January 15, Pathianni kha Sunday School Day-a ni a, he ni hi North East India UPC pum huapa hman a ni ang. Kum tin January Pathianni vawi thumna hi North East India UPC kohhran chuan Sunday School Day atan a hmang thin a ni.
He ni puala Sunday School Day thuchah kan neih thin angin, tun tumah hian General Sunday School Director Rev. R. Laichhingpuia ziah chu North East India UPC tualchhung kohhran tinah chhiar chhuah a ni.
North East India- UPC ah hian kum 1969 khan Sunday School Department hi din tan a ni a. Kum 1969 March ni 21, Executive Board rorel inkhawm hmasa ber, Shillong-a Peak Hotel a neih chuan North East India pum huapa hman turin Sunday School Department-hi a din a ni.
Hruaitu hmasa te:
- Director : Rev. J. Laltluanga.
- Treasurer : Rev. R. Hrangvunga.
Hruaitu ni lai te (Kum 2016 – 2018 ) :
- Director : Rev. R. Laichhingpuia
- Secretary : Rev. R. Vanlalawia
- Treasurer : Evan. F. Lalsangliana
Member tin huap he Department pawimawh tak mai hi a din tirh atanga vawiin thleng hian kohhran tha leh nung siamna kawngah te, rawngbawltu tha chherchhuahna kawngah te, Ringtu puitling chherchhuahna kawngah te leh Pathian thu dik hre lote hriattirna kawngah a thawh hlawk ber a ni a tih theih hial.
“Sunday School Day” nei tur hian March 12,1980 khan Shillong-a General Conference neih kumin ‘January First Sunday’ hmang tura passed a ni a. Tichuan, kum 1981 atangin January 1st Sunday ah hman tan a lo ni ta a ni. Mahse, kumthar nen a inhnaivai deuh avangin January Pathianni vawi thumnaah sawn ni rawh se, tiin, March 25, 1983 General Sunday School Conference, Churachandpur-a neihah chuan sawn a lo ni leh ta a. Tichuan, kum 1984 atangin January Pathianni vawi thumna hi “SUNDAY SCHOOL DAY” atan kan hmang ta a ni.
Facebook