Oct 2, 2018 Thawhtanni kha North East India UPC Kohhran thalai pawl Pentecostal Youth Department (PYD) Social Work Day a ni a, India hmarchhak pum huapa hman a ni.
Pentecost Kohhran thlai pawl rorelna sang; General PYD Conference rorelna chuan Kum 1999 khan Social Work Day neih nise tiin a pass a, Kum 2000 atang khan hman tan nghal niin kum tin Oct ni 2-hi India hmarchhak pum huapin Vantlang tana hna tha thawhna ni atana hman chhoh a lo ni ta a ni.
Aizawlah chuan City PYD bultumin Civil Hospital Aizawl, tihfai hna nilengin an thawk a. Chawhma dar 10:30 ah Civil Hospital ah Evan Allan Laldawngliana kaihhruainain tanna hun hman a ni a, Evan. C. Lalremruata’n huhserh hmangin, General PYD Secretary Evan JH Malsawmdawngliana leh Civil Hospital Nursing Superintendent ten thu tawi a sawi a. Aizawl City PYD hmingin Civil Hospital-ah hian Thutthleng sei pali dahin, Evan Lalchhuanmawia Zote, Chairman chuan Nursing Superintendent hnenah a hlan.
Thalai kalkhawmte hi Group hrang hrangah in thenin Civil Hospital Building chhung leh pawn lam fang kualin, Hospital building chhunga ward tin bakah building leh a chhehvel te thahnemngai takin an thian fai a. Aizawl City Area Pastor Bial 15 leh Sihphir Local atangin PYD member 300 chuangin nilengin Hospital leh a chhehvel tihfai hna hi an thawk a ni.
Lunglei-ah chuan Lunglei Town Area PYD Social Work Day Committee bultumin hman a ni a, DTO Office kawtah inkhawm tawi Evan Laldinpuia kaihhruaiin neih a ni a, Rev C.Lalrintluanga’n hunserh a hmang a ni. Khuallin Pu Eddie Zonunkima, UD&PD aiawh chuan thusawina neiin faina chungchangah PYD ten hma an la chu a lawmthu a sawi a ni. Lunglei Town Area te hian Kikawn atanga Venglai inkara Side Drain leh vantlang kawnga bawlhhlawh awmte thenfai hna an thawk a, member 300 chuang an thawkchhuak.
District hrang hrang te hman dan chanchin erawh District rawngbawlna chanchinah tarlan a ni.
Facebook