UPCNEINEWSSERVICE MAY 16-30.2021
———-
UPC North East India Kohhran Office-te Covid 19 hrilengin zual lam a pan zel avangin khar rih a ni.
Covid-19 hrileng a hluar chhoh zel avang leh Mizoram Sawrkarin inkharkhipna a kalpui mek thlawpin April ni 20 atang khan UPC North East India General Headquarters Office, Mualpui Salemveng Aizawl leh District hrang hrang a Kohhran Office thenkhatte chu khar chhunzawm zel rih a ni a, Office hawn leh hun emaw khar zel thu emaw chu Sawrkar thuchhuak ngaichang chunga siam a ni ang.
———-
General Missions:
April ni 23 pentecost day ni khan Assam Missions Field ,Gossaigaun Section, Hurkum Local church atangin Hindu chhungkaw 2 , member 8 awmna chu UPC North East India member niturin Bialtu pastor in a lawm lut a, mi 4 ten Isua hmingin Baptisma changin, Naupang 4 Isua hnenah hlanna a nei bawk. Hurkum Kohhran hi April 2021 a ding tan niin tunah hian members 50 an awm tawh a ni.
———-
UPCI General Conference 2021 :
Kum 2021 UPCI General Conference programme tur tih chhuah a ni ta a, thupui atan Beyond tih hman tur a ni. Oct ni 5 atanga ni 8 chhung hian Indiana Convention Center Indianapolis ah neih tur a ni dawn a, registration hawn mek a ni.
Conference hun chhung hian a tlangpuiin chhun lamah rorel inkhawm leh seminar te, rawngbawlna chak zawk neihna tur atana sawi hona hun te an buatsaih thin a. Thalai leh Nu ho pawl lamin programme an nei thin bawk. Zan lamah a nawlpuia inkhawm programme siam chhunzawm thin a ni.
Kumin hian kum dang ang lo takin Global Missions Director Rev. Bruce Howell chu Children Ministries Service a thusawi tura ruat a ni.
———–
Conference Speaker tur te :
TUESDAY, October 5, 2021
7:00 pm North American Missions Service –
Speaker: Jim Blackshear
WEDNESDAY, October 6, 2021
7:00 pm Global Missions Service –
Speakers: Ryan Crossley, Jack Cunningham, and Tes Stewart
THURSDAY, October 7, 2021
Noon – 2:00 pm Children’s Ministries Service –
Speaker: Bruce Howell
7:00 pm General Superintendent’s Message –
David K. Bernard
FRIDAY, October 8, 2021
Noon – 2:00 pm – Youth Service –
Speaker: Dan MacLeod
7:00 pm General Conference Service –
Speaker: Joshua Herring
———-
Zan khatah mi 1000 chuangin Thlarau Thianghlim Baptisma an chang :
Hri pui lengin ram tin kil tin a fan vel lai hian, *Thlarau Thianghlim leh a hnathawh pawhin chawlh zai a rel tur a ni bik lo* tia a theih dan kawng awm ang ang dapa pen chhuak America rama Pentecost Thalai rawngbawlna a ropui takzet.
UPCI Youth Ministries (Thalai pawl) peng pawimawh tak Apostolic Youth Corps (AYC) hmalakinain nimin May ni 23, Pathianni zan khan America rama Wisconsin state chhunga khawpui pakhat Milwaukee-a infiam mite tualzawl (UWM Panther Arena) ah Save our Nation tih thupuiah hmangin inkhawm an buatsaih a. He rawngbawlna hian rah ropui tak chhuahin mi 1103 zetin Thlarau Thianghlim Baptisma an chang thar a, mi 72 in sual ngaihdamna Baptisma changin Pathian hnathawh mak thleng avanga damna chang mi 17 lai an awm bawk. Lalpa fakin awm rawh se.
AYC team-te hian hripui leng karah pawh nise tiin kumin hian America khawmualpui chhung heng hmun hrang hrangah te hian rawngbawlna nei turin ruahmanna an siam :
– Anchorage, Alaska
– Billings, Montana
– Clearwater/Tampa, Florida
– Detroit/Dearborn, Michigan
– Fresno, California
– Ft. Lauderdale, Florida
– Hawaii
– Los Angeles, California
– Miami, Florida
– Milwaukee, Wisconsin
– Pensacola, Florida/Atmore, Alabama
– Salt Lake City, Utah
– San Marcos, Texas
– Santa Barbara Coast, California
– South Dakota
Tin, Global Missions hnuaia Benin ramah rawngbawla fehchhuah an la tum cheu bawk.
———-
———-
CHHIMTUIPUI DISTRICT
HRIATTIRNA
May ni 24 2021 (Monday) a Chhimtuipui District Official meeting chuan, June 2021 a Apostolic Bible School kal tura lo rel tawh chu Covid 19 hri leng avangin sawn hlat tha a ti a. A hun tur hi Apostolic Bible School Board neih leh hmasa ber a, ngaihtuah atan a dah a ni. ABS a kal tur, Local Church recommend na fel tak nei, la interview lo te tan pawh interview hun siam sak an ni bawk ang.
Rev.W.L Thanghre
District Secretary
———-
BUALPUI NG BIAL NEWS
Bualpui NG Bial chhung a local hrang hrang te chuan Myanmar ral tlante pualin chhawmdawlna thil pek an la khawm.
Bial chhung local hrang hrangah thawhlawm lakkhawm ṭhin niin, local tina upa ten an bial ṭheuh fangin Kohhran an tlawhchhuak mek zel a. Aṭul angin thawhlawm lakkhawmna neih ṭhin ani.
Dist Home Mission field Ṭialdawngilung field Biak In chu sak mek niin, Kohhran ten ṭhahnem ngai takin an thawk ṭhin. Ṭialdawngilung field ah hian Evan G Lalnunzira chu field worker niin, door to door crusade leh ṭawngṭai rawngbawlna anei ṭhin.
Local news:-
1. Bualpui NG Local: Kohhran ten Biak In Ceiling siam ṭha in, structur hmang in ceiling siam mek zel niin, puloit hnung design leh light decoration pawh aṭha thei angbera siam tum mek ani.
Tin, Kohhran chhungkua Bro. Zothansanga In sak chu Kohhran member ten hnatlang in anpuih bawk ani.
2. Vawmbuk local: Kohhran ten Biak In sa in hnatlang an thawk ṭhin. Tunlai hian Biak In chhuat chhung hnatlang an thawk mek ani.
———-
Vartek home mission field report:
Chhimtuipui District home mission field zing a pakhat Vartek/Tuipui D home mission field Kohhran hi South Lungpher Bial chhung a awm niin, Kum 2009 June ni 5 khan Sangau Bial PYD hmalakna a din a ni.He mi kum vek 5/12/2009 khan Biak buk tundin nghal a ni. Kohhran member pawh an pung chak hle a tun dinhmunah member 62 awmin chhungkua 13 lai an awm tawh ani.
Kum in 2021 chhung hian an target pawh Rs.5735/- in an khum der tawh a, Vartek Kohhran tehian Biak In hi tum 2 lai an tung ding tawh a. Dist aṭang leh pawnlam ṭanpuina tellova Kohhran ten ṭangrual tak a hma anla hi an fakawm tak zet ani.
Nikum 2020 khan sound system ṭha tak neiin, kum in hian Biak In tichangtlung turin project hrang hrang annei mek bawk ani.
———-
———-
NORTH MIZORAM DISTRICT
North Mizoram District Office:
North Mizoram District Office chu Covid 19 hrileng hluar thar leh avanga fimkhur ngai thilah thla kalta April ni 20 atang khan a nawlpuia Office kal chu ti lovin; Hruaitute leh Account Section te erawh a tul huna dawr theihin an in kal chhawk thin. May ni 28 zirtawp ni hian District hruaitute leh Account Section lam te pawh a tula dawr theihin Office an hawng a ni.
———-
Pentecostal School of Ministry:
Pentecostal School of Ministry (PSM) Committee chu may ni 24 thawhtanni chawhma dar 10 khan North Mizoram District Office- ah Meeting neiin; District Supdt. Rev. Laltluanga’n meeting a kaihruai a, hetah hian District hnuaia Pathian thu zirna Kum tin June thlaa neih thin chungchang an ngaihtuah. PSM kal dan tur chungchang chu Committee chuan ngun taka thlirin Hri lengin zual lam a pan mek avang leh sorkar thuchhuak leh boruak te thlir chungin Class kal dan tur chu beng thara ngaihtuah leh atan a dah a ni. PSM zirtirtu zingah Rev. K. Malsawmtluanga chu North East India UPC in Bible zirna a neih Calvary Bible College-a Principal hna a chelh tak avangin; Rev. C. Lianchama chu District Board in zirtirtu atan a lak angin; PSM zirtir hna hi Rev. C. Lianchama chuan a thawk bawk ang.
———-
District rawih tirhkohte’n rawngbawlna kalpui zel:
North Mizoram District-in hun engemaw chen atanga ram lak beihpui a thlak, kum 2021 chhung atana chhun zawmna neihah Evangelist 29 ruaiin; tunah hian heng rawngbawltute hian anmahni hmun theuhah rawngbawlna theih ang angin an kalpui mek zel a, Lockdown chhung pawhin ram lak hna nasa taka thawkin Pathianin an rawngbawlna malasawm hle a ni.
———-
District Building Committee te hmalakna kal zel:
North Mizorma District building Committee hmalakna pawhin hmasawn lam a pan zel a, tunah hian District enkawlna hnuaia sak mek West Phaileng Pastor Quarters tur leh Kohhran Dawr tur chu tluang taka sak chhoh mek zel a ni a. Tin, Kawnpui Quarters pawh Bialtu pastor hmalaknain Quarter chung ber Dynaroof- chu chih zawh a ni tawh bawk; Kawnpui Bialte thawhrimnaah Dist. Hruaitute’n lawmthu an sawi.
Tlangnuam Bial Hqrs. Biak in leh quarters tur pawh District puihna bakah Tlangnuam tualchhung kohhran leh bialte tanhonain tunah hian kawngpui dung zuiin Concrete-a sak mek zel a ni bawk.
———-
District Missions hmalakna kal zel:
North Mizoram District Missions Dept enkawlna hnuaiah Missions Field 13 te pawhin tluang taka hna thawkin; kumin chhungin Missionary te rawngbawlna kaltlangin mithar 130 chuang neih tawh a ni. Ram lak rawngbawlna piah lamah Missionary Quarters sak mek Bajerung Missions Field, Marpara Missions Field, Dilzawl Missions Field, Tumpanglui leh West Phulpui MF-ah te neih a ni. Hei bakah hian Dilzawl leh Tumpangluiah te chuan Sunday School Hall tur an sak mek bawk a, Tumpangluiah leh West Phulpuiah te pawh Concrete in Biak in sak mek a ni bawk.
———-
Mi thar nei”:
May ni 22 Inrin ni khan Tlangsang Bial chhunga sailut II (Sailut Two) khuaa cheng chhungkaw khat member 3, puitling pahnih leh naute pakhat chu hemi khuaa rawngbawla awm Bro. Jonathan Lallawmzela chuan Sailut -1 khua, Missionary Vanlalpeki Quarters ah hruaiin, Tlangsang Bialtu Pastor C. Zoramthara chuan UPC NEI member atan Lal Isua hming in lawm luhna a nei a, nau hlan rawngbawlna an neinghal bawk. Mi thar lawm luhna inkhawm neih hnuah Bialtu Pastor vek hian Isua Krista hmingin Sual ngaihdamna Baptisma a chan tir nghal bawk ani
———-
———-
Aizawl East Distric
Office khar:
Mizoram Sorkarin hripui avanga inkharkhip hun chhung May 24 atanga May 31 thleng a pawhsei leh tak avangin Aizawl East District OB Meeting chuan District Office chu khar chhunzawm zel ni se a tih angin Aizawl East District Office hi May 31 thleng khar a ni ang. Hemi chungchangah hian District Secretary chuan thuchhuah siamin office khar a nih thu hi Office Staff leh Kohhran mipuite kan inhriattir a ni. Office hawn leh hun tur chu la in hriattir leh tur a ni ang.
———-
Lawmthu sawina leh ngenna thuchhuah siam:
Covid-19 hrileng mekah Sawrkarin Lock Down a puan avanga harsatna tawk leh tanpuina ngaite tanpuina turin Bial leh Tualchhung Kohhran hrang hrangte chu an phak ang tawkin an luangchhuak mek zel a, veng chhung VLTF/ LLTF hnena tanpuina Bial leh Tualchhung Kohhran hrang hrang hian an pe chhuak mek zel a ni. Hemi chungchangah hian Aizawl East District OB Meeting chuan Bial leh Tualchhung Kohhran hrang hrang te hnenah lawmthu sawina leh ngenna hetiang hian a siam a ni.
Covid-19 hripui leng thawhhnihna (2nd wave) chuan keini Mizoram pawh nasa takin min tuam mek a, chu hrileng kal lai chhut chah a nih theih nan Mizoram Sawrkar chuan April 20,2021 atang khan inkhuahkhirhna te siamin tunah chuan TOTAL LOCKDOWN hial alo puang ta a. He hri laka humhima kan awm theih nan Sawrkar thu zawma, a theih ang anga Kohhran mipuite kan fimkhur hi a tul tak zet a ni.
He hripui dona atan hian Tualchhung Kohhran leh Bial hrang hrangte pawhin kan phak ang tawka hmala in, VLTF/ LLTF bakah Kohhran chhungkua harsate hnenah tanpuina kan pe thin a ni tih kan hriat hian thinlung takin lawmthu kan sawi a, a theih ang anga chhunzawm zel tur pawhin kan inngen nghal a ni. Chutihrual chuan Tualchhung leh Bial chakna a inchen loh avangin Tualchhung leh Bial in a tih theih bak a awm a nih chuan District Hruaitute hriattir ni se, a theih ang anga in tanpui kan tum dawn nia.
Tawngtaina chhangtu Lalpa Pathian kan nei a ni tih hriain, hri vei mek te an lodam leh thuai a, he hriin a tihbuai chhungkua ten Pathian thlamuanna an lo chan theih nanleh kan ram hruaitute leh Covid-19 laka mipuite kan him theihna tura thawkrim tute tan itawngtai fo thin ang u” tiin.
———-
Pension in chhuak:
Aizawl East District hnuaia Full time Evangelist Evan Lalamena chu Kohhranin Dan a neih anga Kum 60 alo tlin tak avangin May 20, Ningani khan Pension in a chhuak.
Evan Lalamena hi District Full time Evangelist a lak a nih hma hian District Missions hnuaiah hun engemaw chen Tirhkoh ram tlanin rawngbawlna hna alo thawk tawh thin a, Kohhranah malsawmna a thleng nasain, Pathianin a awmpui thin a ni. Kum 2018 February 1 khan District Kohhranpui chuan Full time Evangelist atan a la ta a. Aizawl East District hmun hrang hrangah rawng bawlin, Pathian awmpuina leh malsawmna a dawng nasa a, kohhranah malsawmna tam tak a thleng thin a ni.
District pawn leh chhunga Lalpa rawngbawla amah kal chhuaka a pension ni thlenga rawngbawlna Lalpan mal a sawmnate chu:—
1.Kohhran din zat 13
2.Nau hlan zat 67
3.Baptisma chantir zat 281
4.Member thar sengluh zat 350 te an ni.
Evan Lalamena hi Kum 1961. May 20 khan Vervek khuaah lo piangin Sis HC.Lalchhandami nen May 31, 1991 khan inneiin tunah hian fa 6, mipa 1 leh hmeichhia 5 an nei mek a ni. Tunah hian Bawngkawn Kohhranah a lawi mek a ni.
Evan Lalamena hi tleirawl sual nei lova Pathian rawngbawlnaa inhmang nghal chawt mi a ni a, tawngtai mi niin vanram ngai mi a ni. Lalpa thlarau pawlna nasa taka changin, a vanglai hun hi rawngbawl nan a hmang nasain, Lalpan ram a pe a, member thar tam tak leh kohhran engemawzat Lalpan a pe a ni.
Evan Lalamena Pension ni hi Mizoram Sawrkarin hri leng avanga Lock Down a puan hun lai a nih avangin pension thlahna hun buatsaih theih a ni lova, hun remchang hmasa berah amah thlahna hi buatsaih tura tih a ni.
———-
Pastor Quarters pualin hnatlang nei:
Hnahlan bial PYD board in Pastor Quarters a thuthleng 6 leh dawhkan te chu chei that ni se a lo tih angin May 22, Inrinni khan Bial Pastor Quarters pual hian hnatlang neih a ni. He hunah hian Bial PYD hruaitute leh Hnahlan khawchhunga local PYD hruaitute an thawk chhuak a, Bial Kohhranpui hruaitute chuan lawmthu an sawi a ni.
———-
Mithar leh baptisma chang thar:
Covid-19 hrileng avanga inkharkhip hman a nih chhung pawhin District chhungah Lalpan a ram zauh a thulh chuang lova, mithar leh baptisma chang thar engemaw zat neih a ni.
May 21, Zirtawpni khan Khawhai bial Sialhawk hmunah chhungkaw khat member 5 te chu Kohhranah sengluh an ni a, Pa ber leh Nu ber ten sual ngaihdamna Baptisma chang nghalin an fate pawh hlan nghal an ni. Sialhawk hmunah hian Evan H.Lalremhlua’n rawngbawlna a nei mek a ni.
May 22, Inrinni khan Upper Republic bial-ah Bialtu Pastor, Rev. C.Lalengliana kutah mi 3 in sual ngaihdamna baptisma an chang bawk.
Zohmun bial chhunga Bro.Lalhlimawma S/o Pastor K.Lalhmingmawia leh a rawngbawlpuite rawngbawlna Lalpan mal a sawm zel a. Zohmun bialah hian thla thum vel rawngbawlna hi an nei tawh a ni. Mike Service neiin rawngbawlna hi chhunzawm mek zel a ni. May 16, Pathianni khan mi 4 in sual ngaihdamna baptisma changin mi 20 in sual ngaihdamna baptisma an chang tawh a mithar 6 sengluh an ni tawh bawk a ni. An rawngbawlna atang hian Zu ngawlvei te leh zu zuar te Lalpan an saltanna atanga la chhuakin siamtharna an chang mek a ni. May 9, Pathianni atang khan Mike Service hi neiin thuthlung puanchhuahna neih thin a ni a, khawtlangah indona a awm chho mek zel a ni.
Facebook