Pennet News Service : May 24 – 31

UPCNEINEWSSERVICE MAY 24-31.2020
———
Pentecost Day :
May ni 31, Pathianni hi zirtirte hnena Thlarau thianghlim lo thlenna ni Pentecost Day a ni a, kum dang angin hman theih ni lo mahse General Suptd Rev. Lalmalsawma Sailo chuan India hmarchhak huamchhunga Kohhran hote duhsakna chibai bukin; chhung tin ten urhsun leh tihtakzetin kan chhungkua theuhvah Thlarau thianghlim a lo thlen ngei theihnana Lalpa hnena inhlan tharna hun buatsaih tur leh he hun lawmawm tak hi hlim tak hmang theuh turin duhsakna a hlan a ni.
——–
Syllabus Meeting :
Calvary Bible College (CBC) chuan May ni 17, Nilaini khan Syllabus meeting vawi 14-na an thukhawm.

Meeting hi May thla chhunga zawh hman tum niin, vawi 15 vel meeting nei tura ruahman a ni a, zing dar 10:30 ah tan thin niin, tlai dar 4:30 thleng neih thin a ni.

Syllabus meeting ah hian District Bible School, BTh Programme leh BD Programme hawn thar tur syllabus chu ruahman a ni a, syllabus revision hi Theological Education Board ah approve leh tur a ni ang.

Calvary Bible College (CBC) a zirlaite hi tunah chuan an mahni in lamah an haw deuh vek tawh a, Odisha, West Bengal leh Bangladesh a zirlai te an vaiin mi 4 an la tangkhang rih a ni.
———
Zonet ah Kohhran programme :
May ni 25, Thawhtanni khan Zonet Cable Tv te chuan Zonet Rinna channel-ah Kohhran programme tam leh zual a chhuah theihnan tiin meeting an buatsaih a, Kohhran aiawhin Media Cell Secretary Bro. R. Lalbiakfela, chu meeting ah hian a kal a ni.

Meeting hi Zonet Director LV Lalthantluanga’n a kaihruai a, hripui leng avanga Kohhran programme hrang hrang neih a harsat avangin zonet Cable tv kaltlanga Kohhran tana hun tam zawk siam a nih theihnan tiin Zonet Rinna channel chu Kohhran pual programme chhuah na atan chauh ni tawh se tiin ruahmanna an siam a, June ni 1, Thawhtan atangin he programme hi a function tan ang.

Zonet Rinna channel ah hian Kohhran hrang hrang 5-UPC North East India, Baptist Church of Mizoram, Roman catholic, Seventh Day Adventist leh Mizoram UPC ten programme an nei tlang dawn a, kan Kohhran programme hi nitin zan dar 8-9,zing dar 1-2, dar 6-7, chhun dar 11-12, chawhnu dar 4-5 inkarah te  a chhuak thin dawn a ni. Programme chhuah hun hi thla tin darkar khatin a tawlh hma thin ang.

May ni 27, Nilaini khan UPC North East India Media Cell Chairman Rev. R. Lalhawia leh Zonet Director Pu Lv Lalthantluanga ten inremna thuthlung ziakin an nemnghet a, June ni 1, Thawhtan zan atangin he programme hi tihchhuah tan a ni ang.

LPS 12 channel-a Kohhran programme kal lai pawh June thla atang hian darkar khatin a tawlh hma dawn a, tlai lam dar 5-6 inkar atangin Programme a chhuak tan ang.   )
———-
District hrang hrang rawngbawlna chanchin :

North Mizoram District :
May ni 13-a Rengdil, Zamuang leh Sihthiang khuaa mihring chenna in engemaw zat  Rial leh thliin in a tihchhiat chungchangah North Mizoram District chuan Rengdil   khawtlang hruaitute hnenah chhawmdawlna sum  Rs 130,000 May ni 22 zirtawpni khan a hlan.

Chawmdawlna sum hi North Mizoram District Treasurer Rev.K.Lalduhsanga’n hlanin. Rev. K. Lalduhsanga hi Rengdil bialtu Pastor C.Lalthlengliana, Evan C.Laltanpuia bial treasurer leh Upa Rohnuna Bial Missions Director bakah Upa James Lianmawia Rengdil kohhran Secy. Ten an lo tawiawm a, Rengdil Khawtlang hruaitute pawh an lawm hle.

Zamuang leh Sihthiang khuaa chawmdawl ngaite pek tur sum hi  District aiawhin Rengdil bialtu Pastor C.Lalthlengliana’n Zamuang khaw tan Rs 70,000 leh Sihthiang khaw tan Rs 9,000  a hlan bawk. Pastor C. Lalthlengliana hi Evan C. Laltanpuia bial treasurer leh Zamuang kohhran upa ten Bialtu Pastor C.Lalthlengliana hi an tawiawm bawk a ni.
——–
District Missions Exe Comtt :
North Mizoram District Missions Conference rorel bawhzuiin May ni 25 thawhtanni khan North Mizoram District Mission Dept. huaihawta Missionary Convention leh Missionary challenge neih tur chungchangah Aizawl khaw chhunga Bial Missions Director te leh District Missions Exe Committee member te an thukhawm.

Meeting hi District Missions Director Rev. C.Lalthantluanga’n kaihruaiin; District Secretary Rev. Chhiarpuia leh Dist. Treasurer Rev. K. Lalduhsanga ten an ho thei a, Aizawl khaw chhunga Bial hrang hrang Durtlang, Chaltlang, Headquarters, Tlangnuam, Dinthar, Hunthar leh Chawlhhmun Bial Director te an kim vek bawk.

District Missions Exe Committee leh Aizawl khaw chhunga Bial hrang hrang 8 te rorel chuan North Mizoram District Missions Dept. te huaihawta kumin  2020 chhunga Missionary Convention leh Missionary Challenge neih tur chu ngun taka thlirin ngaihtuahna an nei a, Covid 19 hripui lengin zual lam a pan zel avangin; tun dinhmunah chuan fimkhur ngaih thuah tih hrih loh phawt ni se. boruak thlirin hotute’n ngaihtuahna lo siam mai se an ti.
——
Thilpek pe :
Mamit Bial Pastor Qtrs ah  tui dahkhawlna atan Pu Sam s/o S. Hiato , Chaltlang te chuan  Zo Plast 2000 litres chu Bialtu Pastor Vanlalruata, hnenah an hlan.

Sis Hmingṭhasangi d/o Bro Ngurhlunsanga, Vanghmun, chuan May ni 26 (Nilaini) khan Tlangsang Bial Pastor Quarters-a phah tur Carpet man Rs. 10000/- a hlan. Carpet man hi Upa Rinkima of Tlangsang kaltlangin Bialtu Pastor K. Ainawna’n a dawng a ni.
———
Member thar :
May ni 24 Pathiannni khan North Mizoram District, Rengdil Bial chhunga awm, Bajirung Home Missions Field-ah Hindu sakhua atangin mi thar  chhungkaw 1, member 4 awmna te chuan Pathian thuthlung hmuin Pentecost Kohhranah an lut.

Hemi chungchangah hian Bapjerung Missionary Esther Lalrawngbawli’n lawmthu sawiin; Missionary te tana thilpek petute leh ram lak rawngbawlna kawngah tawngtaia Missionary te an lo tawngtaipuina rah a ni tiin; lawmthu a sawi a ni.

May ni  24, Pathianni vek khan Tuikhuahtlangah member pakhat chuan Pentecost Kohhran rawn zawmin Dist Hedquarters Bialtu Rev. C. Lianchama’n an chenna inah Lalpa Isua hmingin Kohhrana sengluhna hun a hmang a ni.

May ni 18 Thawhṭanni  khan Kawnpui Venglaiaah chhungkua, member 3 te chu UPC (NEI) kohhrana lawi turin Kawnpui Bialtu Pastor Rev. PC. Laltlankima chuan Lal Isua hmingin a seng lut.
———
Missionary chawmna :
May ni 24, Pathianni khan Reiek Bial, Ailawng Kohhran member naupiang thar Bro. Malsawmnadawnga chu Reiek Bialtu Pastor Rev. P. Vanlalfela’n an chenna inah Pathian hnenah hlanna a nei.

Hetihrual hian naupiang thar Malsawmnadawnga hmingin Nausen Nu leh Pa te chuan Bialtu Pastor hnenah Missionary chawmna tur Rs. 6000 an lo hlan nghal bawk.
————

Chhimtuipui District :
May ni 27, Nilaini khan Chhimtuipui District Ladies Auxiliary Department  President Sis. T. Lallianmawii, Bible Women, Secretary Sis T.T. Duhtinthluaii, leh Pi L. Nitei, Treasurer  te chuan District LAD hmingin Siaha town chhunga   Quanrantine  facilities a khunghran mek te hman turin RIZAI 11 chu Quarantine facilities viltu DC Office-a officer   Pu H. Zonunmawia, Election Officer  leh Pi. B. Malsawmtluangi, SDO (S) te hnenah an hlan.

State pawna tangkhang lo haw,  Siaha town chhunga Quanrantine facilities a khunghran mek  te zingah hian Siaha town  pawn lam mi, thingtlang khaw hla taka awm ; mutbu lo ngaihtuahsaktu tur  chhungte neih  remchang lo an awm nual a.  Sawrkar tan pawhin han lei mai tur a lo awm tawh bawk si lo va, chutiang boruak kara District LAD ten rem hre taka hetiang thil thlawnpek an lo hlan hi quarantine facilities viltu officer te an lawm  tak zet a ni.

Tunlai hrileng avanga harsatna tawkte tanpuina atan Chhimtuipui District chuan District chhunga bial leh local hrang hrang tan tanpuina a semchhuak mek zel a.

District kohhranpui chuan  Mara Autonomous District Council, Chief Executive member hnenah  ah Rs.10000/- leh Lai Autonomous District Council, Chief Executive Member hnenah Rs.10000/- ṭanpuina an hlan a,  Bial leh Local thenkhan pawhin DLTF & VLTF te hnenah an lo semchhuak tawh bawk.

Siaha college veng local PYD chuan volunteer in Govt Saiha College a quarantine mekte eirawng bawl sakin, khawpui chhung local hrang hrang PYD tepawhin aremchan dan angin quarantine te eirawng bawl leh ṭangkai theihna anneih chuan anin hawng reng bawk.

Chhimtuipui Dist committee room leh Guest room  te chu quarantine na tur hmun atana hlanin he hmuna awmte hi Dist Hqrs LAD ten volunteer in eirawng anbawl sak dawn a ni.
———-
Member thar :
1. May ni 24, Pathianni khan Siata Bethlehem local ah  member 2 Pentecost Kohhrana lawi turin sengluh an ni. Member thar te hi  Evan Z Sangliana local chairman chuan Kohhranah a senglut.

2. May ni 26, Thawhlehni khan Siaha Council Veng local ah chhungkaw khat, member 3 te chuan Pentecost Kohhran rawn zawmin Kohhran upa ten sengluhna hi an inah an hmang.
——

Charge in hlan :
Chhimtuipui Dist PYD hruaitu atan a ruatthar Evan Robert B Lalnunsiama T – Vice President, Rbt LS Lalhmingmuana – Asst Secretary, C Lianhmingthanga –  Financial Secretary leh Dist PYD Kumpuan hruaitu tharte chuan May ni 26, Thawhlehni khan charge an inhlan.

He hun hi Evan K Rinthara President Dist PYD in akaihruai a, Dist superintendent Rev Joseph L Thlauhthang’n fuihna thu sawiin an hming lamin, ṭawngṭai sakna anei.
——–

Aizawl East District :
May 25, Thawhtanni khan Aizawl East District hnuaia Revival Committee chuan District Superintendent room-ah Committee an nei. Rev KVL Hmangaihkima, Chairman chuan meeting a kaihruai.

He hunah hian Revival speaker lak dan tur chungchang sawi hovin, hri leng avanga lock down kalpui mek a nih avangin tun hunah chuan Revival Speaker lak rih loh mai ni se, remchang hmasa berah District hruaitute nen inbe rawnin lak mai ni se an ti a ni. Aizawl East District Revival Committee hruaitute leh memberte lo tarlang ila:
1. Rev KVL Hmangaihkima, Chairman
2. Evan K.Vanramngaia, Secretary
3. Rev VL Hnemtluanga, Treasurer
4. Rev Biaksangzuala, Dist. Superintendent
5. Rev Vanlalfela Ramtiam. Dist. Secretary
6. Rev R.Lianzama, Missions Director
7. Rev HL Thakunga, Dist. S.S Director te an ni.
———-
Baptisma chang :
May 21, Ningani khan Chhingchhip Bial, Chhingchhip Hqrs. Kohhranah Bialtu Pastor, Rev PB.Chawngtinliana chuan mi 3 sual ngaihdam baptisma a chantir a, an zinga pakhat hi Kohhran dang atangin a ni.

May 24, Pathianni pawh khan Bazar Bial, Chhinga Veng Kohhranah Bazar Bialtu Pastor, Rev HL Thakunga chuan mi 1 sual ngaihdam baptisma a chantir bawk.
———
Dist Suptd Programme :
Aizawl East District Suptd Rev Biaksangzuala chuan May 29, Zirtawpni khan HnahlanHqrs. Biakin sak that tur lungphum phumin rawngbawlna a nei.