Pennet News Service : March 1 – 8

UPCNEINEWSSERVICE MAR 1-8.2020
——–
Pacific Region UPC  :
March ni 2, Thawhṭanni kha Pacific Region amiten Ṭawngṭaina ni (Regional day of prayer) atan an hmang a. Ṭawngṭai thupui (prayer focus) atan Hruaitu te tan, Pastor te tan, Bible School/college tan, Region chhunga UPC la din lohna ram te tan tiin thupui ṭhensawm lehchhawng hmangin an ṭawngṭai a ni.

Pacific Region hi area thumah an inṭhen leh a, North Pacific, South Pacific leh Central Pacific tihtein ṭhen an ni a. He region chhungah hian Brunei, Cook Islands, French Polynesia, Mariana Islands, Marshall Islands,  Nauru, Niue, Tokelau ramah te hian UPC ten kohhran kan la nei lo va, theihtawp chhuah mek a ni. A bak ram dang zawngah chuan UPC kan ding kim vek tawh a ni.

Pacific Region ah hian Rev. Roger Buckland chu Regional Director ni mekin he region chhunga UPC dinna ram leh member kan neih dan hetiang a ni:
1. American Samoa – 498
2. Australia – 6,085
3. Fiji – 9,000
4. Kiribati – 367
5. Malaysia – 4,380
6. Micronesia – 795
7. New Caledonia – 265
8. New Zealand – 1,570
9. Papua New Guinea – 60,000
10. Philippines – 12,51,030
11. Samoa – 426
12. Singapore – 1,580
13. Solomon Islands – 710
14. Timor Leste – 133
15. Tonga – 390
16. Tuvalu – 5
17. Vanuatu – 4,500
———
General hruaitute Programme :
General Supreintendent Rev. Lalmalsawma Sailo chuan Aizawl East District Conference, Zemabawka neih mekah telpuiin rawngbawlna a nei. District Conference hi General Treasurer Rev. Zohmingthanzama leh General Missions Director Rev. R. Lalhawia te pawhin a hmanpui bawk.

General Secretary Rev. R. Lalrinsanga chuan Lawngtlai West District Conference Lawngtlaia neih mekah telpuiin rawngbawlna a nei.

General Sunday School Director Rev. R. Laichhingpuia chuan Chandel District Conference, Rungchanga-a neih mekah telpuiin rawngbawlna a nei.
———-
District hrang hrang rawngbawlna chanchin :

Lunglei District :

Feb.27-1 March 2020 chhung khan ‘Thlarauvah awm rawh u’ Galatia 5:16 tih thupui ah hmangin Lunglei District  Conference vawi 55-na chu Headquarters Local biak in Chanmari-III ah hlim taka hman a ni a, General Secretary Rev.R.Lalrinsanga chuan a hmanpui.

Feb.29 inrinniah kohhranpui chuan rorelna an nei a, an rorel langsar zingah Pentecostal Social Front din turin hmalak nise tha an ti a, kohhran programme ah khawvel hlimhlawp thil lak luh loh nise an tih bakah Hospital din turin hmalak nise an ti bawk. Tin, Pentecostal Children Department (PCD) te District huapa an inrelbawlna tur chu District in sum pe thin se an ti bawk. Tin, Lunglei District din ni August ni 22-a hman thin chu August ni 29 anih zawk avangin kumin atangin tih danglam a ni.

Kum 2020-2021 chhung atana Lunglei District kohhranpui hruaitu thlanna neih chhunzawm a ni a, chungte chu
SUPERINTENDENT-ah Rev.C.Vanlalena
SECRETARY-ah Rev.PC.Lalfakawma
TREASURER-ah Rev.C.Lalrintluanga

Feb.28 zirtawpni khan District Sunday School Department leh District PYD-te chuan rorelna an nei a, District PYD  te chuan Skill Development  Training buatsaih nise an ti a, kum 2020 chhungin Voluntary Blood Donation neih nise an tih bakah, khawtlang nun siam thatna lam lehkhabu chhuah nise an ti bawk. Tin, Dist.PYD te hian  Missionary 10 support nise an ti bawk.General PYD a thlen tur thu pawimawh tak tak an ngaihtuah bawk a ni.

District Sunday School Department te chuan Kumpuan nasa zawkin bawhzui nise an ti a, Sunday School Hall sak tanpuina an tih san bakah General-a thlen tur thu pawimawh tak tak an ngaihtuah.

He inkhawmpuiah hian General Secretary Rev.R.Lalrinsanga, Hnahthial bialtu Pastor Rev.VL.Hmuaka, Chawngte bialtu Pastor Rev.B.Kamliana leh Headquarters bialtu Pastor Rev.C.Hmingthanfala ten thusawi rawngbawlna an nei  a, Lunglei District PYD Choir bakah Haulawng bial PYD, Luangmual bial PYD, Headquarters bial PYD, Rahsiveng bial PYD leh Pukpui bial PYD zaipawl ten zaiin rawngbawlna an nei a, malzai thiam tak tak an zai bawk.

Report bu a alan angin Lunglei Dist UPC ah hian Members 18748 awm mekin chhungkua 4060 kan awm a, 2019 chhung khan member hi 506 in kan pung a ni.

2019 chhung khan Sunday School hi Local 106-ah  din a ni a, Members 10996 in hming an ziak a, Sunday School Hall nei hi Local 28 an ni.

Lunglei Dist chhungah hian PYD dinna Local 90 a awm a, Members 5324 kan awm mek bawk. Nikum chhung khan zuk leh hmuam nghei thar Members 89 an awm bawk.
———
District board :
Ni thum awh Lunglei District Board vawi 199-na chu Superintendent Rev.C.Vanlalena kaihhruainain March  ni 2 atanga 4 chhung khan District UPC Conference Hall-ah neih a ni a, General Secretary Rev.R.Lalrinsanga chuan he Board hi a hmanpui a ni. An rorel langsar zualte :

1.      Executive Board Members atan – Rev.C.Vanlalena – Rev.PC.Lalfakawma, Rev.C.Lalrintluanga leh Rev.PC.Nghakliana te ruat an ni.

2.      Thianghlimna Committee hruaitu atan –Chairman-ah Rev.C.Vanlalena, Vice Chairman-ah Rev.C.Lalhriatpuia, Secretary-ah Evan.T.Lalzawmsanga, Treasurer-ah Sist.Lalramlawmi Sailo Bw te ruat an ni.

3.      District Conference in Hospital din turin hmalak nise a lo tih chu zirchiang turin Committee din a ni a, Members atan Rev.C.Lalrintluanga, Rev.Lalbiakdika Chawhte, Evan.V.Lalduhawma, Evan.F.Llahmangaiha leh Dr.J.Lalnunmawia te ruat an ni.

4.      District Conference in Pentecostal Social Front din nise a lo tih chu hma la turin Convener-ah Rev.PC.Lalfakawma, Members-ah Rev.K.Lalchhuansanga, Rev.R.Vanlalenga leh Rev.C.Lalhriatpuia te ruat an ni.

5.      Pentecostal Children Department (PCD) te District huapa an inenkawlna tur District kohhranpui atang pek nise tia District Conference in alo rel chu District atangin kumin atan Rs.76000 pek nise tha tih a ni.

6.      May 15-a kum 2 Pastor Service tur Pastor Muanpuia Colney, Pastor R.Lalremsiama leh Pastor H.Lallawmsanga te chu regularise an ni.

7.      Board hian Licence dil mi 3 leh CBC-a kal tur mi 4 a recommend bakah Auditors a ruat thar bawk.
————–

Aizawl East District :
District Conference :
Aizawl East District Conference vawi 26-na, Zemabawk Vengpui Biakin-ah March 5, Ninga zan atang khan hman mek a ni a, Pathianni zanah a tiak ang.

Inkhawmpui tan zan khan Rev Rosanga Kawlni, District Superintendent chuan inkhawm kaihruaiin Rev VL Dika Sailo, Former General Superintendent chuan hlanna a nei a, Rev R.Laltlankima, Zemabawk bialtu Pastor hnen atangin palai lawmna thu ngaihthlak a ni. Aizawl East District Inkhawmpui-ah hian Speaker bik nei lovin mi hrang hrangte hnen atangin thusawi ngaihthlak a ni. Ninga zan khan Rev Lalrema, Bethlehem Bialtu Pastor chuan thuchah sawina neiin Zirtawp zanah Rev R Laltlankima, District PYD President, Inrinni zanah Rev Vanlalfela Ramtiam, District Treasurer chuan thu sawiin Pathianni chawhma- Rev Biaksangzuala, District Secretary, Pathianni chawhnu-ah Sacrament rawngbawlna leh thuchah sawina Rev Rosanga Kawlni, District Superintendent chuan a nei anga, Pathianni zanah Rev Lalmalsawma Sailo, General Superintendent hnen atangin thuchah ngaihthlak leh a ni ang. Inkhawm apiangin mimal bakah zaipawlte hnen atangin fak hla ngaihthlak niin Pathianni chawhma inkhawmah mitthi sunna, Rev Rohmingliana, Thingsulthliah bialtu Pastor kaihhruaiin neih a ni ang.

Kuminah hian District PYD chuan a hrana inkhawmpui an neih loh avangin District Kohhranpui Conference-ah hian an bet tel a, Zirtawpni khan Zemabawk Vengpui Biakinah rorelna Rev R.Laltlankima, President kaihhruaiin an nei a, Zirtawp zanah District PYD bakah Sub-Committee hrang hrang ten lawmman semna hun an hmang bawk. District Sunday School Department pawhin Zirtawpni khan Zemabawk Vengpui S.S Hall-ah rorelna nei bawkin Inrinni zan hian lawmman leh chawimawina sem tur an neih ang ang an sem bawk a ni.
District PYD report atanga a lan danin tunah hian Aizawl East District chhunga Bial 30-ah PYD hi khaw 133 a ding mek a, PYD member 7018 awmin Zuk leh hmuam nghei thar 178 an awm a, zuk leh hmuam nghei zawng zawng hi mi 2458 an awm mek a ni. Lehkha tara innei tuak 37 leh lehkha tar lova innei tuak 99 an awm a, Nupui pasal avanga Kohhrana lut 72 an awm laiin chhuak 30 an awm. PYD rawngbawlna atanga Kohhrana sengluh mi 6 an awm bawk a ni.

District Sunday School report atanga a lan danin tunah hian Sunday School hi khaw 174-ah din mek niin Sunday School hming ziak zawng zawng hi 21551 an awm mek a, Sunday School hall nei thei khaw 129 an awm mek a ni.

Inrinni nilengin Zemabawk Vengpui Biakinah Conference rorel neih a ni a, hetah hian Bial atang leh Official atanga agenda lut engemaw zat an ngaihtuah a, rorel zawh hian hruaitu thar thlanna neih nghal a ni bawk. Pathianni zanah Kohhranpuiin lawmman sem tur a neih ang ang semna neih a ni dawn bawk a ni.
———–
Seminar :
February 29, Inrinni khan Darlawn Bial Sunday School Department buatsaihin Darlawn Biakinah Sunday School Zirtirtute tan Seminar buatsaih a ni.

He hunah hian General S.S Director  Rev R.Laichhingpuia resource person-ah hman niin Zirtirtute tana pawimawh leh hriattur hrang hrangte ngaihthlak a ni. Bial chhung atangin Sunday School zirtirtu an kal tha hle.

Khawruhlian bial te pawhin February 29, Inrinni vek khan Khawruhlian biakinah Leadership Training leh Account vawn dan tih hmangin Seminar an buatsaih a. Chawhma lamah Leadership Training neih niin Bialtu Pastor Hmingchungnunga Ralte leh Upa R Lalfakawma, Bial Secretary te hnen atangin thusawi ngaihthlak a ni a, chawhnu lamah Account vawn dan chungchang zir hona neih leh a ni a, hetah hian Upa Lalrinthanga, Bial Treasurer hnen atangin account vawn dan hrang hrang ngaihthlak a ni bawk. Mi 50 chuang kalkhawmin hlawk takin hun an hmang a ni.
———
Biak in hawng :
February 29, Inrinni khan North Vanlaiphai Hqrs. Biakin sak thar cheng nuai sawmhnih pakhat chuang senga sak chu Pathian hnenah hlanin hawn a ni.

Biakin hawnna hi Biakin tualah neih hmasak niin Rev Rosanga Kawlni, District Superintendent chuan UPC-North East India Biakin pakhat ni tura hawngin Pathian hnenah hlanna neih nghal a ni. Biakin chhunga a lawmna Programme hman chhunzawmah Pastor H Lalropuia, North Vanlaiphai Bialtu Pastor chuan inkhawm a kaihruai a, Kohhran chanchin tawi leh Biak in sak dan report Upa Sanghmingthanga hnen atangin ngaihthlak a ni. LAD Zaipawl ten Pathian fak hla sa in Rev Rosanga Kawlni, District Superintendent hnen atangin thuchah an ngaithla a, tlai-ah Biakin thar lawmna ruai hlim takin Kohhran ten an kilho a ni.

North Vanlaiphai Hqrs. Kohhran hi Kum 1955 khan din tan niin an Biakin hmasa ber hi 1957 khan hawn alo ni tawh a, tuna mi hi a pathumna niin Kum 2016 atanga khan an sa tan a, a dung ft 63 leh a vang ft 32-aliana sak a ni a, cheng nuai sawmhnih pakhat chuang a saknan hian an sen bakah hnatlang tha sangli chuang an seng bawk a ni.

Biakin thar lawmna Programme hi Zirtawp zan atang khan hman tan niin Pathianni zan thleng khan an hmang chhunzawm a, North Vanlaiphai Bialtu Pastor lo ni tawh te, Rev C Laldintluanga, Rev H Vanlalchhana, bakah Rev R Lianzama ten thusawina an neih bakah Rev Biaksangzuala, District Secretary te hnen atangin thusawi an ngaithla thin a ni. N.Vanlaiphai Hqrs. Kohhran atang hian Pastor pahnih- Rev R.Hrangvunga (L) leh Rev Biaksangzuala, Aizawl East District Secretary ni mek te hi Pastor niin an lo chhuak tawh a ni.  Tunah hian member 100 chuang zet, chhungkaw 24 an awm mek a ni.
———-
Lawmthusawi chawimawina :
February 29, Inrinni khan Thuampui Kohhrana lawi Bro Vanlalhruaia te chhungkua chuan Pathian hnena lawmthu sawi chawimawina neiin Kohhran ten hlim takin hun an hmang. Speaker-ah Evan K Vanlaldika an ruai.

Keifang Kohhranah pawh Bro Lalrinfela te rawngbawlna kal zelah February 29, Inrinni khan Bro Kapa te chhungkua chuan Pathian chawimawina an nei a, March 2, Thawhtanni khan Sis Zarzokimi te chhungkua chuan chawimawina hi nei chhunzawm ve lehin Kohhran ten hlim takin hun an hmang. February 3, Thawhleh zan khan Bialtu Pastor V Lalnienga chuan mithar 5 Kohhranah sengluhna a nei bawk a ni.
——
Member thar :
March 1, Pathianni khan Zemabawk bial, Airfield Kohhrana lawi turin mithar 2 Kohhranah sengluh an ni.
———

Chhimtuipui District :
District LAD Conf :
February 28 atanga March ni 1 chhung khan Sangau I local, Sangau bial ah Chhimtuipui Dist LAD Conference Vawi-44 na hlawhtling taka hman a ni.

He khawmpui ah ah hian Evan.Robert B.Lalnunsiama T(Home missionary To Zero) chu speaker a hman niin Pathian thu thatak tak ngaihthlak a ni.

He khawmpui hi Lunglei dist LAD hruaitu leh member 10 ten an hmanpui.

Feb ni 29, Inrinni  chhunah rorel inkhawm neih a ni a, he hunah hian LAD member chatuan ram panta te pualin sunna hun hman tel a ni a,tlailam dar 3:00pm ah rorel tluang taka zawh fel a ni.  Dist LAD conf vawi-44 na khawmpui palai chhinchhiah theih zat hi mi 400 atanga 520 inkar bawr vel an ni.
——-
District Conference :
March ni 12-15 chhung hian South Lungpher local, South Lungpher Bial ah Dist Conference vawi 44 na neih a ni dawn a, ni 14 Inrinni ah kohhranpui rorel leh Sunday school rorelna inkhawm neih a ni ang.

Conference thlengtu tur South Lungpher Kohhran te theihtawp chhuahin an inbuatsaih kal mek  ani.
——
Charge in hlan :
Chhimtuipui Dist PYD hnuaia sub- committee Education Board hruaitu thar te leh Dist PCD hruaitu thar techuan Dt.04.03.2020(nilai) khan mawhphurhna an la thar.

Mawhphurhna inhlanna hun hma hi T Upa H Lalduhsanga secretary Dist PYD chuan akaihruai a, Rev WL Thanghre Dist superintendent leh Rev Dr C Sihmo Dist Mission Director te chuan fuihna thu sawiin, lu chunga kut nghat tawngtai sakna annei.

Sub Committe hruaitu ruat tharte:-

Dist PCD
Chairman : Rbt S Vanlalvena
Secretary : LS Vanlalchhuanga
Treasurer : C Hmingchullovi

Kum puan
Chairman : Rbt LS Lalhmingmuana
Secretary : C Lalchhanhima
Treasurer : Rbt Jona Lalrintluanga
——-
PMD Day :
Siahatla local Pentecostal Man Department techuan March 03 Thawhlehni khan avawi khatna atan PMD DAY an hmang.

He hun hi kohhran member zawng zawng ten awmni kham in hun an hmang a, tlai lamah ruai killo niin,  zan lamah hun hi hman chhun zawm leh a ni.
——-
North Mizoram District  :

District Hruaitute Programme:
District Supdt.: Rev. Laltluanga hian March ni 8 Pathianni hmang hian District Missions khawmpui vawi 39-na in Field thar atana a puan Tumpanglui khua chu Missions Field thar atan a hawnna a nei ang.

District Secretary: Rev. Chhiarpuia chuan March ni 8 Pathianni hian a bial enkawl Durtlangah inkhawmin, chawhnuah Durtlang North kohhran Baptisma rawngbawlna a nei ang. Durtlang North-ah hian Chawhnu hun hi thuthlung rawngbawlnain hun a hmang dawn a ni.

District Treasur: Rev. K. Lalduhsanga chuan kar thar chho khian General Missions Field conference hmangin General Field lamah a chhuak ang.

District Missions Director: District Missions Director Rev. C. Lalthantluanga pawhin District Missions Confe. vaiw 3-na in Home Missions Field thar atana a puan South Chhimluang khua chu Field thar atan a hawng dawn a, hemi rual hian Kolasib Venglai Bialtu Pastor Rev. B. Vanlalruata’n Missionary Quarters sak thar a hawng bawk ang.

District Missions Treasurer: Evan. MS Dawngliana chuan Tlangsang Bial chhunga Zomuantlang Missionary Quarters sak thar chu hawngin rawngbawlna a nei ang.
———
District Conference ;
North Mizoram District  Conference vawi – 70-na Conference Platinum ni thum leh zan li chhung awh, Pathian Thlarau hriakthih hnuaia hlim taka hman chu kar kalta March ni 1 Pathianni zan khan a tiak.
Conference hi Feb ni 27 Ningani zan khan tan a ni a, Conference hi Cultural Centrre, Bawngkawn South-ah neih a ni. Conference chhung zawng hian Rev. Laltluanga Dist, Supdt., Rev. Chhiarpuia District Secretary leh Rev. K. Lalduhsanga Dist. Treasurer ten khawmpui hi nung takin an kaihruai thin a ni.
Conference Platinum-ah hian Thupui “Pathian thu hi a nung a ni (Heb. 4:12)” thu hman niin; he thupui hmang hian heng thuhriltute hian Pathian thuchah an sawi:-
1) Feb ni 27 (Ningani zanah) thusawitu  Rev. RC Puia, Thupui – “Thianghlimna kawnga min hruaitu”
2) Feb ni 28 (Zirtawpni zanah) thusawitu  Rev. C. Lalrammuan, Thupui – “Chhandamna a ni”
3) Feb ni 29 (Inrinni zanah) Thusawitu Rev. C. Lianchama, Thupui – “Nunkawng hruaitu atan”
4) March ni 1 (Pathianni zing) Thusawitu – Rev. Rev. Lalmalsawma Sailo, Thupui – “A lokallehna min hriattirtu a ni”
5) Pathianni chhun Thusawitu – Rev. K. Lalduhsanga, Thupui “Chakna leh Thiltihtheihna a ni”
6) Pathianni zan Thusawitu – Rev. Laltluanga, Thupui “Pathian thu hi a nung a ni” Thuhrilhtute Pathianin a hmanga Kohhranhiote’n an hlawkpui hle.
Platinum Conference a nih angin Confe chhung hian North Mizoram District din a nih tirh atanga rawng lo bawl tawhtu Pastor zawng zawng te leh Pentecostal Herald Editor lo ni tawh te chawimawina thilpek hlan a nih bakah Sunday School Department atanga chawimawina thilpek- Sunday School kum 10 chhung kaikim te, Sunday School hruaitu hlun leh Zirtirtu chawimawina Certificate te sem a nih bakah LAD ten Buhfai tham tha lawmman an sem bawk.
Feb ni 28 Zirtawpni chawhma dar 10 atanga dar 12 khan Conference report hrang hrang, Kohhranpui, Missions, Sunday School, LAD leh PYD bakah Pentecostal Gateway Higher Secondary School atang tein ngaihthlak niin; Report atangin hmasawnna tam tak hmuh a ni.
Conference Report in a tarlan danin North Mizoram District dinhmun tlangpui hetiang hi a ni:-
1.  North Mizoram District kohhranpui hnuaiah Committee peng 9 heng 1) PG Managing Board Committee 2) Motor Board Committee 3) PenNet Committee 4) Building Committee 5) Resolution Committee 6) Thianghlimna Committee 7) Literature Committee 8) Legal Board Committee 9) PSM Committe te awmin, heng committee peng hnathawh kaltlang hian hmasawnna tam tak hmuh a ni.

2. Ramlak beihpui thlak turin District tirhchhuah rawngbawltu mi 30 awmin heng mite hian i) South Chhimluang 2) Thinglian 3) Kanan Thar 4) Sailam 5) Bungthuam 6) Kawrthah 7) Darlung 8) Bukvannei 9) Thinghlun 10) Phuldungsei 11) Luangpawl 12) Chawilung 13) Sihthiang 14) Kanan 15) Phaizau 16) Luimawi 17) Dampa Tlangnuam 18) South Chhimluang 19) New Eden 20) Zawlpui 21) Chuhvel 22) Nisapui 23) Phunchawng 24) Vanghmun 25) Dapchhuah 26) Neihloh 27) Sidon 28) Tuipuibari 29) Tuirum leh 30) Lungthirah te rawngbawlna hna an thawk mek a ni.

3. Conference report in a tarlan danin North Mizoram District Statistic dinhmun tlangpui hetiang hi a ni
i) Kohhran dinna  zat 176
ii) Kohhran in awm zat 6124
iii) Biak in ding zat 171
iv) Member zawng zawng zat : 26761
v) Mi thar lakluh zat: 1101
vi) report hun chhunga member thi zat: 168
vii) Thlarau Thianghlim dawng thar zat : 471
viii) Thlarau Dawng tawh zawng zawng : 10929
ix) Kohhran ding thar zat: 8
x) Preaching Point neih thar zat: 3
xi) Preaching Point neih zawng zawng: 27
xii) Ordination Licence neih zat: 48
xiii) Gen. Licence neih zat: 100
xiv) Local Licence neih zat : 54
xv) Bible Women neih zat : 24
xvi) Deacon upa zawng zawngt zat: 561
xvii)T.Upa zawng zawng zat : 402
xviii) Kum 2019  chhunga Zuk leh hmuam nghei zat : 593

Conference Report pek ni feb ni 28 chawhnu ah District Sunday School Confe Rorel neih nghal a ni a, Director Rev. K. Malsawmkima’n kaihruaiin an rorel tlangpui te:
1) Naupang pual lehkhabu thla li danah (Quarterly)-a chhuah thin ni se.
2) Sunday School zirlaibute leitheih reng turin Gen. Sunday school hian chhut tam deuh ni se.
3) Thu inchhang buah Doctrinal Department pual telh ve ni se.
4) Home Missions Field-a Bru te hman tur SS zirlaibu siam ve ni se.
5) Dist. SS Confe. rorel a hranga neih tawh ni se.
6) Dist. huapin Doctrinal Dept. Meet Aizawl khaw chhung leh Dist. khawpui hrang hrangah neih ni se. tih te an passed a ni.

Feb ni 29 Inrinni khan District Kohhranpui rorel nei nghalin; Rev. Laltluanga Dist. Supdt. in Meeting a kaihruai a, rorel pawimawh zual te:-

1) Kum 2021-ah District Confenrence Headquarters Bialah nghatin Kum 2022-ah Thenzawl Bialah Confe nghah a ni.
2) Kum 2020 chu Ram lak beihpui thlak kum atan puan a ni.
3) North Mizoram District-ah Revival a thlen zel theihnan tawngtai runpui neih ni se.
4) North Mizoram District chhunga Kohhrante zingah- ziak leh tawngah Mizo tawng uar zawka hman ni se.
5) District Board member-ah Upa Bialtin aiawh Upa Deacon member-ah dah ve nise.
6) Gen./ Local/ Bible Women ten an License an renew dawnin renewal form hmangin an lawina local leh Bial kaltlangin renew ni tawh se.
7) Kohhran Manual (Article 17 section  100) -a Bial resolution Committee thuneihna ziahlan loh hi ziahlan ni se. Ennawna siamthat ni rawh se.
8) Chhiatni thatni, Serh leh sang kaihhruaina bu thar District-in siam ni se.
9) District inenkawlna dan, Section 11 (e) leh Section 6 (e) te hi ennawn a, Bial leh tualchhung indaihlohnaah chuan hman kher ngai lo turin siamrem ni rawh se.
10) District hruaitute hi Post ngaiah Term khat (Kum 2) chauh awm tawh se.
11) UPC-NEI hnuaia zirna (School) kan neihah Uniform inang tlang vek nei tura hmalak ni se.
12) Kohhran ni pawimawh (Missionary Day, Disable Sunday, Orphanage Sunday) -ah te hetiang lam hawi sermon kaihhruaina leh Bible changte daha siam ni se
13) Isua hminga Nupui/Pasal lo innei tawh, inthen leh te hi, an kawppuite’n kohhran phalna ang thlap a, Nupui/Pasal an lo neih tawh chuan District Board-ah dil kher ngai lo hian Local Church Board ten phalna pe thei se. tih te passed a ni.

District Board nei: UPC-NEI, North Mizoram District kumtir Board chu March ni 2 thawhtanni atang khan Headquarters Kohhran Biak in Tuikhuahtlangah neih a ni.
District Board hi Rev. Laltluanga Dist. Supdt. in kaihruaiin, General atangin NEI UPC Supdt. Rev. Lalmalsawma’n a ho bawk.
District Board hian ni 3 chhung awhin Board ni khat ni March ni 2-ah Pentecostal School of Ministry (PSM) kal tur te, Local License leh General License dil te interview neih fel a ni.  License dilte dinhmun hetiang hi a ni:- Local License dil mi 12 awmin Geneeral Lisence dil mi 3 an awm a, PSM dil mi 22 an awm bawk a ni.
North Mizoram District kumtir Board-ah hian  Official Agenda 9 awmin,  District  khawmpui vawi 70-na rorel tawh bawhzuina bakah Bial Agenda 35 leh Private Agenda 1  rel an rel bawk. Rorel pawimawh zingah kumin 2020 hi Department hruaitu thar ruat kum a nih angin heng a hnuaia mite hi kum 2020 & 2021 District Department hruaitu thar atan an ruat:-
1. Kohhranpui hruaitu
Superintendent : Rev.Laltluanga
Secretary :Rev.Chhiarpuia
Treasurer : Rev.K.Lalduhsanga
2. Missions Department
Director : Rev.C.Lalthantluanga
Secretary : Evan RK Vanlalngaia
Treasurer : Evan MS Dawngliana

3. Sunday School Department
Director : Rev K Malsawmtluanga
Secretary&Treasurer : Evan H Lalrinngheta

4. Ladies Auxilliary Department
President : Sist K.Lalhmachhuani Bible women
Secretary : Sist Laldawngliani
Treasurer : Sist Chhuankungi Bible women

5. Pentecostal Youth Department
President: Evan J. Vanlalruata
Secretary: Evan.K.Rotluanga
Treasurer : Evan C.Lalruatsanga

District Board hian Pastor thar pakhat lain Evan PC Lalrokima Ramhlun South ami chu lak a ni a,  Ani hian Aibawk a bial anga, Aibawk Bialtu Pastor ni mek Rev P.C Lalfela chu Durtlang Bial turin Post a ni bawk bawk a ni.
———
Member thar :
Feb ni 24 Thawhtan zan khan Tlangsang bial Khakchang khuaah rawngbawltu Sist. J. Lalmuankimi leh a thiante rawngbawlna atangin mi thar chhungkaw 4, an vaiin members 25 te chu Pentecost Kohhrana lawi turin sengluh an ni.  Mi tharte hi Bialtu Pastor K. Ainawna’n Kohhranah a seng lut.
——–
Work Camp :
Hunthar Bial Missions Department hmalaknain Damparengpui Bial Tuipuibari Centre-a ah Biak in sakin Work camp an nei.
Work camp hi Bial Director Upa C. Vanlalsiama’n hovin member 19 bawr an thawk chhuak a,  Feb ni 24 khan Aizawl an chhuahsan a ni.
——–
Dist PYD Rising Day :
UPC-North East India Unit hnuaia North Mizoram District te chuan PYD din ni (Rising day) March ni 4 khan North Mizoram District huam chhunga Bial 30 ten an hmang.

North Mizoram District PYD Rising Day hi Headquarters Bial PYD te chuan an ruahman angin Headquarters Biak In ah Bial chhunga Local 5 Headquarters, Missions Vengthlang, Nursery, Tuikual South leh Khatla South ten inkhawmhona neiin; Dist. PYD President Evan. F Lalngaihawma leh Gen. SS Secretary Rev. R. Vanlalawia ten he inkhawm hi hovin, Pathian thuchah  Hqrs Bialtu Pastor Rev. C Lianchama hnen atanga ngaihthlak niin; District PYD President leh Gen. Sunday School Secretary hnen atang tein Rising Day thuchah ngaihthlak a ni bawk.

Bilkhawthlir Bial PYD te chuan District PYD Rising Day March 4 chu Home Mission Field, North Thinglian Tirhkoh quarter sakna tur a hmun laiin PYD Raising day an hmang a, quarter sak theih mai turin a hmun hi an zo a ni.
Quarters hmun lai hian PYD Member 67 zet an thawk chhuak a, hlim takin hun an hmang a ni. North Thinglian Tirhkoh quarter hi Bilkhawthlir Bial hmalaknain Assam type a sak tura ruahman niin; kumin thâl chhunga luah hman tura sak an tum bawk.

Aibawk Bial PYD te chuan District PYD Rising Day March ni 4 lawmna pual hian Blood Donation Camp leh Social Media tih thupuia hmangin Awareness Programme an buatsaih.

March 4, Chhun lamah khan Blood Donation Camp buatsaihin State Referal Hospital, Falkawn tan thisen unit 24-an pe a, zan lamah Social Media tih thupuia hmangin Falkawn Kohhran Biak inah Awareness Programme an buatsaih thung.

Awareness programme hi Bial President Tual Upa Lalramnghaka’n a kaihruai a, Bial Secretary Sis. Benben Lalremdiki’n Day thuchah chhiarchhuakin, Sis. Lalenkawli leh Bial PYD Zaipawl ten zaia rawngbawlna an nei bawk.

He programme ah hian Pentecostal Network (PenNet) Co-Ordinator Bro. R. Lalbiakfela, Resources Person atan an hmang a, Power Point Presentation hmanga zirtirna pein  Social Media hman dan kawnga hma sawnna tur leh hmansual hlauhawm theih zia te bakah a kaihhnawih thil dang pawimawh tak tak ngaihthlak a ni a, sawi hona hun hlawkthlak tak hman zui a ni bawk. Inkhawm banah thingpui ruai hlim taka kil ho a ni.