Inthlan thuchah :
United Pentecostal Church of North East India Kohhran chuan kan hma lawk, November 28, 2018-a Mizoram MLA inthlanna lo awm turah Kohhran mipuite leh Political Party-te hnena ngenna leh thuchah a siam a. He thuchah leh ngenna hi mipui leh Political Party-ten ngai pawimawha zawmsak turin Pathian hmingin min ngen a ni.
Inthlanna tluang taka neih a nih theih nan leh Pathian ruat roreltu tha thlanchhuah an nih theih nan tualchhung kohhran tinin November 3, 2018 Inrini zanah tawngtaina neih ni se.
Kohhran mipuite hnena thuchah :
1. Inthlan boruak hian rawngbawlna kawngah kohhran leh ringtu mimal nun a tichak lo thei a; chak loh phah nana hmang lo turin politics lama inhmangte pawh fimkhur ni se. Inkhawm leh kohhran thiltih dangahte inthlahdah lova tawngtaia Pathian pawlna tam tawk neih ni se.
2. Party tan lam inan loh avangin kohhranah pawh inrem lohna a awm thei tih hriain, thusawiah leh chetziaahte mi dang hliam lo turin fimkhur ila, kohhran chhungah leh Biakinah phei chuan Politics thil sawi hauh loh ni se.
3. Inthlannaa vote thlak hi khua leh tuite tih tur a nih avangin vote neite chuan vote thlak ngei a tha a. Chutih rualin vote pekna turah ngaihtuahna fim tak hmangin, zu leh mipat-hmeichhiatna kawnga nungchang tha lo leh bawlhhlawh te, mi duham leh hlemhle tak te, Kohhran tana hnawksak leh min thliar hrang tur chite chu ram rorelnaa tel tlak an ni lo va, eng Party ami pawh ni se thlan loh ni se.
4. Candidate-te hnenah therhlo leh hamthatna umin kohhran tumahin intiamkamna neihtir loh ni se.
5. Huai takin mahni vote duh zawng chu vote mai tur a ni a; mahni dikna chanvo leh zahawmna humhimin, therhlo leh sum leh paiin tuman vote hralh loh ni se.
Political party leh candidate-te hnena ngenna :
1. Ram hruaitu tha kan neih theih nan Candidate siamtu zawng zawngten Candidate atan pawl leh kohhran inenbikna awm lovin, Pathian tih mi, ruihtheih thil leh corruption-a fihlim, mipat-hmeichhiat kawnga hming hliau lo leh eng pawl leh eng mi pawh en hrang lo va, an harsatnaa tanpui duh mi thlang chhuak turin kan ngen a ni.
2. Tih puitlin theih loh tur hmanga mipui hnena inzuar lo va, ram leh hnam tana Party-in tih a tum dik tak sawia campaign tur te, tlin duh avanga hmanraw bawlhhlawh: hel pawl leh ralthuam lam chi hmang lo tur te, sum leh therhlo sem lo tur te leh hleihluak taka mimal leh pawl in sawichhiat tawn te, inelsen leh in auh nawmnahte ti lo turin kan ngen a ni.
3. Candidate zawng zawngte hnenah duhsakna kan hlan a. Thlan tlin member apiangte pawh term puitling hmang zo ngei turin duhsakna kan hlan a ni.
4. Thlan tlin apiangte chu anmahni thlangtu mipui leh roreltua ruattu Pathian zah chunga ram leh hnam tana rinawm taka hna thawk tur leh mimal hamthatna uma therhlo leh eng thil maha lei theiha awm lo turin kan ngen a ni.
————-
Hruaitute Programme:
1. General Superintendent Rev. Lalmalsawma Sailo, General Secretary Rev. R. Lalrinsanga leh General Treasurer Rev. Zohmingthanzama te chuan CBC Gaduation Day October 21 a neih tur hmanpui turin an kal.
Hemi rual hian Theologial Education Board (TEB) Shillong hmuna neihah an tel pui bawk anga, October 22 Thawhtanni a General LAD Board shillong a neih turah an telpui bawk ang.
2. General Missions Director Rev. R. Lalhawia chuan Oct. Ni 15 thawhtanni khan Assam Field Board, Guwahati-a neih chu a hmanpui a, October ni 18-a Central District Missions Board Shillong-a neih chu telpui leh in October 21 Pathiannia Calvary Bible College (CBC) Graduation Day a hmanpui bawk ang.
3. General Sunday School Director Rev. R. Laichhingpuia chuan October ni 20 a Imphal District Sunday School Department buatsaih seminar ‘Children Psychology’ tih thupuia hmanga Imphal Kohhranah seminar nei turin a kal.
4. North Mizoram District Superintendent Rev. Laltluanga chuan October ni 10 Nilaini khan Ailawng, Reiek Bial Pastor Quarters siam that dan tur enin a fehchhuak a, zanah Ailawng kohhranah rawngbawlna a nei.
5. North Mizoram District Treasurer Rev. K. Lalduhsanga’n October ni 19 inrinni leh Pathianni hmang hian Tlangsang Bial buatsaihin Seminar, Tlangsang Biak inah a nei ang.
6. Aizawl East District Superintendent Rev. Rosanga Kawlni chuan October 17 Nilaini khan a bial hmui thar Chhingchhip Kohhranah rawngbawlna a nei. Tin, Oct ni 21 Pathianni-a CBC Graduation Day, Shillong hmuna hman-ah telpui bawkin TEB Meeting neih chhunzawm turah a tel leh nghal dawn a ni.
7. District Secretary Rev. Biaksangzuala chuan Ngopa Bial, Teikhang-ah rawngbawlna neiin hun a hmang ang.
8. Rev. C. Mawizuala, Aizawl East District Sunday School Director chuan Khawlian bial ten Sunday School Kumpuan bawhzui nana October ni 19, Zirtawpni leh Inrinni-a Naupang pual camping an neih mekah Speaker-ah tangin Pathianni zanah Revival Programme-ah rawngbawlna a neih chhunzawm bawk ang.
———
PCD MEET:
October ni 19 Zirtawpni atang hian Pentecostal Children Department (PCD) Lunglei District buatsaih in Headquarters Local Biak in, Chanmari-ah PCD MEET an hmang mek.
Meet-ah hian Solo Competition leh Worship Dance Competition-te hmanga in tihsiakna neih tur niin, worship dance Competition -ah hian Local PCD 15 an tel thei a, Solo-ah Local PCD 19 ten hla pahnih theuh hmangin intihsiakna an nei bawk ang. Kum 2017 PCD MEET-a Solo Competition- mipa leh hmeichhia a pakhatna CV. Remsangzuali leh Lalhlimpuia Sailo ten Pathian fakna hla an sa dawn bawk a ni.
———
Biak In hawng dawn:
Oct. ni 20 inrinni hian Mualcheng South Local Biak in chu Lunglei District Treasurer Rev. C. Lalrintluanga’n a hawng dawn.
Mualcheng South Local-Biak in hawn inkhawm ah hian District Treasurer Rev. C. Lalrintluanga chuan Pathian thuchah puan chhuahna a nei anga, tlai lamah biak in thar lawmna ruai kilho nghal a ni ang.
Mualcheng S Local biak in hi a dung 70ft. leh a vang 38 ft. a ni a, Oct. ni 20, 2008 khan Rev. VL. Hmuaka chuan biak in lungphum hi lo phum tawh in, lungphum a nih atanga kum 10 hnu Oct. ni 20. 2018-ah hawn a ni ta a ni. Biak in hi Rs.50,00,000 (Nuai sawmnga) senga sak a ni.
———
Joint Conference hmang:
Oct. ni 12 atanga ni 14 chhung khan Sertlangpui Bial PYD leh LAD Join conference vawi 32-na chu Dengsur Local Biak Inah neih a ni.
Joint Conference-ah hian Lunglei District Secretary, Rev. C. Vanlalena chu Speker niin, H. Lalengzami chuan Pathian fakna hla sa in rawngbawlna a nei ve thung a, October ni 13 inrinniah rorelna neiin an rorel tlangpui te chu:
PYD rorel:
1. Bible Ralchhan siam
2. Pastor Quarters tih changtlun
3. Kum 2019 Dist. PYD Conference dawl tur Organising Committee hnenah Rs 5000 pek ni se tih te an rel.
LAD rorel:
1. ASC home tanpuinan Rs.4000 pek.
2. Bible ralchhan siam.
3. Pastor Quarters tih changtlun nan Rs 15,000 sanction.
4. Pastor bial fan ruala local tin in Buhfaitham campaign na tur programme lo siamsak leh
5. Pentecostal Lady chanchinbu man May thla ral hma ngei a pek vek zel tura hmalak te an rel a ni.
__________
Bial Missions Conference hmang:
Oct. ni 19 zirtawp zan atang hian Lungsen bial Mission Department Conference chu Rangte ‘S’ -ah neih a ni dawn a, Thupui atan ‘Chanchintha tan turin Pathianin hna min pe a ni’ Philipi 1:16 chu hman a ni. Inkhawmpui Speaker atan hian bialtu Pastor K. Vanlalhruaia chu hman tur niin, Oct. ni 20 inrinni hian rorel inkhawm neih a ni ang.
———————–
Crusade cum Sport nei:
Oct. ni 19 zirtawp zan atang hian Theiriat Section PYD ten Zobawk Local-ah Crusade Cum Sport Meet an hmang dawn a, Oct. ni 20 inrinni nilengin item hrang hrang hmanga intihhlimna neih tur niin, Crusade-a chhunzawm a ni ang. Crusade Speaker atan District Secretary Rev. C. Vanlalena chu hman a ni.
Tin, October ni 21 Pathianni hian Rahsiveng Local Sunday School Department chuan Vocational Programme nilengin an hmang dawn a, Lunglei District Sunday School Director, Evan C. Lalremchhunga’n a hmanpui ang.
—————–
ASC Home ah thilpek hlan:
October ni 12 khan Hnahthial bial LAD ten ASC Home, Khuangpuilam, Kolasib-ah thilpek an hlan.
Hnahthial bial LAD te hian ASC Home tan hian Television Rs 23,900 man an pe a, Hnahthial Venglai Local LAD ten Long chair cushion telin an pe bawk a, Hnahthial Chanmari LAD ten Dunlop Rs 3,000 man leh Leite leh Tuipui LAD ten bedsheed 4 ve ve pein, Thiltlang Local ten bedsheed 1 leh Hnahthial Electric LAD ten Sana lian an pek bakah mimal thahnem ngai ten thilpek engemawzat an hlan bawk.
———————
Mithar:
October ni 14 Pathianni khan Lungsen ‘S’ Local-ah Bialtu Pastor K. Vanlalhruaia’n mi pathum baptisma chantir in, an zinga 2 hi mi thar an ni.
———–
Fehchhuak dawn:
Lunglei District, Luangmual bial LAD ten Oct. ni 20 leh 21 chhung hian Thenzawl Vengpui Local-ah rawngbawlin an fehchhuak dawn.
—————-
Meet hmang mek:
Oct. ni 21 Pathianni hian Pukpui bial Sunday School Department buatsaihin Pukpui Biak Inah Sunday School Meet an nei.
He Meet-ah hian bial chhung Local hrang hrang atangin Sunday Scholl naupang ten item chi hrang hrang hmangin intihsiakna an nei dawn a, Pukpui bial PYD Zaipawl ten zai a rawngbawlna an nei bawk ang.
—————-
Distict LAD Conference hmang zo:
October ni 13-15 chhung khan UPC (NEI) North Mizoram District LAD Conference Golden Jubilee, “Puitlin lam i pan ang u” tih thupui hmanga, Thenzawl Bial, Thenzawl Field Veng Biak ina neih chu Pathian Thlarau Thianghlim awmpuinaa hman a ni.
Conference ah hian palai in report chin mi 1380 niin President Sis. PC Lalromawii B/W kaihhruaina hnuaiah neih a ni. Dist. LAD Conference hi Jubilee Conference a nih avangin, tum dang conference ang lovin hun hman dan sawi danglam a ni a, Palai thlen kim zan Zirtawp zanah Conference rorel a bul tan in, Sist. P.C Lalromawii B/W Dist. LAD President-chuan rorel inkhawm a kaihruai; North Mizoram District Treasurer Rev. K. Lalduhsanga’n conference hawnna neiin, “Pentecost kohhran te hi Lalpa’n a chanchin tha hril turin min ring em em a ni” tih hmangin Pathian thuchah a sawi.
Dist. Supdt. Rev. Laltluanga’n North Mizoram District LAD ten Conference vawi 50-na (Golden Jubilee) hial an thleng thei chu lawmawm a tih thu sawiin Dist. LAD te ‘Tanpuitu’ an nih anga Kohhran siam puitlin a nihna tura an theihna lam lama an tangkai thin dan te, District Kohhran pui pawhin a thlamuanpui dan te bakah mi dangte tana malsawmna ni tura an luanchhuah nasat dan te sawiin District LAD hruaitute mai bakah North Mizoram district chunga LAD member zawng zawng te thawhhona that vang a ni a ti bawk.
October 12 zirtawp zanah rorel inkhawm neih a ni a, rorel thu passed pawimawh zual te:
1) Kum 2019 Dist. LAD Conference hi District puia beh kum niin; 2020 Conference-na hmun atan Kolasib Venglai bial chu ruat a ni.
2) Kum 2019 ah hian Golden Jubilee pualin LAD ten mahni lawina Biak In theuhah jubilee hriatrengna dah nise.
3) Tirhkoh ramtlan rawih chhunzawm.
4) 2019 chhungin Bible chhiar chhuaka inelna neih nise tih leh.
5) Golden Jubilee pualin Home Mission Field 9 ah present pek nise tih te a ni.
October ni 13 Inrinniah Conference Golden Jubilee lawmna hun hman niin Conference hmanna Biak In kawtah Sist. F Rohlupuii Bible Woman kaihhruaia hman tan a ni. District Superintendent Rev. Laltluanga’n Jubilee hriatrengna lungphun hawngin; Rev C Lianchama’n Jubilee mei a det a, Jubilee baloon chhuah a nih hnuah Jubilee dar vuak a ni.
Biak in chhungah Jubilee lawmna inkhawm neih zui nhalin; Rev C Lalthantluanga North Mizoram District Missions Director-in Jubilee souvenir a tlangzarh a. LAD zaipawl bial 10 chuang ten Jubilee hla tha tak tak an rem bakah mal zai te, thusawi tawi te leh North Mizoram District Documentary kum 1969 atanga kum 2018 thlenga LAD nihphung tarlang thei Documentary Drama-a chan chhuah ni bawkin, tlaiah Jubilee ruai an kilho bawk.
Conference hman chhung hian thuhril rawngbawlna tum 4 awmin Sist. P.c Lalromawii B/w Dist. LAD President in Inrinni zanah Thupui then khatna “Thuawihnaah” tih a sawi a, Pathianni zingah Rev. Lalmalsawma Sailo General Supdt. in Thupui then hnihna “Ram thim rawngbawlnaah” tih a sawi bawk, Pathianni chawhnuah Sist. Lalchangliani Sailo B/W Gen. LAD President in “Thianghlimnaah” tih thu sawi lehin Pathianni zanah Rev. Laltluanga North Mizoram District Supdt. in “Thlarau lamah” tih thupui hmangin Pathian thuchah a sawi bawk ani.
Pathian thuchah sawitute hian ‘Puitlin lam i pan ang u’ (Hebrai 6:1-2) tih hmanga thuchah sawiin; Rev Lalmalsawma Sailo chuan ‘khawvel hian hun khirh takte a hmachhawn mek a, India ramah pawh neih inang inkawp khapna leh uire khapna dan pawh Supreme Court in a paih tawh a, sodom hunah khan kan let leh mek a ni, a ti.
Israel fate kha Kanan ram an pan lai chuan Pathian hnen atangin engkim a thlawnin an dawng a, Kanan an luh chiah atangin anmahni in an thawkchhuak ang khan, keini pawh hi thilpek chi hrang hrang, buhfaitham thlengin step khat talin hma kan sawn a ngai. Missionary support pawh nasa zawkin kan pek a ngai a ti.
Conference report atanga a lan danin North Mizoram District LAD dinhmun leh hmalakna tlangpui hetiang hi a ni.
North Mizoram District chhunga Bial awm zat : 30
Bial LAD dinna zat: Bial 30
Local LAD dinna zat: Local 147
District chhunga LAD member zat: 4791
Bible Women awm zat: 6
Report hun chhunga District LAD sum thawhchhuah zat: Rs. 17,65,208
North Mizoram District hi UPC North East India hnuaia District 11 zinga District upa ber niin; tunah hian Pastor bial 30 leh kohhran (local church) 195 an awm mek a ni.
———
Disrtict Missions Resolution Committee thukhawm:
Oct. ni 17 Nilaini khan North Mizoram District Missions Conference vawi 38-na, Oct. ni 26-28 hmanga Chaltlang Bial-a neih tur atan Resolution committee District Office-ah an thukhawm.
Meeting hi Rev. C. Lalthantluanga Dist. Missions Director in kaihhruaiin, Mission Conference vawi 38-na-a rel tur Confe. Agenda lut te thlir hovin, thlitfimna an nei a ni.
———–
Nilaizan thupui Bu tur endik hna thawk:
October ni 10 Nilaini Chawhma dar 10:30 khan North Mizoram District Lit. & Pub. Board chuan Chairman Rev. Chhiarpuia kaihhruaiin nakum 2019 Nilai Thupui zirtur endik runpui neiin a thawhkhatna atan edik hna, Dist. Committee Room-ah an nei a, Nilai zan bu hi bung 1-10 na thleng endik hna an thawk zo a ni.
————–
Thianghlimna Committee thukhawm:
Oct. ni 17 Nilaini chawhnu dar 1:30 khan North Mizoram District- Thianghlimna committee chu District Committee Room-ah an thukhawm.
Meeting hi Chairman Rev.Laltluanga Dist.Supt. in kaihruaiin; Thianghlimna kawnga North Mizoram District-in hma a sawn dan te, Department tinin Thianghlimna kawnga hma an sawn dan te leh an hma lak dan te a tar lang a, District huapa hmalakna tur hrang hrangte an sawi ho. (Pic. NMD Thianghlimna committee)
————
Member thar:
Oct. Ni 14 Pathian ni khan Evan. R. Vanlalhriatpuia Vaseikai Home Missionary chuan Buddist Sakhua atangin chhungkaw khat member 6 Kohhran ah a lawm lut.
———————————–
Disrtict anniversary lawm:
Oct. Ni 20 inrinni khan Chhimtuipui District UPC te Lunglei District atanga an indan kum 43-na a ni a, He ni hi Chhimtuipui District office in thu a chhuah angin District chhunga Bial leh Local te chuan awm ni khamin Pathian hnen a lawmthusawi nan hun an hmang a, chhun lama hmang remchang lo te pawn Zan inkhawm ah Pathian hruaina avanga Lawmthu sawiin hun an hmang bawk.
—————————-
Bial Conference hmang:
Oct. ni19-21 chhung hian Siaha Bial LAD te chuan an Conference Vawi-43-na an hmang mek.
Conference ah hian speaker atan Sis. H. Zoramthangi Former Dist LAD President chu ruat a ni a, inkhawmpui chhungin Dist PYD Choir leh Bial chhung local hrang hrang LAD ten Pathian fakna hla sa in rawngbawlna an nei dawn bawk a ni.
——————————-
PCD Meet hmang:
Oct. ni 13-14 chhung khan Sangau Bial PCD meet chu Sangau 1 localah hman a ni.
Meet ah hianRbt. L. Khuangpari chu speaker ah hman a ni a, Pathian thlarau awmpuina nasa tak an dawn avangin Oct. ni 15 leh 16 chhung khan meet hi chhunzawm leh a ni.
—————————-
Serh leh sang rawngbawlna nei:
Siaha Sectional Pastor Rev. Kholy Hlychho chuan tunlai hian a bial chhung local hrang hrangah sacrament rawngbawlna leh ke sil rawngbawlna a nei mek a, Oct. Ni 14 (Pathian ni) hmang khan Siaha council Veng local ah rawngbawlna a nei leh bawk.
—————————
Crusade hmang dawn:
Chhimtuipui District chhung hmun hrang hrangah crusade nei tura hmalak mek niin, District, Bial leh Local huap a ruahmanna kalpui mek a ni.
October ni 31 atanga November ni 4 chhung hian Sangau I Kohhranah District huap Revival Crusade buatsaih a ni dawn a, hlawhtling taka hman anih theih nan Sangau Bial leh Sangau I Kohhran te chu theihtawp chhuahin an inbuatsaih mek zel a. District lam atangin Crusade sawmna pawh Local tinah thawn chhuah tawh niin he Crusade ah hian Rev. Dr. Lianmang of Myanmar leh a team ten rawngbawlna an nei dawn a ni.
————–
Open Air Crusade nei:
Oct. Ni 15 atang khan District Evangelist N.Thanghnuna chuan Riasikah hmunah ah Open Air Crusade a nei a. He crusade ah hian Bro.Lalnunzira leh Bro.Lalawmpuia ten an tawiawm a ni.
Tin, Oct. Ni 11 khan Riasikaah Salvation Camping buatsaih ani bawk a, Camp ah hian Evan. N. Thanghnuna Dist Evangelist chu speaker ah hman a ni bawk.
——————————-
Revival khawmpui hmang:
Oct ni 12-14 hmang khan Tuipang Bial ten Revival khawmpui Tuipang V Biak In ah an nei.
He Revival khawmpui ah hian Speaker ah Pastor C. Lalchhuanthanga Vathuampui Bial chu hman a ni a, Thupui “Harhtharlehna” tih hmangin Pathian Thuchah ngaihthlak thin a ni.
———–
Barak District ah khawmpui hmang mek:
Oct. ni 19 zirtawpni atanga ni 21 Pathianni chhung hian Barak District chhunga bial hrang hrangte chuan Department khawmpui an hmang mek.
Hqrs. Bial ten Sunday School leh Missions Department khawmpui a inkawpin Hmarkhawlianah an hmang a, Haflong bial ten LAD leh Sunday School Department khawmpui inkawpin Muolhoi Local-ah hmangin District Sunday School Director Rev. HL. Vunga’n a hmanpui bawk. Silchar bial ten Sunday School leh LAD khawmpui chu inkawpin Nagathol local-ah an hmang a, District Superintendent Rev. H. Lalramlien-a’n a hmanpui. Vangai Bial ten PYD, Sunday School leh Missions Department inkawpin khawmpui an hmang a, inkhawmpui hi District Missions Director Rev. Lalthanmawia’n a hmanpui bawk a ni.
_____
Pathian chawimawina nei:
1. October ni 17 Nilaini khan Haflong Local-a Upa Manga te chhungkua chuan Pathian Chawimawina hun an hmang. He Pathian hnena lawmthusawi chawimawinaah hian Rev. H. Lalramlien, Barak District Superintendent leh Rev. V. Biaksangliana, Kolkata Missionary ten telpui in an hnen atang hian Pathian Thu ngaihthlakna neih a ni.
Tin, Oct. ni 18 khan Sis. Lienzahnem, Hmarkhawlien te chhungkua chuan Pathian hnenah lawmthu sawi chawimawin an an nei bawk a, Rev. HL Vunga’n inkhawm kaihruaiin, Pastor L. Kapma, Bialtu Pastor chuan thusawi rawngbawlna a nei a, District Superintendent Rev. H. Lalramliena’n chawimawina petu te chhungkaw tan tawngtaisakna a nei bawk.
2. October ni 13, Inrinni khan Suangpuilawn bial-a Bro Raldosanga te chhungkua chuan Pathian hnenah lawmthu sawi chawimawina neiin Kohhran hoten hlim takin hun an hmang.
He hunah hian Speaker-ah Pastor K Vanlalhlimpuia hman niin Speaker hi Apostolic Herald team members ten an tawiawm a ni. Chawimawi Programme hi Chawimawina petute In-ah hian Zirtawp zan atanga Pathiani zan thleng khan hman niin Pathian Thlarau Thianghlim awmpuina hnuaiah hlim takin hun an hmang a, siamtharlehna chang mi engemaw zat an awm bawk a ni.
3. Hnahlan bial, Khuangphah hmunah pawh October 13, Inrinni khan Bro. Hrangkama te chhungkua chuan Pathian chawimawina an nei a, Kohhran hoten hlim takin hun an hmang a ni.
Chawimawina neitute chhungkua hi Bialtu Pastor R. Lalfamkima chuan hriakhnawih rawngbawlna a neih sak a ni. Chawimawina Programme hmang tur hian hnahlan atang pawhin mi engemaw zat an kal a ni. Hnahlan bial chhung N. Diltlang hmunah pawh, District Full Time Evangelist Evan. Lalamena leh a team-te chuan rawngbawlna an nei kal mek zel a, October 10, Nilaini khan Evan. Lalamena kutah hi mi 6 in sual ngaihdamna baptisma an chang a ni.
Hnahlan bialte hian October 20 leh 21 chhung hian Bial huapin rawngbawltu chin Retreat Khuangphah Kohhranah an nei dawn bawk a, Resource Person atan Bialtu Pastor R. Lalfamkima an hmang dawn a ni.
———
Tihdam rawngbawlna nei:
Oct. ni 15 khan Unaunu Thuthlungmawii chuan Muolhoi UPC Biak Inah tawngtai a tihdam rawngbawlna a nei a, Pathian hnathawh ropui tak lo langin a rawngbawlna pantu zing a mi 3 ten Pathian tihdamna a hmunah an chang nghal a ni.
——————————
Thu leh Hla kut pui hmang dawn:
Aizawl East District PYD hnuaia Hla kutpui Committee te buatsaihin October ni 20, Inrinni zan atangin Zemabawk Vengpui Biakin-ah District huapin HLA KUTPUI hman a ni dawn.
Inkhawm hi Hla Kutpui Committee chairman Evan C. Lalchhuanga chuan kaihruaina hna a thwk anga, Pastor Laltlanhlua Hnamte, Ex. District PYD President chuan hawnna a nei ang. Opening song, Pentecostal Choir te hnen atangin ngaihthlak a ni dawn bawk.
Aizawl East District PYD ten hla kutpui an hman turah hian Inkhawm apiangin zaithiam hrang hrang ten zaia rawngbawlna an neih thin bakah thupui hrang hrang hmangin heng mite hnen atang hian thusawi ngaihthlak thin a ni bawk ang.
Inrinni zan-ah Evan F. Lalsangliana, Thupui : Music lama hmasawnna
Pathianni chawhma-ah Bro.Lalthansanga Colney, Thupui: Solfa lama hmasawnna
Pathianni chawhnu-ah Evan H.Lalrinawma, Thupui: Zai leh hlaphuah lama hmasawnna
Pathianni zan-ah Rev R. Laltlankima, District PYD President.
Aizawl East District PYD hla kutpuiah hian hranghlui Pentecost zaithiam te sawm an nih angin mi engemaw zatin an telpui beisei a ni a, zaia rawngbawlna an nei thin bawk ang. Pathianni zan inkhawm-ah hian Hla kutpui Committee te buatsaih hla inphuahsiak result puanna leh lawmman semna hun hman a ni dawn bawk a ni.
———-
District Missions Confererence hmang dawn:
Aizawl East District, Missions Department te chuan October ni 26 – 28 chhung hian Khawhai bial, Khawhai hmunah District Missions Inkhawmpui an hmang dawn a, Thupui-ah “I rawngbawlna kha hlen rawh” II Timothea 4:5 hman a ni ang.
Thupui thensawm hmangin Speaker hrang hrang Evan H. Malsawmthanga, Rev. Lalrema, Rev. R. Lalhawia, Gen.Missions Director leh Rev. Lalmalsawma Sailo, General Superintendent bakah Rev. Rosanga Kawlni, District Superintendent te hnen atangin thusawi ngaihthlak thin a ni dawn a ni. October 27, Inrinni Chawhma Dar 10-ah rorel inkhawm Khawhai biakin-ah neih a ni anga, rorel velote tan vantlang inkhawm inkhawmpui neihna hmunah neih a ni bawk ang. Hetah hian Evan H. Lalbiakzauva’n inkhawm kaihhruain hna thawkin Evan H. Lalhlimpuia hnen atangin thusawi ngaihthlak a ni dawn a ni.
Aizawl East District Missions Department inkhawmpui thlengtu tur Khawhai Bial te pawh nasa takin an inbuatsaih chho mek zel a, Inkhawmpui hi Khawhai Community Hall-ah hman tura ruahman ni in, tunah hian a cheimawi hna leh a tul ang ang thawkin nasa takin Khawhai bialte an inbuatsaih chho mek zel a ni. Mikhualte hi Counter panga-ah lo hmuah tur niin Counter No-1 hi Khawhai buhkangkawnah, Counter No-2 hi Indoor Stadium Tual, Khawhai North niin Counter No 3-hi Town Hall, Khawhai Venglai bakah Counter No 4- Section IV, YMA Office Tual, Khawhai South leh Counter No 5- Pi Rinthangi Tual, Khawhai South te a ni.
——–
PYD Tlangval in Gold Medal la:
September ni 26 atanga ni 30 chhunga Lucknow, Uttar Pradesh hmuna National Classic Powerlifting Championship- 2018 neih zawh takah Mizoram Powerlifting Association tirhin Bro.Joseph Lalnunmawia S/o Upa Vanlalpeka, Bazar Kohhran, Aizawl-a lawi chuan 83 Kgs Category-ah Gold Medal ala.
He Championship hi December thlaa neih tur Asian Championship, Philipines hmuna Powerlifting Competition neih leh tura India ram aiawha kal tur thlanna a ni nghal bawk a ni. Hetiang ang National Level-a Gold Medal la thei PYD tlangval kan nei hi kan chhuang zet a ni.
——————
Mobile Crusade nei:
Bethlehem bial PYD ten October ni 10, Nilai zan inkhawm ban khan Aizawl khawpui chhung hmun hnihah Thuthlung puan chhuahna Mobile Crusade an nei.
He hunah hian Speaker-ah Evan Lalchhuanmawia Zote chu hman niin Bro Lalthansanga Colney hnen atangin fak hla ngaihthlak thin a ni bawk. Mobile Crusade hi Vanapa Hall kawtah neih hmasak a ni a, hemi zawh hian Bawngkawn Traffic Point, Durtlang pengah hun hman chhunzawm leh a ni bawk. He hunah hian member engemaw zat an kal a, hlawkthlak an ti hle a ni.
—————–
Theological College campaign cum seminar nei:
October ni 13, Inrinni nileng khan Serchhip Bial PYD te chuan Bial huapin Theological College campaign cum seminar hlawhtling takin an nei.
He hun hi Serchhip bial chhung Chanmari Biak in-ah neih a ni a member kal an tha hle. General PYD kumpuan, Intodelhna lama hmasawn a nih theih nana ruahman niin Serchhip Bial chhung atanga Pathian thu zir tam zawk an chhuah theih nan leh Home missionary tam zawk an chhuah a, Pathian rawngbawlna lama nasa zawka Serchhip bial a intodelh theihna tura ruahman a ni. He hun hmang tur hian Calvary Bible college hotute sawm an ni a, Pastor LS Lalhruaisanga, Lecturer CBC chu resource person niin, Evan F. Lalsanglura, Home Missionary Lunglei District chuan a tawiawm bawk. Serchhip Bial PYD ten Theological College campaign an neih chu hlawk thlak an tiin a hlawhtlinna pawh hmuh ngei an inbeisei a ni. Hemi ni vek hian Serchhip Bial PYD Kumpuan sub committee te buatsaih, ‘Intodelh kan ngaihna lai, Kohhranah’ tih thupui hmanga Article inziah siak lawmman semna neih a ni a, Slogan inphuah siakna neih nghal a ni bawk. Kumpuan sub committee te hian kumin chhunga Bible chhiar chhuakte hnenah lawmman pek an tum bawk a ni. Inrinnni zan vek hian District PYD conference rorel in a passed, District board in mahni bial chhungah remchan dan anga hman nise a tih, Thlarau Thianghlim dil beihpui thlakna Bial huapa neih nghal a ni a, hemi hma hian Serchhip bial chhung local tinah Thlarau Thianghlim dila tawngtaina hun an hmang tawh bawk a ni.
———————
PYD Education Sub-Committee ten Quiz buatsaih:
Bawngkawn bial PYD Education Sub-Committee te hmalakna in October ni 15, Thawhtan zan khan bial huapin quiz inelna Peniel Sunday School Hall-ah neih a ni.
He hun hi Bro. HK Lalneihsanga, Bial Education Sub-Committee Chairman chuan kaihruaiin Bialtu Pastor, Rev C.Mawizuala’n hunserh a hmang. Quiz-ah hian Local thum, Bawngkawn, Peniel leh Ramhlun Vengthar atangin Team hnih theuh telin Quiz master-ah Bro K. Lalbiaknunga chu an hmang a ni. He Quiz-ah hian Kohhran history bakah Mizoram GK, Indian Constitution leh Indian Political History atangte in zawhna siam a ni a, Peniel PYD chu pakhatna niin Bawngkawn PYD ten an dawt a, Ramhlun Vengthar PYD te pathumna an ni thung. He hunah hian bial chhung atangin PYD member engemaw zat an kal thei a ni.
—————-
Thianghlimna tuikhuah buatsaih:
October ni 12, Zirtawpni khan Bro Vanlalvuana te chhungkua, Champhai Kahrawt Kohhran te chuan Thianghlimna tuikhuah an buatsaiha Thlarau Thianghlim awmpuina hnuaiah hlim taka hun hman a ni.
He hunah hian Upa Dr. Charles Romalsawma hnen atangin Pathian thu ropui tak ngaihthlak niin ‘Thianghlim tur kan ni a, Thianghlimna daltu kulh i thiat ang u’ tiin Kohhran mite a sawm a ni. He Thianghlimna Tuikhuah puan a nih atang hian mi 7 laiin an zuk leh hmuam bansanin Kohhranin Thianghlimna a kalpui mek an tihlawhtling nghal bawk a ni. Tlai-ah hlim takin tisa ruai an kilho nghal a ni. Thianghlimna Tuikhuah hi October 13, Inrinni khan chhunzawm leh a ni a, Bialtu Pastor, Rev. VL. Hnemtluanga hnen atangin Thianghlimna thuchah ngaihthlak chhunzawm a ni bawk.
Facebook