GENERAL
———-
HRUAITUTE PROGRAMME:
General Treasurer Rev. Lalmalsawma Sailo chuan October ni 10 Pathian ni chawhnu hian Mualpui Kohhranah Tualchhung Rawngbawltute Seminar neih puiin Resource Person-ah a tang ang.
General Missions Director Rev. R. Lalhawia chu Octoberni 2 khan UPC North East India General Missions hnuaia Field hrang hrangte tlawhin a zin chhuak a, File mamawh leh hmalakna tur hrang hrang hrangte ruahmanna a neihpui a ni.
General Missions Director Rev. R. Lalhawia hi Kum 2021 October hian superannuation a a penson dawn avagnin Missions Field then khat te chuan thlahna hun an hmanga, Assam Missions Field chuan October 3 khan thlahna hun hmangin, October ni 5 khan Dimapur Missions Filed in thlahna an nei leha, October ni 7 ningani khan Upper Missions Field-te chuan Director Kalchhuak tur hi an thlah leh bawk a ni.
———-
GENERAL SUNDAY SCHOOL EDITING BOARD:
September ni 24 Zirtawp ni khan UPC North East India General Headquarters Committee Room, Mualpui Salem veng ah General Sunday School Editing Board chuan kum 2022 Puitling Sunday School Zirtur I Korinth leh II Korinth bu chu en hoin, Editing hmawr bawkna tluang takin an nei a, Press lama chhuttura zawh fel a ni ta a ni.
Kum 2022 Puitling Sunday School Zirlai bu hi Rev. R. Laichhingpuia, General Sunday School Director ziah a ni.
———-
GENERAL HEADQUARTER OFFICE BUILDING
Tunlai hian UPC North East India General Headquarters Office Building chu chei that mek niin, Office pan chhohna kawng chu RCC Constructiona siam that a ni a, Office kawt leh Step te chu Marble Granite hmanga chei a ni bawk. Covid 19 hrileng mek laka him tlan zawk nan General Headquarters Office Administrative Committee chuan inkaihhruaina siamin Office hi ni karthlak a kal thin a ni.
———-
SOCIAL WORKDAY HMAN A NI:
October ni 2, Inrinni kha North East India UPC Kohhran thalai pawl Pentecostal Youth Department (PYD) Social Work Day a ni a, India hmarchhak pum huapa hman a ni.
Hri leng vangin kum dang anga hman theih ni lo mahse sawrkar dan siam leh hri leng a darh lohna tura ruahmanna te siam chungin UPC North East Thalai-te chuan vantlang tana hna thawkin hun an hmang a, thinsen pek, Damdawiina damlo tana ei tur sem, Vantlang hmun pawimawh Community hall, Damdawi in leh sub center tih fai, Vantlang inthiarna tur siam leh tihfai, khawlai thenfai leh tuiluankawr tihfai bakah thingphun hnatlang te neiin hun an hmang a ni.
Aizawl City PYD Co-ordination Committee chuan October ni 2 (Inrinni) khan Social Work Day hian Zoram Medical College ZMC Falkawn hmun a Covid Patients leh frontline workers te chhun ei leh in tur pe in hun an hmang a.
Aizawl City PYD Chairman Evan.C.Lalruatsanga kaihruaina hnuai ah thilpek hlanna inkhawm tawi hman niin, General PYD President Rev. H. Lalropuia chuan hunserh hmangin thilpekte hlanna ZMC Word Superintendent hnenah a nei a ni.
ZMC tan a ei leh in hlan turte leh a tul ang ang lo buaipui tu Aibawk Bial PYD te chungah Aizawl City PYD Co-ordination Committee ten lawmthu an sawi tak meuh a ni.
———-
AIZAWL CITY PYD LIVE CRUSADE
October ni 15 -17 hmang hian Aizawl City PYD Co-ordination Committee chuan, Pennet Youtube kal tlangin Live Crusade a nei dawn a, Speaker ah General PYD President, Rev. H. Lalropuia niin, Zaithiam tak tak ten zaia rawngbawlna an nei bawk ang. He hun hi lo chhima lo en vek turin Aizawl City PYD Co-ordination Committee chuan Kohhran mipui te a ngen a ni.
———-
October ni 5 atanga ni 8 chhung khan khawvel pum huapa UPC Kohhran inkhawmpui lian ber, UPC International General Conference vawi 76-na, Indiana Convention Center, Indianapolis United States-ah tluang taka neih zawh a ni.
Conference chhun lamah hian a tlangpuiin seminar leh thupui thlan bik hmanga sawi hona programme hrang hrang an ruahman a, Sunday School, Ladies Ministries, Youth Ministry te pualin inkhawm buatsaih thin a ni a, zan lamah sermon inkhawm neih thin a ni bawk.
October 5, Thawhleh zanah North American Missions puala inkhawm neih a ni a, Speaker atan Jim Blackshear an ruai.
October 6, Nilai zanah Global Missions puala inkhawm buatsaih niin Ryan Crossley, Jack Cunningham, leh Tes Stewart ten thuchah an sawi a, Missions rawngbawlna pualin appeal an nei nghal bawk.
October 7, Ningani hian chhun lamah Children’s Ministries pualin inkhawm buatsaihah Rev. Bruce Howell chuan rawngbawlna a nei a, zan lamah General Superintendent Rev. David K. Bernard chuan rawngbawlna a nei thung.
October 8, Zirtawpni khan chhun lamah thalai pual inkhawm buatsaih niin Nelson Rivera chuan rawngbawlna a nei a, zan lamah Joshua Herring in rawngbawlna a nei bawk.
Kumin hi hruaitu lian ho ruat thar kum a nih angin October ni 6, Thawhlehni khan hruaitu ruat tharna hun an hmang a, heng mite hi UPCI hruaitu atana ruat tharte an ni :
General Superintendent – Dr. David K. Bernard
Assistant General Superintendent, Eastern Zone – Darrell Johns
Assistant General Superintendent, Western Zone – Stan Gleason
Director of Global Missions – Bruce Howell
Director of North American Missions – Scott Sistrunk
Director of Children’s Ministries – Steve Cannon
Director of Ladies Ministries – Linda Gleason
Director of Youth Ministries – Michael Thomas
———-
———-
CHHIMTUIPUI DISTRICT
CHHIMTUIPUI DISTRICT PYD TEN WEEK HMANG
Chhimtuipui District PYD te chuan September ni 27 – 02 October hmang khan District PYD WEEK an hmang a, Tin, 2nd October hi India hmarchhak PYD Social Work Day anih angin, District chhung Bial leh Local hrang hrang ten Vantlang tana thil ṭha tih ni atan an hmang. District PYD Week leh Social work Day hman dan tlangpui:-
1. Siaha Bial PYD ten a mamawh piang hman atan thisen Unit 17 (Mipa16 + 01 hmeichhia) an pe. Donation Camp hi Dist Hqrs Local Sunday School Hall ah neih ani. Tin, Siaha kawtchhuah KVK Road side a PYD Plantation chu enkawl in samfai, hung ṭhat hna an thawk.
2. Sangau Bial PYD techuan Sub Hqrs YLA Sangau ruahmanna hnuaiah Myanmar raltlan te chenna tur Sangau hmun ah relief camp sak hnatlang an thawk ani.Aṭul angin raltlan te ṭanpui hna an thawk chhun zawm zel.Tun hnai ah hian Sangau hmunah hian raltlan an pung nasa hle.
3. South Lungpher Bial chhung PYD ten an remchan ang ṭheuhvin vantlang tana thil ṭha tih ni atan an hmang. South Lungpher Local PYD chuan Kum engemaw chen aṭang a anlo enkawl tawh PYD Plantation hmun samfai hnatlang thawkin. Social Work Day hriat rengna chikhat atan a, South Lungpher kawtchhuah a Zung In ṭha tak an siam chu Dist PYD President Evan K Rinthara chuan vantlang hman theih turin a hawng. South Lungpher local tehi zan riah an kilho nghal ani.
4. Bualpui NG BIAL chhung local hrang hrang tepawhin an Vantlang hmun teleh Biak In compound tifai in hun an hmang. Archhuang local PYD tepawh member ṭhahnem tak thawkin khawchhung leh Biak In kawt antifai. Bial Hqrs local Bualpui NG Local PYD techuan Myanmar aṭang a raltlan Refugee chhawmdawlna atan sum ṭhahnem tak Bualpui NG Refugee Relief Committe hnenah an hlan.
5. Tuipang Bial chhung Local PYD ten, anmahni khawchhung ṭheuh tifaiin hnatlang an thawk. Tuipang L local PYD member 70 chuang thawkchhuak in khawchhung a vantlang hmun pawimawh tak tak an tifai ani. Tin PYD Week pual hian Sports hun hlimawm tak an hmang.
6. Niawhtlang bial chhung PYD tepawh in, antual chhung ṭheuhvah vantlang hmun tihfai Ni atan hun an hmang. Ainak local techuan thlan In sa ṭha in, ahmun tifai nghal. Noaotlah PYD tehian khawchhung tifaiin member thawk chhuak anṭhahnem hle.
kum 10 kalta aṭang khan India hmar chhak PYD tehian kum tin 2O ctober hi Vantlang tan thil ṭha tih ni atan anlo hmang tawh thin. Kum in ah pawh Refugee te chhawm dawl, thisen pek, vantlang kawng siam that, khawtlang hmun hma tihfai, tuihna humhalh leh ṭanpui ngaite ṭanpuina atan hun an hmang ani.
———-
LOCAL LICENCE HLANNA NEI:
Evan.Beihluatlai Khuhly (Mama) S/o K. Lalfakfela Siaha Council Veng, Odisa Mission Field-a Missionary hnathawk a awm mek chu Local Licence hlan a ni.
Licence hlanna hun tawi Chhimtuipui District Superintendent Room ah neih niin, Rev.W.L Thanghre District Secretary chuan Licence hi Evan.Beihluatlai Khuhly (Mama) nu leh pa hnenah a hlan a, Rev.Joseph L.Thlauhthang District Superintendent in lawmpuina leh fuihna thu a sawi a, tawngtaina nei nghalin hun tih tawp a ni.
———-
———-
LAWNGTLAI WEST
HRUAITUTE PROGRAMME:
Lawngtlai West District Secretary & Treasurer Rev.Lalsawmliana Sailo chuan October ni 10 Pathianni chawhma inkhawm hian College veng ah nauhlan rawngbawlna a nei a nga, Chawhnuah District LAD leh PYD joint Board a neih pui leh ang, Sunday zanah Mampui Kohhranah sacrament rawngbawlna a nei bawk ang.
———-
LAWNGTLAI DISTRICT PYD TEN SOCIAL WORKDAY HMANG
October ni 2 inrinni khan Lawngtlai District PYD te chuan Social workday hmangin Lawngtlai Town bik ah chuan PYD te chuan a mamawh apiang te hman atan Thisen pek runpui neih a ni a. He hunah hian mi 95 kal khawmin Mipa 23 leh hmeichhia 12 ten thisen an pe a ni. Evan George Lalawmpuia District PYD Secretary in hun a kaihruai a, Pastor S.Vanlallunghnema Dist PYD President in hunserh hmanna a nei. Medical lam leh AVBD atangte in thusawi tawi ngaihthlakna neih a ni bawk.
Mampui Local PYD te hian, Mampui Sub-Centre ah Bench pathum Donate in, Biak In hnatlang an nei a ni.
Diltlang S Local PYD te pawhin Social Work Day hi hmangin, hemi ni hian Biak In Compound leh Pastor Quarter bul tihfai hnatlang an thawk bawk.
Chawngte Bial PYD O/B ten Lawngtlai Road ṭawngṭai-na hmun tihfai hnatlang neiin Hording board an tar a ni.
———-
HRIATTIR NA:
United Pentecostal church NEI Lawngtlai West District
Rev.R.Ramthatzawla Lawngtlai west District Superintendent hmasa ber pension thlahna programme tihchhuah Dt.10.10.2021 Sunday kan lo ruat tawh chu, remchan lohna a awm avangin ṭhulh a ni tih kan in hriattir a. Hun remchang hmasa ber ah programme hi hman tum a ni.
Rev. Lalsawmliana Sailo
District Secretary
Rev. R.Ramthatzawla hi Covid19 positive leh hrisel lohna hrang hrang vangin tunah hian LCMC ah enkawl mek a ni a, Kohhran mi ten ṭhahnemngai taka ṭawngṭaipui theuh turin kan in sawm nghal bawk a ni.
———-
———-
LUNGLEI DISTRICT NEWS
1. SOCIAL WORK DAY HLUNG TAKA HMAN A NI
October ni 2 Inrinni kha North East India PYD Social Work Day (Vantlang tana hnathawh Ni) a ni a, Lunglei District chhunga Bial 20 aṭangin Bial 19 in an hmang thei a, Bial 1 in Covid 19 Hrileng vangin an hmang thei lo.
Social Work Day hi Lunglei District-a Local ṭhenkhat in zingkarah an hmang a, Local tam zawk te chuan chaw eikhamah an hmang thung. Vantlang tana hnathawh ni a nih angin Local tam zawk chuan khawlai dung tihfai, thlanmual kawng leh thlanmual sam fai, Vantlang zun in siam leh tihfai, thingphun enkawl lai tihfai, tuikhur leh a vel a thing/changel phun leh tihfai hna an thawk a. Community Hall leh a vel te, Damdawiin leh a vel te tihfai hnatlang nei an awm bawk. Covid Hrileng avanga hnatlang thawh remlo Local thenkhat te chuan an veng VLTF ah sum leh ei leh in tur an pe a ni.
Kum 2000 atanga India hmarchhak huapa hman tan Social Work Day hi a vawi 22-na a ni a, kum dangah pawh Vantlang tana hnathawh leh thisen pek te in hun hman a lo ni tawh ṭhin a ni.
Kum 2021 District PYD Conference Report-a a landanin Lunglei District chhungah PYD member Mipa – 3429, Hmeichhia – 1816 an vaiin 5245 an awm mek a ni.
———-
2. KHAWTLANG NUN RAH BI TIH LEHKHABU TLANGZARH A NI TA
October ni 1 Zirtawpni khan Lunglei District PYD in lehkhabu a buatsaih ‘Khawtlang nun rah bi’ tih chu chawhma dar 11 khan District UPC Conference Hall ah Rev.C.Vanlalena, Superintendent, UPC (NEI) Lunglei District chuan a tlangzarh.
Lehkhabu tlangzarh inkhawm hi Lehkhabu Editorial Board Chairman Evan.Laldinpuia Sailo chuan a kaihruaia, Rev.C.Lalrintluanga Treasurer, Lunglei District UPC chuan hunserh hmangin, Upa K.Lalfakzuala, Chairman Farm veng Local UPC chuan lehkhabu thlir lawkna a neih hnuin Rev.C.Vanlalena Superintendent, Lunglei District UPC chuan a tlangzarh a ni.
Lehkhabu Editorial Board Secretary Evan.Lalringzuala Pachuau chuan lehkhabu buatsaih anih chungchangah report a pek hnuin Upa C.Malsawmkima, Asst.Secretary, Lunglei District PYD chuan lehkhabu a thuziak tute hnenah lawmthu sawina thilpek a hlan a, Evan.C.Lalremchhunga, President Lunglei District PYD chuan lawmthu sawina a neih hnuin, Bro.TC.Jonunsanga chuan thu a sawi a, Rev.PC.Lalfakawma, Secretary, Lunglei District UPC chuan ṭawngṭainain hun a khar a ni.
He lehkhabu hi Pentecostal Youth Department (PYD) Lunglei District Conference vawi 52-na chuan PYD thiltum zinga pakhat khawtlang nun siam thatna lam hawi lehkhabu ziaka chhuah fo ṭhin tihhlawhtlin nana buatsaih nise a tih a ni a, UPC(NEI) chhunga ziak mi leh Mizoram chhunga thu leh hla lama mi chhuanawm tak takte ziak a ni a, chhiar man hla tak tak tur a ni.
Lehkhabu chhungah hian khawtlang nun siam thatna lam hawi thupui ṭha tak tak 15 a awm a, phek 131-a chhah niin, Rs.100 a hralh chhuah tur a ni.
———-
3. LUANGMUAL BIAL PYD TEN THISEN UNIT 13 AN PE :
September ni 25 Inrinni khan Luangmual Bial PYD-te chuan Lunglei Civil Hospital tan thisen unit 13 an pe.
Lunglei District PYD Conference in Blood Donation neih nise tia a lo rel bawhzui nan Luangmual bial PYD-te hian thinsen hi an pe a, Luangmual Local UPC Sunday School Hall-a hunserh tawi an hman naah Bial PYD Secretary Rbt.C.Lalvensanga chuan hun a kaihruai a, Dist.PYD Fin.Secretary Rbt.K.Lalrintluanga chuan hunserh hmangin Blood bank, Civil Hospital Lunglei thawktute aṭangin thusawi ngaihthlak a ni.
Thisen unit 13 petu te hi mipa vek an ni a, thisen petute hi Lunglei Civil Hospital Blood Bank-a thawktu ten an kal chilh a ni.
———-
4. THUTHLUNG PUAN UAR BAWHZUINA LIVE CRUSADE NEIH MEK A NI
Pentecostal Youth Department, Lunglei District Kumpuan Committee leh Pentecostal Network, Lunglei ṭangkawpin a buatsaih Thuthlung puan uar bawhzuina Live Crusade chu October ni 4 (Monday) zan atang khan neih tan a ni a, October ni 10 (Sunday) zan thleng neih a ni ang.
He Live Crusade hi LDF leh Zonet Jb-a Pennet Lunglei Channel bakah Pennet Lunglei YouTube Channel ah te zan lamah dar 7:30 ah pek chhuah a ni a, Pathianni chhun hi dar 10:30 ah pek chhuah a ni ang.
Live Crusade ah hian thusawi thiam leh Pathian mi hman tak tak ten Thupui hrang hrang an sawi bakah Lunglei District-a PYD zaimi thiam tak tak ten rawngbawlna hi an nei dawn a ni.
Tin, he Crusade ah hian thusawi leh zai fiah fel fai taka pek chhuah anih theih nan Ardy Verity Records chuan Sound an buaipui bawk a ni.
———-
———-
NORTH MIZORAM DISTRICT
Hruaitute Programme:
Oct. ni 5 Thawhlehni khan North Mizoram Distrrict hruaitu Pathum Rev. Laltluanga Supdt, Rev. Chhiarpuia Secretary leh Rev. K. Lalduhsanga Treasureer te chuan Kolasib Venglai Bial Tuitha veng Local Biak in sak leh Bilkhawthlir Bial Kharzawl Kohhran Biak in sak te bakah Bilkhawthlir Pastor Qtrs. Sak mek te a hmunah tlawhin an en fel.
———-
PGHSS Managing Board Committee nei:
Oct ni 4 chawhma dar 11:00 khan North Mizoram District Pentecostal Gateway Higher Secondary School Managing Board chu District Office Supdt. Chamber-ah Meeting neiin; Rev. Laltluanga Managing Board Chairman in a kaihruai. Meeting-ah hian PG Zirtirtu vanduaithlak taka Covid avanga boral ta Bro. F. Liansiam ral chungchang sawiin; Oct. ni 14 hian ral nise an ti a, ralna thilpek atan Rs. 100000 hlan an rel. Hetihrual hian Bro. F. Liansiama aiawh tur ngaihtuah nghalin kum 10 chung taima tak leh rinawm taka lo thawk tawh Pu Lallawmkima chu lak tha an ti a, Ani hian Nov ni 1-ah Joining report a pe dawn a ni. PG Managing Board hian School Building thar sak dan tur ruahmanna siam tha an ti a, District Board-ah thlen tha an tib awk. (Pic: Managing Board)
———-
Rammut thla Live Crusade nei:
Hrileng avanga fimkhur ngai thilah Sorkar in Partial Lockdown a siamah, Inkhawm phal ala nih loh avangin, District PYD Music Committee buatsaihin Rammut thla Live Online Crusade hlawhtling tak an buatsaih, Online Crusade hi Aug ni 16 thawhtan zan atanga tannin zan 9 chhung neih a ni a, Speaker atan heng rawngbawltute hi hman an ni: 1) Rev. B. Vanlalruata, Kolasib Venglai Bialtu Pastor 2) Evan. Lalduhsaka Saza, NMD Tirhkoh Ramtlan 3) Evan Lalringzuala Pachuau, Lunglei Dist Treasurer 4) Evan. T. Vanlalruata, Dist Revival Speaker 5) Evan. HV Zoramsanga, Revival Speaker NMD 6) Evan. F. Lalchhanhima 7) Evan. C. Lalruatsanga, NMD Dist PYD Treasurer 8) Rev. C. Lalrammuana, Sihphir Bialtu Pastor 9) Rev. C. Lianchama, NMD Hqrs. Bialtu Pastor.
———-
KAWRTHAH PREACHING POINT, RENGDIL BIAL: NORTH MIZORAM DISTRICT:
Aug. ni 23 Thawhṭan zan khan Rengdil Bial Kawrthah Preaching point-ah Evan Isak Lalhmingliana rawngbawlna aṭangin mi thar -2 ( Nupa) chu seng luh a ni a; Bialtu Pastor C.Lalthlengliana’n Lalpa Isua hmingin a lawm lut a ni. Bial chhung lam aṭangin Bial P.Y.D hruaitute, Rengdil Local P.Y.D hruaitu te leh T.Upa Vanlalthanga, Rengdil ten an ṭawiawm bawk a ni.
Kawrthah hmunah ah hian , kum 2018 khan District kohhranpuiin Biak In hmun ₹ 600,000 ( cheng nuai ruk) a leiin; District P.Y.D hmalakna a Tirhkoh rawih chhunzawm zel a ni a, kum 2020 khan District P.Y.D suma sak Biak In pawh hawn a lo ni tawh a ni.
Evan Isaak Lalhmingliana awm hnuah hian mi thar -14 ( chhungkaw -4 ) sengluh a ni ta a ni.
Kawrthah Preaching point ah hian kumin 2021 chhungin mi thar -12 seng luh a nive tawh a ni
District tirh tirhkoh report tlangpui: UPC, North Mizoram District chuan ram lak beihpui thlak kal zelah kumin chhung hian Lalpa ram tana thawk tur mi 33 lain; North Mizoram District huam chhung khaw 33-ah rawngbawlna ngawrh takin an nei mek District Secretary Rev. Chhiarpuia hnen report lut PenNet North Mizoram District -in a dawn danin January – July thlenga ram lak dinhmun tlangpui chu hetiang hi a ni: Khaw 33 -ah rawngbawlna neiin, khaw 20-a rawngbawltu awm ten kumin rawngbawlna an neih chhungin Mithar (Ram lak) an nei thei. Heng Khaw 20 te ram lak zawng zawng hi 223 an tling a ni. July thla hnu lamah pawh Tirhkoh fehchhuakte hian mithar engemaw zat ram lak an nei leh tawh a ni.
———-
———-
AIZAWL EAST DISTRICT
Social Work Day:
October 2, Inrinni kha kum danga UPC- North East India PYD ten vantlang tana thil tha tihna ni atana kan hman thin, Social Work Day a nih angin Aizawl East District PYD hnuaia Tualchhung leh Bial te pawhin Covid-19 hrileng mek karah a theih ang angin vantlang tana thil tha tihna ni atan an hmang hlawm a, Bial anga hmang an awm laiin Tualchhung anga hmang an awm bawk a ni. Kum dangah chuan Social Work Day-ah hian vantlang tan thil tha tiin PYD memberte chuan hnatlangin hun an hmang thin a, vantlang zunin tihfai hna te, khawlai lun lai leh Bazar hmunte, Thlanmual leh thil tul ang ang thawk thinin kuminah erawh Covid-19 hri leng mek avangin Bial leh Tualchhung te hian duhthusamin hun an hmang thei hlawm lo a ni. Bial leh Tualchhung anga hmang kan hriattheihte hmandan tlangpui lo tarlang ila:
1. Rabung bial:
Rabung Hqrs. leh Rabung Vengchhak PYD te chuan Joint in hnatlang an nei a. PHC kawt chu PCC a chhun sak in Member 40 chuang thawkchhuak in Building an tifai bawk. Hliappui PYD te chuan remchan zawkna avangin Biak in leh a vel tifaiin an hnatlang. Murlen PYD in khawlai tifaiin an hnatlang a, member 20 chuang an thawk chhuak bawk. Aiduzawl PYD te hian Vantlang hmun pawimawh hrang hrang te leh kawngpui dung leh Side Drain te tifaiin hun an hmang. Pamchung-ah chuan Evan Lianhnuna, Bial PYD Vice President, rawngbawla awm ho in Kohhran naupang te nen Social work day hi an remchan angin an hmang ve bawk a ni.
2. Khawzawl bial:
Khawzawl Bial PYD te chuan Khawzawl District Hospital-ah thutthleng(Bench) panga (5) dah in, Poor Fund atan Rs 2000/- an hlan tel bawk. He hunah hian Bial hruaitute leh Bialtu Pastor, Gen.PYD Treasurer ni bawk Rev C.Lalmalsawma te an tel thei a ni.
3. Kahrawt bial:
Kahrawt Bial PYD ten Social Work Day denchen in Champhai Covid Care Centre ah tanpuina Rs 13,000/- an hlan. He hunah hian Bial hruaitute leh Bialtu Pastor an tel thei a ni.
4.Darlawn bial:
Darlawn Bial, Ratu Vengpui Kohhran PYD leh Ratu Melkawn PYD te chuan khawlai leh Sawrkar Quarters te tifai in hun an hmang.
5.Zohmun bial:
Zohmun Bial a Zohmun Kohhran PYD ten khawchhung tifaiin hun an hmang. Member engemaw zat an thawkchhuak a ni.
6.Saitual bial:
Saitual Bial chhungah Kohhran pahnih ten social work day an hmang thei a, Tualbung PYD ten community hall leh health sub-centre bul vel tifaiin, vantlang bawlhhlawh paihna hmun an tifai bawk a ni, member 20 vel an hnatlang chhuak a. N.Lungpher PYD ten khawchhung side drain leh khawlai bawlhlawhte an thian fai a, motor te hmang in an pai nghal a, kawtchhuah kawng te leh vantlang hman tura PYD in an siam zunin te tifai in member 45 hnatlang in an chhuak a ni.
7. Khawhai bial:
Khawhai Bial a Tualchhung Kohhran hrang hrang PYD te chuan mahni remchan dan anga hmang hlawmin, Riangtlei Kohhran lamah chuan chawhma lamah khawlai te tifai in chawhnu lamah intih hlimna te an nei a. Chalrang, Vangtlang, Khawhai, New Chalrang PYD te pawhin mahni remchan dan angin khawchhung tifai a hnatlang in hun an hmang bawk
8.Chhingchhip bial:
Chhingchhip Bial a Hqrs. Kohhran PYD ten chuan Social work day pualin Chhingchhip 4C tanpuina sum an hlan a, PYD ten vantlang zunin an siam tawh chu rawng hnawih thar in hnatlang neih a ni bawk.
9. Kawlkulh bial:
Kawlkulh Bial chhunga Kawlkulh Venglai PYD ten vengchhung leh Tuikhur tifai in hnatlang an nei a, Vankal Kohhran PYD ten khawchhung tifai in hnatlang an nei bawk.
10. N.Vanlaiphai bial:
N.Vanlaiphai Bial PYD te chuan N. Vanlaiphai PHC ah thutthleng (Bench) pahnih, Khawlailung PHC ah Bench pakhat, Lungkawlh Sub Centre ah Bench pakhat an dah a. N.Vanlaiphai Joint PYD te’n khawlaidung te fangin Bawlhhlawh chhar faiin hnatlang te an nei a, Lungkawlh PYD te pawhin khawchhung hnim te thlo fai leh khawlai dung Bawlhhlawh te chhar faiin hun an hmang. Tin, Lungkawlh PYD te hian an PYD pualin Lungkawlh Sub-Centre ah Bench pakhat leh hmunphiah(3) an pe bawk
11. Zemabawk bial:
Zemabawk Bial PYD ten chuan Cancer Hospital leh khualbukah damlo awm, an mahni awmpuitu te leh a hnathawk te tan tlai chawhmeh an siam sak.
12.Hnahlan bial:
Hnahlan khawchhung a Tualchhung Kohhran Pali awm a PYD te chuan a huho a hmangin Hnahlan khawtlang in a an tui tlanna tuikhur silfaiin, a bul vel hnim leh bawlhhlawh te an thianfai a, member 80 vel an thawk chhuak. Vapar lama PYD te pawhin khawchhung bawlhhlawhte chhar fai leh kawng kam samfai in hun an hmang bawk.
13. Keifang bial:
Keifang Bial a Maite Kohhran PYD te chuan khawchhunga bawlhhlawh zingkarah motor pathum hmangin an paih a, member thahnem tak thawk chhuakin, Chaw ei kham ah khaw chhung kawngpui tha lo lai te siam tha in, member 60 vel an thawk chhuak a chhunah sawhchiar tuihnai tak leh thingpui ruai buatsaih a ni bawk.
14. Ngopa bial:
Ngopa Bial Selam Biakin Pui leh Selam Vengthar Kohhran PYD ten Joint in khawchhung tifai in bawlhhlawh bawm te khawchhung ah an dan a, YMA hall te tifai a hnatlang in member 50 vel an thawk chhuak a ni. Ngopa Damaska Kohhran PYD ten zingkar ah vengchhung tifai in an hnatlang bawk.
15. Serchhip Dinthar:
Serchhip Dinthar Bialah Hriangtlang PYD te chuan, Pickup 2 hmanga lung (Boulder)te phur khawm in, motor kawngpui chhe zual laite an siam tha a, khawchhung a Step te an tifai bawk.
16. Thingsulthliah bial:
Thingsulthliah Bial ah Tualchhung pahnih Tlangnuam leh Thingsulthliahte chuan Biakin leh a chhehvel bakah kawngpui kamte tifai in hun an hmang bawk.
Mithar leh Baptisma chang thar:
October 3, Pathianni khan Champhai Dinthar Kohhranah mithar pali chu Evan Dr.Charles Romalsawma’n a senglut. Dinthar ah hian Evan F.Vanlalruata’n District Missions Department hmalakna in rawngbawlna a nei mek a ni.
Bawngkawn Bial, Ramhlun Sport Complex Preaching Point-a Sis.Sangkumi Pachuau B/W rawngbawlna kal zelah October 3, Pathianni vek khan Bialtu Rev.C Mawizuala kutah patling pahnih in sual ngaidamna Baptisma an chang.
October 6, Nilaini zing inkhawmah Zemabawk Vengpui Kohhranah lawi turin mithar pakhat Bialtu Pastor, Rev R.Laltlankima chuan sengluhna a nei bawk.
———-
Hruaitute Programme:
Rev Biaksangzuala, District Superintendent chuan October 5 leh 6 khan a bial hmui mek Chhingchhip bial tlawhin, October 5, Thawhlehni khan Mualpui Kohhran Biakin sak mek chu a enpui bakah a hnatlanpui nghal a ni. Rev Biaksangzuala hi Mualpui bialtu Pastor, Rev H.Lalropuia chuan a tawiawm a ni.
Rev VL Hnemtluanga, District Treasurer leh Rev KVL Hmangaihkima, Missions Director te chuan September 29 atanga October 4 chhung khan Keifang bial, Khawzawl bial leh Champhai bial te tlawhin Kohhranpui bakah District Missions Department hmalak mekna te an enpui a, October 3, Pathianni khan Champhai bial-ah hun hmangin District Missions Conference October Pathianni hnuhnungbera Champhai Bial ten an thlen tura an inbuatsaih dan leh tul dangte an enpui nghal a ni.
Facebook