Global Mission Statistics Report :
Global Missions hnuaia kumin 2018 January atanga November thla inkar chhunga khawvel pum huapa member statistics report chu hetiang hi a ni :
Africa khawmualpuiah : member 963,239
Asia khawmualpuiah : 441,097
Central Americal/Carribean : 528,875
Europe/Middle East : 41,008
Pacific : 1,386,813
Tun dinhmunah UPCI, Global Missions hnuaia member tam lam top 10-ah North East India UPC hi a lang pha a, hetiang hi member tam dan indawt a ni :
1. Philipines – 1,252,030
2. Venezuela – 442,800
3. Uganda – 279,109
4. Madagascar – 212,846
5. Brazil – 202,490
6. El Salvador – 196,492
7. Pakistan – 127,853
8. Liberia – 120,444
9. North East India – 104,889
10. Kenya – 97,198
———-
November ni 21, Nilaini khan General Hqrs Office Committee Room, Mualpui Salem veng Aizawlah General PYD Board neih a ni a, Board hi General PYD President Pastor H. Lalropuia’n a kaihruai.
An rorel tlangpui te :
1. Kum 2019 General PYD Budget atan cheng 13,47,900 ruahman a ni.
2. Kum 2019 General PYD Golden Jubilee-hlim taka hman nise, Jubilee pualin Souvenir buatsaih a, hruaitu hluite chawimawina pek nise.
3. Kum 2019 hian Golden Jubilee Live Crusade Lunglei-ah buatsaih nise.
4. Kohhran in kawngka lu chungah ‘Pentecostal Home’ tih emaw ‘Isua chauh hi Pathian a ni’ tih tar tura hmalak tha tih a ni a, General PYD OB te bawhzui tura dah a ni.
5. PYD Flag size chungchang ngaihtuah niin; Tualchhung, Bial, District leh General pawh a size inang tlang hman tur niin a ngul san zawng erawh PYD dan buin a sawi anga hman tura tih a ni.
6. General PYD Conference rorelin General PYD Conference hun sawn nise a tih angin thu leh awm hma chu General PYD Conference hi November Pathianni vawi 3-naah sawn a ni.
7. Kum 2019 Joshua Generation Youth Camp May ni 16 atanga ni 19 chhunga Chennaia neih turah India hmarchhak Kohhran zaipawl atangin Pentecostal Choir, Aizawl East District chu kal tura ruahman an ni.
———
Ni hnih awh General Missions Board chu Nov 14 leh 15 chhung khan General Hqrs Office, Mualpui salem veng Aizawl ah neih a ni a. Board meeting hi Rev. R. Lalhawia, General Missions Director chuan a kaihruai.
General Missions Board-ah hian kum 2019 General Missions Budget tura ruahmanna thlirin; Budget atan hian cheng 2,44,36,250- an ruahman a, Field budget tur pawh an duang nghal bawk. Biak insak, repair, quarters sak, ram fencing leh Field mamawh hrang hrang lei tura dilna lutte chu zir chianga Appove in; kum 2019 Budget ah an khung nghal a, General Missions Executive Board in kum 2018, Sept ni 1 a Bihar field-a thawktu a lak thar mi 7 te a approve nghal bawk. thawktu lakthar te :
1. Bro. Birendra Kumar- Baktadhanarah, Bihar
2. Bro. Bhagwan Pandit- Bidupur Bihar
3. Bro. Ramsevak Ravidas-Bagitpur Bihar
4. Bro. Paras Manjhi-Chhuki Nabaha Bihar
5. Bro. Jitendra Kumar Manjhi- Bahera Dih Gaya Bihar
6. Bro. Ranjit Ravi Das-Nabaha, Bihar
7. Sis. Premlalta Devi- Jadhua, Bihar
Heng bakah hian Full time worker-ah Vanlalrokhawma leh MS Dawngliana te an la thar a. Pastor Chawngtinliana Deputation chungchang ngaihtuahin kum 1 dang Aizawl East District dil leh nise an ti bawk. Missionary lakbelh tha tih a ni a, General Missions Executive Board kutah dahin, Bihar Field thar hawn tha tih a ni a, Kum 2019 General conference Agenda atana chhawp chhuah a ni ang.
——-
Manigong Bial Silver Jubilee :
Nov ni 14 atanga ni 18 chhung khan Arunachal Missions Field, Manigong Bial Silver Jubilee hman a ni.
He hun hmanpui tur hian Non-Arunachal zinga Manigong a Chanchin Tha hrila lut hmasa ber Rev. Jh Zahluna, tuna Compassion Center Project Director ni mek te nupa leh ASC Home Superintendent Evan C. Vanlalruate te Mizoram atangin an kal a, Field pawn atangin helai hmuna lo awn tawh Pastor C.Thandawla, Guwahati leh Pastor FK.Lalchawiliana, Bengal a awm mekte bakah Aalo atangin Kohhran mi thahnem tak an kalkhawm a. Field chhung a missionary – Sis. Kenter Doje, Bro.Tasingh Jenpen, Bro.Larmo Kamduk, Bro.Durga Chhetri leh Field Treasurer Pastor Lalhualhima te ruahmannain hlim takin hun an hmang.
Manigong Kohhran din nan hian Nov.14, 1993 ah mi 41 in Isua hmingin baptisma an chang a. Pioneer missionary chu Sis. Kenter Doje a ni a. Tun dinhmunah Manigong bialah hian member 1150 zet an awm tawh a ni.
Silver Jubilee puala Revival programme an buatsaihah Rev. Jh Zahluna chu Speaker-ah hmangin; revival programme hman chhungin mi 15 chuangin thlarau an dawng thar a ni. Pastor Tabin Pujena hriatrengnana Gate ropui tak an siam chu Rev. Jh Zahluna hian hawngin ; Jubilee lungphun Sis. Kenter Doje- in a hawng bawk.
Silver Jubilee lawm nan hian Sial 8, Vawk 8, Kel 8 leh Ar 50 zet talh a. Hnam lam leh zai rooui tak tak entirin hlim takin Jubilee lawmna hun hi an hmang ani.
——-
General Hruaitute Programme :
General Superintendent Rev. Lalmalsawma sailo leh Gen. Treasurer Rev. Zohmingthanzama te chuan hmun dangah chhuak lovin an lawina Tuikhuahtlang kohhranah hun an hmang dawn.
Gen. Secretary Rev. R. Lalrinsanga chuan Nov ni 23, Zirtawpnia khan Lunglei District Hqrs Bialin Rawngbawltu Ni an hman naah telpuiin an Seminar buatsaihah Resources Person ah a tang a, Inrinni zan atanga Pathianni zan thleng hian Lunglei District, Hqrs Bial chhunga Tualchhung Kohhran hrang hrangah rawngbawlna a nei kual ang.
Gen. Mission Director chuan Chhimtuipui District Mission Khawmpui Vawi 42-na, Nov ni 23 atanga ni 25 chhunga Dist. Hqrs kohhrana hman mekah Speaker niin rawngbawlna a nei mek.
General Sunday School Director Rev. R. Laichhingpuia chuan tun Pathianni hian Aizawl, Republic veng thlang Kohhranah rawngbawlna a nei ang.
——-
Inthlan thuchah :
United Pentecostal Church of North East India Kohhran chuan kan hma lawk, November 28, 2018-a Mizoram MLA inthlanna lo awm turah Kohhran mipuite leh Political Party-te hnena ngenna leh thuchah a siam a. He thuchah leh ngenna hi mipui leh Political Party-ten ngai pawimawha zawmsak turin Pathian hmingin min ngen a ni.
Kohhran mipuite hnena thuchah :
1. Inthlan boruak hian rawngbawlna kawngah kohhran leh ringtu mimal nun a tichak lo thei a; chak loh phah nana hmang lo turin politics lama inhmangte pawh fimkhur ni se. Inkhawm leh kohhran thiltih dangahte inthlahdah lova tawngtaia Pathian pawlna tam tawk neih ni se.
2. Party tan lam inan loh avangin kohhranah pawh inrem lohna a awm thei tih hriain, thusawiah leh chetziaahte mi dang hliam lo turin fimkhur ila, kohhran chhungah leh Biakinah phei chuan Politics thil sawi hauh loh ni se.
3. Inthlannaa vote thlak hi khua leh tuite tih tur a nih avangin vote neite chuan vote thlak ngei a tha a. Chutih rualin vote pekna turah ngaihtuahna fim tak hmangin, zu leh mipat-hmeichhiatna kawnga nungchang tha lo leh bawlhhlawh te, mi duham leh hlemhle tak te, Kohhran tana hnawksak leh min thliar hrang tur chite chu ram rorelnaa tel tlak an ni lo va, eng Party ami pawh ni se thlan loh ni se.
4. Candidate-te hnenah therhlo leh hamthatna umin kohhran tumahin intiamkamna neihtir loh ni se.
5. Huai takin mahni vote duh zawng chu vote mai tur a ni a; mahni dikna chanvo leh zahawmna humhimin, therhlo leh sum leh paiin tuman vote hralh loh ni se.
Political party leh candidate-te hnena ngenna :
1. Ram hruaitu tha kan neih theih nan Candidate siamtu zawng zawngten Candidate atan pawl leh kohhran inenbikna awm lovin, Pathian tih mi, ruihtheih thil leh corruption-a fihlim, mipat-hmeichhiat kawnga hming hliau lo leh eng pawl leh eng mi pawh en hrang lo va, an harsatnaa tanpui duh mi thlang chhuak turin kan ngen a ni.
2. Tih puitlin theih loh tur hmanga mipui hnena inzuar lo va, ram leh hnam tana Party-in tih a tum dik tak sawia campaign tur te, tlin duh avanga hmanraw bawlhhlawh: hel pawl leh ralthuam lam chi hmang lo tur te, sum leh therhlo sem lo tur te leh hleihluak taka mimal leh pawl in sawichhiat tawn te, inelsen leh in auh nawmnahte ti lo turin kan ngen a ni.
3. Candidate zawng zawngte hnenah duhsakna kan hlan a. Thlan tlin member apiangte pawh term puitling hmang zo ngei turin duhsakna kan hlan a ni.
4. Thlan tlin apiangte chu anmahni thlangtu mipui leh roreltua ruattu Pathian zah chunga ram leh hnam tana rinawm taka hna thawk tur leh mimal hamthatna uma therhlo leh eng thil maha lei theiha awm lo turin kan ngen a ni.
———
District LAD Board :
November ni 15, Ningani khan Lunglei District L.A.D. Board vawi 102-na chu District UPC Conference Hall-ah President Sist.H.Zirliani B/w kaihhruainain neih a ni.
Board thurel langsar zual te:
1. Kum 2019 General LAD Conference Cum Golden Jubilee, Oct.10-13 chhunga Kolasib Diakkawn bial a neih turah Lunglei District atangin Zaipawl a tam thei ang ber neih nise tha tih a ni a, Zaipawl nei thei turte chuan 2019 July ral hmain District Secretary hnenah hla sak tur Copy nen thehluh tur a ni ang.
2. General LAD Golden Jubilee pual hriatrengna atan Farm vengah Tuizem siam nise.
3. Shillong Guest House sakna tur atan kum 2019 ah member 1-ah Rs.20 khawn nise.
4. P.Lady lak zat tur bial tinin January thla ral hmain District hruaitute hnenah report nise.
5. District LAD Conference 2019-a neih tur thlirlawkna neih a ni a, Agenda nei tur te chuan Dt.20.2.2019 aia tlai lovah Secretary hnenah thehluh tur a ni ang a, Report pawh January 20 ral hmain thehluh tur a ni ang.
6. Home Missionary te Christmass thilpek chu Lunglei District Missions Conference neih lai December 2 Pathianni zing inkhawmah hlan nise tha tih a ni.
7. Kum 2019 Budget atan lungrual takin Rs.10,00,000 chu pawm a ni.
——-
Rawngbawltu Ni hmang :
Nov.24 inrinni khan Laldenga Park, Pukpui-ah Lunglei District, Headquarters bial hmanlaknain bial chhunga rawngbawltute pualin ‘Rawngbawltu Ni’ hman a ni.
Rawngbawltu ni ah hian Resource Person atan General Secretary Rev.R.Lalrinsanga leh Lunglei District Superintendent Rev.R.Lalrosanga te hman an ni.
——
Camping :
Nov.20 – 24 chhung khan Hnahthial Venglai Local-ah Camping neih a ni a, Speaker atan Chawngte bialtu Pastor Rev.Lalbiakdika Chawhte an ruai.
——-
Missions Field tlawh :
Nov.25 Pathianni hmang hian Lunglei District Missions Director Rev.VL Hmuaka chuan Laisawral Missions Field-ah rawngbawlna a nei ang.
Laisawral ah hian Lunglei District Missions Department hian Home Missionary atan Evan.K.Lalhlupuia chu a dah mek a ni.
—–
Seminar :
Nov.25 Pathianni chawhnu hian Lunglei District PYD rorel bawhzuiin, Luangmual bial PYD te chuan Lunglawn Zaia veng Local-ah Leadership tih thupui hmangin Seminar an buatsaih dawn a, Resource Person atan District PYD Treasurer Evan.Laldinpuia Sailo chu an hmang ang.
—–
Mi thar :
1. Nov.18 Pathianni khan Bungtlang Local-ah mi thar 4 kohhranah seng luh a ni. Bungtlang Local-ah hian tun hnaiah member thar 12 lai Kohhranah seng luh a ni tawh a ni.
2. Nov. 19 Thawhtanni khan Ramthar Local-ah Rev. C. Hmingthanfala, Hqrs. Section Pastor chuan mi thar 2 Isua hmingin Baptisma a chantir.
——
Revival Crusade :
Nov.22 zan atang khan Rangte N Local Sunday School Department te chuan Revival Crusade an buatsaih a, Speaker atan Thenhlum bialtu Pastor PC Zion Rammawia chu hman a ni a, Nov.25 Pathianni zan thleng rawngbawlna a nei dawn a ni.
———
Nov.25, Pathianni hmang hian Tawipui N-II Local LAD te chuan Bualte-ah rawngbawlna nei turin an fehchhuak a, Speaker atan bialtu Pastor Rev.H.Rothuama an ruai. (Pic. Rev.H.Rothuama)
——
District Literature Committee :
November 20, Thawhlehni khan Aizawl East District Literature Committee chu District Superintendent room-ah neih a ni.
Meeting hi Rev Rosanga Kawlni, Chairman chuan kaihruaiin Kum 2019 Nilai zan thupui zir tur an endik a. Kum 2019 Nilai zan thupui hi mi hrang hrang ziah niin Thupui 41 zir tura ruahman a ni a, UID chungchang te, WCC, Sabbath chungchang, Ephraim, Zoramthar, Israel chungchang bakah Politics in Kohhran a nghawng dan te, Kohhranin Politics a thlir dan tur chungchang te, Missions rawngbawlna te, Daniel hapta chungchang te, Sawmapakhat leh Buhfaitham bakah Bible Society chungchang, Ruihhlo ngaite pual, Fahrah leh chanhaite chungchang te leh Kohhran leh tunlai Media bakah Serh leh sang chungchangte chu thupui langsar zualte an ni.
—–
District Sunday School Board :
November 21, Nilaini khan District Committee room-ah Aizawl East District Sunday School Board neih a ni.
He hun hi Rev C.Mawizuala, Director chuan a kaihruai. Sunday School board hi District Kohhranpui hruaitute, Rev Rosanga Kawlni, Superintendent, Rev Biaksangzuala, Secretary leh Treasurer Rev Vanlalfela Ramtiam bakah General Sunday School Director Rev R.Laichhingpuia ten an telpui a, Rev R.Laichhingpuia chuan rorel palai te lawmna thu sawiin S.S Zirlaibu siam dan leh nihphung te, General S.S hmalakna hrang hrangte a sawi bawk.
District Sunday School Board-thurel langsar zualte:
1. Naupang chawhnu zirlaibu hi a ngai reng ni lovin kumtin thlak theih ni se tih chu a thara siam ni se, a bu kalhmang leh ziaktu tur chu Executive board in lo siam fel se, Kum 2020-ah chuan zir hman ngei tura hmalak ni se.
2. District huapa Sunday School Sam inphuahsiak ni se, Executive board-in tul leh pawimawhte chu ruahmanna lo siam se tih a ni.
Kum 2019 Budget Estimate Upa Rodailova, Treasurer chuan pharhin siamthat ngaite siamthat a nih hnuah District Board pawmpui turin Rs 10,16,000/- an ruahman.
District Sunday School board-ah hian Chairman sawm angin Rev Rosanga Kawlni, District Superintendent chuan tunhnai lawka Thailang khawpui Bangkok-a UPC NEI Executive Board member ten Seminar an neih report a pe a, Rev Biaksangzuala, District Secretary pawhin thutlem sawiin tawngtaina in rorel inkhawm a tin a ni.
——–
Revival Crusade :
November 16 atanga 18 chhung khan Mualpui bial Revival Committee te chuan ITI Biakin-ah Revival Crusade an buatsaih.
Revival Crusade ah hian Speaker-ah Evan Lalchhuanmawia Zote chu hman niin Thlarau Thianghlim awmpuina hnuaiah hlim takin hun an hmang a, Mualpui bial chhung bakah khawpui chhung bial hrang hrang atangin inkhawm an chhim thin a ni. Crusade neih chhung hian mal zai bakah group zai ngaihthlak thin niin siamthar lehna chang mi engemaw zat an awm a ni.
Evan Lalchhuanmawia Zote Speaker a hmang tho hian November 24 atanga 25 chhung hian Bethlehem bial PYD buiatsaih in Hermon Biakin-ah Revival Crusade neih leh mek a ni.
——-
Department OB pual Seminar :
Rev Biaksangzuala, District Secretary resource person-a hmangin November 18, Pathianni khan Shillong- Kohhranah District chhunga Department hrang hrang OB te pualin Seminar hlawhlting taka neih a ni.
He hunah hian Hruaitute mawhphurhna tih thupui-ah hman niin hruaitute tih tur leh tih loh turte, hruaitute mawhphurhna hrang hrangte zirtirna pe a ni. Seminar-ah hian District chhunga OB te an telkim thawkhata, kalkhawm ten hlawkthlak an ti hle a ni.
——-
PYD Building hawng dawn :
Aizawl East District PYD ten Champhai Bethel bial, Zokhawthara Building an sak chu November 25, Pathianni hian an hawng dawn.
He hun hmang tur hian District PYD hruaitute chu Inrinni khan Champhai lam pan hian an kal a, Inrinni zanah Champhai Bethel bial Hqrs.-ah rawngbawlna neiin Pathianni hian Building hawng turin Zokhawthar lam hi an pan leh ang a, He building hi District PYD President, Rev R.Laltlankima’n a hawng dawn a ni.
Building hi Kum 2017 November 24 khan District PYD President, Rev R.Laltlankima kaihhruaiin Champhai Bethel bial PYD te nen sak tan a ni a, a dung ft 18 leh a vang ft 24 aliana sak niin Champhai Bethel bial PYD te kutah dah a nih angin an ni hian hma an la a ni.
Kum 2019-a District PYD Conference vawi 25-na lo thleng tur denchhenin District PYD OB meeting neih chuan he Building hi Jubilee building ni se alo tih tawh a ni. He building sak nan hian Budget-ah dah thin niin bial hrang hrang te thawhrimna leh sum leh pai District-a an chhunluhna kaltlangin tunah hian puitlin theihin alo awm ta a ni.
—–
Biak In hawng :
November 17, Inrinni khan Aizawl East District, Darlawn Biak in sak thar chu General Secretary Rev R.Lalrinsanga’n UPC-North East India biak in pakhat ni turin Pathian hnenah hlanin a hawng.
Biak in hawnna hi biakin tualah neih hmasak niin Rev. R.Lalrinsanga Gen. Secretary, chuan Exodus 25:8 atang 9 thu chhiarin thuchah tawi a sawi a, Rev.R.Lalthanzuala’n tawngtaina a hmang.
Biak in chhungah Biakin thar lawmna hun hman chhunzawm a ni a, Bialtu Pastor , Rev T.Lalbiakliana’n inkhawm a kaihruaia, T.Upa Joseph Lalrohluna Church Board Secretary hnen atangin Technical Report ngaihthlak a ni. Report atanga a lan danin Darlawn-ah hian Kum 1972 khan Kohhran hi alo ding tawh a, tunah hian member 140 vel an awm mek a, tuna Biak In hi vaw 4 an sakna a ni tawh a ni.
T.Upa TC. Malsawmtluanga Church Board Treasurer hnen atangin Financial report ngaithlak a ni a, Biak In hi a dung ft 50 leh a vang ft 28 a liana sak niin, cheng 13,68,118 leh hnatlang vawi 200-ah tha 2470 vel an seng. Sis Laldinpari’n zaia rawngbawlna neiin; Rev R.Lalrinsanga hnen atangin Pathian thuchah ngaihthlak a ni a. Bialtu MLA Pu RL.Pianmawia’n lawmpuina thu tawi a sawi bawk.
Darlawn biakin hawnna-ah hian Bial chhung mai bakah bial pawn atangin Kohhran mi thahnem tak an kalkhawm a, Darlawn bialtu Pastor lo ni tawh mi engemaw zatin an telpui bawk.
—–
Music video tlangzarh :
Bawngkawn bial zaipawl ten kumin chhunga Project an neih Music video an siam “I dam tha em” tih C.Lalruatsanga (Sangtea) phuah chu November 20, Thawhleh zan khan Peniel Sunday School Hall-ah an tlangzarh.
Music Video hi Bialtu Pastor, Rev C.Mawizuala chuan tlangzarhin Youtube leh Local channel-ah thlir theih turin December thla hian dah a ni ang. Music video siamna tur atan hian October 27 khan Shooting neih alo ni tawh a, Recording hi CTJ recording studio-ah neiin Video hi Asanga Dosel siam a ni.
Bawngkawn bial zaipawl te hian Music Video engemaw zat siam tawhin Bawngkawn Kohhranpui leh Department hrang hrang bakah Kohhran mipuite thlawpna an hmuh thin avangin lawmthu an sawi a ni.
——-
Retreat :
November 15, Ningani khan Aizawl East District hnuaia Revival Speaker te pualin retreat buatsaih a ni.
He hun hi Evan K.Vanrmangaia, Revival Speaker chuan kaihruaiin District hruaitute pathum, Rev Rosanga Kawlni, Superintendent, Rev Biaksangzuala, Secretary leh Rev Vanlalfela Ramtiam, Treasurer bakah Rev KVL Hmangaihkima, Chairman Revival Committe te hnen atangin Speaker te tih tur leh tih loh turte, rawngbawlna kawnga hmasawn dan leh an rawngbawl leh zelna tur atana hmasawnna na tur hrang hrangte sawiin infuihtharna hun an hmang.
Tun dinhmunah Aizawl East District Revival Committee hnuaiah hian Speaker 5 an awm mek a ni. Revival Speaker leh an Team hming te :
1. Evan. Hmingchungnunga, Serchhip Chanmari, Serchhip Bial. Krista tana Sengkhawmtu Team
2. Evan. H.Lalhlimpuia, Bethlehem Vengthlang, Bethlehem Bial. Crusaders for Christ Team
3. Evan.Vanlalramnghahmawia, Hnahlan. Thuthlung phurtute Team
4. Bro. K.Raldoliana, Bethlehem Vengthlang. Lalpa nghaktute Team
5. Rev. H.Vanlalchhana, Salem Veng. Healing Ministry
——-
Naupang pual Seminar :
November 18, Pathianni Chawhnu khan Aizawl East District, Bazar Bial Sunday School Department chuan Naupang pual Seminar an buatsaih.
He hunah hian Bial chhunga Tualchhung Kohhran hrang hrang atangin Intermediate zirlai atanga Doctrinal zirlai engemaw zat an kalkhawm a. Evan VL Nghaka Chawngthu, Bial Sunday School Director leh Rev R.Vanlalawia, General Sunday School Secretary te resources person atan an hmang a, Projector hmangin zirtirna an pe a ni.
Hetah hian Zirna chungchang te, Thuthlung lam hawi bakah eizawnna chungchangte zirtir an ni a, kalkhawm ten hlawkthlak an ti hle a ni. Zanah Revival inkhawm neih chhunzawm niin Rev R.Vanlalawia, General Sunday School Secretary hnen atangin thuchah ngaihthlak a ni.
———-
Member thar :
Aizawl East District chhung, Zemabawk bial Missions Department ten bial chhunga rawngbawltu an rawih mek Evan Thangneihsanga rawngbawlna kal zelah November 18, Pathianni khan chhungkaw 1, member 7 chu Zemabawk Lungbial Kohhrana lawi turin an senglut.
Sialhawkah pawh Sis Sangkhumi B/W te rawngbawlna kaltlangin mithar 4 bialtu Pastorin sengluhna a nei bawk. Sis PC.Lalhmangaihzuali rawngbawlna kal zelah November 17, Inrinni zan khan Maite kohhran-ah mi 2 in sual ngaihdamna baptisma an chang a. Bazar Kohhran pawh November 17, Inrinni kha Sis. Lalnunziri te chhungkua chuan Pathian hnena lawmthusawi chawimawina pein; Kohhran ten hlim takin hun an hmang a, Speaker-ah Evan R.Vanchhunga an hmang a, Pathianni zan thleng revival programme an hmang chhunzawm a ni.
——
Aizawl East District Superintendent Rev Rosanga Kawlni chuan November 24, Inrinni hian Suangpuilawn bial, Pehlawn biakin sak thar a hawng a, Pathianni zan thleng rawngbawlna a nei chhunzawm.
——-
Rawngbawlin fehchhuak :
Aizawl East District, Thuampui PYD te chuan Nov ni 9 atanga ni 11 chhung khan Khawbung Kohhran te tlawhin PYD Member 20 chuang an fehchhuak.
Nov ni 9, Zirtawp Niah kalin zan lamah inkhawm programme an buatsaih nghal a,
Inrinni chhun lamah Khawbung chhehvela Pi leh Pu sulhnu awm te tlawh kualin hun an hmang thung. Fehchhuah Programme hman chhungin Bro. R Zorinpuia, Bro. Calvina Lalrinngheta, Bro. Malsawmdawnga leh Bro. Zothansiama ten thuchah an sawi thin a ni.
Thuampui PYD te hian Khawbung kohhran tan hian Sanna pui (Wall Clock) an hlan a, Bial in sak tanpuina tur mimal ten an thawhkhawm an hlan bawk.
——-
Revival Crusade :
Aizawl East District, Thuampui Bial PYD chuan Conference thurel bawhzuiin Nov ni 15 atanga ni 18 chhung khan Thuampui Biak Inah Revival Crusade an buatsaih.
Revival Crusade ah hian Rev. R Laltlankima, Aizawl East District PYD President speaker atan an ruai a, Nov ni 15, Ninga zan atang khan Revival Crusade hi tanin; Bial chhung veng hrang hrangin chhimtu an thahnem thei hle. Nov ni 17, Inrinni zan khan thalai te tawnghriat loh hlapui dawng thei tura inbuatsaihna inkhawm neiin an hlawk pui hle.
Pathianni chhunah Hangi tlang Prayer Mountain ah tawngtaia inhlan tharna hun an hmang a, member ten an hlawkpui hle. Zu leh ruihhlo avanga harsatna tawk ten siam thar lehna an chang a, thalai hruaitute pawhin an hlawkpui hle a ni.
——–
Naupang chawhnu zirlaibu tlangzarh :
Nov ni 21, Nilai zan khan Tlangnuam Biak inah North Mizoram District Sunday School Department Naupang Sunday School Chawhnu Zirlaibu Tlangzarh inkhawm buatsaih a ni.
Thuzirbu tlangzarh inkhawm hi N.Mizoram District Sunday School Director Rev. K.Malsawmtluanga’n a kaihhruai a. Tlangnuam Bial S.S Director Upa Lalthlanga’n hunserh a hmang.
N.Mizoram District Superintendent Rev.Laltluanga’n Naupang Sunday School chawhnu zirlaibu (Bible-a mi entawn tlakte chanchin) chu tlangzarh in Pathian hnenah tawngtainain a hlan. District S.S Secretary Evan.H.Lalrinngheta’n report a pek chhunzawm a, zirlaibu hi Rs. 50/- man tur niin kum thum zirtur atan ruahman a ni. A ziaktu Upa K. Hranglawta inpekna leh zirlaibu buatsaihna kawng a puitu zawng zawngte hnenah lawmthu a sawi a ni.
Gen. Sunday School Director Rev.Laichhingpuia’n thu tawi sawiin he thuzir bu hi kan fate chhanhim tura hna ropui tak thawktu a nih ngei a beisei thu a sawi a, tan la sauh sauh turin a fuih.
Tlangnuam Sunday School zaipawl, Sis.Lalnuntluangi leh Sis.Lalfakzuali ten zaia rawngbawlna an nei a. Aizawl East District Sunday School Director Rev.C.Lalmawizuala leh thuzir bu ziaktu Upa K.Hranglawta, Rev.K.Darsailova, Rev.C.Lalmuanpuia, Rev.Lalramzauva Sailo te hnen atangin thusawi tawi ngaihthlak a ni a. General Sunday School Secretary Rev.R.Vanlalawia’n Malsawm tawngtaiin inkhawm a tin a ni.
———
District Missions Conf :
Nov ni 23 atanga ni 25 chhung hian Chhimtuipui District Hqrs local, New Siaha ah District Mission Conference an hmang mek.
District Missions Conference ah hian Rev.Lalhawia General Mission Director chu speaker atan an hmang a, District Mission Official ten he khawmpui hi an kaihruai thung. District PYD Choir, South Lungpher local PYD Choir te, Siaha bial chhunga local LAD hrang hrang teleh malzai hrang hrang hnen atang Pathian fak hla ngaihthlak thin a ni a,
He khawmpui ah hian district chhung home missionary hrang hrang ten report pein Nov ni 24,Inrinni chhun khan rorel inkhawm an nei a, Pathianni zan thleng hun an hmang dawn a ni.
——
Kumtawp Board nei :
Nov ni 24, Inrinni khan Chhimtuipui District Hqrs local, New Siaha ah District PYD Kumtawp Board an nei a, NOv ni 25, Pathianni chawhnu hian District LAD te chuan Dist Hqrs local, New Siaha ah District Board an nei ang.
——
Rawngbawlin chhuak :
Chhimtuipui District, Lawngtlai South Bial, Chandmary Local PYD te chuan Lawngtlai North BiaL chhunga AOC Local tlawhin an fehchhuak a. Intlawhtawn programme hi Nov ni 17, Inrinni zan atanga tanin Pathianni zan thleng an hmang a ni.
——
Missionary tan thilpek pe :
Lawngtlai Council Veng LAD te chuan Karo, Manigong Arunachal-a Missionary Evan.VL.Dinthara te quarters carpet phahna atan thawktu hnenah hian RS.10000 an hlan a. South Lungpher local LAD pawhin Eng leina tur RS.10000 an hlan bawk.
——-
Naupang SS pual intihsiakna :
Nov ni 17 atanga ni 18 chhung Khan Siaha bial te chuan bial Naupang SS pualin INTIHSIAKNA Siahatla local an buatsaih.
He intihsiaknaah hian apumpui ah a thlengtu local Siahatla/Saihatlangkawn local chu pakhatna an ni a, Dist Hqrs local chu pahnihna niin, College Veng II local church pathumna an ni.
He INTIHSIAKNA hi ni hnih awh niin Solo,Group Song, Chang vawn,recitation leh Bible qiuz hmanga inelna thianghlim neih a ni a. Naupang ten an hlawkpuiin Kohhran ten a hlimpui hle.
Facebook