North Mizoram District Missions Department Confe. vawi 37 Bilkhawthlir Biala neih turah Bial mipuite inbuatsaihnain a vawrtawp a thleng mek.
Conference hi October Ni 27th – Ni 29th chhung neih tur niin; Bilkhawthlir Hqrs. Biak in -ah Conference nghah a ni anga, Conference Thupui atan “Krista aia Palai kan ni” tih hman tur a ni. District Missions Confe.-ah hian Thuhriltu Pathian mi hman tak tak heng:- Evan. Malsawmdawngliana Missionary, Rev. Lalchuailova, Rev. R. Lalhawia, Evan. Thangropuia leh Rev. C. Lalrammuana te ruat an ni.
——-
Bial Missions Conference tluang taka zawh a ni:
UPC-North Mizoram District huam chhunga Pastor Bial 30 ten Sept. ni 29th atanga Oct. ni 1 chhung khan Bial Missions Conference a rualin an hmang a. Sept. ni 30 Thawhtanni khan an tiak. He Conference hi General hruaitu, District puipa te bakah District Missions Department hruaitute’n chan insemin bial hrang hrang an hman pui bawk. Bial hrang hrang report dawn atanga Confe. rorel tlangpui tarlang ila:
Aibawk Bial: Aibawk Bialte chuan Bial Missions Conference vawi 28 na Falkawn kohhran Biak Inah hmangin Confe. speaker atan Rev Rc Puia hman a ni. Confe. rorel pawimawh zingah Kum 2018-ah kelsih-ah Mission Conf. neih tur niin, Confe. Speaker neih leh tur a ni ang. Kum 2018-ah Bial huap Crusade neih te, Bial Mission Conference Report a Bu-a siam te leh Bial Missions dept. ten mithar 5 tal Krista tana sengkhawm te an rel.
Bairabi Bial: Bairabi Bialte’n Mission Confe. vawi- 36 na Bairabi Bethel Biak inah hmangin Confe. Speaker-ah Evan. Malsawmdawngliana Missionary Lower Assam Field-a thawktu an hmang. Confe. chhung hian General field atanga lokal Unau pahnih Borro Hnamte tan leh An Biak in current wiring nan sum khawnsakin Rs. 20000/– chuang an hmu chhuak bawk.
Confe. chhung hian Pathiani hnathawh, Kohhran leh mimalte kaltlangin alo lang a, Missionary bakah Field member te hmangaihna tuhin silhfen bakah Field member te tuamhlawmna tur thil hrang hrang thilpek nasa takin an pe bawk a ni.
Chawlhhmun bial: Chawlhhmun Bialte’n Bial Mission Confe. Central Jail vengah hmangin Confe. Thupui atan “Chanchin tha hril tura koh kan ni” tih an hmang. Confe. Speaker atan Bialtu Pastor PC Laltlankima hman niin confe. an hlim hle.
Conference rorel pawimawh zual te: Kum 2018 Conf -neihna tur Govt, Complex, Kum 2018-ah General Mission Field ah Missionary pahnih chawm, Bial Mission Dept Revival Crusade buatsaih, Bhutan pual thawhlawm Bawm Local tinah dah tih te an rel.
Dinthar Bial: Dinthar Bial te chuan Bial Mission Confe. vawi 25-na Tuikual N Local-ah hmangin Confe. thupuiah “Chak tak leh huai takin awm rawh” tih an hmang. Thupui hmang hian Bialtu Pastor Rev. C. Laltlanchhuaha leh Bial hruaitute’n hun an hmang a, Pathianni chawhnuah Lalpa zanriah Sakrament an kilho bawk.
Confe. rorel pawimawh zingah kum 2018-ah Dinthar Biak Inah Confe. neih leh a ni anga, Confe. pualin chawnghet tawngtai neih a ni bawk ang. Tin, Kum 2018 chhungin Bial pawn fehchhuah te, Local Mission Department tinin mahni kohhran pawn lamah rawngbawlna in 10 tala neih te an rel a ni.
Headquarters Bial: Hqrs. Bialte chuan Bial Mission Confe. Vawi 34 na Nursery Biak inah neiin, District. Mission Director Rev. K. Lalduhsanga chu Speaker atan hman a ni. Confe ah hian thupui “Chanchin tha hi hril rawh u” tih hman niin; Bial Confe. rorel pawimawh zingah:- Kum 2018-ah Headquarters Biak inah Confe. hman a ni anga, Bial huapin Crusade leh Camping an nei bawk ang. District Home Mission Field-a rawngbawltu an rawih lai chu kum 2018 atan chhunzawmin, Bial chhunga rawngbawlturin tirhkoh dah an rel bawk.
Hunthar Bial: Hunthar Bial ten Bial Mission Confe vawi 4-na Sairangah hmangin Confe. thupui atan “Lithuk lam pan la” tih chu an hmang. Confe Speaker-ah Evan Pc Lalrokima, Gen. Mission Treasurer hmangin rawngbawlna ropui tak a nei. Pathianni tlaiah Pathian thuthlung puanchhuahna Mike service neih a ni bawk.
Confe. rorel pawimawh te: Kum 2018 conference na tur Hunthar local 2.) Zomuantlang tirhkoh thla 7 atan rawih zawm 3.) 2020 ah bial hmingin General Field tlawh ni se. tih te an rel a ni.
Kanghmun Bial: Kanghmun Bialte’n Bial Missions conference vawi 17 na an hmang a, NEI UPC General Superintendent Rev. Lalmalsawma Sailo chu Speaker a ni. Confe. rorel pawimawh zingah kum 2018 khawmpui neihna atan Khawrihnim 2. Kum thar atangin district ah missionary chawm ve nise., Bial pawn fehchhuah nise tih te an rel.
Kawnpui Bial: Kawnpui Bialte’n Bualpui ‘N’ Hmarveng Biak In ah Bial Mission Confe. an hmang a, Conf. rorel-ah hengte hi an passed:- 1. 2018 confe neihna atan Kawnpui Chhimveng Kohhran ruat a ni. 2. Nakum 2018 conference ah Main Speaker neiin Missionary thawk lai ngei hman nise 3. Kohhran din anih theih nana beihpui thlak nise, hemi pual hian tirhkoh rawih nise. 4. Kawnpui bial hian Missionary 2 chawm ve nise. 5. Rastali- Mission Field-ah rawngbawltu quarter sak nise. 6. Missionary Challenge programme bial huapin buatsaih nise tih te an rel bawk.
Kawnpui Bial Missions Confe.-ah hian Bialtu Pastor Rev. C. Lalramthanga bakah Bial leh Local hruaitute’n Pathian thuchah an sawi thin bawk.
Phainuam Bial: Phainuam Bialte’n Missions Conf. vawi 8-na Saiphai Biak inah an hmang. Conf. hi Dist. Secy. Rev. Laltluanga’n hmanpuiin Speaker hna a thawk a, Conf. rorel pawimawh te:-1. Kum 2018 Conference hmun atan Phainuam Bethel. 2. Kum 2018 November thlaah Revival neih te an rel.
Reiek Bial: Reiek Bialte chuan Bial Missions Conf vawi 29 na Reiek Biak inah an hmang a, Conf Speaker atan Rev. H Vanlalchhana ( Upper Republic Bial tu) an hmang.
Rengdil Bial: Rengdil bialte’n Bial Missions conf. vawi-13 na Rengdil Biak inah hmangin Speaker atan Rev.C.Lalrammuana Dist.supt.:N.Mizoram Dist. hman a ni. Conf. Rorel tlangpuite: 1. Kum 2018 bial missions conf. neihna tur Hriphaw 2.Bial huapa Kolalian missions field tlawh leh kolalian missionary quarter Ceiling siam 5.Bial hminga Dist-a Missionary support neih. 6. K.Sarali kohhran leh Kolalian kohhran tan thilpek pek
Conference neih chhung hian Rengdil local Missions dept.in Baptisma khur an siam chu Rev.C.Lalrammuana Dist.Supt.in hawnna neiin, Mi -5 in a kutah sual ngaihdamna baptisma an chang nghal.
Sialsuk Bial: Sialsuk Bial te hian Missions Conf. Vawi 42 na Sialsuk Biak inah an hmang a, Speaker atan Evan JH Malsawmdawngliana, Dist Missions Treasurer hman a ni. Confe. ah hian Kohhran thar din tura nasa zawka hmalak te an rel bawk.
Thenzawl Bial: Thenzawl Bial te chuan Bial Missions Conference Vawi 27 na hmangin Thenzawl Kanan Biak Inah an hmang a, Confe. Speaker atan Rev. Chhiarpuia Dist. Treasurer an hmang. Confe.-ah hian thupui “Chanchin tha hi hril rawh u” tih hman a ni. Conference rorel pawimawh zingah kum 2018 Confe..na tur PWD Veng local 4. Bial Mission dept ten kum 2018 atan missionary pakhat Chawm 5. Dist. Home Missonary quarter ah thilpek nise tih te an rel.
Vairengte Bial: Vairengte Bial te chuan Mission Conf. vawi 25 – na Vairengte South Biak In ah hmangin Confe. Speaker-ah Rev. Zohmingthanzama, NEI-UPC General Treasurer hman a ni. Bial Mission Conf. Rorel tlângpuite : 1. Kum 2018 Bial Missions Conference na hmun tur IOC Veng Local. 2. Phaisen Biak In a Crusade neih 3. IOC Biak In sak tanpuina atan Appeal 4. Kum 2017 District Missions Conference thlengtu tur Bilkhawthlir Bialte hnatlânga puih nise tih te an rel a ni.
Confe. chhung hian Conference rorel thu angin Phaisen hmuna Crusade neihna tur pual Appeal neih a ni a, Rs. 10000 hmuh a ni a, IOC Biak in sakna appeal leh niin Rs. 21585 an hmuchhuak bawk. Confe. rorel thu ang bawkin Oct. ni 3 Thawhlehni khan Vairengte Bial te chuan Dist. Missions Confe. thlengtu tur Bilkhawthlir Bialte Biak in zarzawm hnatlang an neih pui a, membe 25 bawr an thawkchhuak bawk.
Zawlnuam-Bawrai Bial: Zawlnuam-Bawrai bial hi kum 2017-a piang niin Confe. vawi khatna Bawrai Kohhranah an hmang a, Confe. -ah hian Bial chhung rawngbawltu hrang hrang Bro. Pazawna, Evan. Lalrinzuala, Evan. K. Malsawmkima Pastor Incharge, Upa H.D Samuela leh Upa F. Lalawithanga ten rawngbawlna an nei.
Confe. rorel pawimawh zingah Kum 2018 conf neihna tur Bazirung 2. Kum 2018 ah bial hmalaknain Zawlpuiah Crusade neih tih te an rel.
Confe. tiak tuk Sept. ni 2 Thawhtanni khan Bro. K. Lalthlamuana te chhung Kanhmuna mite’n Pathian chawimawina Bawrai localah neiin Speaker atan Rev. C. Lalrammuana N.M.D Superintendent hman a ni. Zawlnuam -Bawrai Bialte’n Confe. hi hlim takin an hmang a ni.
——–
Tun hnaia ruah nasa tak sur avanga leiminin North Mizoram District Phunchawng Biak in a hnawl chu IAS Rtd. Pu Lalthara chuan Phunchawng hmuna a ram tha tak mai Biak in sakna turin a pe a, District hruaitute leh Kohhranhote an lawm hle.
——
SOCIAL WORK DAY: October ni 2 Thawhtanni kha UPC-NEI huapa PYD ten Vantlang tana luanchhuahna ni (Social Work Day) a ni a, North Mizoram District huam chhunga PYD City PYD, Town PYD, Bial leh Local PYD ten report kan dawn atanga Social Work Day an hman dan tlangpui ngaithla ila:-
Social Work Day hmanna pui ber Aizawl City area PYD te chuan Aizawl Lammual Playground bakah mipui thutna hmun tihfai ngaite an tifaia, hei bakah hian Aizawl Civil Hospital hmuna hmun hnawk thenfai ngai leh darthlalang te an tifai bawk.
Aibawk Bialte chuan Social Work Day Bial huapa hmangin Aibawk Playground samfaiin hnatlang an nei a, PYD member thawkchhuak 70 chuang an awm. Hnatlang thawkchhuakte hi Aibawk Bialtu Pastor bakah VC Secretary ten an tawiawm bawk a ni. tlaiah chawhlui an kilho nghal.
Reiek Bial Ailawng Local PYD ten Social work day khan Vantlang hmun pawimawh Health Sub Centre- hmunhmate an tih fai bakah Field-kotlangahte Palchawi (Plant) an phun a, Motor Picup hmanga Lung (Boulder) phurin khawchhung kawng chhe laite an siam bakah Khawlai Bawlhhlawh thenfai hna te thawkin kawngsir hnim vai fai leh Bawlhhlawh paihna khur tihfai hna an thawk bawk a ni.
Hei bakah hian Puk veng Waiting Sheet panna Step tifaiin hun hlim takin an hmang.
Kawnpui Bialte chuan Social work day Kohhran tinah remchan dan anga hmangin anmahni local theuhah khawtlang tan hna thawkin an fehchhuak. Hortoki local ten khawchhung kawngdunga bawlhhlawh thianfaiin hnatlang an nei a; Bualpui ‘N’ Venglai local ten zingkarah khawchhung kawngdung bawlhhlawh thenfai leh an khawchhung hmun pawimawh tak mai ‘Lung Nupa’ leh a chhehvela vantlang zunin te an tifai bawk.
Kawnpui Venglai local ten zingkarah Kawnpui PHC a damlote kanin, ei tur an pek bakah Kawnpui Police station-a khawtlang ralmuanna tura thawktu police leh mitang te kanin, ei tur an kensak bawk. An vengchhunga hmun pawimawh tak, thlanmual hlui panna kawng samfaiin hnatlang an nei tel bawk a ni.
Vairengte Bial PYD te chuan Bial huapa Social Work Day hmangin Vairengte SDPO Complex hmun hma sâm leh thlawfai hna an thawk a, hei bakah hian kawngpui dunga bawlhhlawh awmte chhar fai hna an thawk bawk. Vantlang tana fehchhuah hunah hian member 60 chuang thawkchhuakin Bialtu Pastor Rev. C. Lalthantluanga bakah Upa thenkhat ten an tawiawm bawk a ni.
Kolasib ah pawh Town PYD huaihawtin Vengthar atanga tanin khawlai thenfai hnatlang neiin kawng kama zun In awm te pawh an tifai nghal bawk.
Social Work Day hnatlang hi Tual Upa F Rothangvunga, Chairman, Town PYD Kolasib chuan hawngin PYD te chu mite tana hnawksak zawnga awm lova, mite malsawmna ni tur kan ni a. Hetianga a huhova malsawmna kan nih theihna tura kan hruaituten vantlang tana thil tha tihna ni an lo buatsaih chu thil lawmawm tak a ni tiin, kan Bible in ‘ Thil tha tih i ning suh ang u’ a lo tih angin Social Work Day ah chauh lo pawh mite tana thil tha ti zel tur kan ni tih kan hriat a tul a ni a ti.
Hnatlang ah hian Diakkawn Pastor Bial leh Venglai Pastor Bial chhung atanga PYD Member thlahnem tak an thawkchhuak a ni.
—–
Bawngkawn kohhrana Evan Dr Lalsawivela rawngbawlnaah Pathian hnathawh ropui tak tak a thleng chho zel. Oct 3, Nilainia report kan dawn danin damna chang nghal in report chu mi 1190 an tling tawh.
Upa R. Lalhmangaihzuala, Bawngkawn Kohhran Chairman in a sawi danin, October ni 2 khan naupang kum 8 mi thisen cancer avanga hmundanga beidawng tawh, Kevin Lalrintluanga, Ramhlun North chu an pawm lut a, a mutna tura siam sakah mut a ni chungin a nat tawh em avangin sermon lai leh a hnuah pawh a tap char char a, a ke nate chu khawih sak ngam loh khawpin na a ti tawh a. Evan Dr Lalsawivelan a khawih veleh he naupang tap hi a bang nghal hmiah a. Reiloteah amahin a kal nghal a, “Pathianin min tidam” a rawn ti chhuak a, damlo pantu dang pawh an mittui a lo tla ve phung mai a ni.
Lunglei District Chithar khuaa nu pakhat, fa 3 nei tawh, thin cancer vanga zangthal zawnga thla hnih chhung mu thei tawh lo, a zawna an zawn luh pawh Lalpan a tidam a, amahin zang vahin damlo room a chhuahsan a, damna thu, tap zawih zawihin a puang a ni.
Evan Dr Lalsawivela rawngbawlnaah hian Pathian thiltihmak a thleng nasa hle a. A room chhung an luh chiah a dam nghal te an awm a. Bengngawng, a khuma an thut ruala beng var nghal nia insawi ringawt pawh mi 10 chuang an awm tawh.
Record atanga a lan danin, a sermon atanga an natna dam nghal nia insawi pawh mi 30 chuang an awm tawh a. Phai lam Doctor a beidawng tawh cancer leh natna dang dam ta nia insawi pawh an awm nual tawh. Tun thleng hian chawplehchilha dam nghal nia insawi hi zaa 80 chuang an la ni a. An dam nghal leh nghal loh hriat loh nausen leh fa nei theilo an tam em avangin dam percentage hi a sang thei lo zawk a ni. Tun hnai report langsar zual :
Damlo khawih zat – 1502
Damna chang nghal zat – 1190
Dam zui inbeisei – 249
Dam zinga natna langsar zual te :
Bengngawng – 358
Tawngthei lo bengngawng kawp – 87
Spinal Cord thalo – 19, Nerve thalo – 139, Cancer – 41, Stroke – 20, Mitdel – 4
Sermon atanga dam – 30
———-
North Mizoram District LAD ten nakum 2018 Oct. thlaa Golden Jubilee an lawm turah kar kalta Sept. ni 28 Ningani khan Golden Jubilee committee District Office Committee Room-ah an thukhawm. Golden Jubilee Celebration Committee chairman Sis. F. Rohlupuii Bible Women in a kaihruai a, Golden Jubilee lawmna tura sum mamawh ngaihtuah tur Fund-rising Committee bakah Souvenir Editorial Board an siam.
——–
North Mizoram District huam chhunga Pastor Bial 30 ten Sept. ni 29th atanga Oct. ni 1 chhung khan Bial Missions Conference a rualin an hmang a. Sept. ni 30 Thawhtanni khan an tiak. He Conference hi General hruaitu, District leh District hruaitute’n heng hmunahte hian an hmanpui :
Kanghmun Bialah – Rev. Lalmalsawma Sailo, General Superintendent
Vairengte Bialah – Rev. Zohmingthanzama, General Treasurer
Hunthar Bial -ah Evan Pc Lalrokima, Gen. Mission Treasurer
Rengdil Bialah – Rev.C.Lalrammuana Dist.supt
Phainuam Bial – Rev. Laltluanga, Dist. Secretary
Thenzawl Bialah – Rev. Chhiarpuia Dist. Treasurer
Sialsuk Bialah – Evan JH Malsawmdawngliana, Dist Missions Treasurer
Facebook