Pennet News Service : September 1 – 8

Executive Board :
Sept ni 4 atanga ni 5 chhung khan NEI UPC Kohhran rorelna sang Executive Board favang thutkhawm neih a ni.

Executive Board ah hian Chhimtuipui District Suptd Rev. Thanchunga Sailo; Nov 15,2019 a pension-a a chhuah dawn avangin a aiawh turin Rev. W.L Thanghre an ruat a, Imphal District Suptd Rev. Thangtinlien Singson; Sept 17,2019 a chhuak tur aiawh turin General Suptd Rev. Lalmalsawma Sailo ruat a ni bawk. Heng bakah hian General Hqrs Administration chungchang thupawimawh hrang hrang an ngaihtuah bawk.

Board ah hian Half Year audit report thlir ho a ni a, Board member atanga pension-a chhuak tur Rev. Thangchunga Sailo, Rev. Thangtinlien singson leh Rev. Lalramzauva Sailo te hnenah thlahna thilpek an hlan bawk.
——
Beihrual thupui zir tan :
Sept 2, Thawhtan zan atang khan kumin atana Beihrual thupui zir tan a ni.

Kumin thuzir bu Thuthlung fate Puitlinna tih hi Rev. Ellic Hnehzova Fanai ziah niin a bu chhungah hian bung 20 a awm a; Thuthlung fa te puitlinna tur kawng hrang hrang thupuiah siamin Kohhran hoten kan hlawkpui ngei a beiseiawm hle.

Literature and Publication Board Chairman Rev. R. Lalrinsanga chuan he lehkhabu kaltlang hian hlawkna leh malsawmna duhawm tak chang theuh turin Kohhran hote duhsakna a hlan a. Hun tawite chhunga zir zo mai lova, inbuatsaihna tha tak nen uluk taka zir theuh turin Kohhran hote min ngen bawk.
——
Thisen pe :
Sept ni 5, Ningani khan NEI UPC Driver Welfare te chuan Executive Board lai denchhenin State Referral Hospital, Falkawn tan thisen an pe a. Hospital tan hian thisen unit 7 an pe thei a ni.
(Pic : Thisen pe)
——
Licence renew :
United Pentecostal Church of North East India Kohhran huamchhunga rawngbawlna Licence kawl zawng zawng ten Kum 2020 atana Licence renew a hun leh tawh avangin District leh Missions Field huamchhunga Licence holder zawng zawngte licence renew turin General hqrs Office atangin General Secretary Rev. R. Lalrinsanga chuan hriattirna a thawnchhuak a ni.

Renewal rate :
Local Licence/Bible woman : Rs. 10
General : Rs. 20
Ordination : Rs. 30
——
ASC Home tanpuina pe :
Vairengte Bial PYD te chuan, kumtina an tih thin dan angin Sept ni 4, Nilaini khan ASC Home tan sum fai leh hmunphiah phiah 45 an hlan a.

Bial chhung PYD Office Bearer ten Home hi tlawhin bialtu Pastor K.Malsatluanga’n a ho a ni.

Gov’t Kolasib College P.A. Deptt te pawhin ASC Home hi tlawhin zir chianna an nei a, tanpuina an hlan bawk.
——
Bial Sunday School Conference :
Aizawl East District chhunga Bial hrang hrangte chuan September 6, Zirtawp zan atang khan Bial Sunday School Inkhawmpui an hmang tan a, Pathianni zan hian a tiak ang.

Bial Sunday School Inkhawmpui-ah hian Bial hrang hrang te chuan Inrinni hian mahni bial chhung inawpna leh Districta lut tur agenda te ngaihtuahin rorel Inkhawm an hmang hlawm. Sunday School Inkhawmpui-ah hian Naupang lamin mal zai, thu leh thu inchhang, Recitation leh Group zai te a intihsiakna neiin Bial thenkhat-ah chuan Puitling lamin Lengkhawm zai leh Puitling Zirlaibu atangin Quiz intihsiakna an nei ve bawk a, Bial thenkhatah chuan intihsiakna awm lovin meet angin an hmang bawk a ni.

Tun dinhmunah Aizawl East District chhungah hian Bial 30 awm mekin Puitling leh Naupanga Sunday School hming ziak  singkhat leh sangriat vel an awm mek a ni. District Sunday School leh Kohhranpui hruaituten hetiang hian Inkhawmpui an hmanpui a ni: District S.S Secretary Evan Hr.Lalrindika chuan Mualpui Bial a hmanpui a, Treasurer Upa Rodailova Zote chuan Sakawrdai bial hmanpuiin ruahmanna ang chuan Rev C.Mawizuala, Director-in Bawngkawn Bial hmanpui tura tih a ni a, accident a tawh avangin a hmanpui thei ta lo a ni. Kohhranpui hruaitute, Rev Rosanga Kawlni, District Superintendent chuan a bial hmui mek, Mualpui Bial-ah a hmang a, Rev Biaksangzuala, Secretary chuan N.Vanlaphai Bial-ah a hmang a, N.Vanlaiphai Bial te hian Inkhawmpui vawi 60-na, Golden Jubilee an hmang nghal a ni. Treasurer Rev Vanlalfela Ramtiam chuan Bawngkawn Bial a hmanpui bawk a ni.
——-

Souvenir tlangzarh :
Aizawl East District in Kum 25 a tlin, Silver Jubilee Souvenir chu September 2, Thawhtanni khan District Hqrs. Biakin-ah tlangzarh a ni.

Tlangzarhna inkhawm hi Evan Lalramzauva, Souvenir Committee Convener chuan kaihruaiin Rev Dokhuma’n hunserh a hmang. Upa Lalthawhmawia, Souvenir Committee Secretary hnen atangin report tawi, Souvenir buatsaih a nih dan te bakah Souvenir chhunga awmte ngaihthlak a ni. Rev Lalmalsawma Sailo, General Superintendent chuan Souvenir tlangzarhna neiin Pathian hnen-ah tawngtaiin a hlan nghal a ni. Rev Lalmalsawma Sailo hian Souvenir buatsaih a ni chu lawmawm tiin ziak-a thil dah that a pawimawh thu ngaihthlak a ni. He hunah hian Rev Rosanga Kawlni, District Superintendent chuan thusawina nei bawkin kalkhawm te chungah lawmthu a sawi a, Souvenir chhiar theihah peih a nihna-ah lawmthu a sawi bawk. Aizawl East District Souvenir tlangzarhna inkhawmah hian Sis Laldinthari hnen atangin Pathian fak hla ngaihthlak niin Rev Biaksangzuala, District Secretary chuan tawngtaiin inkhawm a titawp a ni.

Aizawl East District Silver Jubilee Souvenir tlangzarhna-ah hian Aizawl khawpui chhunga Bialtu Pastor te, Bial hrang hrang hruaitute bakah Pensioner leh Department hrang hrang hruaitute sawm an nih angin mi engemaw zat an tel thei a ni. Souvenir-ah hian Aizawl East District lo pianchhuah dan te, District report bakah Department hrang hrang chanchin te, Pastor te chanchin bakah thil chhinchhiahtlak tak tak dah a ni.

Aizawl East District  hian kumin May 8 khan Kum 25 tlin, Silver Jubilee chu ropui takin a lo lawm tawh a, hetah hian Souvenir hi tlangzarh ni lovin tunah hian mipuite chhiar theih turin tlangzarh alo ni ta a ni.
——–

Retreat :
Aizawl East District PYD zaipawl, Pentecostal Choir te chuan August 29 leh 30 chhung khan District hqrs. Sunday School Hall-ah retreat an nei.

Retreat hi zan lamah hman thin niin Evan C.Lalchhuanga, Chairman Music & Sound Committee chuan kaihruai thinin Rev R.Laltlankima, District PYD President hnen atangin thusawi ngaihthlak thin a ni. He hunah hian Pentecostal Choir member te an telkim thawkhatin sharing hunte hman thin a ni
——
Music School Hawng :
Aizawl East District PYD hnuaia Music & Sound Committee te buatsaih-a Music zirna School, Pentecostal Music School te chuan September 2, Thawhtan atang khan Kum 2019 Session atan Class an tan leh ta.

Class tan ni, Thawhtanni hian inkhawm tawi, Evan C.Lalchhuanga, Chairman, Music & Sound Committee kaihhruaiin neih a ni a, hetah hian Music School-a lut turte hriattur pawimawh chi hrang hrang ngaihthlak a nih bakah Rev R.Laltlankima, District PYD President chuan fuihna thu tha tak sawiin Music zir turte chu thahnemngai taka zir tur te, an thiamna Kohhran tana hmang ngei tura chahin Pathian hnenah Music School hlanna a nei nghal a ni.

Pentecostal Music School-ah hian Kumin-ah hian Tonic Solfa bakah Keyboard leh Guiter zir tel tura tih niin mi 40 chuangin tunah hian Class an kal mek a ni. He Music School-ah hian Aizawl East District PYD member chauh ni lovin District dang atang pawhin zirlai an awm bawk a, Instructor atan Evan F Lalsangliana leh Bro Nelson KVL Chhandama te hman niin Class hi zingkarah September leh October thla chhung an kal thin dawn a ni. He Music School hi kum dangah pawh kalpui tawh thin niin Tonic Solfa chauh zir thin a ni a, kumin-ah hian Keyboard leh Guiter zir theih tura tihchangtlung niin kum lo kal leh turah tihchangtlung chhoh zel tura ruahmanna siam mek a ni bawk. He Music School atang hian mi engemaw zatin an lo zirchhuak tawh a ni.
——–

Lang camp :
August 31, Inrinni khan Thingsulthliah Bial, Sesawng Naupang Sunday School te pualin lang camp buatsaih a ni.

He hunah hian Apostolic Herald Revival Team Speaker,  Evan Vanlalruatsaka leh Team member ten rawngbawlna an nei a ni. Lang camp-ah hian Thlarau Thianghlim dawngthar mi 28 awmin September 1, Pathianni zan khan sual ngaihdamna baptisma mi 8 in an chang bawk a ni. Lang camp-ah hian naupang engemaw zat telin Thlarau Thianghlim awmpuina hnuaiah hlim takin hun an hmang a ni. Evan Vanlalruatsaka leh team member te hian August 20 atang khan Sesawng hmunah hian rawngbawlna an nei a, zing leh zan lamah Kohhran in tinah kut nghah tawngtaina an nei thin a, chhun lam leh hun awl dangah Pathian Thu lama kawm turte zawng kualin an kawm thin a ni. Rawngbawltute hian Sesawngah hian rawngbawlna an la neih chhunzawm zel dawn a ni.
——

Bial Sport :
Upper Republic Bial Sunday School Department te buatsaihin August 31, Inrinni khan College Veng Playground-ah Bial huap Sport hlimawm tak an hmang. He hunah hian Sport Item chi hrang hrang hmangin intihhlimna neih a ni a, Bial chhung atangin member thahnem tak kalkhawmin College veng Naupang Sunday School pakhatna an ni.
——

Thilpek pe :
August 21, Nilaini khan Upper Republic PYD te chuan an kum 25-na tlin, Silver Jubilee pualin State Refrerral Hospital, Falkawn hmuna hman atan Thutthleng sei 5 an hlan. He hunah hian Upper Republic PYD hruaitute telin Hospital hotuten an lo dawngsawng a ni. Ruahmanna ang chuan September 14, Inrinni hian Charity ride neiin ASC Home-ah tanpuina an hlan leh dawn a ni.
——

Mi thar :
August 28, Nilai zan khan E.Lungdar Bial, Leng Kohhranah sual ngaihdamna baptisma mi 9 in chang tharin an zinga pakhat hio Kohhran dang a ni a, sengluh nghal a ni. Leng hmunah hian Evan HMS Dawngkima leh team member ten rawngbawlna an nei a ni.

Kawlkulh Vengthar-ah August 28, Nilai zan khan mi pathumin sual ngaihdamna baptisma changin an zinga pahnih hi Kohhran dang atangin an ni.

Evan Vanlalramnghahmawia rawngbawlna, Bethlehem Bial, Hermon Venghlui Kohhranah pawh August 29, Ninga zan khan mi 2 in sual ngaihdamna baptisma an chang a, an zinga pakhat hi Kohhran dang atangin a ni.
Evan V.Lalramenga rawngbawlna, Thingsulthliah Bial, Darlawng hmunah pawh mi pathumin September 1, Pathianni khan sual ngaihdamna baptisma changin mithar 4 Kohhranah sengluh an ni.

August 28, Nilai zan pawh khan Zohmun Bialtu Pastor B.Lalhmingliana chuan Zohmun Kohhrana lawi turin mithar pakhat Kohhran-ah sengluhna a nei bawk.

Khawbung Bial, Samthanga Evan Lalhmingmawia, rawngbawlna kaltlangin September 1, Pathianni chawhnu khan mi 2 in sual ngaihdamna baptisma changin pakhat hi mithar niin Kohhranah sengluh a ni. Evan Lalhmingmawia hi Bazar Bial Missions Department ten August thla chhung rammu tura an rawih a ni.
——-
District hruaitute Programme :
Aizawl East District hruaitute Rev Rosanga Kawlni, District Superintendent, Rev Biaksangzuala, District Secretary leh Rev Vanlalfela Ramtiam, District Treasurer te chuan September 4 leh 5-a Executive Board neih-ah an tel a. Bial Sunday School Inkhawmpui hman mekah heng hmunah te hian an hmanpui a ni.

Rev Rosanga Kawlni, District Superintendent chuan Mualpui Bial-ah a hmang a
Rev Biaksangzuala, District Secretary chuan N.Vanlaiphai Bial hmanpuii
Rev Vanlalfela Ramtiam, District Treasurer chuan Bawngkawn Bial a hmanpui bawk a ni.
———-
Chhimtuipui District :

Chhimtuipui Dist chhung local hrang hrang te chuan Sept 01, Pathianni khan thlaithar kut an hmang a. Local thenkhat chuan chhang ruai nen hun hmangin, Kohhran hoten Pathian fak nen leh infuihtharnan hun an hmang.
——-
Seminar :
Sept ni 7, Inrinni khan Tuipang V localah  LAD te buatsaihin Leadership leh Buhfaitham tih thupuiah hmangin seminar neih a ni a, Resource person atan Bialtu pastor MH Robin Lalthanmawia leh Upa B. Dingliana Bial secretary te ruaiin LAD member ten an hlawkpui hle.
——-
Evangelism Tour :
Sept 07 – 08 chhung hian Chhimtuipui Dist PYD chuan Evangelism tour thawhkhatna a kalpui a, he tour ah hian South Lungpher bial, Siaha bial leh Niawhtlang bial PYD hruaitute an fehchhuak dawn a, Team hnihah inthenin; Team 1 ten Bualpui NG local, Bualpui NG Bial ah rawngbawlna an nei a, Team-2 ten Tuipang L local, Tuipang bial ah rawngbawlna an neive thung a ni.
——–
Lehkhabu tlangzarh dawn :
Sept ni 08, Pathianni hian Rev.L.Chunglinga lehkha bu ziah “Ka rawngbawl chhunga Pathian malsawmna ka dawn leh ka thil tawnte” tih chu College Veng local Biak In ah Rev.Thanchunga Sailo Dist superintendent chuan a tlangzarh dawn a ni.
——–
Zin chhuak :
Sept ni 8, Pathianni hian Kum
2020 Dist.Missions Conference thlenna Niawhtlang localah Dist Mission Director Rev.Dr.C.Sihmo leh Dist secretary Upa John VT Hniehu te chu an fehchhuak a, Conference thlenna tur atana thil tul hrang hrang an buaipui dawn a ni.
———
Lawngtlai West District hruaitute Programme :
Lawngtlai west District
Supdt.

Rev.R.Ramthatzawla chuan Sept 3 atanga 6 chhung khan Aizawlah Executive Board neiin hun a hmang.

Dist.Secretary

Pastor Lalsawmliana Sailo chuan Sept 8, Pathianni hian Lawngtlai College veng kohhran ah rawngbawlna a nei ang.

District
Mission Director

Rev.F.Lalbiak?huama chuan Pathianni zingah Chandamry Kohhranah hun hmangin zan lamah Council vengah rawngbawlna a nei thung ang.
——–

Lunglei District :
Book Room hawng :
Aug.30 zirtawpni khan Lunglei District-in Book room-a siam thar ‘Pentecostal Book Room Lunglei District’ chu Literature Committee Chairman Rev.Ralkapkunga Khiangte chuan Pathian hnenah hlanin a hawng.

Book Room hawnna hi District Secretary Rev.PC.Lalfakawma chuan a kaihruai a, District Superintendent Rev.C.Vanlalena chuan thusawina neiin, Literature Committee Chairman Rev.Ralkapkunga Khiangte chuan hawnna a nei chhunzawm a ni.

He Book room hi Literature Committee ten District Board-ah siam nise tia an ngen angin District Board Committee-in a pawmpui hnuah chak taka hma lain Lunglei District UPC Office-ah siam a ni a, lehkhabu tha tak tak lei theih tur a chhawpchhuah nghal a ni.

He book room tlangzarhna ah hian District UPC Office Staff-te bakah Literature Committee members te leh Town area-a bialtu Pastor-te an tel a ni.
——-

Quarters hawng :
Sept.2 thawhtanni khan Lunglei Dist.UPC in Farm veng ram a Quarters an sak chu Dist.Superintendent Rev.C.Vanlalena’n Pathian hnenah hlanin a hawng.

Quarters hawnna neih hnu hian Quarters chhungah hun hman a ni a, Dist.Treasurer Rev.C.Lalrintluanga chuan kaihruaiin, Upa Zoramdina Ralte, Building & Property board chairman chuan Quarters sak dan report a pe a, Dist.Superintendent Rev.C.Vanlalena, Dist.Secretary Rev.PC.Lalfakawma ten thusawina neiin, Pukpui bialtu Pastor Rev.PC.Nghakliana chuan tawngtainain hun tawp a khar .

Quarters hawnna ah hian office-a thawk tute bakah town area-a bialtu Pastor-te an tel thei a ni.
——

Sept.7 leh 8 chhung hian Lunglei District Missions Director Rev.R.Vanlalenga chuan District Missions Field Bualpui V ah rawngbawlna a nei dawn. Bualpui V ah hian Evan.R.Lalrokhawma chu Home Missionary-in a awm mek a ni.
—–

Campaign :
Lunglei District Thianghlimna Committee-te chuan Local hrang hrangah Campaign an nei mek zel a, Sept.1 Pathianni khan Campaign hi Muallianpui Local-ah neih a ni a, District Secretary Rev.PC.Lalfakawma chuan chawhma inkhawm leh chawhnu lama Seminar neih ah te hun hmangin zan lamah District PYD President Evan.V.Lalduhawman thusawiin zai thiam HC.Lalengzami chuan Campaign neih chhung hian zaiin rawngbawlna a nei thin a ni.

Sept.1 Pathianni khan Haulawng bial Thianghlimna Committee hruaitute chuan bial chhung Local hrang hrangah Thianghlimna Campaign an nei bawk.

Sept.8 Pathianni hian Chawngtui S Local-ah campaign hi an nei leh dawn a, Evan.Lallawmsiama leh Thianghlimna Committee Secretary Evan.T.Lalzawmsanga ten hun an hmang ang a, HC.Lalengzamin zaiin rawngbawlna a nei bawk ang.
——–

Teachers Day :
Sept.5, Ningani kha Teachers Day anih angin, Lunglei District UPC-in a enkawl Christian Education Centre (CEC) School chuan an School tualzawlah he Teachers day hi an hmang.

Teachers day hmanna inkhawm Vice Principal Evan.Lalrinmawia chuan a kaihruai a, Principal P.Samson Vanlalfela chuan thusawiin Student-te atangin Solo, Group zai, lam leh Special Item hmuhnawm tak tak thlir ho a ni a, Student-te hian zirtirtute thilpek an hlan bawk.
——–
Seminar :
Sept.1 Pathianni khan Sertlangpui bial LAD rorel bawhzuiin Thuampui Local-ah Thianghlimna Seminar neih a ni a, members 30 vel an kalkhawm a, resource person atan bialtu Pastor T.Zahmingliana chu hman a ni. He hunah hian LAD mai bakah rawngbawltu, Upa leh tirhkohten an tawiawm a ni.
——
Mi thar :
Sept.1 pathianni zan khan Thuampui Local-ah mi thar 1 kohhranah seng luh a ni a, Pukpui Local-ah pawh mi thar 1 Sept.1 pathianni chhunah khan seng luh a ni bawk.
——
Thlaithar kut :
Thingsai bial chhunga awm Bualpui H leh Tarpho Local-te chuan kumtina an tih thin angin Sept.1 Pathianni khan Thlai thar kut an hmang.

Bulapui H Local-te hian an Thlai thar kut hmanna kal zelah Sept.2 thawhtanni khan ruai thehin hlim takin an hmang chhunzawm a, Tarpho Local-te pawn zaikhawmna te neiin hlim takin hun an hmang ve bawk. Tarpho Local-te hi bialtu Pastor H.Lallawmsanga chuan a hmanpui a ni.

Thlai thar kut hi Aug.31 inrinni khan Cherhlun Local-ah pawh hman a ni a, kohhran hoten an thlai thar neih ang ang kengkhawmin  sumah chantir a ni a, cheng engemawzat an hmu chhuak a, zaikhawmna te neiin hlim takin hun an hmang a ni.
——–

Joint Revival :
Aug.30 zirtawp zan atanga Sept.1 Pathianni zan thleng khan Bunghmun bial leh Thenhlum bial te chuan Sesawm Vengchhak Local-ah Joint revival hlim takin an hmang. He revival-ah hian Upa Lalkeuva, Bunghmun bial SS Director, Evan.Rohlupuia Thahlun, Laisawral Home Missionary, Evan.P.Lalhunthanga, Thenhlum bial Secretary, Pastor PC. Zion Rammawia, Thenhlum bialtu Pastor, Upa C.Lalhlupuia, Thenhlum bial Treasurer leh Pastor Lalengzauva Bunghmun bialtu Pastor ten thusawina an nei thin a ni.

He Joint revival-ah hian Thenhlum bial atangin mikhual 90 vel an kal a, Bunghmun bial atang pawhin member thahnem tak an kal bawk.
——–

Cherhlun bial Missions Department-te chuan September atanga November thla chhung hian New Ngharchhip Local-ah rawngbawlna neih nise tia an rel bawhzuiin Sept.1 atang khan rawngbawlna hi neih tan a ni a, rawngbawl tur hian Bro.Lalrokima Chhangte, Theiriat Local chu hman a ni.
——-
Thisen pe :
Aug.30 zirtawpni khan Chhipphir bial PYD te chuan bial Conference rorel bawhzuiin Mualthuam Electric Local Sunday School Hall-ah mamawhtute hman atan thisen an pe a, thisen hi Civil Hospital, Lunglei a thawktu ten a hmunah kalin an lak chilh a ni.

Chhipphir bialte hian Thisen hi Unit 36 an pe a, Mipa 31 leh Hmeichhia 5 in an pe a ni.

Sept. 4 nilaini khan Pukpui Local-te chuan an Diamond Jubilee Sept.9-a lo thleng tur lawmna kal zelah Christian Hospital Serkawn-a hman turin Thisen an pe bawk.
——-
Jubilee lawm :
Sept.4 nilai zan atang khan Pukpui Local-te chuan Sept.9 thawhtannia an Local Diamond Jubilee lo thleng tur hlim taka an hman theih nan Crusade an buatsaih a, Speaker atan Chengpui Home Missionary Evan.Simona Hmar an hmang a, Lalngilneiin zaia rawngbawlna neiin a hmanpui bawk. He Crusade hi Sept.8 Pathianni zan thleng hman a ni ang.
———

Quarters hawng :
North Mizoram Disrtrict huam chhung Home Missions Field, Dilzawl Missionary Quarters chu Sept ni 1, Pathianni khan District Missions Secy. Evan. R.K vanlalngaia’n Pathian hnenah hlanin a hawng.

Dilzawl Missionary Quarters hawng tur hian Aizawl atangin Evan. R.K Vanlalngaia, Dist. Missions Secy leh Dist. Missions Staff  T.Upa H. Thantluanga te kalin Lengpui Bial Missions Director Upa Rodailova leh Lengpui Local Missions Treasurer Sist. Madini  ten an tawiawm bawk.

Quarters hawn Programme hi  Sept ni 1 Pathianni chawhma inkhawmah tanin Dilzawl Missionary Evan. H. Lalnunzira’n inkhawm a kaihruai a; Dist. Missions Secy. Evan. R.K Vanlalngaia’n rawngbawlna neiin kohhranhote fuihna thu tha tak a sawi a ni.

Inkhawm banah Missionary Quarters hawnna inkhawm neih chhunzawm a ni a, Quarters pawn lamah inkhawm tawi hmangin; Dist. Missions Secy. Evan. R.K Vanlalngaia chuan Pathian thu chhiarin sawi zauna a nei a, chumi hnuah Dilzawl Missionary Quarters chu Lalpa Isua Krista hmingin a hawng ta a ni. Tlai lamah Quarters thar lawmna ruai kohhranhote’n an kil ho bawk a ni.
——–

Rammut report hrang hrang :
1. North Mizoram District huam chhunga Rammut chhunga Member thar neih tamna ber Rengdil Bial Tumpanglui khuaa rammut Programme hman chu Pathianni kalta Sept ni 1 khan khar a ni.

Tarlan tawh angin Tumpanglui khua hi Pentecost kohhran awmlohna khua a ni a, Aug ni 8 khan he khuaah  hian Rammu turin Rawngbawltute Sist. J. Lalmuankimi Speaker,  Bro. Paul LaLrambeiseia, Bro. Lalawmpuia, Sis. Lalhriatkimi leh Sist. Sanghnuni  te lutin rawngbawlna an nei a, Rammut thla an hman chhungin Sept ni 1 thleng khan Pentecost kohhranah mithar 106 sengluh a ni.

Tumpanglui khuaa Rammut rawngbawlna hi Sept ni 1 khan khar niin; kohhranhote enkawlzui an ngaih avangin Rengdil Bial Missions Deptt. in District Missions Deptt. hnenah rawngbawltu dah chhunzawm turin ngenna a thlen a,  District Missions Department Executive meeting Sept 29-a neih chuan Rengdil Bial Missions Dept. ngenna chu ngaihtuahin September ni 1 atanga thawk tan turin Sist. Lalhriatkimi Kawnpui chu Casual Worker atan a dah nghal a ni. (Pic. Tumpanglui khua)

2. North Mizoram District Revival Team Apostolic Revival Team te chuan Aug ni 19 atanga Sept 1 chhung khan Hunthar bial Edenthar kohhranah Ram mut thla den chhenin Crusade neiin rawng an bawl a. He Crusade ah hian Ram beih chu thupui berah neiin Chhun leh zan zawmin rawngbawltute mi inah lengin Pathian thu sawipuina an nei thin a, mual inkhawm tum 3 an nei bawk. An rawngbawlna Lalpan mal a sawm a, Pentecost mi la ni ngai lo  chhungkaw khat member 4 leh mi dang 2 an vaiin member 6 Lalpan mithar rawngbawltute hi a pe a ni.

Heng mitharte hi Sept ni1 Pathianni zan inkhawm khan Team Speaker Evan.T.Vanlalruatan kohhranah lawmluhna a neiin Baptisma chantirna hi Aug ni 25 Pathianni khan a lo neih tirh tawh bawk a ni.

3. Rengdil Bial, Rengdil Kohhrante chuan mithar chhungkaw 2, member 9 awmna chu an rawngbawlna kaltlangin Pentecost kohhranah an seng lut.

Rengdil kohhrante hian Rammut thla hman dan tur Programme mumal tak duangin chanchin tha hril hna uar zawka thawkin an rawngbawlna kaltlang hian heng mithar te hi pek an ni a, Sept 1, Pathianni chawhma chawhma inkhawmah Pentecostl kohhrana Lawmluhna Bialtu Pastor C.Lalthlengliana’n a nei a, Isua Krista hnena Nau hlan – 6 an awm bakah Inkhawmbanah   mi -2 in sualngaihdamna baptisma Lalpa Isua  an chang nghal bawk.

4. Dinthar Bial PYD te Thla kalta Rammut thla hmanga Sumsuih Bial Chawilunga an rammut na chu tih tawp niin; rawngbawlna an neih chhung hian mithar 3 an seng lut.

Dinthar Bial PYD te rawngbawlna kaltlang hian Aug.ni 25 khan mithar 2 an lo lawmlut tawh a, rawngbawlna kal zelah Pathianni kal tak Sept., 1chawhma inkhawm khan Evan. Vanrammawia’n mithar pakhat dang lawmluhna  a nei a ni. Dinthar bial PYD ten Chawilunga rawngbawlna an neih chhung hian  Sumsuih bial atangin Mission Dept. OB ten an rawn inkhawm pui thin a, Dinthar bial PYD te an lawm hle.

5. Damparengpui Bial chhungah Aug thla kal ta Rammut thla chhung khan mithar 35 Kohhranah an senglut.

Heng mithar te hi Bialtu Pastor R. Thanglura leh District in a rawih mek  rawngbawltu Gospel Lalrinmawia te bakah District Missions Director Rev. C. Lalthantluanga te rawngbawlna kaltlanga neih te an ni hlawm a, rawngbawltute inpekna Pathianin mal a sawm a, Bial mipuite pawh an lawm hle a ni.

6. Tlangsang bial leh Tlangsang kohhran tangkawpa rammut programme kal zelah zanin Aug ni  31 Inrinni zan khan  mithar 11, puitling 6 leh naupang 5 an vaiin member 11 chu bialtu, Pastor K. Ainawna’n Kohhranah a senglut. Hemi rual hi nau 5 Lal Isua hnenah hlan nghal  a ni bawk.

Zomuantlangah hian Sept 1 khan  Bro Lalthana te chhung Zomuantlang Kohhran Secy. te chuan Pathian chawimawina neiin; Pathianni Chawhma inkhawm banah member thar lawmluhte’n Sual ngaihdamna  baptisma chan tir a ni a, Zan inkhawmah member thar lawmluhna neih leh a ni bawk.

Rammut programme atang hian member thar 4, puitling 2 leh naupang 2 lawmluh  an lo ni tawh a, an vaiin  member thar 15 an lo ni ta a ni.

Tlangsang Bial leh Tlangsang kohhrante’na rammut Programme an hmanah hian rawngbawltu Rev C. Lalhmingthanga leh a fapa C. Ramhlunmawia te rawih niin; Aug. 21 khan tihdam rawngbawlna neiin; he rawngbawlna hian Aug 30 thleng a awh a ni. an rawngbawlna atanga damna chawp leh chilha damna chang nghal mi 64 an awm. He rawngbawlna uap hian a tir atangin Pastor K. Ainawna leh Bro Ramtharmawia ten riah chilhin an kaihruai a. Rawngbawltute hi Missions field worker Sis F. Lalsiamliani quarters ah an inkulh a ni.

7. Mamit  Bial chhung awm High School Veng Kohhran te chuan Rammut thla denchhenin ” Chhandamna Crusade” an buatsaih a, Bialtu Pastor Vanlalruata chu crusade Speaker atan hman a ni. Bial Hqtrs Kohhranah pawh Rammut thla denchhenin rawngbawltute Group 3 a inthenin Home visit an nei thin a, Kohhran ten an hlawkpui hle. Phaizauah pawh Mi thar 4 Kohhranah senglut in, Bialtu Pastor kutah mi 3 baptisma chang tharin nau pakhat hlan a ni. Damdiai- Bial Missions Department chuan Crusade buatsaihin Home Missions Revival Speaker, Tirhkoh Lalthianghlima chu Crusade Speaker atan hman a ni a, mi thar 3 Kohhranah an senglut.
——

Work Camp :
Chaltlang Bial, Chanmari  PYD ten North Mizoram District Missions Field Vawngawnzo Biak in Work camp-a an sak, sum leh hmaraw indaih lohna avanga an chawlh san lailawk chu remchang hmasa bera chhunzawm atan Rs. 200000 budget siamin hma lak leh an tum.

Chanmari Local PYD ten Vawngawnzo Biak in sak hna hi a thawhkhatna Aug ni 13 khan an lo tan tawh a, Biak in hi a RCC-a sain a ban leh tie beam te chhung zo tawhin remchang hmasa berah chhunzawm leh an tum a ni.
——-

Jubilee lawm :

North Mizoram District, Rengdil Bial Hriphaw Kohhran LAD te chuan Aug ni  30  Zirtawpni khan kohhran LAD atanga kum 50 an tlinna Golden Jubilee an hmang.

Golden Jubilee lawmna Programme hi chawhma dar 10-ah tanin Hriphaw Local LAD President Sist. Sailothangi’n inkhawm a kaihruai a, Golden Jubilee lungphun hawnna Rengdil Bialtu C. Lalthlengliana’n a nei a ni. Jubilee lungphum hawn zawhah Jubilee dar vuak niin; Biak in chhungah Bialtu Pastor C. Lalthlengliana vekin jubilee thuchah sawiin rawngbawlna a nei bawk.
Inkhawm banah Jubilee lawmna ruai kohhrante’n an kil ho bawk a ni.