Audit :
July ni 23 atanga ni 26 chhung khan General Hqrs Office, Mualpui Salem veng Aizawlah General Hqrs Administration hnuaia Kohhran sum Audit a ni.
General Hqrs Account hrang hrang bakah General Administration hnuaia Department leh Committee peng hrang hrangte sum Audit a ni a. Auditors te hi Rev. C. Lalrammuana, Rev. Biaksangzuala leh Rev. C. Lalrintluanga leh Rev. Joseph L. Thlauhthang te an ni.
——
General Hruaitute Programme :
General Suptd Rev. Lalmalsawma Sailo chuan July ni 23-25 chhung khan Lawnglai West District ah hun hmangin District Board a telpui.
General Treasurer Rev. Zohmingthanzama chuan Chanmari West Kohhran Golden Jubilee lawmna Programme ah July ni 28, Pathianni hian rawngbawlna a nei ang.
——
District Board :
July ni 17-19 chhung North Mizoram Disrict Kum chanve Board neih a ni.
District Board hi District Hqrs. Kohhran Biak in Tuikhuahtlangah neiin, Dist. Supdt. Rev. Laltluanga’n a kaihhruai a, North East India General Hruaitu Rev. Lalmalsawma Sailov chuan Board meeting hi a ho bawk.
District Board-ah hian North Mizoram District pastor Bial aiawh Bial 30 atangin Board member an kal kim a, District Board kum chanve nikhat ni leh ni hnih ni hian North Mizoram District Office-a LDC Post ruak hnawhkhahna tura thawktu tur interview Board neih a ni a, Interview mi 41 awm zingah Bro. Andy Lalramnghaka Royte, Apa Lalbiakzuala Royte Kolasib Bial Vengthar kohhrana lawi tuna Mission Vengthlanga cheng chu thawktu atan lak thar a ni.
District Board rorel pawimawh dang te tarlang ila:
1. North Mizoram District office-a thawktu Sist. K. Lalrokimi tuna LDC hna thawk mek chu UDC atan hlan kai a ni.
2. United Pentecostal Church ten North East India huapa kum tina Thlarau bo te sengkhawm nan leh Kohhrana mi hla leh Thlarauva tihchak ngaite intihchakna thla atana August thla an lo hman thin chu, kumin pawh hian theihtawp chhuaha hman leh ni se tiin a rel a, He Rammut thla hi District huam chhunga Bialtinte’n a theih anga hlawka hmang tur leh Bial neitu Pastor te pawh rammua chhuak theuh turin an ngen bawk.
3. North Mizoram District atanga thawktu Pension te chu Medical Reimbursement August 2019 atanga tithei turin District Board chuan a rel.
4. North Mizoram District huam chhung khaw hrang hranga rawngbawla tirh chhuah Tirhkohte’n an hunchhung an hman zawh tak avangin, rawngbawl chhunzawm zel dan tur leh an awmnate a tul anga sawi danglam turin District Board rorelna chuan District Officer Meeting kutah a dah.
5. North Mizoram District-in inenkawlna Dan a neih chu ennawna siamthat leh tihlen ngai te a awm tawh avnagin District inenkawlna Dan, Rules, leh Building Rules te chu kum thar lo awm tur 2020-ah chhut that nise tih a ni.
6. Kumin 2019-a Kohhran ding thar Dapchhuah kohhran leh Luimawi Kohhran te chuan inkhawmna tur an neih loh avangin Biak in hmunhma leh a sakna District Board chuan sanction nise tiin a rel a, hei bakah hian Chawlhhmun Pastor Quarters hmun lei remtih a ni bawk.
7. Pastor Pension te thlahnana sumfai Rs. 10000 a pek thin chu, Rs. 30000 pek tawh nise tih a ni.
8. Durtlang Bialtu Rev. C. Lalramzauva Sailo chu kumin October 2019-a pensiona a chhuah dawn tak avangin, Rev. Chhiarpuia District Secretary chuan pastor lak leh hma atan Durtlang Bial lo hmui se tih a ni.
9. North Mizoram Ditrict ten Tualchhung Kohhran hming lam nana “Local emaw Kohhran emaw” tih chu duh zawk zawk hman theih turin a rel.
10. Tlangsang Bial, Tlangsang Kohhrante’n Biak in an sak mek chu District Board in a chung khuhna turin Rs. 1,00,000 pek ni se.
11. Zawlnuam Pastor Quarters sakna tura hmun hma Officer meeting-in Rs. nuai 8-a a lei tawh chu District Board in a Approved a ni.
12. Kohhranin harsatna kan tawh mek chungchangah Pentecost kohhrante’n rorelna fel leh dik kan chan theihnan District Board chuan July ni 21 (Pathianni) chu North Mizoram District chhunga Pastor awm zawng zawng te chawngheia tawngtaina neih ni se tiin a rel.
——-
Seminar :
North Mizoram District Conference rorelin a lo passed tawh angin July 24, Nilaini khan Mamtit District huam chhunga Pentecost kohhran hrang hrang Tual Upa leh Upa te pualin seminar buatsaih a ni a, Seminar hi Mamit Hqrs. Biak inah neiin; Chawhma Dar 10: 00 atangin seminar tan a ni.
Seminar-ah hian Dist. Supdt Rev. Laltluanga paper buatsaih ‘Upate mawhphurhna’ tih te, Dist. Secy. Rev. Chhiarpuia buatsaih ‘Kohhran Statistic’ tih te leh District Treasurer Rev. K. Lalduhsanga paper buatsaih ‘Sum leh Pai lam’ tih thupui hmangtein Seminar neih a ni a. Seminar kal ten an hlawkpui hle.
North Mizoram District buatsaih Tual Upa leh Upa te puala Seminar neih hi a thawhkhatna May 29 khan Aizawl District huam tan Hqrs. Biak in, Tuikhuahtlangah neih a lo ni tawh a, a thawh hnihna July 7 khan Kolasib District huam tan Kol. Venglai Biak inah neih a lo ni tawh bawk a ni.
—–
Chawnghei tawngtai :
North Mizoram District kumchanve Board-in a lo rel tawh angin North Mizoram District ten Kohhrana harsatna a tawh mek chungchangah Pentecost kohhrante’n rorelna fel leh dik a chan theih nan North Mizoram District chhunga Pastor awm zawng zawng te leh Board member te chuan July ni 21 (Pathianni) tlai khan Chaw ngheiin Pathian hnenah an tawngtai a ni.
——
Thawktu la thar :
North Mizoram District Board July ni 17-19-a neih chuan District Office-a LDC post ruak-a thawk turin Bro. Andy Lalramnghaka Royte chu a la thar.
Andy Lalramnghaka Royte hi Barak District Assam Ram Halflonga piang niin; Halflong Kohhranah hian PYD Secretary hna hun engemaw chen a lo chelh tawh bakah Guwahati hmuna NEI UPC in Kohhran a din tirh laia Church Board member, PYD Adviser, leh Sunday School zirtirtu ni bawk a ni.
Kum 2016 khan Aizawlah lo chuang chhuakin Mission Vengthlangah an cheng a, Mission Vengthlangah hian PYD Treasurer ni mekin, Hqrs. Bial PYD Education Sub Committee Chairman hna a chelh mek bawk.
Bro. Andy Lalramnghaka Royte hian Aug Ni 1 (Ningani, 2019) hian he a hna thar hi a zawm dawn a ni.
——-
Crusade :
Bilkhathlir Bial Missions Dept. bultumin Bilkhawthlir Bial Kanaan Kohhranah July 19 -21 Inrinni zan atanga pathianni zan hmang khan bial huap Revival crusade buatsaih a ni.
Crusade-ah hian Evan F.Lalchhanhima Thingdawl venglai chu Speaker atan hman niin; Crusade kaltlangin kohhran mipuiten siamtharna nasa tak an chang a ni. Crusade boruak kal zelah July ni 22 thawhtanni khan T.Upa Lalbiakhlua Runhun, Kanaan Kohhran Church board secretary te chhung chuan Pathian chawimawinan an ran pein Pathian chawimawina hun hlimawm tak an hmang bawk. (Bilkhawthlir Bial Missions rawngbawlna)
——-
Mi thar :
1. N. Mizoram District Kawnpui Bial chhunga Kanan Preaching Point-ah Pathianni kalta July 21 khan Pentecost Kohhranah mi thar 1 sengluh niin mi 4 in Baptisma an chang.
July ni 21 Pathianni khan Kawnpui Venglai Kohhran te chuan Kanan Preaching Point hi tlawhin Chawhnu leh zan an inkhawmpui a, Pathian thuthlung hmu mithar hi Bialtu Pastor P.C Laltlankima chuan Sual ngaihdamna baptisma Lal Isua hminga chantirin Pentecost Kohhranah a senglut a ni.
2. July ni 20 Inrinni khan Rashdali Mission Field-a Missionary hna thawk mek Evan. Hrangchhankhuma leh kohhranhote rawngbawlna avangin Pathian thuthlung hmuin mi thar 1 Pentecost kohhranah sengluh a ni a.Evan. Hrangchhankhuma’n Sual ngaihdamna Baptisma a chan tir nghal bawk.
Pathianni kalta July ni 21 khan Rashdali Mission Field-ah vek hian Ringthar pakhat Hindu atangin Pentecost Kohhranah sengluh a ni a, Rawngbawltu Evan. Hrangchhankhuma hian Baptisma a chantir bawk.
3. Bairabi Bial Suarhliapa rawngbawlna nei Bro Rinenga leh a thawhpuite rawngbawlna kal zelah July ni 21 Pathianni khan Bialtu Pastor Lalhmuakliana Hnamte chuan Suarhliap kohhran-ah Member 3 sual ngaihdamna Baptisma a chantir.
Bialtu Pastor hi Bairabi atangin Bial Secretary Upa C.Vanlalzawma’n a tawiawm a, Baptisma channa tura tuikhuahna tur Bairabi Bethela lawi Sist. F.Lalhlimpuii leh Mapuii ten Silpouline an pek chungchangah Suarhliap kohhrante an lawm hle.
——-
Biak in hawng :
July 20, Inrinni khan Dinthar Bial chhunga awm Chawnpui Biak in sak thar hawnna leh Pathian hnena hlanna neih a ni.
Chawnpui Biak in sak thar hi N. Mizoram District Suptd Rev. Laltluanga chuan Pathian hnenah hlanin a hawng a, Dist Suptd hian Kohhran hoten malsawmna an dawn chu ropui a tiin; an thawhrimna leh inlungrualnaah lawmthu a sawi.
Biak in hawn inkhawm hi Dinthar Bialtu Pastor Rev. C.Laltlanchhuaha’n a kaihruai a, fakna hla saa tawngtairual neih hnuah Evan R.Liandawla, Secretary, Chawnpui UPC chuan Report a pe a. Dinthar Bial PYD ten hla mawi tak zaiin an rem bawk.
Chawnpui Preaching Point ten Biak in thar an neih lawmpuinan hian District leh Bial atangin lawmpuina thilpek pek a ni, Dist. Secretary Rev. Chhiarpuia leh Rev. K. Lalduhsanga, Dist. Treasurer ten Chawnpui Kohhrante fuihna thu leh lawmpuina thu an sawi bawk.
Bro. Lalruatdika, Dinthar chuan fakna hla mawi tak sain hemi hnu hian Rev. Laltluanga Dist. Superintendent chuan thusawi rawngbawlna a nei a. Chawnpui Preaching Point chu Kohhran Puitlingah puanna a nei nghal bawk a ni.
Chawnpui Kohhran aiawhin Chawnpui Church Board Chairman Upa R.Kapthanga Meeting Chairman chu chibai bukna a nei. Upa R. Kapthanga chuan Chawnpui kohhrante District leh Dinthar bial leh an pemchhuahna Zotlang kohhrante enkawlna leh chhawmdawlnaah lawmthu a sawi bawk.
Chawnpui Kohhran Biak in thar lawmna leh Kohhranpuia hlan kai Inkhawm hi Rev. C.Lalthantluanga, Director, Missions Department chuan Malsawm tawngtaina neiin a tin a.
Tlaiah Biak in thar lawmna Ruai theh a ni bawk.
Chawnpui Biak in thar lawmna leh Kohhranpuia hlan inkhawm Programme hi Chawnpui khawtlang hruaitu Local Council, MHIP leh MUP ten an hmanpui thei bawk.
Dinthar Bial chhunga kohhran pakhat Chawnpui-Zotlang kohhran tih mai thin hi Kumin January 13, 2019 atang khan Chawnpui veng lam atanga lawi te chu indangin, North Mizoram District chuan Chawnpui Preaching Point ah a dah a. District-in Biak In tur In ding sa chhawng thum, a vang fit 18 leh a dung fit 21 chu leisak a ni.
Tun dinhmunah Chawnpui kohhranah hian member 100 chuang an lawi mek a ni.
—–
District Hruaitute Programme:
District Supdt. Rev. Laltluanga chuan July ni 28 Pathianni hian Damparengpui Biala awm Dampa Tlangnuam Kohhran Biak in hawnna a nei ang.
SS Director Rev. K. Malsawmtluanga chuan July 28, Pathianni hian Phainuam Sunday School Hall sak thar hawngin rawngbawlna a nei ang.
—–
Thianghlimna Committee :
Lunglei District Thianghlimna Committee chuan bial tinah Thianghlimna Committee din nise tia ngenna an siam angin Lunglei District chhung bial 20 atangin bial 13 ah Thianghlimna Committee hi din a ni tawh a, hmun hrang hrangah Campaign an nei chho mek bawk.
July 21 Pathianni khan Mualthuam Venglai Local-ah District Secretary Rev.PC.Lalfakawma leh Evan.MS Dawngliana Hnamte ten Thianghlimna Campaign hi an nei a ni.
—–
PCD :
July 17 nilaini khan District PCD OB meeting chu District Secretary room-ah neih a ni. An rorel tlangpuite:
-Aug.3 inrinnia Hnahthial bial PCD ten Seminar an neih turah Resource person atan District PCD Senior Adviser Rev.PC.Lalfakawma leh District PCD President Rbt.K.Lalrintluanga te nise tha tih a ni a, hemi rual hian Aug.3-4 chhung hian District PCD Board members ten Hnahthial bial chhung Local hrang hrangah Campaign neih nghal nise tha tih a ni.
-PCD zirlaibu kum 2025 thleng a zir tur ruahman lawk nise tha tih a ni a, hma lo la turin District PCD Senior Adviser Rev.PC.Lalfakawma leh District PCD President Rbt.K.Lalrintluanga te ruat an ni.
-PCD meet neih hun tur atana ruat Oct.19-20 chu remchan zawkna avangin hetiang hian ruahman a ni. Oct.18 zirtawp zanah District.UPC Conference Hall-ah Quiz Competition neih tur a ni ang a, Oct.19 inrinniah Worship Dance neih tur a ni ang.
—–
Retreat :
July 25, Ninga zan khan District UPC Conference Hall-ah Lunglei District PYD Choir-te chuan Retreat an buatsaih a, District Superintendent Rev.C.Vanlalena, Resource Person atan an hmang.
——-
Seminar :
July 28 Pathianni hian Lunglei District PYD hmalaknain Bunghmun Local-ah Seminar neih a ni dawn a, Resource Person atan District PYD Treasurer Evan.Lalringzuala Pachuau chu hman a ni ang, thupui atan hian ‘Leadership’ tih leh ‘Kohhran dan thianghlima nupui/Pasal neih tam inzirtir’ tih chu hman a ni ang.
—–
Member thar :
July 21 Pathianni khan Thingsai Local-ah bialtu Pastor H.Lallawmsanga chuan mi 2 baptisma a chantir a, 1 hi mi thar a ni.
—–
District Board :
July ni 18, Nilaini khan Chhimtuipui Dist Committe room ah Dist Board neih a ni. An rorel tlangpui te :
1. August thla hi District chhunga Rammut thla atana hman relin Pastor leh Evangelist te rawngbawlin an fehchhuak dawn a ni.
2. Evan.T.Vanlaltana chu kum 19 aservice tawh hnuin LDC a hlan kai a ni.
3. Local leh Bial tin ten Pentecostal Voice agent siam thar nise tih a ni a, Dist Pentecostal Voice Correspondent T.Lalbiaknungi hnenah inhriattir tur a ni.
4. Biak In sak tanpuina dilna lut chungchang ngaihtuahin, heng local te hnenah hian Rs.100,000/- ?heuh tanpuina pek nise tih a ni.
a. Pangkhua local
b. Vawmbuk Local
c. Siata Bethlehem local.
d. Siaha Council veng local.
——
Chawimawina :
Chhimtuipui District, Siahatla local chuan July ni 19-21 chhung khan Bro.Patinga techhungkua kaltlangin lawmthusawi chawimawina an buatsaih a, Dist Revival Pastor C.Lalchhuanthanga chu speaker atan an ruai.
He chawimawi chhim tur hian Niawhtlang bial leh Siaha bial chhunga kohhran thahnem tak an kalkhawm a ni.
—-
Rawngbawlin fehchhuak :
1. Chhimtuipui Dist Evangelist Robert B Lalnunsiama T chuan July 19- 21 chhung khan Tuipang bial, Laki hmun ah Kohhran tih thupui hmangin rawngbawlna a nei. Dist Evangelist N.Thanghnuna pawhin July ni 19-28 chhung hian Siata, Bethlehem Kohhranah rawngbawlna a nei mek bawk.
2. July 15-20 chhung khan Dist Hqrs local, New Siaha ah Rev.Lalkima of Myanmar chuan rawngbawlna neiin, July 24-28 chhung khan Siahatla local ah rawngbawlna a chhunzawm leh a, Rev.Lalkima hian Pentecostal family tih thupui hmangin thahnemngai takin rawngbawlna beihpui a thlak thin a, a rawngbawlna Kohhran hoten an hlut hle a ni.
—–
Bial Zaipawl Induction :
Chhimtuipui District, Niawhtlang Bial PYD zaipawl din thar niin, July ni 28, Pathianni hian Niawhtlang local ah sectional pastor V.Lalhlimpui an lakluhna leh tawngtaisakna a nei dawn a ni.
———-
Office Sraff te tan Seminar :
July 18, Ningani khan Aizawl East District Board-in ruahmanna alo siam tawh angin District Committee room-ah Aizawl East District hnuaia Office Staff leh an kawppuite tan Seminar buatsaih a ni.
District Secretary Rev Biaksangzuala, chuan he hun hi kaihruaiin Rev Vanlalfela Ramtiam, District Treasurer chuan hunserh a hmang.
Seminar hi Session hnihah then niin chawhma session-ah General Superintendent Rev Lalmalsawma Sailo, resource person-ah hman niin ani hian Thawktute Office chhunga an mawhphurhna bakah Thawktute laka kawppuite mawhphuhrna tih thupui-a hmangin zirtirna a pe a, mahni hna theuhah lungawi taka thawh a pawimawh thute, hruaitute tawiawm zel a pawimawh thute ngaihthlak a ni.
Chawhnu session-ah General Missions Director Rev R.Lalhawia, leh Rev Rosanga Kawlni, District Superintendent te chu resource person-ah hman niin Rev R.Lalhawia hian thawktute leh an kawppuite mawhphurhna hrang hrang- thianghlimna chungchang bakah Bial leh Tualchhung Kohhrana an mawhphurhna te ngaihthlak niin lawm chunga Lalpa rawngbawl tur an nih thute leh Bial leh tualchhungah an phak ang tawka Kohhran tana thahnemngai taka thawh a tul thute ngaihthlak niin Rev Rosanga Kawlni hnen atang hian thawktute leh an kawppuite tana hriattur pawimawh tak tak ngaihthlak a ni bawk.
Seminar-ah hian thawktute leh an kawppui mi 35 kalin hlawk takin hun an hmang a ni.
—-
Audit :
Aizawl East District hnuaia Kohhranpui leh Department hrang hrang bakah Sub-Committee te Kum chanve sum chu July 23, Thawhlehni atang khan District Office-ah Audit neih a ni. District Board in heng mite hi Auditor atan a ruat a ni: Pastor H.Lalropuia, Pastor Lalhmangaihawma Parte, Pastor B.Lalengzauva bakah Upa Joseph Lalhruaitluanga te niin Audit hi tunkar chhunga an zawh hman loh chuan karleh hian chhunzawm tur a ni.
——
Dist Board :
Aizawl East District hnuaia Department pahnih Missions Department leh LAD te chuan karleh hian District Committee room-ah Kum chanve District Board an nei dawn. Missions Department hian July 30, Thawhlehni hian District Board hi Rev R.Lianzama, Director kaihhruaiin an nei anga, LAD te hian July 31, Nilaini hian Sis F.Lalawmpuii B/W, President kaihhruaiin District Board hi an nei bawk ang.
——-
Fehchhuak :
Bawngkawn Bial Missions Department ten ruahmanna an lo siam tawh angin July 21, Pathianni khan North Mizoram District, Lengpui Kohhran tlawhin fehchhuah programme hlawhtling takin an hmang.
He hunah hian member 50 chuang kalin hun hlimawm tak an hmang a, Bawngkawn Bial Missions Department ten thusawi rawngbawlna an nei thin a, mimal bakah Bial zaipawl te hnen atangin fakna hla ngaihthlak thin a ni bawk. He hunah hian Pathianni chawhma khan Evan H Lalsiamliana chuan thusawi rawngbawlna a nei a, Chawhnu-ah T.Upa Zothankima Colney chuan nei ve lehin zanah Rev C.Mawizualal, Bialtu Pastor hnen atangin thuchah ngaihthlak leh a ni bawk.
——-
Revival Crusade leh Lawmthusawi chawimawina :
Aizawl East District, Zemabawk Vengpui Kohhran Missions Department hmalaknaa Revival Crusade neih chu Kohhranah harh tharna nasa tak a thlen avangin la chhunzawm zel a ni.
He Crusade-ah hian Speaker-ah Evan H Lalhlimpuia chu hman niin Pathian hnena lawmthu sawi chawimawina pawh vawi engemaw zat neih tawh a ni a, Kohhran ten hlim takin hun an hmang a ni. July 20, Inrinni khan mi panga in sual ngaihdamna baptisma chang tharin an zinga pahnih hi mithar an ni.
Upper Republic Kohhrana June 19 atanga Revival Crusade neih pawh Pathian chenchilhna hnuaiah Kohhranah harh tharna nasa tak a thlen avangin ala tawp mai thei lova, tunah hian chhunzawm mek zel a ni. He Crusade-ah hian Speaker-ah Evan R.Vanchhunga, District Fulltime Evangelist chu hman niin Pathian chawimawina pawh mimal kaltlang leh Kohhrana mithahnemngai thawh hmangin vawi engemaw zat neih alo ni tawh a ni. Pathianni khan Kohhran dang atangin sual ngaihdamna baptisma chang an awm bawk a ni.
——-
Missionary kal tur thlah :
Bawngkawn bial PYD leh Bawngkawn Local PYD te chuan an member Sis.Nissi Lalduhsaki, Pentecostal English School, Manigong hmuna Missionary-a kal tur thlahna hun July 22, Thawhtan zan khan Bawngkawn Biak-inah an hmang. He hun hi Bro C.Lalruattluanga chuan kaihruaiin Bawngkawn PYD aiawhin Sis KVL Chhanchhuahi’n thilpek hlanna a neih a, Bro HK Lalneihsanga, President in thusawina a nei bawk. Special Item Bro Laldinsanga’n neiin Bial PYD aiawhin T.Upa Hmingchungnunga chuan thusawina a neih bakah thilpek hlanna neih a ni bawk. He hunah hian Bawngkawn bial zaipawl bakah mimal hnen atangin fakna hla ngaihthlak niin Sis Nissi Lalduhsaki hnen atangin thusawi ngaihthlak a ni bawk. He hunah hian Bial chhung atangin PYD member engemaw zat an kalkhawm a ni.
Sis Nissi Lalduhsaki hi Bawngkawn Bial zaipawl member a nih angin July 18, Ninga zan khan Bial zaipawl te hian thlahna hun an lo hmang tawh bawk a ni.
—–
Aizawl East District Hruaitute Programme:
District Superintendent Rev Rosanga Kawlni, chuan Serchhip Dinthar bial, Hriangtlang hmunah Pathianni hmang hian rawngbawlna a nei a, Chhungkaw maicham thupuia hmangin Seminar-ah resource person-ah tangin zirtirna a pe bawk ang.
Facebook