Pennet News Service : July 5 – 12

UPCNEINEWSSERVICE JULY 5-12.2020
——-
General PYD :
July ni 9, Ningani khan General PYD Executive Comtt meeting neih a ni a. Meeting hi Rev. H. Lalropuia’n a kaihruai.

Meeting ah hian kumin 2020 November Pathianni vawi thumna hmanga General PYD Conference neih tura ruahmanna awm sa chu Executive Board thurawn angin General Kohhranpui Conference, November Pathianni tawp ber hmanga neihah bet tel mai se tiin an pass.

General PYD Conference a hranga neih hun atan  November Pathianni vawi thumna nise tia  ruahmanna lo siam tawh pawh Executive Board in November Pathianni vawi khatnaah neih nise tiin a ruahman sak a, PYD Conference a hranga neih kum chuan hemi hunah hian neih thin a ni ang.
——

Urshan Graduate School of Theology (UGST) :
UPCI in Bible college kan neih zinga khawvel huap pawha langsar ber pawl, Urshan Graduate School of Theology (UGST) chuan June ni 25, 2020 aṭanga effect ṭanin Higher Learning Commission (HLC) aṭangin Accreditation (Initial) a hmu ta.

Higher Learning Commission hian United States-a zirna in hrang hrang post secondary education ho te accreditation a pe ṭhin a, Chicago, Illinois ah Headquarters awm niin kan kohhran Bible zirnain HLC aṭang meuhva accreditation a hmu ta hi a lawmawm hle a, UGST hotute pawh an lawm takzet a ni. He accreditation hi UGST hian nei tura a beih ngar ngar (primary objective) zinga mi a ni.

Urshan Graduate School of Theology hi Missouri, USA a awm niin Master Degree thleng zir theihna a ni a, an zirtirtute hi MTS (Master of Theological studies), D. Ed, Ph. D, MA D.Mins, DSL (Doctor of Strategic Leadership), D. Th,M  Th. te Pastoral Councelling lama Degree ropui tak tak nei thlengin an awm nawk a, zirtirtute an ṭhat ang bawkin zirlai zirchhuak te pawh an theuneu lo hle. Initial Accreditation an hmu hi an lawmpuiawm hle a ni.

UPCI General Superintendent David K. Bernard, Urshan Graduate School of Theology leh Urshan President Dr. Brent Coltharp bakah Urshan Executive Vice President Jennie Russell te chuan Facebook-a UPCI Page ah hemi chungchang an sawi hona hi Live in July 15th America ram sanaa chawhnu 2 ah an nei dawn a ni.
——-

District hrang hrang rawngbawlna chanchin :

Lunglei District :

July ni 7 thawhlehni khan Lunglei District UPC Board vawi 200-na chu District UPC Conference Hall-ah District Superintendent Rev.C.Vanlalena kaihhruainain neih a ni a, an rorel tlangpuite :

i. Evan.C.Vanlalruatan General Licence a dilna chu Recommend tha tih a ni.

ii. Runtung biak in sak tanpuinan Rs.300000 (Nuai thum) pek tha tih a ni.

iii. Mualthuam S biak in diptu in leh a hmun lei nise tha tih a ni.

iv. Pastor T.Zahmingliana service regularise a ni.

v. CEC Vice Principal Term siam a ni a, kum hnih nise, hruaitu inruat thar kum apiangah ruat thar ve thin nise tha tih a ni.

vi. Covid-19 hripui avanga inrenchem nan kumina 3%-a D.A pung tur chu tih pun loh nise tha tih a nih bakah hetiang hian thawktu ten an hlawh atang thawh se tha tih a ni.

– Pastor thawklai – Rs.5000

– Probationary Pastor – 4000

– LDC chin chunglam – 3000

– IV Grade – 2000

Tin, he board ah hian 2019 Annual Audit Note thlir ho a nih bakah Emergency District Board rorel approved a ni. (Pic.District UPC Board)

——–
Tanpuina hlan :
July ni 3 zirtawpni khan Ladies Auxiliary Department Lunglei District-te chuan Lunglei District UPC in a enkawl Christian Education Centre (CEC) School-ah tanpuina Rs. 50,000/- an hlan. Pawisa hi School aiawhin Principal in  a dawng a ni.

District LAD te hian July ni 1 nilaini khan General Missions Department hnenah Missionary Support atan rs.60000 an hlan a, July ni 8 nilaini khan  Lunglei District LAD te hian General Missions Department hnuaia Assam Missions Field SERFANGURI No.2-ah an biak in sak nan Rs.160000 (Nuai khat singruk) an hlan bawk. H

e biak in sakna tur hi District LAD te hian Lunglei District Missions Director kaltlangin General hnenah hian an hlan a ni. Lunglei District LAD te hian Serfanguri biak in sakna tur hi District LAD Conference 13-15 March chhunga an neih ah appeal in an tuak a ni.
——-

Aizawl East District :

Aizawl East District hnuaia rorelna sang, District Board vawi 123-na chu July 7 leh 8 chhung khan neih  a ni. Board hi District Committee room-ah neih niin Rev Biaksangzuala, District Superintendent chuan a kaihruai a ni.

He hunah hian tun hnaia Bialtu Pastor atana lak thar, Pastor F.Malsawmtluanga, Champhai Bial leh Pastor Vanlalnghaka, Zohmun Bial te chu District Superintendent hian Board member atan lakluhna a nei nghal a ni. District Board hi Rev Lalmalsawma Sailo, General Superintendent chuan telpuiin Bial hrang hrang 31 atangin Board member an telkim thei a ni. An thu ngaihtuah langsar zualte lo tarlang ila:
1. Pastor lak turte chu District Board-ah Interview leh Exam kaltlanga lak zel tawh tura tih a ni.
2. Bial hawn thar, Zemabawk North bial-a Middle School Veng Kohhran tih chu veng chhungin veng hming a kalpui angin Zemabawk West UPC tia thlak a ni.
3. August rammut thla hi Pastor Bial tinah a hlawk thei ang bera hman tum ni se, a hman dan tur pawh Bial kutah dah a ni.
Heng bakah hian District Board hian  Re Marriage Licence (RL) dil engemaw zat a pe bawk a ni.
——–
Motor Board :
July3, Zirtawpni khan Aizawl East District hnuaia Motor Board thutkhawm, Rev Rohmingliana, Chairman kaihhruaiin neih a ni.

He hunah hian District Motor Board-in Motor hman dan alo siam chu ennawn tura tih niin August thla chhungin ennawnna neih tura tih a ni. Car Dairy maintain tura Dan awm mek chu kum khatah vawi 4 tal check thin ni se tih a ni bawk. District Motor board thutkhawmah hian District Board in Secretary tura a ruat Upa Thanghmingliana chuan Secretary kalchhuak Upa JH Rozawna hnen atangin charge a la nghal a ni. Aizawl East District Motor Board hruaitute leh memberte :
Chairman: Rev Rohmingliana
Secretary: Upa Thanghmingliana
Treasurer: Rev VL Hnemtluanga
Member: Rev Biaksangzuala, Rev Vanlalfela Ramtiam leh Rev R.Lianzama te an ni.
——
Baptisma chang :
July 5, Pathianni khan Keifang Bial, Maite Kohhranah Baptisma khur hawn niin Evan K.Laltlanmawia kutah mi 3 in sual ngaihdamna baptisma an chang. July 5, Pathianni vek khan Serchhip Dinthar Bial, Dinthar Kohhranah Baptisma khur hawn niin Rev C.Laldintluanga, Bialtu Pastor kutah mi 19 ten sual ngaihdamna baptisma an chang bawk.

July 8, Nilaini zingkar khan District Hqrs. Kohhranah Rev Biaksangzuala, District Superintendent kutah mi 2 in sual ngaihdamna baptisma an chang.
—–
Pentecostal Choir :
July 9, Ningani chawhma Dar 11 khan District Hqrs. Biakinah Kum 2020-2021 chhunga Aizawl East District PYD Zaipawl, Pentecostal Choir memberte lakluhna, induction neih a ni.

He hun hi Bro Lawmsangkima, V.Chairman, Music & Sound Committee chuan kaihruaiin Rev C Lalmalsawma, President, District PYD-in lakluhna leh hriakthihna a nei a. Rev Biaksangzuala, District Superintendent chuan fuihna thu sawiin Choir member kalchhuakte hnenah thlahna thuziak(citation) hlan an ni bawk.
———

Churachandpur District :
Induction service :
July 12, 2020 hian Tuibong Section Pastor incoming ceremony leh induction service an nei dawn a, Dist. Suptd. Rev. Paosei an rawngbawlna a nei ang. Hemi zanah vek hian Saipum Local te Dist. O.B. in an tlawh leh nghal bawk ang.
—–
Dist Suptd Prog :
July 5, Pathianni khan Rev. L.Ṭhachuoilo, Tuibong Section Pastor in a chenna tur inn, Hmarveng a a sak chu Dist. Suptd. Rev. Paosei an Lal Isua hminga hawnna leh hlanna a neih sak.

Dist. Suptd. Rev. Paosei hian July 12, Pathianni hian Tuibong Section Pastor thar induction service neiin hun a hmang ang.

Pathianni zan hian District Suptd Rev. Paosei, Dist Secy Rev. Lalzawm, Trea Pastor B. Lalzamluaia te chuan Saipum Local tlawhin rawngbawlna a neih chhunzawm.
——
Qtrs repair :
Pastor B.Lalzamluaia Dist. Treasurer hovin July 8,2020 khan Vengnuam Singngat a Tirhkoh ramtlan unaunu Kimcha quarter thawm ṭhatna an va nei a, Tirhkoh Kimcha hi hmeichhia a ni nain ramlak rawngbawlna kawngah mi ṭhahnemngai tak a ni.
—–
Kumchanve Board :
Churachandpur District Missions Deptt. chuan July 10,2020 zirtawp ni khan kum chanve Board an ṭhukhawm a, hmalak dan tur hrang hrang an rel.
——-

Chhimtuipui District :
Disabled Sunday :
July ni 5, “Rualbanlo teni” Disabled sunday khan Chhimtuipui District chhunga kohhran ten, mahni remchan dan angin inlamah thawhlawm lakhawmin hun an hmang a. Dist chhunga chhungkaw tin te chhungkaw Maicham  hmang te chuan thawhlawm lakhawmin, Dist hqrs lamah an chhunglut leh dawn a ni.

Lungtian local LAD te chuan Disabled sunday pualin, an local member zinga vauhbik(rualbanlo) techu ṭanpuina sum an hlan.
——
Rawngbawl sak :
Siahatla local PYD techuan July 06 aṭang khan volunteer in,  Siahatla a quarantine mekte eirawng an bawl sak.

PYD te hi group ah inṭhenin, sawrkar dan zamte zawm chungin eirawng anbawl ṭhin ani.
—–
Audit :
July  ni 9-11 chhung khan District Committee Room ah District kum chanve audit neih a ni a, District Kohhranpui leh Department hrang hrang account te audit a ni.

Auditor te hi Rev.Lalhnehchunga, Upa John VT Hniehu leh Upa Ps Lalthanhlira te an ni.
——
Inbuatsaihna kalpui :
July ni 8, Nilaini khan Siaha Council veng Kohhran Biak In ah Pulpit, Lectern, Chairman dawhkan leh thut thleng te Council Veng LAD ten an siamtir chu Biak inah an dah lut a, Kohhran te an lawmin an hlim hle.

Kum 2020 District Missions Conference hi Council Veng Kohhran ten an thleng dawn a, hemi atana an in buatsaihna hi theih tawpin an kalpui mek a ni.
——
Seminar :
July ni 15, Nilaini hian District Headquarters complex New Siaha ah Pastor Nupui te pualin seminar neih a ni dawn a. He Seminar ah hian Rev.L.Chunglinga leh Sist.H.Zoramthangi B/W te chu resourse person atan hman an ni ang.
——

Lawngtlai West District :

District Suptd Rev. Ramthatzawla chuan July ni 8 leh 9 chhung khan Bungtlang S bial tlawhin a fehchhuak a, July ni 8, Nilaini khan Bungtlang S Bial Board Lunghauka ah telpuiin, July 9, Ningani khan Bungtlang, Hmunnuam, Diltlang, Khawmawi leh Mampuiah te chawlin kohhran ho te a tlawh kual a, Kohhran puipa te nen inkawm khawmna an nei.
——

North Mizoram District :
Thilpek pe :
July ni 2 Ningani khan Sist. Lallawmzuali D/o Pastor R. ThangluraDamparengpuiBialtu Pastor chuan  North Mizoram District Office Staff tepualin Surgical Mask leh Mask pangngai  tha hnem tak a pe. Thilpek hi Sist. R. Lalpianfeli Office Accountant in lo dawngin; Office mamawh tak thilpek an dawnah Sist. Mafeli hian lawmthu a lo hrilh bawk a ni. (Pic. Mask)
—–

District Hruaitute Programme:

North Mizoram District, Kawnpui Bial Pastor Quarters chu July ni 12 Pathianni khan, North Mizoram District Superintendent Rev. Laltluanga’n Pathian hnenah hlanin a hawng.

Quarters hawnnaah hian District Secretary Rev. Chhiarpuia leh Dist. Treasurer Rev. K. Lalduhsanga ten an telpui.
—–
Pastor Qtrs :
July 2, Ningani khan District Tresurer Rev. K. Lalduhsanga chuan District Officer meeting thu ang in; West Phaileng Bial Pastor Quarters thar sak tur a hmunah thli thlaiin; a hmunlaih dan tur ruahmanna a neihpui a, laih tan nghal a ni.
—-
Zin chhuak :
July ni 3 Zirtawpni khan Dist. Supdt. Rev. Laltluanga chuan kohhran thil tulah Kolasib tlawhin, Kohhran hmun lo ram Revenue-a tih fel ngai te a tifel.
—–
Rawngbawlna kalpui zel :
Hrileng vanga hun rei tak chhung inkharkhi phnuah District in rawngbawlna beih pui a thlak beh chhanin District in a tirhchhuah rawngbawltute, mimal, Kohhran leh Bialin a rawih rawngbawltute chuan an awmna khua VLTF te kaihhruainain Home Crusade, Home Visit leh tawngtai rawngbawlna te neiin rawngbawlna an chhunzawm leh tan mek.

North Mizoram District chhunga Missions rawngbawlna kut kengtu Missions Department te chuan hrileng karah theih tawka rawngbawlna kal chhohpui zelin; North Mizoram District chhunga Missions Field 12-a Missionary te chuan remchan ang angin anmahni station-ah rawngbawlna an kalpui mek zel a, Missionary te hian Lockdown chhung khan mithar 39 lai chhandamna huangah an senglut a ni.
——
PYD Board :
North Mizoram District PYD te chuan kumin chhunga a vawikhatna turin July ni 10 zirtawpni khan District PYD Board an nei.

Board meeting District PYD President Evan. J. Vanlalruata’n a kaihruai a, District Puipapathum ten an ho thei bawk. An thurel kimchang karleh lamah tihchhuah tum a ni.
——
PG School :
July ni 3, Zirtawpni khan North Mizoram Dist School enkawl Pentecostal Gateway Higher Secondary School, Higher section chuan School hmasawnna tur chungchangah meeting an nei.

Meeting hi Principal Evan JH Malsawmdawnglianan kaihruaiin, North Mizoram District Secretary Rev Chhiarpuian a ho bawk. Meeting ah hian School hmasawnna tur hranghrangbakah Higher section bik Admissiontih dan tur chungchang an sawi ho a ni. (pic. PG)
——–
Intuaitharna :
July ni 5, Pathianni khan Sihphir bial hruaitute ruahmannain Bial kohhranpui leh bial Dept hruaitute chuan Sihphir SS hall-ah intuaitharna an nei.

He Intuaitharna hunah hian Bial huapa rawngbawlna kawnga hma thar lakzel dan tur sawi ho niin; Bialtu Pastor Rev. C.Lalrammuana’n fuihnathu a sawi bakah a huhova tawngtaiin Pathian hnenah inhlantharna an nei nghal bawk. Sihphir Bialte hi Lockdown avangin hun rei tak inkhawmthei lo mahse, bial chhung kohhran hoten thlarau lam nunah malsawmna thar an neih zel theih nan, bial hruaituten bial chhung kohhrante a tam thei ang ber tlawh kualin an infuih thar reng a, tawngtaisakna an nei thin bawk.
——
Member thar ;
1. July ni 5, Pathianni khan Zomuantlang Field-ah Missionary a thawk mek Sis F. Lalsiamliani rawngbawlna kaltlangin Pentecost kohhran zawm turin member thar pali Kohhranah sengluh a ni. mithar lawmluhna Programme hi Field Quarters-ah neih a ni.

2. June ni 29 thawhtanni khan lawipu kohhranah nau 1 hlan thar niin July ni 2 ningani khan  Nau 3 hlan an ni bawk. July 3 zing khan member 3 in bialtu Pastor Rev. R. Lalhmangaiha kutah sual ngaihdamna baptisma an chang bawk.

3. July ni 5 Pathianni zan khan maubawk kohhranah mithar pakhatin Evan. Lalawmpuia kutah baptisma- changin, July ni 6 Thawhtan zan khan Maubawkah mithar vek pakhatin bialtu Pastor kutah Baptisma a chang a, Nausen 1 Pathian hnenah  a hlan nghal bawk.
——
Baptisma chang :
July ni 5, Pathianni khan Chawlhhmun Church Board ruahmanna in Baptisma chan run pui Chawlhhmun Kohhrante’n an hmang.

Baptisma rawngbawlna hi chawhnu dar 2:30-ah neiin, Bialtu Pastor Rev. Lalramthanga Kawlni chuan a nei a, chawlhhmun kohhran chhung atangin Tleirawl leh rawlthar rual mi 11 ten sual ngaihdamna Baptisma an chang a ni.

Baptisma chang thar te hi Biak Inah hunserh tawi hmanpuiin Baptisma pawimawhna councelling neih pui an ni a, upa leh tirhkoh ten tawngtaisakna an neibawk. (ChawlhhmunBaptisma)
—–
Ralna nei :
July ni 5, Pathianni khan North Mizoram District, Chaltlang Bialte chuan Bro. Lalhruaizela, Samtlang Quarry chim Vanduaina tawk avanga boral ta chhungte Ralna an nei.

Bro. Lalhruaizelna ralna hi Chaltlang Bial aiawhin Bial hruaituten an chenna hmunah an nei a. Ralna thilpek Bial chhung hrang hrang atanga sum thawhkhawm Rs 51,800/- chu Bro. Lalhruaizela chhungte kutah an hlan a ni.

Bro. Hruaizela ralna hunah hian Bialtu Pastor Rev. C. Lalramthanga’n hovin, Evan JH Malsawmdawngliana, Bial Secretary, Evan R Lalthangchhuana, Bial Treasurer bakah Rev P Chunga,Sist R Lalpianfeli leh Sist PC Lalzawmlianite an tawiawm bawk.

He mi ni vek hian Chaltlang Biala tanga Pastor-a chhuak Pastor PC Lalrokima Aibawk Bial vawngtu chu Aibawk-ah tlawh  nghalin Chaltlang Bialte hian lawmpuina thilpek an hlan bawk.
——
Work Camp :
Kolasib Diakkawn Bialte chuan ruahmanna an lo neih tawh angin July ni 20 khian Dampa Tlangnuam Tirhkoh Quarter tur Work Camp in an sa dawn.

Dampangrengpui Bialte an lawmhle a, kohhran hmasawn zelna turah puitu Bialte chungah lawmthu an sawi bawk. Chaltlang Bialte’n Damparengpui Bial vek Sidon Biak in Work camp-a sak an tum, hrileng avanga remchang a awm theih tak loh avangin; Biak in sakna tura hlawhfachhawrna tur Rs. 35,000 District kaltlangin pek an tum a, Chaltlang Bialte hian Sidon Biak in sakna tur sum hi District Missions Dept-ah an chhung lut tawh bawk.
——-
Baptisma chang :
Evan BT-an  Darlungah Dist rawihin rawngbawlna a nei a, Lockdown tirh khan Khawrihnimah kalin, Kohhran ngenna angin rawngbawlna a nei a, a rawngbawl chhung hian Khawrihnim Kohhranah Sual ngaihdamna Baptisma chang Mi 17 an awm bakah Thlarau Thianghlim dawng thar mi engemawzat an awm bawk.

Hrileng avanga inkharkhip chhung kha Darlungah Mi 4 in Sual ngaihdamna baptisma an chang thar bawk.
——
SS Hall :
March thla tira District Missions hruaitute Rajtali field-a zinin, Sunday School Hall an mamawhna hriatpuiin; Rajtali Sunday School Hall sak chu ruahmanpuiin sum pawh sanctioned nghal a ni a, Lockdown chhungin Rajtali Missionary Evan Hrangchhankhuma chuan kohhran member remchang ang ang te puih nain Sundasy School Hall hi a sa a, tunah hian naupang sunday school hall chu luah theihin peih a ni ta a.

He Sunday School Hall hmun hma hi Rajtali Pentecost kohhran Upa Hriatkima in hmunniin, a hmun hi man man takin District tan hian a pe a, District Missions Driver T. Upa Lalthantluanga chuan Sunday School Hall man tur hi a tum nghe nghe bawk.
Rajtali Missionary hian Pathiannikal ta July ni 5 khan, Biak inainkhawm a la theihlohavangin a ma quarters-ah Nau sen pahnih Pathian hnenah hlanin rawngbawlna a nein bawk.