UPCNEINEWSSERVICE Oct 11-18.2020
———
Khawvel ram danga UPC Kohhran rawngbawlna report :
Member thar :
– Australia ram khawpuia UPC Kohhran duhawm, Pentecostals of Sydney Kohhranah Oct ni 11, Pathianni khan mi thar 12 in sual ngaihdamna Baptisma an chang.
– Oct 11, Pathianni khan Ndola, Zambia ah mi thar 9 in Sual ngaihdamna Baptisma an chang.
– UPC Life Tabernacle ah pawh Zambia UPC General Suptd Rev. Morgan Mwanza kutah Oct 11 khan mi thar 3 in sual ngaihdamna baptisma an chang.
– Oct ni 11, Pathianni chawhnu khan Japan rama Matsusaka Kohhrana lawi turin member thar 11 Kohhranah seng luh an ni a. Hemi zan vek hian mi thar 2 in sual ngaihdamna Baptisma an chang thar.
– Bolivia ramah Oct ni 12, Thawhtanni khan mi thar 2 in Sual ngaihdamna Baptisma an chang thar ve leh.
———–
Pastor rual tir chhuak :
October 4, Pathianni khan Madagascar UPC Pastor 38 rual te chuan an Bible School-ah kum 2 zet class room chhunga Pathian thu zirna leh rawngbawl tura inbuatsaihna an neih hnuin October ni 4, Pathianni khan rawngbawl tura tirhchhuah an ni ta.
Hmani lawka member thar sengluh engemawzat pawhin Oct ni 6, Thawhlehni khan Pathian thu an zirna course (new converts class) zovin certificate hlanna programme an lo buatsaih tawh nghe nghe.
Madagascar hi UPCI hnuaia ram bung thenah, Africa region-ah awmin kum 1970 Feb thla tir te ah mi 14 in Kohhran dinin bul an tan a, an din tirh chuan an khaw har ve rak rak hle ang. Kumin Feb 2, Pathianni khan an kum 50 tlin lawmna hun an buatsaih a, Kum 50 an han tlin meuh chuan Kohhran member Nuai 2 chuang fe an awm tawh a, UPCI Global Missions hnuaia member tam lamah palina dinhmun hauh mekin Kohhran thang duang tak an ni mek.
Madagascar-rama UPC Kohhran enkawl Bible School pathum ah hian kumin session-ah zirlai 171 an awm mek a ni.
————
Global Connections Weekend :
Oct ni 15 atanga ni 17 chhung hian khawvel huapa UPC Kohhran Missions rawngbawlna sul su tu pawimawh; Global Missions chuan Global Connections Weekend programme a buatsaih a, thupui atan MULTIPLY tih hmangin, a tum ber chu Multiply God’s Kingdom, Multiply your Life tih a ni. He programme hi online(zoom) a kalpui a ni a, chhimtu an thahnem viau.
Global Connection hi Global Missions programme duan pawimawh tak pakhat zinga mi niin; Global Missions Confernce a ni ber.
Chanchin Tha hril hnaa tui apiang te in tawh khawmna tura duan a ni. Chanchin Tha rawngbawlna kawnga infuih phurna leh in tih chakna tur atan items hrang hrang- thusawi, seminar, report, fakna hla hmang te a progamme buatsaihin kum hnih dana neih thin a ni.
Speaker te :
– UPCI General Superintendent Rev. David K. Bernard
– Global Missions Director Rev. Bruce Howell
– Global Missions hnuaia Associates in Missions (AIM) Director of Education Jim Poitras
– Apostolic Youth Corps (AYC) Director Sis. Seneatha Clayton
– South Africa Missionary Pastor Nick Sisco
– Access Challeged Nation Missionary
———-
Editing Board :
Tunkar chho, October ni 12, ni 13 leh ni 16 ni te khan General Sunday School board chuan General Hqrs Office ah kum thar atana Puitling Sunday School thu zir tur edit hna an thawk a, kum thar 2021 hian Rom hrilhfiahna, Rev. R. Lalrinsanga ziak zir tura buatsaih mek a ni.
———–
Biak in hawng :
Arunachal missions field chhung Pongte local Biak in chu Sept ni 27, Pathianni khan Rev.Thangchuanga Field Director chuan Pathian hnenah hlanin a hawng a, he biak in hi chhimtuipui Dist.missions Dept.chuan Rs,131430 sengin an sak sak a ni.
———–
Inkawm hona nei :
Oct ni 15 Ninga ni khan UPC NEI Gen. Conference vawi 52 -na Lunglei District,Farm Veng UPC Biak in neih tur, Covid 19 hripui leng avanga Emergency Executive Board Oct ni 6, 2020- a neih in a thulh tak chungchangah Gen Supt Rev. Lalmalsawma Sailo leh Lunglei District hruaitute, Farm Veng kohhran hruaituten inkawmhona an nei.
Organizing hruaitute hnen aṭangin khawmpui dawl tura an inbuatsaihna chanchin ngaihthlak a ni a, khawmpui ṭhulh anih chu a pawi an tih thu sawiin hripuileng avanga ṭhulh a ngai ta erawh chu thinlung taka an hriatthiam thu an sawi a ni. District hruaitute aṭangin an hmalak dan ngaihthlak a ni bawk. Lunglei District emaw Fatm Veng kohhran emaw pawhin hun lo la kal leh tur ah pawh Inkhawmpui Lian dawl hi an inhuam thu an sawi. General Supt pawhin thu sawiin Lunglei District hruaitute leh Farm veng kohhran hruaitute chungah lawmthu a sawi a ni.
———
District hrang hrang rawngbawlna chanchin :
Aizawl East District rawngbawlna :
October 8, Ningani khan Aizawl East District LAD Conference vawi 27-na, rorel inkhawm chu tluang taka neih a ni.
Mualpui Bial ten Mualpui Kohhran-ah lo thlengin Sis.Zionparmawii B/W, President, District LAD chuan a kaihruai a, Rev Biaksangzuala, District Superintendent chuan palai kalkhawmte hnenah fuihna thu sawiin rorel tur hlanna a nei nghal a ni. Rev VL.Hnemtluanga, District Treasurer kaihhruaiin member boral sunna neih a ni bawk a, LAD member boral mi 54 he hunah hian sun an ni.
Aizawl East District LAD Conference hi ruahmanna ang chuan October 9 atanga 11 chhungin Mualpui Bial-ah hian Revival inkhawma neih tura tih niin Covid-19 hri leng mek avangin Revival Inkhawm hi nei lovin rorel inkhawm chauh October 8, Ningani hian neih a ni ta a ni. District LAD Conference rorel inkhawm-ah hian hri leng avanga Mizoram sawrkarin inkaihhruaina a siam hrang hrangte zawm niin rorel palai pawh kum dang ang lovin bial tin atangin mi 3 zel ruat an ni. He rorel inkhawmah hian Bialtu Pastor te bakah General LAD Hruaitute pawhin an telpui bawk a ni.
District LAD Conference rorel-ah hian Bial atang leh Official atangin agenda lut engemaw zat awmin an thu passed langsar zualte:
1. Kum 2022 District LAD Conference chu Zohmun Bial-ah nghah a ni. Kum 2021-ah chuan District Kohhranpui-ah betin N.Vanlaiphai bial-ah Conference hi neih a ni ang.
2. District LAD Conference thlengtu tanpuina chu Rs 100,000/- a ti pungin pandal zar emaw zar loh pawh ni se Rs 300,000/- ni tawh se tih a ni.
3. Kum 2020 LAD Day thawhlawm District in a chan chu District chhunga Kohhran harsa zual Biak in sak tanpui nan hman ni se tih a ni.
4. Kum 2021 LAD Day Ip atanga sum hmuh chu General Missions puala dah ni se tih a ni.
5. LAD Kumpuan Chhungkaw Maicham hmalak zal nan kum khata Pathianni vawi khat hi chhungkaw maicham puala dah ve ni se tih chu tha tih niin District Kohhranpui-ah Chhungkaw Maicham pualin Pathianni vawi khat, Chhungkaw Maicham Sunday siam sak tura ngen ni se an ti.
6. District LAD hian Corona Virus hri leng dona atan Sawrkarah tanpuina a remchan anga pek ve ni se tih chu tha tih niin pek zat tur leh tul dang chu District Board kutah dah a ni.
7. District LAD hmalakna in fa nei tam tura inzirtir thar leh ni se, bial tinin mahni bial-ah theuh thahnemngai taka bawhzui ni se tih a ni.
8. HIV darh zel tur laka kan him tlan nan District LAD hmalakna in nasa taka in zirtir ni se, guideline pawh hruaituten lo ruahmanin, a tul a nih chuan General thlenga hmalak ni se tih chu tha tih a ni.
Rorel zawh a nih hnuah Budget pe tlak hmasate hnenah hetiang hian lawmman sem a ni:
2019 Budget pe tlak hmasate:
Pakhatna: E.Lungdar bial; Pahnihna: Mualpui leh Champhai Bethel bial; Pathumna: Zemabawk bial
2020 Budget pe tlak hmasate:
Pakhatna: E.Lungdar bial, Zemabawk bial, Mualpui bial leh Khawlian bial; Pahnihna: Thuampui bial niin Pathumna: Sakawrdai bial te an ni.
Secretary report atanga a lan danin tun dinhmunah Aizawl East District-ah hian Bial 31 awm mekin LAD member hi sangnga chuang an awm mek a, LAD member zuk leh hmuam nghei mi sangkhat zathum chuang awmin Chhungkaw maicham nitin nei thei chhungkaw zariat chuang an awm mek a, a changa nei thei chhungkaw sangthum zasarih chuang awmin chhungkaw maicham nei ngailo zathum sawmriat chuang an awm bawk. LAD hi khaw 157-ah dingin Tualchhung 100 chuangin LAD inkhawm an nei thei a, nei thei lo tualchhung 50 chuang an awm bawk a ni.
Aizawl East District LAD te hian an phak ang tawkin hmalakna chak takin an kalpui a, Kum 2019 khan LAD Day thawhlawm atangin Kohhran 4 hnenah Biak in sak tanpuina pek an ni a, Cancer vei mi 29 te hnenah tanpuina pe bawkin Kum 2019 khan Home Missionary thla 4 chhung an rawih bakah General Missions Field-ah an luangchhuak bawk a ni.
———–
District Missions :
Aizawl East District Missions Department hnuaia rorelna sang, District Conference vawi 27-na, rorel inkhawm chu karleh October 23, Zirtawpni hian neih a ni dawn. District Missions Conference, rorel hi Bazar bial ten District Hqrs. Kohhranah an lo thleng dawn a ni.
Kuminah hian ruahmanna ang chuan October 23 atanga 25 chhung hian E.Lungdar Bial-ah District Missions Conference hi neih tura ruahman a ni a, hri leng mek avangin Revival inkhawma hun hman a theih tak loh avangin rorel inkhawm chauh neih tura ruahman niin rorel palai pawh bialtu pastor bakah bial hrang hrang mi 3 chiah ni se tiin Missions Executive Board chuan ruahmanna alo siam tawh a ni.
=———–
District LAD Board :
October 9, Zirtawpni khan District Committee Room-ah District LAD Board tluang taka neih a ni. He hun hi Sis.Zionparmawii, B/W, District LAD President chuan kaihruaiin Rev Biaksangzuala, District Superintendent chuan fuihna thu a sawi a, rorel turte Pathian hnenah hlanna hun a hmang nghal a ni. District LAD Board-ah hian thu pawimawh tak tak ngaihtuah niin, an thu passed langsar zualte:
1. District LAD Conference in LAD Day thawhlawm, District in a chan, Kohhran harsa zual Biak in sak tanpuinan hman ni se alo tih chu bawhzuiin Biak in sak tanpui turte chu Executive Board in ngaihtuah mai ni se tih a ni.
2. District LAD Conference in hir leng mek, Corona Virus dona atan Sawrkarah tanpuina pek ve ni se alo tih chu bawhzuiin Rs 50,000/- pek tha tih a ni a, Chief Ministers Relief fund-ah pek ni se tih a ni.
Heng bakah hian District LAD Board hian Kum 2021 Budget atan nuai sawmhnih singnga sangnga chu Kohhranpui pawmpui turin siamthat ngaite siamthat a nih hnuah a pawm bawk a ni.
District LAD Board-ah hian District Kohhranpui hruaitute tel kimin Bial atang pawhin rorel palai an kal tha hle a ni.
————
District Hruaitute Programme:
Rev Biaksangzuala, District Superintendent chuan Thawhlehni khan lehlangin Thingsulthliah bial, Mualmam Kohhran biakin bul ruahsur avanga leimin chu a hmunah kalin a enfiah. Rev Biaksangzuala hian Zirtawpni khan ASC Home-ah tanpuina hlanin a kal a, Inrinni khan Aizawl a rawn thleng leh a ni.
————–
Bial Missions :
October ni 10, Inrinni khan Mualpui Bial Missions Department chuan Salem Kohhran Biak inah Bial Missions puala rorel inkhawm an nei.
Rorel inkhawm hi Bial Missions Director Evan. H. Kristiana chuan a kaihruai a, Bial Secretary Upa R. Malsawmdawngliana leh Treasurer Sis. PC Lalrintluangi te hnen atanga report ngaihthlak a ni a. General Missions Director Rev. R. Lalhawia’n telpuiin General Missions Field report a pe bawk.
Conference hian General Missions Department hnuaiah Missionary 10 chawm nise an ti a, Kum 2021 chhungin hun remchang hmasa berah Work Camp neih nise tin an pass bawk. Kum 2021 hian October ni 3 ah Bial Missions Conference hi neih leh tura ruahmanin Mualpui Kohhran in an thleng ang.
Oct 13, Thawhlehni khan Mualpui Bial Missions Department OB te chuan General Missions Director Rev. R. Lalhawia hnenah Missionary 10 chawmna tura an pass hi an pe nghal a. General Missions Department hruaitu leh thawktute an lawm hle.
—————
Lawngtlai West District :
Octber ni 11, Pathianni khan Lawngtlai West District LAD leh PYD chuan Lawngtlai Chandmary Local Church ah Joint Conference neiin rorel inkhawm an buatsaih a, an Department pualin rorel inkhawm hran ve ve an nei zui bawk.
Joint Conference rorel tlangpui te:
1. Kum 2021 LAD leh PYD Join Conference hmun leh hun atan March chawlhkar khatna nise a hmun atan Lawngtlai North bial ruat a ni.
2. Conference thlengtu tanpuina atan PYD in Rs.20000/- leh LAD in Rs.20000/- a vaiin Rs.40000/- ruahman a ni.
3. Joint Revival Crusade neih nise thil tul dang te chu joint board kutah dah a ni.
PYD rorel thuchhuak langsar zual :
1. District PYD in Missionary rawih mek hi rawih chhunzawm nise.
2. District PYD huap a Leadership training buatsaih nise. Training hun tur leh resources person tur chu District Board kutah dah a ni.
3. Thupui neiin Sermon in ziah siak neih nise sermon thupui leh tul ang te chu District Board ah dah a ni.
5. District chhunga PYD member te talent hai chhuahna kawngah hmalak nise.
6.Kum 10 chhung chawl lova PYD hruaitu te chawimawina neih nise.
LAD rorel thuchhuak langsar zual :
1. Home Missionary rawih lai chu rawih chhunzawm leh nise a tul dang chu District board kutah dah a ni.
2. Covid 19 avanga harsatna tawk te hi tanpui nise, a tanpui dan tur chu District kohhranpui in hma an lakna ah thlawp tlatin an hma lakna anga kal nise.
3. Kum 2021 kumpuan atan Chhungkaw maicham neih uar kum ah puan nise General lamin maicham kalpui dan a siam zul zuia kal ni mai se Local tin hruaitu ten mahni local ah theuh hma lak nise.
4. Heng thupui hmang hian seminar buatsaih nise :
(a)Thianghlimna
(b)Chhungkaw Nu mawh phurhna
(c)Taimakna
Tul leh pawimawh chu District board kutah dah a ni.
5. District LAD hruaitute hian Bial tin tlawh chhuah ni se.
6. Tui thlang lamah LAD ten Crusade neih ngei nise.
6.Tu leh fa te puala chawnghei tawngtaina neih chu tha tih tlan a ni a November (2020)thla atanga neih tan nise.
7. kum 10 chhung chawl lova thawk te chawimawina neih ve nise pek tur bik atan
President,Secretary,Treasurer.
8.District hruaitute,Bial leh Local hruaitute tan chawnghei tawngtai neih thin nise thla tawp ber chawlhni tlai tin hian chawnghei tawngtai neih nise
—————-
Chhimtuipui District :
Oct ni 14, Nilaini khan Niawhtlang -III (10km) Local ah khan chhungkaw khat member 10 Kohhranah seng luh an ni. Member thar sengluh inkhawm tawi buatsaih Bialtu Pastor V. Lalhlimpuia’n a kaihruai a, seng luhna leh thuchah puanna District Missions Director Rev. Dr. C Sihmo an a hmang a ni.
Km 10 kohhran hi Siaha leh Niawhtlang inkar a awm ani.
Oct 11, Pathianni khan Niawhtlang Local ah pawh Chhungkaw khat member 3 chu Rev.W.L Thanghre District Secretary in Isua hmingin Kohhran ah a seng lut bawk.
———
Bial fang :
Tun kar chho khan Pastor MH Robin Lalthanmawia Tuipang bialtu chuan bial chhung fangin Oct ni 10-11 chhung khan Tuipang- L ah rawngbawlna a nei a. Nau hlan rawngbawlna neiin, naute 2 Isua hnenah a hlan. Oct ni 11, Pathianni khan Tuipang- L Local hruaitute infuih tharna hun ahmanpui nghal bawk.
———
October ni 7 atanga ni 10 chhunga Chhimtuipui District hruaitute bial fan report :
Oct 7, Nilaini khan KM 10 Local an tlawh a, Zan lamah VLTF te phalna in Biak In ah inkhawmna neiin District Superintendent Rev.Joseph L. Thlauhthang hnen atangin Pathian thuchah ngaih thlak a ni. Inkhawm banah inkawmhona hun hlimawm tak hman leh a ni a, dar 11 vel thleng hun hman niin Kohhran ten an hlawkpui hle a ni. A tukah District hruaitute pual a chawhlui an buatsaih chu Upa, rawngbawltu leh department hruaitute nen hlim taka kilho a ni. Oct ni 11, Pathianniah member thar, chhungkaw khat member 10 Isua hmingin Kohhran ah Rev.C.Sihmo District Missions Director chuan Kohhranah a seng lut.
Oct ni 8, Ningani khan KM 10 atangin Ainak an pan a, zan lamah Upa, rawngbawltu, LAD leh PYD te nen inkawmhona neiin A tuk Oct ni 9 ah Ainak Kohhran ten District hruaitu pualin Vawk talhin Kohhran te nen hlim takin chaw hlui an kil ho.
Oct ni 9, Zirtawpni ah Ainak atangin Siata pan a. Siata Bethlehem Kohhran ten Kel talhin chawlhui an kil pui a. Zan lamah Siata I Local Biak In ah Siata I Local leh Bethlehem Local te nen inkhawmna neih a ni. A tuk zingah Siata I Kohhran ten vawk talhin District hruaitute pualin chawhlui an buatsaih bawk.
Oct ni 10, Inrinniah Siata atangin Niawhtlang an pan a, Zanah Pastor Qtr ah inkawm khawmna neiin hun hlim taka hman a ni. Pathian Ni zing chaw ei khamah Biak Inah tawngtai inkhawm neiin Rev.W.L Thanghre District Secretary in Chhungkaw khat member 3 Isua hmingin Kohhran ah a seng lut. Chawhnu lamah Qtrs ah inkawm khawmna neiin Rev.Kholy Hlychho in fuihna thusawiin hun hlimawm tak hman a ni. Pathian Ni tlai lamah Niawhtlang Kohhran in District hruaitute pual a Kel talhin chawhlui an kil pui.
————-
Churachandpur District :
Baptisma chang :
Oct ni 11-12 chhung khan Senvon khuaah Buh thar lawmna prog. Pastor Ngamkholal chuan a hmanpui a, he programme ah hian mi 5 in Isua hmingin Baptisma an chang a, Nausen pakhat Isua hnenah hlan a ni bawk.
———
Seminar :
Oct ni 11, Pathian ni khan Dist. LAD chuan an conf.rorel bawhzuiin, Khengjang Kohhran Biak inah thupui pahnih thlang chhuakin Seminr an buatsaih a, LAD mawhphurhna -Kohhranah, Chhungkuaah leh Khawtlangah tih thupuia hmangin Sis. Lalsangliani resouces person atan an ruai a, Account maintenance tih thupuia hmangin Upa V.L. Mawia resources person atan an ruai bawk. tlaiah chawhlui an kilho an nghal .
——–
Member thar :
Oct ni 13, Thawhlehni khan Dist. Evangelist Soitingou leh Kimcha B.W.te rawngbawlna aṭangin Sangaikot khuaah member thar pakhatin Isua hmingin sual ngaihdamna baptisma a chang a, Kohhranah seng luh a ni.
——
Churachandpur Dist.hruaitute prog :
Oct ni 18, Pathianni hmang hian District Suptd Rev. Paosei leh District Secretary Rev. Lalzawm te chuan Veng nuam Local, Singngat tlawh in rawngbawlna an nei a, Pastor B.Lalzamluaia Dist. Treas. in Hebron Local ah rawngbawlna a nei bawk ang.
————-
North Mizoram District :
North Mizoram District Supdt. Rev. Laltluanga chuan Oct ni 8 Ningani zing khan West Phaileng Bialtu Pastor quarters sak tura ruahmanna kal mekah, District atanga tihtur tulte tiin, langin West Phaileng a tlawh, he mi ni vek hian dam takin Aizawl a lo thleng leh a ni.
District Puipa pathum Superintendent, Secetary leh Treasurer te chuan Oct. Ni 9 Zirtawpnia neih Dist. LAD Confe vawi 52-na rorel inkhawm an hmanpui a, Dist. Supt. In thutawi sawi pahin Confe hi a hawng a, Dist. Secretary Rev. Chhiarpuia’n Kum 2019 chhunga Dist. LAD member boralte sunna hun a hmang bawk.
———
District Missions :
North Mizoram District Missions Dept te chuan Oct. Ni 15 Ningani chawhma dar 11:00 khan Dist. Missions Confe vawi 40-na rorel Oct. Ni 23 zirtirpawhnia neih turah Agenda thlitfimna neiin Resolution Committee an nei.
Meeting hi Dist. Missions Director Rev. C. Lalthantluanga’n a kaihruai a, Committee member-ah hian District Missions Dept OB pathum bakah Dist. Superintendent an tel a, kumin Reso Committee-ah hian Kohhran danin a phalsak angin Dist Missions Director in a ruat Hqrs. Bial Missions Director leh Reiek Bial Missions Director te an tel bawk. (Dist. Missions Reso Comt.)
———
District LAD Conference :
North Mizoram District Ladies Auxilliary Department (LAD) te chuan Zirtawpni kalta Oct. ni 9 khan, Dist. LAD Confe Vawi-52-na, Conferenrece Report leh rorel inkhawm an hmang.
Conference rorel inkhawm hi, District Headquarters Biak in, Tuikhuahtlangah neiin; Dist. LAD President Sist. K. Lalhmachhuani Bible Women in a kaihruai a, North Mizoram Dist. Supdt. Rev. Laltluanga’n Confe hawngin Pathian hnenah tawngtaiin rorel turte a hlan. Rev. Laltluanga hian thu sawiin ‘Khawvelin hun khirh tak tawngin, Bible hrilhlawkna ang zelin khawvel timangang khawp hripui a leng a, chutichung pawha Mizoram mipuite Pathianin min hum chungchangah lawmthu sawiin, North Mizoram Dist. LAD te ngei pawh hrileng karah rorel inkhawm duhawm tak kan nei thei hi, Pathian hnathawh ropui a ni’ a ti.
Kum kalta 2019 chhungin LAD member duhawm tak tak members 49 chatuan ram pan awmin, heng mi uihawm tak takt e hi Dist. Secretary Rev. Chhiarpuia’n Sunna hun a hmang bawk.
Conference rorel pawimawh te:
1. Kum 2021-ah District Kohhranpui rualin Confe rorel neih a ni anga, Hqrs. Bialah neih a ni ang. Kum 2022 ah Bilkhawthlir Bialah Confe neiin; kum 2023 ah Kawnpui Bial ah Confe an nei thung ang.
2. Ruihhlo ngaite tan Camping Centre din nise tih chu passed a ni bawk.
North Mizoram District chhungah hian Bial 30 awmin khaw 162-ah LAD a ding a, Dist. Pumah LAD member 5224 an awm mek bawk. LAD member zingah rawngbawltu Bible Women 26 North Mizoram District bikah an awm bawk a ni.
North Mizoram Dist. LAD te hian rawngbawlna kawngah thiltih hrang hrang neiin hetiang hian an luang chhuak:-
1. A tulna hmuna Biak in sak tanpui
2. Tirhkoh ramtlan rawih
3. Orphanage home tanpuina Dist-a pek
4. Kohhran ram leina tura tanpuina sum Dist pek
5. General leh Home-a Missionary chawm te
6. ASC Home Sponsor
7. Gen. Office Building fund pek te
8. CBC Librarian Sponsor
9. Dimapur Missions Field-ah Biak in hmun leisak bakah Pastor Qtrs Tuizem leh Pipe line siamsak
10. Dimapur Field chhunga kohhhran pathum tanpuina pek
11. District hnuaia Bible zirna Pentecostal School of Ministry puihna bakah
12. Arunachal Field, Manigong Schoola hman tur Generator an leisak bawk
Kum 2019 chhungin District huam chhungah LAD member 75 in Holy Bible an chhiar chhuak a, Buhfaitham tham zingah Sist. F. Rohlupuii B/w Dinthar chu a tham hnem ber niin No 15150 a tham chhuak a, Dist chhunga Buhfaitham atanga sum hmuh hi Rs. 29,12,463 a tling a ni. North Mizoram District chhungah chhungkaw 5379 awmin, chhungkaw maicham nitin chhungkaw 475 in an nei thei a, hun karlaka maicham nei thei chhungkaw 2995 an awm bawk.
North Mizoram District LAD te hian kumin report hun chhungin sum Rs. 31,60,748 an thawk chhuak a, 29,74,333 rawngbawlnan an hmang chhuak bawk a ni. (NMD LAD Confe)
————
Bial Missions :
North Mizoram District, Tlangnuam Bial te chuan Oct. Ni 17 Inrinni khan Bial Missions Conference, Saikhamakawn-ah an hmang. Bial Missions Conference neih hun pangngai Oct. Ni 2-4 chu, Hripui leng kaihhnawih thilah Tlangnuam vengah Lockdown puan a ni a, hei vang hian Bial Conference Meeting hi an thulh ani. Tlangnuam Bial Missions Dept. Confe rorel hi District OB ten an hmanpui bawk.
———–
District Missions Conference :
North Mizoram District Missions Department te chuan kar leh zirtawpni lo awm tur Oct. Ni 23 hian District Conference rorel vawi 50-na, North Mizoram District Headquarters Bial, Headquarters Kohhran Biak inah an nei dawn.
District Missions Conference vawi 39-na in ruahmanna a neih danin Conference hi Kolasib Diakkawn Bialte’na an thlen tur niin; Covid 19 hrilengin harsatna min siam tak avangin Confe. Neihna hmun tur hi sawn a ni ta a ni. Conference-ah hian rorel inkhawm chauh neih tur a ni dawn a,chawhma Dar 10:00Am-ah tanin, chawhnu lam District Board neih zui nghal a ni ang. Rorel inkhawmah hian Sorkar lamin phalna an pek, mi 120 aia tam lo kal theih tur a ni.
———-
Joint Crusade :
North Mizoram District, Tlangsang Bial chhungah hrilengin khawvel a tihbuai mek chung pawhin Pathian rawngbawl hna chatlak awm lovin Tlangsang Bial Kohhranpui kaihhruaiin neih mek zel a ni. Lungthir leh Vitor Kalagang kohhran ten Joint Crusade an buatsaih chuan hlut a hlawh hle a. Crusade -ah hian Bialtu Pastor K. Anawna leh Volunteer Missionary ten a tul ang zelin rawngbawlna an nei a ni. Oct. Ni 12 thawhtanni khan damlo tawngtaina dawng 35 awmin, Pathian tihdamna chang nghal 24 awmin heng zingah Beng chhet leh Beng leh lam ngawng te an dam a ni. Pathian in a khawih nghal ngeia insawi dam zel beisei hi 11 an awm bawk a ni.
Oct. Ni 12 Thawhtanni kalta zan khan inkhawm buatsaih niin; tisa damna tura tawngtai sakna kohhranhote neih sak atangin mi 16 ten Pathian tihdamna an chang bawk. Inkhawm banah Pathian thlarau thianghlim dawng duh tan tawngtaina neihpui leh niin; member pasarih ten Pathian thlarau thianghlim an dawng leh bawk.
——–
Member thar :
Oct. Ni 11, Pathianni khan Bukvannei khuaah Pentecost kohhrana lawi turin member 4 awmna chhungkaw khat Kohhranah seng luh an ni.
He programme hi Buhvanneia rawngbawla awm mek Evan. R. Lalchhanchhuaha’n a nei a, Nau pakhat Lalpa Isua hnenah hlanin rawngbawlna a nei bawk. (Bukvannei mi thar)
——–
Seminar :
Pathianni kal ta Oct. Ni 11 khan Sialsuk bial Chamring kohhranah Seminar neih a ni. seminar-ah hian Biatu Pastor Rev.K.Vanlaldika chu Resource Person-ah hman a ni a, thupui hrang hrang heng:- 1 Chhiatni thatni. 2.Rawngbawl tute mawhphurhna tih leh 3. kohhran leh politic tih te hman a ni.
Seminar neih Ruahmanna kal zelah oct Ni 18-ah Sialsuk kohhranah neih leh ani ang a. Oct ni 25-ah Samlukhai kohhranah an neih leh bawk ang. Thlathar Novemberah Lungseiah neih leh an beisei bawk.
————
Hnatlang :
Sept ni 28 Thawhtanni khan Rengdil kohhran te chuan Biak In compound-ah Zun In leh Toilet siam hnatlang an nei a, member 40 an thawk chhuak. Rengdil Kohhran hote Biak Inahinkhawm an kalpui thei lo chungin, Hnatlang leh Zing tawngtai inkhawmah phur takin kohhranhote’n inpawlkhawmna an nei thin.
Hripui leng avanga Rengdil Bial chhung Kohhran te inkhawm theih a nih loh avangin; Bible thu hriatna kawng leh chhiar uar tura hmalakna chikhat atan covid -19 lock down bible Quiz Bial huapa buatsaih a ni a, he hmalakna hian Kohhranhote zingah nghawng tha tak neiin Bial mipuite’n an hlawkpui hle. Bible Quiz lawmman hi Oct. Ni 14 Nilaini ah Lawmman 1-3 sem a ni a, Pakhatna : Bro.Lallianmawia , Rengdil. Pahnihna : Sist.K.Lalenkawli , Rengdil leh Pathumna : Sist.Lalhmunmawii, Rengdil ten an la a ni, Lawmman hi Quiz Master Bialtu Pastor C.Lalthlenglianan a sem a ni.
———–
Thil pek :
Hunthar Bial Mission Dept. Te chuan Oct. Ni 12 thawhtanni khan, Phungchawng Mel 10 Preaching Poin kohhran te, Kohhranpuia hlankai an nih lawmpuina thilpek atan Tea Urn an lei saka, mel 10 kohhranhote an lawm hle.
Phunchawng mel 10-ah hian member 18 awm mekin; Lockdown chhunga Biak ina inkhawm theih loh chhung pawhin Social Distancing kalpui chungin Beirual zirlai an zirchhuak vek thei a, tunah hian in lamah inkhawmkual mekin Nilai Thupui pawh pangngai takin an zir thei bawk.
———–
Biak in luah lut :
Hunthar Bial Rangvamual kohhrante chuan Oct. Ni 10 Inrinni khan Bro. Jakob Ngursangkhuma Building, Biak in atan an luah thar.
Rangvamual kohhrante hi hun rei tak chhung, man chawia mimal in luah an ni a, tuna an Building luah hi Building neitu Bro. Jakob Ngursangkhuma hian man chawi lovin a luahtir dawn a ni.
Oct. Ni 10 inrinni khan Rangvamual Kohhranhote’n an Biak in thar luahluh inkhawm neiin; Bialtu Pastor Rev. C. Lalhmunliana’n inkhawm a kaihruai a, Biak in hlanna tawngtairual neiin; Hunthar Bial hruaitu atangin Evan. K. Tlangthanmawia leh Rangvamual Local Treasurer Upa Vanlalruata ten thu an sawi bakah thusawi ngaihnawm tak tak rawngbawltu dangte atangin ngaihthlak a ni bawk.
Rangvamual kohhrante hi lawmpuina sum engemaw zat Hunthar Kohhran, Phunchawng Kohhran leh Upa Lalchhuanawma te chhungin an pe a ni.
————-
Lunglei District :
October ni 14 nilaini khan Lunglei District UPC Office-a thawktute leh Press Staff-te chuan Office tihfai hnatlang an nei.
He hunah hian thawktute chuan hna thawh tur chanpual theuh in siamin Office chhung leh pawn bakah inthiarna hmun hrang hrangte tihfai hna an thawk a, Office chhung chei that ngai laite an chei tha bawk.
Lunglei District UPC Office hi District Superintendent, Secretary, Treasurer bakah Missions Director ten an thutchilh a, an ni bakah hian tun dinhmunah Office Staff hi mi 11 awmin Press lamah hian thawktu mi 6 an awm bawk. (Pic.Office tihfai hnatlang)
———–
District Missions :
October ni 13 thawhlehni khan Lunglei District Missions Emergency Board chu District Conference Hall-ah Director Rev.R.Vanlalenga kaihhruainain neih a ni a, he Board hian December ni 4-6 chhunga District Missions Conference Venglai biak ina neih tura ruahman chu tunlai boruak avangin December ni 6 Pathianniah Venglai biak inah rorelna chauh neih mai nise tha an ti.
Tin, rorelna ah pawh hian Bialtu Pastor, District Missions Board Member leh Bial Missions Board Member te chiah kal nise tha an ti bawk.
———
Member thar :
October ni 11 Pathianni khan Bunghmun Local-ah mi thar 6 bialtu Pastor Lalengzauva chuan a seng lut. Heng mi thar te hi bialtu Pastor hian tawngtaina neih sakin kohhranah hian a seng lut a ni.
——–
Mike Service :
Hnahthial bial PYD Conference rorelnain Town Area PYD ten Local tinah Mike Service neih nise tia a lo rel chu bawhzuiin Town Area PYD te chuan Mike Service an nei mek, October ni 11 Pathianni zan khan Hnahthial Electric Local PYD te chuan Hnahthial Chanmari Local-ah Mike Service hi an nei a, October ni 4 Pathianni khan Hnahthial Chanmari Local-te hian Hnahthial Venglai Local-ah hun an hmang tawh bawk. October ni 18 Pathianni pawh hian Hnahthial Venglai Local-te hian Hnahthial Electric Local-ah Mike Service nei hian hun an hmang ve leh ang.
Facebook