Pennet News Service : Nov 8 – 15

Pu Editor Zahawm tak,

 
UPC kohhran thutharte hi khawngaiha minlo tih chhuahsak leh turin ka ngen a che.
 
———————————————-
UPCNEINEWSSERVICE Nov 8-15.2020:
————-
Member thar :
Nov 8, Pathianni khan Odisha missions field Kandhamal dist, Muselipanga Local church ah Lal Isua hmingin sual ngaihdamna Baptisma mi 10 in an chang a, heng zing a pa riat(8) te hi HINDU sakhaw vuan tu an ni a. Kan Missionary te rawngbawlna kal tlanga Chhandamna Thuthlung hmu in, Pentecost Kohhran an sengluh an ni.
———–
Thlamuantu Chanchinbu lawmman buatsaih result :
General PYD Chanchinbu “THLAMUANTU” chuan kum danga a tih angin Kum 2019 chhunga Bial/Local Chanchinbu tha bakah Article (Mizo & English) tha a thlang chhuak leh ta a, chunga lawmman dawngtute chu a hnuai ami te hi an ni :

Chanchinbu tha :
1-na OLIVE Bazar Bial PYD-AED
2-na PYD AW Hunthar PYD-NMD
3-na BEERSEBA Zemabawk Vengpui PYD-AED

Top 5-a langte:
4-na THALAI ENG Maubawk PYD-NMD
5-na PYD CHIBAI Tlangnuam bial PYD- NMD

Article of the year (Mizo)
Thalaite Kohhran tan- Lalhmangaihzuala, Bilkhawthlir Kanaan, NMD

Top 5-a langte:
2-na Lal Davida leh PYD te- Richarda pa, Chhiahtlang
3-na Chhung Inkhawm – Nany Vanlalhriata, Sakawrdai Vengpui
4-na Intodelh – Vanlalhlimpuia, Champhai Venglai
5-na Intodelh – Saihmingliani Sailo, Durtlang North
5-na Intodelh – Laldingliana, Saipum

Article of the Year (English)
Status of Women in the Creation Narratives – Evan Samuel Laldinsanga, Bethlehem

Top 3-a langte:
2-na Humility – Evan VL Zarzoliana, SDBS, Kolasib
3-na Existentialism with Pentecostalism – Johny Lalthafamkima, AED Hqrs Kohhran

Agent titha ber (copy sem tam ber)
Andrew Lalruatsanga
Dinthar Local, NMD – Copy 89

Lawmman hi Chanchinbu tha-ah hian pakhatna atanga pathumna thleng leh Article/Sermon (Mizo&English)-ah hian pakhatna bakah Agent ti tha ber te pek tur a ni

Kuminah Gen.PYD conf.neih theih a nih loh avangin lawmman hi Editor hnenah Office hun chhungin Aizawl East District Office, Ramhlun South-ah lam theih a ni ang
———–
District hrang hrang rawngbawlna chanchin :

North Mizoram District :
District Missions rorel inkhawm vawi 40na :
UPC-NEI, North Mizoram District, Missions Department chuan kar hnih kalta Oct Ni 23 zirtawpni khan Confererence rorel inkhawm an nei.
Rorel inkhawm hi District Hqrs. Biak in, Tuikhuahtlangah neiin, Dist. Missions Dept Director Rev. C. Lalthantluanga’n  inkhawm a kaihruai a, District Puipa pathum Dist. Supdt. Rev. Laltluanga, Dist. Secy Rev. Chhiarpuia leh Dist. Treasure Rev. K. Lalduhsanga ten an ho thei a, NEI-UPC Gen. Missions Director Rev. R. Lalhawia leh Treasurer Pastor PC Lalrokima ten an ho thei bawk.
Rorel tan hmain North Mizoram Dist Supdt. Rev. Laltluanga’n mipuite chibai bukin hripui leng karah N.Mizoram district Missions Dept. ten Confe. Rorel kan nei thei hi Lal Lalpa hnathawh ropui a ni tiin; tawngtaina a nei a, Rev. R. Lalhawia, Gen. Missions Director in thusawi bawkin, North East India huapa rawngbawlna hrang hrang report pein Lalpan ramthim su  eng turin a mite min hmang mek a ni tiin, tha thlah lovin rawngbawl turin ke kan pen zel tur a ni a ti bawk.
Confe. Rorel inkhawm chawhma dar 10:00 AM-ah tannin, rorel pawimawh zualte:-

Confe. Neih lehna hmun tur kum 2023 thleng ruahmanna siamin:- Kum 2021-ah Rengdil Bialah neih a ni anga, Kum 2022-ah Maubawk Bial leh Kum 2023-ah Sumsuih Bialah te neih a ni ang.
North Mizoram District Missions Dept te hian Home Missions Field-ah revival Programme buatsaih ni se. tih te an rel a ni.

UPC-NEI, North Mizoram District-ah hian Missions Field 12 leh rawngbawlna mek khaw thum neih a ni.
North Mizoram District-a Missionary te leh an thawhna hmun te tar lang ila
Sist. Khawlliani B/w: Kolalian Missions Field
Evan. Hrangchhankhuma : Rajtali
Evan. RS lalnunmawia : Vawngawnzo
Evan. Lalrampana : Damdiai
Evan. Isak lalrohlua : Persang
Evan. H. Lalnunzira : Dilzawl
Evan. Vanlalawia : Marpara
Evan. Lalrawngbawla Casual worker: South Chhimluang
Sist. Esther Lalrawngbawli B/W : Bajerung
Sist. F. Lalsiamliani : Zomuantlang
Sist. Lalbiakzuali : West Phulpui
Sist. Lalhriatkimi : Tumpanglui
Kum 2019 – 2020 chhungin Missionary te leh Casual worker te hian mi thar 143 neiin, Baptisma chang 128 an awm bawk.
Coference-ah hian rorel mi 80 bawr kalin, Hqrs. Local Missions Dept. ten  hnen takin Rorel inkhawm an thleng a ni.

Chawhnu lamah Dist. Missions Dept Board neih nghal a ni a, rorel tlangpui:
Kum 2021 District Missions Budget Estimate atan Rs. 1,15,00,000.00

Missionary Post 2 ruak chu hnawhkhah tha tih a ni a, Advertisement chhuah a, December thla Board-ah lak tura tih a ni.
Missionary chawmna ip hi kum 2021 atan siam ni se. tih passed a ni
Missionary Transfer & Posting hun a nih angin December thlaah Missionary thar 2 lak rualin Transfer and Posting tih tha tih a ni.

PSM Correspondent in kal dawn: NMD enkawlna hnuaia Pathian thu zirna kalpui mek Pentecostal School of Ministry chu hripui leng avanga ruahmanna anga kal theih a nih tak loh avangin, Nov. ni 16 atang hian Correspondence-a zirna nei turin ruahmanna siam a ni. PSM Committee hruaitute’n ruahmanna an siamah Class hi a theih ang angin Internet Online hmanga neih tur a ni anga, Zirlai naupang zirlaibu te pawh an awmna hmunah thawn mek zel a nib awk. Zirlaite zir zawh a nih hunah December ni 7-ah exam tannin December ni 14-ah graduation day hman a ni ang.

Bilkhawthlir Bial te Workcamp in fehchhuak: North Mizoram District Bilkhawthlir Bial Missions te chuan ruahmanna an lo neih tawh angin; Nov ni 10 thawhlehni atang khan North Mizoram District Missions Field Tumpanglui Missionary quarters sa in Work camp an nei.
Workcamp ah hian member  12 fehchhuakin; Bilkhawthlir Bialtu Pastor Lalpiangthanga’n a ho va, Workcamp member te hian Tumpanglui an thlen ni Nov. ni 10 chawhnu atang khan quarters sak hna hi an tan nghal a, zan thlengin rim takin hna an thawk nghal a ni.
Nov. ni 11 Nilaini atangin zingkar atanga hna tannin chanchin buatsaih lai hian Qtrs. Sak hna hi a rel pum zo tawhin tunkar hian an zawh theih mai a beisei awm.

North Mizoram District PYD te Exe Meeting nei: North Mizoram District PYD te chuan Nov ni 10 thawhlehni khan District PYD Conference December thlaa neih tur chungchangah Exe. Meeting an nei. Meeting hi Dist. PYD President Evan. J. Vanlalruata’n kaihruaiin, NMD Dist.  Office, Supdt. Chamber-ah meeting hi an nei a ni. Exe Meeting rorel tlangpui te:-
Dist. PYD  Conf chu rorel leh Report chauh neih tur a ni ang a, Confe rorel neih hun atan December ni  10 thawhlehni dar 10:00 nise tih a ni a, A hmun atan Hqrs Biak in ni se tih a ni bawk. He Ruahmanna hi hrileng boruak thlir chungin a tul chuan tihdanglam theih tura duan a ni.
Confe ah hian Hruaitu Hlun Chawimawina Certificate hlan leh Member boral sunna neih ni anga, Bial target tlak hmasa lawmman 1na aṭanga 3na sem a nib awk ang.
Conf Palai tur chungchang ngaihtuahin Hripui leng vangin kumin bikah Conf rorel thei palai Gen PYD in a lo duan tawh chu sawr zimin Bial tin aiawh mi 2 intirh ni se an tib awk.
Confe rorel zawhah Dist. Board  neih chhunzawm ve nghal a ni ang.

Exe Meeting hian Confe. Chungchang bakah Dist. Pyd hmalaknaa tirhkoh rawih mekna Kawrthah khuaa Biak in sak mek chu kumin 2020 chhung ngei hian hawn hman ni se an tih bakah Kohhran office Staff te zingah Dist. PYD in-charge atan Bro. Andy Lalramnghaka hman chu kohhranpui remtihna dil ni se.

Kum 2021 Dist. PYD Budget Estimate ruahmanin Rs.14,65,000 chu pawm a ni a. Dist Board ah pharh leh tur a ni ang.

NMD Hqrs Bial, Hqrs Local Missions Dept te Ramthim tan an luang chhuak: Thla kal ta Oct ni 26 (Thawhtanni) khan North Mizoram District, Hqrs Bial, Hqrs Local Missions Dept te chuan Assam Missions Field-a Pechadapri Kohhran hote inkhawmna tur Biak in sak nan Rs 100000 NMD Missions Dept Treasurer Evan MS Dawngliana kutah an local Missions Secy Sist PC Lalhmingchhuangi’n a hlan. Hqrs Local MSD te hian kumin kumtir khan Rs 100000 lo pe tawh bawkin. Dist Missions ah hian Rs 200000 an thehlut tawh a, remchang hmasa berah Rs 50000 pek leh an tum. Pechadapri Biak in hi Rs 250000 a sak zawk theih beisei a ni. Hqrs Local MSD te hi Evan MS Dawngliana NMD Missions Treasurer chuan Gen leh Dist aiawhin lawmthu a lo sawi a ni.

Thilpek pe: North Mizoram District Tlangsang Bial chhunga Volunteer Missionary Sist. Vanlalpeki rawngbawlna hmun Sailut kohhran ten an mamawh e m em khuang chu Maubawk, Aizawl Kohhrawna lawi T. Upa Lalvenhima te chhungkua phal takin an pe a, an chungah Sailut kohhrante leh Tlangsang Bial hruaitute an lawm hle. (Khuang)

Kawnpui Bialah Mithar nei: Oct ni 25.10.2020 Pathianni khan Kawnpui Bial chhunga Preaching point  Kanan Vengah  mi thar 1 leh Home Mission Field Rasdali aṭangin mi thar pakhat BBC kohhran aṭangin UPC(NEI) kohhranah lawmluh an ni.
Kanan Venga member thar neih hi tirhkoh rawih lai Evan. Lalramhluna Hmar chuan a lawmlut a; Rasdali-ah hian Missionary rawih lai Evan. Hrangchhankhuma chuan a lawmlut bawk.

N. Thinglianah mi thar nei: N. Thinglianah Oct. ni  25 Pathianni khan BBC ațangin UPC of North East India-ah mi thar pakhat lawmluh a ni a. Lawmluhna neih rual hian lawmluttu Tirhkohvin țawngțaisakna a nei nghal bawk a ni.

RENGDIL BIAL NEWS: Nov ni 10 Thawhlehni khan North Mizoram District Missions Department  hmalaknaa Tumpanglui Home missions field Missionary Quarter   sak turah, Bialtu Pastor C.Lalthlengliana chuan Missionary Quarter Lungphum  Lalpa Isua hming in a phum , Bialtu Pastor hi Bro.Lalramnghaka , Bial missions department secretary in a tawiawm bawk a ni.

Nov ni  10 Thawhlehniah vek Tumpanglui Home missions field Missionary Quarter  tur hi  Bilkhawthlir bial missions department in work camp in an sa tan nghal  a ni.
Tumpanglui kohhran hian kum 2019  ah khan Sist.J.Lalmuankimi : Rengdil leh a thian ten  rawngbawlna nei in, U.P.C.( N.E.I) din a lo ni ta a ni,   N.mizoram District missions department in  Home missions field ah puang zuiin, tunah hian member -120 vel an awm mek a ni.
Sist.Lalhriatkimi ( Sist Kimkimi) chu Tumpanglui Home missions field ah hian Casual Worker in Missionary hna thawkin a awm mek a a ni.

Tlangsang Bial BEHLIANGCHHIP Kohhran ten SAILUT KOHHRAN TLAWH: Nov. ni 7 Inrinni khan Tlangsang Bial Behliangchhip kohhran te chuan an Bial chhunga Kohhran din thar Sailut kohhran chu Bro Lalthapuia, volunteer missionary hovin member 5 te nen tlawhin hun hlimawm tak an hmang.
Sailut kohhran hi Sis Vanlalpeki rawngbawlna khua niin; kohhran pahnih te hian hun hlimawm tak an hmang a ni.
Behliangchhip kohhrante’n Sailut kohhran an tlawh inkhawm boruakah Naupang damlo khawsik mu reng pakhat chuan damna a chang a, Thlarau dawng thar pakhat awm bawkin; siamtharna chang 6 lai an awm bawk.
————-
Aizawl East District :
District Office hawn a ni:
Mizoram Sawrkarin Covid-19 hri leng mek laka mipuite kan him theih nan leh Covid-19 mipuia darh tih ziaawm a nih theih nana October 27 atanga November 9 zing dar 4:30  thleng Aizawl khawpui chhungah Lock Down a puan avanga Aizawl East District Office khar pawh November 9, Thawhtanni atang khan dan pangngaia mipuite dawr theih tura hawn tan leh a ni.

Lock Down avanga Office khar a nih chhunga Office dawr duh, harsatna tawk an awm a nih chuan District hruaitute hriatthiamna an ngen a ni.

Hri leng laka Kohhran mipuite kan him theih nan inveng fimkhur a, Sawrkar in Dan a siam te zawm hram hram turin District hruaitute chuan min ngen a ni.

Tawngtai rual:
October 30, Zirtawp zan Dar 6:30 khan Aizawl East District OB meeting-in tunlai hri leng mek leh ramri-a harsatna kan tawh mek denchhenin Kohhran chhungkaw tinte hnenah tawngtai tura a ngen angin District chhungah tawngtai rual hun hman a ni.

Aizawl East District OB meeting chuan kan ram boruak tawn mek thlirin  “Chhungkaw tinte Tawngtai rual” hman thain a hria a. Kohhran hote Covid-19 hripui avanga harsatna kan tawh mek leh ramri-a buaina kan tawh mekte hre rengin, thahnemngai taka tawngtai theuh tura a beisei angin October 30, Zirtawp zan dar 6:30 khan tawngtai rual hun a hnuaia thupui tarlan hmang hian neih a ni.

Tawngtai thupui te:
1. Kohhran chhungkua-a Covid-19 hri vei mek ten Pathian tihdamna an chan thuai theih nan.
2. Covid-19 in a tihbuai mek, chhungkua (Home Quarantine lai) ten Pathian thlamuanna an chan theih nan.
3. Covid-19 damlo enkawl tute tan leh Mizoram Sawrkara thuneitute tan.
4. Covid-19 in Mizoram min kian san thuai theih nan leh Lalpa Biakbuk thianghlima ami ten Lalpa Pathian kan faka kan chawimawi leh thuai theih nan.
5. Ramri-a Duty kan Police te tan.
6. Ramri buai avanga Mizoram chhungah harsatna lutuk kan tawh loh nan.
7. Ramri buai Sawrkarin a chinfel thuai theih nan

Thianghlimna Committee:
November 10, Thawhlehni khan District Superintendent room-ah District Thianghlimna Committee, Rev C.Lalengliana, Chairman kaihhruaiin neih a ni. He hunah hian thu pawimawh tak tak ngaihtuah niin an rorel langsar zualte:
1. December 7 atanga 13.2020 chhunga Aizawl East District huam chhungah No Tobacco Week hman dan tur ngaihtuahin, a hlawk thei ang bera hman a nih theih nan tualchhung kohhran ten an remchan dan angin hma lo la se tih a ni.

2. No Tobacco Week pualin thuchah siam nise, District Thianghlimna Committee Chairman hmingin Social media lamah tihchhuah ni se tih a ni.

3. Khawpui chhung Pastor bial 7 a Thianghlimna Commiittee Chairman te No Tobacco Week pualin interview tawi neihpuiin Youtube lama tihchhuah ni se tih a ni.

5. Kum 2021 hi Kohhran hruaitu ruatthar kum a nih dawn avangin Distric rorelna in alo passed tawh, Upa Deacon leh  Tual Upa ruatthar tur te chu zuk leh hmuam nghei ngei an ni tur a ni tih chu a hlawhtlin theih nan Thianghlimna Committee aiawh a hemi chungchang campaign min neihsak a, a tul ang a hma lakpui turin Bialtu Pastor te ngen ni se.

6. Thianghlimna beihpui kalpui mekah chak zawka hma lakpui turin District hnuaia Dept- PYD, LAD leh Missions Dept te ngen ni se tih a ni bawk.

Revival Committee:
November 12, Ningani khan District Committee room-ah March 2021 thlenga District Revival Speaker turte lakna Interview kaltlanga neih a ni. He hunah hian District Revival Committee bakah District hruaitute telin diltu engemaw zat awm zingah heng mite hi Revival Speaker atan lak an ni.
1. Evan HMS Dawngkima, Thingsulthliah- Ebenezar Revival Team
2. Evan H.Lalhlimpuia, Bethlehem Vengthlang- Crusader for Christ Team
3. Evan K.Vanlaldika, Zemabawk Vengpui- Krista aia palai Revival Team
4. Evan Lalbiakmuana, Zemabawk North- Philadelphia Revival Team
5. Evan Zonunsanga, Kawlkulh Vengthar- Pentecostal Revival Team
6. Evan Lalsiamkima, ITI- Eldorado Revival Team.

Heng Revival Speaker leh Team te hi inkhawm theih hma pawhin a duh apiang ten rawngbawlna nei turin District Revival Committee hruaitute hnenah ziakin emaw whatsapp kaltlangin a sawm theih reng a ni.

Mithar leh baptisma chang thar:
November 6, Zirtawp zan khan Bazar Bial, Armed Veng Kohhrana lawi turin chhungkaw khat member 3 te chu Kohhranah sengluh an ni.

Kawlkulh Venglai Kohhranah October 28, Nilai zan khan mi pakhat in sual ngaihdamna baptisma changin November 8, Pathianni khan Ramthar Kohhrana lawi mi 5 te chuan Bialtu Pastor, Rev HL Thakunga kutah sual ngaihdamna baptisma an chang bawk a, Sakawrdai Vengpui Kohhranah pawh mi 3 te chuan Evan Lalhunthara kutah sual ngaihdamna baptisma an chang bawk.

—————
Chhimtuipui District :
Nov 10, Thawhlehni khan Chhimtuipui District Building Board chuan meeting pawimawh tak an nei. An rorel langsar zual te :

1. Golden Jubilee Hall sak chhoh mek chu, kumin chhung ngei hian luah theih tura peih hman nise.

2. Jubilee Hall sak chhoh zel dan tur leh a luah dan tur te pawh sawihona neih a ni.

District Building Board member te :

Chairman : Rev.Joseph L.Thlauhthang
Secretary : Rev.W.L Thanghre

M/ Present : 1.Rev.Kholy Hlychho
2.Rev.Dr.C.Sihmo
3.Rev.C.Satinkapa
4.Pastor C.Lalchhuanthanga
5.Evan.V.John
6.Upa Lalkunga

Hnatlang :
Dt.6-7.11.2020 (Friday & Saturday) ni khan Niawhtlang Kohhran chuan Building pual inhlawhna neiin Rs.50,000 an thawk chhuak.Tin,tunlai hian Biakin phutin chei ṭha in, rawng an hnawih mek ani.

Kohhran hmun hma thar :
Tipa D-ll Village Council te rem tihpuina in Tuipang Bial Pastor Quarters hmun tur In hmun ṭha tak chu Kohhran ten an nei thar.  He Quarters hmun hi Biak in atanga hnaih te, hmunhma tha tak kawng an a awm a ni. Hetianga Quarters hmunhma tha tak a thlawna Kohhranho ten an nei ta hi an lawm em em a, hma lak saktu Upa B. Thansiama VCP chungah Tuipang Bial chuan lawmthu an sawi tak zet a ni.

Tawngtai rual dawn :
Chhimtuipui District pumah Nov ni 15, Pathianni zan dar 6:30 hian thupui hrang hrang hmangin tawngtai rualna neih ani ang. Hei hi General lam thuchhuak bawhzuina a ni.
—————-
Lunglei District :
November ni 12, Ningani khan Luangmual Bial PYD te chuan Lunglei Civil Hospital tan thisen unit 25 an pe.

Lunglei District PYD Conference in Blood Donation neih nise tia  a lo rel bawhzui nan Luangmual bial PYD te hian thinsen hi an pe a, Luangmual Local UPC Sunday School Hall-a hunserh tawi an hman naah Bial PYD  Vice President  Rbt.Lalhmangaihzuala chuan hun a kaihruai a, bialtu Pastor Rev.Lalbiakdika Chawhte chuan hunserh hmangin Dr.Lalnunsiama Renthlei, Consultant Tobacco Control, Civil Hospital Lunglei leh Dr.Lucy Ramhmingliani Renthlei, blood bank Office, Civil Hospital Lunglei chuan  thusawina an nei bawk.

Thisen unit 25 petu te hi mipa 21 leh hmeichhia 4 an ni a, thisen petute hi Lunglei Civil Hospital Blood Bank-a thawktu ten an kal chilh a ni.