Social Work Day

Oct 2, Thawhtanni kha Pentecostal Youth Department (PYD) Social Work Day a ni a, India hmarchhak pum huapa hman a ni.
Aizawlah chuan City PYD bultumin Civil Hospital leh Lammual thenfai hnatlang thawh a ni a. Chawhma dar 10:30 ah Civil Hospital ah Evan Dr. Lalmuanpuia, City PYD Chairman kaihhruainain tanna hun hman a ni a, Evan. F. Lalngaihawma’n huhserh a hmang. Thalai kalkhawmte hian Civil Hospital Building chhung leh pawn lam fang kualin, Hospital building chhunga ward tin bakah building leh a chhehvel fang kualin thenfai hna thahnemngai takin an thawk a ni. Chawhnu lamah Lammual lamah hun hman chhunzawmin nilengin hnatlang hi an nei. Aizawl City Area Pastor Bial 15 leh Sihphir Local atangin PYD member 350 chuang hnatlang hian an thawkchhuak a ni.
Lunglei khawpui chhungah pawh Lunglei Town Area chuan a huhova hmangin Thuamluaia Mual leh a chhehvel tihfai hna nilengin an thawk a, Lunglei District Treasurer Rev. C. Vanlalena’n hunserh hmangin thalaite tan fuihna thuchah a sawi a, Lunglei Sub Hqrs YMA President Pu R. Lalnunthara pawhin hnatlang hi hovin thu tawi a sawi bawk.
Kolasib ah chuan Town PYD huaihawtin Vengthar atanga tanin khawlai thenfai hnatlang neiin kawng kama zun In awm te pawh an tifai nghal bawk. Hnatlang ah hian Diakkawn Pastor Bial leh Venglai Pastor Bial chhung atanga PYD Member thlahnem tak an thawkchhuak a ni.
Siaha Bial Pyd te chuan  Bial huapin an hmang a, Bualpui Ng Road a Bial Pyd ten kumin June thlaa an thingphun bul tifai leh hungthat hna an thawk. Zing dar 10:30 ah Rev Dr. C. Sihmo, Bialtu Pastor in hunserh tawi hmangin hnathawh tan nghal. Mi 70 vel hnatlangin anthawk chhuak a, Pastor Joseph L. Thlauhthang,  Dist Secretary, Evan S. Vanlallunghnema, Dist Missions Secy, Evan R. VL. Dinthara, Home Missionar, Rbt H. Lalduhsanga, Dist Pyd Asst. Secy ten an ho a ni.
Lawngtlai town PYD te pawhin a huhova hmangin Oct 8, Pathianni hmanga General LAD Conference thlenna tur Lawngtlai chanmari kohhran Biak in hmun hma leh a chhehvel tihfai hna an thawk.
Serchhip bial chuan zing karah New Serchhip College peng atanga Serchhip Bazar thleng khawlai dung thenfai hna an thawk a, Member 80 vel an thawkchhuak. Champhai Bial pawhin zing karah Chanem Building leh a chhehvel hnawk thenfai hna thawkin member 70 chuan an thawkchhuak. Khawzawl Bialin Aizawl Road tuisen phai kawng chhia siamin an hnatlang bawk.
Thingtlang local tam zawk chuan zing karah vantlang hmun pawimawh thianfaiin khawlai an fang a ni.
Hriattheih chinah Mizoram pawn Shillong-ah chuan Bial huapa hmangin General PYD President Pastor H.Lalropuia leh Churachandpur District PYD President Pastor K.Lalramdina  ten an hmanpui a, Thlanmual samfai hna an thawk a ni.
Social Work Day hi Kum 1999 khan Saihaa General PYD Conference rorelna chuan hman turin a rel a, Kum 2000 atangin Bial leh local thenkhat ten an hmang tan nghal. Aizawl khawpui chhungah chuan kum 2002 khan City PYD hmalaknain a hu hova thawh tan a ni a, vantlang tana hna tha thawhni a nih avangin sawrkar lama hruaitute nena inbe rawnin a tul anga thawh ho thin a ni.