UPCNEINEWSSERVICE SEPT 20-27.2020
————–
UPCI General Conference :
Khawvel pum huapa UPC Kohhran inkhawmpui lian ber, UPC International General Conference vawi 75-na chu St. Louis, Missouri United States-ah Sept ni 22, Thawhleh zan khan tan a ni ta. Kumin hian hri leng avangin online service-a kalpui turin ruahmanna an siam a, Conference hi upci.org/live, upcigc.com, and Facebook.com/upci.org ah te live a thlir theih turin chhawpchhuah thin a ni.
Conference chhun lamah hian seminar leh thupui thlan bik hmanga sawi hona programme hrang hrang an ruahman a, Sunday School programme, Ladies Ministries leh Kum 75 tlin lawmna programme te pawh chhun lama neih turin an ruahman bawk.
Conference chhunga speaker te :
September 22, Thawhleh zan :
Global Missions Service – Speaker: Morgan Mwanza
September 23, Nilai zan :
North American Missions Service – Speaker: Mark Drost
September 24, Ninga zan :
General Superintendent’s Message – David K. Bernard
September 25, Zirtawp zan :
Youth Ministries “Passing the Mantle” Service – Speakers: James Wilson and Scott Graham
Kumin hi Secretary-ho ruat thar kum a ni a, Youth Ministry President erawh rawngbawlna tulna dang avangin an thlak.
Rev. Scott Graham chu UPCI General Secretary atan thlan nawn leh a ni.
Rev. Scotty Slaydon chu Global Missions Secretary atan thlan nawn leh a ni.
Rev. Bill Hobson chu North American Missions Secretary atan thlan nawn leh a ni.
Pastor Michael Thomas chu Youth President atan thlan thar a ni. Ani hi Youth Ministries lama Director of Promotions hna chelh mektu kha a ni.
Pastor Jeremy Stafford chu Youth Secretary atan thlan thar a ni. Ani hian Justin Reinking a thlak dawn bawk a ni.
Rev. Raymond Woodward pawh General Executive Presbyter in / of Canada atan thlan nawn thar leh a ni.
Sister Jane Buford chu Ladies Ministry Secretary atan thlan nawn a ni bawk.
————-
Missionary Day :
September ni 25, Zirtawpni kha Missionary Day a nia, Kohhran ni pawimawh a nih avangin kohhran office, Bible College, Bookstall, School leh Kohhran hmun pawimawh dangte khar a ni.
Kum dang anga hman theih ni lo mahse, Thingtlang bial tam zawk chuan zing tawngtai inkhawmah programme siamin General Hqrs atanga thawn chhuah Missionary Day thuchah chhiar chhuakin, thilpek te an lakhawm a. Hemi nia thawhlawm leh thilpek lakkhawm hi Missions rawngbawlna puala thehluh thin a ni.
North East India UPC Kohhran hian tun dinhmunah Mizoram chhung leh State pawnah nen Missionary 250 vel a ruai mek a, Mizoram chhung hmun hrang hrang bakah state pawnah heng : Assam, Dimapur, Upper Assam & East Arunachal, North Bengal & Sikkim, Bihar & Jharkhand, Odisha, Andaman and Nicobar Island, Arunachal Pradesh leh Bhutan field ah te hian rawngbawlna hna a thawk mek a ni.
————-
Missionary kal tur thlah :
Sept ni 24, Ninga ni khan Odisha Missions Field a Missionary a kal tur Bro. Beihluatly Khuhly thlahna leh hriak thihna General Hqrs Office Committee room- ah neih a ni.
General Missions Director Rev. R. Lalhawia chuan Missionary kal tur tan fuihna thuchah sawiin hriak thihna a neih sak a, rinawm leh chhel takin, thahnemngai taka Lal rawngbawl hna thawk tura fuihin tawngtaina neih sak a ni.
Bro. Beihluatly Khuhly hi kumin kum tir khan Missionary atana lak thar a ni a, tunlai hrileng avangin a awm na hmun tur Odisha ah hian a kal lawk thei lova, hun remchang hmasa berah kalna tur hi ruahmanin Sept ni 25, Zirtawpni khan a awmna tur hmun hi a pan ta a ni.
Rev. R. Lalhawia chuan, hun dang anga thlahna programme buatsaih theih a nih tak loh avanga pawi a tih thu sawiin, Kohhran hoten thahnemngai taka tawngtaina sak thin turin a ngen bawk.
————-
District hrang hrang rawngbawlna chanchin :
Lunglei District :
Sept.ni 25 zirtawpni kha kohhran ni pawimawh Missionary Day a nih angin Lunglei District UPC Office pawh khar a ni a, Local engemawzatin Missionary Day lawmna hun hi mahni remchan dan angin chhun lamah leh zan lamah an buatsaih a, General Superintendent thuchah chhiar chhuahna an nei.
———–
Painting Competition :
Chhipphir Bial PCD te chuan Naupangte intuaithar nan September ni 20 Pathianni khan Painting Competition an buatsaih. He Painting Competition-ah hian Bial chhung Local hrang hrang ten Chawhnu Dar 1:00 khan a rual tlangin mahni Local-ah theuh hun an hmang a, lem ziah tur hi Kum 10 chin chung lam leh hnuai lam ah then a ni.
Hetiang hi Local hrang hrangin hun an hman dan a ni.
1. Chhipphir Local : Chhipphir Local atang hian PCD member 32 in lemziahna an nei a. Hruaitu mi pariat(8)ten an telpui bawk a ni. Chawhnu dar 1:00 ah tanna nei in bialtu Pastor Rev.LH Lalchhandaman Hunsreh hmanna a nei a, ruaite buatsaihin tlailam ah hlim takin an kil ho a ni.
2. Mualthuam ‘N’ Electric Local : Mualthuam N Electric Local atang hian PCD member 28 in lemziahna an nei a. Hruaitu mi 10 in an telpui. He hun hi Bial PCD President Rbt.R.Lalchhandaman atel pui.
3. Sekhum Local : Sekhum Local atang hiam PCD member 41 in Lemziahna an nei a. Hruaitu mi 6 in an tel pui bawk a ni. chawhnu dar 1:0 ah tan na an nei a Bro.VL Lawmsiama Chhiphir Bial PCD Tresuerer in Hunserh hmanna a nei a ni.
He Painting Competition ah hian Lawmman hi pakhatna atanga Pathumna thleng siam a ni a. Local atanga lemziak tam ber hnenah lawmman siam a ni bawk.
———
North Mizoram District :
Sept ni 22 thawhlehni khan Dist. Supdt. Rev. Laltluanga chuan Aibawk tlawhin, tun hnai ruah surin Pastor Qtrs. Kawmthlangah leimin a siam, a hmunah a enpui a, hma lak zel dan tur chu Officer meeting lama thlen a ni.
———
Kawng en tu tlangzarh :
North Mizoram District Literature Board hmalaknaa lehkhabu, Khawvel zirtirna diklovin kohhranah chi a tuh mai loh nana kohhranin a mamawh hun apianga tihchhuah tur KAWNG ENTU tih chu September ni 24 Ningani khan UPC-North Mizoram District Office-ah tlang zarh a ni.
Lehkhabu tlangzarh inkhawm hi District Literature & Publication Board Chairman Rev. Chhiarpuia’n kaihruaiin, North Mizoram District Suptd. Rev. Laltluanga’n a tlangzarh a, Lehkhabu Tlangzarh tu Rev. Laltluanga chuan ‘North Mizoram District Literature Board ten, Kohhran venhim nana a tul hun apianga chhuah tur Kawng Entu an tihchhuah chungchangah lawmthu sawiin; a buatsaihtute fakawm a tih thu a sawi bakah Literature tihhmasawnna kawngah North Mizoram District te ke pen zel turin a fuih bawk’ hei bakah hian Kawng Entu lehkhabua thuziaktute hnen atangin thusawi ropui tak tak ngaihthlak a ni bawk a ni.
Lehkhabu Tlangzarh inkhawmah hian District Office staff te bakah Literature Committee member te bakah UPC-NEI Gen. Office aiawhin Gen. Supdt. Rev. Lalmalsawma Sailo in a ho bawk. (Video: Kawng Entu)
———-
District PYD :
Sept ni 23 Nilaini chawhnu dar 1:00 khan North Mizoram District PYD Executive Comt chuan NMD Office Supt Chamber-ah Meeting neiin; Meeting Dist. PYD President Evan. J. Vanlalruata’n a kaihruai, Meeting hian Dist. PYD Conference December 2020-a neih tur chungchang ngaihtuahin Hrilengin zual lam a pan zel avangin Boruak thlir chungin ngaihtuah that leh nise an ti.
District PYD Board in PYD Kumpuan sum vawngtu atana ruat chuan chhungkaw lamah harsatna a neih avangin, Treasurer thar tur a ruat a, Sist. Lallianmawii Hunthar Bial chu Dist. PYD Kumpuan Committee treasurer atan a ruat bawk
Dist. PYD hmalaknaa rawng an bawl mekna hmun Kawrthah Biak in, Khuangpuilam Kohhran ten an sak chungchangah Committee chuan lawmthu a sawi a, Biak in chhung mamawh thiltul te Dist. PYD OB ten a theih angin lo bawhzui nise tih a ni.
Dist. PYD Exe Meeting hi, District Puipa pathum Rev. Laltluanga, Supdt. Rev. Chhiarpuia Secretary lehy Rev. K. Lalduhsanga Treasuerr ten an ho a ni.
———
Bial Missions Conference chungchang ngaihtuah :
North Mizoram District chhunga Bial 30 ten Bial Missions Conference kum tina an hman thin Oct. 2-4-a aruala hman tur chungchangah, North Mizoram District Board rorelin Confe neih dan tur Bial kuta a dah angin, North Mizoram District Bial 30 te chuan Bial Missions Conference karleh Pathianni hmanga neih tur chu hrilengin zual lam a pan zel avangin Rorelna chauh hman nise tiin thutlukna an siam.
Bial Missions Confe. Hman tur chungchangah Headquarters Bial te chuan Sept ni 22 thawhlehni khan Resolution committee Hqrs. Kohhran Committee room-ah neiin; Hqrs. Bial Director Evan. Lalchhuanmawia Sailovin meeting a kaihruai a, Conference Agenda atana local hrang hrang atanga lut zingah Confe-a rel turin Agenda 8 an chhawpchhuak a ni.
———
District Literature Board :
Sept. Ni 24 Ningaini chawhnu khan District Literature Board te chuan District Office, Supdt. Chamber-ah Meeting an nei. Meeting hi Board Chairman Rev. Chhiarpuia’n kaihruaiin kum 2021-a Nilai Thupui zirtur edit fel tawh chu ennawnin October thla tirah Press-a chhut hman tura peihfel turin an ruahman.
——–
Staff Meeting :
Setp 22 thawhlehni khan PGHSS Staff Meeting neih a ni a, Meeting hi Principal Evan JH Malsawmdawngliana’n a kaihruai a ni.
Meetingah hian School hmasawnna tur thil tam tak rel a ni a, rorel pawimawh zualte :
1. Education Department, Gov’t Of Mizoram Order zulzuiin ni 23.09.2020(Wednesday) atangin Zirtirtu 50% te School ah nitin an kal tawh ang. Zirtirtute School a an duty dan tur hi detailment felfai tak siam a ni.
2. Zirlai naupang ten nu leh pa/Guardian-te remtihna lehkha(Consent letter) kengin an zirlaiah harsatna leh hriatthiam loh an neih chuan School ah Zirtirtu te an rawn thei tawh ang.
3. Zirlai naupangte hi School ah Zirtirtute rawn tura an kal reng rengin Full Uniform nen an kal ang a, Mask an vuah vek ang. Tin, Sanitizer emaw kut silna ah an kut fai takin a khat tawkin an sil thin ang.
4. Online Class/Assignment chu regular takin kalpui zel tur a ni ang.
5. School Building thenkhat repaired ngai te a rang thei ang berin repair a ni ang.
6. Managing Board lamten an harsatna an thlen an lo ngaihtuah sak zel thin avangin Managing Board chungah lawmthu an sawi bawk a ni.
———
District Missions Department :
Sept ni 8 thawhlehni khan North Mizoram District Missions Department chuan Executive meeting, District Missions Director Room-ah neiin; Kumin October thlaa District Missions Conference neih tur chungchang an thlir ho.
Meeting hi District Missions Director Rev. C. Lalthantluanga’n kaihhruaiin; Dist. Missions Treasurer Evan. MS Dawngliana hnen atanga Financial Report buatsaiha a lan danin Kum 2019 Closing Balance nen, kumin chhunga District Missions Account-a sum lut zawng zawng 92,83,547 a nih thu leh Rs 62,64,219 hman chhuah dan te, Sum balance Rs. 30,19,328 a la awm thu te report a ni. North Mizoram District Missions Dept. hian General Missions Rs. 35,59,000 an neih atangin Rs. 22,00,000 target pe tawhin, Gen. Buhfaitham hi Rs. 9,56,353 an chhunglut tawh bawk.
Missions Exe Meeting hian kumin October ni 23-25 chhunga District Missions Conference neih dan tur hetiang hian ruahmanna a siam:
1) Kum 2020 North Mizoram District Missions Department Conference chu Conference rorel chauh neih tur a nih dawh avangin District Headquarters Kohhran Biak in, Tuikhuahtlangah neih tura rel a ni.
2) Conference rorel hi Oct. Ni 23 Zirtawpni chawhma dar 10:00 ni se tih a ni.
3) Bial atanga Conference Agenda leh Report form bakah Conference Bu-a report tel tur Sum thehluh tur zawng zawng te, October ni 15 hmaa thehluh tur a ni ang.
4) Conference Report Bu hi kum dang ang thovin a pangngaia chhuah tur a ni bawk dawn a ni.
———-
Bial Sunday School Conference :
Sept ni 13 Pathianni khan Sialsuk Bial SS Dept Confe chu Chamring kohhran Biak inah neiin Confe. Ah hian rorel inkhawm chiah neih a ni.
Rorel tlangpui:
1. Kum 2021-ah Sialsuk Bial SS Confe. Lungsei kohhrnah neih a ni ang
2. NPSS te Group khata insiamin Solfaa inelna buatsaih leh nise
3. SS Confe-ah Puitling inelna buatsaih tawh loh ni se
4. Syllabus uluk zawka siam leh ni se. Rorel inkhawmah hian Bial SS hruaitute, Bial Dept hruaitute leh local SS hruaitu pawimawh bakah zirtirtu an vaiin mi 30 bawrin rorel inkhawm an nei thei a ni. Rorel inkhawm zawhah Nauhlan rawngbawlna Bialtu Pastor Rev. K.Vanlaldika’n neiin, Sual ngaihdamna baptisma chang 1 awm an awm bawk a. Baptisma Rawngbawlna Bialtu Pastor hian a nei a ni.
———–
Rorel inkhawm :
Covid 19 hrileng vangin kum dang anga Department Conference neih theih anih loh a vang in, Zawlnuam bial board chuan S.S dept leh Missions dept te chu Conference Rorel inkhawm neih mai nise ti a a rel ang in, dt 12 sept 2020 inrinni khan Conf rorel neih a ni.
Rorel pawimawh zingah, 1) 2021 Conf na atan Zawlpui ruat ania, 2) Kumin a Naupang intihsiakna tura thlansa chu Nakum 2021 atan rin leh nghal mai nise. tih te a ni.
Chawhnu lam dar 1- 3 pm-ah Missions dept Conf Rorelna neih leh nghal niin, Rorel pawimawh zingah Nakum 2021 Missions dept Conf na atan Kanhmun ruat a ni a, Bungṭhuamah Crusade neih tura passed ani bawk.
: Zawlnuam bial chhungah hian Dist puihnain Bungṭhuam leh Luimawiah Biak in sak mek a ni a, Luimawi Biak in chu peihfela hawn mai theih ani tawh a
Bilkhawthlir Bial Sunday School Conf. 2020 chu Sept. Ni 13 Pathianni khan Bilkhawthlir Dawrveng Kohhran Biak Inah neiin; ruahmanna siam tawh angin Rorel inkhawm chauh neih a ni.
Rorel inkhawmah Rorel palai – 70 kalkhawmin zanriah kilho nghal a ni. Hun khirh tak karah bialchhung local tam zawkin Bial budget an tlak a, heng budget tling khawm atang hian District budget bial in an tlak bawk a ni.
Khawmpui ah hian member boral te sunna hun leh baptisma rawngbawlna bialtu pastor, Lalpianthangan a nei a, mi pariat ( mipa -3 leh hmeichhia -5) laiin tui baptisma an chang a ni.
Conference rorel pawimawh zingah 1. kum 2021 ah Bilkhawthlir Kanaan kohhranah September chawlhni vawihnihna hmangin bial Sunday school conference hman leh nise 2) kuminah intihsiakna kan neih theih loh avangin hemi atana item ruahmanna te hi kumthar conference atan hman ni se3) Local wise in solo intihsiakna (sound track hmang ngeiin ) neih nise, hla thlan bik awm lovin, anmahni hla duh zawng sak mai nise tih te leh Doctrinal Department ten hla hmanga intihsiakna nei ve rawh se tih te rel a ni.
Bairabi Bial te chuan Bial Sunde Sikul Conference Rorel, Bial Headquarter Bairabi North ah neiin tluang takin hun an hmang.
Kolasib Diakkawn Bial te pawhin Bial SS Conference vawi 24-na Kolasib Vengthar Biak inah neiin; tluang takin rorel an nei thei bawk.
Tlangsang Bial chhung Volunteer Missionary hna thawk mek Sis Vanlalpeki chuan Tlangsang Bial Sailut khuaah rawngbawlna tluang taka nei chho zelin; a awmna atanga Km 3 leh a chanve a hla Sailut 2 an tihah zan hnih rawngbawlna neiin; Sept ni 18 Zirtawpni zan khan Hindu atanga lakluh tawh mithar pakhat chuan Pathian thlarau a dawng. Dodalna karah Sist. Mapeki rawngbawlna Lalpan mal a sawm hle a ni.
Sist. Mapeki puala mi thilphalte’n an sum pekkhawm hmangin Sept ni 18 Zirtawpni khan Kanchanpur-ah bialtu pastor leh Bial Secy Upa Lalfakawma ten Volunteer Missionary hman tur atan Solar battery Rs.6000/- in an leisak a, Kanchanpur aṭanga Tlangsang inkar hi Upa Rinkima’n a lirthei hmangin a thlen sak bawk. Sist. Mapeki pual hian Vanghmunah Bank account hawn sak niin; Voluntee Missionary puala sum pek te a Account-ah direct in a lut zel tawh thin a ni.
Volunteer Missionary quarters sak a ni: Tlangsang Bial chhunga Volunteer Missionary Sis Vanlalpeki chenna tur Quarters Sailut khuaah Aug ni 27-29 chhung khan Lungthir leh Vitor Kalagang kohhran atangin kohhran member pasarih ten châk lak chawp hmangin an sa zo. Hnathawktute ho hi Bialtu Pastor K. Ainawna hovin Sailut kohhran hruaitute leh members thenkhat ten a tir atangin an tawiawm tluan bawk. Quarters sak nan hian Tha 54 sengin nithum chhungin sak zawh a ni. He qtrs hi Mau hmang vek a sak ani a, a dung 18ft, a vang 12 ft ani a, ft 12 a sei ft 6 a zau a nam puk a ni bawk.
Work camp neih hun chhung hian Hindu atangin member thar puitling pahnih leh naupang pathum neih a ni a. Mithar te hi Missionary hian a lawmlut a, Baptisma leh nauhlan rawngbawlna hi bialtu pastor K. Ainawna’n a nei a ni.
Sunday zing leh zan inkhawm atangin Pathian thlarau dawng thar Work Camp a lo kal Lungthir kohhran member pathum leh Sailut member 4 an vaiin 7 an awm bawk. He Work Camp a tan hian bial chhung mipuiten ei leh in tur leh mamawh hrang hrang an thawhkhawm bawk. (Pic: Missionary Quartrs)
Tlangsang Biala Volunteer Missionary Sist. Vanlalpeki chanchin hriain kohhran leh Department bakah member ten Sist. Vanlalpeki hi theih ang angin an tanpui. Headquarters Local Missions Dept, Tuikhuahtlang, Aizawl chuan Rs.8000 pein, Dist. Superintendent kal chhuak ta tuna Sihphir Bialtu Rev C. Lalrammuana te chhungkuain Rs.10000 in an pui bawk.
Rawngbawltu Sist. Vanlalpek leh amah lo buaipuitu Tlangsang Bialte Thilpek petute chungah an lawm hle. Tunah hian Sailut khuaah hian Kohhran in 9 awmin member 37 an awm mek a ni.
Tlangsang Bialtu Pastor K. Ainawna chuan Lalpa zarah an Bial chhunga Mission rawngbawlna kawnga hma an lak veipuia hmangaihtu, thilpek pea tawngtaipuitu te zarah member an pun dan hetiang hian a tarlang bawk.
1) Sailut ah member 37, kumin June ni 28 a kohhran ding.
2) Khakchang ah member 30, Kumin Feb ni 24 a kohhran ding.
3) Lungthir ah member 41, Kumin Jan ni 26 a kohhran ding.
4) Zomuantlang ah member thar 7
5) Vitor Kalagang ah member thar 4
Heti hian Kumin 2020 chhungin Tlangsang Bialah mi thar 119 neih a ni.
———
Member thar :
1. Bro Lalrivunga leh Sis Kross Chhuanawmi te nupa Sihphir bial rawih Upa C. Sangliana, missionary chuan Sept ni 20 Pathianni khan, Lungthir preaching point ah member thar 6 Pentecost kohhranah a seng lut. Mithar zingah Chhungkaw khat member pali hi baptist aṭangin a ni a. Naupang pahnih chu Hindu aṭangin an ni ve thung ani.
2. Damparengpui Bial chhunga awm Tuipuibari Centre Preaching Point-ah Sept ni 20, Pathianni khan mithar chhungkaw khat member 5 awmna chu Pentecost Kohhranah lawmluh a ni. i Mithar lawmluhna hi helai hmuna rawngbawl tur atana Hunthar Bial Missions Dept ten an dah Bro. Vanlalruata’n lawmluhna hun hi a nei. Tuipuibari Centre Preaching Point-ah hian District kohhranpui hmalaknain Biak in sak mek a ni bawk.
———
Thilpek pe :
Sept ni 22 thawhlehni khan Bro.Robert Lallawmkima Dinthar Bial, Chawnpui kohhrana lawi chuan District-in rawngbawlna a neih mekna hmun Bungthuam Biak In Pulpit siamna tur atan Sumfai Rs. 20,000 District Orffice-ah a chhung lut a, District hruaitute’n lawmthu an sawi.
———
Baptisma khur siam thar :
Sep ni 8 Thawhlehni khan North Mizoram District Missions Dept. Field enkawl Kolalian missions Field-ah Baptisma khur siam thar hawn a ni.
Baptisma khur siamna senso hi Rengdil Bial Missions Director Upa Rohnuna’n tumin, Hriphaw kohhran Pentecostal Mens Fellowship ten phur takin a siam hna hi an thawk a ni. Hetihrual hian Sist. Vari Bairabi a miin; Baptisma khur chhin tur a tum bawk.
baptisma khur thar hi Bialtu Pastor C.Lalthlengliana’n Lalpa Isua hmingin a hawng a, Baptisma khur chu Lal Isua hminga mi tam takte sual ngaihdamna tura sual tlenfaina ni turin Pathian hnenah a hlan bawk. Bialtu Pastor hian Kolalianah hian nau -2 Lal Isua hnenah a hlan nghal bawk a ni.
Kolalian missions field-ah hian sist. H.Khawlliani Bible woman awm mekin, Lalpan a rawngbawlna mal a sawm a, Kolalian Field a enkawl hnuah mithar -27 sengluh a ni tawh a, tin, tunhnaiah Ladies Auxilliarty Dept. (LAD) din thar niin; Bial lamin target an tuk pawh kumin atanah an tlak vek tawh bawk a ni.
———-
Churachandpur District :
Seminar :
Sept.20, Pathianni khan Lamka Local, Dist. Hqtrs.chuan Hqtrs. Biak inah kohhranpui leh a hnuaia Deptt.leh committee member zawng zawng te nen awmni khamin Seminar an huaihawt.
Seminar ah hian Resource persons Evan. K. Khuma, chuan Local Administration tih thupuia hmangin zirtirna a pe a, T.Upa Mangkholal ( Lalboi) chuan Banking system tih thupui zirtirin Upa V.L. Mawian Account Maintenance chungchangah zirtirna a pe bawk. Mi 50 chuang an kalkhawm a, tlaiah chawhlui an kilho nghal a ni.
———-
Missionary Day :
Sept ni 25, Missionary day khan District chhunga Local eng emaw chuan ruai nen a hmang in programme an buatsaih a, Dist. Hqtrs. local pawhin Sept.25-27, chhung hian nitinin Biak inah Missionary te pualin Missionary Day thawhlawm thawh hun an buatsaih bawk.
———
District hruaitute Programme :
District suptd Rev. Paosei chuan Sept ni 27, Pathianni hmang hian Chullophai ah Inthar hawnna leh rawngbawlna neiin hun a hmang dawn a, District Secretary Rev. Lalzawma chuan Mongnelphai Localah Pathianni a hmanpui ang.
District Treasurer Pastor B.Lalzamluaia chuan New Mata Local ah Missionary day hmanpuiin rawngbawlna a nei.
———–
Chhimtuipui District :
Sept ni 20, Pathianni khan Siahatla Local OB te leh local Missions OB te chuan meeting an nei a, an meeting ah hian Missionary Day chungchang relin Sorkar leh VLTF phal chinah zing kar 6:30 ah Biak Inah missionary te tan tawngtaina hun hman nise an ti.
Kaihruaitu : Upa.J.Cheulinga Local chairman
Day Thuchah chhiar na : T.upa J Rinthanga, Secretary
Tin, Local mission thawhlawm bawm leh Bhutan for christ bawm chu Sep ni 27, Pathianni zing dar 6:30 aṭangin In tinah vahpui nise an ti bawk.
———–
Missionary thlah :
Chhimtuipui District atanga Odisha Missions Field a kal tur Bro.Beihluatlai Khuhly chu District Superintendent, Secretary, Treasurer leh Missions Director ten fuihin District Superintendent Rev.Joseph L.Thlauhthang chuan tawngtaina a neih sak.
———–
District hruaitute fehchhuak :
Sept ni 16, Nilaini khan Chhimtuipui Dist hruaitute Rev Joseph L Thlauhthang, Rev WL Thanghre, Rev Kholy Hlychho leh Rev Dr C Sihmo Diat Mission Director te chuan South Lungpher local an thleng a. Evan K Rinthara Local chairman inah Dist official te hi lo dawng sawngin, Bial puipa teleh South Lungpher local hruaitute nen Pastor quarters sak mek enin, hmalakna hrang hrang an sawi ho.
South Lungpher bial hruaitute, South Lungpher upa leh rawngbawltu te leh Local department hruaitute hian zan riah lo buatsaih sakin Zan lamah ah S Lungpher local chairman Inah inkawm hona neih a ni a, kohhrante an hlimin an phur hle. South Lungpher Bial te hian Pastor Quarters tur ft 40×30 a zau an sa mek a ni.
Dist Official te hian Sept ni 17-18 chhung khan Lungtian local leh Cheural local an tlawh leh a, Sept 19, Inrinni khan Bualpui Ng bial ah an lut a, Pathianni hian Vawmbuk ah hun an hmang.
Hetiangin an chhunzawm :
ni 21 – Archhuang
ni 22 – Tialdawnglung
ni 24 – Tuipang Lal Veng Local
ni 25 – Tuipang Vai Veng Local
Sept ni 26-27 chhung hian Laki Local ah rawngbawlna an nei.
———-
Aizawl East District :
Aizawl East District chhunga Bial hrang hrangah ruahmanna ang chuan September 25 atanga 27 chhung hian Bial Missions Inkhawmpui hman hun tur a ni a, kuminah erawh hri leng mek avangin kum danga hman thin angin hman theih a ni dawn lo.
Bial engemaw zat chuan rorel inkhawm chauh nei turin ruahmanna an siam a, hetah hian sawrkarin dan a siamte zawm ni se an ti hlawm bawk a ni. Bial thenkhat chuan September 26, Inrinni hian rorel inkhawm an nei a, Bial thenkhatah erawh September 27, Pathianni-ah rorel inkhawm hi an nei thung dawn a ni. Bial Missions inkhawmpui hi hri leng mek avangin District Missions Department Hruaitute pawhin hmun dangah hmang lovin an awmna Bial theuh-ah an hmanpui dawn a ni. Rev R.Lianzama, Director chuan Zemabawk Bial-ah leh Evan C.Lalchhuanga Treasurer te chuan Thuamui bial-ah an hmang anga, Evan Lalramzauva, Secretary chuan Bethlehem bial-ah a hmang ang.
———-
District Missions Executive :
September 22, Thawhlehni khan District Missions Executive meeting, District Office-a Director room-ah neih a ni. Rev R.Lianzama, Director chuan kaihruaiin, He hunah hian District Kohhranpui hruaitute pawh an telkim thei a ni. An rorel tlangpuite:
1. Hri leng mek avangin kum dang angin District Missions Conference hman theih a nih dawn loh avangin rorel inkhawm chauh neih tura tih a ni a, hetiang hian ruahmanna siam a ni.
Conference palai turte: Bial tin aiawh mi 3 theuh, Bialtu Pastor zawng zawng, District Department OB te
Conference hun: October 23, Zirtawpni Chawhma Dar 10
Conference rorel neihna hmun: District Hqrs. Biakin
Agenda thehluh hun: October 19\8, Pathianni aia tlai lo.
Conference rorel palaite thlenna tur ngaihtuah turin Bazar Bial Missions Department te ruat an ni.
2. General Missions Department Budget la tlak lohna Rs 15,50,000 (nuai sawmpanga singnga) pek tlak ni se tih a ni.
3. Hripui leng avangin Home Missionary te duhna hmunah dah vek theih a nih rih loh avangin October-November chhung thawk turin heng mite hi dah an ni.
Sis Sangkhumi B/W- Khawlian bial-Daido-ah
Evan Vanlalrosiama- N.Vanlaiphai bial- Lungchhuan-ah
Bro Ramhuapliana- Kawlkulh bial, Dulte-ah
Heng bakah hian a remchan veleh a Champhai Zote-a lut turin Evan HK Lalhmangaiha chu ruat a ni bawk.
———-
Literature & Publication Board :
September 23, Nilaini leh 24, Ningani khan Kum 2021 Nilai Zan thupui zir tur endikna, Literature & Publication Board thutkhawm District Superintendent room-ah neih a ni. He hun hi Rev Vanlalfela Ramtiam, Chairman, Literature & Publication Board chuan a kaihruai.
Kum 2021 hian Aizawl East District chhungah Nilai zan thupui hi mi hrang hrang ziah zir tur niin thupui hlawm 41 awm tura ruahman a ni. Thupui hlawm liante lo tarlang ila. Thurin humhimna, Fakna thiltihtheihna, Thalaite mawhphurhna, Literature chungchang te, Intodelh bakah Kohhran hlutna tihte, Kohhran hmasawnna te bakah Thilpek chungchang, Kohhrana hmeichhia mawhphurhna leh Zirna kawnga hmasawnna chungchang te a tel a ni. Heng thupui hrang hrangte hi Upa Dr.Charles Romalsawma, Champhai Bial, Evan Lalthankima Ralte, Serchhip Bial, Upa K. Lalremchhunga, Khawhai bial, Upa Lalfelkima, Bethlehem bial, Upa JH Rozawna, Bazar bial leh Sis Prof.Lalhmasai, Upper Republic bial te ziakte niin editing hi nihnih chhung neih phawt tura ruahmanna siam a ni.
——–
Relief fund-ah chhung lut :
Aizawl East District Superintendent Relief fund-ah Chhingchhip Bial LAD te chuan September 21, Thawhtanni khan Rs 2000/- an hlan.
Chhingchhip Bial aiawhin Rev Biaksangzuala, District Superintendent chuan Rev VL Hnamtluanga, District Treasurer hnenah a hlan a ni. District Superintendent Relief fund hi Kohhran chhungkua, khuarel chhiattawk leh damlo bakah mi harsate tanpuinan hman thin a ni a, kumin chhung ringawtah pawh mi engemaw zat tanpuina hi hlan an lo ni tawh a ni.
——-
Member thar :
September 20, Pathianni khan Hnahlan Venglai Kohhranah nupa tuak khat chu Bialtu Pastor R.Lalfamkima chuan Kohhranah a senglut.
Biakinah inkhawm theih a nih loh avangin anmahni Inah Venglai Kohhran Upate leh Bialtu Pastor hian sengluhna hun hi an hmang a ni.
———
Hruaitute Programme:
Rev Biaksangzuala, District Superintendent chuan tun hnaia lirnghingin a tihchhiat Leng Kohhran Biakin, E.Lungdar bial te tanpuina pe tur leh N.Vanlaiphai bial, Lungkawlh Kohhran Biakin sak mek enpuia a tul anga tanpuina pe turin Zirtawpni khan Aizawl a chhuahsan.
Facebook