Pennet News Service : June 2 – June 9
Pentecost Day :
June ni 9, Pathianni Pentecost Day hi India hmarchhak huamchhunga Pentecost Kohhran te chuan urhsun taka hmang turin ruahmanna an siam a, Aizawl khawpui chhunga Local tamzawk chuan ruai nena an hmang dawn a, Sawhchiar, thingpui leh chhang nena hmang tur engemawzat an awm bawk.
He hunpui puala Revival Programme buatsaiha Zirtawp zan atanga hun hmang tan Local engemawzat an awm a, Inrinnia lawmthusawi chawimawina buatsaih Local thahnem tak an awm bawk.
General Suptd Rev. Lalmalsawma Sailo chuan Pentecost Day hmang tura inbuatsaih India hmarchhak Pentecost Kohhran hote chibai bukin; Thlarau thianghlim awmpuina leh malsawmna hnuaia hlim taka he hun lawmawm tak hmang theuh turin duhsakna a hlan a ni.
———
General hruaitute Programme :
NEI UPC General Treasurer Rev. Zohmingthanzama te chhungkua chuan an lawina, N. Mizoram Dist Hqrs Kohhranah June ni 8, Inrinni khan Pathian hnena lawmthusawi chawimawina an buatsaih a, Pentecost Day lawmna nena Pathianni zan thlenga chhunzawm turin programme an siam. He Chawimawina programme-ah hian General Suptd Rev. Lalmalsawma Sailo leh Rev. R. Lalrosanga te Speaker atan an ruai.
General Secretary Rev. R. Lalrinsanga chuan June ni 4 atanga ni 6 chhung khan Barak District chhunga Bialtu Pastor te puala Seminar-ah Resources Person-ah tangin rawngbawlna a nei.
General Missions Director Rev. R. Lalhawia chuan June ni 5, Nilaini khan Aizawl chhuahsanin Arunachal Field, Aalo-ah Field board neiin hun a hmang a, ruahman dan chuan June ni 12, Nilaini hian Aizawl panin a let ang.
General Sunday School Director Rev. R. Laichhingpuia chuan ITI Kohhranin Pentecost Day a hmanna Inrinni zan atanga Pathianni zan thlenga Programme a buatsaihah Speaker-ah tangin rawngbawlna a nei.
——-
Aizawl City PYD Co-Ordination Committee :
Aizawl City PYD Co-Ordination Committee chuan May 30, Ninga zan khan Aizawl East Dist Comtt Room ah Meeting an nei.
Meeting hi City PYD Co-Ordination Committee Chairman Evan K. Lalrotluanga’n a kaihruai. An rorel tlangpui te :
1. Social Work Day hman dan tur chungchang ngaihtuahin; sawrkar Hospital remchang tur biaka Thisen pek nise tih a ni.
2. July 20-21 chhung hian Revival meet, N Mizoram Dist Hqrs Kohhran Biak inah neih nise tha tih a ni a, Speaker atan Aizawl East Dist PYD President Rev. R. Laltlankima leh N. Mizoram Dist PYD President Evan F. Lalngaihawma te ruat an ni a.
Hemi pual Budget atan ?30,000 dah a ni.
3. Civil Hospital kawta Hoarding Board siamthat nise tih a ni.
He meeting hi General PYD Secy Evan Ms Dawngliana chuan a telpui a ni.
——
Pentecostal School of Ministry (PSM) :
North Mizoram Dist. hnuaia Pathian thu zirna Pentecostal School of Ministry (PSM) Kum 2019 session chu June ni 3 Thawhtanni khan Registration Day hmangin bul tan a ni.
Registration Day hman inkhawm hi Headquarters Kohhran Biak in, Tuikhuahtlangah neiin, inkhawm PSM Principal Rev. Laltluangan a kaihruai a, Zirtirtute leh Registration Day hman inkhawm chhimtute hmelhriattirna neiin Registration Day hi District LAD hruaitute bakah NMD Office staff ten hovin Sist Lalrinmawii Maubawk chu zaia rawngbawlna nei turin sawm a ni bawk.
Dist. Secy Rev. Chhiarpuian Psm zirlaite hming chhiarchhuahna a neih bakah PSM zir hun chhunga Zirlaite hriattur pawimawh puanna neiin, 3rd Years zirlaiten Practical training an neih dan tur leh Practical sermon an neihna tur kohhran te puan a ni bawk.
Dist. Treasurer Rev. K. Lalduhsanga’n PSM zir hun chhunga zirlaite an mamawh anga hman tur sum chungchang ruahman a nih dan a tarlan bakah Chairman sawm angin Dist LAD aiawhin Sist. PC. Lalromawii B/w Dist LAD President dingin thusawina a nei a, PC Lalromawii hian Zirlaite an an zirlai zirna kawngah Dist LAD aiawhin duhsakna hlanin Bible in zirtirna a neih anga “Hna tha tinreng thawk tura kan famkim theih nan Thu takah leh Thlarauah kan khat tur a ni” a ti a. PC Lalromawii hian Dist LAD tena PSM zirna an neih theih nana Sponsorship an lo pek thin Rs. 50000 chu hlan turin Sist Laldawngliani Dist LAD Secy. sawmin Anin thilpek hi PSM Treasurer Rev. K. Lalduhsanga hnenah a hlan a ni.
Rev. C. Lalmuanpuian thusawina a nei a. Ani hnen atang hian Dist in Bible zirna bul a tan atanga a kal chhoh zel dan te sawiin zirlaite chuan an zirna ngaihlua a zahawmna vawngnungtu ni zel tur leh rawngbawlna kawnga mi tangkai tak ni tura fuihin duhsakna a hlan.
Inkhawm chhung hian Zaia rawngbawl tura sawm Sist. Lalrinmawii Maubawk chuan tum hnih fakhla mawi leh thiam takin a sa bawk.
Dist. Missions Director Rev. C. Lalthantluanga chuan lawmthu a sawi a, Dist. Treasurer Rev. K. Lalduhsanga’n Malsawm tawngtainain he inkhawm hi a tin a ni.
——
Usher Training :
North Mizoram District PYD Board rorel bawhzuiin June ni 3 leh 4 chhung North Mizoram District huam chhung Bial 30-a Bial aiawh thalai ten Usher Training an nei.
Usher Training hi North Mizoram District Hqrs. Biak in Tuikhuahtlangah neiin Hunserh inkhawm Dist PYD President Evan F. Lalngaihawman a kaihruai a, Dist Suptd Rev. Laltluanga Leh Rev. K. Lalduhsanga Dist. Treasurer ten hovin Dist. Supdt Rev. Laltluanga hian he inkhawm hlanna leh hawnna neiin PYD te thlen chin atanga hmasawn duhna rilru an neih avanga a lawmthu a sawi bawk.
Training hi June ni 3 thawhtani chhun leh zan bakah June ni 4 thawhlehni chhun leh zan thleng neih niin; Evan F.Lalremruatpuia, Lunglei Farm veng chuan zirtirna Power Point Presentation hmanga neiin PYD ten an hlawkpui hle a ni. Ushering zirtirtu Evan F. Lalremruatpuia chuan Usher hna chu Pathian rawngbawlna ropui tak a nih avangin a chanvo leh mawhphurhna hi a sang hle a ni a ti.
North Mizoram District PYD buatsaih Usher Training-ah hian Bial 30 atangin Bial aiawh mi 58 an tel thei a, kalkhawm thalaiten an hlawkpui hle a ni. Traning hi June ni 4 thawhleh zanah zovin District Secretary Rev. Chhiarpuia’n tawngtaiin hun tawp a hmanpui a ni. (Pic. Usher Training )
——
Biak in hawng :
June ni 2 (Pathianni) khan Rengdil Bial chhunga awm Sihthiang kohhran Biak In sak thar NMD Supdt. Rev. Laltluanga’n Pathian hnenah hlanin a hawng.
Sihthiang Biak in hawn inkhawmah hian Bial chhung mipuite thahnem tak an kalkhawm a, bial chhung bakah Lungsei, Zawlpui, Sihphir, Bairabi atang te pawhin he Biak In hawnna Programme hi an rawn hman pui bawk a ni.
Biak in hawn inkhawm hi bialtu Pastor C.Lalthlengliana’n kaihruaiin. Sihthiang khuaa rawngbawltu Evan Lalhrechianga Technical report a pe a, Evan F.Lalchhuangliana, bial secretary-in Sihthiang kohhran dinhmun tlangpui a report bakah bial hmingin lawmthu a sawi bawk
Rev.Laltuanga District Superintendent chuan thusawina a nei a, District atang leh bial leh mimal thahnemtakin Sihthiang kohhrante hi duhsakna thilpel an hlan.
Sihthiang kohhran biak In sak lungphum hi Bialtu Pastor C.Lalthlengliana’n phumin, a dung 36ft. leh avang 18ft a sak a ni a, Rengdil Pentecostal Men fellowship (P.M.F) ten work camp in an sa a, ni -8 chhung an sa a ni. Biak in pum nana Tha sen zawng zawng belhkhawm hi tha -158 a ni.
District atangin biak In sak tanpuina Rs 150,000 (Cheng Nuaikhat leh singnga ) dawngin Rengdil Bial, Lungsei kohhran, Rengdil bial L.A.D, Rengdil kohhran L.A.D, Sialsuk kohhran, Chamring kohhran, Sihthiang kohhran atangin sum hmuh belh a ni a, Bro.Remnghakliana’n Pulpit, Maicham, Lecturn , Chair a rawn donate a, Bro.Lalnunfela Zawlnuam B.D.O in electrict wiring-na a tum piah lamah Rengdil kohhran te’n biak In dar an pe bawk a, biak In sak nana sum sen zawng zawng hi Rs. 224,956 (Cheng nuai hnih singhnih sangli zakua sawmnga paruk ) a ni.
Sihthiang kohhranah hian member -120 an awm a, kum 2017 April ni 29 khan Sihthiang kohhran hi din a ni, Bro.L.C Enga, Evan H.Lalnunmawia, Evan C.Laruatsanga te’n rawngbawlna an lo nei tawh a, Tunah hian Evan Lalhrechianga’n rawngbawlna a nei mek a ni, Biak In hawn ni ah hian Mithar -9 sengluh a ni a, mi -3 in sualngaihdamna baptisma an chang nghal a, Nau -1 hlan nghal a ni bawk.
Tlaiah Biak In thar lawmna ruai theh nghal a ni.
——
Seminar :
N. Mizoram District Maubawk Bial LAD te chuan June ni 5, Nilaini khan General Hqrs Commt Room, Mualpui Salem veng Aizawlah Seminar an buatsaih.
Seminar ah hian thianghlimna tih thupuiah hmangin Resources Person atan Bial LAD Secretary Sis. Pc. Vanlalzawni an hmang a, sawihona hlawkthlak tak hmangin member kalten an hlawkpui hle.
——-
HIV/AIDS Awareness Campaign :
North Mizoram District PYD chuan June ni 5, Nilaini khan HIV/AIDS Awareness Campaign an nei.
He hun hi North Mizoram Dist. PYD President Evan F. Lalngaihawma chuan a kaihruai a. Rev. C. Lianchama Head Quarters Bialtu Pastor in hunserh hmangin Sam 127:3-5 thu a chhiar a, nu leh paten an fate beiseina sang tak nena an thlir thin thu leh HIV/Aids avanga beisei tlak loh fa nih a hlauhawm thu sawiin thalaite fimkhur turin a a chah.
HIV/Aids awareness campaign-ah hian Resource Person atan MSACS Divisional Asst.Pu. P. Laltlanmawia, hman niin; Resource Person hnen atang hian HIV/AIDS Khawvela a lo lan chhuah dan leh kan rama a lo thlen dan te leh tuna kan dinhmun mek te chiang taka sawiin India ramah AIDS vei tamna ber State kan nih mek avanga hemi veng tura Kohhran thalaiten mawhphurhna kan neih dan te leh HIV/AIDS chungchanga hriat tur pawimawh tak tak te Power Point Presentation hmangin zirtirna a nei a ni.
——-
Registration Day :
Lunglei District UPC-in thla khat awh Pathian thu zirna a neih Pentecostal Bible School (PBS) chu kumin atan kal tan a ni leh ta a, June 4 thawhlehni khan Registration Day hman a ni.
Registration Day hi UPC Conference Hall-ah hman niin, Rev.C.Vanlalena, Principal PBS chuan a kaihruai a, Rev.PC.Lalfakawma, Secretary PBS chuan inhmel hriattirna neiin, PBS Dean, Pastor K.Vanlalhruaia chuan thusawina a nei a, PBS Teacher Rev.C.Lalrintluanga kaihhruainain Student hruaitu thlanna neih chhunzawm a ni a, District Missions Director Rev.R.Vanlalenga chuan tawngtainain Registration Day hmanna hi a khar a ni.
Kumin hian PBS-ah hian Student 24 (1st Year, 2nd Year leh 3rd Year-ah te Student 8 theuh) an awm a, kumin hian Subject 7 an zir ang. Heng te hi kumina an Subject zir tur leh zirtirtu turte an ni.
Bible Geography- Rev C. Vanlalena
Bible Survey – Rev PC. Lalfakawma
Missions & Evangelism – Rev PC. Lalfakawma
Christian Living – Rev C. Lalrintluanga
Pentateuch – Rev C. Lalrintluanga
Life Of Christ – Pastor K. Vanlalhruaia
Acts – Pastor K. Vanlalhruaia
Pentecostal Bible School (PBS) hian July 7 Pathianniah Headquarters biak inah Graduation Day an hmang ang.
——-
Pentecost Day :
June 9 pathianni hi Pentecost Day anih angin Local hrang hrangten he ni hi urhsun takin a lawm dan tur an ruahman a, hetiang hi District hruaitute hun hman dan tur a ni ang.
– Superintendent, Rev.C.Vanlalena chuan Bungtlang Local-ah Pentecost Day hi a hmang ang a, June 10 thawhtanni ah Bungtlang biak in sakna tur lungphum a phum nghal ang.
– Secretary, Rev.PC.Lalfakawma chuan Theiriat Local-ah Pentecost Day hi Speaker niin a hmang ang
—–
HIV/AIDS awarness campaign :
Lunglei District PYD Conference-in HIV/AIDS awarness campaign neih nise tia a lo rel bawhzui nan June 7 zirtawpni khan Venglai UPC biak inah Trainer’s Training neih a ni a, he hunah hian bial aiawhin member 2 theuh an kal khawm a, Resource Person atan Pu R.Laltanpuia, District project officer, North East Technical Support Unit, MSACS hman a ni.
——
Career Guidance :
Lunglei District PYD Education Committee chuan June 8 inrinni khan District UPC Conference Hall-ah kohhran chhunga pawl 10 leh 12 pass tharte lawmpuina leh an pualin Career Guidance an buatsaih a, hetah hian pass thar te lawmpuina momento an hlan bawk.
——–
Mi thar :
June 2 pathianni khan Lunglei Dist.Missions Director Rev.R. Vanlalenga chuan Putlungasih Missions Field-ah mi thar 1 kohhranah a seng lut.
——
Joining report :
June 3 thawhtanni khan Lunglei District Board vawi 196-nain Pastor atana a lak thar, Evan.Lalengzauva leh Evan.K.Lalnunpuia te chuan District Superintendent hnenah Joining report an pe.
Joining report petute hi District Superintendent Rev.C.Vanlalena bakah District Secretary Rev.PC.Lalfakawma leh Treasurer Rev.C.Lalrintluanga te chuan lo dawngsawngin an kal leh zelna tur atana thu pawimawh tak tak hrilhin, tawngtaisakna an lo nei a ni.
Pastor K.Lalnunpuia hi June 9 pathianni ah Dist.Treasurer Rev.C.Lalrintluanga chuan Cherhlun biak inah lawmluhna a nei ang a, Pastor Lalengzauva hi June 16 pathianni ah Dist.Secretary Rev.PC.Lalfakawma chuan Bunghmun biak inah lawmluhna a nei bawk ang. (Pic.Joining Report)
——–
Pastor Transfer :
Lunglei District Board vawi 196-nain bialtu Pastor a transfer-te chuan June 1 atang khan an bial thar tur ah theuh mawhphurhna an la tan a, hetiang hian an awmna tur bial an thleng ang.
1. Rev.K.Lalchhuansanga, Chhipphir bialtu Pastor chuan a awmna tur Theiriat bial June 12-ah a thleng ang.
2. Pastor LH.Lalchhandama chuan Bunghmun bial atangin a awmna tur Chhipphir bial June 12 hian a thleng ang.
3. Pastor Lalengzauva chuan a awmna tur Bunghmun bial chu June 12 ah a thleng ang.
4. Pastor K.Lalnunpuia chuan June 7.
5. Lunglei District atanga Delhi chaplain-a kum 2 chhung awm tur Pastor Jerry Lalmuanawma pawh Lunglei District chuan June 1 khan a release-a, Delhi Chaplain-a awm tur hian June 15-ah General Superintendent hnenah Joining Report a pe ang.
——
Financial Campaign :
Tlabung bial Conference-in a lo rel angin June 1 inrinni zan khan Chawnpui Local-ah Financial Campaign neih a ni a, June 2 pathianni ah Zodin Local-ah Campaign hi neih chhunzawm leh niin zan lamah Tlabung Local-ah Campaign hi khar a ni a, Speaker atan bialtu Pastor R.Lalremsiama an ruai.
——-
Church Leadership :
June 2 pathianni hmang khan Bualpui H Local-ah Church Leadership tih thupui hmangin seminar neih a ni a, Resource Person atan bialtu Pastor H.Lallawmsanga hman a ni.
——
Crusade buatsaih :
June 7 zirtawp zan atang khan Mualcheng S Local te chuan June 9-a Pentecost Day lo thleng tur pualin Crusade an buatsaih a, Speaker atan Chengpui Home Missionary Evan.Simona Hmar chu hmangin, June 8 inrinniah Pathian chawimawina ruai an buatsaih bawk.
June 7 zirtawp zan atang vek khan Zotlang Local-te chuan Crusade an buatsaih a, Speaker atan Luangmual bialtu Pastor Rev.Lalbiakdika Chawhte chu an hmang a, June 8 inrinniah Pathian chawimawina ruai an buatsaih bawk.
———
Apostolic Bible School :
Chhimtuipui District in thlakhat awh Pathian thu zirna a kalpui Apostolic Bible School chuan May ni 31, Zirtawpni khan Registration Day hmangin kumin 2019 session an tan leh ta.
He hun hi Principal Rev.Thanchunga Sailo chuan kaihruaiin Rev.Joseph L.Thlauhthang Registrar hnen atangin zirlai te hriat tur leh ABS rules and Regulation ngaihthlak a ni a, Rev.WL Thanghre leh Rev.Kholy Hlychho te hnen atangin fuihna thuchah ngaihthlak a ni.
June ni 3, Thawhtanni atang khan Class kal tan nghal a ni. Zirtirtu te leh an subject lak turte :
1. Rev.Dr.C.Sihmo – 1) Mission 2) Acts of Apostle
2. Rev.Kholy Hlychho – Bible Servey
3. Rbt.Hmangaihzama – 1) Penteteuch 2) Christian Living
4. Rbt.LS Lalhmingmuana – Life of Christ
5. Rbt.Jona Lalhrintluanga – Bible Geography
——–
District PYD Board :
June 05, Nilaini khan Dist Committee room, New Siaha ah Dist PYD Special Board Meeting neih a ni.
Dist board thurel tlangpui:-
1. Lawngtlai West Dist an indan tak avangin Kum 2019 District PYD Budget ennawn a ni a, siamrem nghal niinRs.234,300/-(nuai hnih singthum sangli leh zathum) pawm tlan a ni.
2. 43rd District PYD Conference vwi 43na thupui atan, “Lalpa duh zawng” Ephesi 5:17 chu hman a ni ang. Conference ah hian International Evangelist Rev.Elvis Buai USA chu beisei niin, Dist kohhranpui kaltlangin sawm a ni ang.
3. Short term missionary rawih chhunzawm zel tur niin, a chhawr tur leh field erawh Dist Mission Board kutah dah a ni.
4. Conference chhungin Bible study neih tur a ni.
5. Conference thlengtu inbuatsaihna pualin Dist chhung local tin ten fehchhuah neih nise, fehchhuahna atanga sum tlingkhawmte chu October thla ral hmain bial kaltlangin Dist PYD tgehluh tur a ni. Dist hian Conference thlengtu hnenah ahlan veleh ang.
6. Dist PYD Evangelism tour neih tur niin, he hunah hian bial tin hruaitu teleh Dist PYD board member te chu group ah inthenin rawngbawlna annei ang.
7. General PYD in flag size leh shape thar aruahman avang leh PYD logo siam ?hat anih tak avangin Dist chhunga local leh bial tinte flag siam ?hat nise. June thla ral hma in Dist secretary hnenah inreport tur a ni.
——
District Missions Board :
June ni 5, Nilaini khan Chhimtuipui Missions Board, Dist Committe room ah neih a ni a, he board hi Dist MS director thar Rev.Dr.C.Sihmo kaihhruaina hnuaiah neih a ni.
An thurel langsar zual te :
1.Dist.Mission Conference, Niawhtlang a neih turah Speaker neih ni se.
2. Pangkhua Missionary a tan Evan.Hc.Hmingtinthanga lak niin, Dt.10.6.2019 Thawhtanniah Joinning report pe se tih a ni.
3.Dist Missions Director Quater chu a tul anga thawm that nise.
4.Evan.Robert B.Lalnunsiama T Amobuy Mission field a thawklai chu Riasika Mission field kawp tura tih anih tak avangin approval pek a ni a. Missionary lawmman pangai alak bakah thlatin Rs.1000.00 pek belh nise tih a ni.
5. Gen.Executive Rorelnain mahni Dist.huamchhunga thawktute chu concern Dist.in a chhawr zui ang a tih chu ?ha tih tlan a ni. Hei hian Pastors, Missionaries leh Evangelist Teacherte a huam vek ang.
6.Dist.PYD Chhawrlai Hmunnuam mission field Evan.C.Lalhmangaiha chu tun term chhung hi chu Chhimtuipui Dist Mission Dept kal tlanga chhawr zui a ni ang.
——–
Biak in hawng :
Siaha Bial chhunga Dist Home Mission Field Riasika Biak In chu June ni 2, Pathianni khan Dist Suptd Rev.Thanchunga Sailo chuan Pathian hnenah hlanin a hawng.
Biak in hawn programme hi June ni 1, Inrinni zan atangin tan a ni a, Bialtu Pastor Rev.Kholy Hlychho leh Bial Secretary Upa.H.Ramhluna ten inkhawm an kaihruai thin a, District hruaitute hnen atangin Pathian thuchah ngaihthlak thin a ni bawk.
June ni 1, Inrinniah District Secretary Rev. Joseph L. Thlauhthlang chuan Pathian thuchah a sawi a.
June ni 2, Pathianni khan District Suptd Rev. Thanchunga Sailo chuan Biak in thar chu Pathian hnenah hlanin a hawng a, Biak ina lawi tur Kohhran ho zawng zawngte duhsakna leh malsawmna chibai a buk a; Pathian thuchah a sawi a. Siaha bial chhunga Dept hruaitu:- Pastr.J.Chawnthanga MS Director, District PYD President Evan.T.Vanlal?ana leh Siaha bial LAD President Sis. H.Vanlalthangi BW ten thutawi an sawi bawk. Biak In thar lawmna pual hian tlai lamah ruai buatsaihin hlim takin an kil ho a ni.
Biak In hi adung 36ft leh avang 18ft a zau a ni a. Siaha bial kohhrante chuan Biak In sa hian tum hnih Work camp neiin an riak lut a ni.
Pathianni zan lamah District Treasurer Rev. W.L Thanghre chuan Pathian thuchah a sawi thung.
Riasika hi Dist Evangelist ?huthmun niin Evan.N.Thanghnuna’n hun reitak a?hutchilh hnuin tunah hian Evan.Robert B Lalnunsiama T chuan he hmun hi a enkawl mek a ni.
June ni 8, Inrinni zan atang hian Chhimtuipui Dist Mission Director Rev.Dr.C.Sihmo chuan Riasika ah hian rawngbawlna a nei a. He hmunah hian Pentecost Day a hmang nghal dawn a ni.
—-
Pastor mawhphurhna la :
Pastor.V.Lalhlimpuia chuan June ni 04, Thawhlehni atang khan a bial thar Niawhtlang bial chu vawng tan in, sectional pastor mawhphurhna a la.
Niawhtlang Bialah hian Local-5 awmin, khaw li a tuam mek a ni.
—–
Crusade :
Gospel Crusader team speaker Evan.K.Lal?anmawia chuan tunhnai a Local dintharna Sangau Bethel kohhranah crusade a nei.
Evan.K.Laltanmawia hi a rawngbawlpui mi 10 vel ten zuiin June ni 5-9 chhung hian rawngnawlna nei tura ruahmanna siamin, he hmunah hian Pentecost Day ahmang ang.
——
Golden Jubilee lawm :
Chhimtuipui District, Tuipang L Local Ladies Auxiliary Department chuan May ni 31 atanga June ni 2 chhung khan an Local LAD kum 50-na Golden Jubilee an lawm.
Jubilee lawmna pui ber hi June ni 2, Pathianni khan neih niin ruat bik ten Jubilee dar an vua a, Jubilee puala lungphun, Dist LAD President T.Lallianmawii BW in hawngin; bialtu pastor Robin MH Lalthanmawia’n thusawi rawngbawlna a nei a ni.
——-
Rawngbawlin fehchhuak :
Revival Pastor.C.Lalchhuanthanga leh Dist Evangelist N.Thanghnuna te chuan June ni 1-2 chhung khan Sangau bialah rawngbawlna an nei.
Dist revival pastor leh Evangelist hian Sangau I leh Sangau II ah kalin an rawngbawlna Kohhran hoten an hlut hle a ni.
———
Pentecost Day lawm :
June 9, Pathianni hi Pentecost Day a nih angin Aizawl East District chhunga Tualchhung Kohhran hrang hrangte chuan urhsun takin an hmang dawn a, Tualchhung Kohhran Church Board Committee chuan Programme hranpa siamin hun an hmang hlawm dawn a ni. Ran talah Kohhran huapa ruai buatsaih tum engemawzat awmin; Local thenkhat chuan thingpui leh chhang, sawhchiar siamin he ni hi hman an tum thung.
District Kohhranpui hruaitute chuan hetiang hian an hmang ang.
Rev Rosanga Kawlni, District Superintendent chuan Nilai zan khan Mualpui Kohhranah rawngbawna neiin Pathianni chawhma hian Salem Kohhranah rawngbawlna a nei anga, zanah ITI Kohhranah rawngbawlna a nei leh ang.
Rev Biaksangzuala, District Secretary chuan Pentecost Day hi District Hqrs. Kohhranah hmangin Pathianni Chawhma Inkhawmah thusawi rawngbawlna a nei ang.
Rev Vanlalfela Ramtiam, District Treasurer chuan Pentecost Day hi Bethlehem Kohhranah a hmang dawn a ni.
—–
Biak in hawng :
June 1, Inrinni khan Khawbung Bial Hqrs. Biakin sak thar chu Rev Rosanga Kawlni, District Superintendent chuan UPC North East India Biakin pakhat ni turin Pathian hnenah hlanin a hawng.
Biakin pawnah hun bul tanin; Rev Rosanga Kawlni chuan UPC North East India Biakin pakhat ni turin Pathian hnenah hlanin a hawng a. Biakin chhungah Bialtu Pastor HP Ramfangzauva kaihhruaiin Inkhawm neih chhunzawm a ni a, hetah hian Khawbung Kohhran Secretary Upa H Lalmalsawma chuan report pe a pek bakah Khawbung khawtlang NGO hruaitute bakah mi hrang hrangte hnen atangin thusawi tawi ngaihthlak a ni a, Rev Rosanga Kawlni hnen atangin Pathian thuchah ngaihthlak a ni bawk. Khawbung Biakin thar lawmna atan hian tlai-ah hlim takin ruai kilho a ni.
Khawbung Kohhran Biakin hi Kum 1994 khan luah thei lova kalh niin chu Biakin kalh reng tawh chu Kum 2017 February thla khan Kohhran mipuiten an luah luh leh theih nan Rev Rosanga Kawlni, District Superintendent chuan hawngin Biakin hi chei that lohvin Kohhran mipuite chuan an luah lut a, District lamah thiah leh sak that phalna hmuh a nih hnuah Kum 2017 June thla khan thiah hna thawkin October 2017 khan Biakin thar sakna tur atan Rev Rosanga Kawlni bawk hian lungphum phumin Biakin thar sak hna hi November 2017 khan bul tan a ni a, hun engemaw chen sak a nih hnuah November 2018 khan sak zawh a ni.
Khawbung Biakin sak nan hian mimal mai bakah District Kohhranpui leh Department hrang hrang ten tanpuina an pe a, Rev R.Pahlira te chhungkua chuan an fanu Sis.R.Lalhmudiki hriatreng nan a chung leh a bang an tum bakah Sis Betty H. Lawmsangpuii chuan a pa Rev H Vankunga hriatreng nan Pulipit leh maicham a tum a, Bazar Bial Missions Department ten Work Camp-in an pui bawk. He Bakin hi cheng nuai sarih chuanga senga sak niin tha zanga chuang an seng. Biakin hi a dung ft 45 leh a vang ft 24-a liana sak a ni.
Khawbung Biakin thar lawmna hi Inrinni zan atanga Pathianni zan thleng khan hman niin; Inrinni zan khan Pastor C.Lalmalsawma chuan thuchah sawiin Pathianni Chawhma-ah Rev VL Hnemtluanga leh Pathianni zanah Rev H Vanlalchhana ten thusawi rawngbawlna an nei a ni.
——
Lungphum phum :
Aizawl East District Superintendent Rev Rosanga Kawlni chuan May 30, Ninga zingkar khan Champhai Bial Hqrs.,Kahrawt Biakin sak thatna tur lungphum a phum.
He hunah hian Kahrawt Church Board memberte bakah Bethel Bialtu Pastor te telin Rev Rosanga Kawlni chuan Biakin tluang taka sak a nih theih nan Pathian hnenah a hlan nghal a ni. Biakin hi a dung ft 60 leh a vang ft 36-a liana sak turin tunah hian a ruhrel ruahman fel tawh a ni. Champhai Bial Hqrs. Kohhran-ah hian tunah hian member zahnih chuang an awm mek a ni.
Rev Rosanga Kawlni hian Champhai Bethel Bial-a Kohhran ding thar, Champhai Zote Biakin sakna tur chu May 30, Ningani Chawhma Dar 11 khan lungphum a phum. He hunah hian Champhai Bethel leh Champhai Bial atangin member engemaw zat telin Biakin sak tur chu Pathian hnenah Rev Rosanga Kawlni hian a hlan nghal a ni. Biakin sak hna hi tan chho mek zel niin Biakin hmun tur hi cheng nuainga in lei a ni.
——
Oneness Theological Seminary :
June 3, Thawhtanni khan District Committee room-ah Aizawl East District ten Short Term Course Pathian thu zirna a neih, Oneness Theological Seminary-a Kum 2019 Session-a lut turte pualin Registration Day an hmang.
He hun hi Evan C.Laltanpuia, Theological Education Board Secretary chuan kaihruaiin Zirtirtute hnen atangin fuihna thu tha tak tak ngaihthlak a ni. OTS-a zirlai te hian June 4, Thawhlehni atang khan class hi an tan nghal a ni. Kumin-ah hian zirlai 7 zirin tarlan tawh angin Rev Rosanga Kawlni, Rev Biaksangzuala, Rev Vanlalfela Ramtiam, Rev K.Satinvela, Rev R.Laltlankima, Rev P.Chunga leh Evan C.Laltanpuia ten zirtirna an pe thin dawn a ni.
OTS hi Kum 1998 atang khan bul tanin mi engemaw zat ten an lo zirchhuak tawh a, Bialtu Pastor leh rawngbawlna a kal pawh an awm tawh bakah District dang atangin he OTS-ah hian zirlai an awm thin a ni. Kuminah hian OTS-ah 1st Year 10, 2nd Year 10 bakah 3rs Year 6 an awm mek a ni.
——
Revival Crusade :
May 25 atanga June 2, Pathianni zan thleng khan Hnahlan Bial PYD buatsaihin Vaparah Revioval Crusade buatsaih a ni.
He hunah hian Speaker-ah Evan Lalbiakmuana, District Revival Speaker chu hman niin Sis Muantei Team member bakah Sis. Hmangaihkimi leh Sis. Hmangaihtharzeli Hnahlan Bial PYD te hnen atangin Pathian fakna hla ngaihthlak thin niin PYD Joint action team ten Action Song an entir thin bawk.
Speaker hi Team member thahnemtakin tawiawmin Pathian thlarau thianghlim awmpuina hnuaiah hlim takin hun an hmang. June 2, Pathianni tlai khan Thuthlung puan chhuahna Mual inkhawm hlawhtling takin an nei bawk. Crusade neih chhung hian thlarau thianghlim dawng thar mi 11 an awm a ni.
——
Camping buatsaih :
Aizawl East District, Bazar Kohhran buatsaihin May 28 atanga June 1 chhung khan Camping buatsaih a ni.
Camp hi May 28, Thawhleh zan khan lutin June 1, Inrinni khan an chhuak. Speaker-ah Evan R.Vanchhunga, District Fulltime Evangelist chu hman niin Campers mi 26 an lut a ni. Camping neih chhung hian Sual ngaihdamna baptisma mi 3 chuan changin Thlarau thianghlim dawng thar mi 4 bakah siamtharlehna chang mi 11 an awm a ni.
Camp chhawng hnihna June 4, Thawhleh zan atanga Inrinni thleng khan an nei leh a, Pathianni zan thleng followup programme hmanchhunzawm a ni ang.
——
Lawmthusawi chawimawina :
June 8, Inrinni khan Sis Lalramliani Sailo te chhungkua, Zemabawk Vengpui Kohhran te chuan Pathian hnena lawmthusawi chawimawina neiin Kohhran hoten hlim takin hun an hmang.
Chawimawina Programme hi June 7, Zirtawp zan atang khan hman niin Speaker-ah Rev Rosanga Kawlni, District Superintendent an ruai a. June 8, Inrinni vek hian Upa Lalfekima te chhungkua, Bethlehem Kohhran te chuan Pathian chawimawina neiin Kohhran ten hlim takin hun an hmang bawk a ni.
Facebook