January 15 a Superannuation Pension-a chhuak Pukpui bialtu Rev. Ralkapkunga Khiangte thlahna chu January 14 Pathianni khan Pukpui biak inah hman a ni.
Rev. Ralkapkunga Khiangte thlahna hun hi Pukpui bial Secretary Evan. C. Lalremchhunga’n kaihruaiin, District Secretary Rev. C. Lalrintluanga chuan Rev.Ralkapkunga Khiangte Service report a chhiar a, Rev. T. Aichhunga, Chairman Pukpui local leh Rev. Ralkapkunga Khiangte ten thusawina an nei bawk a, District Superintendent Rev. R. Lalrosanga chuan thuchah puan chhuahna a nei bawk. Pukpui local PYD leh Pukpui bial PYD zaipawl ten zaia rawngbawlna an nei a, Rev. C. Vanlalena, District Treasurer chuan malsawm tawngtaina in inkhawm a ti tawp a ni. Inkhawmnaah hian thilpek hlanna hun hman a ni bawk.
Rev. Ralkapkunga Khiangte hi District board vawi 190-na chuan March 31 thleng a re-employ a, Pukpui bial hi a enkawl chhunzawm ang.
Rev. Ralkapkunga Khiangte hi Pu Thangkaia leh Pi Mansangi te fa upa ber niin, ni 15 January 1953 khan Chhipphir khua-ah a lo piang a. An unau hi pakua an ni a, January 20, 1987 khan Pi Lalawmawii nen in neiin, fanu pahnih leh fapa pakhat an nei. Pathian thuzir thiamna lamah Bachelor of Theology (B.Th) niin, Lunglei District UPC-ah chuan Pathian thu lama Degree nei kan neih hmasak ber te zinga mi a ni. Ni 12 June 1986 ah Local License pek a ni a, Ni 29 January 1988 ah General License pek leh a ni a, tichuan Ni 4 April 1992 khan Ordination License pek a ni leh ta a ni.
October 1, 1984 khan Office Clerk atan lak a ni a, May 1, 1985 khan Press Manager hna thawk leh in, District Sunday School Director, full time ( Kum hnih) atan March 1, 1989 khan a thawk tan leh a, Pastor title pek nghal a ni bawk. District Mission Director hna January 1, 1992 khan a thawk tan a, December 31,1995 thlengin a thawk leh a ni. Sertlangpui bial Pastor hna January 1, 1996 atangin a thawk tan leh a, chung bakah chuan –
District Treasurer, Secretary leh Superintendent hna a thawh tawh bakah Haulawng Bialtu pastor hna a thawk tawh bawk a, Pukpui Bialtu pastor hna hi a pension thleng hian a thawk a ni.
Rev. Ralkapkunga Khiangte hi Pathian thu thiam tak leh thusawi thiam tak a ni a, rawngbawlna kawng hrang hrang Camping, Crusade, Seminar leh rawngbawlna kawng dang dangah Pathian mi hman tak niin, Pathian rawngbawl ngaipawimawh mi NEI UPC Executive member hi kum 2000 atanga a pension hun thleng hian a thawk bawk. Literature Committee Chairman leh nihna pawimawh hrang hrang a chelh tawh a, Kohhran Lehkhabu hrang hrang engemawzat a ziak bawk a ni.
Facebook