Pennet News Service : Jan 10 – 17

UPCNEINEWSSERVICE JAN 10-17.2020
———–
Office hawng :
January ni 6, Nilaini khan UPC North East India ; General Headquarters Office Mualpui Salem veng Aizawl chu Kohhran mipui te dawr theih turin hawn a ni a, he mi ni  hian  UPC North East India huam chhunga District hrang hrang Office leh Kohhran hmun pawimawh dang te pawh hawn nghal a ni.
General Headquarters Office hawn ni hian function tawi buatsaih a ni a, General Superintendent Rev. Lalmalsawma Sailo chuan chuan he hun hi a kaihruai. General Secretary Rev. R. Lalrinsanga, General Treasurer Rev.Zohmingthanzama, General Missions Director Rev. R. Lalhawia leh General Sunday School Director Rev. R. Laichhingpuia ten fuihna thu tawi an sawi a. Tawngtairualna neiin Pathian hnena inhlan tharna hun hman a ni.
Office staff ten Krismas leh kum thar chhunga an hun hman dan report an pe a. Office Cashier hnen atangin thilpek hlanna neih a ni bawk.
———
Sunday School Day :
Jan ni 19, Pathianni hi North East India UPC Kohhran Sunday School Day a ni a, kum dang angin hman theih ni lo mahse mahni chhungkua ang tal pawha tha thlah hauh lova Pathian thu zirna kalpui zel turin General Sunday School Director Rev. R. Laichhingpuia chuan Kohhran hote a ngen a, Day thuchah chhiar chhuah tur pawh Social media platform hrang hrangah semchhuah a ni.

Sunday School Day hi kum tin January Pathianni vawi thumnaah hman thin a ni a, He ni hi Sunday School kal tha leh Exam-naa ti tha lawmman semna ni atan te, Sunday School hmasawnna lam hawi inzirtirnan te, a hlutna leh pawimawhzia in zirtira infuihtharna hun atana hman thin a ni.
———

Thilpek hlan :
January ni 12, 2021 khan Bawngkawn Bial, Bawngkawn Local LAD (AED) te chuan Guwahati, Assam Missions Field Director Quarters ami tur Cooker 1 leh Blanket 5 chu Genneral Missions Director Rev. R. Lalhawia a kut ah an hlan.

Thilpek hlanna hi General Headquarters Office, Mualpui Salem veng ah neiin, Bawngkawn Local LAD President Sis. Vanrampari hnen atangin Thilpek an pek chhante leh Missions Field tan theitawp an chhuah zel tur thu te ngaihthlak a ni bawk. Thilpek pe tu Bawngkawn Local LAD te chungah General Missions Department chuan lawmthu an sawi tak meuh meuh a ni. (Pic)
———

District hrang hrang rawngbawlna chanchin :

Aizawl East District :
Office hawng :
January 7, Ningani khan Kum 2021 atan Aizawl East District Office chu mipuite dawr theih turin hawn leh a ni.
District Office hawnna hunserh tawi District Office-ah hman niin Pastor K.Lalawmpuia, Head Assistant chuan kaihruaiin inhlan tharna tawngtai rual neih a ni. Rev Biaksangzuala, District Superintendent hnen atangin fuihna thu ngaihthlak niin Office Staff te chu hmangaihna nena rawngbawl hna thawk turin leh mahni hna theuhah thahnemngai taka thawh a pawimawh thu a sawi a ni.
Rev Vanlalfela Ramtiam, District Secretary, Rev VL Hnemtluanga, District Treasurer bakah Staff Welfare lam atangin thusawi tawi ngaihthlak a ni bawk. Kum 2021 atana Office hawnna hun tawi hi Rev VL Hnemtluanga, District Treasurer chuan malsawm tawngtaiin a titawp a ni. He hunah hian Office Staff te an telkim thei a ni.
———-
District Board :
Aizawl East District hnuaia rorelna sanga, District Board Budget Session chu January 19 atanga 20 chhung hian neih a ni dawn.
He hun hi District Committee room-ah neih tur niin Kum 2021-a District Kohhranpui Budget bakah District Department hrang hrang Budget siamte approve tura chhawpchhuah a ni anga, siamthat ngaite siamtha in Budget hi an pawm beisei a ni.
———-
Dan ennawn :
Ni hnih awh, Aizawl East District  Danpui bakah Dan tesep a neih hrang hrangte ennawnna hun chu tluang takin January 13, Nilaini khan neih zawh a ni.
He hun hi January 12, Thawhlehni khan District Office-ah neih tan niin Rev Biaksangzuala, District Superintendent chuan a kaihruai a ni. Kum 2020 Kumtawp District Board khan heng Dan te hi ennawna zirchiang turin District Kohhranpui Hruaitute bakah Rev Rosanga Kawlni, Pastor Lalhmangaihawma Parte leh Pastor B.Lalhmingliana te chu alo ruat tawh a ni. An zirchianna hi District Board-ah an pharh leh dawn a ni.
———-
Kohhran puitlingah hlang :
January ni 10, Pathianni khan Rabung Bial, Rabung Vengchhak Preaching point chu Kohhran puitlingah hlankai a ni. Bialtu Pastor J Lalhmingsanga chuan he hun hi kaihruaiin Rev Biaksangzuala, District Superintendent chuan Kohhran puitlingah hlankaina neiin kalkhawmte hmaah Pathian thuchah sawina a nei nghal bawk a ni.
Rabung Vengchhak hi Kum 2020 August 7, Zirtawp zan khan Rev VL Hnemtluanga, District Treasurer chuan Preaching Point pakhat ni turin hawnna alo nei tawh a, tunah hian Kohhran puitlingah hlankai an ni ta a ni. Rabung Vengchhakah hian tunah hian member 80 chuang an lawi mek a ni.
———-
SS hall hawng :
December 29, 2020, Thawhlehni khan Rabung Bial, Aiduzawl Sunday School Hall sak thar chu hawn a ni.
Hawnna hun tawi S.S Hall tualah hman niin Rev. HL Thakunga, District Sunday School Director chuan UPC- North East India hnuaia Sunday School Hall pakhat ni turin a hawng a ni. Aiduzawl Sunday School Hall hi a dung ft 12 leh a vang ft 24 a lian niin a sak zawh nan  hian  cheng singriat sangnga vel hman a ni. Sunday School Hall sak nan hian District Sunday School atang bakah Upper Republic Kohhran leh Zemabawk Bial Missions Department atangin tanpuina an hmu a ni.
December 29.2020 vek hian District Sunday School Director, Rev HL Thakunga hian Khualen S.S hall hawnna a nei bawk a ni. Khualen SS Hall hi District S.S Department chuan a chung khuhna pe in Evan Vanlaltluanga te unau in a bang an pin sak bawk a ni.
———-
Day lawm :
January 13, Nilaini kha Serchhip Biakinpui PYD dincham pha vawi 52-na a nih angin Biakinpui PYD te chuan an Day hi hlim takin an hmang. PYD Day denchhen hian Biakin leh a vel tihfai hnatlang an nei a, member engemaw zat an thawkchhuak thei a ni.
Serchhhip Biakinpui PYD hi Kum 1969 January 13 khan din a ni a, member 40 vel awmin Kohhran tichak tura ding an ni tih in hriain hma nasa takin an la nghal a, membership mi pakhatah Siki khawn nghal a ni. Hruaitu hmasate:
President: Bro Lalhmuaka
V.President: Bro Biakngenga
Secretary: Bro Lalthanmawia
Asst.Secretary: Bro C.Vala
Treasurer & Fin.Secretary: Bro Zokunga te an ni.
Hun a kal zela, chak taka hma la in Kohhran tan an theihtawp an chhuah a, bungrua te pawh lei zelin hmun hrang hrangah rawngbawlna hna an thawk bawk a, September 16, 2018 khan Jubilee puala Project an neih, CHAWEI DAWHKAN 50 chu Church Board Committee hnenah an hlan bawk a ni. Biakinpui PYD te hian Chanchinbu Pentecostal Times chu Kum 1988 atanga vawiin thleng hian la tichhuak zelin General PYD bakah District PYD atangin Chanchinbu tha lawmman te pawh alo dawng ve tawh a ni. Serchhip Biakinpui PYD te hian Kum 2019 khan an dinchampha phak vawi 50-na, Golden Jubilee chu ropui takin an lo lawm tawh a ni.
———-
Bial Board :
January ni 11, Thawhtan zan khan Mualpui Bial PYD chuan Bialtu Pastor Rev. H. Lalropuia quarters ah Bial PYD Board an nei a, kumin 2021 Bial PYD Conference tur chungchang an ngaihtuah.

Hripui leng avanga General Kohhranpui Conference hun sawn a nih avangin Bial PYD Conference hi a hun pangaiah neih a remchang ta lova. Hemi avang hian January ni 24, Pathianniah rorel inkhawma neih nise tiin Bial Board chuan an ruahman a ni. Rorel palai tur atan : Tualchhung tin Executive Committee member chin, Bial Kohhranpui Board member leh Bial Deptt OB te an ruat bawk. Mualpui Bial PYD Conference vawi 7na hi Mualpui Kohhran in an thleng dawn a ni.
Bial PYD Board hian kumin chhunga Mualpui Bial PYD Budget tur bakah Bial Sub Committee hruaitu tur an ruat thar bawk.
———-
Member thar leh Baptisma chang thar :
Krismas leh Kumthar vuakvet khan Aizawl East District chhung hmun hrang hrangah mithar leh baptisma chang thar hetiang hian neih a ni.

December 25, Krismas ni khan Thuampui Kohhrante chuan zing tawngtai inkhawm neiin inkhawm banah mithar 1 in sual ngaihdamna baptisma Bialtu Pastor, Rev KVL Hmangaihkima kutah a chang.

December 26, Inrinni zan khan Ngopa Bial, Hqrs. Kohhrana lawi turin chhungkaw khat, member 6 te chu Bialtu Pastor K.Vanlalhlimpuia chuan sengluhna a nei.

December 27, 2020 khan Zemabawk bial, Tuirial Kohhrana lawi turin chhungkaw khat, member 6 te chu sengluh an ni.

December 27.2020 vek khan Darlawn Bialah mithar 6 sengluh bawk niin N.Serzawl-ah 4, Darlawnah 1 leh Ratu Melkawn-ah 1 te sengluh an ni.

January 1.2021 khan Bazar Bial, Armed Veng South Kohhranah mi 6 in Bialtu Pastor, Rev HL Thakunga kutah sual ngaihdamna baptisma an chang.

January 1, Zirtawpni khan Thuampui Bial, Thuampui Local-ah pawh mi 1 in sual ngaihdamna baptisma, Bialtu Pastor, Rev KVL Hmangaihkima kutah a chang bawk.

January 3, 2021, Pathianni khan Mualpui bial, I.T.I Kohhranah mithar 1 sengluh niin Bialtu Pastor, Rev H.Lalropuia kutah sual ngaihdamna baptisma a chang nghal.

Kawlkulh Venglai Kohhranah mithar 1 sengluh niin.

Khawruhlian bialah mithar 4 sengluh an ni bawk.

January 10, Pathianni khan Khawbung bial, Khuangleng Kohhrana lawi turin chhungkaw hnih, member 8 te chu Bialtu Pastor HP Ramfangzauva chuan sengluhna a nei bawk.

January 10, Pathianni vek khan N.Vanlaiphai bial, Leilet Kohhrana lawi turin chhungkaw khat, member 6 te chu Bialtu Pastor B.Lalhmingliana chuan sengluhna a nei bawk.

Ngopa Bial-ah pawh Bialtu Pastor K.Vanlalhlimpuia kaihhruaiin Thuthlung rawngbawlna neih a ni a, Ngopa Hqrs.-ah mi 10 leh Damaska Kohhranah mi 4, Kohhran ni sa ten sual ngaihdamna baptisma Bialtu Pastor kutah hian an chang bawk a ni.
———-

Hruaitute Programme:
Aizawl East District Superintendent Rev Biaksangzuala, chuan January 15, Zirtawpni khan Upper Republic Bial ten an bial kum 25-na, Silver Jubilee an lawmnaah a telpui a ni.
Rev VL Hnemtluanga, District Treasurer chuan Jan.17, Pathianni hian Peniel Kohhran, Bawngkawn South-ah Kohhran thil tul pawimawh tiin hun a hmang ang
————
Chhimtuipui District
Intihsiakna huaihawt :
Chhimtuipui District PYD chuan ahnuai kan tarlan ang hian intihsiak  huaihawt dawn a , Dist chhung Kohhran member-te lo tel vek tur a sawm kan ni.
Lawmman tha tak buatsaih tur niin, 2021 Dist Kohhranpui Conference ah lawmman te hi adawng tu te hnen ah hlan a ni ang.
Intihsiak turte:-
••• Tunlai hri leng Corona Virus (Ciovid-19) lak a invenna lam hawi video clip insiam siak tur a ni a, Video clip rei zawng hi minute 10 – 20 tur a ni. video picture, background music leh voice te afiah felfai tur a ni. Editor engang pawh hman theih ani ang.
Video te hi January thla chhungin Dist PYD Vice President leh Secretary hnenah phone kaltlangin theh luh tur ani ang.
•••  Dist PYD Conference vawi 43 na rorel ‘No Tobacco to PYD’ tih bawhzui nan, “Vaihlo leh akaihhnawih/zuk leh hmuam thatlohna” tih thupui hmangin article inziah siak tur a ni a,Thumal 500-1000 thleng hman theih ani ang.
January 2021 chhungin Dist PYD Treasurer leh Fin Secretary hnen ah soft copy (pdf,word document,wps,office word, zip file etc) leh hard copy (written, photo copy) te submit tur a ni.
———
Hunpui prog hlim takin hmang :
Chhimtuipui District chhung Bial leh local hrang hrang ah Christmas leh Kumthar Programme chu VLTF-te phalna leh Sawrkar thuchhuak bawhchhe silovin hun hlim tak a hman a ni.
Christmas leh Kumthar Programme kal chho zelah Evan. Khaching Aineh, Vahia Home missionary chu Speaker a hmangin, Tuipang Bial, Laki ah rawngbawlna neih a ni.
Kohhran ten malsawmna nasa tak dawngin thlarau lam malsawmna a thleng nasa hle a, January 1, 2021 Thawhlehni khan Rev. Kholy Hlychho te chhungin Pathian hnenah lawmthu sawi chawimawina maicham an buatsaih a, mi 8 in sual ngaihdamna baptisma an changin, mi 11 in Thlarau thianghlim an dawng bawk . January ni 6 thleng khan Pathian chawimawina hun hman chhun zawm a ni.
———-
Member thar :
Bualpui Ng Bial, Tial dawngilung ah January ni 3  Pathianni khan Bialtu Pastor Rev. H. Lalhnehchunga chuan mi 3 Lalpa Isua hmingin baptisma chan tir.
———-
Lawmthusawi chawimawina nei :
January ni 9 (Inrinni) khan Siata I local te chuan Pathian hnen a lawmthu sawi chawimawina neiin, Pastor V Lalhlimpuia Sectional Pastor Niawhtlang leh Dist Evangelist Evan N Thanghnuna te chu Speaker ah an tang. He lawmthu sawi chawimawina hi a tum 3 na niin Upa K Chhuasa te In ah nghah a ni a, tum 2 dang te chu  mimal Pu Buisang leh Upa K Chhuasa te chawimawi ani thung. Pathian malsawmna dawngin Hunpui vuakvet ah hian mi-13 laiin Thlarau thianghliman dawng a ni.

Ainak local pawhin hunpui chhung khan malsawmna an dawng nasa hle a, Upa K Rothanga techhungkua chuan vawi-4 lai Pathian hnena lawmthusawi chawimawina nei in, January ni 10 thleng khan chawimawina hun hi an hmang a ni.

South Lungpher local ah hian mi 11 in Isua hmingin Rev HC Mangliana kut ah Tui Baptisma an chang.

January ni 10 Pathianni khan Tuipang Bial, Phura Kohhran ah  Bialtu  Pastor MH. Robin Lalthanmawia’ n nauhlan rawngbawlna neiin Chhungkaw 1 member 2 Kohhran ah a lawm lut bawk.
————-
District Suptd Prog :
Rev Joseph L Thlauhthang Dist Superintendent leh Pastor C Lalchhuanthanga Siaha sectional pastor techuan Bualpui NG Bial chhung Archhuang, Vawmbuk leh Tial dawngilung ah rawngbawlna an nei mek.
——-
LAWNGTLAI WEST DISTRICT RAWNGBAWLNA :
Member thar :
January ni 10 Pathianni khan Chandmary  Local ah Rev. Lalsawmliana Sailo chuan rawngbawlna neiin mi 4 in  Lalpa Isua hmingin Baptistma a chang.

January ni 10 Pathian ni khan Diltlang South Bial, Khawmawi leh Ngengpuikai ah te Bialtu Pastor S. Lallunghnema chuan rawngbawlna neiin Chhungkaw 7, member 29 Kohhran a Lawmluhna a nei a, mi 6 in Lalpa Isua hmingin Baptisma an chang bawk. Ngengpuikai hi UPC kohhran  la awm lohna  niin kohhran  din thar a ni ta a, Tun dinhmun ah member 33 an awm mek a ni.
———-
Sectional Conference :
January ni 16-17, 2021 chhung hian Bungtlang south chuan Sectional Conference vawi 8 na chu Tuidangchhuah Local Church ah neih a ni a.  Conference hawnna hi Rev. R. Ramthatzawla District Suptd. chuan neiin ni 16 zan hian Missions Dept. leh S.S. Dept. ten rorelna an nei a, January ni 17 Pathianni ah PYD, LAD leh Kohhranpui ten Rorelna an nei leh a ni.
January 16 Inrinni khan Ngengpuikai-a kohhran dingthar te tlawhin rawngbawlna a nei nghal bawk.
Dist. Supdt. Leh Dist. Mission Director te chuan Bungtlang south Sectional Conference hi an hmanpui a ni.
————
NORTH MIZORAM DISTRICT
Office hawng :
North Mizoram District Office chu Mipuite dawr theihin Jan ni 6 Nilaini khan hawngin kum 2021 kumthar atan bul an tan.
Office hawn ni hian Dist. Supdt Rev. Laltluanga kaihhruaina hnuaiah Pathian hnena inhlantharna inkhawm neiin; District hruaitute hnen atangin fuihna thu tha tak tak bakah, North Mizoram District Office staff te midangte tana malsawmna ni turin duhsakna an hlan a ni. (Pic. Office 2021)
———-
Hruaitute Programme:
Rev. Laltluanga Dist. Supdt. Chuan Jan ni 11 thawhtanni khan North Mizoram District Office-a Officer meeting neih a kaihruai a, Jan ni 14-ah North Mizoram District rawngbawltu pawimawh Evan. C. Lalthlamuana nupui neih turah kutsuihtu puithiamah tangin, a tuk Jan ni 15 Zirtawpniah North Mizoram District Board 2021 Budget Session neih turah Dist. Board kaihruai lehin, Jan ni 16 Inrinni hian North Mizoram District hnuaia Bible zirna Pentecostal School of Ministry 2020 session Graduation Day hmannaah hunserh a kaihruai bawk ang.
———-
Exam nei :
North Mizoram District hnuaia Bible zirna kum 2020 session, Covid -19 hrileng avanga online Class zawnga zirna neih tak chu, nikum 2020 Dec ni 7-10 chhung khan tluang taka exam neiin; kumin 2021 jan ni 16 Inrinni khan Graduation Day hman a ni.
He hun hi PSM Principal, NMD Supdt ni bawk Rev. Laltluanga’n a kaihruai ang. PSM 2020 session-ah hian zirlai Graduate tur mi 17 an awm a ni.
———-
Budget Session :
North Mizoram District chuan kumin 2021 chhunga District Kohhran pui, Department, Camping Centre leh zirna in bakah Committee peng pawimawhte sum hman dan tur ruahmanna Budget session neiin an thukhawm ang.
———-
Missionary transfer & Posting :
North Mizoram Disrict Missions Department Board kum 2020 Oct thlaa neihin Missionary thar 2 a lak te bakah, Missionary an awmhmuna an awm hun tur term awm tawh te transfer & Posting hun a ruahman dungzuiin; Missionary ten an awmna hmun tur tluang takin an thleng a, rawngbawlna an kalpui mek.
North Mizoram District Missions Dept. OB meeting ruahman angin Missionary lak thar Sis. Lalhriatkimi chuan Casual worker-a a lo awm tawhna Tumpanglui Field chu January ni 4 thawhtanni khan chhuahsanin a Post tura ruat South Chhimluang Mission Field chu Jan ni 8 khan a lut a.
Kolalian Mission Field-a awm Sist Khawlliani chuan a Post chhuahsanin January ni 5 thawhlehni khan a awmna hmun thar tur Tumpangluiah Missions Field-ah a lut bawk.
January ni 6 Nilaini khan Evan. Hrangchhankhuma Rajtali Field-a awm chuan a awmna thar tur  Kolalianah Missions Field-ah a lut a, Casual worker-a rawngbawl hna thawk Evan. S. Lalrawngbawlzela Missionary atana lak thar chuan a Post tura ruat Rajtali Field chu Jan ni 7 khan a lut bawk a ni.
Heng Missionary awmhmun sawn leh lak thar te hi an awmna Bial leh kohhrante’n thlahna leh lawmluhna Programme te lo buatsaihin Programme changtlung tak an lo hman sak zel bawk a ni.
———-
Fehchhuak :
North Mizoram District Missions Director Rev. C. Lalthantluanga chuan kar kalta Jan ni 7-10 chhung khan Mission Department rawngbawlna kaihhhnawih thil tul leh pawimawh te tiin kohhran hrang hrang a tlawhkual bawk.
Jan ni 8 zirtawpni khan Sidon Biak in hawnna Programme-ah Dist. Missions Director hian Pathian thuchah sawiin; Bialtu Pastor R. Thanglura’n Biak in hawnna a nei a nei thung.
Dist. Missions Director Rev. C. Lalthantluanga fehchhuak hian Damparengpui, Sidon, Persang, Tuipuibari Centre, Zomuantlang Missions Field, Vitor Kalagang leh Lungthir khua te a tlawh a ni.
———-
Fehchhuak :
North Mizoram District Missions Dept. Bru Revival Team Evan. Lalthianghlima leh a thawhpui te chuan jan ni 11 thawhtan zan atanga rawngbawlna nei turin Tlangsang Bial chhung an lut.
Revival team te hian Tlangsang Bial chhunga ringthar awmna khua Vitor Kalagang leh Lungthirah te rawngbawlna an nei ang a, kohhran ringtharte’n Thlarau Thianghlim an dawn theihnan theihtawp chhuaha hma lak an tum a ni.
Heilai hmuna home crusade leh a tul anga rawngbawlna nei tura lut Bru Revival team te hian theihtawp chhuah an tum a, kohhranhote tawngtaipuina an ngen bawk. Tlangsang Biala mitlawmngai te leh Bial Department ten Crusade neih chhunga mamawh tur Buhfai bag bakah thil dang mamawh hrang hrang an pe a ni.
———-
Joining report pe :
North Mizoram District Missions Board in kum kalta October-a Missionary a lak thar pahnih Evan. S. Lalrawngbawlzela leh Sist. Lalhriatkimi te chuan January ni 6 Nilaini khan lehkha ziakin Joining report an pe a. Thawktu thar pahnih te hian an post tura ruat S. Chhimluang leh Rajtali-ah  an awm fel tawh a ni.
———-
Induction Service :
North Mizoram District Missions Department hruaitute’n ruahmanna an siam angin; Jan ni 18 thawhtanni zan hian Missionary Sist. Khawlliani Tumpanglui Missions Field-a awm thar chu Dist. Missions Treasure Evan. MS Dawngliana’n Induction service a nei ang a, hemi rual vek hian Kolalian Mission Field-a lut Missionary  Evan. Hrangchhankhuma chu Rengdil Bialtu Pastor C. Lalthlengliana’n Induction service a nei bawk ang.
S. Chhimluang leh Rajtali Missions Field-a lut thar te chu February thlatir lamah Induction service neih a ni t hung ang.
———-
Member thar :
North Mizoram District Home Missions Fieldd-ah kumin kumtir lam khan Pathian hnathawh thlengin mithar engemaw zat lawmluh a ni:-
Jan ni 3 zing 7:30 Am khan Damdiai Missions Field-ah Hindu sakhua atangin chhungkaw hnih member 12 awmna chu Missionary Evan.Lalrampana Pentecost kohhranah lawmlutin UPC NEI kohhran an zawm. Jan ni  5 thawhlehni zan 7:00  Hindu sakhua atangin Evan. Lalrampana hian mithar chhungkaw khat member 4 awmna Pentecost-ah lawmlut lehin Jan ni 10 Pathianni khan Damdiai Home Missions Field-ah vek Missionary Evan Lalrampana chuan  mi 9 sual ngaihdamna Baptisma Isua hmingin a chantir a,  mithar 1 lawmluh belh a ni bawk. Damdiai kohhrante’n Kum 2021 kumtir lamah malsawmna an dawng nasa hle a, January thla chhungin member thar 18 an nei a ni. (Damdiai Mithar)

Thla kalta Dec ni 26 Pathianni khan Rengdil Bialtu Pastor C.Lalthlenglianana chuan  Kolalian Home missions field tlawhin Mithar -1  sual ngaihdamna baptisma chantirin, kohhranah a lawmlut a, Nau hlan rawngbawlna a nei bawk.

Jan ni 11 thawhtan zan khan Rasdali Home Missions Field ah Chhungkaw khat Member paruk awmna te chuan Pentecost kohhran zawmin rawngbawla Missionary Evan.Rawngbawlzela’n a lâwmlut. (Pic. Rajtali Mithar)

Mamit Bial chhunga awm Vawngawnzo Missions Field Biak in chu chaltlang Bial, Chanmari Kohhrante’n workcamp in an sa.
Biak in sak hna thawh mekah hi Chaltlang Bial Missions Director Evan. C. Hmingchungnunga chuan hovin; member ten phur takin an sa a, Biak in sak hna thawk tur hian Mamit Bial chhung kohhran hrang hrang atangin mi tlawmngai thahnem tak in Biak in hi an pui thin bawk a ni.

January ni 3 leh ni 5 zan khan S.Chhimluang Home Missions Field ah member thar Nula 3 lawm luh an ni a, Evan. E. Lalrawngbawlzela’n lawm luhna hi a nei a ni.  S. Chhimluang ah hian Pathian hnathawh a thleng mek zel a, thlarau dawng thar pawh an awm belh zelin  kumin ah member thar 27 an awm tawh a ni.
January ni 8 ( Zirtawpni) khan S. Chhimluang Tirhkoh thar tur  Sist. Lalhriatkimi chu South Chhimluang Biak In ah lawmluhna huh hman a ni bawk.

Bajirung ah mithar 7,chhungkaw 2 Kohhran ah lawmluh an ni.

District Missions Department  Casual Workers Upa C. Sangliana, Victor Kalagang-a thawk mek chu Sist Krawschhuanawmi Sihphir bial LAD President te chhungkuain Thlatin Rs. 5000.00 in kum 2021 atan an rawih chhun zawm.

Kawnpui bial, Rasdali Missions Field-a Missionary Evan. Hranchhankhuma chu District ruahmanna anga Kolalian Missions Field-ah a awm dawn tak avangin, a thlahna inkhawm January ni 3 Pathianni chhun dar 12:00 khan Rasdali Biak Inah neih a ni.
———-
Kum 2021 January  ni 3 a North Mizoram District Home Missions huam chhunga mi thar neih dan.
1. Damdiai ah member – 12 (Hindu atangin)
2. Bajirung ah member – 7 (Hindu atangin)
3. Zomuantlang ah member – 1 (Kohhran dang atangin)
4. S. Chhimluang ah member – 2 (Kohhran dang atangin)
An vain  = 22