Pennet News Service : May 31 – June 7

UPCNEINEWSSERVICE May 31-June 7.2020
——
Executive Board :
June ni 3, Nilainia UPC-North East India Kohhran rorelna sang, Executive Board Emergency meeting chuan Covid 19-hri pui leng avangin India hmarchhak UPC Kohhran inkhawmpui lian General Conference chu November ni 26 atanga ni 29 chhunga neih turin a sawn.UPC-NEI General Conference hi kum tin April Pathianni vawi hnih naah emaw vawi thumnaah emaw neih thin a ni a, kumin hian hripui len avangin a hun takah neih theih a ni ta lova. General Administrative Committee in July Pathianni tawp bera neih turin ruahman mahse, Executive Board chuan boruak kal mek thlirin November Pathianni tawp ber hmannga neih nise tiin a ruahman ta a ni. North East India huapa Election leh appointment term tawp zawng zawngte pawh General Conference rual hian inruat thar leh mai nise an ti a, General Conference hun an sawnah hian General Department leh District programme-duan lawk a lo awm a nih pawhin anmahni lo insiamrem mai turin an ngen nghal bawk.

Executive Board chuan Covid 19- hri pui leng hian eng chen nge min nghawng dawn a hriat loh avangin sum inrencham thiam tur leh; loh theih loh thilah lo chuan sum in hmang ral lo hram hram turin Kohhran hote a ngen a, District enkawl Bible School te pawhin mahni District remchan hun huna kumin session chu lo kalpui mai turin ruahmanna a siam bawk.

Executive Board hi General Superintendent Rev. Lalmalsawma Sailo chuan a kaihruai a, a report atanga a lan danin Covid 19- hri pui leng leh Cyclone Amphan-tuarte tanpuina atana Kohhran hote luanchhuahna hi hriat theih chinah pawh cheng nuai 12 chuang zet a ni tawh a ti. Executive Board ah hian member thar Rev. C. Lianchama – North Mizoram District, Rev. R. Lianzama – Aizawl East District, Rev. V.L Hnemtluanga – Aizawl East District, Rev. H.L Thakunga – Aizawl East District te chu General Suptd in Board member atan a lawmlut nghal a. Board member te hian Covid 19 hripui leng avanga harsatna tawk mekte leh ram tana tawngtai hona an nei bawk.
——
General Hqrs Office kai hun :
General Administrative Committee chuan Covid 19 hri lengin zual lam a pan zel avangin sorkar thuchhuah zulzuiin June thla chhung General Hqrs Office kal dan tur ruahmanna thar a siam a, ni inkarthlaka hawn tur niin; Thawhtan, Nilai leh Zirtawpniah te Office hi hawn a ni ang.
(PIC: Gen Hqrs Office)
——

District hrang hrang rawngbawlna chanchin :

Aizawl East District
May 29, Zirtawpni khan Hnahlan Hqrs. Biakin sak thatna tur lungphum chu Rev Biaksangzuala, District Superintendent chuan a phum a,Biak in sak that tur hi tluang taka sak a nih theih nan Pathian hnenah hlanna a nei nghal.

Hnahlan Hqrs. Biakin sak tur hi a dung ft 70 leh a vang ft 32-a liana sak tura ruahman a ni a. He hunah hian Bialtu Pastor R.Lalfamkima bakah Kohhran Upa leh Kohhran member engemaw zat an kalkhawm a ni. Hnahlan Hqrs. Kohhranah hian member 280 vel an awm lawi mek. Rev Biaksangzuala hian Hnahlan bial, Khuangphah Biakin sak lai a enpui nghal a, hetah hian Bialtu Pastor chuan a tawiawm bawk.
——–
Pentecost Day :
May 31, Pathianni khan Pentecost Day niin kum dangah chuan Kohhran ten hlim taka hun hman thin a ni a, amaherawhchu Kumin chuan hripui leng avangin Pentecost Day hi duh angin hmang theilo mah ila, ami te Lalpan a kalsan lova, Pentecost Day hian mithar sengluh, baptisma chang thar bakah nau hlan District chhungah hetiang hian engemaw zat neih a ni.

1. Kawlkulh Vengthar Kohhranah Pentecost Day khan mi 23 in sual ngaihdamna baptisma, Bialtu Pastor R.Malsawma kutah changin an zinga pakhat hi mithar a ni.

2. Khawzawl-ah pawh Pentecost Day khan mi 10 ten Bialtu Pastor, Rev C.Lalmalsawma kutah sual ngaihdamna baptisma an chang thar a, an zinga pakhat hi mithar a ni.

3. Bawngkawn Kohhranah Pentecost Day khan Bialtu Pastor incharge Rev Vanlalfela Ramtiam chuan nau 7 hlanna a nei bawk.

4. Bethlehem Local-ah Bialtu Pastor, Rev Rohmingliana chuan nau 3 hlanna a nei.

5. Darlawnah mithar pakhat, Bialtu Pastor, Rev T.Lalbiakliana’n sengluhna a nei.

6. Zohmun Kohhranah Bialtu Pastor Vanlalnghaka Renthlei chuan Pentecost Day khan nau 5 hlanna a nei.

Heng bakah hian May 23 leh 24 khan Sakawrdai hmunah Bialtu Pastor K.Lalmuanpuia kutah mi 10 in sual ngaihdamna baptisma changin an zinga pakhat hi mithar a ni.
——-

Chhimtuipui District :

Office khar :

May ni 28, Ningani atang khan Chhimtuipui Dist Office chu khar rih a ni.

Office building Committee Room leh Guest Room te hi sawrkarin quarantine centre atan a hman avangin Office hi khar rih a ni a, Office dawr tu turte chuan mimal in emaw, phone call hmangin Dist official te hi dawr theih reng an ni.

He hmunah hian mi 12 quarantine niin Dist Hqrs local PYD te chuan May ni 28, Ningani atan khan vokunteer in eirawng an bawl sak a, khunghran an nih chhung zawng chu Dist Hqrs local PYD te hian ei rawng anbawl sak dawn a ni.

Meisatla Kohhran Hall pawh family quarantine centre atana hman mek a ni a, Meisatla PYD te pawhin he hmuna quarantine mek te hi volunteer in eirawng an bawl sak bawk.
—–

Lawmthusawina :

Siaha College Veng PYD te chuan ni 14 chhung zawng Govt Saiha College a quarantine mi 130 chuangte volunteer in eirawng an bawl sak a.

Eirawng an bawl chhung hian Siaha Council Veng PYD te, Dist Hqrs local PYD te leh Siaha bial PYD te hnen atang thil pek leh puihna an dawng a, quarantine te hian an neih ang ang sum thawhkhawm in, eirawngbawl saktu College veng local PYD te hnenah lawmthu sawina atan an hlan.
Siaha college veng PYD te hian an beisei hauh loh leh an phut ni miah lo, quarantine te hnen a?anga sum leh pai an dawng hi lawmawm an ti tak zet a ni.
——-

Churachanpur District :

District board :
June ni 3, Nilaini khan Churachandpur District board Meeting neih a ni.

District board hian Pastor Transfer tur Lockdown avanga pendinga awm chu June ni 15 hma ngeiin an awmna tur hmunah in sawn fel se tiin a pass. Pastor transfer leh an awmna tur hmun te :
1.Rev. Thachuailo – Tuibong section ah.

2. Rev. Haungama – Lentlang section
(Hmar veng) ah

3. Pastor K.Lalramdina – Pangzawl Section ah.

4. Pastor Ngamkholal – Parbung Section ah.

5. Pastor Chinminthang – Thangting section(s.molhoi)ah.

6. Pastor J.Lalnunsang – Thanlon Section ah.

Sawrkar in a ngen angin District enkawl EL Scism High School-ah Quarantine mi 42 an awm mek a, a tul angin District pawhin tanpui ngaite tanpui nan ke a pen mek zel bawk.
—–
Rawngbawlna a chawl lo :
Lockdown hun chhung hian Churachandpur District chhunga Bialtu Pastor leh Tirhkoh te chuan an theih ang anga rawngbawlna kalpui reng a, Lockdown chhung hian Member thar 14 Kohhranah sengluh an ni tawh a;
District Office pawh chawlh lova kai reng a ni bawk.
——-

North Mizoram District :

Pentecost Day report :
May ni 31 Pathianni kha Pentecost Day a nih angin; North Mizoram District chhunga kohhran hrang hrang te chuan he ni pual hian chhungkaw Maicham buatsaihin urhsun takin hun an hmang a, he ni hi Thlarau Thianghlim pawimawh zia inzirtirna tharna atan an hman bakah Thlarau thianghlim dawng tura intawngtai sak nan te hun hman a ni bawk.

Kohhran thenkhat te chuan an Pastor te kaihhruaina in Pentecost Ni Sermon lehkhaa sem chhuakin hun an hmang bawk.
——
Tanpuina hlan :
June ni 2 Thawhlehni khan North Mizoram District hruaitu Pahnih Rev. Laltluanga Dist. Supdt. Leh Rev. Chhiarpuia District Secretary te chuan Samtlang Kohhrana lawi Sist. Lalthlamuani damlohna avanga hun rei tak hna thawk thei lova awm leh Lock down avanga eizawnna mumal nei lo chu tlawhin District Relief fund atangin tanpuina an hlan, Pi Lalthlamuani leh a chhungte hian tanpui an ngaih laia District in tanpuina a pek avangin an lawm thu an sawi bawk.
——-

Hruaitute Programme:
June ni 1 Thawhtanni kalta khan North Mizoram District Treasurer Rev. K. Lalduhsanga chuan Kolsib Venglai Bial chhunga Project Kohhran tlawhin; tun hnaia khuarel chhiatna avanga an biak in bul lungrem chim a hmunah enin, kohhran dinhmun te a thlithlai.

He chhiatna thlithleng avang hian Bialtu MLA Pu K. Lalrinliana Minister of State pawhin Pathianni kal khan Kohhran hote tanpuinan Rs. 20000 a hlan bawk a, kohhranhote an lawm hle.
——
Thilpek :
1. May 27, Nilaini khan Bro Mavena of Maubawk chuan North Mizoram District-a Missions Field, nikum kum tawp lama hawn, Tumpanglui Missions Field tan Combo tha tak Rs 8470 man a pe a. He thilpek avang hian Kohhrante an lawm hle (Pic. Combo)

2. June ni 2 Thawhlehni khan Reiek Bial LAD te chuan Bial Board-a an lo rel tawh tihlawhtlingin Bialtu pastor Quarters -ah Gas Stove tha tak an pe, Reiek Pastor P. Vanlalfela chuan LAD te fakin Tanpuitu an nihnaah lawmthu a sawi (Pic Gas Stove)

——
Hnatlang :
May ni 13-a Ruah leh rial tlain Khawthlang Rengdil khua leh a chheh vel mihring chenna in luah tlak lohva a den chhiat UPC-North Mizoram District leh Kohhran dang dangte’n tanpuina an pek kaltlangin Tunkar chhung khan khawtlang hnatlang kohvin in chung chih hnatlang an nei a, khawtlang huap hnatlangah Kohhranhote pawh an chhuak tha thin hle.
——

Office kai hun siam :
North Mizoram District Officer meeting chuan Covid 19 hri lengin zual lam a pan zel avangin sorkar thuchhuah zulzuiin June thla chhung Office kal dan tur ruahmanna thar a siam a, Thingtlang lam atanga Office dawr duhte tana awlsamna tur ngaihtuah chungin Thawhtan, thawhleh leh nilaini Office thin tur niin; hemi hun chhung hian zing lam dar 10:00 atanga dar 4:30 thleng Office hi dawr theih a ni anga, Ningani leh zirtawpni erawh chawlh a ni thung dawn a ni.
—–

District Missions :
North Mizoram Disrict Missions Department-ah Local, Bial leh District level thenkhat atangin Missions rawngbawlna tur sum thehluh zel a ni a, District in Bialtin Target a tuk tlingkhawm Rs. 4763000 atangin 1277930 lai a hmu tawh bawk.

Hetihrual hian Local leh Bial tangin Missionary chawmna leh Support-na tur sum thahnem tak a lut mek zel bawk a, District hruaitute pawh an lawm hle.

North Mizoram District te hian General Missions Department-ah Buhfaitham target a neih Rs. 23,00,000 atangin Rs. 4,85,874  a pek tawh bakah General Target-ah Rs. 35,59,000 atangin Rs. 12,00,000 a thehlut tawh bawk.
Mi thar nei: Pathianni kal ta May ni 31 khan Darparengpui Bial, Tuipuibari, Persang Home Missions Field area- ah, Pentecost kohhrana lawi turin kohhran dang atangin Nupa tuak khat lawmluh an ni. Mithar lawmluhna hi Persang Missionary Evan. Isak Lalrohlua Home Missionary chuan neiin; Missionary Quarters-ah lawmluh inkhawm hi an nei a ni. Missionary Evan. Isak Lalrohlua chuan “Lalpa mi thianghlimten harsa taka in sum thawh chhuah leh ramthim tana in inpekte a thlawnin a luang ral lo” tiin a lawmthu a sawi.
——-

Member thar :
May ni 28 Ningani zan khan Aizawl Dinthar Pentecost kohhran-a lawi turin chhungkaw khat (member 3) awmna chu Dinthar bialtu pastor Rev. C. Laltlanchhuaha chuan Kohhranah a senglut a, he mi pual inkhawm hi Pu Lalchhuana te inah hman niin; Bialtu Pastor hi Dinthar Kohhran  Church Board Committee ten an tawiawm bawk.