Member thar 44 :
July ni 15, Thawhtanni khan General Missions Director Rev.R.LalHawia chuan Dimapur field, Karbi Along Dist.chhung Torte Apum khuaah member thar 44 Pentecost Kohhrana lawi turin a senglut.
Torte Apum khaw enkawltu Lal chawp hian Pentecost Kohhranah hian sengluh an ni a, member tharte hi Hindu leh Kohhran dang atanga rawn lut an ni. General Missions Director chuan Chhandamna thuthlung dik tak avanga tawrh leh chan pawh huama Pentecost Kohhran huangchhunga rawn lutte hnenah lawmthu sawiin, rinawm leh chhel taka thuthlung vuan tlat turin a fuih a, Torte Apum khaw Lal pawhin thu tawi sawiin Pentecost kohhran dik a tih zia leh chhandamna thu avanga tuar a tul pawha tuar a inhuam zia a sawi bawk. Karbi along ram chhung Karbi hnam zingah Pentecost kohhran pakua (9) din a ni tawh a ni.
General Director Rev. R. Lalhawia kutah hian Mi 19 in Lalpa Isua hminga sual ngaihdamna Baptisma chang nghalin; Field Director Rev. James Lawrence Joute chuan Naupang Sawmpahnih (12) a hlan bawk a ni.
——-
Spiritual Emphasis Week :
July ni 15 atanga ni 19 chhung khan Calvary Bible College, Shillong chuan Spiritual Emphasis Week, CBC Chapel-ah an hmang.
Spiritual Emphasis Week hi July ni 15, Thawhtan zing dar 6 ah tanin Principal Rev. Lalpeklien Sungte, chuan Pathian hnenah hlanin a hawng a, chaw nghei tawngtai an neih chhunzawm nghal.
Week tanni hian Chawhma session Rev. L. John Gangte chuan a kaihruai a, Rev. Lalpeklien sungte speaker niin, The danger of not being baptized with the holy spirit tih thupuiah hman a ni. College campus hlan thianghlimna neiin chawhnu lamah tawngtai leh bible chhiarna hun an hmang.
Zan lamah Praise and worship programme hmangin Evan David R. Malsawmtluanga’n inkhawm a kaihruai.
Week hman chhung hian zing dar 6:30 ah Morning Devotion neiin session khatna dar 9:30 atanga 10:30 thleng an nei a, he hun chhung hian Emphasis Week speaker ten thupui thlanbik hmangin zirtirna an pe a, Zirlaite Group 5 ah inthenin thupui zir zauna bakah zawhna leh chhanna hun an hman chhunzawm thin. Chawhnu lamah pawh session hnihah thenin Praise and worship programme, tawngtaina leh Bible study programme te an nei a, Zan tin inkhawm programme an buatsaih bawk.
Resources person, an thupui zir leh zan lama speakers te :
Week ni khatnaah :
Speaker : Rev. Lalpeklien sungte
topic : The danger of not being baptized with the Holy Spirit
July 16, Thawhleihni Week Ni hnihna
Resources Person : Pastor C. Mangthangvunga
Topic : Importance of Holy Spirit Baptism
Zan speaker : Pastor LS Lalhruaisanga
Topic : The New Birth
July ni 17, Nilaini Week Ni thumna
Speaker : Evan David R. Malsawmtluanga
Topic : The importance of Speaking in tongues
July ni 18, Ningani Week Ni li na
Resources Person : Rev. L. John Gangte
Topic : Speaking in New Tongues : The Initial sign of receiving Holy Spirit.
Zan speaker : Pastor BD Kowarson
Topic : The power of Holy Spirit
July ni 19, Zirtawpni Week Ni ngana :
Speaker : Pastor C. Malsawmzela
Topic : The role and work of the Holy Spirit
July ni 19, Zirtawpni chawhnu khan Week kharna hi neih a ni a, lawmthusawina leh in hlan tharna neiin Principal Rev. Lalpeklien sungte hnen atangin thuchah tawi ngaihthlak a ni a, tlaiah chaw hlui an kil ho a ni.
Week hman chhung hian zirlai zingah thlarau thinghlim dawng thar leh siamtharna chang engemawzat awmin; zirlai ten an hlawkpui hle a ni.
——-
Missionary 3 tirchhuak dawn :
July ni 21, Pathianni chawhnu hian General Missions Department in Missionary tura a lak thar mi 3 te tirhchhuahna Maubawk Kohhran biak inah neih a ni dawn.
Missionary tirhchhuah turte hi Sis. Naom Vanlalhmangaihi, Aizawl dinthar; Sis. Nissi Lalduhsaki, Sakawrdai; Bro. Lalawmpuia Lianhna, Rahsiveng Lunglei te an ni a, General Secretary Rev. R. Lalrinsanga’n tirhchhuahna neiin; General Treasurer Rev. Zohmingthanzama’n fuihna thuchah a sawi ang a, General Suptd Rev. Lalmalsawma Sailo chuan hriakthihna leh tawngtaisakna a nei thung ang.
He Programme hi General Missions Director Rev. R. Lalhawia’n kaihruaiin General Missions Secretary Rev. V.L Tluanga Sinate hnen atangin report ngaihthlak a ni ang a, Hunserh Evan RK. Vanlalngaia’n neiin Missionary te chanchin sawina Evan Pc. Lalrokima, General Missions Treasurer chuan a nei dawn a. Pentecostal Choir leh General Chiar ten zaia rawngbawlna an nei ang.
Missionary tirhchhuah inkhawm hi Rev. R. Lalhmangaiha, Maubawk Bialtu Pastor chuan malsawm tawngtaiin a tin ang.
——–
Revival Meet :
July ni 20 atanga ni 21 chhung hian N.Mizoram District Hqrs Kohhran Biak in, Tuikhuahtlangah City PYD buatsaihin Revival meet hman mek a ni.
Revival Meet hi City PYD Co Ordination Committee in a buatsaih niin July ni 20, Inrinni zan khan tan a ni a, tan zan hian N. Mizoram District PYD President Evan F. Lalngaihawma hnen atangin Pathian thuchah ngaihthlak a ni a, General PYD choir leh N. Mizoram Hqrs Bial Zaipawl ten zaia rawngbawlna an nei bawk.
July ni 21, Pathianni chawhma, chawhnu leh zan lam thlenga hun hman chhunzawm tur niin Pathianni chawhma lamah Evan F. Lalngaihawma’n thuchah sawi lehin chawhnu leh zan lamah Aizawl East District PYD President Rev. R. Laltlankima, speaker atana hman chhunzawm a ni ang.
Revival meet chhung hian Hqrs Bial, Zemabawk Bial, N. Mizoram District Choir, Pentecostal Choir ten zaia rawngbawlna an nei dawn a ni.
——–
Missionary a kal tur thlah :
General Missions Department-in Manigong-a Missionary Teacher thawk tur atana a lak Bro.Lalawmpuia Lianhna S/o Pastor LH.Lalchhandama chu a lawina Rahsiveng Local-te chuan July 17 nilai zan khan a thlahna inkhawm an buatsaih.
He thlahna inkhawmah hian kohhranpui leh Department hrang hrang ten thilpek an pek bakah rawngbawltuten a pualin tawngtaina an neih sak a, bialtu Pastor Rev.C.Lalhriatpuia chuan thuchah puan chhuahna a nei bawk.
——
Audit :
July 16-19 chhung khan Lunglei District UPC kohhranpui bakah a hnuaia Department leh Sub.Commiittee hrang hrangte leh C.E.C.School leh Offset press-te sum District UPC Conference Hall-ah audit a ni.
—–
Revival Crusade :
Lunglei District, Tawipui bial kohhranpui hmalak nain July 19 zirtawp zan atang khan Tawipui S Local-ah Revival Crusade neih tan a ni a, Speaker atan Evan. F.Lalsanglura chu hman a ni.
—–
Work Camp :
Chawngte bialin a ruahman angin July 16 thawhlehni atang khan Mautlang biak in sak mek chu work camp-a thawh a ni a, Cement Work thawh zawh hma chu work camp hi nei turin ruahmanna an siam a ni.
——
Campaign :
Pangzawl bial Mission Department hmalaknain July-August chhung hian Financial Campaign neih a ni dawn a, group 7 ah in then in Local tinah fehchhuah an nei ang.
—–
Member thar :
July 14 Pathianni khan Hrangchalkawn Local UPC member ni turin chhungkaw khat member Paruk (6) te chu bialtu Pastor Rev.K.Lalchhuansanga chuan Isua hmingin Pentecost Kohhranah a seng lut.
July 14 Pathianni vek khan Lungsen Chhim vengah mi sawm (10) bialtu Pastor K. Vanlalhruaia chuan Pentecost Kohhrana lawi turin a senglut bawk.
——–
Chawnghei tawngtai :
July 12 zirtawp tlai khan Mualthuam Electric Local L.A.D.-te chuan tu leh fate pualin Chawnghei tawngtai an nei a,tun thla chhung zirtawp zan apiangin tu leh fate pual hian tawngtaina an neih chhunzawm ang.
Tin, Mualthuam Electric Local P.Y.D. buatsaihin July 16-20 chhung khan Tawngtai camp neih a ni a,tawngtai thupui hrang hrang siam niin, Sunday School Hall-ah an riak khawm a, zan lamah thupui then hrang hrang hmangin tawngtaina neih a ni a, zingtin dar 5:15 ah tanin zing tawngtai inkhawm an nei thin bawk a ni.
—–
Sunday School Hall hawng :
July 14, Pathianni khan Khawlian Bial, Phuaibuang Sunday School Hall sak thar chu Rev C.Mawizuala, District Sunday School Director chuan Pathian hnenah hlanin a hawng.
He hunah hian Bialtu Pastor bakah Bial hruaitute leh Phuaibuang Kohhran member engemaw zat an kalkhawm a. District atangin Sunday School hruaitute, Rev C Mawizuala, Director, Evan Hr Lalrindika, Secretary leh Upa Rodailova Zote, Treasurer te chuan July 13, Inrinni khan Phuaibuang hi thlengin Inrinni zan atanga Pathianni zan thleng khan rawngbawlna an nei nghal a ni.
Inrinni zan, Pathianni chawhma leh Zan-ah Rev C.Mawizuala, Director chuan thuchah sawina neiin Pathianni chawhnu khan Evan Hr.Lalrindika, Secretary chuan thusawina nei ve lehin Pathianni zan khan Upa Rodailova Zote, Treasurer hnen atangin thuchah tawi ngaihthlak a ni bawk. Phuaibuang S.S hall hi a dung ft 20 leh a vang ft 14-a liana sak niin a saknan hian District Sunday School atangin Sunday School Hall sak tanpuina engemaw zat an dawn bakah Bial chhung atangin thawhlawm hmuh a ni bawk.
——
Seminar :
July 18, Ningani nileng khan District Committee room-ah Aizawl East District Office staff leh an kawppuite tan Seminar/ Retreat buatsaih a ni.
He hunah hian Office Staff te leh an kawppuite tih tur leh tih loh turte bakah thu pawimawh tak tak General hruaitute leh District hruaitute hnen atangin ngaihthlak a ni a, hlawkthlak an ti hle a ni.
—–
Audit :
Aizawl East District hruaitute ruahmanna angin karleh July 23 atanga 25 chhung hian Aizawl East District hnuaia Kohhranpui leh Department bakah Sub-Committee te sum kum chanve audit neih a ni dawn.
District Board in heng mite hi Auditor atan a ruat a ni: Pastor H.Lalropuia, Pastor Lalhmangaihawma Parte, Pastor B.Lalengzauva bakah Upa Joseph Lalhruaitluanga.
——
Lawmthusawi chawimawina leh member thar :
Aizawl East District chhung hmun hrang hrangah Thlarau harhna leh hlimna boruak thlengin lawmthusawi chawimawina leh Kohhrana mi thar sengluh report te, Revival Crusade chhunzawm boruak ten Kohhran a chhiah hneh hle.
July 17, Nilaini khan Zemabawk Vengpui Kohhran te chuan Pathian hnenah lawmthu sawi chawimawina neiin Kohhran hoten hlim takin hun an hmang.
Zemabawk Vengpui Kohhranah hian Missions Department te bultumin Revival Crusade neih chhoh mek zel a ni a, Speaker-ah Evan H. Lalhlimpuia hman niin Team member ten an tawiawm bawk a ni. Zemabawk Vengpui Kohhranah hian hlimna nasa tak thleng chho mek zelin Pathian chawimawina pawh vawi 3 neih lo ni tawhin tun tum ami nen hian Pathian chawimawina vawi 4 an neihna a ni.
crusade hi tawp tawh mai tura an ngaih laiin thlarau lam tulna avangin an chhunzawm leh a. July ni 20, Inrinni khan Sis. Rothanpuii(Marovi) te chhungkua chuan lawmthusawi chawimawina an pe a, Kohhran hoten hlim takin hun an hmang.
July 20, Inrinni hian Sis Lilypuii te chhungkua, Armed Veng South Kohhrana lawi te chuan lawmthusawi chawimawina neiin, Kohhran ten hlim takin hun an hmang. Armed Veng South Kohhranah hian tun hnai-ah vawi 10 chuang Pathian chawimawina hi neih a ni tawh a, Kohhran hote Thlarau lamah an hlimin thalai lamah Thlarau dawngthar pawh mi engemaw zat an awm tawh a ni. Armed Veng South Kohhranah hian Rev H Vanlalchhana’n rawngbawlna a nei mek zel a ni.
Upper Republic Kohhranah pawh Revival Crusade, Evan R.Vanchhunga, Speaker-a hmanga neih chu chhunzawm mek zel a ni a, Pathian chawimawina pawh vawi engemaw zat neih tawh niin tunkar chho pawh hian chawimawina hi neih leh a ni bawk a ni. Pathian thlarau thianghlim awmpuina hnuaiah hlim takin Kohhran hoten hun hmangin Thlarau Thianghlim dawngthar pawh engemaw zat an awm tawh bawk.
Thuampui Bial, Muanna Veng Kohhrana Evan K Vanlaldika, Speaker-a hmangin Crusade neih pawh chhunzawm chhoh zel niin Chawimawina pawh vawi engemaw zat neih tawh a ni a, July 20, Inrinni hian Sis Marini te chhungkua chuan Pathian chawimawina an nei a, hlim takin Kohhran ten hun an hmang a ni. Crusade kal zelah July 13, Inrinni zan khan mithar pakhat Kohhranah sengluh a ni bawk.
July 20, Inrinni vek hian Darlawn Bial, Ratu Vengpui Kohhrana lawi Bro Hlimpuia te chhungkua leh Bro Thankima te chhungkua kaltlangin Pathian chawimawina neih a ni bawk. Speaker-ah Evan Vanlalramnghahmawia an ruai.
Ratu Vengpuiah hian Evan Vanlalramnghahmawia leh a Team ten rawngbawlna hi neiin an rawngbawlna kaltlang hian Thlarau Thianghlim dawngthar mi 19 awm tawhin sual ngaihdamna baptisma mi 5-in an chang tawh a, inkhawm ngailo te pawhin Biakin lam an pan mek zel a ni. Chawimawina vawi 4 awm tawhin tun hi a vawi 5-na tur a ni.
Champhai Bial, North Khawbung Kohhranah July 16, Thawhleh zan khan mithar pakhat Kohhranah sengluh niin Bialtu Pastor, Rev VL Hnemtluanga kutah sual ngaihdamna baptisma pakhat-in a chang bawk.
N.Khawbung ah hian Bro H Lalrinfela chuan rawngbawlna neiin a rawngbawlna kaltlang hian mithar 12 Kohhranah sengluh tawh an ni a, Thlarau Thianghlim dawngthar mi 7 awm tawhin siamtharlehna chang engemaw zat an awm tawh bawk a ni.
——-
Bial PYD Sports :
Upper Republic Bial PYD te chuan July 15, Thawhtan zan khan Upper Republic Kohhran Hall-ah Bial PYD Sport hlim takin an hmang.
Sport hi T.Upa R.Lalrintluanga, Bial PYD President chuan hawngin Pathian hnenah a hlan a ni. He hunah hian Indoor Item chi chi hrang hrang hmangin intihhlimna neih a ni a, Bial chhung atangin PYD member thahnem tak an kalkhawm ani.
Bial PYD Sport-ah hian kum dang zawng aiin member an kal tha in inelna thianghlim leh boruak nuam tak hnuaiah hun an hmang a, September 10, Thawhlehni hian Hualngo Field-ah Out Door Item hmangin Sport hi neih chhunzawm leh tura ruahman a ni.
——
District Board :
July ni 17-19 Nilaini atanga Zirtawpni thleng khan North Mizoram District kum chanve Board chu District Hqrs. Kohhran Biak in Tuikhuahtlangah Dist. Supdt. Rev. Laltluanga kaihhruaiin neih a ni.
District Board-ah hian North Mizoram District pastor Bial aiawh Bial 30 atangin Board member an kal tha hle a, District Board kum chanve nikhat ni hian North Mizoram District Office-a thawktu tur interview Board neih a nih bakah Bial hrang hrang atanga Agenda lut thenkhat te ngaihtuah hman a ni bawk.
North Mizoram District kum chanve board ah hian:- Official Agenda 13 awmin, Department leh Sub committee atangin Agenda 3 a awm bawk a, Biak in sak tanpuina dil Kohhran 7 lo lut te, General LAD Conference North Mizoram District a thlen tur chungchanga Dist. LAD ten District Kohhranpuia tanpuina sum an dil chungchang te bakah, North Mizoram District in nakum kum 2020-a Platinum Jubilee lawm tura a inbuatsaihnaa Organising Committee atanga tanpuina sum dil chungchang te leh Pentecostal Mens Fellowship inenkawlna dan siam that rawtna te, District huapa Rammut Programme hman dan tur chungchang leh District-in tirhkoh a rawih mek te chungchang thu ngaihtuah a ni bawk.
District Board tan ni July ni 17-a District Office-a LDC hna thawk tur Post 1 awmah mi 41 in dilna thehluhin mi 5 interview hman loh an awm a, July ni 18 khan Interview chhunzawm leh nghal a ni.
Kohhran chanchin buatsaih lai hian North Mizoram District Board thuchhuak hi kimchanga hriat theih ala ni lova. Board thuchhuak leh roreel te karleh PenNet Programe-ah tihchhuah tum a ni.
——
District LAD Board :
North Mizoram District LAD te chuan July ni 12 Zirtawpni nileng khan District Hqrs. Kohhran Biak In, Tuikhuahtlangah Board meeting an nei. Board meeting-ah hian Pastor Bial aiawh member 30 atangin member 26 an kal thei a, District kohhranpui atangin Dist. Supdt. Rev. Laltluanga’n a ho bakah NEI General LAD President Sist. Lalchangliani Sailo chuan a ho bawk.
Board Meeting hi Dist. LAD President Farnu P.C Lalromawii B/W chuan kaihruaiin; an rorel langsar zual tarlang ila:-
1. Kum 2020 February thlaa District kohhranpuiin Platinum Jubilee a hman dan tur thlir lawkin Department anga an hman dan tur an duang lawk.
2. Kumin October thlaa General LAD Conference Kolasib Diakkawn Biala North Mizoram District ten an thlen turah, North Mizoram District atangin Agenda 5 chhawp chhuah a ni.
3. North Mizoram District ten Gen. LAD Conference an thlen tur puala Chawnghei tawngtai neih relin a hun atan October Pathianni hmasa ber ruat a ni.
4. General Missions Field, Manigong Hmuna Pentecostal English School-a hman tur Generator leisak tha tih a ni.
5. November ni 3, Orphanage Sunday puala thawhlawm lakkhawm dan tur ruahmanna fel tak siam a ni bawk.
6. District LAD Board member te pualin Missions Field fan tha tih a ni a, ruahmanna siam a ni.
—–
Chhanchhuahna beihpui thlak :
North Mizoram District Hqrs. Bial Missions Department te chuan Bial Conference rorel bawhzuiin; Bial chhung kohhran hrang hrang a member Thlarau Thianghlim la dawng lo ten Thlarau Thianghlim an dawn a, Thlarau Thianghlim dawng tawh, sualin a bawih leh tak avanga Biak buk thleng phak lo ten chakna thar an neih leh nan leh, Ruih hlovin a tihbuai thalaite chhanchhuak a Lalpa an hmuh leh theih nan te hma lain rawngbawlna beihpui an thlak mek.
He rawngbawl hna thawk tur hian sis Zikpuii Sailo Hqrs. Kohhrana lawi chu rawih niin, ani hian Headequarters Kohhran, Nusery Kohhran leh Tuikual South Kohhran te tlawh tawhin a rawngbawlna an hlawkpui hle bawk a ni.
Tunah hian Mission Vengthlang Kohhranah rawngbawl hna thawk mekin Tualchhung Missions Department leh Churh Board Committee ten lo dawngsawngin Mission Vengthlang kohhranah hian July ni 12 zirtawp zan atang khan rawngbawlna bul a tan a ni. sis Zikpuii hian Biak ina rawngbawlna a neih piah lamah intin fangkualin mi chaklohte’n chakna thar an neih leh theih nan kohhran member-teah lu chunga kutnghah tawngtai rawngbawlna a nei thin a. Thlarau Thianghlima Siamtharna chang pawh an awm nual tawh a ni.
Rawngbawltuin a Ruahman dan chuan Mission Vengthlang kohhrana a rawngbawlna hi July ni 16 Thawhleh zan thleng tur a ni a, Nimahsela Pathian hnathawh avanga mi chak lohte’n thlarauva siamtharna an chan leh Thlarau ram tulna avangin he rawngbawlna Crusade hian Sist. Thanchhingi’n Pathian chawimawina a neih ni tura Church Board ruat July ni 20 Inrinni thleng a awh dawn a ni.
——
Revival Crusade :
Kolasib Venglai Bial, Project veng Kohhran te chuan July ni 1-14 2019 chhung khan North Mizoram District Revival Team Apostolic Revival Team Evan. T. Vanlalruata Speaker-a hmangin Revival crusade an buatsaih.
Revival Team Evan T Vanlalruata leh a rawngbawlpui te Lalpan nasa takin a hmang a, He revival chhung hian Kohhran chhungah harhna thlengin, Tisa leh thlarauva damna chang an awm nual bawk.
District Revival Speaker te hi District remtihna ang leh hmun danga Programme duan lawk tawh awm avangin kham lo takin rawngbawlna hi tih tawp lailawk a ni a, Nimahsela he rawngbawlna boruak kal zelah kohhrante’n hlim taka hun hmang chhovin zaikhawmna te neiin Programme siam chhunzawm thin a ni a, Revival teamte rawngbawlna kaltlangin July ni 27 hian Bro. HC VL Bela te chhungin Pathian chawimawina an nei dawn bawk a ni.
Kolasib Tumpui kohhrante Pathianin a awmpui a, kummin chhung hian chhungkaw li (4) in Pentecost Kohhran an zawm tawh a ni.
——-
Missionary kal tur thlah :
N. Mizoram District, Dinthar Kohhran te chuan Arunachal Missions Field, Petecostal English School Manigong-a thawk tur atana General Missions Department ten an lak Bro. K. Lalnunmawia fanu Sis. Naom Vanlalhmangaihi chu July ni 17 Nilaini zan khan a puala inkhawm buatsaihin thlahna Programme an hmang.
Sist. Naomi thlahna inkhawmah hian Kohhran leh Department hrang hrang te bakah mimal atang tein Missionary-a kalchhuak tur hi thlahna thilpek an pe a ni.
Sis. Naomi thlahna inkhawmah hian Bialtu Pastor Rev. C.Laltlanchhuaha chuan Fuihna thu sawiin Pastor hian Lamtualah Missionary tur Naomi chu Hriakthih rawngbawlna a neih sak a, Kohhran Upa te leh Church Board Committee te chuan a lu chungah kut nghatin an tawngtaipui bakah Kohhran mipuite pawhin theihtawp chhuahin tawngtai sakna an nei bawk.
Inkhawmah hian Naomi pawhin thu sawiin ‘Kohhrana a rawngbawlnaah tlinglo a inti hle chunga kohhranhote’na an duhsakna leh hmangaihah lawmthu a sawi a, Missionary-a a kal chhuak tur chu a tawngtai chhanna a nih ngei a rin thu sawiin, a tak tak ram a lo thlena a zam thu te, bang lova kohhranho te tawngtaipuina a mamawh thu a sawi a, Ka vanglai leh ka thatlai hian Lalpa hna thawk turin Missionary in ka kal dawn tih hi ka inchiang em em a ni’ a ti.
——
Seminar :
July ni 13 & 14 Zirtawp leh Inrinni hmang khan Sumsuih Bial buatsaihin rawngbawltu chin seminar buatsaih a ni.
Seminar Cum Revival Programme hi Sumsuih Bial Thiak kohhran Biak inah neih niin Dist. Supdt. Rev. Laltluanga’n Seminar hi a hmanpui a, Seminar thupuiah ‘Thianghlimna’ tih hman a ni. Seminar paper zir zawh hnuah tlai lamah chawhlui an kilho nghal bawk.
July ni 14 Inrinni zan atangin Revival Programme-a hun hmang chhunzawmin Rev. Laltluanga hian rawngbawlna a chhunzawm a, Sumsuih Bial hruaitute’n inkhawm kaihhruai hna an thawk bawk a ni. Revival programme hman chhung hian Sist. laldinpari Salem veng, Sist. Malsawmzeli Sumsuih leh Ebenezer Male Voice sumsuih bialte chuan zai rawngbawlna an nei thin bawk a ni.
—–
Sunday School Kumpuan bawhzui :
General Sunday School Kumpuan ‘Kan fate i chhanhim ang u’ tih bawhzuiin North Mizoram District hruaitu pahnih Rev. K. Malsawmtluanga Dist. SS Director leh Evan. H. Lalrinngheta District SS Secretary te chuan rawngbawlna an nei.
District SS Director Rev. K. Malsawmtluanga chuan July ni 13 leh 14 Inrinni atanga Pathianni zan thleng khan Chanmari Kohhran, Chanmari West kohhran leh Ramhlun Kohhrante tlawhin rawngbawlna a nei a, District Secretary Evan. H. Lalrinngheta pawhin Chaltlang Kohhran eh Bawngkawn kohhrante tlawhin rawngbawlna a nei bawk.
Facebook