Oct 2, hi North East India UPC Kohhran thalai pawl Pentecostal Youth Department (PYD) Social Work Day a ni a, India hmarchhak pum huapa hman thin a ni.
Pentecost Kohhran thlai pawl rorelna sang; General PYD Conference rorelna chuan Kum 1999 khan Social Work Day neih nise tiin a pass a, Kum 2000 atang khan hman tan nghal niin kum tin Oct ni 2-hi India hmarchhak pum huapin Vantlang tana hna tha thawhna ni atana hman chhoh a lo ni ta a ni.
Social work day ah hian thinsen pek, Damdawiina damlo tana ei tur sem, Vantlang hmun pawimawh Community hall, Damdawi in leh sub center tih fai, Vantlang inthiarna tur siam leh tihfai, khawlai thenfai leh tuiluankawr tihfai bakah thingphun hnatlang te neih thin a ni a.
Hri leng vangin kum dang anga hman theih ni lo mahse sawrkar dan siam leh hri leng a darh lohna tura in veng chungin UPC North East Thalai-te chuan vantlang tana hna thawk turin he ni hian an pen chhuak a ni.
Aizawl City PYD Co ordination Committee chuan October ni 2 (Inrinni) Social Workday hian Zoram Medical College ZMC Falkawn hmun a Covid Patients leh frontline workers te chhun ei leh in tur pe in hun an hmanga, General PYD President Rev. H. Lalropuia chuan hunserhte hmangin thil pek hlanna hi a nei a ni.
Hemi ni a ei leh in sem tur leh a tul ang angte lo buaipui tu Aibawk Bial PYD chungah Aizawl City PYD Co ordination Committee chuan lawmthu a sawi tak meuh a ni.
Facebook