Pennet News Service : June 28 – July 5

UPCNEINEWSSERVICE JUNE 28-JUL 5.2020
——–
Office kaldan pangai zawm tan :
Covid-19 hrileng avanga hun rei tak chhung office kai hun a mumal loh hnuah; July ni 1, Nilaini atang khan UPC General Hqrs Office Mualpui Salem veng Aizawl chuan dan pangai angin Office an kal tan leh ta.

Mizoram chhungah hri lengin zia awm lam a pan avanga Sawrkar thuchhuak angin Kohhran office pawh dan pangngai anga hawn tan leh a ni a, General Suptd Rev. Lalmalsawma Sailo chuan sawrkar thuchhuak ngaichang chunga Kohhran office pawh hawn a nih thu sawiin; Pathian kan biakna maicham leh Kohhran hmun pawimawh dang te pawh Kohhran hoten kan luah thuai theihnana bang lova tawngtaina nen theih tawp chhuah turin Kohhran hote a ngen nghal bawk.
—–
Disable Sunday :
July 5, Pathianni hi Kohhran ni pawimawh Disable sunday a ni a, he ni bawhzui leh hmalakna tur hi Executive Board Committee rorel no. 23na, Sept 4 – 5, 2019-in District hruaitute kuta a dah tawh angin mahni District-ah țheuh circular siama lo bawhzui țheuh tur a ni.

Disable Sunday hi kum 2012 General Conference in hman tura a ruahman angin kum 2012 atang khan hman tan a ni a, kum tin July Pathianni hmasa berah hman thin a ni.
—–
CBC tan hun sawn :
July ni 2, Ningani khan Calvary Bible College (CBC) chuan July ni 8, 2020 Nilainia Class tan tura Faculty board meeting in hriattirna a lo tih chhuah tawh chu cancel a nih thu a tichhuak.

April 30, 2020 khan Faculty Board meeting chuan hrileng boruak thlir chungin July ni 8, 2020 ah session thar tan theih a nih beiseiin ruahmanna a siam a, mahse hrilengin ziaawm lam ala pan hleih theih loh vangin he ruahmanna an siam tawh hi sut in, an cancel leh ta a ni.
—–
UPCI General Conf :
Khawvel pum huapa Pentecost Kohhran intawh khawmna lian ber, UPCI General Conference 2020 inbuatsaihna kal pui mek a ni a, COVID-19 vangin khawvel ram hrang hrang te buaiin USA ngei pawh buai hle mahse inkhawmpui neih theih beiseina lian tak nen inpuahchahna kalpui zel a ni. Kumin hi UPC din aṭanga kum 75-na niin Conference ah anniversary puala hun hman a ni ang. Program duan lawk tlangpui hetiang hi a ni:

UPCI General Conference 2020
A hun: September 22-25
A hmun : America’s Centre, St. Louis, USA

Speaker tura ruat láwk te:
1. Sept. 22 Tuesday Zan : Rev. Morgan Mwanza
2. Sept. 23 Wednesday Zan : Rev. Jerry W. Dillon
3. Sept. 24. Thursday Chhun : Rev. Steve Cannon
Thursday zan : Rev. David K. Bernard
4. Sept. 25 Friday Zan : Rev. James Wilson leh Rev. Scott Graham.
▶️ A ṭan zan, Thawhleh zan inkhawm hi Global Missions pual a ni.
▶️ Nilaini 9am – 2pm ah Business meeting neih a ni ang.
▶️ Nilaini zan inkhawm hi North American Missions pual a ni.
▶️ Ningani chhun inkhawm hi Sunday School (Children Ministries) pual a ni.
▶️ Zirtawpni chhun dar 12 – 2pm ah kum 75 tlin lawmna inkhawm 75th Anniversary Service a awm ang.
▶️ Zirtawpni zan tirah Memorial Service a awm leh ang a, dar 7 aṭangin ṭhalai pual inkhawm Youth Ministries service in Conference an khar ang.
▶️ Inkhawmpui ṭan zana speaker tur Rev. Morgan Mwanza hi UPC Zambia Gen. Superintendent a ni.
——-

Member thar :
June ni 28 Pathianni khan Barcelona khawpuia kan kohhran Los Pentecostales de Barcelona ah mithar 6 ten Isua hmingin baptisma an chang.

Sweeden rama Missionary Bro. Craig Christofferson report danin February thla khan Jehova Witnesses aṭangin mi 2 ten Isua hminga baptisma changin UPC an zawm tawh a, tunah hian bible studies kaltlangin Jehova Witnesses tho mi 3 ten baptisma an chang leh thuai dawn a ni.

Jordan ramah Sri Lankan Church aṭangin hmeichhe 5 in Pathian thuthlung hmufiahin hun remchang hmasa berah baptisma chan tir an ni ang.

June ni 28, Pathianni khan Greenville, Ohio, USA ah mithar 1 in Isua hmingin baptisma a chang leh a, June thla chhungin Greenville ah hian mithar 6 an nei tling ta chiah a ni.

June ni 28, Pathianni vek khan Stone Mountain, Georgia, USA a Dekalb UPC kohhranah mithar 1 in Isua hmingin baptisma a chang ve bawk.

South Bend, Indiana, USA a awm Ironwood UPC kohhranah tun Pathianni vek khan Mithar 7 in Isua hmingin baptisma an chang bawk.
——–

Micki Mooney vui liam :
America ram sana June ni 24 Nilaini zan dar  7:40pm a van kohna chhangtu Sis. Micki Mooney kum 76, UPCI Asst. General Superintendent Rev. Paul D Mooney nupui chu June ni 30 dar 11:00am khan vui liam a ni ta.

A ruang hmu duh tan June ni 29 leh ni 30 dar 10am – 11am inkar hun hawn a ni a. June ni 30, Thawhlehni dar 11am khan Calvary Tabernacle, 902 Fletchet Ave, Indianapolis, ah vuina hun an hmang.

He hunah hian a rawngbawlpui mi thahnem takin Sis. Micki Mooney hi an thlah liam a ni.

Sis. Micki Mooney hi September 6, 1944 khan Lilbourn, Missouri-ah a piang a, Rev. Paul D. Mooney nen hian June 28, 1963 ah inneiin fa 3 fapa pakhat leh fanu pathum an nei a, rimawi tum thiam tak niin khawvel ram hrang hrangah a pasal rawngbawlna tawiawmin zaia rawngbawlna te a nei thin. Indiana Bible College ah kum 30 chuang zirlai te tana councellor leh instructor hna a thawk a ni. He nu ropui hian ui tu leh sun tu a ngah hle a ni.
——–
Office chowkider hlui boral :
Evan Lal bahadur-a Pu Lala tia hriat, General Hqrs Office ah hun rei tak chhung chowkider hna lo thawk tawh chuan June ni 30, Thawhlehni khan van kohna chhangin chatuan ram min pan san ta.

Pu Lala hi 1942 June ni 12 ah Nepal ramah a piang a, an unau hi paruk mipa 3 leh hmeichhe 3 an ni. Kum 1970 March thlaah Saikhumi nen inneiin fa 8 an nei a. Kum 1978 ah Kristian ah in pe in kum 1991 atang khan Presbyterian Kohhran tan tirhkoh hna a thawk thin. Kum 1998 oct 8 ah Pathian thuthlung hmuin Rev. K. Hrangvunga kutah sual ngaihdamna baptisma changin Pentecost Kohhranah a lut a. Kum 2003 ah tirhkoh licence holder niin a theih tawpin rawngbawlna a thawk thin a ni.

Kum 2013 atanga 2016 chhung General Hqrs Office ah Chowkider hna thawkin thahnemngai leh taima takin a hmaa tih tur awm te a hlenchhuak thin. Kum 2011 atanga khan zun thlum natnain a tibuai tan a, kumin 2020 June thla tir atang khan in sawisel tan lehin Saitual district hospital-ah te admit a ni a, zual lam pan zelin June ni 30, Thawhleh zan khan he khawvel hrehawmna leh lungngaih tuar tawh lo turin Lalpa hnenah a chawl ta a ni.
——–

District hrang hrang rawngbawlna chanchin :

Aizawl East District
Mizoram Sawrkarin Covid-19 hrileng mek avanga Lock Down a kalpui chu a thlahdul tak avangin Aizawl East District Office pawh mipuite dawr theih turin nitin Thawhtanni atanga Zirtawpni thleng kal tawh tura ruahman a ni. Office timing hi Chawhma Dar 9:30 atanga tlai Dar 4:30 thleng a ni.
——-
District board :
July 7 atanga 8 chhung hian Aizawl East District hnuaia rorelna sang, Kum chanve District Board chu neih a ni dawn. He hunah hian Bial atang leh Official atanga agenda lut te an ngaihtuah dawn a ni. Tun dinhmunah Aizawl East District chhungah hian Pastor Bial 31 awm mekin Board member pawh an telkim thei tura ngaih a ni.
—–
District missions :
June 29, Thawhtanni khan District Missions Department chuan Director room, District Office-ah Executive meeting, Rev R.Lianzama, Director kaihhruaiin an nei. He hunah hian thu pawimawh tak tak ngaihtuah niin District Kohhranpui hruaitute pawhin an telpui bawk a ni. An rorel langsar zualte:

1. July 2.2020-a Kum chanve Board nei tura ruahmanna lo siam tawh chu Covid-19 hrileng avangin 22.July.2020, Nilaini-ah neih tura tih niin July 19, Pathianni thleng Agenda nei tur tan thehluh theih a ni.

2. General Missions Department budget Rs 10,00,000/- (nuai sawm) pek tura tih a ni.

3. Covid-19 hri leng avangin kum danga hmun hrang hranga Home Missionary rawih thin chu kumin-ah a kalpui mumal theih lo a, he hrileng avang hian tunah mai chuan la tirhchhuah rih loh ni se, District Board-ah ngaihtuah ni se tih a ni.

4. Evan Lalramthanga, New Chalrang, Khawhai Bial Missions Department Director leh New Chalrang Kohhran Secretary mawhphurhna chelh mektu, June 23, Thawhlehni-a boral chu Rs 1000/- a ral ni se an ti bawk a ni.
——
PYD member boral ral :
Bro.Lalhruaizela, Samtlang, North Mizoram District PYD Member, tun hnaia Quarry chima boral ta chhungte hnenah Upper Republic PYD chuan June 27, Inrinni khan ralna hun an hmang. He hunah hian Upper Republic PYD President chuan tawngtaina hmangin ralna sum Rs 15,000/- an hlan a ni. Upper Republic Bial leh Upper Republic PYD te hian mi harsa leh tanpui ngaite hnenah luanchhuah hna an lo thawk tawh thin a, Bial chhunga tanpui ngai tanpui bakah ASC Home tanpuina pek te bakah khuarel chhiatna avanga mangang BSUP ami te, khawdanga naupang damlo harsa te leh mi harsa tak tak, tanpui ngaite hnenah tanpuina hi an lo hlan tawh thin a ni.
——
Member thar :
June 23, Thawhlehni khan Champhai Bial, Champhai Vengsang-ah Kohhran dang atangin mi pakhatin Bialtu Pastor F.Malsawmtluanga kutah sual ngaihdamna baptisma a changa, Kohhranah sengluh nghal a ni.

June 28, Pathianni khan Bazar bial, Armed Veng Kohhrana mi 2 in sual ngaihdamna baptisma, Bialtu Pastor, Rev HL Thakunga kutah changin Bialtu Pastor hian nau piang thar 3 a hlan nghal bawk a ni.
——
Pastor qtrs :
June 30, Thawhlehni khan Serchhip Bial PYD ruahmanna angin Bial huapin Serchhip Bial Pastor Qrts.sak hnatlang neih a ni. He hunah hian bial chhung atangin member 30 thawkchhuakin ban khur laih hna an thawk a ni. Serchhip Bial Pastor Qrts,tur hi sak that mek niin March 16, Thawhtanni khan Bialtu Pastor, Rev B.Lalengzauva chuan lungphum alo phum tawh a ni. Pastor Qrts. hi a dung ft 47 leh a vang ft 24-a liana sak tura ruahman a ni.
——-

Chhimtuipui District :

June ni 30, Thawhtanni khan Dist Comm room UPC NEI Office ah Chhimtuipui Dist PYD chuan kum chanve board an nei.

An thurel langsar zual te :

1. Dist PYD Conference vawi 44-na Tuipang Bial a neih tur chu Hrileng avang in athlengtu bial PYD ten hun sawn an dil a. Ngun taka ngaihtuah anih hnuin 44th Dist PYD Conf chu Kohhranpui ah beh mai nise tha tih a ni.

2. Heng ahnuaia DIST PCD hruaitu ruatbelh tehi pawmpui an ni:-
Vice President : T Upa Ismaela
Asst secretary: J Malsawmsanga
Fin Secretary: Lalzawmpuii

3. Dist Evangelism tour neihtur chu hruaitu kutah dah ani.

4. Heng mite hi Dist PYD Music & Sound Committe hruaitu atana ruatte anni:-

Chairman : T Upa L Khai-U
Secretary: J Lalhriatchhunga
treasurer : T Upa N Lalchhuanmawia

Conductor: Zorammuana
Asst Conductor: C Vanlalpeka

5. Dist Sound incharge leh operator atan heng mite hi ruat anni:
CH Duhthlanga
V Lalchhuanmawia
J Lalfangkima
—-
District Board :
July ni 2, Ninga ni khan Chhimtuipui Dist Board chu Dist Committe room ah neih a ni a, an thurel kimchang erawh karleh lamah tihchhuah a ni ang.
——-

Lunglei District  :
July ni 1 nilaini khan Lunglei District PYD Board chu District UPC Conference Hall-ah District PYD Vice President Upa C.Lalhmangaiha kaihhruainain neih a ni a, an rorel tlangpuite:

i. District PYD Conference hun sawn nise ti a, District Conference in a lo rel tawh chu engtikah nge ni ang tih ngaihtuah a ni a, nakum 2021 atan April ni 23-25 (April 3rd Sunday hmangin) chu tha tih a ni.

ii.Khawtlang nun siam thatna lam lehkhabu siam nise ti a District Conference in a lo rel chu hetiang hian bawhzui nise tha tih a ni. Lehkhabu ah hian khawtlang nun siam thatna lam thupui 16 dah nise tha tih a ni. Lehkhabu siam tur lo buaipui turin Editorial Board din a ni a, Chairman-ah Evan.Laldinpuia Sailo, Secretary/Editor-ah Evan.Lalringzuala Pachuau te ruat an ni a, Member-ah Evan.Lalrinmawia, Rbt.P.Samson Vanlalfela, Rbt. S.Lalrinsanga leh Rbt.K.Lalrintluanga te ruat an ni a, Ex.Officio atan District PYD OB te ruat an ni.

Lehkhabu hi nakum 2021-a District PYD Conference-ah tlangzarh hman nise tha tih a ni.

iii. District Conference in Skill Development Training buatsaih nise ti a a lo rel chu hetiang hian hmalak  nise tha tih a ni.

– Skill Development chungchang Awarness Media kaltlangin a tam thei ang ber neih nise tha tih a ni.

– Training theihna tur Line hrang hrangte zirchiana Sorkar Department hrang hrangte pawh dawr nise.

– Practical Training chu nakum 2021 ah hmalak mai nise tha tih a ni bawk.

iv. Kumin 2020 kum chanve leh kumtawp a Sub.Committee-te sum Audit neih turah Auditors atan Evan.Laldinpuia Sailo leh Evan.Lalringzuala Pachuau te ruat an ni.

v. Oct.ni 2-a Social Work Day hman dan tur lo ngaihtuah turin Organising Committee din a ni a, Chairman-ah Upa C.Malsawmkima, Secretary-ah Rbt.Lalhmingmawia, Treasurer-ah Evan.Lalringzuala Pachuau te ruat an ni.

He board ah hian District PYD in Thiltlang hmun a biakin a sak mek Report B.Vanlalmuana President, Hnahthial bial PYD chuan a pe a, District Superintendent Rev.C.Vanlalena leh Treasurer Rev.C.Lalrintluanga ten an telpui bakah bial President  mi 14 an tel thei a ni.
———
CEC School Board :
June 25 ningani khan Christian Education Centre (CEC) School Board chu District Superintendent Room-ah Chairman Rev.C.Vanlalena kaihhruainain neih a ni a, he board hian June thla atang hian Monthly fee hi 50% sawrkarin private school te lak rem a tihsak angin school kal dan pangaia kal theih hma chu lak ve nise an ti a, District Board-a thlen turin thu pawimawh tak tak an ngaihtuah bawk.(Pic.CEC Board)
——
Pentecostal Bible School :
Lunglei District UPC in thla khat awh Bible zirna a neih, Pentecostal Bible School (PBS) chu June ni 9 atanga kal tan tur nimahse, Covid-19 avangin kal theih anih loh avangin hetiang hian ruahmanna thar siam a ni.

–  PBS hi August ni 4 thawhlehni atanga kal tan tur a ni ang.
–  Graduation Day hi Aug.30 Pathianni ah hman tur a ni.
–  Kumin hian PBS-ah hian heng Subject te hi zir a ni ang.
– Church History
– Epistle
– Pneumotology
– Tabernacles
– Minor Prophets
– Bible Doctrine
– Life and Work of Christian Minister
——-
PCD Board :
July ni 2 ningani khan Lunglei District PCD Board vawi 22-na  chu District Secretary room-ah President Rbt.K.Lalrintluanga kaihhruainain neih a ni a, an rorel tlangpuite:

1.  2021 atanga 2025 chhung a PCD zirlaibu tur ruahman a ni a, zirlaibu hi bung 30 zelin siam nise tha tih a ni.

2. PCD kumtawp exam chu a hun ngai Nov.29 Pathianniah neih leh tur a ni ang a, answer paper chu mahni Local theuhin in endik tur a ni ang.

3. PCD day December ni 13 Pathianni hian Local tinin mahni remchan dan ang theuhin Day hi hman nise tha tih a ni a, Day thuchah  District atangin thawhchhuah nise tha tih a ni .

4. Hruaitu hlun (chawl lova kum 10 hruaitu) chawimawina hi nakum District Conference hunah in hlan nise tha tih a ni
——-
Churachandpur District :

June ni 21, Pathianni khan Songpi kholui, Thangting Section ah District Suptd Rev. Paosei leh District Trea Pastor. B.Lalzamluaia ten inkhawmna an neih pui a, S.Molhoi Thangting Section Hqtrs Local ah Rev.Lalzawma Dist.Secy chuan hun a hmang thung. Hrileng boruak karah Kohhran hote tlawhin rawngbawlna tluang takin an nei a, an rawngbawlna Kohhran hoten an hlut hle.
——

June ni 26, Zirtawpni khan Churachandpur District Suptd Rev.Paosei chuan March 16, Thawhtannia an khua an halsak Chassad tlawhin a fehchhuak a, Kohhran hrang hrang hruaitu te nen he hmun hi an tlawh a ni.

District Suptd hian June ni 28, Pathianni khan Kangvai Local Tuibong Section ah Kohhran te tlawh in rawngbawlna a nei.
——-

North Mizoram District  :

North Mizoram District Office, hun engemaw chen hrileng avanga kalphung pangaia an kal tawh loh hnuah, Sorkarin inkharkhip thladul a puan tak avangin fimkhurna kawnga Sorkar thu zawm chungin July ni 1, 2020 atang khan Office kal hun pangaiah nitin an kal tawh dawn a ni.

District in dan a neih angin Office hi zing dar 9:30-ah tanin tlaiah dar 4:30pm ban thin a ni, hemi chhung hian District Office chu engtik lai pawha dawr theih a ni tawh dawn a ni.
——

Member thar :
Tun hnaia North Mizoram District chhunga member thar report tlangpui te :

June ni 30 thawhlehni khan Sialsuk Bial, Sialsuk Kohhranah member thar pakhat  Sialsukah seng luh a ni. Member thar hi Bialtu Pastor Rev. K. Vanlaldika’n tawngtaina neiin Kohhranah a senglut.

June ni 29 thawhtanni zan khan Kawnpui Bial chhungah pawh chhungkhaw khat member thar 3 Kawnpui Kananah sengluh an ni a,  Evan. Lalramhluna Hmar in Pentecost kohhrana lawi turin Lalpa Isua hmingin a senglut a ni. Hemi rual hian Nau 1 hlan niin mi 1 in sual ngaihdamna baptisma a chang bawk.

May ni 31 khan Tuipuibari Persang Home Missions Field ah, Missionary Evan Isak Lalrohlua leh kohhranhote rawngbawlna kaltlangin mithar nupa tuakkhatte’n Pentecost kohhran an zawm a. Persang Missionary Evan. Isak Lalrohlua  chuan Field Quarters ah Lalpa Isua hmingin Kohhranah a senglut a ni.

July ni 1 Nilaini zan khan Headquarters Bial Mission Vengthlang Kohhranah mi thar pakhat sengluh a ni a, North Mizoram Distirct Missions Department Treasurer Evan. MS Dawngliana  chuan sual ngaihdamna Baptisma Lal isua hmingin a chantir.

June ni 28 Pathianni khan Tharma khua a, Sailut vengah Sis. Vanlalpeki, Ṭuahzawl khua Missionary volunteer rawngbawlna aṭangin Chhungkaw 8, Member thar 39 te chu kan kohhranah seng luh an ni a. Baptisma chang thar 10 awmin nau 8 hlan an ni a, baptisma lo chang tawh sa 2 neih a ni bawk. Heng mithar te hi Tlangsang Bial hmalaknain lukhum leh register bakah kohhran mamawh thilte pek nghal an ni bawk.

Sis Vanlalpeki hi Tlangsang bialah hian January 22, 2020 aṭang khan mahni in-volunteer in a thawk thla a, an bial Lengpui bial, mi tlawmngai hrang hrang te leh Tlangsang bial mipuite zarah tun thlengin nghei lovin rawngbawlna a nei thei zela, rawngbawltu chhawmdawl hna thawktute chungah Tlangsang Bial hruaitute an lawm hle a ni.
He rawngbawlna hlawhtlin nana mi pawimawh tak pahnih Bro Lalrivunga leh Sis Kross Chhuanawmi te nupa Sihphir leh an mi rawih missionary Bro C. Sangliana, Zomuantlang khua te chungah Tlangsang Bial hruaitute chuan lawmthu an sawi bawk. Bro C. Sangliana hi a remchan dan ang leh a tul hun apiangin Tlangsang Bial chhungah hian rawngbawlna a nei a, ani hi Sihphir Bial LAD President Sist Kros chhuanawmi te chhungin an ruai mek a ni.
Tharma khuaa kohhran thar dinna programme hmanpui hian Tlangsang aṭangin T. Upa Vanlalruala, T. Upa Lalmawia, T. Upa Ramtharmawia leh Sis Heno-i ten bialtu pastor hi an ṭawiawm a ni.
——–
Tanpuina hlan :
June thla kalta khan Bro Jacob Ngursangkhuma of Durtlang Mualveng te chuan, Tlangsang kohhrante’n Biak buk an sak mek tanpui nan Tlangsang Kohhran hruaitute hnena tangkafai ₹ 20000/- (Singhnih) an pe a, kohhranhote an lawm hle.

Tin hei bakah hian Tlangsang Kohhrana lawi Upa Lalrinkima te chhung hmalakna in  bricks 2500 lai a thlawnin kohhranhote’n an dawng bawk a, heng bricks man te hi ₹ 37500/- man lai a tling a, kohhranhote malsawmna an dawnah an lawm hle a ni
——
Rawngbawlna kalpui zel :
North Miozram District-chhunga rawngbawltu engemaw zat te chuan hrileng karah pawh VLTF leh LLTF hriatpuinain rawngbawlna tluang takin an kalpui mek zel.

Kanghmun Bial chhung Darlung khuaa rawngbawl mek Evan BT-a hnen atanga thu dawn danin Lockdown tirh khan Khawrihnimah kohhranh Bial hriatpuia rawngbawlna neiin, a rawngbawl chhung hian Khawrihnim Kohhranah Sual ngaihdamna Baptisma chang Mi 17 an awm bakah Thlarau Thianghlim dawng thar mi engemaw zat an awm tawh a. A rawngbawlna hmun Darlungah pawh Inkharkhip chhung khan Sual ngaihdamna Baptisma chang Mi 4 awmin baptisma an chang thar a, YMA Info Mike atangin Pathian thuchah sawiin Mike service tum 3 lai a nei bawk.

Evan. T. Vanlalruata kaihhruai Apostolic Revival team chuan Kolasib venglai bial chhungah mi hlate’n Lalpa an hnaih zel theihna turin Home Crusade an nei thin a, Crusade hi Kol Venglai Bialtu Pastor Rev. B. Vanlalruata leh bial chhung thalai thahnem tak ten an tawiawm thin bawk.

June 21st, Pathianni khan Isua hminga sual ngaihdamna baptisma chang mi 7 awmin; June ni 27 inrinni zan khan Pangbalkawn VLTF  ruahmanna hnuaiah khawtlang huap mike service neih a ni a, hetah hian Evan T. Vanlalruata hian rawngbawlna a nei bawk. Apostolic Revival Team Speaker Evan T. Vanlalruata hi Tunah hian Kol Bial chhunga rawngbawltu mamawha  sawmtu apiangte in lamah Home crusade neihpui zelin, Bialtu pastor hoin bial chhung Local hrang hrangah Ke sil rawngbawlna neih thin a ni bawk. kohhranhoten an hlawk pui hle a ni.
—-
PYD Member ralna hun hmang :
North Mizoram District PYD hruaitute chuan Bro. Lalhruaitluanga Samtlang, quarry chimin a chhilh avanga nunna chan ta chu June ni 30 thawhlehni khan Samtlanga an chenna inah ralna an nei.

Bro. Lalhruaizela ralna hun hmanah hian hun kaihhruaina Dist PYD Sec Evan. K. Rotluanga’n neiin; Dist. PYD Treasurer Evan. C. Lalruatsanga’n tawngtaina a hmang a, Dist. PYD President Evan. J. Vanlalruata’n thlamuanna thuchah a sawi bakah Tlangnuam Bial PYD President Bro. Lalmuanawma’n a sawi bawk a, Tlangnuam Bialtu Pastor Lalruatkima Fanaiin Malsawm tawngtaina a neih sak thung.

Vanduaina a tawh avanga nun chan ta Bro. Lalhruaitluanga hi, North Mizoram District chunga PYD amah lainattute’na thawhlawm an thawh tlingkhawm ₹ 47,000 chu Dist. PYD Treasurer Evan C. Lalruatsanga’n a hlan a ni. (Pic Lalhruaitluanga)
———-
School admission :
Covid 19 hrileng avanga Mizoram Sawrkarin Total Lockdown a puan nghawng chuan School kal hun a tichiang hlei thei lova. Hetihruala Mizorama hrileng dinhmunin zialam a pan chhoh zel avangin Zirna tan hun tur pawh tihchian beiseina a awm lian hle tawh a ni.
PG Higher Secondary School chuan a hnuaia mi ang hian Admission chungchangah ruahmanna a siam:-
1. Admission hi July ni 1 Nilaini atangin nitin Office kaini apiangin dar 9 : 30Am – 2 : 30Pm chhungin Office ah tih theih reng a ni ang.
2. PGHSS ah hian Class IX, X leh Higher lamah Class XI & XII (Art Stream, Subj – History, Economics, Pol Science & Education) te tan admission hi tih theih a ni
3. PG School Marict Exam hnuhnung ber dinhmun:
Class X = 60%
Cass XII = 100%

4. Admission fee & Monthly fee chungchang: High School section lamah school inrelbawlna tur atan chauh tiin Parent Contribution Rs 100/- lak thin a ni.
– Higher section lamah Kohhranin Sum leh Paia nasa takin a puih avangin Monthly fee Rs 200/- chauh lak thin a ni.
Admission fee
– High School – Rs 1,520/-
– Higher Section – Rs 1,800 + 200 (fee for 1 month)
School chinchang leh Admission chungchanga hriatduh nei tan Office
i/c Pu C Lalrammawia
Ph – 8794026208 leh Principal Evan. JH Malsawmdawgliana Ph – 9612020423 ah te zawhfiah theih reng a ni ang.