UPCNEINEWSSERVICE July 19-26.2020
—–
Reverend Title hlan :
UPC-North East India, General Aministrative Committee chuan Imphal District Board in a recommend angin Pastor T.L Siama, Imphal leh Pastor H. Muana Vaiphei, Moreh te chu kum 10 chhung Pastor rawngbawl hna rinawm taka an lo thawh tak avangin July ni 22, 2020 Thawhlehni khan Reverend title an hlan a, tun hnuah chuan Rev. T.L Siama leh Rev. H. Muana Vaiphei tia lam leh ziah tawh tur an ni.
Rev. T.L Siama leh Rev. H. Muana Vaiphei te hi May ni 17.7. 2010 khan Pastor atana nemngheh a ni a, an rawngbawlna peng hrang hrang te thlirin Imphal District Board chuan Reverend title pek tlakah ngaiin a recommend-a, General adminitrative committee pawhin he title hi pek tlakah ngaiin a hlan ta a ni.
——
Khawvel ram dang Pentecost rawngbawlna chanchin :
Global Missions hnuaia Fiji rama missionary hna thawk mék Bro. & Sister Troy N Jennette Wickett te report-a a lan danin July ni 17, zirtawpni khan Solomon Islands-a mission trip an neih zawh takah mithar 21 zet ten Isua hmingin baptisma an chang a, mi 7 in Thlarau baptisma an chang thar a, an zinga 2 hi baptisma chang zo hlim tui aṭanga an lo chhuah ruala Thlarauvin a khawih te a ni.
July ni 17 vek khan Pentecostals of Centrala, UPC, Koronadal khawpui (Mindanao Province) ah mithar 20 ten Isua hmingin baptisma an chang a. Heng mite Bible study kaltlanga thuthlung hmutute an ni.
July ni 15 khan 92.5 FM Radyo Rapido kaltlanga Inrinni leh Pathianni zan apianga Pathian thuthlung sermon kaltlanga thuthlung hmufiah mi 19 ten Isua hmingin Mindanao luiah baptisma an lo chang tawh a, kar kal ta khan mithar 39 zet sengluh an ni. July ni 11 Inrinni khan Radio kaltlanga Thuthlung hmufiahtu mi thar 4 te UPC ah sengluh niin baptisma chan tir an lo ni tawh bawk.
—–
Audit dawn :
Chawlhkar thar lo awm tur July ni 28 atanga ni 31 chhung hian General Hqrs Office, Mualpui Salem veng Aizawlah Kohhran sum Audit a ni dawn.
General Hqrs Account hrang hrang bakah General Administration hnuaia Department, Field leh Committee peng hrang hrang te sum Audit a ni ang. Auditors te hi Rev. C. Lalrammuana, Rev. Biaksangzuala,Rev. C. Lalrintluanga leh Rev. Joseph L. Thlauhthang te an ni ang.
Tunlai hripui leng avanga inkal pawh a harsat avangin Calvary Bible College (CBC) Account chu Shillong-a lo audit turin Rev. Lalromawia Ralte leh Pastor T. Vanlalhruaia te ruat an ni.
——
District hrang hrang rawngbawlna chanchin :
Lunglei District :
July ni 15 thawhlehni khan Lunglei District UPC chuan Half Yearly Report 2020 (January – June) chu a tichhuak a, hetiang hi report tlangpui chu a ni.
Kohhran ding zat – Local 112
Tuna Member zawng zawng – 18758
Baptisma chang tawh zawng zawng – 12084
Thlarau Baptisma chang tawh zawng zawng – 8098
PYD dinna – Local 90
LAD dinna – Local 107
PMD dinna – Local 49
PCD dinna – Local 84
S.S. Department dinna – Local 107
Missions Department dinna – Local 101
Kohhran upa zat – 393
Senior Upa zat – 56
Rawngbawltu zat – 554
Ordination Licence nei zat – 28
General Licence nei zat – 52
Local Licence nei zat – 41
Bible women Licence nei zat – 11
Chhungkaw awm zat – 4001
Karchhuak chhungkaw zat – 279
Mipa zat – 9333
Hmeichhe zat – 9425
Kum 18 leh a chunglam – 12091
Kum 17 leh a hnuailam – 6667
——-
Missionary chawm :
July ni 21 thawhlehni khan Luangmual Local PYD te chuan Missionary pakhat chawmna Rs.12000 chu Lunglei District Missions Director kaltlangin General Missions Department hnenah an hlan.
Luangmual Local PYD te hian Missionary chawmna hi nikum pawh khan an lo pe tawh bawk.
—–
Baptisma chang :
July 19 Pathianni khan Rahsiveng Local Sunday School Hall-ah bialtu Pastor Rev.C.Lalhriatpuia chuan Lalpa Isua hmingin mi 16 sual ngaihdamna baptisma a chantir a, an zingah hian mi thar 2 an tel, he hun hi Thlarau lam hla nen hlim tak a hman a ni.
——
Aizawl East District :
Aizawl East District hnuaia Kohhranpui leh Department hrang hrangte kum chanve sum Audit chu July 21 atang khan nei tanin July 24 khan tluang taka zawhfel a ni.
Audit tan ni hian Rev Biaksangzuala, District Superintendent kaihhruaiin inhlantharna neih a ni. Kuminah hian Auditor atan District Board chuan Rev. H.Lalropuia, Pastor Lalhmangaihawma Parte bakah Rev. B.Lalengzauva leh Upa Joseph Lalhruaitluanga te chu ruatin Audit hi tluang takin July 24, Zirtawpni khan an zo fel a ni.
—-
Sunday School Executive Meeting :
July 21, Thawhlehni khan District Superintendent room-ah District Sunday School Executive meeting Rev HL Thakunga, Director kaihhruaiin neih a ni.
September 16, Nilaini hian District Committee room-ah District Board neih tura ruahman a ni a, Agenda nei turten September 15, Thawhlehni hmain Secretary hnenah thehluh ni se tih a ni. Champhai Bial, Zion Local ten Sunday School sak tanpui an dilna chu pek tha tih niin Serchhip Bial, Sialhau dilna chu hruaituten lo zirchiang leh phawt se tih a ni. Heng bakah hian Darlawn Kohhran ten Sunday School Hall an sakah harsatna an neih chu 3500/- a tanpui ni se tih a ni bawk. District Sunday School Executive meetingah hian District Kohhranpui hruaitute pathum pawhin an telpui bawk a ni.
—–
Dist Education Sub Comtt :
July 18, Pathianni chawhnu khan District Committee room-ah Aizawl East District PYD hnuaia Education Sub-Committee te chuan meeting an nei. Bro R.Vanlalpeka, Chairman chuan a kaihruai a ni. An rorel tlangpuite:
1. Sailulak Local leh Sakawrdai Bial atanga sawmna an hmuh chu tihhlawhtlin ngei tha an ti a, boruak thlirin a hun tur chu hruaituten ruahmanna lo siam se tih a ni.
2. Covid 19 hrileng avanga Sawrkar dan zam bawhchhe chuang lovin Aizawl khawpui Bial chhunga Local thenkhat tlawhchhuah ni se tih a ni a, a hmasa ber atan Bethlehem Kohhranah a remchan dan angin hun hman tura tih niin Target Group atan Kum 15 chin chunglam nise Topic atan heng hi thlan a ni:
Eizawnna kalkawng inkawhhmuhna, Rikrum thila inven dan leh nunna chhan dan, Mizo nun mawi inzirtirna te a ni.
——-
Kum chanve Board :
July 29, Nilaini hian District PYD chuan kum chanve District Board, District Committee room-ah an nei dawn. He hun hi Rev C.Lalmalsawma, President chua a kaihruai anga, Bial atang leh Official atanga agenda lut te an ngaihtuah dawn a ni. District PYD Board-ah hian District Kohhranpui hruaitute pawh tel tura beisei an ni.
—–
Member thar lawmlut :
Bawngkawn Bial Zaipawl Committee chuan July 19,2020 (Pathianni) khan an member Pentecostal Choir a lut tate thlahna leh Zaipawl member tharte lawmluhna an nei.
He hun hi Bro Lalchhuansanga, Chairman, Zaipawl Committee chuan a kaihruai a. Bro C Lalruattluanga, Secretary, Zaipawl Committee hnen atangin report ngaihthlak a ni. Zaipawl member kalchhuak tur mi 2 leh member thar mi 3 te lawmluhna hi Bro HK Lalneihsanga, Secretary, Bial PYD – in a nei a, Bro Malsawmdawngliana Fanai, Vice President, Bial PYD in fuihna thu a sawi thung.
Bro Imanuel Lalnunsanga, Sis Mercy Lalmuanpuii leh Sis Lalhlimpuii te hnen atangin fak hla mawi tak ngaithlak a ni a. Bro Lalbiakdika, Treasurer, Bial PYD in hun tawp tawngtaina a hmang a ni.
Bawngkawn Bial PYD Education Sub-Committee te chuan an bial chhunga HSLC leh HSSLC pass tha, 1st Div chin chunglama pass te hnenah lawmpuina memento, July 19, Pathianni khan an hlan bawk. Bial huapa program buatsaih theih anih loh avangin Education Sub-Committee te chuan zirlaite hi anmahni in theuhah kalchilhin memento hi an hlana, an zir lehzelna atan zirlaite leh nu leh pate fuihna an sawi thin a ni.
——-
District Missions Board :
July 22, Nilaini khan Aizawl East District Missions Department hnuaia rorelna sang, kum chanve Dictrict Board chu District Committee room-ah neih a ni.
Board hi Rev R.Lianzama, Director chuan kaihruaiin District Kohhranpui hruaitute bakah Rev R.Lalhawia, General Missions Director pawhin an telpui a ni. An rorel tlangpuite:
1. Covid-19 hrileng mek avangin Kumin October thlaa E.Lungdar Bial-a District Missions Conference neih tura tih chu neih theih a ni dawn lova, conference pangngai programme siam lovin rorel inkhawm chauh neih ni se, a hun atan October 23, Zirtawpni ni se, a hmunah District Hqrs. Biakin ruahman niin rorel palai tur chu boruak awm dan enin Executive meeting in ruat se tih a ni.
2. Home Missionary te a theih hun huna tirhchhuah leh tha tih niin a tirhchhuah hun leh tul dang chu Executive meeting kutah dah a ni.
3. August thla, rammut thla hian Local tinah Missions hmalakna in Home Crusade neih theuh tura tih niin District Missions Department atangin Circular la chhuah a ni ang.
4. Covid-19 hrileng avangin Lock Down chhung pawhin Second Sunday thawhlawm khawn kal zel ni se an ti bawk a ni.
—-
Hruaitute Programme:
Rev Biaksangzuala, District Superintendent chuan Zirtawpni khan Rabung Bial, Saichal Kohhran ten Biakin an sakna tura thil tul pawimawh te tiin a kal a, Inrinni khan a rawn let leh a ni.
——
Chhimtuipui District :
Sunday School Board :
July 16, Ningani khan Chhimtuipui District Sunday School Dept. Board meeting neih a ni a, hengte hi thurel tlangpui a ni:-
1. Conference in Sunday School Campaign neih a lo pass tawh, Lockdown vanga bawhzui theih tak loh chu, a theih ang ang a Campaign hi neih ni se tih a ni a, Executive Meeting in programme siam in, an lo bawhzui tura tih a ni.
2. Conference vawi-43 na thu pass bawhzui na a, Naupang Sunday School tana Hla bu te Secretary in a lo duan (draft) chu belh leh paih ngai te siam remin pawm a ni a, Hla bu te hi Rs. 20/- in hralh ve ni se tih niin, Sunday School intihsiak na reng reng ah he hla bu te hi Bial tin ten hman vek nise tih a ni.
Meeting hi Evan. V. John, District SS Director in a Kaihruai a, District Suptd Rev Joseph L Thlauhthang leh District Secretary Rev WL Thanghre ten an tel pui a ni.
——
Baptisma rawngbawlna :
July 19, Pathianni khan Rev K Kawngkharmawia Sectional pastor kaltlangin, Sangau I local ah mipanga (5) te chuan Isua hmingin sual ngaihdamna Baptisma an chang. An zinga pakhat hi mi thar a ni.
—–
Sum pe chhuak :
July ni 22, Nilaini khan Biak In sakna tur leh Pastor Qtrs pakhat sakna tur sum pek chhuahna inkhawm tawi District Treasurer Room ah neih a ni. Hemi rual hian Tialdawnglung a Kohhran ram leina tur Rs.80000 chu District Missions Treasurer in Bualpui Ng Bialtu Pastor hnenah a hlan nghal bawk.
He hun hi District Superintendent in kaihruaiin District Treasurer in Local hrang hrang aiawh Upa leh Pastor te hnen ah sum hlanna a nei a, District Secretary in tawngtaina in hun kharna a nei a ni. July ni 22, Thawhlehnia Pastor Quarters leh Biak In sak tanpuina sum pek chhuah zat hi Rs.1,400,000/- a ni.
——–
Charge hlan :
July ni 21, Thawhlehni khan Chhimtuipui Dist SS Dept Treasurer thar Upa F Lalrothuama chuan Treasurer hmasa Rev.Kholy Hlychho hnen aṭangin charge ala thar. Upa F Lalroṭhuama hi Dist Sunday School Secretary nilai mek a ni.
——
Music and Sound Comtt :
July ni 22, Thawhlehni khan Dist Superintendent Quarters ah Dist PYD Music & Sound committee ten meeting an nei. An rorel tlangpui te :
1. Board member pathum ruat belh an ni.
2. Dist PYD Choir member ruat tharna neih a ni.
3. Zaipawl member thar induction service chu Aug ni 9, Pathianni khian neih tum a ni.
——–
Lawngtlai West District :
District Secretary/Treasurer Rev. Lalsawmliana Sailo chuan July ni 26, Pathianni hian a bial chhung Chandmary Biakin ah Nauhlan rawngbawlna a nei ang a, Chandmary Local church board comtt a telpui nghal bawk ang.
District Mission Director Rev.F.Lalbiakṭhuama chuan July 26, Pathianni hian Lawngtlai North bial Council veng local ah Leadership training a neih pui dawn a, Thupui tan Church Administration tih hman a ni ang. Director hi Lawngtlai North Bialtu Rev.TV Mawngchina’n a tawiawm dawn a ni.
——
Imphal District :
Audit :
July ni 16-18 chhung khan Imphal District chhunga Kohhranpui sum leh pai te audit a ni a, Rev.M.S.Singh leh Upa Thanga Lengen-te auditor an ni.
—–
Baptisma chang :
July ni 19, Pathianni khan T. Munnomjanga Dingpi bial a, Rev. MS.Singh Bialtu pastor kut a mi thar pahnihin Lal Isua hmingin baptisma an chang.
—–
Member thar :
July ni 21, Thawhlehni khan Saikul area a Imphal District Missions depart. hnuaia thawk Evan. Kaplalthuam rawngbawlna kaltlangin mi pakhatin Lal Isua hming in sual ngaihdamna baptisma a chang a. Kohhranah sengluh nghal a ni.
——
Seminar cum revival :
July ni 17-19 chhung khan Leimakhong tualchhung PYD te chuan Seminar cum Revival programe an buatsaih a, Evan.Lucien K Lengen, Evan.Paoluna leh Evan.Kaplalthuama te speaker atan an ruai.
——-
Churachandpur District :
Seminar :
July ni 26, Pathianni hian Distrct Hqrs Biak in, Salem vengah District level-a rawngbawltu chin tan Accounting Seminar an buatsaih.
Seminar ah hian Dist.level Deptt. O.B. chin kal tura beisei an ni a, Resource person atan Upa V.L.Mawia leh T.Upa Mangkholal (Lalboi) te an ruai.
—-
Baptisma :
July ni 19, Pathianni khan Moirang khawper Okshongbung-a District hruaitute rawngbawlna kaltlangin mi 2 in baptisma an chang a, Baptisma rawngbawlna hi Khousabung Section Pastor Noren Singh an a chantir.
——-
North Mizoram Distirct :
District Hruaitute Programme:
Superintendent Rev. Laltluanga chuan Pathianni kalta July ni 19 khan Tlangnuam Bial Lungleng 1 kohhran leh, Samtlang kohhrante tlawhin; Lungleng 1 Kohhrante’n an Biak in sak mek dinhmun a enpui a, Kohhran a tlawh pahnihah te hian tawngtaihona an nei. Dist. Supdt. Kohhran tlawh hi Tlangnuam Bialtu Pastor Lalruatkima Fanaii’n a tawiawm.
—-
District Board :
North Mizoram District Kum chanve Board ni 2 awh chu July ni 16 Ningani khan tanin July ni 17 tlai dar 5:00 khan an zo. Board Meeting hi Rev. Laltluanga District Supdt. Chuan kaihruaiin General Office aiawhin Gen. Supdt. Rev. Lalmalsawma’n Board meeting a ho bawk.
Board roreltlangpui:
1. Kohhranhote’n kumtina an hman thin Rammut thla August chu hrileng boruak thlirin District hruaitute’n ruahmanna siam ni se.
2. Kum 2020 atana Department Conference la nei lo ten, Boruak azirin rorel inkhawm chauhneih ni rawh se.
3. Bial Join Revival neih thin chu, Covid-19 hrilengin ziaawm lam a pan theih loh avangin, fimkhur thuhlaah kumin atan chuan thulh ni mai se.
4. Kum 2020 chhung atana Bial huap Department Conference nei tur te’n Conference an neih leh neih loh tur chungchang chu Bial kohhranpui Board kutah dah a ni.
5. Kum 2020 chhung hian Kohhranhote’n sum a ren thei ang bera hman ni se. Tih te an rel a ni.. (Video: District Board)
——
Pentecostal School of Ministry :
July ni 22nd Nilaini chawhma dar 11:00 khan North Mizoram District hnuaia Pathian thu zirna Pentecostal School of Ministry (PSM) chuan kumin chhunga Pathian thu zirna kalpui hun tur an sawi ho.
Meeting hi Chairman Rev. Laltluanga’n kaihruaiin; Kumtin PSM Zirna June thlaa an neih thin, Covid-19 hrileng avanga zirna an kalpui theih loh chu, kumin chhunga neih hun tur an ngaihtuah a, October thlaah neih an rel.
Kummin chhung hian Subject 7 zir tur niin; an Subject zir tur leh zirtirtu tur te:
1) Tabernacle: Rev. C. Lalmuanpuia
2) Pneumatology: Rev. C. Lalrammuana
3) Life & Work Christian minitry: Rev. Laltluanga
4) Church History: Rev. K. Malsawmtluanga
5) Bible Doctrine 1: Rev. K. Lalduhsanga
6) Epistle: Rev. Chhiarpuia
7) Minor Prophet: Rev. C. Lalthantluanga
——
Result lawm :
July ni 16 ningani khan Pentecostal Gateway HSS ten kum 2019 – 2020 HSLC & HSSLC result tha tak an neih avangin a lawmnan District Board-ah Cake zaiin an ei ho.
Lawmthusawina Cake hi District Superintendent leh Managing Board Chairman ni bawk Rev Laltluanga’n a zai a, Board member te leh North Mizoram District Office staff ten an ei ho a ni.
Cake zaina hunah hian PG HSS Principal Evan JH Malsawmdawngliana’n thusawi tawi pein. PGHSS ten result tha tak mai an neih chu Pathian mite tawngtaina vang a nih thu leh, Pentecost kohhrante Lalpan malsawmnaa a vur zel thu te, Zirtirtute thawhrim rah a nih thu te leh District Board member ten school thatna tur an ngaihtuahna vang a ni a ti. Principal hian kohhranin boruak eng neih hunah Shool Building tur ngaihtuaha theihtawp chhuaha hmalak pui turin a ngen nghal bawk.
—–
Member thar :
Pathianni kal ta July ni 19 zan khan North Mizoram District Mission Field neih zinga a naupang ber, Evan Rawngbawlzela rawngbawlna hmunah member thar 3 Kohhranah sengluh an ni.
Member sengluh programme hi Evan. Rawngbawlzela hian neih nghalin, Lal Isua hmingin Pentecost Kohhrana lawi turin a seng lut a ni.
—-
Work camp :
Kolasib Diakkawn bialten ruahmanna an neih angin July ni 21 thawhlehni khan Damparengpui Bial chhunga awm, Dampa Tlangnuam Tirhkoh Quarters sak hna chu Workcamp in an thawk.
Diakkawn Bial atang hian work camp member 22 lai thawk chhuakin quarters sak hi ni hnih chhung an thawk a, an tanrualna leh thawhrimna avangin Dampa Tlangnuam Tirhkoh quarters chu an zo fel thei ta a ni. Hemi chungchangah hian Damparengpui Bial hruaitute an lawm hle.
——
Tanpuina hlan :
1. Chaltlang bial Missions Department ten ruahmanna an neih anga Damparengpui Bial Sidon Biak In Workcamp-a sak chu, Covid-19 hrilengin harsatna a siam avangin; sum leh paia tanpuina pek mai nise tiin an rel a, an rorel anga District Missions kaltlanga sum leh pai an pek tawh chu, July ni 16 Ningani khan District Missions Treasurer in Sidon Kohhran Bialtu Pastor R. Thanglura hnenah Rs. 35000 a hlan, Sum dawngtu Pastor hian Chaltlang Bial Missions Dept. Te chungah a lawmthu a sawi bawk
2. Chanmari Local PYD ten Mamit Bial, Vawngawnzo Missions Field Biak in tur anmahni sum senga workcamp-a bul an lo tan tawh chu Sist. Lily in hnatlanna tura Rs. 10000 a hlan hmangin, tunlai hian Vawngawnzo Missions Feild Biak an sak hna Missionary Evan. RS Lalnunmawia hovin Tualchhung kohhrante’n an theih ang angin an chhunzawm leh mek.
He Biak in hi remchang hmasa berah Chanmari Local PYD ten a sak hna an chhunzawm leh dawn a ni. (Vawngawnzo Biak in)
Facebook