UPCNEINEWSSERVICE MAY 3-10.2020
———
General Administrative Committee :
May ni 4, Thawhtanni khan UPC North East India, General Administrative Committee meeting chuan heng a hnuaia Pastor thawklai te hi Pastor rawngbawlna kum 10 an Service tawh bakah Reverend Title pek tlaka a ngaih avangin Reverend title a pe thar a ni.
1. Pastor Lalramthanga Kawlni, N. Mizoram District
2. Pastor Pc Laltlankima, N. Mizoram District
3. Pastor H. Lalropuia, Aizawl East District
4. Pastor B. Lalengzuava, Aizawl East District
5. Pastor L.H Lalchhandama, Lunglei District
6. Pastor Lalsawmliana Sailo, Lawngtlai West District
7. Pastor K. Kawngkharmawia, Chhimtuipui District
8. Pastor H. Hnehchunga, Chhimtuipui District
Heng bakah hian General Administrative Committee chuan Covid-19 hripui leng avang March ni 23 atanga General Hqrs Office khar chu sorkar lamin Kohhran Office te hawn a phalsak tak avangin May ni 4, atanga dan pangai anga kal nise tiin a rel a, General Hqrs Office staff Bro. R. Lalbiakfela pa, Sr Upa Ngaihchhunga; April ni 16 a boral chu May ni 5 ah Staff Welfare hminga ral nise tih bakah General Hqrs Office Staff Evan. Pc Lalrokima, North Mizoram District Board in Aibawk bialtu Pastor atana a lak chu Staff welfare hmingin May ni 8, Zirtawpniah thlahna neih nise a ti bawk.
———-
LAD Day & Mother’s Day :
May ni 10, Pathianni hi UPC North East India Kohhran ni pawimawh LAD Day leh Nute ni Mothers Day a ni a, kum dang anga hman theih loh a nih avangin mahni inchhungkhur theuhva tangkai leh hlawk thei ang bera hmang turin General LAD President Sis. Lalchangliani Sailo B/W chuan LAD member zawng zawng te a ngen.
LAD Day hi Kohhran dan buin a sawi angin; he ni hi Nute hriatrengna ni-Mother’s Day a ni nghal bawk a. General Suptd Rev. Lalmalsawma Sailo chuan LAD member zawng zawngte duhsakna chibai bukin, he ni hi LAD Day bakah Nu te ni- Mother’s Day a nih tel avangin Nute chawimawina ni atana hmang turin Kohhran hote a ngen bawk.
LAD hi UPC North East India in dan hnua Executive Board hmasa ber; kum 1969 March ni 20-21 chhunga Shillong Peak Hotel-a neihin a din a ni a, Kum 1988 atang khan LAD Day hi hman tan a ni. Hruaitu hmasa ber turin President atan Audrine Scism leh Secretary /Treasurer atan Thangziki, Hmarkholien chu an ruat.
Kum 2019 LAD General Conference Report atanga a lan danin North East India huamchhungah LAD member 18,448 an awm mek a, Bial 114 ah LAD hi din niin, an member atanga Rawngbawlna Licence- Bible Women (BW) kawl mi 121 an awm mek a ni.
————
Thlahna hun hmang :
May ni 8, Zirtawpni khan General Hqrs Office Staff atanga Pastor rawngbawlna hna thawk tura lak Pastor Pc Lalrokima thlahna, General Hqrs Office Mualpui Salem veng Aizawlah neih a ni.
He hun hi General Suptd Rev. Lalmalsawma Sailo chuan kaihruaiin; Rev. V.L Tluanga Sinate, General Missions Secretary in tanna hun a hmang a. General Secretary Rev. R. Lalrinsanga’n thlahna leh fuihna thu tawi sawiin, General Treasurer Rev. Zohmingthanzama’n Staff Welfare aiawhin thlahna thutawi sawiin ngaihhruina thilpek a hlan a, General Missions aiawhin Director Rev. R. Lalhawian thlahna thutawi leh thilpek a hlan bawk.
Heng bakah hian Staff atangin thlahna leh fuihna thu tawi sawiin a kalzelna turah duhsakna an hlan a ni.
Pastor Pc Lalrokima hi kum 2010 khan General Hqrs Offfice-ah General Missions Clerk ni tura lak a ni a, Kum 2011 May ni 1 ah a service regularise-in thahnemngai leh taima taka a hmazawn mawhphurhna apiang hlenchhuak thin mi a ni a, tunah hian General Missions Treasurer mawhphurhna a chelh mek. May ni 2, Inrinni khan a bial vawn tur Aibawk bialah hian an chhungkuain an insuan lut tawh a ni.
————–
City PYD :
May 5, Thawhlehni khan Kum 2020 chhunga Aizawl City PYD hruaitu hlui leh tharte chuan charge hlanna hun Aizawl East District Committee room-ah an nei. He hun hi Evan J.Vanlalruata, North Mizoram District PYD President leh City PYD Adviser ni bawk chuan a kaihruai a ni. Hruaitu hlui leh tharte inhmelhriatna neih a nih hnuah charge inhlanna neih chhunzawm a ni.
Kum 2020 chhunga City PYD Hruaitu tharte:
Chairman Upa F.Lalthlangliana, AED PYD Vice President
V.Chairman: Evan K.Rotluanga, NMD PYD Secretary
Secretary: Evan C Lalruatsanga, NMD PYD Treasurer
Asst. Secretary: Bro Lawmsangkima, AED PYD Asst. Secretary
Treasurer: Bro Zothansiama, AED PYD Fin. Secretary
Charge inhlanna neih a nih zawh hnuah OB Meeting neih nghal niin AVBD atanga May 8, Zirtawpni-a thisen pe tura ngenna awm chu tihhlawhltin ngei ni se an ti a ni.
———–
Vawiin May ni 8, Zirtawpni hian Aizawl khawpui chhunga Pentecost Kohhran thalai pawl City PYD te chuan Aizawl City PYD Co-Ordination Committee ruahmanna angin Civil Hospital, Aizawl Blood Bank a dah turin thisen an pe.
Association For Voluntary Blood Donation (AVBD) General Headquarters atanga thisen pe tura ngenna an hmuh angin Aizawl City PYD Co-Ordination Committee chuan May ni 5, Thawhlehni khan Emergency Meeting a nei a, tunlai hrileng avanga punkhawm a remchan loh avangin Bial hrang hrangte pek dan tur darkar hun bi siamin; a thawhkhat nan Pastor Bial 7 ten hetiangin an pe.
Dar 10 :00am ah Chaltlang bial leh Bazar Bial
Dar 11:00am ah Thuampui bial leh Headquarters Bial
Dar 12:00noon ah Hunthar bial leh Upper Republic Bial
Dar 1:00pm ah Chawlhhmun Bial
Thisen pek thawhkhatnaah hian Mipa 81 leh hmeichhia 13 ten avaiin unit 94 an pe thei a ni.
———–
District hrang hrang rawngbawlna chanchin :
Lunglei District :
LAD Day :
May 10 Pathianni hi LAD Day a ni a, he hun hi Lunglei District LAD hruaitute chuan Local hrang hrangin an hman theih dawn loh avangin Pennet Lunglei kaltlangin Live Programme in a lawmna hun an buatsaih dawn.
General LAD Day lawmna Programme hi Pennet Lunglei LDF Channel leh Youtube lamah Live a ni dawn a, chawhma dar 11 ah programme hi tan a ni ang a, Sist.Lalramchhani Asst.Secretary District LAD chuan a kaihruai ang a, Member-te chibai bukna Sist.Lalramkungi Pachuau, Treasurer District LAD leh Sist.H.Biakngengi, Vice President District LAD chuan an nei ang a, Day thuchah chhiarna Sist.K.Lalremruati Secretary District LAD chuan a nei bawk ang, District LAD President Sist Lalramlawmi Sailo B.W chuan thuchah tawi puanchhuahna a nei bawk dawn a ni. Tin, he hunah hian Sist.Lalduhawmi Chawngthu leh Sist.C.Lalbiaksangi te chuan zaiin rawngbawlna an nei bawk ang.
——–
Sermon live in pechhuak dawn :
Pennet Lunglei chuan LDF Cable Network-ah leh Youtube-a Pennet channel-ah te Sermon Live in an pe chhuak dawn a, he hunah hian hetiang hi thusawi dan tur ruahman a ni.
-May ni 9 Inrinni zan Dar 7:30 P.M. – Rev.C .Vanlalena
-May ni 10 Pathianni chhun Dar 11:00 A.M. – General LAD Day programme
– May ni 10 Pathianni chawhnu Dar 1:00 P.M. – Rev.Ralkapkunga Khiangte
– May ni 10 Pathianni zan Dar 7:30 P.M. – Rev.Lalbiakdika Chawhte
-May ni 16 Inrinni zan Dar 7:30 P.M. – Rev.K.Lalchhuansanga
-May ni 17 Pathianni chhun Dar 11:00 A.M. – Rev.R.Lalrosanga
– May ni 17 Pathianni chawhnu Dar 1:00 P.M. – Rev.PC.Nghakliana
– May ni 17 Pathianni zan Dar 7:30 P.M. – Rev. C.Lalhriatpuia
———-
Member thar :
May ni 3 Pathianni khan Bunghmun Local-ah bialtu Pastor R.Lalengzauva chuan Member thar 6 a Kohhranah a senglut.
————–
Aizawl East District rawngbawlna chanchin :
Tanpuina hlan :
Tun hnaia Mizoram hmun hrang hranga Thli leh rial bakah leimin-in a tihchhiat Kohhran chhungkua te hnenah District Superintendent Relief Fund atangin tanpuina hlan a ni.
Rial tla in Hliappui khuaa In tam tak a denchhiat tanpuinan April 25, Inrinni khan Hliappui Church Board Committee leh District Hruaitute ruahmanna angin Rs 60,000/- Hliappui Village Council hnenah hlanin tanpuina hi Rev Biaksangzuala, District Superintendent chuan a hmunah kalchilhin a hlan. Hliappui Sunday School Hall chung, rial-in a tihchhiat tanpuina atan District Sunday School pawhin Rs 20,000/- Hliappui Sunday School hruaitute hnenah Evan Hr. Lalrindika, District Sunday Schhol Treasurer chuan a hlan nghal bawk.
April 21, Thawhlehni khan tun hnaia thli tlehin a tihchhiat Sesawng hmuna Kohhran chhungkua engemaw zat hnenah tanpuina hi hlan an ni bawk a, Rev Biaksangzuala, District Superintendent-in Sesawng hmunah hian kalchilhin a hlan.
April 21, zingkarah khan Bawngkawn Chhim Venga cheng, Muthi hmuna Ar vulhna nei, thli tlehin Ar In a tihchhiat bakah Ar engemaw zat an thih avangin tanpuina Rev Vanlalfela Ramtiam, District Secretary chuan a hlan bawk. Heng bakah hian tun hnaia Darlawn hmuna leiminin an In a hnawl sak chhungkuate hnenah April 26, Pathianni khan Rev VL Hnemtluanga, District Treasurer chuan tanpuina a hlan bawk a ni. Tunah hian District Superintendent relief fund-ah hian mi thahnemngai ten sum engemaw zat an chhunglut tawh a ni.
——–
Charge in hlan :
Aizawl East District Board kumin March 9 atanga 12 chhunga neihin District hnuaia Department hrang hrang Kum 2020-2021 hruaitu a ruat tharte chuan April 17, Zirtawpni khan District Committee room-ah charge inhlanna hun an hmang.
He hun hi Rev Biaksangzuala, District Superintendent chuan kaihruaiin fuihna thu chah a sawi. Charge inhlanaah hian District hnuaia Department hrang hrang PYD, Sunday School, Missions Department te chuan charge inhlanna hi neiin LAD erawh Financial changtu ten charge inhlanna hi an nei thung a, remchang hmasaberah OB dangte hian charge inhlanna hi an nei leh dawn a ni. Charge inhlanna-ah hian Rev VL Hnemtluanga, District Treasurer thar chuan Rev Vanlalfela Ramtiam hnen atangin charge a la bawk. Kohhranpui hruaitu dang Superintendent, Rev Biaksangzuala leh Secretary, Rev Vanlalfela Ramtiam te chuan April 14, Thawhlehni khan charge an lo la tawh a ni. April 14, Thawhlehni vek khan Rev Rosanga Kawlni, District Superintendent kalchhuak tur chu Staff Welfare te hian thalahna hun an hmang bawk a ni.
District PYD hnuaia Sub-Committee peng hrang hrang hruaitu te pawhin April 24, Zirtawpni khan charge inhlanna hun an hmang. He programme hi Rev Biaksangzuala, District Superintendent chuan kaihruaiin fuihna thuchah a sawi a, Charge inhlanna neih zawh hian hruaitu thar leh District PYD OB te hian Sub-Committee peng hrang hranga Committee member tur ruatna an nei chhunzawm nghal a ni. Tunah hian District PYD hian Sub-Committee peng panga- Kumpuan, Education, Environment, Fund Raising leh Music & Sound a awm mek a ni.
———-
Baptisma leh Nauhlan rawngbawlna :
April 18, Inrinni khan Chhingchhip bial, Thentlang Kohhrana lawi turin member pakhat chu Bialtu Pastor PB Chawngtinliana chuan sual ngaihdamna baptisma a chantir a, nau pahnih a hlan nghal bawk.
April 11, Inrinni vek khan Zokhawthar hmunah mi pakhatin Evan Lalamena kutah sual ngaihdamna baptisma a chang bawk.
May 3, Pathianni khan Bazar bial, District Hqrs. Kohhranah Bialtu Pastor Rev HL Thakunga chuan mi pakhat sual ngaihdamna baptisma a chantir a, May 4, Thawhtanni vek khan Rev Biaksangzuala, District Superintendent chuan District Hqrs. Kohhran ami mi pakhat sual ngaihdamna baptisma a chantir bawk.
——–
Aizawl East District Missions Department hriattirna :
1. Covid-19 avanga hma lak mumal theih a nih loh avangin Home Missionary te May thla chhung chawlh vek tura tih an ni. Boruak en in rawngbawl theih hun la ngaihtuah leh a ni ang.
2. Sis Sangkhumi B/W, Daido hmuna awm erawh District PYD hmalakna bik a nih avang leh an chet sawn a remchan loh avangin awm chhunzawm tura tih a ni.
3. Dulte, Lungchhuan, Zote, Champhai Dinthar khuaa Home Missionary te In luah man April thla chhung pek an ni ang.
4. Hripui avanga District hruaituten Missionary support zawn chhunzawm theih tak loh avangin Support la zawn lohna Bial leh Local-a Support lo zawng turin Bialtu Pastor leh Bial Missions Department hruaitute ngen an ni.
5. District Budget theih ang anga chhung lut turin Bial Missions hruaitute ngen an ni.
6. District Office-a sum thehlut turten Bro K.Lalbiaknunga hnenah thehluh tur a ni.
7. Bank kaltlanga sum theh lut duh tan District Missions Bank Account- Mizoram Rural Bank, Chanmari Branch- A/c No 97007343258, IFSC Code- SBIN0RRMIGB
8. General Missions Field tam tanpui nan Rs 10,000/- pek a ni.
9. District Superintendent Relief fund-ah Rs 5,000/- pek a ni.
Evan Lalramzauva
Missions Secretary
——
Aizawl East District Sunday School Department hriattirna :
1. District Sunday School inkaihhruaina dan bu siam tur atana rawtna leh duh dan nei bial te chuan June thla chhungin kan rawtna neih ang angte District hruaitute hnenah felfai taka thehluh ni se.
2. Lock Down avanga Sunday School zirlai kan zirtheilo chu District Sunday School chuan pawi a ti hle a, chutih laiin Tualchhung thenkhat ten Social Media kaltlanga Sunday School zirlai anlo zir chu lawmawm a ti hle a, Social Media kaltlanga la zir velo te pawn zir ve ngei tura hmalak ni se. Tin, Social Media kaltlanga zirve theilote pawhin mahni in lam theuhah chhungkuaa Sunday School zirlai zirho hram ni se.
3. Lock Down chhung hian inkhawm a awm loh avangin Sunday School thawhlawm khawn theih a ni lova, chuvangin chhungtin ten Sunday chhung inkhawm kan neih-ah hian thawhlawm lakhawma dah that ni se, Sunday School neih leh hmasak berah chhungtin ten kenkhawma Tualchhung Sunday School Treasurer te hnenah pek ni se.
Evan C.Laltanpuia
Secretary
——-
District din champha :
May 8, Zirtawpni kha Aizawl East District dinchampha vawi 26-na niin Kohhran chuan ni pawimawh-ah puangin he ni hian Aizawl East District Office chu kum dangah khar thin a ni a, kuminah erawh Office tul pawimawh avangin khar a ni lova, Thawhtanni-ah Office chawlh hi sawn a ni.
Aizawl East District hi N.E.India District pakhat ni turin May ni 8, 1994 khan Bethlehem Veng UPC Biak inah Rev. K.Satinvela, khatih laia Gen. Superintendent UPC-NEI chuan ropui takin a hawng a ni. Rev H.Vankunga, General Secretary chuan Executive Board-in District hruaitu atana a ruatte puan chhuahna nei nghal in District hruaitu thar te chu :
Dist. Superintendent :Rev. R.Lalrinsanga
Dist. Secretary : Rev. R.Hrangvunga
District Treasurer : Rev. C.Vala te an ni.
Dist. Conference hmasa ber chu Zemabawk Playground-ah Feb 23-26, 1995 khan neih a ni a, thupuiah ‘Chanchin Tha puan darh’ tih hman a ni.
Tun dinhmuna Aizawl East District hruaitute:
Superintendent: Rev Biaksangzuala
Secretary: Rev Vanlalfela Ramtiam
Treasurer: Rev VL Hnemtluanga
Missions Director: Rev R.Lianzama
Sunday School Director: Rev HL Thakunga
PYD President: Rev C.Lalmalsawma
LAD President: Sis Zionparmawii B/W te an ni.
Aizawl East District hian a din tirh atangin Pathian hnen ata malsawmna nasa tak a dawng a, tunah hian District chhunga Pastor Bial 31 a awm mek. Kum 2019 District Conference report bu atanga a lan danin Kohhran member 25,756 awm mekin Kohhran chhungkua 5633 awmin Kohhran hi khaw 187-ah a ding mek a, tunah hian Preaching Point 11 a awmin; rawngbawlna License kawl mi 222 an awm mek bawk.
Aizawl East District hi a dintirh chuan Office mumal pawh nei lovin hmun hrang hrangah mi In luahin an awm kual thin a, tunah chuan Kohhran mipuite leh Pathian malsawmna avangin Ramhlun South, Aizawl-ah Office tha tak neiin tunah hian Building sak hna pawh chak taka thawh mek zel a ni bawk. Kum 2019 khan Aizawl East District hian a kum 25-na, Silver Jubilee chu ropui takin District Building chungah a lo lawm tawh a ni.
——-
Bial thar hawng :
May 6, Nilaini khan Aizawl East District chhunga Bial 31-na ni turin Zemabawk North Bial chu hawn a ni.
Hawnna hun hi Zemabawk Biakin-ah hman niin Rev Vanlalfela Ramtiam, District Secretary chuan kaihruaiin Rev R.Lianzama, Missions Director in hunserh a hmang. Rev Biaksangzuala, District Superintendent chuan Aizawl East District hnuaia Bial 31-na ni tura hawngin thuchah tawi a sawi a, Pathian hnenah hlanna a nei nghal a, Rev VL Hnemtluanga, District Treasurer chuan bial thar tan hian thilpek hlanna a nei bawk. Zemabawk North Bial thar hawnna-ah hian Rev Rosanga Kawlni, Rev R.Laltlankima bakah Zemabawk Bial hruaitute leh Zemabawk Kohhran Church Board hruaitute hnen atangin thusawi ngaihthlak a ni a, Zemabawk Bial atang hian Bial indanna tur thilpek hlan an ni bawk.
Zemabawk North Bial hi Kumin March thlaa District Conference khan Zemabawk Bial atanga indan tirin hawn ni se alo ti tawh a, tichuan District Board-in bawhzuiin Zemabawk Bialtu Pastor atan Rev Rosanga Kawlni chu a dah a ni. Zemabawk Kohhran chu Bial Hqrs.-ah awmin Middle School Veng, Bethel bakah Falkland East te a huam dawn a ni.
———
North Mizoram District rawngbawlna chanchin :
Pentecostal School of Ministry :
May ni 6 Nilaini dar 11:30 khan NMD Pentecostal School of Ministry (PSM) Commitee chu Kum 2020 Session-a PSM kal pui dan tur thlirin North Mizoram Distict Office, Supdt. Chamber-ah Meeting an nei.
Meeting hi Dist Supt Rev. Laltluangan kaihruaiin; Covid 19 in khawvel a chawhbuai mek karah PSM zir hun June thla a lo hnaih leh tak avangin PSM kalpui dan tur an thlir a. Meeting-ah hian Registration Day hman dan tur ngaihtuahin, Registration Day Programme tlangpui an duang a, Registration Day hman hun tur erawh Committee OB ten boruak thlir chungin ruahman siam se an ti.
—-
Tanpuina hlan :
covid 19 hripui leng avanga kohhran huang chhung mipui te chhawmdawl nan NMD Officer meeting chuan ngaihtuahna sengin Bial chhunga Kohhran chhuanchham awmte chawm dawl nan Bial tinah Rs 10000 theuh a sem a. Tanpuina sum te hi Bial te hian an hmang tangkai hle.
Hetihrual hian NMD Missions Dept te pawhin Home Missions Field tinah inkharkhip avanga chhawmdawl ngai awmte chhawmdawl nan Field tinah Rs 5000 theuhin a sem bawk.
——-
Office kal :
Hripui leng avanga Inkharkhip karah Mizoram sorkarin dan a siam zawm chungin North Mizoram District Office chu kar kalta thawhtanni April ni 27 atang khan Account Section lam ten Office an kal a, Office kal tur pawh detailment siam niin; nikhat kar danah Office hi kal thin a ni. District hruaitute’n ruahmanna an siam angin; Office kal dan hi inkharkhip tura sorkarin a ruahmanna a siam May ni 17 thleng a awh dawn a ni.
——-
Pastor transfer & Posting :
North Mizoram District chhunga Pastor lakthar leh awmna hmun sawn ten tluang takin an awmna hmun an thleng.
May ni 1 Zirtawp khan Durtlang bial enkawl tura District Board in a rel Rev PC Lalfela leh a chhungte chuan a bial awmna Aibawk bial chhuahsanin Durtlang dam takin an thleng.
Pastor PC Lalfela hi Durtlang Bial board members leh Mualveng Church Board member ten an lo hmuak a. An chhungkua leh an mahni thlahtute tana zanriah an lo buatsaihsak chu hlim takin an kil ho. Durtlang Bial te hian hun eng emaw chen hun khailak thil atangin bial Pastor nghet an nei lova, Bialtu Pastor duhawm tak an nei hi an lawm hle a ni.
North Mizoram District Kumtir Board-in Pastor atana a lak thar Pastor PC Lalrokima leh a chhungte te chuan an awmna hmun tura District board in a rel angin May ni 2 Inrinni khan Aibawk khua chu dam takin an thleng a. Pastor PC Lalrokima hi Aibawk Kohhrante’n hlim taka lo lawmin, lawmthu sawina inkhawm tawi neih a ni bawk.
——–
North Mizoram Distrct PYD te chuan April 24 khan NMD Office- Supt. Chamber-ah Executive Committee neiin Meeting hi District PYD President Evan J. Vanlalruatan a kaihruai. Dist PYD Exe meeting hi District Puipa pathum ten an ho.
Meeting rorel pawimawh zual zingah District PYD Board neih hun leh agenda tur chungchang sawiin, District Board neih hun leh agenda tur hi hripui avanga Mizoram Inkharkhip anih vangin 0B ten remchang hmasa ber lo ngaihven mai se tha an ti.
Music Committee atanga lehkha lut chungchang ngaihtuahin, Music committee ten Music video siamna sum an indaihloh avangin Dist ah Rs 30000 an dil, sum balance atanga pek an rem ti, hei hi District Board approve tura ruahman ni se an ti bawk.
Kawrthah Biak in sak mek chungchang sawiin Kawrthah Biak in sak mek thlir ho a ni a, remchang hmasa berah 0B ten ahmunah tlawhin hmalak zel dan tur te thlirpuiin ruahmanna siampui ni se tha an ti.
Executive Board hmasain Bial leh local tam thei ang berah HIV Awareness campain OB ten neih ni se a tih chu
0B ten tour programme lo siam se, a ranglama tih hlawhtlin ni se tha an ti.
PYD Committee Peng Audit hun tur relin District PYD hnuaia committee peng hrang hrang te sum dinhmun chu April 30 khan Dist. Commtt room-ah District OB ten audit hna an thawk a ni. (Pic. Dist. LAD Exe)
——-
April 28 chawhma dar 11 khan NMD LAD Exe Meeting Dist Office Supdt chamber ah neih a ni.
Meeting hi Dist LAD President Sist Lalhmachhuani BW in a kaihruai a. Meeting hi Dist Hruaitu 3 ten an ho bawk. an rorel pawimawh zualte:-
1. Kum chanve dist LAD Board neih hun tur relin remchanlohna a awm loh chuan June ni 10 chawhma dar 11:00 chu ruat a ni a, a hmun atan Dist Hqrs Kohhran Biak in, Tuikhuahtlang nise tih a ni
2. Kum 2020 chhunga Dist LAD hruaituten bial an fan dan tur ruahmanna siam a ni bawk.
3. Kum 2020 LAD Day hi boruak awmdan a zirin Dist LAD Hruaituten Kolasib Venglai Bialah LAD day hman an rel a, Kol Venglai Bial hi kumina Dist LAD Conf neihna hmun tur a ni bawk. (Pic. District LAD Exe)
———–
Member thar :
1. April ni 22 Nilaini khan Evan. PC Lalramchhuanmawia rawngbawlna Luimawiah rawngbawltu rawngbawlna kaltlangin mithar 2 in Sual ngaihdamna Baptisma Lal Isua hmingin an chang. Baptisma rawngbawlna hi Bialtu Pastor K.Malsawmkima’n a nei a ni.
2. Kolasib project VENG Biak In ah May ni 3 Pathianni zing khan Rev. B Vanlalruata Kolasib Venglai bialtu Pastor chuan chhungkaw khat Member 3 Presbyterian Kohhran atangin Seng lutin an nupain Baptisma a chan tir a, hemi rual hian nau 2 hlanna a nei nghal a ni.
——–
Quarters sa :
Bilkhawthlir Bial hmalaknain an Bial chhunga awm N. Thinglian Tirhkoh Quarters chu sak sak a ni a, Quarters sak hna hi Bialin hnatlanga hun engemaw chen an lo beih tawh hnuah May ni 1 Zirtawpni khan Tirhkoh Quarter Bilkhawthlir Dawrveng Pentecostal Men’s Fellowship te chuan luah theihin an sap um ta a ni.
Facebook