General Sunday School Board :
October ni 10, Nilaini khan General Hqrs Office, Mualpui Salem veng Aizawlah General Sunday School Board neih a ni.
Board hi Rev. R. Laichhingpuia’n a kaihruai a, rokhawlhna avanga Board a tel hman lo South East Nagaland leh Tripura District atanga Board member te bak chu Mizoram chhunga board member te bakah state pawna member te pawh an kim hle. General Hruaitute pawhin Board hi telpuiin General Superintendent Rev Lalmalsawma Sailo, chuan Kohhran rawngbawlna report leh General Sunday school in hmasawnna thar kan hmuh zel avangin lawmthu a sawi a. General Secretary Rev R Lalrinsanga, pawhin thu tawi sawiin Sunday school hi Literature hmanga North east India UPC hmun hrang hranga mite min pawt khawmtu a nih vangin a tangkai tak meuh va. Zirtirna him lo laka kan intihfihlim thiam tulh tulh a tul thu a sawi bawk.
General Sunday School Board Rorel thuchhuak langsar zual te :
1. Manipur State-a District pathum : Churachandpur, Imphal leh Chandel District tan Sunday School Children Meet buatsaih nise. A tul angin General hruaituten lo bawhzui se tih a ni.
2. Kumin 2018 General Sunday School Conference rorel in Sunday school thil tum siam belh nise a tih bawhzuinana rawtna lut hrang hrangte ngaihtuah a ni a, rawt belh duh nei tan kumin 2018 November thla ral hma hun hawn belhin kum 2019 General Board neih hmasak berah final nise tih a ni.
3. Kum 2019 atana sum ruahmanna General S.S Treasurer in a rawn ruahman chu sawi ho a ni a, uluk taka enin siam rem ngaite siam rem a nih hnuah Budget atan cheng Rs 34,98,500 (Nuai 34, singkua sang riat zanga) pass a ni.
———-
Inthlan thuchah :
United Pentecostal Church of North East India Kohhran chuan kan hma lawk, November 28, 2018-a Mizoram MLA inthlanna lo awm turah Kohhran mipuite leh Political Party-te hnena ngenna leh thuchah a siam a. He thuchah leh ngenna hi mipui leh Political Party-ten ngai pawimawha zawmsak turin Pathian hmingin min ngen a ni.
Inthlanna tluang taka neih a nih theih nan leh Pathian ruat roreltu tha thlanchhuah an nih theih nan tualchhung kohhran tinin November 3, 2018 Inrini zanah tawngtaina neih ni se.
Kohhran mipuite hnena thuchah :
1. Inthlan boruak hian rawngbawlna kawngah kohhran leh ringtu mimal nun a tichak lo thei a; chak loh phah nana hmang lo turin politics lama inhmangte pawh fimkhur ni se. Inkhawm leh kohhran thiltih dangahte inthlahdah lova tawngtaia Pathian pawlna tam tawk neih ni se.
2. Party tan lam inan loh avangin kohhranah pawh inrem lohna a awm thei tih hriain, thusawiah leh chetziaahte mi dang hliam lo turin fimkhur ila, kohhran chhungah leh Biakinah phei chuan Politics thil sawi hauh loh ni se.
3. Inthlannaa vote thlak hi khua leh tuite tih tur a nih avangin vote neite chuan vote thlak ngei a tha a. Chutih rualin vote pekna turah ngaihtuahna fim tak hmangin, zu leh mipat-hmeichhiatna kawnga nungchang tha lo leh bawlhhlawh te, mi duham leh hlemhle tak te, Kohhran tana hnawksak leh min thliar hrang tur chite chu ram rorelnaa tel tlak an ni lo va, eng Party ami pawh ni se thlan loh ni se.
4. Candidate-te hnenah therhlo leh hamthatna umin kohhran tumahin intiamkamna neihtir loh ni se.
5. Huai takin mahni vote duh zawng chu vote mai tur a ni a; mahni dikna chanvo leh zahawmna humhimin, therhlo leh sum leh paiin tuman vote hralh loh ni se.
Political party leh candidate-te hnena ngenna :
1. Ram hruaitu tha kan neih theih nan Candidate siamtu zawng zawngten Candidate atan pawl leh kohhran inenbikna awm lovin, Pathian tih mi, ruihtheih thil leh corruption-a fihlim, mipat-hmeichhiat kawnga hming hliau lo leh eng pawl leh eng mi pawh en hrang lo va, an harsatnaa tanpui duh mi thlang chhuak turin kan ngen a ni.
2. Tih puitlin theih loh tur hmanga mipui hnena inzuar lo va, ram leh hnam tana Party-in tih a tum dik tak sawia campaign tur te, tlin duh avanga hmanraw bawlhhlawh: hel pawl leh ralthuam lam chi hmang lo tur te, sum leh therhlo sem lo tur te leh hleihluak taka mimal leh pawl in sawichhiat tawn te, inelsen leh in auh nawmnahte ti lo turin kan ngen a ni.
3. Candidate zawng zawngte hnenah duhsakna kan hlan a. Thlan tlin member apiangte pawh term puitling hmang zo ngei turin duhsakna kan hlan a ni.
4. Thlan tlin apiangte chu anmahni thlangtu mipui leh roreltua ruattu Pathian zah chunga ram leh hnam tana rinawm taka hna thawk tur leh mimal hamthatna uma therhlo leh eng thil maha lei theiha awm lo turin kan ngen a ni.
———
September ni 25 atanga ni 28 chhunga UPCI General Conference chuan kumin hi Secretary a ruat thar kum a nih angin UPCI Secretary atanga Department hrang hrang Secretary te a ruat thar a, heng mite hi ruat tharte chu an ni :
UPCI General Secretary-
Scott Graham
Global Missions Secretary
Scotty Slaydon
North American Mission Secretary
Bill Hobson
Children’s Ministries Secretary
Robbie Knox
General Youth Secretary
Justin Reinking
Ladies Ministries Secretary
Jane Buford
——-
General Hruaitute Programme :
General Superintendent Rev. Lalmalsawma Sailo chuan North Mizoram District LAD Conference vawi 50-na (Golden Jubilee Conference) Oct. Ni 12-14 chhunga hman mekah telpuiin hun a hmang.
———
Bial Missions Conference report :
North Mizoram District huam chhunga Bial 30 te chuan Oct. Ni 5-7 chhung khan Bial Missions Conference tluang takin an hmang.
Bial Mission Conference hi District Missions hruaitute te bakah District Puipa 3 pawhin Bial hrang hrang hetiang hian an hmanpui a ni:-
1. Rev C Lalthantluanga, District Mission Director-in Kawnpui Bial
2. Evan RK Vanlalngaia, District Mission Secretary in Sialsuk Bial
3. Evan JH Malsawmdawngliana, Dist. Mission Treasurer-in Chaltlang Bial
4. Rev Laltluanga, District Superintendent in Sumsuih Bial
5. Rev Chhiarpuia, District Secretary in Zawlnuam Bial.
6. Rev. K. Lalduhsanga, Dist. Treasurer Bairabi bial ah
District Sunday School Director Rev. K. Malsawmtluanga pawhin a bial vawn Tlangnuam Bial Missions Conference Mel-3 –a neihah Speaker-niin a hmanpui.
—
Bial Mission Conference hmangtute hian an rorel tlangpuiah kum 2019 Bial Mission Conference neih lehna hmun tur te, General Missions leh home Missions rawngbawlna tihhmasawn dan tur kawng hrang hrang te, mahni Bial chhung inrelbawl dan tur bakah Missions rawngbawlna kawnga Bial hmalakna tur hrang hrang an rel hlawm a ni.
North Mizoram District chhungah hian tun dinhmunah Home Missions field 9 leh thawktu nghet 10 nei mekin; Home Missionary te leh an awmna hetiang hi a ni:-
Sist. Khawlliani B/w, Kolalian Mission Field
Evan Hrangchhankhuma, Rashdali Mission Field
Evan Rs Lalnunmawia, Vawngawnzo Mission Field
Evan Lalrampana, Marpara Mission Field
Evan Isak Lalrohlua, Persang Mission Field
Evan H Lalnunzira, Dilzawl Mission Field
Sist Lalsiamliani, Damdiai Mission Field
Sist Esther Lalrawngbawli B/w, Bajirung Mission Field
Sist K Lalbiakzuali, W phulpui Mission Field
———–
District LAD Conference :
North Mizoram District LAD chuan District LAD Conference vawi 50-na (Golden Jubilee Conference) chu Oct. Ni 12-14 Zirtawp zan atanga Pathianni zan thleng awhin Thenzawl bial Field veng kohhran Biak inah an hmang mek a, kar thar PenNet news ah chanchin kimchang zawk tihchhuah a ni ang.
————
Mission Field Biak in hawng :
Oct. ni 5 Zirtawpni khan North Mizoram District, Zawlnuam Bial Mission Conference hman denchhenin Bajerung Mission Field Biak in chu North Mizoram Dist. Secretary Rev. Chhiarpuia’n a hawng.
Zawlnuam Bial Mission Conference hman chhung hian Mithar 4 Kohhranah senglutin sual ngaihdamna Baptisma an chang nghal a, Thlarau Thianghlim dawng thar mi 6 an awm bawk.
Bajerung Biak in hi Headquarters Bialin Work camp-a sain; Biak in hmun hi Sist. Lalsangzuali Hqrs. Local chuan a pa Sr. Upa Kapbuaia famta hriat reng nana a leisak niin; Biak in sak nan hian Evan. Lalchhuanmawia Sailo Hqrs. chuan tangkafai Rs. 70000 in tanpuina alo pe tawh bawk. Biak in lenzawng hi a dung ft 30 leh avang ft15 niin, a chung Rangva, a bang tile leh scirting Rangva a sak a ni.
———-
Tanpuina hlan :
Bro Jacob Ngunsangkhuma te chhung Durtlang Mualvenga lawite chuan Tlangsang Biak in sak mek tanpuinan tangkafai Rs.300000/-(3 lakhs) an pe a, Tlangsang kohhran ho te an lawm hle.
Bro Lalruatkima s/o T. Upa Vanlalruala Tlangsang, tuna Lungleia khawsa mek pawhin a lawina thin Tlangsang biakin sak mek chung khuh nan Rs.20000/- tanpuina a pe bawk.
————
Education & Skill Development Campaign :
Dinthar bial PYD, Education committee hmalaknain ni Oct. ni 8 (Thawhtanni) khan Dinthar UPC Biakinah Education & Skill Development Campaign neih a ni.
He hunah hian Bial Education chairman Bro. Lalhmingthaa chuan inkhawm a kaihruai a, bial PYD Zaipawl leh Bro. Lalruatdika ten Pathian fakna hla an sa bawk.
Education campaign nei tur hian Bro. K. Rotluanga, District Education Committee chairman chu sawm niin; a ni hian Thalai ten zirna lam kan uar deuh deuh tul thu te, zirlai te pawh Thalai activities hrang hrangah a theih chin china awl thiam a tul thu te a sawi bawk.
Skill Development campaign nei tur hian Pu David Laltlanmawia, SMM, National Urban Livelihood Mission, UD&PA leh Pi Guddi Singh, CMM, National Urban Livelihood Mission, UD&PA te sawm an ni. Campaigner te atangin Thalai te mamawh tak tak ngaihthlak niin; anni hian NULM hnuaia free training an pek hrang hrang te, training chhuak hna an zawn sak dan te leh sumdawnna leh eizawnna bul tanna atana loan an pek theih dan kawng hrang hrang kawhhmuhna an nei a, zawhna leh chhanna hun zau tak hawn a ni bawk.
———–
Kawnpui Kanan Vengah rawngbawlna :
North Mizoram District, Kawnpui Bial PYD chuan an bial chhung Kawnpui Kanan Vengah Kohhran din tumin Krista Tana Sengkhawm hna a thawk mek a. Rawngbawltu atan Evan. Lallianmawia, Thenzawl ruaiin hma an la mek zel a ni.
Oct. ni 2 Thawhlehni zan khan Bro. Lianzuala in, Kawnpui Kanan Vengah Tirhkoh lakluhna inkhawm neih niin; Tual Upa Lalthanpuia, Bial PYD Vice President chuan inkhawm a kaihruai a, bial chhung local hrang hrang atangin member thahnem tak an kalkhawm. Bialtu Pastor Rev. C. Lalramthanga chuan tirhkoh lawmna thu sawiin, Bial PYD ten Kanan Venga rawngbawlna an nei thei tur chu lawmawm a tih thu leh phurawm a tih thu sawiin, hemi atana rawngbawltu tur Pathian mi hman tak tirhkoh an nei chu lawmawm a tih thu a sawi bawk. Evan. Lallianmawia pawhin thusawiin, rawngbawlna pawimawh lutuk nei tura amah thlan a ni chu a lawm rualin, huphurhawm a tih thu a sawi bawk.
——-
North Mizoram District Hruaitute Programme :
Dist Supdt. Rev. Laltluanga, Dist. Secretary Rev. Chhiarpuia leh Dist. Treasurer Rev. K. Lalduhsanga te chuan Oct. 12-14 chhunga North Mizoram District LAD Conference Thenzawl Biala neih mekah zirtawp zan atang khan hovin conference an hman pui.
———-
Nilai zan thuzir tur endik :
Oct. Ni 10 Nilaini Chawhma dar 10:30 khan North Mizoram District Lit. & Pub. Board chuan kum 2019 Nilai Thupui zirtur endik runpui neiin a thawhkhatna atan edik hna, Dist. Committee Room-ah an nei a. He endik hna hi Rev. Chhiarpuia’n kaihruaiin Nilaibu bung 1-15 na thleng endik a ni.
———
Solo Competition Cum Zaipawl Meet :
Oct.6-7 chhung khan Lunglei District PYD Music Committee buatsaih Solo Competition Cum Zaipawl Meet hlawhtling takin neih a ni a, Solo competition-ah hian PC.Lalrinsanga, Hauruang Local-chu pakhatna a ni.
Oct.6 inrinni zan khan Venglai biak in ah Solo Competition Elimination Round neih a ni a, hetah hian mi 17 inlan in, music telloin hla chang khat leh a thunawn sak a ni a, heta tang hian Top 10 thlan chhuah a ni.
Oct.7 Pathianni khan Rahsiveng biak in ah Solo Competition Cum Zaipawl Meet hi neih chhunzawm a ni a, Zaipawl ah hian Lunglei District PYD Choir bakah bial leh Local atangin zaipawl 12 an tel thei a ni. Solo Competition-a Top 10 tling te hian hla pahnih hmangin intihsiakna an neih chhunzawm a, heta tang hian Final round lut tur mi 6 thlan chhuah a ni a, chungte chu:
1. Pc Lalrinsanga, Hauruang
2. Dennis Lalrinfela, Hnahthial venglai
3. Mimi Lalawmpuii, Rahsiveng
4. Laltlanhlua Sailo, Rahsiveng
5. CV Remsangzuali, Kikawn
6. Lalromawii, Hnahthial Chanmari
Oct.7 Pathianni zanah Solo Competition Final Round hi neih chhunzawm nghal a ni a, mi 6 te hian an hla duh ber hla pakhat theuh sa in intihsiakna an nei a. PC.Lalrinsanga, Hauruang Local chu pakhatna niin, lawmman tangka fai Rs.5000 leh momento a dawng a. Lawmman hi Sr.Upa H.Sangzuala (L) leh Pi Vanthlii (L) hriatrengna atana an tu leh fate sponsored a ni. Pahnihna Dennis Lalrinfela, Hnahthial Venglai niin, ani hian HP.Vanlalruatin anu Lallawmsangi B.w hriatrengna atana lawmman a tum Rs.4000 leh momento a dawng a. Pathumna Mimi Lalawmpuii, Rahsiveng niin, ani hian Rs.3000 leh momento a dawng bawk.
Final Round neih zan hian Lunglei Dist.PYD Music Committee te buatsaih tho Hla inphuah siak lawmman sem nghal a ni a, pakhatna hi PC. Lalthlengliana, College veng a ni a, a hla phuah hi ‘Ka kulhbing sang i ni’ tih a ni.
Pahnihna hi Vaisam Home Missionary Evan.Lalengzauva, Zotlang Local a ni a, a hla phuah hi ‘I ram min thlen rawh’ tih a ni. Pathumna hi Lalrindika, Lunglawn zaia veng niin a hla phuah hi ‘I tan a ni’ tih hla a ni.
Hla inphuahsiak ah hian pakhatna hian lawmman ah Rs 3000 leh momento an dawng a, pahnihna hian Rs.2000 leh momento, pathumna hian Rs.1000 leh momento a dawng bawk.
He Solo Competition leh Zaipawl Meet hi Lunglei District PYD Choir-te sponsored a ni. Meet neih chhung hian Bro.S.Lalrinsanga leh Sist.K.Lalrinkimi ten zei tak leh zangkhai takin programme an kaihruai thin a ni.
———-
Putlungasih Missions Field :
Oct.14 Pathianni hmang hian Lunglei District Missions Director Rev.VL Hmuaka chuan Putlungasih Missions Field a tlawh dawn a, rawngbawlna a nei ang.
Putlungasih Missions Field-ah hian Evan.Simona Hmar chu Home Missionary-in a awm mek a ni.
———–
Field PYD Conference hmanpui dawn :
Oct.18-21 hian N. Bengal Sikkim Missions Field PYD Conference, Targhera-ah neih a ni dawn a, he hun hmanpui tur hian Lunglei District PYD OB te sawm an nih angin Evan. K. Lalnunpuia, Secretary, District PYD leh Bro. H. Lalhmingmawia, Fin. Secretary, District PYD te an kal dawn a ni.
————
Joint conference :
Lunglei District chhung; Tawipui bial, Sertlangpui leh Pangzawl bial ten LAD leh PYD inkawpin Joint conference an hmang.
Oct.5-7 chhung khan Tawipui bial PYD leh LAD-te chuan Thingfal Local-ah Join Conference hlim takin an hmang a, Speaker atan bialtu Pastor Rev.H.Rothuama chu an hmang.
2) Oct.12 zirtawp zan atang khan Sertlangpui bial PYD leh LAD Join Conference chu Dengsur Local-ah neih tan a ni a, Speaker atan District Secretary Rev.C.Vanlalena chu hman a ni. Oct.13 inrinni khan rorelna neih a ni a, District-a thlen tur leh bial inrelbawlna hrang hrang an ngaihtuah a ni.
3) October 5-7 chhung khan Pangzawl bial LAD leh PYD Join Conference chu Pangzawl Khuanghlum Local-ah neih a ni a, Speaker atan Evan.Lianthangvunga (Maliana) chu hman niin, Thupui atan ‘Tho la, I Pathian ko rawh’ Johana 1:6 chu hman a ni. Zaithiam Sist Zothanmawii chuan zaiin rawngbawlna a nei thin bawk.
————
Mi thar senlut :
Oct ni 7, Pathianni khan Lunglei District ah Mi thar 7 Kohhranah sengluh an ni:
1) Oct.7 Pathianni khan Bunghmun bialtu Pastor LH.Lalchhandama chuan Tleu Local-ah mi 12 baptisma a chan tira, an zingah hian mi thar 3 an tel a ni.
2) Oct.7 Pathianni khan Lungsen S Local-ah bialtu Pastor K.Vanlalhruaia chuan mi thar 4 a Kohhranah a seng lut a, mi 2 in sual ngaihdamna Baptisma an chang nghal.
———–
ASC Home tlawh :
Lunglei District, Hnahthial bial LAD te chuan Oct.11-13 chhung khan kan kohhran fahrah enkawlna hmun ASC Home, kolasib tlawhin rawngbawlna an nei a, bialtu Pastor Rochungnunga Renthlei chuan hoin member 30 vel an kal.
Hnahthial bial LAD te hian ASC Home tan hian Television (TV) an pe a, bial chhung Local hrang hrangte pawhin Long chair, Dunlop, Mattress leh thildang an pe bawk. Home Thawhktu leh Naupangte an lawm hle.
——–
Seminar :
1. Oct.7 Pathianni chawhnu khan Cherhlun Local-te chuan rawngbawltu leh Department hruaitute pualin Seminar an buatsaih a, Leadership tih thupuiah hmangin; Resource Person atan bialtu Pastor Rev.PC.Lalfakawma chu an ruai a, kalkhawmten an hlawkpui hle.
2. Oct.14 Pathianni hian Headquarters bial PYD te chuan District Conference Hall, Chanmari-ah Leadership tih thupuiah hmangin Seminar an buatsaih dawn a, Resource Person atan Evan.C.Lalremchhunga an ruai ang.
——
Revival Crusade :
1. October 5-7 chhung khan Haulawng Lamthuamthum Local-te chuan Revival Crusade an buatsaih a, Speaker atan District Treasurer Rev.C. Lalrintluanga chu hmangin, hlim takin hun an hmang.
2) Oct.12 zirtawp zan atang khan Pangzawl bial Missions Department chuan Pangzawl Khawngbawk Local-ah Revival Crusade a buatsaih tan a, Speaker atan Evan.Hmingtinthanga an ruai a. He Crusade hi oct.ni 14 Pathianni thleng a awh dawn a ni.
3) Oct.10 nilai zan atang khan Bunghmun bial Missions Department buatsaihin Bunghmun Local-ah Crusade neih tan a ni a, Speaker atan Rev.Lalhmingthanga chu hman a ni.He Crusade hian Oct.14 Pathianni zan thleng a awh ang.
——-
Pentecost Chhungkaw Ni :
Chhimtuipui District chhung local hrang hrang te chuan Sept ni 7, Pathianni khan Pentecost Chhungkaw Ni hlim takin an hmang.
Pentecost Chhungkaw Niah hian chhungkaw tinte chu an chhungkaw thutna turah a huhovin an thut tir a, rawngbawltura ruat ten Chhungkaw hlutna leh pawimawhna bakah inpumkhatna tha zawk neih dan tur chungchang sawiin hlim takin hun an hmang a. Tualchhung Kohhran thekhat chuan inkhawmbanah thingpui ruai kilin hun an hmang bawk.
Dist Superintendent Rev.Thanchunga Sailo te chhungkua chuan Dist Hqrs local, New Siaha ah he hun hi hmangin Superintendent hian Maicham rawngbawlna anei nghal a ni.
Dist Treasurer Rev.WL.Thanghre te chhungkua chuan Siahatla local ah he hun hi hmangin, Keileh ka chhungte chuan Lalpa rawng ani kan bawl dawn ni tih thupui hmangin Chhungkaw ni thuchah asawi a, Local LAD leh PCD ten fakhla remin hun hlimawm tak an hmang.
—————–
Sacrament Rawngbawlna leh ke sil rawngbawlna :
Siaha Sectional Pastor Rev.Kholy Hlychho chuan tunlai hian a bial chhung local hrang hrangah sacrament rawngbawlna leh ke sil rawngbawlna akalpui mek zel a, Oct ni 7, Pathianni khan Bro.Henry leh Dist Evangelist N.Thanghnuna te nen Riasika localah he rawngbawlna hi an kalpui. A bial chhung local hnih ah he sacrament ruai hi buatsaih tawhin local dang -7 ah achhunzawm leh ang.
—————–
Revival Crusade :
1. October ni 31 atanga November ni 4 chhung hian Sangau I Kohhranah District huap Revival Crusade buatsaih a ni dawn a, hlawhtling taka hman anih theih nan Sangau Bial leh Sangau I Kohhran te chu theihtawp chhuahin an inbuatsaih mek zel a. District lam atangin Crusade sawmna pawh Local tinah thawn chhuah tawh niin he Crusade ah hian Rev.Dr.Lianmang of Myanmar leh a team ten rawngbawlna an nei dawn a ni.
2. Siahatla local PYD te chuan Oct ni 8, Thawhtanni atang khan home crusade nei tanin, Speaker-ah Dist PYD Fin Secretary T.Upa.N.Lalchhuanmawia an hmang a, He crusade hi PYD member hlata te puala buatsaih a nih angina inkhawm service bakah inkhawm loh zanah Kohhran chhungaw inah rawngbawlin an chhuak thin bawk.
3. Oct ni 12 atanga ni 14 chhung hian Tuipang Bial te chuan Revival khawmpui Tuipang V Biak In ah an hmang mek a. Speaker ah Pastor C.Lalchhuanthanga Vathuampui Bial ruaiin thupui atan ‘Harhtharlehna’ tih an hmang.
————
Lang Camp :
October ni 6 atanga ni 7 chhung khan Siahatla local Naupang Sunday School Department pualin Lang Camp buatsaih a ni.
He camp ah hian T.Upa.H.Lalduhsanga local sunday school secretary chu speaker niin, Bro.J.Lalhriatchhunga, Bro.J.Lalfangkima leh Sist.Lalmuanpuii te councellor-ah hman an ni a, Evan.Robert B.Lalnunsiama T, District Evangelist chuan, “Naupangte tan Thlarauthianghlim” tih thu hmangin Pathian thuchah a sawi bawk.
Councelorte leh speaker rawngbawlna Lalpan mal a sawm a, Doctrinal Detp leh Senior dept zirlai Mi-7 ten Thlarau malsawmna an dawng thar a ni.
———
Biak In sak tanpuina :
Chhimtuipui District Mission Dept chuan Vaseikai biak insakna tur khawnin, hetiang hian bial hrang hrang atang tanpuina sum hmuh a ni.
1. Saiha bial : Rs. 144040
2. Lawngtlai ‘N’ bial : Rs. 85500
3. Sangau bial : Rs. 5000
4. Tuipang bial : Rs. 5000
5. S.Lungpher bial : Rs. 21532
6. Niawhtlang bial : Rs. 6000
7. Diltlang s bial : Rs. 2100
8. Vathuampui bial : Rs. 6000
9. Lawngtlai s bial : Rs. 42700
10. Bualpui ng bial : Rs. 15000
11. Bungtlang south bial : Rs. 2000
————–
District LAD Conference :
Aizawl East District, Ladies Auxiliary Department (LAD) Inkhawmpui lian District LAD Conference vawi 25-na, Silver Jubilee chu October 5 atanga 7 chhung khan Pathian Thlarau Thianghlim awmpuina hnuaiah hlim takin hman a ni.
Inkhawmpui hi Khawzawl Field No-1 a pandal a dung ft 90 leh a vang ft 80-a liana sakah hman niin Pandal sak nan hian Kohhran mipui tha 600 chuang bakah Kohhran pawn lam atanga puitu tha 95 nen a vaiin tha 700 chuang sen a ni. Pandal hi a hmingah “Thlarau Inpui” tia vuah niin a hming ang chiah hian Pathian Thlarau thianghlim awmpuina hnuaiah hlim taka hman a ni.
Inkhawmpui-ah hian Thupui-ah “Thlarauva khatin awm rawh u” Ephesi 5:18 thu hman niin inkhawmpui tan zan Zirtawpah Sis F.Lalawmpuii B/W, District LAD President chuan Inkhawm kaihruaiin Conference hlanna Rev Rosanga Kawlni, District Superintendent chuan a nei a, Bialtu Pastor C.Lalmalsawma hnen atangin Inkhawmpui palai lawmna thu ngaihthlak a nih bakah Sis.Lalramthangi B/W, General LAD Secretary leh Sis.F.Rohlupuii B/W, General LAD Treasurer te chuan palai chibai bukna an nei bawk. District LAD Chanchin Sis.Darneihthangi, Serchhip ziak chu Rev C.Mawizuala, District Sunday School Director chuan tlangzarhna neiin khuh hawnna Sis. R.Lalramsiami, District LAD Asst.Secretary chuan a nei bawk a ni.
October 6, Inrinni Chawhma Dar 10 atang khan Pandal-ah Inkhawmpui rorel President Sis F.Lalawmpuii B/W kaihhruaiin neih a ni a, Financial report ngaihthlak a ni bawk. Report bu atanga a lan danin tunah hian District chhungah LAD member 4912 awmin LAD dinna khua 156 leh LAD member zuk leh hmuam nghei mi 1099 an awm a, LAD Inkhawm nei thei Tualchhung 98 awmin Bible Women Certificate nei mi 18 an awm a, Chhungkaw maicham nei thei chhungkaw 750 leh Pathianni chauha nei chhungkaw 1883 an awm a, Kum 2018 atanga nei thar 185 an awm a ni.
Rorel Inkhawmah hian member 700 chuang ten rorelin Bial leh Official atanga agenda lut 13 a awm a, Kum 2020 District LAD Inkhawmpui chu Mualpui Bial-ah nghatin Thupui-ah “I Pathian tawk turin in peih rawh” Amosa 4:12 hman ni se an ti a, heng bakah hian Cancer veite pualin Tualchhung tinin thawhlawm khawn ni se an ti bawk.
Inrinni zan inkhawmah khan Khawbung Biakin pualin thawhlawm khawn a ni a, hetah hian cheng nuaikhat leh singsarih chuang hmuh a ni a, Inkhawm banah Jubilee pualin ruatbik mi 25 ten Sky Lantern Pandal tualah an chhuah bawk a ni.
Pathianni chawhma inkhawmah khan member boral sunna Rev R.Lianzama, District Missions Director kaihhruaiin neih a ni a, LAD Member boral 65 te sun niin General Choir ten sunna hla an sa a, Myanmar PLM Hruaitute hnen atangin chibai bukna thu ngaihthlak a ni bawk. Pathianni chawhnu khan Sis. Ronguri B/W, Ex-District LAD President chuan palai chibai bukna neiin Budget tlak hmasa pakhatna atanga pathumna thleng bakah LAD Chanchin ziaktu leh Kum 70 chunglam palai riak lutte hnenah lawmman hlan an ni bawk. Pathianni zan inkhawmah khan District LAD hruaina hna lo thawk tawhte leh thawk mek te hnenah chawimawina hlan an ni bawk.
Tarlan tawh angin District LAD Inkhawmpui-ah hian Thupui-ah ““Thlarauva khatin awm rawh u” Ephesi 5:18 hman niin Thupui thensawm hmang hian heng mite hnen atang hian thusawi ngaihthlak thin a ni.
Zirtawp zanah- Sis Merry Lalnunsangi B/W, “Chetzia-ah”
Inrinni zanah- Sis Zaithangliani B/W, “Thilpekah”
Pathianni chawhmaah- Sis Dr.Lalhmasa-i, B/W, “Incheinaah”
Pathianni chawhnu-ah- Sis Lalchangliani Sailo B/W, “Chhungkaw maichamah”
Pathianni zanah-ah – Rev Biaksangzuala, District Secretary, “Thianghlimnaah”
Aizawl East District LAD Inkhawmpui-ah hian Bial 30 atangin palai inziak lut 1000 vel awmin inziak lut lem lo te nen palai hi 1200 vel nia hriat a ni. He Inkhawmpuiah hian Bial hrang hrang LAD zaipawl, mal zai leh Group zai te bakah General Choir leh Pentecostal Choir ten fak hla an sa thin a ni.
———–
District Missions Department Executive Committee :
October 9, Thawhlehni khan Director Room-ah District Missions Department Executive Committee, Rev R.Lianzama, Missions Director kaihhruaiin neih a ni.
Meetingah hian kumin October 26 atanga 28 chhunga Khawhai hmuna District Missions Inkhawmpui tura thil tul hrang hrang ngaihtuahin Programme an duang a. Thupui-ah “I rawngbawlna kha hlen rawh” II Timothea 4:5 hman tur niin Thupui thensawm hmangin Speaker hrang hrangte hnen atangin thusawi ngaihthlak thin a ni ang.
District Missions Conference hi October 26 atanga 28 chhung hian Khawhaiah hman tur niin Khawhai Bial te pawh an inbuatsaih nasa hle a. Inkhawmpui hi Khawhai Community Hall-ah hman tur niin a cheimawi hna leh a tul ang ang thawkin nasa takin Khawhai bialte an inbuatsaih chho mek zel a ni.
————-
Pastor Induction service :
October 14, Pathianni chawhnu hian Zemabawk Bialtu Pastor thar, Rev R.Laltlankima lakluhna, Induction neih a ni dawn.
Kumin Kum chanve District Board neih khan District Missions Director Rev Darchhawna, Pension-a a chhuah dawn avangin Director thar atan Zemabawk Bialtu Pastor tanglai Rev R.Lianzama chu ruatin Rev R.Laltlankima, Chhingchhip bialtu Pastor chu Zemabawk bialah awm turin a lo ruat tawh a. Chhingchhip bial hi Rev Rosanga Kawlni, District Superintendent chua a hmui rih dawn a ni.
————
Career Guidance Programme :
Serchhip bial PYD Education Committee chuan October 7, Pathianni khan bial Hqrs. Biakinpui Naupang Sunday School-ah career guidance programme an buatsaih.
He hunah hian resource person-ah Bro K Lalnunpuia leh Sis Esther Zonuntluangi te hman an ni a, anni hnen atang hian zirlai te an zirna kawnga hma an sawn theihna tur leh naupang te dikna leh chanvo te ngaihthlak a ni. Serchhip bial PYD education Sub Committee te hian kumin 2018 hian local tinah career guidance neiin hun an hmang chhuak tawh a ni. Sum tuak nan quiz te buatsaihin zirlai naupang titha te chawimawina an nei tawh bawk a ni. Serchhip bial PYD Kumpuan Committee te pawhin October 8, Thawhtan zan khan New Serchhip Local-ah Kumpuan Campaign neiin hun an hmang bawk a ni.
———
Seminar :
October 13, Inrinni khan Serchhip bial PYD buatsaihin Chanmari Biakin-ah Seminar hlawhtling taka neih a ni.
He hun hi Session hnihah then niin chawhma session hi Bro Lalmuanawma, Bial PYD Asst.Secretary chuan a kaihruai a, Chawhnu Session hi Bro KVL Remruatfela, Secretary Kumpuan Sub-Committee in a kaihruai thung a ni. Seminar-ah hian Resource Person-ah Pastor LS Lalhruaisanga, Lecturer CBC chu an hmang a ni. Zanah Pastor LS Lalhruaisanga Speaker-a hmangin Chanmari Biakin-ah inkhawmna hun an hmang nghal a ni.
————
Mi thar senglut :
October 7, Pathianni chawhma khan Zemabawk Lungbial Kohhranah Evan Thangneihsanga rawngbawlna kal zelah chhungkaw 1 member 4 Kohhranah sengluh an ni.
Evan Thangneihsanga hi Zemabawk Bial Missions Department te hian Bial chhunga rawngbawl turin an ruai mek a ni. September 26, Nilai zan khan Champhai bial-ah chhungkaw khat member 9 awmna chu Kohhran-ah ziah luh an ni bawk.
———–
Aizawl East District Hruaitute Programme:
Rev Rosanga Kawlni, District Superintendent chuan Pathianni-a Zemabawk bialtu Pastor thar, Rev R.Laltlankima lakluhna, Induction neiin rawngbawlna a nei ang.
Rev Biaksangzuala, District Secretary chuan North Mizoram District LAD ten Inkhawmpui Thenzawl hmuna an hman mekah Kohhranpui aiawhin a telpui.
Facebook