Golden Jubilee Souvenir :
July ni 9, Thawhlehni khan General Hqrs Office ah General LAD Golden Jubilee Comtt chuan meeting an nei a, meeting hi Chairman Sis. Lalchangliani Sailo B/w chuan a kaihruai.
Meeting hian LAD Golden Jubilee lo thleng tur lawmna tura hmalak dan tur hrang hrang relin, Jubilee key chain siam te, General Hqrs Office-a LAD room leh ASC Home-ah monument dah nise tih te, Jubilee momento siam bakah, Hruaitu hluite chawimawina pek nise tihte an rel a. Jubilee lawmna pui ber Oct 12,2019 ah Sial leh vawk talhin Jubilee lawmna ruai buatsaih nise an tih bakah hemi ni hian Jubilee Souvenir pawh released turin ruahmanna an siam bawk.
Jubiee Comtt hruaitute :
Chairman : Sis. Lalchangliani sailo B/w
Secretary : Sis. Zaithangpuii vuangtu
Astn Secy : Sis. H. Lalthuamluaii
Treasurer : Sis. F. Rohlupuii B/w
——
Missionary la thar :
July ni 11, Ningani khan General Missions Department chuan advertisement a chhuah angin Pentecostal English School, Manigong a thawktur Missionary Teacher tur mi 3 an la thar.
Missionary teacher tura laktharte hi :
Sis. Naom Vanlalhmangaihi, D/o Bro. K. Lalnunmawia Dinthar Aizawl
Sis. Nissi Lalduhsaki, D/o Evan LalAmena Sakawrdai/ Bawngkawn Aizawl
Bro. Lalawmpuia Lianhna, S/o Pastor Lh Lalchhandama Rahsiveng Lunglei.
Missionary atana lak tharte hian July ni 15, THawhtanniah Joining report an pe ang a, July ni 21, Pathianniah tirhchhuahna neih an ni ang.
——
General Hruaitute Programme :
General Missions Director Rev. R. Lalhawia chuan Dimapur Field tlawhin rawngbawlna a nei.
——-
Lunglei District Board :
July 4-5 chhung khan Lunglei District UPC Board vawi 197-na chu Superintendent Rev.C.Vanlalena kaihhruainain neih a ni a, Pastor atana lak thar Pastor R.Lalengzauva leh Pastor K.Lalnunpuia te Board member atana lawmluhna neih a ni bawk. An rorel langsar zualte :
1.Kum 2020 General Conference dawltu tur Farm veng Local hnenah Rs.400000 (Nuai li) pek nise.
2. Thianghlimna Committee pual atan Rs.50000 (Singnga) ruahman a ni.
3. Christian Education Center C.E.C.School Vice Principal atan Evan.Lalrinmawia chu ruat a ni.
4. Khawhri Local biak in sak mek tanpui nan Rs.100000 (Nuai khat) pek tha tih a ni.
5. Tawipui bial Pastor Quarters leh Thenhlum bial Pastor Quarters maintenance-na tur te pek tha tih a ni bawk.
6. Heng bakah hian he board hian kohhran Quarters luah chungchanga dan, Garage luah dan chungchang leh Evangelistic Group/Team din chungchanga dan te an pass bawk.
——-
District PCD Board :
July 9, Thawhleh zan khan Pentecostal Children Department (PCD) Lunglei District Board chu District UPC Secretary Quarters ah President Rbt.K.Lalrintluanga kaihhruainain neih a ni a, District Board members-te an kalkim thei a ni. An rorel langsar zualte:
(a) PCD zirlaibu hlui bakah a bu thar zir tur ruahman nise, hma lola turin OB te ruat an ni.
(b) Kumtin November pathianni hnuhnung ber ah PCD exam neih thin anih angin kumin pawh hian November ni 24 pathianni chawhnuah Local tinin exam hi buatsaih se tha tih a ni a, District atangin Question siam a ni ang.
(c) December 13 hi District PCD Day vawi 13-na a nih angin Local tinin a lawman atan zing karah Social work,vantlang tana thil tha tih nan hmang se tha tih a ni.
——
PBS Graduation Day :
Lunglei District UPC in thla khat awh Pathian thu zirna a neih Pentecostal Bible School (PBS) chuan July 7 Pathianni khan Headquarters biak inah Graduation day an hmang.
He hun hi PBS Principal Rev.C.Vanlalena chuan kaihruaiin, Headquarters biatu Pastor Rev.C.Hmingthanfala chuan tawngtainain inkhawm a hlan a, Headquarters bial PYD Zaipawlten zaia rawngbawlna neiin PBS registrar Pastor K.Vanlalhruaia chuan result a puanga, lawmman semna neih chhunzawm anih hnuin Former PBS Principal Rev.R.Lalrosanga chuan Graduate te hnenah Certificate in Theology (C.Th) degree a hlan.
Graduate Student C.Lalhriatzuala hnen atangin thusawi ngaihthlak a ni a, Lunglei Dist.PYD choir ten fak hla mawi takin an rem a, Former PBS Principal Rev.C.Darkhuma chuan Pathian thuchah sawina a nei.
Graduate te lawmpuina leh thlahna atan PBS 1st year leh 2nd Year student ten fak hla an rem bawk.
Kumina Certificate in Theology (C.Th) hlan thar te:
1. K.Lalduhsaki, Pukpui
2. Ramnunmawia Aineh, Rangte N
3. Rosangliana, Tleu
4. C.Lalhriatzuala, Venghlun
5. C.Lalhriatpuia, Sekhum
6. Lalhluzuala Renthlei, Darzo
7. Lalnunthara Jongte, Thualthu
8.Hminghlumawia, Rangte S
Graduation Day inkhawm hi Rev.R.Vanlalenga Dist.Missions Director chuan malsawm tawngtaiin a tin a ni.
Lawmman dawngtute:
1. C.Lalhriatzuala Venghlun chu Gold Medalist niin ani hi kumin PBS student 24 zingah ti tha berin Upa R.Sapchhawna Award hlan a ni.
2. C.Lalhriatzuala Venghlun hnenah vek hian Rev.Zalawma Award, Graduate Student 2017-2019 chhunga ti tha ber lawmman hlan a ni bawk.
——-
District PYD Board :
July 5, Zirtawpni khan District Committee room-ah Aizawl East District PYD District Board vawi 46-na neih a ni.
Board hi District PYD President Rev R.Laltlankima chuan kaihruaiin District Superintendent, Rev Rosanga Kawlni chuan rorel palai kalkhawmte lawmna thu sawiin District PYD-in hma a laknaah lawmthu a sawi a ni.
District Board rorel langsar zualte:
1. Kum 2019 chhung hian District chhunga Bial tinah Revival a thlen theih nan hmalak ni se tha tih a ni a, Bial PYD ten mahni bial theuhah a theih ang angin hmalak ni se tih a ni.
2. Sheaves for Christ pualin member tinah appeal nei tawh lovin Kum 2020 atang chuan Faith Promise-a kalpui tawh ni se, Bial PYD in mahni bial-ah hmalak ni se.
3. District pawna rawngbawlna pualin District pawn Account neih tha tih a ni a, kumtin Budget-ah telh ni se tih a ni.
4. Kohhran member zingah Civil Service a tling an tam theih nan District PYD in hmalak ni se tih chu tha tih niin Hruaituten ruahmanna lo siam se, Board in la thlirho leh ni se tha tih a ni.
5. Education Sub-Committee Treasurer Bro.Lalrammawia chu Missionary-a hmun danga a kal tak avangin a aiawh turin Bro Johny Lalthafamkima, District Hqrs. Bazar Bial chu ruat a ni.
Aizawl East District PYD Board hian Daido-a rawngbawlna kallai chu thlirin kumin chhung atan chhunzawm zel ni se tih a ni.
——
OTS Graduation Day :
July 7, Pathianni Chawhnu khan Aizawl East District hnuaia Short Term Course Pathian thu zirna, Oneness Theological Seminary chuan Kum 2019 Session atan Graduation Day hlawhtling takin an hmang.
He hun hi Zemabawk Vengpui Biakinah hman niin inkhawm Rev Biaksangzuala, Principal chuan a kaihruai a, Result puanna Evan C.Laltanpuia, Secretary, Theological Education Board chuan a nei a ni.
Graduate te Degree Confer-na leh Certificate hlanna Rev Lalmalsawma Sailo, General Superintendent chuan neiin Zirlai Graduate tharte chu Pathian rawngbawlna hna thahnemngai taka thawk a Chanchintha hril chu an hna pui ber tur a nih thu te, Kohhran duh dan anga nun uluk taka hmang tur leh Thlarau bote chhandam hna thawk a, rawngbawlna kawngah tlan chhe lo tura fuihin an kal zelna turah duhsakna a hlan.
OTS Graduation Day-ah hian Rev Rosanga Kawlni, District Superintendent bakah Rev Laltluanga, North Mizoram District Superintendent te pawhin fuihna thu sawiin zirtirtu aiawhin Rev P.Chunga leh Zirlai aiawhin T.Upa Laltlanlawma ten thusawina an nei bawk a ni. Rev K.Satinvela chuan Graduate te tawngtaisakna neiin Rev Vanlalfela Ramtiam, District Treasurer chuan thilpek hlanna a nei bawk. Sis Kroschhuanawmi hnen atangin OTS Sam ngaihthlak a nih bakah Sis Lalhriatchhungi, Sis Laldinthari leh OTS zirlaite hnen atangin fak hla ngaihthlak niin Rev R.Laltlankima’n malsawm tawngtaiin hun a titawp a ni.
Kumin OTS-ah hian zirlai mi 27 awmin 1st Year-ah zirlai 10 an awm a, 2nd Year-ah 10 leh 3rd Year-ah 7 awmin mi 7 te hian kuminah hian Certificate in Theology (C.Th) an dawng a, chungte chu:
Bro R.Lalremruata, College Veng, Aizawl, Upper Republic Bial
Sis Kroschhuanawmi, Sihphir, North Mizoram District
Sis Ramengmawii, Armed Veng, Aizawl, Bazar Bial
Bro Vanlalchhawrzela, Khawlailung, N.Vanlaiphai Bial
T.Upa Laltlanlawma, Bethlehem Vengthlang, Bethlehem Bial
Bro Laldinsanga, Bawngkawn, Bawngkawn Bial
Bro Raldoliana, Bagbahar, Barak District
Oneness Theological Seminary hi Kum 1998 khan din tan niin,Certificate in Theology (C.Th) a pe chhuak a, UPC-N.E India-in Pathian thu zirna kan neih Calvary Bible College (CBC), Shillong-a in affiliate a ni.
——–
Biak in hawng :
July 7, Pathianni khan Bawngkawn Bial, Ramhlun Sport Complex Vengthar Biak in sak thar chu Rev Rosanga Kawlni, District Superintendent chuan a hawng.
Biakin hawnna hi biakin pawnah neih hmasak niin Bialtu Pastor, Rev C.Mawizuala chuan a kaihruai a, Rev Rosanga Kawlni hian UPC-North East India Biakin pakhat ni turin Pathian hnenah hlanin a hawng.
Bialtu Pastor, Rev C.Mawizuala kaihhruaiin Biakin chhungah inkhawm neih chhunzawm a ni a, Biakin sak dan report ngaihthlak niin Bial Zaipawl bakah mimal hnen atangin Pathian fak hla ngaihthlak a ni a, Rev Rosanga Kawlni, District Superintendent hian thuchah a sawi.
Biakin hi a dung ft 30 leh a vang ft 15-a liana sak niin a sak nan hian Bial-in budget a siam bakah Bial chhunga mi inphal tak tak ten sum leh pai thawhin Bial chhung Kohhran hnatlang hmangin sak zawh a ni.
Ramhlun Sport Complex Vengtharah hian Bawngkawn Bial te hian hun engemaw chen atang tawh khan rawngbawlna hi an lokal pui tawh a, a tirah chuan member tlem te awmin District Missions kaltlangin rawngbawltu pawh engemaw zat an lo awm tawh a ni.
——
Revival Crusade :
Upper Republic Kohhran ten Evan R.Vanchhunga, Speaker-a hmanga Revival Crusade an hman mek chu chhunzawm zel a ni a, chawlhkar thum zet crusade an hman tawh hnuah pawh ala tawp thei lo.
Revival Crusade hi chhuzawm zel tur tih niin mi thahnemngaite kaltlangin Inrinni hian Pathian chawimawina neih a ni a, Kohhran hoten hlim takin hun an hmang a ni. Crusade hi July 12, Zirtawp zan atang khan neih leh niin ruahmanna ang chuan Pathianni zan thleng a awh ang.
Zemabawk Vengpui Missions Department te hmalaknaa Crusade kar hmasa chhunga neih pawh chhunzawm leh mek zel niin July 13, Inrinni hian Upa Thangzika te chhungkua chuan Pathian chawimawina hi an nei a, Crusade hi ruahmanna ang chuan Pathianni zan thleng hi an hmang leh dawn a ni. He Crusade-ah hian Speaker-ah Evan H.Lalhlimpuia an hmang a ni.
——-
Mual Inkhawm buatsaih :
Aizawl East District, Thuampui bial PYD te chuan Conference thurel bawhzuiin July 7, Pathianni chawhnu khan Thuampui Vengthar-ah mual inkhawm an buatsaih.
He hun hi Bro Zothansiama, Bial PYD Secretary chuan kaihruaiin Bial PYD Zaipawl leh Sis Mary Lalparmawii ten fak hla an sa a ni. Thuampui Bial PYD ten mual inkhawm an neihah hian Speaker-ah Evan H.Malsawmthanga chu hman niin Pathian thlarau thianghlim awmpuina hnuaiah hlim takin hun an hmang a, Bial chhunga PYD member engemaw zat telin Bialtu Pastor Rev KVL Hmangaihkima chuan a telpui bawk a ni. Thuampui Bial PYD te hian Bial huap Crusade bakah Bethel te nei turin ruahmanna an siam mek a ni. He mual inkhawm kal zelah hian mithar pakhat chu Kohhranah sengluh a ni. Thuampui Vengthar-ah hian Evan H.Malsawmthanga hian rawngbawlna a nei kal mek zel a ni.
——–
Lawmthusawi chawimawina :
July 13, Inrinni hian Thuampui Bial chhung Kohhran pahnih-ah Pathian hnena lawmthusawi chawimawina buatsaih a ni.
Muanna Veng Kohhranah Upa Lalbiakzama te chhungkuain lawmthusawi chawimawina an buatsaih a, rawngbawla awm mek, Evan K.Vanlaldika Speaker-atan an ruai. Muanna Venga Evan K.Vanlaldika rawngbawlna kal zelah hian mi 3 in sual ngaihdamna baptisma an chang tawh a ni. July 6, Inrinni khan Bro Tlangluahchhinga te chhungkua chuan chawimawina hi an lo nei tawh a, July 7, Thawhtanni khan chhunzawm leh a ni.
Thuampui Vengthar-ah Upa C Thangbuaia te chhungkua in Pathian chawimawina an buatsaih bawk ani.
Darlawn Bial, Sunhluchhip Kohhrana lawi Sis Thangmawii te chhungkua chuan July 13, Inrinni hian Pathian chawimawina an nei bawk a, Speaker-ah Evan Vanlalramnghahmawia chu hmangin Pathian awmpuina hnuaiah hlim takin hun an hmang a ni.
——–
Mi thar :
July 8, Thawhtan zan khan Champhai Bial, North Khawbung-ah mithar 5, Bialtu Pastor, Rev VL Hnemtluanga chuan senglutin mi 3 in sual ngaihdamna baptisma an chang.
N.Khawbungah hian Crusade neih mek niin Speaker-ah Bro H.Lalrinfela hman niin July 6, Inrinni khan Upa Roreltluanga te chhungkua chuan Pathian chawimawina an lo nei tawh a, July 9, Thawhlehni khan mi thahnemngaite kaltlangin Pathian chawimawina hi an nei leh bawk a ni.
Rabung bial, Murlen Kohhranah pawh mithar 5 Kohhranah sengluh an ni bawk.
——
Tanpuina hlan :
Upper Republic Bial PYD te chuan July 9, Thawhleh zan khan BSUP Durtlanga chhiat tawhna rapthlak tak tuarte tanpuinan Durtlang leitan YMA hnenah Bial PYD hmingin Rs 15,000 an hlan.
He tanpuina hi Bial PYD President T.Upa R.Lalrintluanga chuan YMA Hruaitute hnenah a hlan a, Bial PYD OB te an telkim bawk. Tanpuina hi Upper Republic Bial PYD Member mi thahnemngaite thawhkhawm hmanga pek niin mi harsate tanpui theia an awm chu an lawm hle a, lungchhuak zel turin ruahmanna an siam bawk.
——
Bial fan Programme :
July 6 leh 7 hmang khan North Vanlaiphai Bial PYD OB te chuan Kum 2019 chhunga a vawi khat nan Bial fan Programme an hmang.
Khawlailungah hun hmang hmasaberin Inrinni zan leh Pathianni chawhma khan Khawlailung Bunghmunah rawngbawlna an nei a, Pathianni chawhnu leh zanah Khawlailung Dintharah rawngbawlna an nei leh a ni. Pathian thlarau thianghlim awmpuina hnuaiah hlim taka hun hman niin July 13, Inrinni zan hian Bial Hqrs. Kohhranah hun hmang lehin Pathianni chawhnuah Leilet Kohhran, Pathianni zanah Rawlkhang Kohhranah te hun an hmang leh anga, July 27 leh 28 hian Lungkawlhah programme hmang leh turin ruahmanna an siam a, Education Sub-Committee te pawhin he hunah hian programme an hmang dawn bawk a ni. N.Vanlaiphai Bial PYD te hian Pastor Qrts.a dah turin Inverter an lei thar bawk a ni.
——–
Aizawl East District Hruaitute Programme:
District Superintendent Rev Rosanga Kawlni chuan Pathianni hian a Bial hmui mek, Mualpui Bial chhungah rawngbawlna neiin hun a hmang ang.
Missions Director Rev R.Lianzama,chuan Pathianni hmang hian Sakawrdai Bial-ah Missions rawngbawlna neiin hun a hmang ang.
Sunday School Director Rev C. Mawizuala, chuan Pathianni hmang hian Khawlian Bial-ah rawngbawlna a nei dawn a, Phuaibuang Sunday School Hall hawnna a nei nghal ang. District Sunday School Director hi District Sunday School hruaitu dang ten an tawiawm bawk a ni.
———
Baptisma chang thar :
July 7, Pathianni khan Chhimtuipui District, Siahatla kohhranah Baptisma khur hawn niin, Rev.K.Lalbiaktluanga’n mi-3 sual ngaihdamna baptisma a chantir.
——
Rawngbawlin fehchhuak :
South Lungpher Bial, cheural, Vartekkai leh Lungpher te chuan July 6 atanga ni 7 chhung khan Lungtian local an tlawh a. Hlim takin hun an hmang.
He tlawhtawn ah hian Vartekkai Missionary Evan.Lalhmingthanga chu speaker atan an ruai a ni.
——
Revival Crusade :
July ni 5, zirtawp zan atanga Pathiani zan thleng khan Chhimtuipui District, Raisika local ah Revival Crusade buatsaih a ni a, Speaker atan Rev.Lalkima Tahan an hmang.
——
Chhimtuipui Dist Evangelist N.Thanghnuna chuan July 6-7 chhung khan Tialdawngilung, Bualpui NG bial ah rawngbawlna a nei.
——-
ABS Graduation Day :
July 7, Pathianni khan Chhimtuipui District Pathian thu zirna Apostolic Bible School ABS chuan Graduation Day vawi-7 na an hmang.
He hunah hi Rev.Joseph L.Thlauhthang Dist secretary chuan akaihruai a, Principal Rev.Thanchunga Sailo chuan Certificate of Theology degree confer in, Former Dist superintendent Rev.Dr.T.Tumsanga chuan graduate students te pualin, “I rawngbawlna kha hlen rawh” tih thupui hmangin thuchah a sawi a, Rev.K.Lalbiaktluanga pensioner chuan tawngtaisakna hun ahmang thung a ni.
A pumpuiah Bro.Beihluatlai Khuhly chu ti tha berin, zirlai aiawhin lawmthu sawina a nei bawk.
Kumin Session a Certificate of3 Thealogy Degree hlan te :
1. Beihluatlai Khuhly Siaha Council Veng
2. Lalramdailovi Vartekkai
3. Peter H. Lalawmpuia Meisatla
4. Hc Zoenga Sangau I
Kohhranpui, Dist LAD teleh Siaha bial chhung kohhran ten lawmpuina thil pek hrang hrang anhlan bawk ani.
Chhimtuipui District, Home mission field Pangkhua ah July ni 10, Nilaini atang khan Biak In sak bul tan a ni.
Sangau bial kohhranpui hmalakna leh ruahmanna angin Biak In sak hi chhunzawm mek zel a ni a. He field ah hian Evan.Khaching Aineh chu field worker niin, rawngbawlna akalpui mek a ni.
——
Crusade :
July ni 4 ningani khan North Mizoram District, Mamit bial Missions Dept. te chuan Confe. rorel bawhzuiin Vawngawnzo Misions Field-ah Crusade an nei. Vawngawnzo Crusade-ah hian member thahnem tak an riak lut a, rawngbawlna hlawhtling tak an nei.
——
Bukpui Revival Crusade :
N. Mizoram District, Bukpui Headquarters Kohhran te chuan LAD huaihawtin June ni 27 atanga ni July ni 1 chhung khan Revival crusade an buatsaih.
Crusade Speaker atan North Mizoram District ramtlan Evan. Zoramthara chu hman niin; an rawngbawlna Lalpan mal a sawm a, Pathian hnathawh avangin Sual ngaihdamna Baptisma mi 2 in Bialtu Pastor H Lalrinpuia kutah an chang.
Evan. Zoramthanga leh a rawngbawlpui te hi ruahmanna ang chuan June ni 30 thleng rawngbawl tur an ni a, Thlarau boaruak leh Kohhranhote mamawhna avangin July ni 1 thawhtanni Chamin rawngbawlna an neih leh a. Pathian hnathawh nasa zawk kohhranhote chungah thlengin Chawimawina atana Bro. Lalremsiama sum thawh chu Kohhranhote’n thawh belhin July ni 6 Inrinni khan Pathian chawimawina ruai nen an hmang.
——
PSM Graduation Day :
North Mizoram District hnuaia Pathian thu zirna Pentecostal School of Ministry (PSM) chuan July ni 5 Zirtawpni khan District Headquarters Biak in, Tuikhuahtlangah Graduation Day an hmang.
Graduation Day hman inkhawm hi PSM Principal Rev. Laltluanga’n kaihruaiin, Result PSM Committee Secretary Rev. Chhiarpuia’n puanna neiin; kum 2019 session-ah a pumpuia pakhatna Evan. Zoremmawia Hlawndo niin; pahnihna Missionary K. Lalbiakzuali a ni a, Evan.K. Malsawmkima Zawlpuia rawngbawl mek chuan pathumna a hauh bawk.
Kum 2019 PSM Session-ah hian PSM Graduate 7 awmin; chung te chu:-
1. Pastor K. Ainawna
2. Evan. Vanlalpeka Fanai
3. Evan. C. Lalruatsanga
4. Evan. Pahnuna
5. Tual Upa Remlalnghaka
6. Tual Upa Vanlalhlima
7. Malsawmdawngzela
Graduate te hi Certificate of Theology (C.th) hlan niin; Degree hlanna hi Calvary Bible College Principal aiawhin Rev. L.John Gangte in a nei a, Former General Supdt. Rev. P. Chunga’n Graduate te pualin tawngtai sakna a nei bawk.
Rev. L. John Gangte chuan Graduate te hnenah fuihna thu sawiin, Bible zirna chu Lalpa rawngbawlna atana ti kan nih ang ngeia, mite’na min hriat dan turah pawh Pathian mi tia min hriat a pawimawh a ni a ti.
Rev. Lalmalsawma Sailo Gen. Supdt. chuan thusawina nei bawkin PSM zir chhuak te chu Kohhran mipuite thlir an nih thu hrilhin Apostolic Doctrine chu kohhran te innghahna a nih angin; Kohhran inzirtirna lungphum chu tinghet zual deuh deuh tur leh an awmna kohhranah theuh kohhran thlamuanna ni turin a chah bawk.
Graduation Day inkhawmah hian District LAD ten kum enge maw zat kal ta atanga PSM a kal zel theihnana kohhranpui an lo dopuina Rs. 50000 chu District LAD Treasurer Sist. Laldawngliani’n District PSM Committee ah hlan bawk a ni.
Zirlaite aiawhin Pastor K. Ainawna chuan thusawina neiin; zirtirtute an inpekna thuk tak leh an inbuatsaihna leh naupangte an hmangaihna kawngah lawmthu a sawi a, zirlai Graduate te pawhin theihtawp chhuaha kohhran chhan nana ke pen tur leh Lalpa rawng an bawl zel tur thu a sawi bawk.
Zirtirtu aiawhin District Sunday Director Rev. K. Malsawmtluanga chuan thu sawi bawkin; zirlaite chuan an zirlaite khup mai lovin; Kohhrante enkawl hna thawhna kawng leh an thlarau nun tichak zel turin a fuih a, an zirna te kohhran beihna tur ni lova, kohhran tana daihlim nuam ni zel turin a fuih bawk.
Graduation Day hman inkhawmah hian fakhla sa tura sawm Sist. Lalhmingmawii’n tum hnih zai rawngbawlna a nei a, Rev. K. Lalduhsanga’n lawmthu sawina a neih zawh hnuah NEI UPC General Treasurer Rev. Zohmingthanzama’n malsawm tawngtaina neiin Graduation Day hman inkhawm chu a tin a ni.
Zirlai Graduate te puala chawhlui buatsaih chu kilho a ni bawk a ni.
—–
Seminar buatsaih :
N. Mizoram District Conference in a pass angin July ni 10, Nilaini khan Kolasib District huamchhunga Kohhran Upa leh Tual Upate pualin Kolasib Venglai Biak Inah Seminar buatsaih a ni.
Rev. K. Lalduhsanga, District Treasurer-in Seminar kaihruaiin Sis. Laltleipuii’n Pathian fakna hla a sa a, Upa Lalzawmliana, Bairabi chu Tawngtaiin hemi hnu hian Seminar hi tan niin Rev. Laltluanga, District Superintendent-in Upate mawhphurhna tih thupuiah hmangin zirtirna a pe a. Rev. Chhiarpuia, District Secretary-in Statistic tih thupui hmangin Zirtirna a pe a, Sum leh Pai lam tih thupui hmangin Rev. K. Lalduhsanga, District Treasurer-in Paper a present bawk.
Report-a a lan danin Kolasib Disrict chhungah hian Upa leh Tual Upa hi 311 an awm a, tun tum Seminar-ah hian Attendance Sheet-a a lan dain mi 177 an kal a ni.
Seminar hi Aizawl District tan May ni 29, Nialini khan Aizawlah neih a ni tawh a, Mamit District ami te tan July ni 24, Nilaini hian neih leh tura ruahman a ni.
Facebook