LAD DAY
May ni 10, Zirtawpni kha UPC North East India Kohhran ni pawimawh LAD Day leh Nute ni Mothers Day vawi 36-na a ni a, Kha mi ni khan Bial leh Tualchhung hrang hrang LAD ten Programme siam in hun an hmang a ni.
Ladies Auxiliary Department (LAD) hi UPC North East India Executive Board hmasa ber; kum 1969 March ni 20-21 chhunga Shillong Peak Hotel-a neihin a din a ni a, LAD Day hi Kum 1988 atang khan hman tan a a ni. Hruaitu hmasa ber turin President atan Audrine Scism leh Secretary /Treasurer atan Thangziki, Hmarkholien chu an ruat.
Tuna General LAD Hruaitute:
1. Gen LAD President, Sis. Lalramthangi B/W
2. Gen LAD Secretary, Sis. Lalramlawmi B/W
3. Gen. LAD Treasurer, Sis. Krawschhuanawmi B/W
———-
CHARGE INHLANNA:
May ni 15, 2024 Nilai ni hian UPC North East India Department Hruaitu kalchhuak leh ruat thar te bakah General PYD hnuaia Sub Committee hruaitu hlui leh thar ten General Headquarters Office, Aizawl ah charge inhlanna an nei ang.
———-
CBC:
May ni 8, 2024 Nilaini khan CBC Campus, Aizawl ah June Session a tan tur BTh, BD & COPS entrance exam neih a ni a, UPC North East India District hrang hrang a tangin Applicant mi 28 an awm a ni.
May ni 9, 2024 Ninga zing dar 10.00 khan CBC zirtur-te Personal interview neih chhun zawm leh niin, Interview hi UPC North East India General Superintendent, Rev. Zohmingthanzama chuan a telpui a ni.
———-
———-
AIZAWL EAST DISTRICT:
Aizawl East District Day:
May 8, Nilaini kha Aizawl East District dinchampha vawi 30-na niin Kohhran chuan ni pawimawh-ah puangin he ni hian Aizawl East District Office chawlh-ah puan niin Office khar a ni. Aizawl East District hi N.E.India District pakhat ni turin May ni 8, 1994 khan Bethlehem Veng UPC Biak inah Rev. K.Satinvela, khatih laia Gen. Superintendent UPC-NEI chuan ropui takin a hawng a ni. Rev H.Vankhuma, General Secretary chuan Executive Board-in District hruaitu atana a ruatte puan chhuahna nei nghal in
District hruaitu thar te chu :
District Superintendent :Rev. R.Lalrinsanga
District Secretary : Rev. R.Hrangvunga
District Treasurer : Rev. C.Vala te an ni.
District Conference hmasa ber chu Zemabawk Playground-ah Feb 23-26, 1995 khan neih a ni a, thupuiah ‘Chanchin Tha puan darh’ tih hman a ni.
Tun dinhmuna Aizawl East District hruaitute:
Superintendent: Rev. R. Laltlankima
Secretary: Rev H. Lalropuia
Treasurer: Rev VL. Hnemtluanga
Missions Director: Rev C. Lalmalsawma
Sunday School Director: Rev C. Lalengliana
PYD President: Pastor J. Lalhmingsanga
LAD President: Sis Lalramsiami B/W te an ni.
Aizawl East District hian a din tirh atangin Pathian hnen ata malsawmna nasa tak a dawng a, tunah hian District chhunga Pastor Bial 31 awm mekin Kum 2024 District Conference report bu atanga a lan danin Kohhran member 28,086 awm mekin Kohhran chhungkua 6152 awmin Kohhran hi khaw 186-ah a ding mek a, tunah hian Preaching Point 17 a awm mek bawk a ni. Aizawl East District hi a dintirh chuan Office mumal pawh nei lovin hmun hrang hrangah mi In luahin an awm kual thin a, tunah chuan Kohhran mipuite leh Pathian malsawmna avangin Ramhlun South, Aizawl-ah Office tha tak neiin tunah hian Building sak hna pawh chak taka thawh mek zel a ni bawk. Kum 2019 khan Aizawl East District hian a kum 25-na, Silver Jubilee chu ropui takin District Building chungah a lo lawm tawh a ni.
———-
District Rising Day pualin hnatlang neih a ni:
May 8. 2024, Nilaini khan Aizawl East District dinchampha phak vawi 30-na niin hemi pual hian Chite hmuna District ram chu samfai hnatlang neih a ni. He hunah hian Aizawl khawpui chhung Bial hrang hrang atangin member 32 thawk chhuakin District ram sam fai hnatlang hi an nei a ni.
Chite hmuna ram hi District chuan Kumin 2024 khan Conference centre tur atan lei felin a sakna tur hian March 13, Nilaini chawhnu khan khatih laia District Superintendent, Rev KVL. Hmangaihkima chuan lungphum phumna alo nei tawh a ni.
Aizawl East District in Conference centre tur a lei hi Aizawl, Chite Lei bul maia awm niin District Building Committee ruahmanna angin a hmun chelbawl hna hi thawh chhunzawm tur a ni dawn a ni.
———-
Bial Joint Revival hmang mek:
Aizawl East District chhunga Bial hrang hrangah Joint Revival hman mek a ni a, Pathianni zan thleng a awm ang:
Aizawl khawpui chhung Bial 5 Joint Revival chuan Bawngkawn Bial, Bawngkawn Biakinah hman mek a ni. Bial 5 Joint Revival-ah hian Bawngkawn Bial, Bazar Bial, Bethlehem Bial, Upper Republic Bial leh Mualpui Bial te an awm a ni.
Serchhip Bial, Serchhip Dinthar Bial leh Chhingchhip Bial te pawhin Bial 3 Joint Revival hi Serchhip Bial, New Serchhip Biakinah an hmang mek bawk a ni.
E.Lungdar Bial, Khawhai Bial leh N.Vanlaiphai Bial te pawhin Bial 3 Joint Revival hi North Vanlaiphai Bial, North Vanlaiphai Bial, Khawlailung Dinthar hmunah an hmang bawk a ni.
Zohmun Bial, Sakawrdai bial, Khawlian Bial, Suangpuilawn bial, Khawruhlian bial leh Darlawn bial te pawhin May 6, Zirtawp zan atang khan Suangpuilawn bial, Vanbawng hmunah Bial 6 Joint Revival hi an hmang mek bawk a ni.
Kahrawt Bial, Champhai Bethel Bial, Khawbung Bial leh Hnahlan Bial, Bial 4 Joint Revival pawh Kahrawt Bial, Venglai Biakinah an hmang mek bawk a ni.
Bial 4, Ngopa, Khawzawl, Kawlkulh, Rabung Bial Joint revival hi May 24 atanga 26 hian Kawlkulh Bialah an hmang thung ang
Keifang Bial, Saitual Bial, Thuampui Bial bakah Zemabawk Bial, Zemabawk North Bial leh Thingsulthliah Bial te chuan remchan zawkna avangin May 3 atanga 5 chhung khan Thuampui Bial, Thuampui Biakinah Bial 6 Joint Revival hi an lo hmang tawh a ni.
———-
Mithar leh Baptisma chang thar:
May 4, Inrinni zan khan Khawbung bial, Khuangleng kohhranah Sis.Vanlalpari rawngbawlna atangin member pahnih chhungkaw khat chu lawmluh an ni. Khuanglengah hian Sis. Vanlalpari hian District home Evangelist niin rawngbawlnaa nei mek a ni. May 5, Pathianni khan chhungkaw khat, member 2 lawmluh an ni bawk.
Champhai Bethel Bial, Zote Kohhran ah May 5. 2024, Pathianni khan member 2 chu lawmluh an ni. Zote ah hian Evan Lalvenhima’n rawngbawlna anei mek a, Lalpan malsawm a sawm hle a ni
May 5. 2024, Pathianni khan Khawzawl bial Ngaizawl Kohhrana lawi tur in member thar Myanmar atanga lo chhuk member 3 chhungkaw khat chu Bialtu Pastor. K. Vanlalhlimpuia’n Lal Isua hmingin a lawmlut.
May 5, Pathianni chawhma inkhawm ah Serchhip Biakinpui kohhran a lawi turin chhungkaw khat, member 4 te chu bialtu Pastor C. Lalchhuanga chuan a lawmlut. May 4, Inrinni zan khan College kohhran ah Nau 1 hlan leh kohhran mi 7 te baptisma chantirna bialtu Pastor hian a nei bawk.
May 5, Pathianni zan khan Khawbung Bial, Dungtlang ah chungkaw khat member 10 te chu Bialtu Pastor Robert Lalrinsanga chuan kohhran ah a lawmlut.
———-
———-
NORTH MIZORAM DISTRICT:
District Hruaitute leh Departmental hruaitute Programme
May ni 6 (Thawhtanni) khan District Supdt Rev. K. Lalduhsanga chuan Sialsuk Bial Chamring Kohhran Biak in sak tur hmun hma leh hmalak zel dan tur a enpui a, Dist. Supdt. hi Thenzawl-ah tlang nghalin Thenzawl Bial chhunga Kohhran member thenkhat thlipuiin an chenna in a tihchhiat te chawmdawlna tur relief a pe bawk.
May ni 7 (Thawhlehni) khan UPC-NEI, General Conference vawi 56-na North Mizoram District-in April ni 25-28 chhunga Kolasib-a a thlenah Conference Organising te nen Conference thlirletna te neiin Meeting an nei a, hetah hian Dist. Supt. Rev. K. Lalduhsanga leh Dist. Secretary Rev. C. Lalthantluanga ten an ho a ni.
May ni 8 (Nilaini) khan Pentecostal Gateway Higher Secondary School Managing Board District Committee Room-ah neiin District Supdt. Rev. K. Lalduhsanga’n a kaihruai a, hetah hian District Secretary Rev. C. Lalthantluanga leh Dist. Treasurer Rev. C. Lalmuanpuia te’n an ho bawk.
May ni 8 Nilaini zing khan District Missions Director Rev. C. Lalramthanga chuan NMD huam chhunga Field Biak in leh Quarters sak kal lai mek te, a hmuna thlithlai turin a fehchhuak. May ni 8-ah Bukvannei Quarters sak mek enpuiin Bethlehem (Pangbalkawn) Quarter sak leh hnathawh bak ruahmanna an nei bawk ang. hei bakah hian S. Chhimluang Biak in ceiling siam leh Electrict wiring te an tihpui bawk ang a, Kar tawp lamah Dist. Missions Secretary nen Field tlawh tul thenkhat te tlawha fehchhuak turin ruahmanna an siam bawk.
May ni 10 (Zirtawpni) chu NEI UPC –in LAD DAY atan a hman angin hetiang hian District LAD ten Day an hmang ang-:
1. Thenzawl bial (Neihloh local) – Sist. F. Lalrohlupuii, District LAD President
2. Headquarters bial Nursery local – Sist. Doris Lalrinsangi, District LAD Secretary
3. Chawlhhmun Bial Zonuam Local- Sist. Lalzuiliani, District LAD Treasurer
———-
PENTECOSTAL GATEWAY HIGHER SECONDARY SCHOOL MANAGING BOARD THUKHAWM:
May ni 8 chawhma dar 11:00 khan UPC-NEI, North Mizoram District Committee room-ah, North Mizoram District in a enkawl PGHSS Managing Board an thukhawm.
Managing Board hi District Supdt. Rev. K. Lalduhsanga’n a kaihruai a, Managing Board Secretary Evan. JH Malsawmdawngliana, PG Principal in School kalphung leh hmalakna hrang hrang te, School dinhmun te report a pe. Committee hi Dist. Secreary Rev. C. Lalthantluanga leh Treasurer Rev. C. Lalmuanpuia ten an ho bawk.
Rorel pawimawh zualte:
– PG Higher Secondary School zir tur ‘Nun Kawng dik leh Chatuan Nunna’ tih chu Naupangte zir tura ruahman mek niin; Final Edit ti turin Upa C Lalnunmawia leh Evan F Lalngaihawma te ruat an ni. He lehkhabu hi June 2024 atanga zir hman tura ruahman a ni. School Devotion leh tul danga hman atan Musical Instrument Key Board leh Guiter an pass a, School venhimna kawngah a theih ang anga hmalak te bakah School awmhmun sawn tura ruahman kal mek chu chak taka hma la zelin, a theih anga sorkar lam atanga tanpuina dil te an pass a ni.
———-
DISTRICT HRUAITUTE LEH GEN CONFERENCE ORGANISING COMMITTEE TEN UPC-NEI, GENERAL CONFERENCE 2024 AN THLIR LET:
April ni 25-28, 2024 chhunga UPC NEI General Conference vawi 56-na hman zawh tak chu May ni 07, Thawhlehni zan khan Conference Organising Committee te leh North Mizoram District hruaitute’n an thlirlêt.
Inkhawmpui thlirlêt hi Kol. Diakkawn Pastor Qrs.-ah neiin, Meeting-ah hian Conference Organising Committee bakah Sub-Committee hrang hranga Secretary leh Treasurer te an tel a. Rev. K. Lalduhsanga, Dist. Supt. leh Rev. C. Lalthantluanga, Dist. Secretary te’n an ho bawk.
Inkhawmpui hman zawh takah Sub-Comt. hrang hrang te leh Bial mipuite inpekna a ropuiin lawmawm an ti a, Conference thlen chungchanga an induhkhawp lohna leh Confe hlawhtlinna tura Organising committee bakah sub committee peng hrang hrang te inpekna leh thawhhona zara Confe Lalpa hriakthih an hman theih chungchangah lawm thu an sawi.
Sub-Committee hrang hrangte sum hman bang belhkhawm hi Rs. 92,930/- a ni a, hengte bakah hian Organising sum senna tur la pek chhuah lohte tifelin sum bang la awm chu District-ah chhun luh turin an rel.
Inkhawmpuinaa bungrua hmanhlui te pawh a ṭul angin Tualchhung Kohhran hrang hrangah sem a ni a. Electric Tui pump khawl erawh District-ah pek a ni.
District leh General atanga inkhawmpui puihna dawn bakah Pandal panna kawng siamna atan District atangin sum dawn a ni a, hei bakah hian mi ṭhahnemngaiten sum leh pai engemawzat thawh bawkin, hengte hmang hian inkhawmpui hlawhtling tak District ram, Kolasib Vengtharah thlen a ni.
Sub-Committee hrang hrang te tihtawp niin; an bungraw neih ang ang leh sum an hman bangte pawh Organising Committee-ah submit nghal a ni a. Organising Committee erawh chinfel ngai thil tlem a zawng ala awm avangin thiah ala ni hrih lo.
Hriat tawh angin, inkhawmpuina tur Pandal chu khuarel chhiatna avanga a chhiat hnuah, ni 3 chhung lekin tundi a inkhawmpui thlenna tura peih fel leh a ni a. Hemi atana tha leh zung sengtu zawng zawng te, sum leh pai baka thilpek petu zawng zawng te, inkhawmpui hlawhtlinna atana mi inpe zawng zawng te chungah Organising Committee chuan lawmthu a sawi a. Inkhawmpui palai lo kal zawng zawngte chungah te Organising Committee chuan lawmthu a sawi bawk.
———-
W Phaileng Bialte Work Camp:
W.Phaileng Bialte’n an Bial chhung Missions Field Pukzing Vengthara work tura ruahmanna an siam angin member 19 an fehchhuak a, May ni 7 thawhlehni khan fehchhuakin Biak in sain workcamp rawngbawlna an nei.
———-
Missionary Quarter lung phum, phum a ni:
May ni 6 thawhtanni khan Rengtekawn bial chhunga home Mission field Bethlehem hmuna Missionary Quarter sak tur lung phum chu Rengtekawn Bialtu Pastor Rev C Lalthlengliana chuan tawngtaia hlanin a lung phum a phum.
He Missionary Quarter hi 24×21 Ft a sak tur niin, Bawngkawn, (Chaltlang Bial) Mission Dept ten sum leh pai an tum mai piah lamah an mahni ngei kalin, work camp-in Quarter hi an sa nghal bawk a ni.
———-
MISSIONS FIELD MEMBER TE HMAN TURIN BRU BIBLE:
Headquarters Bial Mission Department ten kum tina an lo tih fo tawh angin kumin 2024 atan Bru Bible field tan lei nise an tih angin May ni 7, 2024 khan Field chhunga a mamawh apiang te tan Bru Bible bu 15 lai mai chu Dist Mission Dept ah kutah an hlan Bible hi Bial Missions Director Evan. Challiana’n hlanin Bialtu Pastor Rev. Lalremtluanga’n a ho bawk.
———-
HEADQUARTER BIAL PYD TEN LOCAL INTLAWH TAWN RAWNGBAWLNA NEI:
UPC(NEI) North Mizoram District Hqrs Bial PYD te chuan Bial Confe rorel bawhzuiin thla hmasa April atang khan Bial inkantawn Programme an hmang.
April thlaah inkantawn thawhkhatna hmangin zanin May ni 6 thawhtan zan hian inkantawn thawh hnihna an hmang chhunzawm a, zanin hian Khatla S Local PYD ten Mission Vengthlang local PYD tlawhin Nursery PYD ten Hqrs Local PYD te an tlawh thung a, May ni 27 zanah Tuikual S PYD ten Nursery tlawh lehin chu chu an inkantawn programme hman zawhna a ni dawn a ni.
———-
BAWNGKAWN LOCAL MISSIONS DEPT TE WORKCAMP TURIN FEHCHHUAK, FEHCHHUAKTE CHALTLANG BIAL MSD TEN ASC HOME PUALIN THILPEK AN THAWN NGHAL BAWK:
Chaltlang Bial Bawngkawn Missions Department te chu vawiin May ni 6 (Thawhtanni) khan Rengtekawn Bial Pangbalkawn Bethlehem ah Missionary Quarter saa workcamp nei turin an fehchhuak.
Bawngkawn Local MSD fehchhuak turte hi Chaltlang Nial Missions Dept te chuan ASC Home tanpuina tur thilpek engemaw zat an thawn tel nghal a
———-
HEADQUARTERS BIAL TEN PANGBALKAWN BETHLEHEM MISSIONS FIELD TAN FRIDGES PE:
May ni 3 Zirtawp zana Hqrs. Bial Board Meeting neih chuan Hqrs. Bial Pastor Quarters Fridges hman lai tha tak chu Fridge thar neih avangin District Missions Department kut-ah pek nise tiin a rel a, Hqrs. Bial Board in a rel angin May ni 6 thawhtanni zing khan Hqrs. Bial Pastor Rev. Lalremtluanga chuan Bial aiawhin District Missions Director Rev. C. Lalramthanga kutah Fridge hi lawm takin a hlan a ni.
District Missions Dept. ten Fridge hi Pangbalkawn Bethlehem Missions Field Quarters-a awm tura ruahmanna a siam angin, Bethlehem MF Quarters-ah dah a ni dawn a ni.
———-
———-
LUNGLEI DISTRICT
DISTRICT BOARD VAWI 213-NA AN THUKHAWM :
May ni 7, Thawhlehni khan UPC Lunglei District Board vawi 213-na chu District Board Room-ah neih a ni a, District Superintendent Rev.C.Lalrintluanga chuan a kaihruai. An thurel pawimawh zualte:
1. General Missions Director atana thlan thar, Zobawk bialtu Rev.C.Vanlalena thlahna chu May ni 12, Pathianni chawhnu dar 1:30-ah District UPC Conference Hall-ah neih tha tih a ni a, hetah hian Bialtu Pastor, District Department hruaitu, khawpui chhung Bial hrang hrang hruaitute, Local hrang hrang hruaitute leh a tel thei remchang apiangte tel nise tha tih a ni.
2. Executive Board Member atan Rev.C.Lalhriatpuia ruat a ni.
3. Electoral Member atan Rev.R.Vanlalenga ruat a ni.
4. Revival Committee Chairman atan Rev.R.Lalsangzuala ruat a ni.
5. Zobawk bial a awm turin Chawngte bial Pastor nilai Pastor Jerry Lalmuanawma a ni ang a, Chawngte bial hi District Superintendent in Pastor dang dah anih hma atan mawh a la ang.
6. Pastor thar la turin Advertisement chhuah nise tha tih a ni bawk.
District Board vawi 213-na ah hian General Missions Director thar Rev.C.Vanlalenan Lunglei District Board Member ni a a tel hnuhnung ber tur anih avangin thu a sawi bawk.
———-
BOOK BINDING MACHINE PATHIAN HNENAH HLANNA NEI:
May ni 6 Thawhtanni khan UPC Lunglei District Offset Press-in an hman tur atana an lei thar Book Binding Machine (Lehkhabu kawm vuahna) chu Pathian hnenah hlanna neih a ni.
Pathian hnena hlanna hun hi District Superintendent Rev.C.Lalrintluanga chuan a kaihruai a, Manager Evan.R.Ropianga chuan Report pe in khawl thar an neih theih nana hma lak saktu District Board chungah lawmthu a sawi a, Khawl thar leina leh a behbawm atana senso ah cheng nuaisawm singnga chuang an hman thu a sawi bawk.
Khawl thar hi District UPC Office-a thawktu ten Pathian hnenah tawngtai rualna neiin an hlan a ni.
———-
ZOTLANG LOCAL-TEN DIAMOND JUBILEE AN LAWM :
May ni 3 Zirtawpni khan Zotlang Local UPC-te chuan an Local kum 60 tlinna Diamond Jubilee an lawm.
Diamond Jubilee lawmna hi hun hmasa Biak In kawtah hman a ni a, Upa F.Lalkungpuia, Secretary, Zotlang Local chuan hun a kaihruai a, mi 60 ten Jubilee dar an vuak hnuin, District Superintendent Rev.C.Lalrintluanga chuan Jubilee lung a hawng.
Biak In pawn a hun hman zawh anih hnuah Biak Inah Jubilee lawmna inkhawm neih chhunzawm a ni a, he hun hi Upa C.Lalrinsanga, Secretary Celebration Committee-in a kaihruai a, District Superintendent Rev.C.Lalrintluanga, Rev.H.Rothuama Sectional Pastor Pukpui Section, Upa LH.Sanghluna Rahsiveng, Rev.Ralkapkunga Khiangte, Rev.C.Darkhuma leh Rev. T.Aichhunga ten thu an sawi a, LAD leh PYD Zaipawlte bakah Sist.PC. Lallawmsangi ten fak hla mawi takin an sa a, Upa R.Lalhmelmawia, Vice Chairman, Zotlang Local chuan lawmthu sawina a nei.
Jubilee lawmna inkhawmah hian Zotlang Local-te hnenah hian Upa LH.Sanghluna, Rahsiveng chuan Bible leh Hla bu a pe a, Sist.R.Vanlalsangi, Sekhum chuan Dekchi a pe bawk. Tlai lamah Jubilee lawmna ruai kilho a ni.
Jubilee lawmna inkhawm programme hi May ni 5, Pathianni zan thlengin hman a ni.
———-
PUKPUI LOCAL PYD TEN GOLDEN JUBILEE AN LAWM:
May ni 5, Pathianni hi Pukpui Local PYD ten kum 50 an tlinna Golden Jubilee a ni a, he hun hi hlim takin an lawm.
Chawhma dar 10-ah Biak In kawtah hun hmasa hman a ni a, he hun hi Bro.Joseph Zonuntluanga, Asst.Secretary chuan a kaihruai a, Upa H.Doruma, Pukpui Local PYD President hmasa ber chuan Lungphun hawnna a nei a, hruaitu hlui mi 50 ten Jubilee dar an vuak chhunzawm hnuah, Pukpui Local Chairman Rev.C.Darkhuma chuan tawngtainain hun hmasa a khar.
Hun hmasa hman zawh anih hnu chawhma dar 11-ah Chawngbawla Hall, Pukpui ah Jubilee lawmna inkhawm hi neih chhunzawm a ni a, he hun hi Rbt.P.Samson Vanlalfela, President, Pukpui Local PYD chuan a kaihruai a, Rbt.R.Lalremsanga, Secretary, Pukpui Local PYD leh Bro.C.Lalrinzuala, Treasurer Organising Committee hnen atangin Report ngaihthlak a ni a, District UPC Choir, Pukpui Bial PYD Zaipawl, Jubilee Choir bakah Local PYD Choir-te an zai bawk.
Pukpui Local PYD Zaipawlte Music Video siam ‘Thuthlung ram khawpui’ chu bialtu Pastor Rev.H.Rothuama chuan a tlangzarh a, (Pennet Lunglei Youtube channel lamah en tur a awm) District Treasurer Rev.K.Vanlalhruaia chuan Pathian thuchah a puangchhuak.
Jubilee lawmna inkhawm hi Pu V.Malsawmtluanga, MLA, HPC Vice Chairman nibawk chuan hmanpuiin thu a sawi a, Evan.Lalringzuala Pachuau, Secretary, District PYD leh Bro.Rochanmawia, Vice President, Pukpui Bial PYD-te chuan thu an sawi bawk.
Chawhnu dar 2:30-ah Sist.Helen K.Zonunengi, Treasurer, Local PYD leh Bro. Lalrohluzuala Pachuau, Asst.Secretary, Pukpui Bial PYD-te kaihhruainain Chawngbawla Hall-ah fellowship neih chhunzawm leh a ni a, Pukpui Local PYD hruaitu ni tawh chatuanram pan ta te sunna hun hman a ni a, Evan.Lalringzuala Pachuau, Secretary, District PYD chuan hunserh hmangin Pukpui Local PYD hruaitu hmasa Sist.C.Lawmzuali leh Sist.CZ.Lalzami te chuan Jubilee Cake an zai.
Hruaitu ni tawhte chawimawina neih a ni a, he hun hi Bro.Joseph Lalmuanpuia, Fin.Secetary Local PYD chuan a kaihruai a, Special Award sem a ni a, Bro.R.Lalnuntluanga chuan Special Item a nei bawk. Chawhnu programme-ah hian Sist.V.Lalnuchhungi, Sist.Evelyn Lalremruati, Sist.J.Ramnunpuii leh Bro.Calvin Lalpekhlua te an zaia, Upa C.Vanlalfela, Adviser, Pukpui Local PYD chuan tawngtainain hun tawp a khar a ni.
Pukpui Local PYD Golden Jubilee lawmna hi May ni 3 zirtawp zan atangin Crusade neiin hman chhoh a ni a, Speaker atan District Treasurer Rev.K.Vanlalhruaia chu hman a ni. Tin, Jubilee lawmna pual hian Pukpui Local PYD-te hian Camping an buatsaih tawh a, Civil Hospital tan thisen Unit 54 an pe a, vengchhung thenfai hnatlangte an neih bakah kawng hrang hrangin Jubilee lawmna hi an lo buatsaih tawh a ni.
Pukpui Local PYD ah hian Member 248 an awm mek a ni.
Facebook