Pennet News Service : Sept 6 – 13

UPCNEINEWSSERVICE SEPT 6-13.2020
———-
General Hqrs Office khar :
Mizoram sawrkarin AMC area Sept 11-17 chhung partial lockdown a puan avangin General Hqrs Office, Mualpui Salem veng chu khar a ni.
———-
Golden Jubilee :
Sept ni 8, Thawhlehni kha Calvary Bible College Shillong-kum 50-na  Golden Jubilee a ni a, Sept ni 5th – 8th hun chhungin lawmna hun hman tura ruahman a ni a, hri pui leng avangin lawm theih a ni ta lo a ni.

CBC Chaplain kaihhruainain Sept ni 8 chawhnu dar 2:30 pm ah khan CBC Day pualin CBC hall ah tawngtaina leh lawmthu sawina hun an hmang.

Calvary Bible College hi UPC International-hnuaia India rama Missionary a rawn awm, Rev. Harry E. Scism chuan kum 1970 khan Uttar Pradesh-ah bul tanin, Mizoram atang pawhin mi thahnem takin Pathian thu an zir thin a, Kum 1973 ah Shillong, Menghalaya ah sawn niin Graduate in Theology (G.Th) Degree hlan thin a ni. Kum 2005 atang khan B.Th level-ah upgrade a ni. Kumin session-ah hian zirlai 42 an awm a, Final year 13, 2nd year 13 leh 1st year 16 an ni.
———-
Missionary Day thuchah thawn chhuak :
September ni 25, Zirtawp ni hi Missionary Day a nih angin General Hqrs atangin General Suptd ziah, Missionary Day thuchah thawn chhuah a ni.
———

Sunday School Executive Meeting :
Sept 7, Thawhtanni khan General Sunday School Department Executive Comtt an thukhawm a, meeting hi Rev. R. Laichhingpuian a kaihruai.

Meeting- hian kumin kum tawp exam question siam dan chungchang leh kum thara Sunday School zirlai bu chungchang ngaihtuahin hetiangin ruahmanna a siam :
Zirlaibu chungchang :
Naupang Sunday School zirlai kumina an zir kum3-na hi km 2021 ah zir tur a ni. Puitling Sunday School zirlai erawh Rom hrilhfiahna, Rev. R. Lalrinsanga ziak zir tur a ni.

Exam question :
Kumin 2020 Exam question hi District office-ah soft copy a thawn chhuah tur niin, a mamawh tur ten mahni mamawh zat order mai tur a ni.

General Sunday School Board :
October thlaa neih thin chu kumin hian a neih theih dawn loh avangin November Pathianni tawp bera General Conference neih ruala neih nise.
———–
Manigong School Meeting thuchhuak :
Sept 8, Thawhlehni khan General Missions Director room-ah Pentecostal English School chuan meeting an nei. An thurel tlangpui te :
1. Admission fee leh monthly fee siam thar pawm a ni a, Kum 2021 session atangin hman tan tur a ni.
2. School uniform kawr var atana hman mek chu manigong sik leh sa a zirin thlak tura pass a ni ac Principal leh staff ten uniform thar tura an rawt chu pawm a ni.
3. Zirtirtu indaih lohna thlirin lak belh tha tih a ni a, mi pathum lak an ni.
4. School naupang pun zel avangin building awmsaah an leng tawh lova, chuvangin building zauh hna thawh nise.
———-
District hrang hrang rawngbawlna chanchin :

Aizawl East District
Bial Sunday School Inkhawmpui:
Aizawl East District chhunga Bial hrang hrangah ruahmanna ang chuan September 11 atanga 13 chhung hian Bial Sunday School Inkhawmpui hman hun tur a ni a, kuminah erawh hri leng mek avangin Bial Sunday School inkhawmpui hi kum danga hman thin angin hman theih a ni dawn lo. Kum dangah chuan naupang lamin Pathian thu leh hla hmanga intihsiakna neiin puitling lamin quiz emaw lengkhawm hla hmangin intihsiakna hi an nei thin a, kuminah erawh heng zawng zawng hi kalpui lovin bial engemaw zat chuan rorel inkhawm chauh nei turin ruahmanna an siam a, hetah hian sawrkarin dan a siamte zawm ni se an ti hlawm bawk a ni. Bial thenkhat chuan September 12, Inrinni hian rorel inkhawm an nei anga, Bial thenkhatah erawh September 13, Pathianni-ah rorel inkhawm hi an nei thung dawn a ni. Bial Sunday School inkhawmpui hi hri leng mek avangin District Sunday School Hruaitute pawhin hmun dangah hmang lovin an awmna Bial theuh-ah an hmanpui dawn a ni. Rev HL.Thakunga, Director leh Evan Hr.Lalrindika, Treasurer te chuan Bazar bial-ah an hmang anga, Evan C.Laltanpuia, Secretary chuan Thuampui bial-ah a hmang ang.

District Board:
Aizawl East District Sunday School Department hnuaia rorelna sang, District Board chu September 16, Nilaini hian ruahmanna ang chu neih tur a ni. District Board hi District Committee room-ah neih tur niin Bial leh Official atanga agenda lut te ngaihtuah a ni ang. Hri leng avanga District Board neih theih a nih dawn loh chuan a ranglama inhriattir leh tur a ni ang.

Mithar leh baptisma chang thar:
Rammut rawngbawlna report dawn belh zel niin August thla, Rammut thla khan Khawzawl bial-ah mithar 7 neiin sual ngaihdamna baptisma chang thar an awm bawk. August 19, Nilaini khan mithar 6 Khawzawl Kawnzar Kohhranah sengluh niin an zinga 3 hian Bialtu Pastor, Rev.C.Lalmalsawma kutah sual ngaihdamna baptisma an chang nghal a ni. August 30, Pathianni khan Khawzawl Venglai Kohhranah mi 5 in sual ngaihdamna baptisma Bialtu Pastor kutah hian chang lehin an zinga pakhat hi mithar a ni.

Khawlian bial-ah pawh mithar bakah nau hlan rawngbawlna neih a ni. September 6, Pathianni khan Bialtu Pastor Robert Lalrinsanga chuan Khawlian Kohhranah nausen panga hlanna a neih bakah Kohhran dang atangin chhungkaw khat, member 7 awmna chu Khawlian Local-a lawi turin sengluhna a nei bawk a ni.

Keifang bial rawngbawlna:
Keifang bial, Maite Kohhran te chuan hri leng avanga Lock Down a nih a, inkhawm theih a nih loh avangin Pathian thu puanchhuahna, Mike Service hlawhtling takin an nei mek zel. Mike Service hi tun hun thleng hian vawi 13 nei tawhin PYD te chuan Evan MH. Laldingngheta, Upa K. Lallawmpuia leh Bro. Hmingthanpuia te kaltlangin vawi thum Mike Service hi an nei tawh a, LAD te pawhin Group-ah inthenin, Estheri Group ten a thawhkhatna atan Speaker-ah Bro. H.Laltlanzela kaltlangin vawi thum Mike Service hi an nei tawh a, a thawh hnihna atan Upa Lalnunzira, Upa K.Lallawmpuia, Bro H. Laltlanzela leh Bro, Hmingthanpuia te kaltlangin vawi li Mike Srvice hi an nei leh bawk a ni. Heng bakah hian mimal thahnemngaiha avangin vawi engemaw zat, Bro H.Laltlanzela kaltlangin neih a ni bawk. Mike Service neih atang hian Kohhran ten hlawkna ropui tak changin mi 4 in sual ngaihdamna baptisma Evan, K. Laltlanmawia kutah an chang a, Nau pathum hlan a ni tawh bawk. Mike Service hi neih chhoh zel tura ruahman a ni.

Keifang Local-ah, July 26, Pathianni khan, mi 3 in sual ngaihdamna baptisma Bialtu Pastor, Rev Lalrema kutah an chang a, Nauhlan rawngbawlna nei nghalin, mi pathum hlan nghal a ni.
————
Chhimtuipui District :

Thlai thar kut hman niah mi thar 28 Kohhranah seng lut :
1. Niawhtlang localah member thar 25 lawmlut:-

Sept 6, Pathianni khan United Pentecostal Church Of North East India Chhimtuipui District Niawhtlang Local ah mi thar 25 chhungkua 6 aṭang seng luh an ni. Member thar seng luhna hi Upa N Thatheia local chairman in a kaihruai a, Bialtu Pastor V.Lalhlimpuia’n Kohhranah seng a seng lut. Bial Secretary Evan HC.Hmingtinthanga hnen atangin thutawi kohhran kal phung leh inkaihhruai dante ngaihthlak a ni bawk. He hun hi District Evangelist Evan N.Thanghnuna leh Tualchhung rawngbawltu te bak ah LAD member eng emaw zat in an tawiawm a ni.

2. Phura Local ah chhungkua 1 seng :
Sept 6, Pathianni vek khan Phura local UPC NEI, CTP Dist local member ni turin chhungkaw 1 member 3 te chu Upa H.Vanlalzuia local Secretary in  Kohhranah a seng lut bakw.

Hripui leng karah Dist kohhrante chuan malsawmna tam tak dawngin Biak In engemaw zat sak ṭhat mek a ni a, Pastor quarters leh hall engemaw zat sa ṭhain, mission field Biak In leh missionary quarters engemaw zat sak mek a ni bawk. Sum leh paiah pawh kohhran member tinte leh chhungkua tinte ṭhahnemngaihna avangin nikum 2019 kum chanve thawhchhuah aiin, kumin 2020 kum chanve thawhchhuah chu nasa takin hma an sawn a ni. Dist kohhranpui pawh nasa taka ṭan lain, Biak In sak ṭanpuina leh Quarters sak ṭanpuina atan nasa takin an luangchhuak bawk.

Tun August thla leh September thla chhung hian District chhung bial hrang hrang atangin member thar 125 Kohhran ah seng luh an ni tawh.
———

Sept ni 05 leh 06 khan Niawhtlang local leh Siahatla localah Dist PCD hmalakna Live Record Home music singing competition a intihsiakna a zat chuh top 3 tehnenah lawmman hlanna neih ani. He lawmman hlanna hi Dist PCD chuan kaihruaiin, top-3 tehnen aṭang zai mawi tak tak ngaihthlak ani a, Siaha sectional Pastor C Lalchhuanthanga leh Niawhtlang sectional pastor V Lalhlimpuia hnen aṭang lawmpuina thu ngaihthlak ani.

Lawmman hian citation + Medal + Sumfai akeng tel ani.

He intihsiakna ah hian category 2 ah ṭhen niin Category-1 kum 11 chung lam ah
Judy Hatvanlalmalsawmkimi  Dist Hqrs local chu pakhatna niin, category 2 kum 10 hnuai lamah Sofia Lalnghakrengi Niawhtlang lical chu pakhatna a ni.
———–
Thlai thar kut hmang :
Chhimtuipui District kohhran techuan Dt.06.09.20 Pathianni hian an remchan angin Thlaithar kut an hmang. Report kan dawn chinah:-

1. Tuipang Bial chhung local hrang hrang he hun hi hmangin, Tuipang V local techuan thlaithar  kut hi Dar 11 hmangin, thawhlawm lilam ani a Rs.5000/- chuang hmuh a ni.

2. Siaha bial chhung lical ṭhenkhat ah pawh hehun hi hman niin, Siahatla local ah Pastor C Lalchhuanthanga sectional Pastorin hunserh hmangin, thlaithar lilam na hun hman a ni.

3. Niawhtlang bial ah pawh he hun hi hman niin, kohhrante an hlim hle.

4. South Lungpher Bial chhung local ṭhenkhatah pawh he hun hi hman niin, Cheural local techuan Upa Tlangchunga Inah thlaithar dahkhawmin lilamna hun hman ani.

5. Bualpui NG Bial ah pawh he hun hi hmanani. Bualpui Ng lical, Archhuang leh Vawmbuk ah hun hi hman ani.

6. Sangau bial chhung Sangau I leh Sangau II localte chuan Biak Inah thlaithar dahkhawmin atihralna hun pawh hman nghal ani.
——-

Beihrual :
Dist chhung local tam zawk chuan beihrual hi hmangin local ṭhenkhatah chuan Biak In ah an hmang thei a, local ṭhenkhat erawhchuan group ah inṭhenin hun anhmang ve thung.
———-
Work Camp :
Sept ni 8, Thawhlehni atangin Chhimtuipui District chhung Bualpui Ng Bial Tialdawngilung  Biak IN sak chhunzawm a ni. Bial PYD ten Tunkar chhung Work Camp nei turin Vawiin Dt.08.09 atangin Memnber tha hnem tak Tialdawngilung ah hian an riak lut ani.
————-
Hnatlang :
Siaha Bial PYD chuan Dt.05.09.20(inrinni) khan Siahatla II huamchhung, Ephatha Biak In aṭanga KVK inkara thingṭiak anlo phun tawhte chu enkawl zuiin, abul hnim samfai leh hung ṭhat hna tlang an thawk. Member anchhauk ṭhain, T Upa N Lalchhuanmawia Dist PYD Treasurer in hnatlang hi athawhpui hlawm ani.
———-
Thilpek :
Sept ni 4, Zirtawpni khan unaupa K.Lalbiaka (Laltea) te nupa in Dist Hqrs local Biak, New Siaha a hman a tan long chair 3 kohhranah an hlan a, Kohhran hote an lawm hle.
———–
CHurachandpur District :
1. CCpur Dist. Office area Containment zone chu dt.2/9/2020 khan hlih a nih a, Dist. Office pawh a pangngaiin an kal chhunzawm theih leh ta.

2. District LAD. Conference in a rel tawh angin Dt.6/8/20 khan Thangting Section Hqtrs. S.Molhoi Local ah  Dist. LAD hmalakna in Seminar an nei a.  President Sist. S.Lalthlamuani’n a kaihruai in. Rev. Paosei Dist. Supt. in Seminar hawnna a nei a ni.
Resources persons te :-
1. Sist. Langniang Hmarveng
2. Evan. Lalzason Samuel Dist. SS Diretor te an ni.
Topic.
1. LAD(Nute) mawhphurna.
(a). Kohhran ah.
(b) Chhungkua ah
2. Tisa leh Thlarau a thianghlimna.
3. Chhungkhaw maicham ah
4. Inthuamna ah leh
5. Financial maintenance te a ni.
Tin, Seminar kaihruaitu leh resource person te chu bialtu Pastor Chinminthang an chawhlui a lo kilpui bawk a ni.

3. Date 6/8/20 Pathian ni khan Lentlang Section-ah District Secretary Lalzawm chuan hun a hmang a, Lentlang Section Board, Section Hqrs Biak in Hmarvenga an neih chu a telpui.

4. Dt.6/9/2020 Pathianni khan kan Kohhran mipa naupang thisen tlachham tan CCpur Dist. PYD te chuan RIMS Imphal ah blood donation an nei bawk.

5. Dt.6/9/2020 Pathianni khan Henglep Local ah Upa Henthanga’n Thuthlung lawmin chawimawina a nei a, Kohhranteah Thlarau malsawmna a thleng nasa hle.

6. Evan. Soitingou (Goucha) Dist. Term Evangelist chuan tunkar chho hian an khua Bungpilon area ah Tirhkoh Kimcha nen rawngbawlna an neihnaah mi thar 3 in an sualte ngaihdam a nih theih nan Lal Isua hmingin baptisma an chang a, Kohhran thar din theih nghal a beisei awm thu dawn a ni.
————-

Lawngtlai West District :

1. Sept ni 6, Pathian ni hian Hmawngbu Local ah Evan Henry H Ramthianghlima chuan Chhungkaw khat Member pasarih(7) Pentecost Kohhrana lawi turin a seng lut.

2. District secretary Rev. Lalsawmliana Sailo chuan Saizawh West ah rawngbawlna a nei dawn a,District Missions Director Rev. F. Lalbiakthuama chuan Diltlang hmunah rawngbawlna neiin Diltlang bial local hrang² a tlawh kual ang.
———–
North Mizoram District :
Hruaitute Programme:
Dist. Supdt Rev Laltluanga chuan thawhtanni kal ta Sept ni 7 khan District Building Committee rorel bawhzuiin; Bukpui Bialah kalin Pastor Quarters repair ngai awm te a hmunah a en. Rev. Laltluanga hian Bukpui hi lângin a tlawh a ni.

District Missions Dept. ten Executive Meeting nei:
Sept ni 8 thawhlehni khan UPC, North Mizoram District Missions Department chuan Executive meeting, District Missions Director Room-ah neiin; Kumin October thlaa District Missions Conference neih tur chungchang an thlirho. Meeting hi District Missions Director Rev. C. Lalthantluanga’n kaihhruaiin; Dist. Missions Treasurer Evan. MS Dawngliana hnen atanga Financial Report buatsaiha a lan danin Kum 2019 Closing Balance nen, kumin chhunga District Missions Account-a sum lut zawng zawng 92,83,547 a nih thu leh Rs 62,64,219 hman chhuah dan te, Sum balance Rs. 30,19,328 balance a la awm  thu te report a ni. North Mizoram District Missions Dept. hian General Missions Rs. 35,59,000 an neih atangin Rs. 22,00,000 target pe tawhin, Gen. Buhfaitham hi Rs. 9,56,353 an chhunglut tawh bawk.
Missions Exe Meeting hian kumin October ni 23-25 chhunga District Missions Conference neih dan tur hetiang hian ruahmanna a siam:
1) Kum 2020 North Mizoram District Missions Department Conference chu Conference rorel chauh neih tur a nih dawh avangin District Headquarters Kohhran Biak in, Tuikhuahtlangah neih tura rel a ni.
2) Conference rorel hi Oct. Ni 23 Zirtawpni chawhma dar 10:00 ni se tih a ni.
3) Bial atanga Conference Agenda leh Report form bakah Conference Bu-a report tel tur Sum thehluh tur zawng zawng te, October ni 15 hmaa thehluh tur a ni ang.
4) Conference Report Bu hi kum dang ang thovin a pangngaia chhuah tur a ni bawk dawn a ni.

Building sum audit nei mek:
Building Committee rorel bawhzuia North Mizoram District in District huam chhunga Pastor Quarters sak thar hrang hrang leh repair ngai atana sum a sanction, Bialin an hman dan sum Audit neih mek a ni a. A thawh lina atan Sept ni 7 thawhtanni khan Bairabi bial Pastor quaters sak mek sum Audit a ni. Building sum hi Rev C Lalramthanga Chaltlang bialtu leh Rev C Laltlanchhuaha Dinthar bialtute’n audit-in tluang takin an hun an hmang.  Building Auditor te hian Kawnpui Bial, Durtlang Bial leh Bairabi Bial Pastor Qtrs sak sum hman an lo audit tawh a ni.

Headquaters Bial SS in Resolution committe nei:
North Mizoram District Headquarers Bial Sunday School Dept. te chuan kumin 2020 Sunday School Confere.ce rorel Agenda atana lut thlirlawkna neiin, Inrinni kalta Sept ni 5 khan Mission Vengthlang Biak inah Resolution Committee an nei.
Resolution Committee hi Bial SS Director Evan. R. Lalrinchhana’n kaihruaiin; Local 5 atangin Local SS OB te an kalkim thei a, Confe Agenda Local hrang hrang atanga lut 7 te chu Confe-a pharh turin an remti a ni.

TLANGSANG BIAL NEWS: Tlangsang Bial chhunga Volunteer Missionary Sis Vanlalpeki chenna tur Quarters Sailut khuaah Aug ni 27-29  chhung khan Lungthir leh Vitor Kalagang kohhran atangin kohhran member  pasarih ten  châk lak chawp hmangin an sa zo. Hnathawktute ho hi Bialtu Pastor K. Ainawna hovin Sailut kohhran hruaitute leh members thenkhat ten a tir atangin an tawiawm tluan bawk. Quarters sak nan hian Tha 54 sengin nithum chhungin  sak zawh a ni. He qtrs hi Mau hmang vek a sak ani a, a dung 18ft, a vang 12 ft ani a, ft 12 a sei ft 6 a zau a nam puk a ni bawk.
Work camp neih hun chhung hian Hindu atangin member thar puitling pahnih leh naupang pathum neih a ni a. Mithar te hi Missionary hian a lawmlut a, Baptisma leh nauhlan rawngbawlna hi bialtu pastor K. Ainawna’n a nei a ni.
Sunday zing leh zan inkhawm atangin Pathian thlarau dawng thar Work Camp a lo kal Lungthir kohhran member pathum leh Sailut member 4 an vaiin 7 an awm bawk. He Work Camp a tan hian bial chhung mipuiten ei leh in tur leh mamawh hrang hrang an thawhkhawm bawk.

Tlangsang Biala Volunteer Missionary Sist. Vanlalpeki chanchin hriain kohhran leh Department bakah member ten Sist. Vanlalpeki hi theih ang angin an tanpui. Headquarters Local Missions Dept, Tuikhuahtlang, Aizawl chuan Rs.8000 pein, Dist. Superintendent kal chhuak ta tuna Sihphir Bialtu Rev C. Lalrammuana te chhungkuain Rs.10000 in an pui bawk.
Rawngbawltu Sist. Vanlalpek leh amah lo buaipuitu Tlangsang Bialte Thilpek petute chungah an lawm hle. Tunah hian Sailut khuaah hian Kohhran in 9  awmin member 37 an awm mek a ni.
Tlangsang Bialtu Pastor K. Ainawna chuan Lalpa zarah an Bial chhunga Mission rawngbawlna kawnga hma an lak veipuia hmangaihtu, thilpek pea tawngtaipuitu te zarah member an pun dan hetiang hian a tarlang bawk.
1) Sailut ah member 37, kumin June ni 28 a kohhran ding.
2) Khakchang ah member 30, Kumin Feb ni 24 a kohhran ding.
3) Lungthir ah member 41, Kumin Jan ni 26 a kohhran ding.
4) Zomuantlang ah member thar  7
5) Vitor Kalagang ah member thar 4
Heti hian Kumin 2020 chhungin Tlangsang Bialah mi thar 119 neih a ni.
Kolalian Missions Field-ah Baptisma khur siam thar hawng: Sep ni 8 Thawhlehni khan North Mizoram District Missions Dept. Field enkawl Kolalian missions Field-ah Baptisma khur siam thar hawn a ni.
Baptisma khur siamna senso hi Rengdil Bial Missions Director Upa Rohnuna’n tumin,  Hriphaw kohhran Pentecostal Mens Fellowship ten phur takin a siam hna hi an thawk a ni. Hetihrual hian Sist. Vari Bairabi a miin; Baptisma khur chhin tur a tum bawk.
baptisma khur thar hi Bialtu Pastor C.Lalthlengliana’n Lalpa Isua hmingin a hawng a, Baptisma khur chu Lal Isua hminga mi tam takte sual ngaihdamna tura sual tlenfaina ni turin Pathian hnenah a hlan bawk. Bialtu Pastor hian Kolalianah hian nau -2 Lal Isua hnenah a hlan nghal bawk a ni.
Kolalian missions field-ah hian sist. H.Khawlliani Bible woman awm mekin, Lalpan a rawngbawlna mal a sawm a, Kolalian Field a enkawl hnuah mithar -27 sengluh a ni tawh a, tin, tunhnaiah Ladies Auxilliarty Dept. (LAD) din thar niin; Bial lamin target an tuk pawh kumin atanah an tlak vek tawh bawk a ni.

September thla, Beihrual thla tia kumtina kohhranhoten intuaitharna leh infuihtawnna atana hman thin thla chu North Mizoram District huam chhunga kohhranho te chuan a remchan dan ang anga hmangin, General Literatrure-in zir tura a buatsaih lehkhabu, chhung lam leh pawn lam thianghlimna tih chu an zir ho.
Beirual thla hi kohhranhote’n an hlawkpui thin hle a, Pathian thuah leh Thlarauvah siam thar he mi hun chhung hian mi tam takin an chan phah thin a ni.

North Mizoram District Office chu September ni 9 (nilaini) khan Tuikhuahtlang Vengah Hrikai engemaw zat hmuh chhuah a nih avangin Vengchhung LLTF te’n Lockdown an puang a, Office pawh khar rih tura hriattir a nih angin Office khar a ni

Pentecost ram humhalh hna thawktu boral: Pentecost zia leh nihphung a theihna ang anga humhalh thintu Sist Laltanpuii B/w, Chaltlang Kohhrana lawi chu Sept ni 8 thawhlehni zing dar 12:20 am khan a boral.
Pi tani hi thlarau mi tak niin, Chanchin tha hrilh te, Thlarau thianghlim nihphung leh zia humhalh pawimawhzia hriaa a humhalhna kawnga kohhranhote zingah theihtawp chhuaha tlangaupui thintu niin, General, District leh Bial huap Inkhawmpuiah pawh Thlarau Thianghlim chenchilha Conference hman a nih theihna atana thu leh hlaa thahnem ngai taka bei thin mi a ni.  Hei bakah hian Thuthlung leh thianghlimna leh Thilpek rawngbawlna lam ruih chilh tlat mai leh kohhran inkaihhruaina hum him tlat mi a ni bawk. Sept ni 8 thawhlehni khan North Mizoram District Secretary Rev. Chhiarpuia chuan ropui takin a vui liam a ni.

Nauhlan rawngbawlna:
Pathianni kalta September ni 6 khan Reiek Bialtu Rev. P. Vanlalfela chuan Nau piangthar Lal Isua hnenah a hlan, Nauhlan rawngbawlna hi Biak inah neiin; Kohhran member mi tlemtein an tawiawm bawk.
North Mizoram District huam chhunga hrileng avanga inkhawm theih loh a nih mek laiin naupiang engemaw zat awm tawhin heng ho hi Puithiam rawngbawltute hian a tul dan a zirin anmahni inah emaw, Biak inah emaw hlanna an neihsak mai thin a ni.

Lengpui Bial News: Lengpui Bialtu Pastor Rev. Lalchuailova chuan Aug ni 23 Pathianni khan Bial fangin Lengte kohhran a tlawh a, hemi tum hian kohhran member mi 7 ten Sual ngaihdamna Baptisma Isua hmingin an chang.  Baptisma rawngbawl hna hi Bialtu Pastor in thawkin Nauhlan rawngbawlna a nei bawk.

Inrinni kalta September ni  5 khan Lengpui local te chuan, an rawngbawlpui Bro. Zobela damlohna avanga zaipui tawk leh Damdawi ina awm mek chu, Kohhranhote’n buh an seng sak a, Bialtu Pastor Rev. Lalchuailova hovin Kohhran member 30 lai an thawkchhuak a, hlim takin hun an hmang a ni.

Lengpui Bial Dapchhuah hmunah Aug Rammut thla chhung khan rawngbawltute rawngbawlna kaltlangin mi thar member 8 neih ni tawhin, Pathainni kal ta  Sept ni  6 khan nauhlan rawngbawlna neih a ni bawk.