Oct. ni 3 Thawhtanni khan kohhran thalai pawl Pentecostal Youth Department (PYD) chuan Social Work Day an hmang.
Aizawl khawpui chhungah chuan City PYD hmalaknain Central YMA Hall-Tuikhuahtlangah Aizawl City huam chhunga Pastor Bial 16 ten Aizawl City PYD Coordination Committee bul tumin Thisen pek Runpui an nei a, Aizawl Civil Hospital tan Thisen Unit 143 an pe.
Blood Donation puala inkhawm tawi buatsaihah Aizawl City PYD Coordination Committee chairman Evan. C. Lalchuanga’n programme a kaihruai a, General PYD Secretary Evan. J.H Malsawmdawngliana’n Hunserh a hmangin “Midang tana malsawmna nih hi Ringte tih tur a ni a, kan thiltih engkim hi Pathian ropuina tura tih ni rawh se” a ti. Civil Hospital atanga Doctor leh thawktu ten fuihna thu tawi sawiin lawmthu an sawi a. North Mizoram district PYD Choir te leh Pentecostal Choir ten zaia rawngbawlna an nei bawk. Aizawl khawpui chhung atangin PYD member 500 chuang an kalkawm a, thisen pe tute hi Mipa 122 leh hmeichhia 21 an ni a, avaiin Unit 143 pek a ni. Thisen pe te eitur HDFC Bank Limited ten an tum sak.
Lunglei District ah pawh Social work Day hi Town Area PYD te chuan a huhovin an hmang a, District PYD in a enkawl mek kohhran ram Tarmit-a khaw thlir hnuai tihfai hnatlang an nei a, PYD member 100 chuan an thawkchhuak. Saiha Bial PYD te pawhin a mamawh a piang te hman turin District Hospital ah Thisen Unit 26 an pe a, thisen petute hi Mipa 18, hmeichhia 8 an ni. thisen pe ve theilo ten Damdawiin leh avel ti faiin an hnatlang a, Bial hruaituten Damdawi ina awm damlote kanin damlote leh a awmpuitute tan chhun thingpui leh ahmeh tui an sem bawk. Serchhip bial te pawhin Serchhip JN Hospital tan thisen Unit 29 an pe bawk. North Vanlaiphai Jt. PYD ten khaw chhung side drain an tifai a, Chhiahtlang Joint PYD te pawhin Zinhalkawna zin mite chawlhna hmun an tifai. E. Lungdar Bial PYD te chuan vantlang hmun hma tifaiin Rabung leh Khualen PYD te pawhin vantlang zun in tihfai hna an thawk bawk.
Thenzawl Bial ten Thenzawl hmuna AYUSH Hospital-ah thutthleng thar dahin Bilkhawthlir Bial ten khawchhung leh BDO Office kawng an tifai a, Sekhum PYD te pawhin zing kar atanga khawchhung tihfai hna thawkin chhun lamah Khaw chhehvela thingphun tawh sa samfaiin nilengin an hnatlang bawk.
Mizoram pawna awm Central District PYD-te chuan remchan zawkna avangin Oct. 1, Inrinni khan social work day hi an hmang a, PYD member 70 chuang thawkchhuakin Shillong -a Mizoram House Compound leh Office-ah hnatlang neiin Mizoram House Office tan hian wall clock tha tak an present.
Sussane Downs Boarding School, Khuangpuilam Kolasib a Kohhran School te chuan Social Work day denchhen in ASC Home bul vel samfai hnatlang an nei a, chawhnuah ASC Home naupang te leh SDBS Hosteller ten Kolasib District Civil Hospital Compound phiahfai hnatlang an nei leh bawk a ni
Facebook