Pennet News Service : October 27 – November 3

Pu Editor Zahawm tak,

 
UPC kohhran thutharte hi khawngaiha minlo tih chhuahsak leh turin ka ngen a che.
 
———————————————-
 
UPCNEINEWSSERVICE OCT 27-3.2019
———-
Orphanage Sunday :
Nov 3, Pathianni hi UPC North East India Kohhran ni pawimawh Orphanage Sunday a ni a, India hmarchhak pum huapa hman a ni ang.

November Pathianni hmasa ber hi kum tin Orphanage Sunday atana a hman thin a ni a, hemi nia thawhlawm lakkhawmte hi Kohhran enkawl fahrah chawmna in Audrine Scism Children Home, Kolasib-pual a ni ang. Tin, hemi nia chhiarchhuah tur Orphanage Sunday thuchah pawh Tualchhung Kohhran tinah thawnchhuah vek a ni bawk.

Audrine Scism Children Home hi Kum 1985 December 30 khan Executive Board chuan din nise tia pass-in kum 1992 january 15, khan Khuangpuilam Kolasib ah  din a ni a. Rev. Stanley Scism an building sak bultanna tur lungphum  a phum a ni.

UPC-NEI Kohhran rorelna sang Executive Board chuan Home  naupang ten awlsam leh tha zawka zirna kawng an zawh theihnan tiin  kum 2002, May 2 khan Home complex chhungah School din a ni a, a hming atan Susane Downs Boarding School tih a ni. Tichuan Home leh School hi Project khatah chhun finin Compassion Center Project tih a ni a, tunah hian Rev. Jh Zahluna chuan Project Director mawhphurhna chelhin a hmunah hian a awm chilh a ni.

Hetianga hmalak chhoh tak a nih vang hian kohhran rorelna sang Executive Board April 16, 2004 a neih chuan; November Pathianni hmasa berah Orphanage Sunday hman thin nise tiin a ruahman a, kumtin hman thin a ni ta a ni.

Kumin Orphanage Sunday hian ASC Home thawktu leh Naupang te chuan Home chapel ah anmahni puala programme siamin an hmang dawn a ni.

Tun dinhmunah  Audrine Scism Children Home ah hian Mipa 20 Hmeichhia 23 avaiin Naupang 43 an awm mek a, Home Superintendent Evan. C. Vanlalruata hnuaiah  thawktu 13 an awm mek.  Susane Downs Boarding School(SDBS) ah Principal Evan. Zarzoliana enkawlna hnuaiah hian zirtiru leh staff dang 21 awmin,  zirlai naupang 562 vel an awm mek bawk a ni.
———

General Sunday School Board :
Oct ni 24, Ningani khan Tura, Meghalaya ah General Sunday School Board neih a ni.

General Sunday School Board hi General Director Rev. R. Laichhingpuian a kaihruai a, General Kohhranpui atangin General Suptd Rev. Lalmalsawma Sailo leh General Secretary Rev. R. Lalrinsanga ten an ho bawk. An thurel tlangpui te :

1. General Sunday School Executive Committe in exam dan tha zawk te zawng a, question set leh a tul anga mawhphurhna la turin Examination board din ni se a tih chu General board hian a approve.

2. Zirlaibu ziaktu te honorarium pek thin chu tihsan a ni.

3. Assam field in Primary kum 2-na translate nan Rs 8000 leh publish nan Rs 27,000/- an dilna chungchang ngaihtuah a ni a, a lehlin tirna Rs 8000/- chu pek phawt ni se,  endik a, a bu a chhuah dan tur chu hotuten kawng lo dap mai se tih a ni.
4. Calvary Bible College puala budget Rs 40,000/- nei ve tura Theological Education board in a ngenna anga pass a ni a, Kum 2020 budget ah khung nghal tura tih a ni.

5. Kum 2020 budget tur a ruahman thlir hovin, siam rem ngaite siam felin Rs nuai sawmthum pariat ruahman a ni a, Hei hi executive board ah pawmpui tura thlen a ni ang.
———

General hruaitute Programme :
General Superintendent Rev. Lalmalsawma Sailo chuan Kolkata Missions Field Conference October 30 & 31,chhunga neih chu hmanpuiin rawngbawlna a nei a, Oct ni 31, Ningani khan Rev. TF Tenney Memorial Bible School Property Dedication Programme ah hun a hmang bawk. Nov 2 inrinni ah Aizawl a let leh ang.

General Treasurer Rev. Zohmingthanzama chuan Nov 1 atanga ni 3 chhunga Siaha bialin Council venga Rawngbawltu pual seminar an buatsaihah resources person-ah tangin rawngbawlna a nei.
———

District hrang hrang rawngbawlna chanchin:

Lunglei District :
Oct.25-27 chhung khan Bunghmun bialte chuan Tleu Local-ah Revival inkhawmpui hlim takin an hmang.

He inkhawmpuiah hian  Speaker hran awm lovin bial chhung rawngbawltu te’n hun an in hman chhawk a, Revival lo thleng zelah Oct.28 thawhtanni khan Pu Lalṭhapuia sailo leh Pu Lalhmangaihzuala Sailo Tleu Local te chuan Rs. 5000 ve ve thawhin, mi ṭhahnemngai te’n thawh belhin Pathian chawimawina neih chhunzawm a ni a, hlim taka hun hman a ni. He inkhawmpui ah hian, bial chhung atangin khawmpui palai thahnem tak  an kal a ni.
———-
Crusade :
Oct.31 zan atang khan Bunghmun Local Missions Department-te buatsaihin Crusade  neih tan a ni a, Speaker atan Pangzawl bialtu Pastor R.Lalramhluna chu hman a ni a, Crusade hi Nov.3 Pathianni zan thleng hman a ni ang.
——-
Bial Sports :
Oct.26, Inrinni nileng khan Pukpui Field ah Pukpui Bial PYD te chuan Bial Sports hlim takin an nei.

Sport hi chawhma  Dar 11:00 ah function ṭanin Sport Committee Chairman Bro. R. Lalremsanga’n hun a kaihruai a, Bialtu Pastor Rev. PC. Nghakliana’n hunserh hmangin, Bial PYD President Rbt. P. Samson Vanlalfela’n Sports hawnna a nei a, Sports Committee Secretary Bro. R. Vanlalnundanga’n Oath taking a neih hnu ah infiamna ṭan a ni

Sport ah hian Major games ah item 7 leh Individual games ah item 6 hmangin intih hlimna hi neih a ni a, a pumpuiah College veng Local chu pakhatna an ni.
——-
Seminar :
Oct.27 Pathianni chawhnu khan Zawlpui Local-ah District Thianghlimna Committee-te chuan Seminar an buatsaih a, Resource Person atan District Thianghlimna Committee Treasurer Lalramlawmi Sailo Bw leh Evan. MS Dawngliana Hnamte te hman an ni.

Seminar thupui ah hian  Zuk leh hmuama thianghlimna, Corruption laka thianghlimna, Hmeichhiat/Mipatna laka thianghlimna leh Information&Technology a thianghlimnate zir ho a ni.

Nov.3 Pathianni hian Thenhlum Local-ah District Thianghlimna Committee hmalaknainCampaign neih a ni dawn a, Campaign hi District Secretary Rev.PC.Lalfakawma leh Rbt.P.Samson Vanlalfela ten an nei ang.
———
Joint Conference :
Oct. 25-27 chhung khan Zawlpui bial PYD & LAD Joint Conference chu Zawlpui Local-ah neih a ni a, Speaker atan Haulawng bialtu Pastor Rev.R. Lalsangzuala chu hman niin, Thupui atan  ‘I din thar leh ang u’ tih chu hman a ni a, an rorel langzar zualte:

Kum 2020 Joint  Conference chu Nov.6-8 chhungin neih nise, Speaker atan bialtu Pastor tha tih a ni a, Thupui atan ‘Chanchin tha hi hril rawh u’ tih chu hman nise tha tih a ni bawk.  Tin,Pastor Quarters ah carpet phah nise an tih bakah  Bible ralchhan buatsaih nise an ti bawk.

PYD te chuan Putlungasih Home Missionary Quarters-ah khum dah nise an ti a, Bial chhung atangin Bible School (PBS/CBC) atam thei ang ber kal tura hmalak leh a kalte senso tlem a zawng tum sak nise an tih bakah bial pawn fehchhuah te an rel a.

LAD ten Putlungasih Home Missionary Quarters-ah Ceiling fun dah ni se an ti a, Kum 60 chin chunglam Conference kalte chawimawi ṭhin ni se an tih bakah Pastor Quarters-ah Dekchi leh Parda zar tur lei nise an ti bawk.
——–
Fehchhuak :
Oct.27 Pathianni khan Haulawng Bial PYD leh LAD   hruaitute chu Chengpui Missions Field-ah rawngbawlin hun an hmang.

Bial PYD leh LAD  hruaitute hi an vaiin Member 14 an kal thei a,  hlim takin hun an hmang a ni.
———-
Rawngbawltu Ni :
Oct.26 inrinni khan kumtina an lo tih ṭhin angin Headquarters Local-te chuan Rawngbawltu ni Conference Hall-ah an hmang.

He rawngbawltu ni hi 1st Session leh 2nd Session-ah then a ni a, 1st Session hi Local Chairman Evan Ṭhasiama Sailo in a kaihruai a, Rev.R.Lalrosanga chuan ‘Isua lo kal lehna’ tih thupui hmangin zirtirna a pe a, 2nd Session hi Local Vice Chairman Upa J.H. Pachhunga chuan kaihruaiin, ‘UPC te khawvel’ tih thupui hmangin District Superintendent Rev. C. Vanlalena chuan Kohhran chanchin leh  rawngbawlnate projector hmangin a entir a, Rawngbawltute awmdan tur chi hrang hrang sawi hona neih a ni bawk.

He rawngbawltu ni ah hian rawngbawltu leh an nupuite bakah Department OB te telin hlawk takin hun an  hmang a ni.
———
Positive Attitude :
Oct.27 Pathianni khan Headquarters Local PYD te chuan Conference Hall-ah Positive Attitude tih thupuiah hmangin thuzirna an nei a. Resource person atan Tv. T. Lalrinmuana Supervisor cum warden HATIM chu hman a ni.

He hun hi Bro.R.Lallawmkima chuan a kaihruai a, Resource Person Tv.T.Lalrinmuana hnen atangin Positive Attitute pawimawhna leh a neih theih dan tur hrang hrangte zirho a ni a, member 35 an kal khawm a ni.
——–
Joint Conference :
Oct.25-27 chhung khan Chawngte bial P.Y.D. leh L.A.D. Joint Conference chu Lungrang S Local-ah neih a ni a, Speaker atan Luangmual bialtu Pastor Rev.Lalbiakdika Chawhte chu hman a ni, Conference thupuiah hian ‘Thuthlung kha rawn pawisa ang che’ tih chu hman a ni. An rorel tlangpuite :

LAD rorel thuchhuak :
Kum 2020 atan ASC Home Rs.3000 a tanpui leh nise, Conference palai kum 70 chin lawmmam siam leh nise Zehtet Missions Field tanpuinan Rs.5000 ruahman niin, Bial huap a bible ralchhan siam leh nise an tih bakah, Chawngte area welfare Lunglei & Aizawl Rs.1000 ve ve a tanpui nise, Kum 2020 ah bial pawn fehchhuah Lungsen North ah neih nise an ti bawk.

PYD rorel thuchhuak :
Bial huapin revival Crusade neih nise, a hmun atan Upper Lungrang an ruat a, Speaker atan Evan.F.Lalsanglura rawih nise. Chawngte Welfare Lunglei tanpuina pek ve nise an tih bakah bial chhung PYD din lohna Local-ah PYD din tura hmalak nise an ti bawk.
———
Bial Missions Conference :
Oct.25-27 chhung khan Theiriat bial Missions Conference chu Hrangchalkawn biak inah neih a ni a, Speaker atan bialtu Pastor Rev.K.Lalchhuansanga chu hman niin, thupui atan ‘Chanchin tha hi hril rawh u’ tih chu hman.

Oct.26 inrinni ah rorel a ni a, an rorel langsar zual zingah Ralvawng Local leh Sairep Preaching Point ah te Crusade neih nise an tih bakah kum 2020 bial Missions Conference chu October Pathianni hnuhnung ber nise a hmun atan Dawn Local nise an tih bakah District-a thlen tur thu pawimawh tak tak an ngaihtuah bawk.
———
Joint Revival :
Oct.25-27 chhung khan Cherhlun Bial leh Thingsai Bial te chuan S. Chawngtui Local-ah Joint Revival hlim takin an hmang.

He hunah hian Palai 100 chuang kalin revival hun hlimawm tak hman a ni a; Pastor H. Lallawmsanga, Thingsai Bialtu leh Pastor K. Lalnunpuia, Cherhlun Bialtu Pastor te Speaker-a hman an ni. Oct.28 (Thawhtanni) khan S. Chawngtui Local te chuan he Joint Revival hmanga kal te hi chelhin ruai theh a ni a.,Thlarau lam hla nen hlim takin hun hman chhunzawm a ni.

He Joint Revival hmang tura kal Bro. Zodinpuia, New Ngharchhip Local Bike accident avanga nunna chan ta pualin Bawm hun a ni a; hetah hian Rs. 5,500/- chuang hmuh a ni bawk.
———
PCD Seminar :
Nov.2 inrinni hian Pentecostal Children Department Rahsiveng bial te chuan Hauruang Local ah bial chhunga PCD zirtirtute pualin Seminar an buatsaih dawn a, Resource Person atan District PCD Senior Adviser Rev.PC.Lalfakawma leh District PCD Secretary Rbt.C.Lalramluahpuia te an hmang ang.

District PCD Senior Adviser Rev.PC.Lalfakawma hian Mode of Speech in Public leh Teaching Method tih thupui hmangin zirtirna a pe ang a, District PCD Secretary Rbt.C.Lalramluahpuia chuan Thianghlimna tih thupui hmangin zirtirna a pe bawk ang.
———
Rally :
Nov.3 Pathianni hian Luangmual bial Sunday School Department-te chuan Lunglawn Zaia veng biak inah Rally an hmang dawn.

He rally ah hian bial chhung Local hrang hrangte chu Recitation, changvawn in sawi siak, Lengkhawm zai leh Quiz hmang ten intihsiakna an nei ang a, zan lamah result puan leh lawmman sem inkhawm neih a ni bawk ang.
———

Aizawl East District
Missions Conference report :
Aizawl East District Missions Department  Conference Vawi 26 chu October 25 atanga 27 chhung khan Thingsulthliah Playground-a pandal sakah hlim taka hman zawh a ni.

Kumin-ah hian thupui hranpa nei lovin mi hrang hrang te hnen atangin Pathian thuchah ngaihthlak thin a ni. Inkhawmpui tan zan khan Rev R.Lianzama, Missions Director chuan Inkhawm kaihruaiin Rev H.Dingliana’n Inkhawmpui hawnna leh Pathian hnena hlanna a nei a, Bialtu Pastor, Rev Rohmingliana hnen atangin palai lawmna thu ngaihthlak niin Evan H.Kristiana leh Rev R.Lalthanzuala te hnen atangin Pathian thuchah ngaihthlak a ni. Serchhip bial, Thuampui Bial PYD leh Sis Lalremsangi te hnen atangin fak hla ngaihthlak niin Pastor R.Malsawma’n malsawm tawngtaiin inkhawm a titawp a ni.

October 26, Inrinni nileng khan Thingsulthliah Biakinah Rev R.Lianzama, Director kaihruaiin rorel inkhawm neih a ni a, hetah hian bial atang leh Official atanga agenda lut engemaw zat awmin chung zinga an thu passed langsar zualte:
1. Kum 2021 Inkhawmpui chu Champhai bial-ah nghah a ni a, ruat sa angin Kum 2020-ah E.Lungdar Bial-ah Inkhawmpui neih leh a ni ang.
2. Kum 2020 atanga hman tan turin Inkhawmpui thlengtu tanpuina Rs 200,000 ni thin chu Rs 250,000-ah tihsan a ni.
3. Aizawl khaw hnaih khaw lian deuh deuh-ah District Missions Department hmalakna in Crusade neih tura tih niin District Board kutah dah a ni.
4. District Kohhranpuiin District Missions Support Rs 500,000 a dah thin chu Kum 2020-ah chuan Rs 500,000-a tih pun rawtna awm chu District Kohhranpui-ah thlen tura tih a ni.
5. Missions Department logo-ah Missions Department din kum chhut kai ve ni se tia rawtna awm chu General Missions Department-ah thlen tura tih a ni.
Conference-ah hian palai mi 362 ten rorel-in District Kohhranpuii hruaitute bakah Rev R.Lalhawia, General Missions Director chuan a telpui bawk a ni.

Rorel inkhawm neih zawh hian District Board neih chhunzawm nghal niin hetah pawh hian agenda lut engemaw zat a awm a, chung zingah an thu passed thenkhatte:
1. Kum 2020 atang chuan Home Missionary te lawmman thlatin Rs 10,000 ni tawh tura tih niin Missionary lak dawnin advertisement chhuah ni se tih a ni a, Kum 2020-ah Home Missionary panga lak phawt ni se tih a ni. Hetiang hian Home Missionary la tur Board siam nghal a ni.
District Kohhranpui OB, District Missions OB bakah Aizawl khawpui chhung Bial Missions Director.
2. Home Missionary lak tharte Induction Training neihpui tawh tura tih a ni.
3. Aizawl khaw hnaih khaw lian deuh deuh-ah District Missions Department hmalakna in Crusade neih tura tih District Board kutah dah chu ngaihtuah chhunzawm niin Executive Committee in tul a tih angin ruahmanna lo siam se tih a ni.
District Board-ah hian Evan Lalthuthlunga, Treasurer chuan Kum 2020 Budget Estimate pharhin sem that ngaite siamthat a nih hnuah District Kohhranpui Board pawmpui turin Kum 2020 Budget atan Rs 9,027,500 chu an pawm a ni.

Inrinni-ah hian rorel ve lo tan pandal-ah vantlang inkhawm neih a ni a, hetah hian Evan TC Kapzathanga’n inkhawm kaihruaiin Evan HK Lalhmangaiha hnen atangin thusawi ngaihthlak a ni a, Solo bakah Sis Ganden Pujen, Manigong, Arunachal hnen atangin Special Item thlirho a ni bawk.

Inrinni zan inkhawm hi Rev R.Lianzama, District Missions Director chuan kaihruaiin Evan Rualthankhuma kaihhruaiin Doctrine sawirual a ni a, Rev Pc.Lalnghakliana leh Rev Darchhawna te hnen atangin thuchahngaihthlak a ni. Bethel PYD, Mualpui Bial leh Sis Vanlalhmangaihtharzeli te hnen atangin fak hla ngaihthlak niin Pastor K.Lalhmingmawia’n malsawm tawngtaiin inkhawm a titawp a ni.

Pathianni chawhma Inkhawm Evan Lalramzauva, Secretary chuan kaihruaiin Rev R.Lalhawia, General Missions Director hnen atangin thuchah ngaihthlak a ni. Upper Republic Bial, Bazat bial, Champhai bial zaipawl te bakah SIs Laltanpuii te hnen atangin fak hla ngaihthlak a ni a, Evan Lalthuthlunga, Treasurer kaihhruaiin Kum 2019 Budget pe tlakte leh khum bialte hnenah lawmman semna neih a ni. Chawhma inkhawm hi Rev Biaksangzuala, District Secretary chuan malsawm tawngtaiin a titawp a ni.

Pathianni chawhnu-ah Evan Lalthuthlunga, Treasurer chuan inkhawm kaihruaiin Rev R.Lianzama, Director hnen atangin thuchah ngaihthlak a ni. Hruaitute chawimawina Evan Lalramzauva kaihhruaiin neih a nih bakah Bethlehem Bial, Bawngkawn Bial zaipawl bakah Sis Lalhmunmawii Parte leh Sis Laldinthari Hauhnar te hnen atangin fak hla ngaihthlak a ni a, Rev Vanlalfela Ramtiam, District Treasurer in malsawm tawngtaiin inkhawm a titawp a ni. Pathianni chawhnu inkhawmah hian  Puri, Odhisa Missions Field Biakin sakna tur pualin thawhlawm khawn a ni a, hetah hian Cheng singruak chuang hmuh sak an ni.

Pathianni zan inkhawm Rev R.Lianzama, Director in kaihruaiin Rev Rosanga Kawlni, District Superintendent chuan thuchah sawina a nei a, T.Upa Lalthansanga Colney, Evan H.Lalrinawma bakah Zemabawk Bial zaipawl leh Pentecostal Choir te hnen atangin fak hla ngaihthlak a ni. District Missions Inkhawmpui hi Rev R.Lianzama, Director chuan malsawm tawngtaiin a titawp ta a ni.

Aizawl East District Missions Inkhawmpui-ah hian Bial hrang hrang atangin palai kal in report 950 an ni.

Kumin hi Aizawl East District Kum 25 tlin, Silver Jubilee a nih angin Missions Department te pawhin a lawmna hun inkhawmpui neih chhung hian an hmang a, Inrinni zan atanga Pathianni chawhnu inkhawmah khan Minute 10 chhung District Department te puala thusawina hun siamsakin Inrinni zan khan District PYD President Rev R.Laltlankima’n sawiin Pathianni chawhma-ah Sis F.Lalawmpuii B/W, District LAD President leh Pathianni chawhnu-ah Evan Hr.Lalrindika, District S.S Secretary ten lawmpuina thu an sawi bawk a ni. Jubilee pual hian District Kohhranpui bakah Department hrang hrang hruaitute hnenah thilpek an pek bakah rorel te tan Jubilee thilpek an pe bawk a ni.
———
Missionary Challege Programme :
October 28, Thawhtan zan khan Mualpui Bial PYD te chuan ITI Kohhran Biak inah Missionary Challenge Programme an buatsaih a, General Missions Tresurer Evan PC Lalrokima rawngbawl turin an ruai.

Mualpui Bial PYD Secretary Bro. R. Lalbiakfela’n programme a kaihruai a, Bro. Lalremsanga’n tanna hun hmangin Bial President T.Upa R. Vanlalropeka hnen atangin Bial PYD leh Bial chhunga local hrang hrang ten Missions lam hawia ke an pen dan leh an hmalakna report hrang hrang ngaithlak a ni.

General Missions Tresurer Evan PC Lalrokima hnen atang hian kalchhuak ngeia rawngbawl hi Lal Isua min tirh dan a nih thu leh kalchhuak kher lova awm hmun atanga tirchhuak ve tu ngei nih a tuldan te, General Missions hnuaia Missionary te inpek dan leh an rawngbawlna report hrang hrangte ngaithlak a ni a, kalkhawmte’n an hlawkpui hle.

He hunah hian Mualpui Bial Kumpuan ten Slogan inziahsiak lawmman an sem a, Evan C. Lalremruata ziah chu pakhatna atana thlangin; Slogan ziaktute hnenah lawmman an pe vek bawk. Aizawl East District PYD Kumpuan committee-in Short film competition-a buatsaiha Mualpui Bial PYD ten lawmman pathumna an lak chu Short film Org Secy Bro. Lalrinngheta’n Bial PYD President T.Upa Vanlalropeka hnenah an hlan a, film buaipui dan report hrang hrang pein; buaipuitute hnenah lawmthu a sawi bawk. Programme hman chhungin Sis. Vanlalzami leh Sis. Zothansangi ten zaia rawngbawlna neiin, hlim takin hun an hmang a ni.
——-
Chawimawina :
Serchhip Biakinpui Kohhrana lawi Sis V.Lalremruati te chhungkua chuan November 4, Thawhtanni hian  Pathian chawimawina an nei dawn a, Speaker-ah Bialtu Pastor B.Lalengzauva an hmang ang.
———
Joint Meet :
November 1, Zirtawp zan khan Aizawl East District PYD buatsaihin District PYD hnuaia Sub-Committee peng hrang hrangte chuan Joint meet an nei.

He hun hi District Committee room-ah hman niin Rev R.Laltlankima, President chuan a kaihruai a ni. He hunah hian Sub-Committee hruaitute leh District PYD OB te telin Sub-Committee ten hma an lak tawhna leh an hmachhawp hrang hrang bakah harsatna an neih te sawi hovin hlawktakin hun an hmang a ni. Hetiang hun hi kum dangah pawh hman alo ni tawh thin a ni.
———
Kumpuan Pual :
November 1, Zirtawp zan khan Serchhip Bial PYD Kumpuan Sub-Committee te buatsaihin Serchhip P&E YMA Hall-ah Kumpuan pual hun hlawhtling taka hman a ni.

He hun hi T.Upa Rinnghinglova Sailo, Bial PYD Kumpuan Chairman chuan kaihruaiin Pastor B.Llaengzauva, Bialtu Pastor-in hunserh a hmang a ni. Serchhip Bial PYD ten kumpuan pual hun an hmanah hian “Intodelh” tih thupui hmanga Essay inziahsiak an buatsaih result puanna hun an hman bakah “Intodelh” tih thupui hmang thovin Drama Intihsiakna hemi zan hian an buatsaih bawk a ni. He hunah hian bial chhung atangin PYD member an kal tha hle a ni. Serchhip Bial PYD Kumpuan Sub-Committee te hian bial chhungah Campaign neiin hun an lo hmang tawh bawk a ni.
——-

District Hruaiute Programme:
Rev Rosanga Kawlni, District Superintendent chuan November 2, Inrinni hian Keifang biakin hawnna  anei a, Pathianni thleng hun a hmang ang.

Rev Biaksangzuala, District Secretary leh Rev Vanlalfela Ramtiam, District Treasurer te chuan Pathianni hian District Hqrs. Kohhranah hun a hmang ang.

————-
North Mizoram District
District Missions Conference report :
North Mizoram District Missions Department conference vawi 39na  Oct. ni 25-28 chhung  khan Headquarters Biak in, Tuikhuahtlangah hlim taka hman a ni.

District Missions Conference hi Oct. ni 25 Zirtawp zanah tanin Rev. C. Lalthantluanga Dist. Missions Director in a kaihruai a, Rev. K. Lalduhsanga, North Mizoram  Dist. Kohhranpui Treasurer chuan Confe. a hawng.
Confe.-ah hian Thupui “Chanchin tha hi hril rawh u” tih hmangin thupui hi then 5-ah then lehin  heng mite hian Pathian thuchah an sawi:-
1)  Pastor SR Lalhualhima, Field Treasurer, Arunachal Missions Field , Thupui: Engtin nge kan hril ang –
2) Rev. K. Malsawmtluanga, Director Sunday School Dept.- Thupui: Tute nge hril ang
3) Rev. Laltluanga, Supdt. North Mizoram Dist.- Thupui:  Tu hnenah nge kan hril ang –
4) Evan. RK vanlalngaia, Secretary, Dist. Missions Dept.: Thupui: Thilpek in
5) Rev. C. Lalthantluanga, Director, District Missions Dept.: Thupui : Chanchin tha hi hril rawh u
Conference neih chhung hian District Missions hruaitu pathum Rev. C. Lalthantluanga Missions Director, Evan. RK Vanlalngaia Missions Secretary leh Evan. MS Dawngliana Missions Treasurer ten an kaihruai a ni.
Oct. ni 26 Inrinni chawhma dar 10: 30 -ah tanin Conference rorel neih a ni a, Chawhma lamah Secretary Report leh Financial report bakah Missionary Report te ngaihthlak  a ni. Report atanga a lan danin hetiang hi North Mizoram District Missions Department dinhmun a ni.
Norh Mizoram District Missions Department hian Home Missions Field 10 neiin, chung te chu
1) Bajerung 2) Damdiai 3) Dilzawl 4) Kolalian 5) Marpara 6) Persang 7) Rasdali 8) Vawngawnzo 9) West Phulpui leh  10) Zomuantlang te an ni a, Field hi Missionary 10 in  enkawlin chung te chu…
1) Sist. Esther Lalrawngbawli Bw 2) Evan. Lalrampana 3) Evan. H. Lalnunzira 4) Sist. Khawlliani BW 5) Evan. Vanlalawia 6) Isak Lalrohlua 7) Evan. Hrangchhankhuma 8) Evan. RS Lalnunmawia 9) Sist. Lalbiakzuali leh 10) Sist. F. Lalsiamliani te an ni.
Heng Field bakah hian Missions Department enkawl lai Tumpanglui khua leh Tuipuibari Center a awm bawk a, heng field-ah te hian Casual worker Sist. Lalhriatkimi, Evan. Lalthianghlima leh Upa Lalruatsang ten an enkawl mek bawk.
Conference chhung hian Field atanga Item nei tur khaw hnih Vawngawnzo Missions Field leh Rasdali Missions Field te sawm niin;  Missions Field  pahnih te hian zai leh lam hmuhnawm tak tak an entir  a,  mipui rilru a hneh hle.

Inrinni chawhnuah Conference rorel neiin; an rorel tlangpui te:-
i) Conference neihna hmun tur indawt hetiang hian passed a ni 1) Kum 2020-ah Kolasib Diakkawn 2) Kum 2021-ah Rengdil Bial 3) Kum 2022-ah Maubawk Bial leh Kum 2023-ah Sumsuih bial te a ni.

ii)  Field thar 2 Tumpanglui Missions Field leh South Chhimluang Missions Field hawn ni se tih chu pass a ni.

iii) North Mizoram District huapin Missionary Convention neih ni se

iv) Missionary Challenge neih ni se

v) Missionary te First Aid Training buatsaih tur District kohhranpui a thlen tih te rel a ni.

Conference neih chhung hian Thlarau boruak a thain kohhranhote zingah siamtharna chang mi thahnem tak an awm a, Missions rawngbawlna kawngah kohhranteah hlawkna tam tak a awm beisei a ni.
Confe. chhung hian General Missions Director aiawhin Gen. Missions Treasurer Evan. PC Lalrokima’n confe a ho tluan thei a, Gen. Supdt. Rev. Lalmalsawma Sailo leh Gen. Treasurer Rev. Zohmingthanzama ten an ho theih bakah District Kohhranpui hruaitu Pathum Rev. Laltluanga dist. Supdt. Rev. Chhiarpuia Dist. Secy leh Rev. K. Lalduhsanga Dist. Treasurer ten Confe. an hmanpui bawk.
District Missions Confe. tiak tuk Oct. ni 28 Thawhtanni khan District Missions Board neih nghal niin; Gen. Missions Director Rev. R. Lalhawia’n rorel a ho thei a, Dist. Kohhranpui hruaitu Rev. Laltluanga leh Rev. Chhiarpuia ten an ho bawk.
District Missions Board hi District Missions Director Rev. C. Lalthantluanga’n kaihhruaiin Conference rorel bawhzui ngai Missionary Convention, Missionary Challenge leh Missionary First Aid Training chungchang an ngaihtuah a, District hruaitute leh Khawpui chhung Bial Director ten tul leh pawimawh chu lo buaipui se an ti.
District huam chhung Bial Director ten Gen. Missions Field fan leh ni se tih chu passed in District Missions Executive leh General Missions hruaitute inberawnin a hun leh hmun turah ruahmanna lo siam se an ti.
Missionary hlawh tuna hman lai chu ennawnin tihsan rel a ni a, bawhzui ngaite District hruaitute kutah dah a ni.
———-
Pastor Qtrs luahlut :
Oct. ni 29 thawhlehni khan Chawlhhmun bial Pastor qtrs thar chu  luah luh a ni. Chawlhhmun Bial Pastor Qtrs. hi kar kalta Oct. ni 25 Nilaini khan Dist. Supdt. Rev. Laltluanga’n a hawng a, hawnna inkhawmah hian Aizawl khaw chhunga Pastor Bial vawngtute pawh an kal tha hle.
Chawlhhmun Bial hi kum 1992-ah hawn niin; tunah han kum 27-a upa an ni ve mek a ni.
Chawlhhmun Bial Pastor Quarters District in a lei thawmthat nan hian Bial chhung Department hrang hrang Missions Dept. LAD, PYD leh Sunday school Dept. ten sum leh pai an thawhkhawm bawk.
———–
Bethel :
Chanmari West Kohhran ten thlarau lama intuaitharna atan tawngtai Bethel neih a rel angin, a thawhkhatna atan Church Board Member-ten vawiin Oct  ni 30, Nilaini khan Sakawrtuichhun hmun a Camping Centre-ah tawngtai Bethel neih a ni a, Bialtu Pastor hovin hlim takin hun an hmang.

Zing lam dar 11:00ah Camping Center Biak inah hun bul tanin Kohhran Chairman Evan C Lalremthanga’n Pathian thu chhiarna a neih zawh hnuin Bialtu Pastor Rev C Lalramthanga chu hun hawnna nei turin a sawm a, Bialtu Pastor hnen atang hian Pathian thu ngaihthlak niin tawngtaina a nei nghal a, thlarau lam hlate nen hun hman a ni. Tin, Bialtu Pastor hian Church Board member tin te hriakhnawih rawngbawlna a nei zui a, chumi zawhah member ten Pastor lu chungah kut nghatin tawngtai sakna neih zui nghal a ni bawk.

Biak Inah hian bethel neih zui nghal niin a hnu lamah Camping Centre huanah mahni rem chan danin tawngtaina neih chhun zawm a ni a. Hun tawp lamah Biak Inah lut khawm lehin tawngtai rualna neih leh a ni a, hemi zawh hian Bialtu Pastor in Tawngtainain hun a khar.
Krismas hma hun remchang ah hian a thawhhnihna atan  rawngbawltu chin leh a duh apiang tan tawngtai Bethel neih leh turin ruahmanna an siam bawk. (Pic. Tawngtai Bethel nei)
———

North Mizoram District Hruaitute Programme :

Dist. Supdt. Rev. Laltluanga chuan Nov. ni 3 Pathiani hian Damparengpui Bial Tuirum-ah rawngbawlna neiin a fehchhuak. Tuirumah hian kohhrana member thar sengluh programme a hmang dawn a ni.

District Treasurer Rev. K. Lalduhsanga chuan Oct. ni 28 Thawhtanni khan Mamit hmuna kohhran hmun lo ram enkawl leh buaipui ngai te a hmunah thlithlaiin a feh chhuak.