilho nghal bawk.
Jubilee lawmna hi zanin May ni 18, Inrinni zan hian hman chhunzawm a ni a, General PYD Treasurer Evan.Laldinpuia chuan thuchah a puang chhuak. May ni 19 Pathianni chawhma ah District PYD President Evan.C.Lalremchhunga chuan thu a sawi a, chawhnu inkhawm ah Upa R.Chhawnkiman thu sawiin zan lamah Tlabung bialtu Pastor Muanpuia Colney chuan thu a sawi bawk.
Kumin 2024 April ni 21 kha Lamthuamthum Local PYD-te kum 50 tlin ni a ni a, remchan zawkna avangin Golden Jubilee lawmna hi May ni 17-19 chhung hian an buatsaih a ni.
Tun dinhmun ah Lamthuamthum Local ah hian PYD Member 97 an awm mek a ni.
———-
———-
AIZAWL EAST DISTRICT
Pentecost Day:
May 19, Pathianni khan Pentecost Day a nih angin District chhunga Tualchhung Kohhran hrang hrangte chuan hlim takin hun an hmang. Pentecost Day-ah hian District atangin a hman dan turah ruahmanna hranpa siam ni lovin Church Board Committee ten an remchang angin Programme an ruahman a, tualchhung Kohhran thenkhat chuan awmni khamin Pathianni chawhma, chawhnu leh zan hun an hmanga, Tualchhung thenkhat chuan Pathianni chawhma leh zan hun an hmang bawk a ni. Tisa lam ruai theh an awm laiin tualchhung Kohhran thenkhatah chuan thingpui leh chhang ruai an theh bawk a ni. Pentecost Day-ah hian Speaker hranpa nei an awm laiin Tualchhung Kohhran hruaituten thusawi rawngbawlna nei an awm bawk a ni. Pentecost Day denchhena Pathian hnena lawmthusawi chawimawina nei an awm bawk a ni. Pentecost Day zan inkhawmah khan District atanga thuchhuak angin Tualchhung hrang hrangte hian Thlarau Thianghlim dawnglo pualin hun an hmang a, Thlarau Thianghlim dawng thar mi engemaw zat an awm a ni.
Pentecost Day hi Rev R. Laltlankima, District Superintendent chuan College Veng Aizawl-ah Speaker-ah tangin rawngbawlna a nei a, Rev VL. Hnemtluanga, District Treasurer chuan Bethlehem Vengthlang. Kohhranah Speaker-ah tangin rawngbawlna neiin Rev C. Lalmalsawma, District Missions Director chuan Champhai Bethel Bial, Zokhawthar hmunah rawngbawlna a nei bawk a ni.
———-
District PYD OB te fehchhuak:
District PYD OB ten ruahmanna an siam angin May 20, Thawhtanni khan Zemabawk Bial tlawhin hlim takin hun an hmang a, Zemabawk Bial te hian Vengpui Kohhranah an lo thleng a ni. Inkhawm hi Bro. Johny Zonunmawia’n a kaihruai a, District PYD President, Pastor J. Lalhmingsanga’n thusawi rawngbawlna a nei thung a ni.
District PYD te hian kumin chhung hian Aizawl khawpui chhung Bial hrang hrangte tlawhchhuak turin hetiang hian ruahmanna a siam a ni.
June 3-ah Zemabawk North Bial, Thuampui bial-ah June 24, Bawngkawn Bial-ah July 8, Bazar Bial -ah July 22, Bethlehem Bial -ah August 5, August 19-ah Upper Republic Bial bakah Mualpui Bial -August 26 te ruahmanna an siam a ni. Hemi bakah hian hun remchang hmasaberah Kum 2025-a District PYD Conference thlengtu tur N. Vanlaiphai Bial tlawh ni se an ti bawk a ni.
———-
Biakin sakna tur lungphum phum:
May 18, Inrinni chawhma dar 10 khan Thingsulthliah Biakin thar sakna tur atan lungphum phumna Rev.R.Laltlankima, District Superintendent chuan a nei. He hunah hian Bialtu Pastor bakah Kohhran member engemaw zat telin hnatlang an nei chhunzawm nghal a ni. Biakin hi a dung ft 70 leh a vang ft 40-a liana sak tura ruahman a ni. Thingsulthliah Kohhranah hian tunah hian member 300 vel an awm mek a ni.
———-
Revival Speakerte pualin retreat nei:
May 16, Ningani khan Rev. T. Lalbiakliana, Chairman, District Revival Committee kaihhruaina hnuaiah District Revival Speakerte tan retreat neih a ni. District Committee room-a neih retreat-ah hian Revival Speaker te an kal kim thei a ni. He hunah hian Rev. VL. Hnemtluanga, District Treasurer bakah District Revival Committee hruaitute hnen atangin rawngbawlna atana pawimawh tur hrang hrang thusawi ngaihthlak a ni a, Revival Speaker te hian hlawkthlak an ti hle a ni.
Kumin May 2, Ningani khan heng Revival Speaker te hi Interview kaltlang lak an lo ni tawh a, tunah hian rawngbawlin hmun hrang hrangah an chhuak mek a ni. District Revival Speaker te lo tarlang ila:
1. Evan. V. Lalngilneia
2. Evan. H. Lalremhlua
3. Evan Lalhlimmawia
4. Evan Vanlalramnghahmawia
5. Evan JH Lalhminghlua
6. Rev. H. Vanlalchhana
7. Evan K. Vanlaldika
8. Evan Lalsiamkima
———-
Sunday School Executive meeting:
May 22, Nilaini khan District Office-ah Rev. C. Lalengliana, Director kaihhruaiin District Sunday School Executive meeting neih a ni a, Rev. R. Laltlankima, District Superintendent in a telpui bawk a ni. He hunah hian thu pawimawh tak tak ngaihtuah niin an thu passed thenkhatte:
(1) North East India huapa Thlarau Thianghlim beihpuithlakna kalmekah Bial tinten Thlarau Thianghlim la dawng lote pualin lang camp buatsaih se, kum 2024 Bial SS inkhawmpui Pathianni zan bik hi hemi pual hian hman theuh ni bawk se.
(2) Aizawl City huapa Inter – Doctrinal puala programme buatsaih chungchangah City chhung bial hruaitute nen Extended meeting neih nise. He programme buatsaih turah hian infiamna leh zirna lama chawimawi phute chawimawina khung tel tum ni se.
(3) Sunday School Hall sak tanpuina pek hmabakah Venghlui, Hermon Kohhran leh Ngentiang Kohhrante pek leh nise.
(4) Khuarel chhiatna avanga District SS OB ten SS hall chhia chhawmdawlna an lo ruahman Ratu tan Rs. 20,000/- leh Tualte tan Rs. 5,000/- te chu approve a ni.
(5) Sunday School Kumpuan bawhzui nan General lamin road map an siam zulzuiin theihtawpa hmalak nise. Khawpui chhung leh pawn lamah pawh campaign beihpuithlakna kalpui tura inruahman a ni.
(6) Kum 2025 NPSS chawhnu inkhawm zirlaibu ziak turin Sis. Lalramsiami B/W chu ruat a ni.
(7) District SS OB zingah District office a thawk an awm loh avangin Evan. Hr. Lalrindika chu Sunday School lam sum theh luh tur ang apiang tlawmngaia lo dawnsak thin turin ruat a ni.
———-
Mi thar leh baptisma chang thar:
May 15, Nilai zan khan Bethel bial New Champhai kohhranah mi thar 4 chu Evan.C.Lalzidinga (Dingtea) District Evangelist chuan Kohhranah a seng lut.
May 19, Pentecost Day khan hetiang hian hmun hyrang hrangah mi thar sengluh an ni:
Thingsulthliah bial Sesawngah Bialtu Pastor Hmingchungnunga Ralte chuan nau pakhat hlain, naute nu hi kohhranah sengluhna a nei nghal bawk. Sesawngah hian Evan Lalzuisanga, District Missions Evangelist in rawngbawlna a nei mek a ni.
Zokhawthar Kohhran ah Bro. Thangkhankapa te chhungkua member pathum chu, Rev. C. Lalmalsawma, Dist. Missions Director chuan Kohhranah a senglut bawk. Zokhawtharah hian Evan H Laltlanzela’n rawngbawlna a nei mek a ni.
Bethlehem Kohhranah pawh mi 4 sengluh an ni a, 2 hi Kohhran ni sa, hmun dang atanga pemlut an ni, mi 2 in Baptisma an chang nghal a ni.
Buang kohhran, Khawbung bialah pawh Bialtu Pastor Robert Lalrinsangan member 9 a senglut bawk. Buang khuaah hian Sis. Vanlalpari BW in rawng a bawl mek a ni.
Thuampui Kohhran a lawi turin Member 6 chu Evan Zothansiama’n a sengluhna a nei bawk.
May 22, Nilai zan khan Kawlkulh Vengthar ah mi thar 2, Bialtu Pastor R.Lalfamkima chuan a senglut a, inkhawm banah an pahnihin baptisma a chantir nghal bawk.
———-
Hruaitute Programme:
Rev. R. Laltlankima, District Superintendent chuan May 23, Ningani khan N. Vanlaiphai Bial, Rawlkhang Biakin hmun en in a kal a, May 25, Inrinni khan Hnahlan hmuna Seminar neihah Resource person-ah tangin Pathianni thleng khan rawngbawlna a nei a, Thawhtanni hian District LAD Conference neihna hmun tur, Kawlkulhah tul leh pawimawh te tiin hun a hmang chhunzawm leh ang.
Rev. H. Lalropuia, District Secretary chuan May 24, Zirtawpni khan N. Vanlaiphai Bial, Lungkawlh Biakin sak thar hawnna a nei a, Pathianni thleng hun hmangin Thawhtanni-ah Aizawl let leh tura ruahman a ni.
Rev VL. Hnemtluanga, District Treasurer chuan May 24, Zirtawpni khan Sunhluchhip hmuna khuarel chhiatna tawkte tanpuina hlanin hun a hmang a, Inrinni khan Aizawl a let leh a ni.
———-
———-
NORTH MIZORAM DISTRICT
District/Department Hruaitute Programme
North Mizoram Dist. Superintendent Rev. K. Lalduhsanga’n May ni 19 Pentecost Day chu Phainuam Bial Saipum leh Saipum North-ah te hun hmangin tluang takin a lo haw leh a, May ni 22 Nilaini khan Mamit-ah fehchhuakin, Mamit khaw peng bula kohhranin hmun hma a neih leh hman dan te a enpui bawk.
May ni 23 Ningani-ah District LAD Board neih a ho ang a, May ni 24 Zirtawpniah Building Committee neih tur a kaihruai bawk ang.
North Mizoram District Secretary Rev. C. Lalthantluanga chuan May ni 16-19 chhunga Arunachal Missions Field PYD Conference vawi 10-na a hmanpui hnuah May ni 22 Nilaini khan tluang takin Aizawl a lo thleng a, May ni 14-24 chhunga Mamit Bial PYD ten Meet an buatsaih hmanpui turin a fehchhuak lehg ang
District Treasurer Rev. C. Lalmuanpuia chuan Pentecost Day May ni 19 chu zing inkhawm chu Hqrs. Bial Khatla South Kohhran a hmanpui a, zanah District Headquarters kohhranah rawngbawlna a nei bawk.
District Missions Director Rev. C. Lalramthanga chuan May ni 22 leh 23 hmangin Home Missions Field-a Biak in leh Quarters sak lai Bawngva Field, Mualthuam West Field leh Bukvannei Field te tlawhin in sakna leh Field bungraw thenkhat te a sem ang.
———-
BIAL CHANCHIN THAR LAWRKHAWM
Rulpuihlimah Mithar nei: May ni 5 Pentecost Day ni khan, Reiek Bial Rulpuihlim kohhranah member thar 5 Pentecost kohhranah lawmluh a ni. Heng mithar te hi PCI atanga lo lut niin Bialtu Pastor Rev. Lalchuailova’n Lalpa Isua hmingin a lawmlut a, Kohhranhote’n an lo lawm hle.
———-
Kolasib Project Veng mithar:
Kohhranhote’n Pentecost Day kan hman tak May ni 5 zan khan Kolasib Venglai Bial, Project Local-ah Mithar 6 UPC North East India kohhranah lawmluh thar ani.
Mithar neih zingah 1 hi PCI kohhran niin; a bak zawng hi Mizoram UPC atanga lawmluhte an ni a, Bialtu Pastor Rev. R. Lalnithanga’n lawm takin Lal Isua hmingin a lawmlut a ni.
———-
K. Sarali Missions Field Mithar:
May ni 19 Pathianni Pentecost Day zan inkhawmah Missionary Evan. John Gabriela chuan PCI kohhran atangin member thar 1 Pentecost kohhranah a lawmlut. Kohhranhote’n he mithar hi an lo lawm hle a ni.
———-
Maubawk Kohhranah mithar nei:
Pentecost Day May ni 19 chawhma inkhawm khan Pentecost kohhran Maubawk Local-a lawi turin mithar 2 lawmluh a ni. Heng mithar te hi Bialtu Pastor Rev. H.F Malsawma’n Lal Isua hmingin a lawmlut a, Evan. B. Lalbiakthanga leh Sr. Upa Lalruata te’n kohhran mipui aiawhin lawmna chibai an buk a ni.
———-
KHAMRANG KOHHRANAH MEMBER THAR NEI:
Kawnpui Bial Khamrang Kohhranah Pentecost Day May 19 Pathian ni khan Khamrang Kohhrana rawngbawl mek Evan. R Lalchhanchhuaha a rawngbawlna kaltlanga Pathian thuthlung hmu thar PCI member 1 Lalpa Isua hmingin Pentecost kohhranah a lawmlut. He mithar hian Sual ngaihdamna Baptisma chang nhglin a rual hian member 5 ten sual ngaihdamna Baptisma an chang ve bawk.
Evan. R. Lalchhanchhuaha hian Kawnpui Bial, Khamrang kohhranah hian kumin April thla aṭanga rawngbawlna bul a lo tan tawh a ni.
———-
KOLASIB VENGLAI LOCAL PYD BUATSAIHIN REVIVAL CRUSADE NEIH A NI:
Kolasib Venglai Local PYD te chuan kar kalta May ni 13 – 19 chhung khan Pentecost Day denchhenin Revival Crusade buatsaihin programme tluang takin an nei: Crusade-ah hian Rehoboth Revival Team te rawngbawla ruaiin team Speaker Evan PC Lalramchhuanmawia hovin rawngbawlna hlawhtling tak an nei a ni.
Crusade hi May ni 13 thawhtan zanah tanin T.Upa PC Lalrinhlua, PYD President in inkhawm a kaihruai a, Bialtu Pastor Rev. R. Lalnithanga’n hun hmasa hmangin Crusade Programme Pathian hnenah a hlan a, Crusade rawngbawlna tan a ni. Crusade neih chhung hian Pathian thlarau thianghlim awmpuina duhawm tak changing siamtharna chang member thahnem tak an awm bawk.
———-
AILAWNG-AH MITHAR NEI:
May ni 12, 2024 (Pathianni) zan khan Ailawng Kohhranah UPC (NEI) Ailawng kohhrana lawi turin chhungkaw khat member 3, Reiek Bialtu Pastor Rev. Lalchuailova’n a lawmlut, heng mithar te hi Nupa niin an fa neih chu Pathian hnenah hlan nghal a ni
———-
Marpara Missions Field tan thilpek pe:
Sist. C. Lalawmpuii, Dist. Headquarters kohhrana lawi chuan May ni 21 thawhlehni khan Marpara Quarter a mi tur Thuthlengsei ₹-3500 man leisakin a pe. Hemi chungchangah hian Marpara Missions Evan. Isak Lalrohluia leh Department neitute’n lawmthu an sawi.
Thutthleng Cushion tur hi a theih anga rang leisak Sist. Maawmi hian a tum bawk a ni.
———-
District LAD Board nei:
May ni 23 Ningani chawhma dar 11:00Am khan North Mizoram District LAD te chuan District Board neiin, Meeting Sist. F. Rohlupuiin a kaihruai, LAD Board hi District kohhranpui hruaitu Pathum Rev. K. Lalduhsanga, Supdt. Rev. C. Lalthantluanga, Dist Secy leh Rev. C. Lalmuanpuia, Dist. Treasurer ten an telpui a, hei bakah hian Sist. Lalramthanga B/w, NEI-UPC, General LAD President meeting a ho thei bawk.
Dist. Supdt. K. Lalduhsanga’n sawm anih angin LAD te fuihna thu sawiin, tanpuitu pawl an nih anga Dist kohhranpui tana zangkhaina tam tak thlentu an nih chungchangah lawmthu a sawi.
District Board-ah hian Agenda 8 neiin chanchin thar chhiar lai hian rorel thutlukna hriat hman a ni lo. An rorel tlangpuiah Dist. LAD Board member ten Missions Field tlawh te, Gen. Missions Field biak in sakna tur Bial LAD Confe a appeal a sum hmuh tawh, a sakna tur hmun chian chungchang te, Kolkatta biak in saknana hma lo lak tawh sum indaihlohna ngaihtuah te a tel a, hei bakah hian Gen LAD kumpuan ‘Taimakna’ bawhzui dan te, Ladies Auxilliary Tailoring Training center hmasawnna tur ngaihtuah chungchangte a tel bawk.
———-
Bawngva Workcamp:
May ni 18 Inrinni khan Mamit Bial Missions Dept te chuan an ruahman angin an Bial chhunga Missions Field Biak in saklaiah workcamp neiin an fehchhuak. Mamit Bialte hi mi 30 thawk chhuakin nilengin hna an thawk a, Biak in Platform chhûn leh Biak in bang plaster te an thawk a, workcamp member te an an hnathawh an ulukin tha hnem an ngai hle a, District tan sum tam tam sen ngai turah a thlawna Mamit Bial Missions Dept ten hna an rawn thawhsak chungchangah District Missions Dept hruaitute chuan lawmthu an sawi.
Bawngva Biak in hi 14”x40” a lian niin; May ni 27 kar thar thawhtanniah Reiek Bial Missions Dept te fehchhuakin Biak in ceiling siam an buaipui ang a, Ceiling peih a nih hnuah Hqrs. Bial Missions Dept ten Bawngva Electrict wiring hna hi workcamp vekin an thawk chhunzawm dawn a ni
———-
BAPTISMA KHUR HAWNG:
Pentecost Day May ni 19 (Pathianni) khan Rengdil Bial chhunga Home Missions Field-ah Baptisma khur thar hawn a ni, Baptisma khur hi Hunthar Bial, Edenthar Local Missions Dept tena an siamsak niin, He Baptisma khur hi Missionary a awm Evan. John Gabriela’n Lal Isua hminga hawngin, Khur hman theiha hawn a nih hnu kohhran membermi 2 in Lalpa Isua hmingin sual ngaihdamna Baptisma an chang nghal a ni.
———-
Ladies Auxilliary Tailoring Centre (LATC) tan thilpek pe:
NMD LAD buatsaih LATC-a Puan thui zirlaite tan May ni 14 thawhlehni khan Chawlhhmun Bial LAD te chuan Zirlaite chaw chhun chhumna tur Preasure cooket thar an pe. An thilpek hi Chawlhhmun Bial LAD President leh Secy ten LATC Instructress kutah an hlan a, LATC zirlaite leh LATC board te an lawm hle.
———-
EDUCATION CAMPAIGN NEI :
Kawnpui Bial Sunday School Department chuan May ni 12, 2024 Pathianni chawhnu inkhawm khan Kawnpui Bial chhung local hrang hrangah Naupang Sunday School pualin Education Campaign an buatsaih. He hun atan hian District PYD Education Sub-Committee rawih niin, District PYD OB pathum leh Education Sub-committee member ten hun an hmanpui.
Kawnpui Bial te leh Dist. PYD OB te leh Education sub committee te hian Kawnpui Bial Kohhran 3-ah Campaign hlawhtling tak an neih pui a, Kawnpui Bial SS Naupangte pawhin hlawk thlak an ti hle. A thawhkhatna Campaign hi Kawnpui Kohhran, Hortoki leh Bualpuiah te Campaign hi neih a ni.
———-
PANGBALKAWN BETHLEHEM MISSIONS FIELD AH LADIES AUXILIARY DEPARTMENT ( L.A.D) DIN A NI:
May ni12, 2024 (Pathianni) khan kum 2023 kuma Pangbalkawn Bethlehem kohhran, Dist. Missions Dept in a enkawlah, Kolasib Rengtekawn Bial L.A.D Conference rorel bawhzuiin, Ladies Auxilliary Dept (LAD) din a ni.
Pangbawlkawn Bethlehem Church Board Committee Bialtu Pastor hova neih chuan hruaitu hmasa atang heng mite hi a ruat bawk a ni:-
1) President : Sis.Vanlalruati
2) Secretary : Sis. Khawrbawih-I
3) Treasurer: Sis. Ṭhakimi
Bethlehem kohhran LAD te hian May ni 12 Pathianni vêk hian, L.A.D O.B te hian Membership fee khawn nghalin, Pangbalkawn Bethlehem ah hian L.A.D member – 7 (Pasarih) an awm a, Bial L.A.D in Budget atan Rs. 650/- an tuk chu Pangbalkawn Bethlehem Missions Field L.A.D ding thar te hian an tlak bawk.
He tih rual hian Sis. Zonunmawii, Bial L.A.D Asst.Secretary chuan Pangbalkawn Bethlehem L.A.D ding thar indan nan hian Rs. 300/- (Cheng zathum) a pe bawk
Facebook