Pennet News Service : Oct 18 – 25

UPCNEINEWSSERVICE Oct 18-25.2020
————
Member thar 15 :
October ni 20, Thawhlehni khan Dera Arlok, zengkha section, karbi anglong, Assam. DMF hmunah RC atangin chhungkaw 5, member 15 te chuan Pastor Amos-a kutah Lalpa Isua hmingin sual ngaihdamna baptisma an chang a, Naupang 12 pawh Isua hnenah a hlan nghal bawk.
———–

Khawvel ram danga UPC Kohhran rawngbawlna chanchin  :

Multi-Ethnic Service:
October ni 18, Pathianni khan Fiji UPCI leh Central District, The Pentecostals of Lami tangkawp chuan Multi Ethnic Service- English, Hindi leh Fiji tawnga inkhawm hona programme buatsaih a ni a, ngaih hlut a hlawh hle. Mi thar pakhatin sual ngaihdamna Baptisma changin; Thlarau Thianghlim Baptisma chang thar pakhat a awm bawk.

He inkhawmah hian “An open door” (Kawngka in hawng) tih thupuia hmangin Thupuan 3:8  ‘I thiltihte ka hria, chakna tlemte chauh i nei a, chutichung pawhin ka thu i pawm a, ka hming pawh i phat lo va, tuma khar theih loh i hmaah kawngka ka hawng e.’ tih chu an beh chhan a ni.

“Pathian chuan tlawh tu satliah ngawt ni lo, a chenna tur mi a zawng a ni” tih chu an thupui ken tel pawimawh tak pakhat a ni bawk.

Fiji thliarkar a Bible School Administrator leh Missionary Rev. Troy Wickett chu an Guest Speaker a ni a, ani bakah hian Fiji leh Hindi tawnga thuhril leh zai rawngbawl tute an awm bawk. Kan India ram tawng pui ber, Hindi service-ah pawh vai khuang leh ri chher mawi hrang hrang chi kim tak an kawng ri a, inkhawm ropui tak zawng a ni phawt mai.
———

Oct 18, Pathianni khan Spain rama Figueres Kohhranah member thar 2 in sual ngaihdamna Baptisma an chang ve leh ta, Granollers Kohhranah pawh mi 2 in Thlarau Thianghlim Baptisma an chang thar bawk.

Oct ni 17, Inrinni khan Namibi ah  mi 2 in Isua hmingin sual ngaihdamna Baptisma an chang.

Oct ni 13, Thawhlehni khan Fiji rama Sigatoka khawpuiah member thar 2 in sual ngaihdamna Baptisma an chang.
———–
UPCI Thalai hruaitu thar :
Thla liam ta Sept ni 22-25 chhung neih, UPCI General Conference ah khan UPCI Youth Ministry Director of Promotion ni lai Michael Thomas chu Youth President atana thlan thar a ni a, heti a nih tak avang hian Oct ni 18, Pathianni khan he a mawhphurhna hmun ruak luah tur hian Pastor DJ Hill- ruat thar a ni. He mawhphurhna hi kum thar 2021 atangin a thawk tan dawn a ni.

Pastor DJ Hill hi Atlanta West Pentecostal Church ah Evangelism Pastor rawngbawl hna thawk tu a ni a, kum 2016 atang khan he mawhphurhna hi a chelh tan.

Atlanta West Pentecostal Church hi Kohhran changtlung leh nghet tak an ni a, an Kohhran Pastor hi  Pastor Darrell Johns-a ni. He Kohhran hian Pastoral Staff pawh 9 ngawt an nei a, Pastor DJ Hill-a hi chung zinga Pastor pakhat chu niin, Evangelism lam hawia rawngbawlna fawng pawimawh ber vuan lai mek a ni.

Oct 25, Pathianni hian Missions Conference an hmang dawn a, speaker atan tuna Global Missions Director ni mek Rev. Bruce Howell an ruai ang.
————–
Biak in thar hawn a ni ta :
Oct ni 17, Inrinni khan Fiji rama Rivers of Life Pentecostals Kohhran Biak in sak thar chu Pathian hnena hlanna leh hawnna inkhawm buatsaih a ni a, he Kohhrana lawi engemawzat an pung khawm.

Biak in thar hi Fiji UPC Suptd Rev. Timoci Nadavo chuan Pathian hnenah hlanin a hawng a, hlim takin Biak in chhunga lawmna programme hman chhunzawmin Biak in thar lawmna cake an buatsaih pawh Upa hoten chemte fawng vuan hovin an zai(cut) a, Kohhran hote an hlim dar dar hle.

Tlai lamah Biak in thar lawmna ruai hlim takin an kil ho nghal a, vawksa pum hem him leh sa dang tam tak nen ruai an buatsaih mup mup mai.
——–
Kum 88-zeta upa in sual ngaihdamna Baptisma a chang :

Vawiin Oct ni 20, Thawhlehni khan Japan rama Sound of Praise Kohhran, Uruma khawpui Okinawa-ah kum 88 zeta upa Japan-pa chuan hming zawng zawnga hming chungnung ber, Isua Krista hmingin sual ngaihdamna Baptisma a chang a, amah leh a chhungte an lawm hle.

A fanu Sis. Hosmer-i chuan a Pa in sual ngaihdamna a chan ngei theihnan hian kum 28 chhung zet bang lovin a tawngtai sak tih a puang a. Tlai ngai lo Pathian chuan Hosmer-i dilna chu hriat sakin; khawvel a chhuahsan hma ngeiin a hmangaih a Pa chuan sual ngaihdamna a chang ta.
———–
District hrang hrang rawngbawlna chanchin  :

Aizawl East Dictrict
District Missions Conference rorel:
October 23, Zirtawpni khan Aizawl East District Missions Conference vawi 27-na, rorel inkhawm chu tluang taka neih a ni. Bazar Bial ten District Hqrs. Local-ah lo thlengin Rev R.Lianzama, Director, District Missions chuan a kaihruai a ni. District Missions Conference hi ruahmanna ang chuan October 23 atanga 25 chhungin E.Lungdar Bial-ah Revival inkhawma neih tura tih niin Covid-19 hri leng mek avangin Revival Inkhawm hi nei lovin rorel inkhawm chauh neih ni se, Palai tur pawh District Hruaituten ruahmanna lo siam se tiin kumin kum chanve District Missions Board chuan alo rel tawh a ni. District Missions Conference rorel inkhawm-ah hian hri leng avanga Mizoram sawrkarin inkaihhruaina a siam hrang hrangte zawm niin rorel palai pawh bial tin atangin Bialtu Pastor bakah mi 3 zel ruat an ni. District Missions Conference rorel-ah hian Bial atang leh Official atangin agenda lut engemaw zat awmin he thu butasaih lai hian an thu pass te kan hre hman lova, karleh-ah tihchhuah tum a ni ang.

Bial Sunday School Inkhawmpui:
Hri leng avangin a hun takah Bial Sunday School Inkhawmpui hmang thei lo mahse, Aizawl khawpui chhung Bial thenkhatte chuan October 17, Inrinni leh 18, Pathianni khan Bial Sunday School Inkhawmpui rorel tluang takin an hmang.

Bazar Bial te chuan Armed Veng South-ah October 17, Inrinni khan Bial Sunday School Inkhawmpui  vawi 28-na, rorel tluang takin an hmang a, palai mi 38 vel an kal thei a ni. Bazar bial te hian a zawna Kum 5, Sunday School kaikim lawmman an siam kallai chu report a awlsam zawk nan PTSS leh NPSS ten file vawn ni se an ti a, Kum 2021-ah S.S Zirtirtu pual seminar neih tura tih niin Bial OB ten 2021-ah Local tinte kumpuan thupui hmangin tlawhchhuah ni se an tih bakah S.S Zirtirtu ni tharte, an nih hun chhung record fel taka vawn theuh tawh ni se an ti bawk a ni. Bazar bial-ah hian tun dinhmunah Puitling lamah zirlai 877 leh zirtirtu 53 awmin Naupang lama zirlai 399 leh zirtirtu 65 an awm mek a ni. Kum 2020 chhung khan Naupang leh Puitling S.S-a zuk leh hmuam nghei thar mi 10 awmin tunah hian zuk leh hmuam nghei zawng zawng 477 an awm mek a ni.

Thuampui Bial te chuan Zuangtui Biak inah Bial Sunday School Inkhawmpui vawi 12-na rorel October 17, Inrinni khan an hmang bawk a, agenda lut engemaw zat awmin Kum 2021 Bial Sunday School Inkhawmpui chu Thuampui hmunah nghatin Kum 2021-ah naupang pual lang camp neih ni se an tih bakah Sunday School inzirtirna-ah hian tun aiin social media leh information technology hman uar leh hman tangkai ni se an ti bawk. Thuampui bial-ah hian tun dinhmunah puitling hming ziak mi 500 chuang awm mekin, Naupang hming ziak mi 293 an awm mek a, Puitling zirtirtu mi 30 awmin naupang lamah zirtirtu mi 44 an awm mek bawk a ni.

Mualpui bial te pawhin October 17, Inrinni khan Mualpui Biak in-ah Bial Sunday School Inkhawmpui vawi 6-na, rorel tluang takin Evan C.Lalremruata, Bial Director kaihhruaiin an nei. Mualpui bial te hian Kum 2021 Bial S.S Inkhawmpui chu ITI-ah nghatin Kum 2020-a intihsiakna bu an siam chu hman theih a nih tak loh avangin kum 2021-ah rin nghal ni se an tih bakah Kum 2021 atanga hman turin Pennet Channel kaltlangin S.S Zirlai Pennet kaltlangin zirtirna pek ve ni se an ti a, Kum 2021-ah Bial chhunga S.S Campaign neih ni se an ti bawk. Tun dinhmunah Mualpui bialah hian S.S hming ziak mi 768 awmin, puitling zirtirtu mi 46 leh naupang zirtirtu mi 39 an awm mek a ni.

Bawngkawn Bial te chuan Ramhlun Vengthar Biakinah Bial S.S Inkhawmpui vawi 26-na, rorel October 18, Pathianni khan Evan K.Vanramngaia, Director kaihhruaiin an hmang bawk. He hunah hian agenda lut engemaw zat awmin Kum  2021 Inkhawmpui chu Peniel Local-ah nghah a ni. Heng bakah hian Kum 2021 chhungin S.S Zirtirtu Training neih tura tih niin Naupang S.S pualin Joint fellowship neih ni se an ti a, Bial huapin Bible Story Drama Competition buatsaih ni se an ti bawk a, District Kohhranpui hian Naupang S.S Hall sak tanpui nan District S.S-ah Rs 500,000 (Nuainga) pek ni se tih chu District Board-ah thlen tura tih a ni bawk. Tun dinhmunah Bawngkawn Bialah hian S.S hming ziak mi 746 awm mekin Puitling zirtirtu mi 30 leh naupang zirtirtu mi 39 an awm mek a ni.

Zemabawk Bial te pawhin Tuirial Kohhranah October 18, Pathianni khan Bial S.S Inkhawmpui vawi 33-na, rorel chu tluang takin an hmang bawk. Zemabawk Bial te hian Bial S.S Inkhawmpui naupang intihsiak neih thin hi Kum 2021 atang chuan intihsiak nei lovin Presentation-a kal ni tawh se an ti a, Kumpuan bawhzui nan hmalak ni se an tih bakah Bial Board member hi Constitution anga kalpui tawh ni se an ti bawk. Tun dinhmunah Zemabawk Bial-ah hian Naupang hming 427 awmin, Puitling lamah  hming ziak mi 649 an awm mek a ni.

CM Relief fund-ah sum hlan:
Aizawl East District LAD Conference neih zawh takin Covid-19 hri leng dona atan Sawrkarah tanpuina pek ve ni se tia alo passed tawh leh District LAD Board-in CM Relief fund-ah Rs 50,000 hlan ni se alo tih tawh angin October 20, Thawhlehni khan Mizoram Sawrkar-in a tul ang anga a hman atan CM Relief fund-ah Rs 50,000/- an hlan. District LAD Hruaitute chuan tanpuina sum hi hlan in Chief Minister PS in alo dawngsawng a ni. He hunah hian Rev Biaksangzuala, District Superintendent pawhin a telpui bawk a ni.

Revival Committee:
October 16, Zirtawpni khan District Superintendent room-ah Aizawl East District Revival Committee neih a ni. He hun hi Chairman, Rev KVL Hmangaihkima chuan kaihruaiin thu pawimawh tak tak ngaihtuah a ni. He hunah hian kumin November atanga March 2021 chhung atan Revival Speaker tur lak ni se, dil turten Bialtu Pastor leh Tualchhung Recommend-na thil tel ni se, October 28, Nilaini thleng dilna hun hawngin October 29, Ningani-ah District Committee room-ah Personal Interview neih ni se an ti. Revival Speaker hi Licence nei chin dil theih ni se an ti bawk a ni. Aizawl East District Revival Committee hi District Kohhranpui hruaitute pawhin an telpui thei a ni.

ASC Home-ah thilpek pe:
October 16, Zirtawpni tlai khan UPC North East India ten fahrah enkawlna kan neih, ASC Home, Kolasib-ah District Superintendent Rev Biaksangzuala bakah mi inphal ten hetiang hian thilpek an pe. Heng thilpek te hi Home lam hruaitute chuan lo dawngin zanah naupang te nen hun hlimawm tak an hmang chhunzawm nghal a ni.  Thilpek an peknaah Home hruaitute chuan lawmthu an sawi a ni. Thilpek petute:
1. Sis.Vanlaldiki W/o Rev Biaksangzuala, District Hqrs. Kohhran- Buhfai Bag
2. Sis Lalfakzuali D/o JH Lalsawmliana (L), District Hqrs. Kohhran- Buhfaitha Bag
3. Sis Lalnarawmmawii, District Hqrs. Kohhran- Blanket bale khat
4. Rev Biaksangzuala, Set free Ministry ten thawmhnaw an pek.

Mithar:
October 18, Pathianni khan Aizawl East District hmun hrang hrangah mithar sengluh leh baptisma changthar neih a ni.
Zemabawk Vengpui Kohhranah mithar pakhat Kohhranah sengluh niin Bialtu Pastor Rev R.Laltlankima kutah sual ngaihdamna baptisma a chang nghal a ni.

District PYD in Missions Department kaltlanga rawngbawlna a neih mekna, Khawlian Bial, Daido hmunah mithar 4, chhungkaw khat chu Kohhranah sengluh an ni bawk. Mi pakhatin Bialtu Pastor Robert Lalrinsanga kutah sual ngaihdamna baptisma changin nau 2 hlan nghal a ni. Daido hmunah hian tunah hian Sis Sangkhumi B/W chuan rawngbawlna a nei mek a ni.

Darlawn Bial, Sunhluchhip Kohhranah pawh chhungkaw khat member 3 chu Kohhranah sengluh an ni bawk. Bialtu Pastor, Rev T.Lalbiakliana chuan nau pakhat hlanin mi 5 in sual ngaihdamna baptisma an chang bawk a ni.
———–

Chhimtuipui District  :
MI THAR LAWM LUT   Vawiin Ni 18.10.2020 (Sunday) hian Niawhtlang Biak In ah chhungkaw khat member 2 (Pathian Kohhran ) te chu Pastor V.Lalhlimpuia Bialtu Pastor in Kohhran ah a lawm lut.

DISTRICT DAY THUCHAH
Dt.20.10.20(thawhlehni) kha CTP Dist indan kum 25 ani a, he mi pual hian dist superintendent chuan thu chah a ti chhuak.

Tlang tina Lalpa Kohhran te,

Hming chungnung ber Lalpa Isua hmingin chibai ka buk a che u.

Chhimtuipui District hi Dt. 20.10.1975 atanga lo in dangin kum 45 na kan lo thleng ta reng mai a!! Nihna leh leh dinhmun beisei avanga in dang kan nih loh avangin kan in dan tirh atangin Lalpa hruaina leh malsawmna nasa tak kan dawng a. Keimahni atangin Lawngtlai West District hial a lo piang (Indang) thei hi Lalpa malsawmna ropui tak a ni. Kohhran ten Lalpa hnenah lawmthu i sawi mawlh mawlh ang u.

Lalpan kum 45 lai min hruai tawhna ah hian Pastor, Evangelist leh thawktu mi engemaw zat  he District enkawla thawk tur hian min pe a. Tunah hian Pastor thawklai 10, Office staff 6, Evangelist 8 thawk mek in Pastor pension 11 kan nei bawk a, a lawmawm tak zet a ni.

Tichuan, building lamah pawh Siaha khawpui hmun laili ber ah complex neiin District office leh quarters engemaw zat RCC building tha tak tak neih a ni a, hemi bakah hian Goldan Jubilee Hall 120×60 a lian chhawng 6 tura ruahman chu sak mek a ni bawk a ni.

Kohhran ten member thar sengkhawm thu ah te, thilpek thu ah te leh thlarau lam rawngbawlna kawngah te malsawmna kan dawng nasa in hma kan sawn nasa hle a, a lawmawm tak meuh meuh a ni. He hun lawmawm takah atang hian Apostol Kohhran diktak ze pui – hmangaihna, inremna, inngaihdam tawnna, hlimna leh damna te hi Kohhran te zingah lo par vul leh se la, keimahni atang hian chu ze pui chu dinthar ni mawlh rawh se.

Hrileng avangin District Day Ni 20 October hi programme hman theih anih hmel lova mahse Ni 20.10.2020 zan lamah tal chuan chhungkaw tin ten Pathian malsawmna nasa tak kan dawng avanga lawmthu sawi nan leh inhlan thar leh na atan hun hmang theuh turin kan inngen e.

Lalpan Kohhran te malsawm zel che u rawh se.

Rev.Joseph L.Thlauhthang
District Superintendent
Chhimtuipui District UPC NEI
————–

BIAK IN SAKNA TUR THING ZEI Ṭialdawngilung home mission field a Biak In sak chhunzawmna na tur atan Dt.19.10 aṭang khan Kohhran te chusn thing an zei ṭan.
————-
DIST PYD EXECUTIVE MEETING/ OB MEETING NEI DAWN

Dt.23.10(friday) hian CTP Dist PYD executive meeting pawimawh tak  chu Dist Committe room UPC NEI offfice ah neih ani ang.

DIST PYD ENLARGE & EDITING BOARD TEN MEETING NEI DAWN

Dt.23.10(friday) hian CTP Dist PYD Enlarge & Editing Board chuan T Upa N Lalchhuanmawia In Siahatla ah meeting pawimawh tak annei ang.
———

Lawngtlai West District :

Lawngtlai North Section Sunday School Department chuan Oct ni 18, Pathianni khan Bazar Kohhran Biak inah rorel inkhawm an nei a, an rorel tlangpui te :

1.Conference chungchang : Conference hi Rotationa kalpui a nih angin kalpui chhunzawm zel nise,a hun tur chu board kuta dah niin a hmun atan Hqrs Local nise an ti a ni.
2.Section chhunga Local hrang² te chu Section Hruaituten tlawh chhuah nise thil tul dang te chu Board kutah dah a ni.
3.Section Sunday Sikul Deparment chuan District Office a dah tur Steel Almeirah dah(donate)
nise thil tul chu Board kutah an dah bawk.
4.Bial chhung Local tin ten Sunday sikula ka zir zawhna leh chhanna kan hman thin hi a leh pek
sunday ah in zawh thin nise a tul a nga bial chhunga Local te theuh nise an ti bawk a ni.

Lawngtlai North Bial Sunday School Conference Rorelna neih rual hian Rev.R.Vanlalawia, General Sunday School Secretary ziah KUMPUAN ZIRNA Booklet, Lawngtlai North Bial Sunday School Ina a buatsaih chu Rev Lalsawmliana Sailo in a tlangzarh nghal a ni.
————
North Mizoram District :

NMD PYD, Headquarters Bial Zaipawl ten induction service an nei:
Oct. Ni 17 Inrinni Zan khan NMDF Headquarters Bial Zaipawl kum 2020-2022 chhuanga member lak thar te, Induction Service HEADQUARTERS kohhran BIAK IN, Tuikhuahtlangah an nei.
Bial Zaipawl Induction inkhawm hi Hqrs. Bial PYD Music Committee chairman Bro. B. Lalremruata’n kaihruaiin, Headquarters Bial Kohhranpui hruaitu 3 (pathum) Rev. C. Lianchama, Evan. Challiana leh Upa Lalkamlova Rokhum ten an tawiawm a ni. Music Committee Secretary atanga report in a tarlan danin  Kum 2020-2022 chhung atan Zaipawl Member 20 ruat chhuah niin; Conductor-ah : Bro. B. Lalremruata, Asst. Conductor : Bro. R. Lalremruata leh Convener-ah Bro. R. Lalduhawma te an ni a, Zaipawl member te 20 niin;  hmeichhiar 10 niin; mipa 10 an ni.
———-
PSM kalna tura ruahman Camping Centre chei that mek a ni:
North Mizoram District, hnuaia Bible zirna Pentecostal School of Ministry (PSM) chu kumin November thlaa kal tur a nih angin, PSM kalna tura ruahmanna siam thar North Mizoram District, Camping Centre Sakawrtuichhun a mi chu, District hmalaknain tunlai hian a chei that hna thawk mek a ni. Kumin 2020 Session-ah hian PSM-a kal tur Naupang zirlai 30 bawr awmin heng mi tena nuamsa taka an zirlaite an zir theih nan Bual in leh Inthiarna in te siam belh ngai leh chei that ngai te an thawk a, October thla chhung hian luah tura an peih beisei a ni.
Hetihrual hian District Hqrs. Bial ten Conference-a an lo rel tawh angin angin Camping Centre Baptisma khur changtlung zawk siam leh Eisiamna hmun leh hma siam hna an thawk mek a, October thla chhung vek hian an peih hman a beisei awm bawk.
————–
Hqrs. Bial Director Evan Lalchhuanmawia Sailo, General Missions Field tan luang chhuak:
Oct. Ni 21 Nilaini khan Evan. Lalchhuanmawia Sailo chuan North Mizoram District Missions Department kaltlangin  North Bengol & Sikkim Mission Field, Darjeling khuaa barahatta Kohhran Biak in sak nan Rs. 200000 a hlan. Barahatta Kohhran Biak in sakna tur Sum hi Evan. Lalchhuanmawia fanu Sist. Lalhmingsailovi Sailo chuan North Mizoram District Office-ah Evan. MS Dawngliana, NMD Missions Treasurer kutah Cheque in a hlan a, Dist. Missions Treasurer Evan. MS Dawngliana hian District leh General aiawhin lawmthu alo sawi nghal bawk a ni.

North Mizoram District hruaitute leh Director rualte’n nikum 2019 December thla khan  N. Bengal & Sikkim Missions Field an fang a, hemi tum hian Darjeling kohhrante tlawhin hetah hian Kohhranhote’n Barahatta hmuna rawngbawlna rusum thlak a tulzia an lo sawi chu, North Mizoram District hruaitute report atangin Maubawk kohhran Upa Zopara thinlungah hna a thawk a, Barahatta hmuna rawngbawlna tur atan hian sum  Rs 40000 (cheng singli) lai a lo pe a a, rawngbawlna kal zelah kohhran din chhoh niin; helai hmunah kohhran member te Biak in hmun  pekah Barahatta Kohhran Biak in sak a ni dawn ta a ni.

Tlangnuam Bial ten Bial Conference an hmang:  Inrinni kal ta Oct. Ni .17 khan Tlangnuam Bial Missions Department te chuan Conference vawi 23 na Saikhamakawn-ah an hmang. Confe-ah hian rorel inkhawm chauh neiin; North Mizoram Distric Director Rev. C. Lalthantluanga’n a hmanpui a ni.

Conference Bialtu Pastor.Lalruatkima Fanai in a hawng a,  Rorel pawimawh zual te:-
1.Kum 2021-ah Samtlangah Bial Confe. Nghah a ni. 2.  Kum 2021 ah Bial Missions Dept. pualin  Missionary 2 chawm passed a ni. 3. Bial chhung ah tirhkoh rawih passed a ni. 4. Tlangsang Biala Volunteer-a rawngbawla fehchhuak Sist.Vanlalpeki Rs. 10000 –a tanpui tha tih a ni. 5. Home Mission Field-a bungraw mamawh lei nan Budget siam a ni.

Maubawk Bialte’n Bial Sunday school Confe. Rorel an nei: Oct. Ni 17 Inrinni khan Maubawk Bial te chuan Bial Sunday School Confe. Rorel inkhawm vawi 11-na  Maubawk SS Hall-ah an nei. Confe-ah hian rorel tur Agenda 14 neiin, rorel tur pawimawh zual te: 1) Kum 2021-ah Bial Sunday School Confe Maubawk Kohhranah nghah a ni 2) General Sunday huap kumpuan atan “Thianghlimna” tih hman ni se 3) General PenNet atang hian Sunday School lam hawi Programme atam thei ang ber chhuah 4) NEI huap General SS Meet kum 1 danah neih thin ni se.

Damparengpui Bialte’n Mission Conference an nei: Pathianni kal ta October ni 18 khan Damparengpui bial te chuan Bial Missions leh Bial S S conf rorel inkhawm an nei. He Joint Conference hi Sidon kohhran Biak inah neiin; kum 2021 chhunga Bial hmalak dan tur pawimawh tak tak relin tluang takin hun an hmang zo thei a ni.
————
OLIVE SILVER JUBILEE:
Chawlhhmun Bial, Chawlhhmun Kohhran PYD te chuan PYD puala chanchinbu an chhuah Olive –in kum 25 na a tlinna Oct. Ni  18 Pathianni khan an lawm.
Olive chanchin bu hi  kum1995 oct ni 8 ah chhuah ṭan niin, Weekly News a ni a, Pathian ven leh kaihhruaiin kum 25 chhung zet an chhuah thei a ni. Kohhran hun harsa taktak a pal lai pawhin; Chawlhhmun PYD te hian chatlak awm lohin he chanchinbu hi an chhuah hram hram zel a, kum 25 chhung zet an chhuah thei hi an lawm hle a ni.
Olive chanchinbu hian kum 2004 kum khan Dist chhunga Chanchinbu ṭha ber lawmman alo dawng tawh a, Consolation prize pawh a lo dawn nual tawh bawk.
Jubilee lawmna ah hian Olive Editor lo ni tawh hmun danga awm tawhte an tel thei lo chungin; social distance vawng  chungin member 30 bawr Olive in Silver Jubilee an thlen lawmnaah an tel thei a. Chanchinbu hming phuahtu Upa. Vanlalsiama’n Jubilee Souvenir a tlangzarh a, Evan. R. Lalthlamuana’n Olive zinkawng a sawi bawk. Lawmna inkhawm hman zawhah Jubilee Cake te zaiin hun hlimawm tak an hmang a ni (Olive)
———-
N. Chhimluang tan feh chhuak:
October ni 14 Nilaini khan Bro. Jacob Ngursangkhuma te chhung,  Durtlang Mualveng Kohhrana lawi te chuan Vairengte Bial chhunga awm N. Chhimluang Preaching Point Biak in sak tanpuinan tur Rs. 10,000/- Evan. C. Lalthlamuana a hlan. Evan. C. Lalthlamuana hi District tirhin N. Chhimluangah hian rawngbawlin a awm mek a, a rawngbawlna Lalpan mala sawmin kohhran duhawm tak a nei mek bawk. (N. Chhimluang)