———–
General Conference hun sawn :
Corona Virus ( Covid-19) in khawvel pumpui a chawkbuai a, mi tam tak thihna a thlen a, mi zawng zawng a nghawng mêk avangin General Administrative Committee chuan ngun takin boruak a thlir a, kan dan bu-in thla 15 chhungin General Conference hi neih tur a lo tih zulzuiin July 23 – 26, 2020 hi General Conference hun atan an ruahman a ni.
July 23 – 26, 2020 hun chhunga District / Bial/ local program lo duang lawk tawh kan awm anih pawhin lo Kohhran hote lo insiamrem turin min ngen a ni.
He hrileng avang hian Prime Minister of India-in April ni 14, 2020 thleng India ram pumpuia total lock down a puan avang leh Aizawl DC-in thuleh awm hma atana curfew a puan avang leh vantlang hmuna mi 5 aia tam awm khawm a khap avangin Gen Hqrs office Aizawl pawh thu leh awm hma chu khar chhunzawm rih zêl tur a ni bawk.
———
Khawvel pum huapa tawngtai rualna :
March ni 27, Zirtawpni khan Covid -19 avanga khawvel hmun tina harsatna thleng lakiang turin Khawvel pumpuia UPC Kohhran hote a rualin an tawngtai.
UPC International General Superintendent Rev. David K. Bernard hnen atanga hriattira a dawn angin United Pentecostal Church of North East India pawhin he tawngtai rualna hunpui hi a zawm a. UPC North East India General Superintendent Rev. Lalmalsawma Sailo chuan thuchhuah siamin UPC-North East India huamchhunga Kohhran ho zawng zawngte tawngtai runpui buatsaih a ni a. Tawngtai rualna hi chhun lai dar 12.00 ah neih niin, Chhung tinte mahni remchan dan anga he hun hi hmangin UPC International atangin Global Missions Prayer Leader Lisa Marshall chuan tawngtai thupui tur sawm leh pakhat (11) duang chhuakin heng thupui hmang hian khawvel pum huapin tawngtairualna urhsun takin an hmang a ni. Thupui te :
1. Hrileng tawp theihnan.
2. Khawvel puma Krista taksa, A Kohhran tan.
3. Sawrkar thuneitute tan.
4. Doctor, Nurse leh damdawiin lama thawktute tan.
5. Kohhran hruaitute tan.
6. Hrileng kai awlsam bik-hriselna tha lo leh kum upa te tan.
7. Media lama thawktute tan.
8. Ei leh bar, sum leh pai harsatnain dinhmun ngai a awh thuai theihnan.
9. Mipuiten thilphalna kan neih tlan theihnan.
10. Rinna nghet taka kan din theihnan.
11. A mamawh tute hnena thlamuanna leh Krista Chanchin tha hril darh zel a nih theihnan.
————
Tanpuina Cheng Nuai 2 hlan :
March ni 28, Inrinni zing khan United Pentecostal Church of North East India, Administrative Committee inrawnkhawm in a ruahman angin tunlai hrileng mek, Corona Virus, COVID-19 chungchanga hma la tura Mizoram sawrkarin State Level Task Force a din te tanpuinan Rs. 2,00,000/- a hlan.
Tanpuina hi vawiin Inrinni zing dar 7:00 khan UPC North East India Kohhran hmingin General Superintendent Rev. Lalmalsawma Sailo chuan Pi Emily Lalrinpuii, M.I.S., Press Information Officer to Chief Minister hnenah a hlan a, Chief Minister Relief Fund ah a pek luh a ni ang.
Facebook