Pennet News Service : Oct 28 – Nov 4

UPCNEINEWSSERVICE Oct 28 – Nov 4

——–

Orphanage Sunday :

November Pathianni hmasa ber hi kum tina Kohhranin a hman thin ni pawimawh Orphanage Sunday a lo ni leh ta a, hemi nia thawhlawm lakkhawmte hi Kohhran enkawl fahrah chawmna in Audrine Scism Children Home, Kolasib-pual a ni ang.

Audrine Scism Children Home hi Kum 1985 December 30 khan Executive Board chuan din nise tia pass-in kum 1992 january 15, khan Khuangpuilam Kolasib ah  din a ni a. Rev. Stanley Scism, hetih hun laia General Superintendent chuan a building sakna bultan lungphum  a phum a ni. He Home din a nih atanga vawiin ni thlengin Nu leh pa leh enkawl tur chhungte neilo Naupang chan hai leh baihvai te enkawla an mahni kea an din theihna tura chher chhuakin Naupang engemaw zatin eizawnna hna puitling neiin he home atanga enkawl seilen an ni tawh a ni.

Kohhran rorelna sang Executive Board chuan Home  naupang ten awlsam leh tha zawka zirna kawng an zawh theihnan tiin  kum 2002, May 2 khan Home complex chhungah School din a ni a, a hming atan Susane Downs Boarding School tih a ni. Tichuan Home leh School hi Project khatah chhun finin Compassion Center Project tih a ni a, tunah hian Rev. Jh Zahluna chuan Project Director mawhphurhna chelhin a hmunah hian a awm chilh a ni.

Hetianga hmalak chhoh tak a nih vang hian kohhran rorelna sang Executive Board April 16, 2004 a neih chuan; November Pathianni hmasa berah Orphanage Sunday hman thin nise tiin a ruahman a, kumtin hman thin a ni ta a ni.

Kumin Orphanage Sunday hian ASC Home thawktu leh Naupang te chuan Chhimtuipui District chhung Saiha leh Lawngtlai ah Kohhran hote tlawhin rawngbawlna an nei dawn a. Lawngtlai lamah hian Project Director Rev JH Za Hluna kaihhruaina hnuaiah thawktu 3 leh naupang 12 ten Chanmari Local ah Pathianni zan thleng rawngbawlna an nei ang a. Siaha lamah hian Home Superintendent Evan C Vanlalruata kaihhruaina hnuaiah thawktu 4 leh naupang 13 ten Local hrang hrang tlawhin hetiangin hun an hmang ang :

Oct ni 03, Inrinni zanah Dist Hqrs local New Sihaah

Oct ni 04, Pathianni zingah College veng local ah; Pathianni zanah Siahatla localah

Tun dinhmunah  Audrine Scism Children Home ah hian Mipa 23 Hmeichhia 24 avaiin Naupang 47 an awm mek a, Home Superintendent hnuaiah  thawktu 13 an awm mek bawk. Tin, Susane Downs Boarding School(SDBS) hi Principal Evan. Zarzoliana enkawlna hnuaiah hian zirtiru leh staff dang 21 awmin,  zirlai naupang 405 vel an awm mek bawk a ni.

——–

Hruaitute kartawp Programme :

General Superintendent Rev. Lalmalsawma Sailo chuan November ni 3 atanga ni 4 chhunga Kolkata Field Conference neih mekah Speaker-ah tangin rawngbawlna a nei mek.

Field Conference ah hian Deut 6:4 “Aw Israel mite u ngaithla teh u, Lalpa kan Pathian chauh chu Lalpa a ni” tih chu thupuiah an hmang a, General Suptd bakah hian Rev. Mark Harris-a chu speaker pakhat atan an ruai tel bawk.

General Missions Director Rev. R. Lalhawia chuan Nov ni 1 atanga ni 3 chhunga Barak District Missions Baord telpuiin hun a hmang.

General Treasurer Rev. Zohmingthanzama chuan Nov ni 3 atanga ni 5 chhunga Kawnpui Bial PYD ten Golden Jubilee an lawman programme ah telpuiin rawngbawlna a nei.

———-

District Missions Conference :

North Mizoram District Mission Conference vawi- 48-na chu Oct ni 26 atanga ni 28 chhung khan Chaltlang Bial chhung Ramhlun Sport Complex-ah hlim taka hman a ni.

                Conference-ah hian thupui “I Rawngbawlna kha hlen rawh” tih hman niin; thupui hlawm hi then hrang 5 : Ramthin rawngbawlnaah, Thianghlimnaah, Thlarau bo chhandamnaah, Thilpek rawngbawlnaah tih leh I rawngbawlna kha hlen rawh tihah thenin; heng rawngbawltute hian Pathian thuchah an sawi thin  a ni :-

1) Zirtawp zanah : Sist. Esther Lalrawngbawli B/w Bajirung Field Missionary

2) Inrinni zanah : Pastor Lalpianthanga, Bilkhawthlir Bial Pastor

3) Pathianni zingah: Rev. V.L Tluanga Sinate, Gen. Missions Secretary

4) Pathianni chhunah: Rev. C. Lalthantluanga, Dist. missions Director

5) Pathianni zanah: Rev. Laltluanga, Dist. Supdt

———-

District Missions Board :

Oct ni 29, Thawhtanni khan North Mizoram District Missions Board chu, District Missions Director Rev.C.Lalthantluanga kaihhruaina hnuaiah Headquarters biak in Tuikhuahtlang, Aizawlah neih a ni.

An Rorel pawimawh zual te :

1. Kum 2019 atan sum ruahmanna Rs. 8,811,500.00 pass a ni a. Heng zinga 66% hi Generala lut tur niin, 24% hi District inenkawlna tur a ni.

2. District Missions Motor hmanlai hi hralha bolero thar lei ni se tih pass a ni.

3. Home Missions atan Revival Speaker tur ruat ni se, tul dang bawhzui ngai chu Executive Board kuta dah a ni.

——

Seminar :

Nov ni 3, Inrinni khan North Mizoram District, serkhan biak inah Sihphir bial LAD te pualin Seminar buatsaih a ni a, Speaker Rev C.Lalrammuana an ruai a, Pathianni zan thleng programme siamin Rev. C. Lalrammuana hian rawngbawlna a nei dawn a ni.

——

Revival Crusade :

Oct ni 31, Nilai zan atang khan Tlangnuam bial, Tlangnuam Kohhran chuan Revival Crusade an buatsaih a, Speaker ah Rev.K.Malsawmtluanga hman niin Pathianni zan thleng rawngbawlna a nei dawn a ni.

——-

Campaign :

North Mizoram District Education Committee te chuan Oct ni 29, Thawhtanni khan Kolasib ah Education and Skill Development Campaign neiin an fehchhuak.

He campaign hi Kolasib Town PYD te chuan lo thlengin Venglai Biakinah hun hman a ni. He hunah hian Bro. Vanlaldika, Education Committee Secretary, Bro. Lalhmingthaa, Treasurer, Bro. H. Lalsangliana, committee member leh Bro. Vanlalringa, committee member te chuan hun an hmanpui a.

Campaign ah hian Bro. H. Lalsangliana chuan Education campaign neiin; Bro. Vanlaldika chuan Skill Development campaign a nei ve thung a ni.

Kolasib town PYD atangin PYD member kal khawm an țha hle a, campaign neih zawh hian thingpui ruai tui tak kil ho a ni. Kum 2018-2019 Education committee hruaitute leh committee member te

Chairman :Bro. K. Rotluanga

Secretary : Bro. Vanlaldika

Treasurer : Bro. Lalhmingthaa

Ex-officio : Evan. F. Lalngaihawma

 leh Evan. Vanlalpeka Fanai

Committee Member te :

Bro. Lalchungnunga, Dinthar bial

Bro. Vanlalringa, Sihphir bial

Bro. Joel Lalnunsanga, Headquarter

Bro. H. Lalsangliana, Maubawk bial

Bro. Lalthanmawia, Tlangnuam bial

T. Upa Malsawmzuala, Chawlhhmun

Bro. R. Lalnunmawia, Durtlang bial

Bro. R. Lalrimawia, Chaltlang bial

———

PCD pual Seminar :

  Nov.3 inrinni khan Lunglei District, Rahsiveng bial PCD buatsaihin bial chhunga PCD zirtirtute pualin Zion Local Venghlun biak in ah  Seminar neih a ni.

He Seminar ah hian resource person atan bialtu Pastor Rev.C.Lalhriatpuia leh District PCD Secretary C.Lalramluahpuia te hman an ni a, Rev.C.Lalhriatpuia hian ‘hruaitute mawhphurhna’ tih thupui hmangin zirtirna pein, C.Lalramluahpuia hian ‘Naupang enkawl dan chungchang’ tih thupui hmangin zirtirna a pe bawk. He Seminar hi Lunglei District PCD Zirtirtute pawhin an hmanpui a ni.

——–

Revival Crusade :

Oct.30, Thawhleh zan atang khan Lunglei District, Thuampui Local-te chuan Revival Crusade an buatsaih a, Speaker atan bialtu Pastor  T.Zahmingliana chu hman a ni a, Crusade hian Nov.4 Pathianni zan thleng a awh ang.

———

 Bial Conference :

Lunglei District chhung Theiriat leh Zawlpui bial te chuan Bial Conference hlim takin an hmang.

A. Oct.26-28 chhung khan Theiriat bial Missions Conference vawi 21-na Lungpuizawl biak inah an hmang a, Speaker atan bialtu Pastor Rev.R.Vanlalenga ruaiin, thupui atan ‘I Pathian tawk turin inpeih rawh’ Amosa 4:12 tih hman a ni a, zaithiam Lalduhawmi, Zion Local Venghlun chuan zaiin rawngbawlna a nei bawk. Oct.27 inrinni khan rorel a ni a, rorel tlangpuite:

i) kum 2019 atan Missionary pahnih Support nise

ii) District Missions a thlen turin, Home Missionary-te regularized ve nise tih leh Revival/Evangelistics team din nise tih te an rel bwk. (Pic.Theiriat bial Missions Conf)

B. Oct.26-28 chhung khan Zawlpui bial PYD leh LAD Joint Conference vawi 2-na Putlungasih Local-ah hlim taka hman a ni a, Speaker atan bialtu Pastor Evan.Muanpuia Colney leh Putlungasih Home Missionary Evan.Simona Hmar te chu hman an ni. Oct.27 inrinnia an rorel langsar zual te :

A. LAD :

1. Missionary Quarter putlungasih ah khum 4×6 leh longchair 1 dah ni se.

2. Bible ralchhan siam ni se.

3.Bial chhung local te intlawh kual leh ni se.

4.Kan bial chhungah Dan thianghlima innei an awm chuan lawmpuina cheng 1000 pek ni se.

5. 2020 a Dist. LAD conf bial huapa kal nan budget Rs 10,000 dah a ni.

6. Budget Rs 24,200 chu pawm a ni bawk.

B.PYD

1. Bible ralchhan hmanga inelna thianghlim buatsaih.

2. Target tlak hmasa lawmman pek.

3. Pastor quarter ah Water filter dah.

4. Bial hruaitute Dist conf an kalna TA pek.

5. 2019 ah Bial pawn Tawipui N II tlawha fehchhuah.

6. budget atan Rs 17600 pawm a ni.

LAD Leh PYD te inkawp; Joint Conference rorel ngaihthlak chhunzawm ila :

1. Kum 2019 Joint conference na hmun atan Zawlpui ruatin; Conf. Thupui leh speaker tur chu joint board kutah dah a ni.

2. Conf. Hun a tan Oct last sunday ah neih leh ni se.

He Conference ah hian Pastor quarter a gas stove dah tur leh missionary quarter-a long chair dah tur sunday tukah appeal neih a ni a, Rs 11000 hmuh a ni.

——–

Tihdam rawngbawlna :

Oct 29 thawhtanni atang khan Rev.C.Lalhmingthanga chuan Pukpui Local-ah tihdam rawngbawlna neiin hun a hmang mek.

Oct.29 khan rawngbawlna hi tan a ni a, mi 50 in tawngtai sakna dawngin, mi 30 dam in report an ni a, Oct.30 thawhlehni khan tawngtaina dawng mi 52 niin, dam in report mi 28 an ni bawk. He rawngbawlna hi Nov.4 Pathianni thleng neih tura ruahman a ni.

—–

Rawngbawltu Ni :

Nov.3 inrinni khan kumtin an lo tih thin danin, Headquarter Local-te chuan Lunglei District UPC Conference Hall-ah Rawngbawltu Ni an hmang a, hetah hian bialtu Pastor Rev.C.Hmingthanfala chuan hruaitute mawhphurhna  tih thupui hmangin zirtirna a pe a, District Secretary Rev.C.Vanlalena chuan ‘Thlaler biakbuk’ tih thupui hmangin kalkhawmte slideshow hmangin zirtirna a pe bawk.

He Rawngbawltu Ni ah hian Headquarters Local rawngbawltute bakah Department hrang hrang hruaitute an tel bawk a ni.

——–

Thlarau dawng tura hmalakna :

Pangzawl bial Conference-in a lo rel tawh, Thlarau Thianghlim la dawnglo ten an dawn theihna tura hmalak nise tih chu hmalak mek a ni a, Oct.27-28 chhung khan Lungmawi Local-ah he hun hi hman a ni a, Nov.4-5 chhung hian Bungtlang Local-ah bial hruaituten he hun hi an hmang leh ang.

——–

District PYD Choir fehchhuak :

Nov.2 zirtawp zan atang khan Kolkata Field Conference chu neih tan a ni a, he hun hmanpui tur hian Lunglei District PYD Choir  member 20 te chu an kal. Conference hi Nov.4 pathianni zan thleng hman a ni ang. Ruahman lawk ang chuan Lunglei District PYD Choir-te hi Nov.8 ah anlo let leh ang.

——

Khuang pe :

Oct.28 Pathianni khan Upa R.Lalrumliana, Luangmual bial Missions Director chuan apa Upa Chawngnanga (L) hriatreng nan  Sethlun kohhrante hnenah khuangpui leh khuangte Rs.10500 man chu a hlan. Sethlun hi Luangmual bial chhunga awm, Oct.18-a kohhran ding thar a ni.

———-

District hruaitute fehchhuak :

Churachandpur District Superintendent Rev. Lalzawm leh District Secretary Rev. Paosei te chuan Oct ni 22 atanga ni 30 chhung khan an District chhunga local hrang hrang tlawhin rawngbawlna an nei kual a, hetiang hun an hmang :

Oct ni 22, Thawhtan zanah Bukpi local ah – speaker Rev. Paosei

Oct ni 23, Thawhleh zanah Senvawn local ah – speaker Rev.Paosei.

Oct ni 24, Nilai zanah Tipaimuk local ah speaker Rev. Lalzawma

Oct ni 25, Ninga zanah Parbung local ah – speaker Rev. Lalzawma

Oct ni 26, Zirtawp zanah Damdiei local ah – speaker Rev. Paosei

Oct ni 27, Inrinni zan atanga Pathianni zan thleng Joutung local ah hetiangin hun an hmang

Inrinni zanah-Speaker Rev. Lalzawma

Oct ni 28, Pathianni zingah – speaker Rev. Lalzawma. Zan inkhawmna ah speaker Rev.Paosei

Oct ni 29, Thawhtan zanah Thanlon local ah speaker Rev. Paosei

———-

 Sacrament rawngbawlna :

Chhimtuipui District, Bualpui NG Pastor Hnehchunga chuan tunkar kalta atang khan a bial chhung local hrang hrangah sacrement rawngbawlna buatsaihin hun a hmang kalmek a,

Oct ni 21, Pathianni khan Archhuang local ah hun hmangin nauhlan rawngbawl hna athawk nghal a. Tin, Oct ni 28, Pathianni khan Bualpui NG localah sacrament buatsaih lehin, nauhlan rawngbawlna a nei leh nghal bawk.

——-

Revival Crusade :

Oct ni 31 atanga NOv ni 4 chhung hian Chhimtuipui District huapin Sangau I Kohhranah Revival Crusade buatsaih a ni a, He Crusade ah hian khawvel hmun hrang hrang a Pathian hman lai Rev.Dr.Lianmang leh a team ten rawngbawlna an nei kalmek a, an rawngbawlna Kohhran hoten an hlimpuiin Lalpan mal a sawm hle. He crusade hi District Secretary Rev.Joseph L.Thlauhthang chuan a telpui

————–

Annual Conference :

Nov ni 1 atanga ni 4 chhung hian Barak District, Tlangmawi Local-ah “I thu hriattirte chu ka ngaina a ni” (Sam 119:119) tih thupuia hmangin Barak District Hqrs Section PYD chuan Annual Conference an hmang mek a. Nov ni 2, Zirtawpni khan Games & Sports a hun hmangin, zanah fellowship programme hlimawm tak an hmang zui a. Nov 3 Inrinni chhunah Bial PYD Conference Rorelna inkhawm neiin Zan lamah inkhawmna leh zaikhawm programme te buatsaihin hlim takin hun an hmang a. Bialtu Pastor Rev. L. Kapma-an Pathian thuchah a sawi thin a ni.

——–

District Missions Conference :

Aizawl East District Missions Department hnuaia Inkhawmpui lian District Conference Vawi 25 chu October 26 atanga 28 chhung khan Khawhaiah hlim taka hman a ni.

Thupui-ah “I rawngbawlna kha hlen rawh” II Timothea 4:5 thu hman niin Inkhawmpui tan zanah Rev R.Lianzama, Missions Director chuan Inkhawm kaihruaiin Rev Vanlalfela Ramtiam, District Treasurer chuan Inkhawmpui hlanna a nei a, Bialtu Pasto E.Vanlalpeka Zote hnen atangin Palai lawmna thu ngaihthlak a nih bakah Evan H.Malsawmthanga, Home Missionary hnen atangin “Sengkhawmnaah” tih hmangin thusawi ngaihthlak a ni.

October 27, Inrinni nileng khan Khawhai Biakinah Rev R.Lianzama, Director kaihruaiin rorelna hun an hmang a, Secretary report leh Financial report ngaihthlak a ni bawk. Report Bu atanga a lan danin tunah hian Aizawl East District chhungah hian Pastor Bial 30 awm mekin Missions Department te hian tunah hian hmun hrang hrangah rawngbawltu Missionary 14 a ruai mek a, Kumin kum kal meka an rawngbawlna atang hian Kohhran-ah mithar 70 senglut tawhin sual ngaihdamna baptisma mi 51 in chang tawhin Kohhran pahnih dinthar a ni a, Thlarau thianghlim mi 25 in dawng thar bawkin damna chang mi 40 chuang an awm a, zuk leh hmuam nghei thar mi 8 an awm bawk a ni. An rorel thuchhuak langsar zual te:

1. Kum 2020 Inkhawmpui chu E.Lungdar Bial-ah nghah a ni a, ruatsa angin 2019-ah Thingsulthliah bial-ah Inkhawmpui hi an hmang dawn a ni.

2. Aizawl East District Building sak mekah District Missions Director Quarter siam ve tura rawtna awm chu District Board-ah thlen a ni ang.

3. Bial Missions Department Board tihlen rawtna awm chu District Board-ah thlen tura dah a ni.

4. Camping Centre neih rawtna bakah Missionary Training School din tura chak taka hmalak ni se tih chu General Missions Department-ah thlen a ni ang.

Rorel inkhawm neih zawh hian District Board neih chhunzawm nghal a ni a, an thuchhuak langsar zual ngaithlak chhunzawm ila :

1. Bial Missions Conference minute reng reng hi District Missions Department-ah thehluh thin tawh nise.

2. Home Missionary te kum khat atana la tawh lovin a tul dan angin lak ni se tih chu Short Term-a kalpui mek angin thlahnih zela lak ni se, Executive board in la thin tawh se.

3. Tukrajastewar, West Bengal Quarters atan Rs 1,50,000/- Project siam niin Budget-ah dah lovin appeal atanga hmuhchhuah tum ni se an ti a, Appeal hi Bial kutah dah a ni.

4. Missionary chawmna thlatin Rs 1000/- ni thin chu January 2019 atangin Rs 500/- ni tawh se tha tih a ni

5. Kum 2019 District Missions Silver Jubilee lawm tha tih niin Executive board kutah dah a ni.

    District Board-ah hian Evan Lalthuthlunga, Treasurer chuan Kum 2019 Budget Estimate pharhin sem that ngaite siamthat a nih hnuah District Board pawmpui turin Kum 2019 Budget atan Rs 79, 25,500 chu an pawm a ni.

Inrinni-ah hian rorel ve lo tan Inkhawmpui neihna hmunah vantlang inkhawm neih a ni a, Evan H Lalbiakzauva’n inkhawm kaihruaiin Evan H.Lalhlimpuia hnen atangin thusawi ngaihthlak a ni.

Inrinni zan inkhawm Evan Lalramzauva, District Missions Secretary chuan kaihruaiin Upa H Lalchhuanawma kaihhruaiin Doctrine sawirual a ni a, Rev Lalrema, Bethlehem bialtu pastor hnen atangin “Thlarauvah” tih hmangin thusawi ngaihthlak a ni a, Pathianni chawhm-ah Rev R.Lalhawia, General Missions Director chuan “Thilpekah” tih hmangin thusawina a nei a, Pathianni Chawhnu-ah Rev Lalmalsawma Sailo, General Superintendent chuan “Mawhphurhna-ah” tih hmangin thusawina neiin Pathianni zanah Rev Roasanga Kawlni, District Superintendent chuan “Thianghlimna-ah” tih hmangin thusawina a nei bawk.

Aizawl East District Missions Inkhawmpui-ah hian Bial hrang hrang atangin palai kal in report 800 chuang awmin in report lote nen Inkhawmpui palai hi 1000 nia hriat a ni. He Inkhawmpui hi Pathian Thlarau Thianghlim chuan nasa taka awmpuiin Inkhawmpui tan zan atang khan Inkhawm apiangin Thlarau lam hla nen hun hman thin a ni a, Inkhawm apiangin Bial zaipawl bakah mai zai ngaihthlak thin a ni bawk.

Inkhawmpui palai kal zing ami, Muanna Venga cheng Sis Saimanliani (Nubawihi), Kum 52  chu Inrinni zan khan zai laia hlim taka a lam chu a taksa-ah harsatna tawkin Khawhai PHC panpui a nih laiin a boral a, a ruang hi Inrinni zan khan an chenna Muanna veng panpui nghal niin Pathianni khan Thuampui bialtu Pastor, Rev KVL Hmangaihkima chuan Thuampui thlanmual-ah a vuiliam a ni. Sis Saimanliani boral thu hriat a nih veleh Inkhawm tihtawp lailawk niin sun nan minute 1 ngawi renga din a ni a, Rev Lalmalsawma Sailo chuan tawngtaisakna a neih bakah ral nan sum thawhkhawm nghal a ni a, cheng singkhat chuang tlingkhawmin heng sum tlingkhawm hi November 31, Nilaini khan District Hruaitute chuan Sis Saimanliani chhungte hnenah hian ral nan an hlan nghal a ni.

——-

No Tobacco Week :

Aizawl East District Thianghlimna Committee hmalakna in November 1 atanga 4 chhung hian “No Tobacco Week” hma mek a ni.

District Thianghlimna Committee chuan he hun hi urhsun taka hmang turin Kohhran tinte chu a ngen a, Circular chhuah Bial tina Thianghlimna Committee ten hma la lain Week hawnna leh kharna uluk taka nei vek tur leh a theih phei chuan Poster te tara hmalak ni se a ti a, he week chhung hian zuk leh hmuam la nghei thei chiahlo te pawhin nghei vek turin a ngen nghal bawk a ni.

No Tobacco Week hi kum engemaw chen atang khan hman tawh niin District Thianghlimna Committee chuan Kohhran mipuite zuk leh hmuam laka kan fihlim theih nana a hmalakna pawimawh tak a ni.

——–

Zirlai tit ha chawimawina :

Aizawl East District PYD hnuaia Education Sub-Committee te hmalakna in November 4, Pathianni zan hian Zemabawk Vengpui Biak In-ah zirlai titha te chawimawina hun hman a ni dawn. He hun hi Evan Albert Chanchinmawia, Chairman chuan kaihruaiin Upa Lalnunmawia Chuaungo, IAS hnen atangin Thusawi  ngaihthlak a ni anga, Bro JH Biakdiktluanga, Secretary Education Committee hnen atangin report ngaihthlak a ni bawk ang.

He hunah hian   HSLC, HSSLC, Graduate leh Master Degree level a Top 10 a lang pha chinte bakah Professional Course la chinah mi hmingtha leh Ph.D Degree hmutharte chawimawi tura tih a ni.

———

Kumpuan pual Seminar :

November 4, Pathianni chawhnu khan District PYD Kumpuan Committee te buatsaihin District Hqrs. Biakin-ah Kumpuan Seminar neih a ni.

Upa Dr.R.Lalfakzuala chu Resource person-ah hman niin Bial hrang hrang atangin Kumpuan Hruaitute leh Committee memberte kal tura beisei an nih angin member engemaw zat an kal thei a, hlawk takin hun an hmang a ni.

——–

Lawmthusawi chawimawina :

Hnahlan bial N.Diltlangah District Fulltime Evangelist Evan Lalamena, chuan rawngbawlna kal mek zelin November 3, Inrinni hian T.Upa Ronghaka te chhungkua chuan khawtlang huapin Pathian hnena lawmthusawi chawimawina an nei a, hlim takin hun an hmang.

E.Lungdar bial, Sailulakah pawh Evan HK Lalhmangaiha te rawngbawlna kal zelah Inrinni hian Kohhran ten Pathian hnenah lawmthu sawina neiin Kohhran hoten hlim takinh hun an hmang a ni. Evan HK Lalhmangaiha leh a Team te hian November 16, Zirtawp zan atang hian E.Lungdar-ah Crusade hi an nei chhunzawm leh dawn a ni.

———

District LAD te luangchhuak :

Aizawl East District LAD te chuan October 5, Zirtawpni-a District LAD Conference, Khawzawl a kal tur Hnahlan Venglai Kohhran te chuanna Motor Accident-a hliam tuarte tanpuinan Rs 2000/- an pe a. Heng bakah hian District LAD te hian District Kohhranpui Official pathumte Quarters-ah Fridge, Double door an dah bawk a ni.

——–

Aizawl East District Hruaitute programme:

Rev Rosanga Kawlni, District Superintendent chuan a bial vawn mek, Chhingchhip Bial-ah rawngbawlna nei turin Inrinni khan a kal a, Pathianni zan thleng hun hmangin ruahmanna ang chuan Thawhtanni-ah Aizawl let leh tura beisei a ni.

Rev Biaksangzuala, District Secretary leh Rev C.Lalengliana, District Thianghlimna Committee Chairman te chuan Khawzawl Bial-a Thianghlimna Campaign nei turin Zirtawpni khan Khawzawl an pan a, Inrinni zan leh Pathianni zan thleng hun hmangin ruahmanna ang chuan Thawhtanni-ah Aizawl an let leh ang.

———

Hriattirna pawimawh :

            Lunglei District Missions Department hnuaia kan Home Missions Field thawktute term chu 31st December 2018-ah hian a lo tawp leh dawn ta a. Kum 2019-2020 chhung atan Home Missionary pasarih lak thar a lo ngai  leh dawn ta a, Pathian kohna dawng, zuk leh hmuam tilo te tan he hna hi dil theih a ni e.

Hriattur pawimawhte:

1. Diltu chu a lawina Local-ah tualchhung rawngbawltu a ni tur a ni.

2. Dilna chu blank paper ah ziakin, District Missions Director hnenah ziaka thehluh tur a ni.

3. Diltu chuan a lawina Local Church Board lehkha thil tel tur a ni.

4. Dilna hi Dec 2 .2018 thlengin thehluh theih a ni ang a, diltu chu 3rd December 2018, dar 10:30 A.M ah District Missions Board hmaah interview tur a ni ang.

5. He hna diltu, Interview-a lo kal te tan, TA/DA a awm lovang.

Evan.F.Lalhmangaiha

Secretary

Lunglei District Missions Department

———-

            United Pentecostal Church, Lunglei District hnuaia thawk turin Driver pakhat Master Roll (MR) a lak a ni dawn a, dil duh chuan NOv 30 .2018 ral hmain District Secretary, Rev.C.Vanlalena hnenah dilna Plain paper-a ziakin thehluh tur a ni.

Diltute tana hriat turte :

1. Hming :

2. Pa Hming :

3. Kum zat :

4. Address :

5. Education Qualification : Class-VIII chin chung lam

6. Interview hun : Dec 4 .2018 Dar 10:00 AM

7. Interview-na hmun : Dist.UPC Conference Hall

8. Local Church Board recommend-na telh tur.

9. Zuk leh hmuam ti mi tan dil theih a ni lo.

10. Interview-naah hian mahni document/Driving Licence ken tur

 Sd/- (REV.C.VANLALENA)

Secretary

Lunglei District U.P.C.

—————