UPCNEINEWSSERVICE MAY 9.2021
——–
RAM PUM HUAP TAWNGTAI RUAL
United Pentecostal Church North East India, General Secretary chuan thuchhuah siamin Tunlai Covid -19 hripui leng mek leh khuarel chhiatna hrang hrang laka kan him theih nan Mizoram Kohhran Hruaitute Committee (MKHC) in Ram pum huap tawngtai rualna neih ni se a tih May ni 8, 2021 Inrinni zan dar 7:00pm neih tur chu a hlawhtlin theih nan kohhran chhungkua tin ten he mi hun hian inkhawmna nei a, urhsun taka Pathian hnena tawngtaina nei turin kan inngenin kan inhriattir a ni.
Tawngtai thupui turte:
1. Sual thupha chawina
2. Pathian hruaina kan chan avanga lawmthu sawina
3. Covid-19 hripui vei mekte an lo dam thuai theih nan
4. Dam lo enkawltu Doctor, Nurse, leh thawktu hrang hrangte tan
5. Covid-19 hripui leng hi a lo reh theh nan 6. Khuarel chhiatna hrang hrang laka kan him theih nan
7. Kan thenawm ram Myanmar tualchhung buaina a lo reha mipui thlan sorkar tha tak an neih theih nan.
———
CM RELIEF FUND ah Nuai 8 hlan:
May ni 05, Nilaini khan UPC-North East India hruaitute chuan Chief Minister Relief Fund ah Covid-19 dona atana a țul apianga hman turin nuai 8 an hlan a, țanpuina sum hi Pu JC Ramthanga, Adtl CS chuan a lo dawng a ni.
Kohhran aiawhin General Superintendent Rev. R. Lalrinsanga, General Secretary Rev. Zohmingthanzama leh General Treasurer Rev. Lalmalsawma Sailo ten țanpuina hi an hlan a ni.
———-
Pentecostal Network Meeting:
May ni 5, Nilaini khan UPC North East India Kohhran Media rawngbawlna kawnga hmala tu Pentecostal Network (PenNet) chuan General Hqrs Office committee Room, Mualpui Salem veng Aizawlah meeting an nei.
Meeting hian PenNet programme chhuah kal mek chungchang an thlir ho a ni a, May thla tawp lam atanga kal tan turin Programme thar siam belh tur an duang a, May ni 23, Pentecost Day hian LPS leh Zonet Cable tv ah Inrinni zan atanga Pathian zan thlenga hun hman nise tiin ruahmanna an siam bawk. Committee member tur ruat belh leh hmanraw leih belh nise tih te chu an thu ngaihtuah langsar zual a ni.
PenNet meeting hi Chairman Rev. R. Lalhawia’n a kaihruai a ni.
———-
LAD DAY Vawi 33-na:
May ni 10, thawhtanni hi UPC North East India Kohhran ni pawimawh LAD Day vawi 33-na leh Nute ni Mothers Day a ni a, Covid 19 hrileng mek vangin kum dang anga hman theih loh a nih avangin mahni inchhungkhur theuhva tangkai leh hlawk thei ang bera hmang turin General LAD President Sis. Lalchangliani Sailo B/W chuan LAD member zawng zawng te a ngen.
LAD Day hi Kohhran dan buin a sawi angin; he ni hi Nute hriatrengna ni-Mother’s Day a ni nghal bawk a. General Suptd Rev. Lalrinsanga chuan LAD member zawng zawngte duhsakna chibai bukin, he ni hi LAD Day bakah Nu te ni- Mother’s Day a nih tel avangin Nute chawimawina ni atana hmang turin Kohhran hote min ngen bawk.
LAD hi UPC North East India in dan hnua Executive Board hmasa ber; kum 1969 March ni 20-21 chhunga Shillong Peak Hotel-a neihin a din a ni a, Kum 1988 atang khan LAD Day hi hman tan a ni. Hruaitu hmasa ber turin President atan Audrine Scism leh Secretary /Treasurer atan Thangziki, Hmarkholien chu an ruat.
Kum 2020 LAD General Conference Report atanga a lan danin North East India huamchhungah LAD member 18,812 an awm mek a, Bial 113 ah LAD hi din niin, an member atanga Rawngbawlna Licence- Bible Women (BW) kawl mi 123 an awm mek a ni.
———-
CHANCHINBU THA THLANG LEH DAWN
Gen.PYD-in Chanchinbu kan neih, THLAMUANTU chuan Kum 2020 chhunga Bial/Local Chanchinbu tha a thlang leh dawn a, thehlut tur te tan a hriattur pawimawhte:
Kan hriat theuh angin Kum 2020 khan Covid-19 hrileng in nasa takin min tibuaiin Bial/ Local te pawhin in duh angin Chanchinbu kan tichhuak mumal thei lo tih kan hria a, hemi avang hian inthlahrung lovin, kan tihchhuah ang angte thehlut turin kan insawm a ni. Chanchinbu hi Hard Copy a thehluh vek tur a ni. (Pdf-a tichhuak te pawhin pdf kha print mai tur a ni ang)
Hriatturte:
1. Thehluh hun chhung : May 2021 ral hma.
2. Thehluhna hmun turte :
Gen. Hqrs. Office : Bro.Lalrammawia
AED Office : Evan Lalhmachhuana Varte
NMD Office : Bro Andy Lalramnghaka
Lunglei Dist. Office : Bro K.Lalrintluanga
Lawngtlai West Dist. Office: Bro Vanlalnelzualpuia
Chhimtuipui Dist. Office : Evan T.Vanlaltana
Chanchinbu tha thlan hi thu leh awm hma atan Kum tin thlan thin tur niin Editorial Staff meeting chuan General Conference hun sawn a nih tak avangin hetiang hian ruahmanna a siam thar a ni tih min lo hriatsak dawn nia.
Kumin 2021 Bial/ Local chanchinbu tha hi January to September thla chhung endik tur niin lawmman hi November thla, Gen. Conference-ah sem tura ruahman a ni (Thehluh hun chhung leh thehluhna hmun tur la in hriattir leh a ni ang) Chutin, Kum 2022-ah chuan Kum 2021 October to September 2022 endik tur a ni ang. Hriatthiam loh emaw hriatfiah duh nei chuan Editor/ Secretary Ph. no. tarlanah hian kan zawtfiah dawn nia.
Kum 2020-a Chanchinbu tha Lawmman hi hun remchang thlirin Kumin 2021 June thla hian sem tum a ni.
North East India huam chhunga Bial/Local Chanchinbu tichhuak zawng zawng ten thehlut vek turin kan inngen a ni.
Tin, Article/Sermon, Kumpuan pual bakah English Article engtik lai pawhin kan dawng thei reng a, thawn duh tan email- thlamuantu@yahoo.com-ah emaw Editor ph no- 9862996079-ah whatsapp/telegram hmangin engtiklai pawhin thawn theih reng a ni.
Editor
THLAMUANTU
———-
———-
CHHIMTUIPUI DISTRICT
KOHHRAN FIMKHUR TUR IN NGEN:
Chhimtuipui District hruaitute chuan hripui leng mek Covid 19 lak a Kohhran member zawng zawng te an him theih nan duhsakna hlanin, Sawrkar leh DLTF/VLTF ten inkhuahkhirhna dan an siam te bawhpelh lo a tha taka zawm turin Kohhran mipui te an beisei a ni. Tin, atheih chin chin ah Chhungkaw Maichamte buatsaih a, inhlan tharna nei ṭheuh turin Kohhran chhungkua tinte a ngen ani.
———-
GOLDEN GUBILEE BUILDING SAK CHHUN ZAWM ZEL:
Kum enge chen liamta aṭanga Chhimtuipui District in Golden Jubilee Building a sak bul a lo tan tawh adung feet 120 leh avang feet 70 alian chu chhawng ṭhenkhat luah theih tura zawh fel a ni a, Dist Kohhranpui / Building Board ten a luah dan tur chung changah rule & regulation te siam in hma an la mek a ni.
———-
NAU HLAN RAWNGBAWLNA NEI
May ni 2 Pathianni khan Pastor C. Lalchhuanthanga Siaha sectional Pastor chuan, a bial chhung Council veng ah nau hlan rawngbawlna a nei.
May ni 2 Pathianni vek khan Sangau sectional Pastor Rev K Kawngkharmawia chuan Nau 2 Pathian hnena hlanna a nei bawk.
———-
———-
LAWNGTLAI WEST DISTRICT:
TANPUINA PE:
May ni 3 Thawhtanni khan UPC North East India Lawngtlai West District chuan Bungtlang South II kangmei tuar te ṭanpuina District Superintendent Relief fund aṭangin Rs.5000, Bialtu Pastor K. Lalzawmsanga’n khawtlang hruaitu te hnen ah a hlan a, kangmei an tawrh chhawmdawl nan a UPC North East India Lawngtlai West District ten tanpuina an pek chungchangah Khawngtlang hruaitu ten lawmthu an sawi tak meuh² a ni.
———-
LAWM LUHNA NEI
April ni 29 Ningani khan Diltlang bialtu Pastor R.Lalhriatpuia chuan chhungkaw khat member paruk(6) awmna chu Diltlang Kohhranah a lawm lut a ni.
———-
LAWMTHUSAWI
April ni 30 Zirtawp ni a Sai avanga nunna hlu tak chan ta Sis. Hnianghniangi H/o Evan. Vanropuia te chhungkaw tawrhpui zia lan tir nana hmun hrang hranga kohhran mi te leh an mahni lainattu ten ralna thilpek an pek vang leh an tawrpuina an lantir na ah UPC North East India Lawngtlai West District chuan Lalpa Isua hmingin lawmthu a sawi tak meuh meuh a ni.
———-
———-
AIZAWL EAST DISTRICT:
Aizawl East District in Kum 27 a tling ta:
May 8, 2021 Inrinni hi Aizawl East District dinchampha phak vawi 27-na, District Rising Day niin District hruaitute chuan Kohhran memberte chibai a buk a ni.
Aizawl East District hi N.E.India District pakhat ni turin May ni 8, 1994 khan Bethlehem Veng UPC Biak inah Rev. K.Satinvela, khatih laia Gen. Superintendent UPC-NEI chuan ropui takin a hawng a ni. Rev H.Vankhuma, General Secretary chuan Executive Board-in District hruaitu atana a ruatte puan chhuahna nei nghal in District hruaitu thar te chu :
Dist. Superintendent :Rev. R.Lalrinsanga
Dist. Secretary : Rev. R.Hrangvunga
District Treasurer : Rev. C.Vala te an ni.
District hruaitu atana ruat tharte chu Lalpa mite thuhnuairawlh leh inngaitlawm taka an hruai theih nan Rev K.Satinvela, General Superintendent chuan an ke sil sakin, Executive Board member te chuan an lu chungah kut nghatin tawngtaiin an nemnghet a ni.
May 9, Thawhtanni-ah District thar lawmna Programme hlimawm tak, Bethlehem Biakinah neih chhunzawm nghal a ni. District thar lawmna atan hian District-in neihsa a neih loh avangin Bial engemaw zat leh mimal thahnemngaite thawhkhawm hmangin Tisa ruai hlim takin kilho a ni.
District din tirh a nih hian member hi singkhat sangruk (16000) vel niin Tualchhung Kohhran 145 an ni a, Bial hi 22-ah then niin Bialtu Pastor te nen Full Time Worker hi 39 an awm a ni.
District Board hmasaber chu May 10, 1994 khan Bethlehem Sunday School Hall-ah Rev R.Lalrinsanga, District Superintendent kaihhruaiin neih a ni a, hetah hian thil pawimawh tak tak ngaihtuah a nih bakah Department hrang hrang hruaitu turte pawh siam fel nghal an ni.
Dist. Conference hmasa ber chu Zemabawk Playground-ah Feb 23-26, 1995 khan neih a ni a, thupuiah ‘Chanchin Tha puan darh’ tih hman a ni.
Tun dinhmuna Aizawl East District hruaitute:
Superintendent: Rev Biaksangzuala
Secretary: Rev Vanlalfela Ramtiam
Treasurer: Rev VL Hnemtluanga
Missions Director: Rev R.Lianzama
Sunday School Director: Rev HL Thakunga
PYD President: Rev C.Lalmalsawma
LAD President: Sis Zionparmawii B/W te an ni.
Aizawl East District hian a din tirh atangin Pathian hnen ata malsawmna nasa tak a dawng a, tunah hian District chhunga Pastor Bial 31 awm mekin Kum 2021 District Conference report bu atanga a lan danin Kohhran member 26,055 awm mekin Kohhran chhungkua 5694 awmin Kohhran hi khaw 185-ah a ding mek a, tunah hian Preaching Point 15 a awm mek bawk a ni. Aizawl East District hi a dintirh chuan Office mumal pawh nei lovin hmun hrang hrangah mi In luahin an awm kual thin a, tunah chuan Kohhran mipuite leh Pathian malsawmna avangin Ramhlun South, Aizawl-ah Office tha tak neiin tunah hian Building sak hna pawh chak taka thawh mek zel a ni bawk. Kum 2019 khan Aizawl East District hian a kum 25-na, Silver Jubilee chu ropui takin District Building chungah a lo lawm tawh a ni.
District Rising Day pual hian District Superintendent, Rev Biaksangzuala chuan thuchah siamin “a thim avar pawh thlu lova Lalram tana an tha leh zung, theihna zawng zawng lo seng rala sul lo su tu, kan mi hmasate thinlungin theihnghilh lo sela, hmasawnna hrang hrang District in a hmuh hi Pathian hnen ata malsawmna leh Kohhran chhungkua leh member tinte thawhrimna avang liau liau a nih thu sawiin Malsawmna min petu Lalpa Pathian hi theihnghilh lova, a malsawmna dawng zel tura awm a pawimawh hle a ni. Dik taka Lalpa chanpual Sawma pakhat pe a, Lalpa taksa, Kohhran siam puitling thei tura nasa taka tan lak a pawimawhin, Chanchintha la hre loten Lalpa Chanchintha an lo hriat theihna tura ke pen hi Kohhran hote tih tur pawimawh ber a ni a, Lalpan chhandam kan nih theihna tura thuthlung min pekah hian Lalpa lokal leh hma zawng rinawm taka awmin Hmangaihna nen rawng in bawl tawnin, Hmangaih Pathian tan rawng i bawl zel ang u” a ti a ni.
———–
Mithar leh baptisma chang thar:
April 25, Pathianni khan Evan Thangneihsanga rawngbawlna, Thingsulthliah bial, Mualmam hmunah chhungkaw khat member 4 te chu sengluh an ni. Sengluhna hi Evan LTh.Tluanga, Bial Statistician chuan neiin an fate 2 hi Evan Thangneihsanga hian hlanna a nei thung a ni. Evan Thangneihsanga hi Thingsulthliah bial Missions te chuan rawngbawl turin an ruai a ni.
April 28, Nilai zan khan N.Vanlaiphai bial, Khawlailung Bunghmuna Evan Vanlalrosiama rawngbawlna-ah mi thar 2 Kohhranah sengluh an ni.
May 2, Pathianni khan Kahrawt bial, Champhai Kahrawt Kohhrana lawi turin chhungkaw khat, member 2 te chuan Bialtu Pastor F.Malsawmtluanga’n Kohhranah sengluhna a nei.
May 2, Pathianni vek khan Champhai Bethel bial, Melbuk Kohhranah baptisma khur hawn niin Kohhran member ni sa mi 13 leh mithar pakhatin sual ngaihdamna baptisma an chang thar. Melbuk hmunah hian Evan TC Kapzathanga chuan rawngbawlna a nei mek a ni.
May 2, Pathianni vek khan Bawngkawn Kohhrana lawi turin Kohhran dang atangin mi 1 in Bialtu Pastor, Rev C.Mawizuala kutah sual ngaihdam baptisma a chang bawk. April 25, Pathianni khan Bawngkawn Kohhranah vek hian Bialtu Pastor Rev C.Mawizuala chuan chhungkaw khat member 3 sengluhna alo nei tawh bawk a ni.
April 24, Inrinni khan Upper Republic Bialtu Pastor, Rev C.Lalengliana kutah mi 4 in sual ngaihdamna baptisma an chang.
Khawhai bial, Riangtlei Kohhrana lawi turin chhungkaw khat member 3 te chu Evan E.Lalmuanpuia chuan sengluhna a nei bawk.
———-
Interview hun sawn:
District Missions Department in District Evangelist a lak tur atana interview hun May 5, Nilaini alo ruat tawh chu Mizoram Sawrkarin inkharkhip a puan leh tak avangin May 5, Nilaini khan neih theih a ni lova, Interview hun hi la inhriattir leh tur a ni tiin District Missions Secretary, Evan Lalramzauva chuan thuchhuah a siam a ni.
———-
———-
NORTH MIZORAM DISTRICT:
Office chawl hrih:
North Mizoram District Kohhran hruaitute chuan Sorkar thupek zulzuiin; tun hnaia Covid 19 hrileng hluar leh chungchangah fimkhur tha a hriain April ni 20 atang khan Office an khar. Hetih rual hian Office dawr tul te tan hruaitute inkau renga awmin; tul pawimawhah chuan dawr theih reng turin an awm a ni.
———-
April ni 29 Nilaithawhtan zan khan District-in rawngbawltu daha rawng a bawlna K.Sarali kohhranah mithar -2 sengluh a ni a, Evan Vanlalhlutan Lalpa Isua hmingin kohhranah a lawm lut a ni, K.Sarali kohhran ah hian Evan Vanlalhluta awm mek a ni.
May ni 3 thawhtanni khan Meidum khuaa Dist in a rawih rawngbawltu Evan. H. Lalbiaktluanga’n mi thar pahnih Pentecost kohhrana lawi turin an chenna inah lawmluhna a nei. Kohhranhote an lawm hle.
———-
Lengpui Bial News:
Lengpui bial PYD te chuan thla kal ta April ni Ni 9-11 khan, Meet cum revival Dapchhuah preaching point-ah hmangin chhunah taksa insawizawina lam hawiin hun a hmang a, Inrinni zan, Pathianni chhun leh Pathianni zanah te Revival Programme an hmang thung. Lengpui Bial PYD huaihawt Meet buatsaihah hian thlarau lam malsawmna tam tak an dawng a ni. Lengpui Bial PYD te hian Meet an neih chhunga an thawhlawm tlingkhawm te Lengpui Bial chhunga Preaching Point kohhran an neih Dapchhuah Kohhran pualin an pe. Dapchhuah Preaching Point hi Lengpui Bial PYD te hian kohhran mamawh hmanraw hrang hrang an hlan tel bawk.
Facebook