Pennet News Service : February 4, 2022

GENERAL NEWS

Executive Board Budget session:

February ni 2 leh ni 3 chhung khan UPC North East India Executive Board Budget session chu General Headquarters Committee room, Mualpui Salemveng Aizawl ah neih a ni.

Executive Board Budget Session ah hian General Kohhranpui Budget leh General Headquarters Administration hnuaia Department hrang hrang leh District hrang hrang budget, Mizoram chhung leh pawna zirna in leh Committee peng hrang hrang budget thlir ho a ni a, kum 2022 a UPC North East India Budget atan cheng Vaibelchhe sawmnga pathum (Rs.53.35 vbch) vel pawm a ni.

———

CALVARY BIBLE COLLEGE LECTURER THAR LAK A NI:

United Pentecostal Church of North East India hnuaia Pathian thu zirna Committee sang, Theological Education Board chuan Calvary Bible College Lecturer turin Evan. David R. Malsawmtluanga, s/o Rev R. Lalrinsanga, General Licence Holder chu lungrual takin a la thar.

Evan. David R. Malsawmtluanga hian nupui, Sis. Vanlalnghaki neiin ani nen hian fanu 1 an nei bawk.

Thiamna lamah BA zir zovin, Calvary Bible College ah BTh ṭha taka zovin, USA a kan Kohhran Bible College ‘Christian Life College-ah’ BA (Bible and Theology) first class ah a zo leh a ni.

Lecturer hna hi May Ni 1, 2022 ah a zawm anga. Kum 2 (2022-2024) chhung atan probation period a hmang dawn a ni.

———-

General Sunday School:

January ni 31 Thawhtanni a General Sunday School OB meeting General Sunday School Director Chamber-a neih chuan kum 2021 November 26 a General Conference leh General board meeting rorelte bawhzuiin Thalai leh naupangten Lengkhawm,/ Hlim hla te tui leh thiam taka an sak theih nan hmalak dan turte,  Naupangte talent tih punsak leh phochhuah sak an nih theih nan a, Local leh Bial Naupang Sunday School ten Pennet a Programme an neih thei dan tur te leh Kum 2022 a Puitling Sunday School Zirlai Pennet a chhuah tur chungchang te ngaihtuahin ruahmanna an siam a ni.

———-

CHHIMTUIPUI DISTRICT

SIAHA BIAL JOINT CONFERENCE VAWI 2 NA CHU HLIM TAK A HMAN A NI:

January ni 29-30, 2022 chhung khan Siaha Bial LAD & PYD Joint Conference vawi-2 na chu Meisatla Local ah neih a ni.
Conference thupui a tan Sam 85:6-na “Min ti harh leh ta che” tih chu hmangin Speaker ah Pastor C Lalchhuanthang Siaha section chu hman a ni a, Dist LAD hruaitu te,Dist PYD hruaitu te, Siaha Bial Kohhran puipa ten khawmpui hi an hmanpui bawk a ni.

LAD thu rel langsar zingah kum 2022 chhunga Dist Mission Department kal tlang missionary 6 chawm leh Building Project atan member tin a Rs.200/- khawn chung chang te rel a ni.

PYD te chuan kum 2022 chhung hian Dist Mission Department kal tlang missionary 2 chawm te leh Blood donation camp neih te chu an rorel langsar zual a ni.

———-

BUALPUI NG BIAL AH DIST OFFICIAL TEN RAWNGBAWLNA NEI

January ni 29-30, 2022 chhung khan Chhimtuipui District hruaitute chuan, Superintendent Rev Joseph L Thlauhthang kaihhrauin Bualpui NG local an tlawh a, Ni 29 inrinni zan atanga Pathianni zan thleng khan District hruaitute hian Thusawi rawngbawlna neiin hun an hmanpui a, Kohhran ten an hlawkpui hle.

———-

KHUANG LEI NAN SUM HLAN/LAWMTHU SAWI NA

Chhimtuipui District, Riasika Local Chairman Upa PC Biaksanglura te chhungkua chuan, Riasika local khuang lei nan Rs. 6000/- chu Kohhran-ah an hlan a, Kohhran aiawh in thawktu Evan. L Khailawng chuan lawmthu a sawi a ni.

———-
———-

LAWNGTLAI WEST DISTRICT

District Hruaitu-te Programme

District Superintendent, Rev.F. Lalbiakthuama chu February ni 2 leh ni 3 chhunga UPC North East India Executive Board, Aizawl a neih ah a tel a, Kartawp hian Thingkah local tlawhin, Council venga Ram lak beihpui neihah hun a hmang bawk ang.

District secretary & Treasurer, Rev.Lalsawmliana Sailo chuan February ni 4-6 chhung a Diltlang South Bial Conference, Khawmawi Local Churc a neih ah Speaker ah a tang ang.

———-

MITHAR LAWM LUHNA LEH NAU HLAN LEH BAPTISTMA

January ni 29-30, 2022 chhung khan Bungtlang South Bial tu Pastor K Lalzawmsanga leh Upa B Lalramtiama te chuan Laitlang, Darnamtlang leh Tuidangchhuah Local-ah te rawngbawlna an nei a, Laitlang Local-ah mithar Member Pathum(3) kohhranah lawm lutin Naute pakhat hlan a ni a, Tui Baptistma mi pahnih(2) in an chang bawk.

Tuidangchhuah Local-ah Member sawmpathum(13) lawm lutin Nau pali(4) hlan a ni a, sual ngaihdamna Baptistma mi paruk(6) in an chang bawk.

———-
———-

LUNGLEI DISTRICT

CHAWNGTE BIAL LEH TLABUNG BIAL  IN INKHAWMPUI AN NEI:

January ni 28-30 chhung khan Chawngte leh Tlabung te chuan an bial inkhawmpui an hmang.

Chawngte bial inkhawmpui  vawi 43 na hi Upper Lungrang Local ah neih a ni a, he hun hi Rev Pc. Lalfakawma,  Dist Secretary chuan, Dist.supdt represent  in a hmanpui.

Inkhawmpui thupui ah  “Tunlai  thil awmzia” tih hman a ni a, Bial hruaitute bakah,  Dist secretary ten sermon thupui hi an sawi a ni. January ni 30 Pathianni chawhnuah Bialtu  Pastor Jerry Lalmuanawma’n Sacrament rawngbawlna  a nei a. Bial chhung atangin mi hrang hrang an solo bakah, Zehtet Local  atangin Special items hmuhnawm tak en thin a ni. An rorel tlangpuite:

A.Kohhranpui

1. Bial chhung rawngbawltu tan thuzir bu neih a, Correspondence Course ang a zirna kalpui.

2. Bial hruaitu term,  mi -1 in a zawnin (term 2)  kum 4 aia rei chelh tawh lo se.

3. Zehtet Home  missionary  quarters ah Invertar dah nise.

4. Bial chhung Local  te in tlawh tawnna  neih nise tih a tel.

5. 2023 bial khawmpuina hmun atan Lalnutui local ruat a ni.

B. Missions:

1. Nasa zawkin Dinthar Local-ah rawngbawlna kalpui  nise.

2. Kum 2022 chhungin Member thar tam zawk la tur a hmalak nise.

C. Sunday school:

1. Tual chhung sunday school kai tha hnenah lawmman siam nise. Upa leh rawngbawltute sunday school an kaidan pawh endikna ah tel nise.

2. Sunday school pawimawhna ziak a chhungtin hnenah sem nise.

Tlabung bial inkhawmpui vawi 17-na hi Tlabung Local-ah neih a ni a, District  Superintendent Represent- in District Treasurer Rev. C. Lalrintluanga chuan a hmanpui.An rorel langsar zualte:

A.Kohhranpui :

1. Rawngbawltu ni bial huap a hman a,Seminar neih nghal nise

2. Tirhkohte thiltih bu atangin bible ralchhan siam nise. A siam turin bialtu Pastor ruat a ni.

3.Kum 2023 ah Pastor quarters hmalakna chhunzawm leh nise,

B. PYD

1. Bial huap Seminar neih nise

2.Pastor quarter Target neih

3.PYD Day leh Social work day Bial huapa hman tha tih a ni

4. Kumpuan Hruitu ten Local tlawh kual ni rawhse tha tih a ni bawk. (Pic. Chawngte & Tlabung bial inkhawmpui)

———-

2. BIAL PALI IN INKHAWMPUI AN HMANG DAWN :

February 4-6 chhung hian Luangmual bial, Lungsen bial, S.Vanlaiphai bial leh Rahsiveng bialte chuan inkhawmpui an hmang ang.

Luangmual bial inkhawmpui vawi 23-na hi Luangmual Local-ah neih a ni dawn a, February ni 4 Zirtawpniah Missions Department leh L.A.D. ten rorelna an nei ang a, February ni 5 inrinniah Sunday School Department ten rorelna nei leh in February ni 6 Pathianniah Kohhranpuiin ro an rel ang a, District Secretary Rev. PC. Lalfakawma chuan he inkhawmpui hi a hmanpui ang.

Lungsen bial inkhawmpui vawi 52-na hi Rangte N Local-ah hman a ni dawn a, District Missions Director Rev. R. Vanlalenga chuan a hmanpui ang.

S.Vanlaiphai bial inkhawmpui vawi 7-na hi S.Vanlaiphai Local-ah neih a ni ang a,  District Superintendent Rev. C. Vanlalena chuan a hmanpui ang. February ni 5 Inrinni chhun lamah Kohhranpuiin rorelna an nei ang a, zan lamah Missions Department chuan rorelna an nei ang. February ni 6 Pathianni zanah Sunday School Department chuan rorelna an nei dawn bawk a ni.

Rahsiveng bial inkhawmpui vawi 37-na hi Hauruang Local-ah neih a ni dawn a, Pukpui bialtu Pastor Rev. PC. Nghakliana chuan District Superintendent Represent-in a hmanpui ang. February ni 4 zirtawpniah L.A.D. leh Sunday School Department-te chuan rorelna hi neiin, February ni 5 inrinniah Kohhranpui in ro an rel ang.

———-

MI THAR :

January ni 30 Pathianni khan Ṭawipui N-II Local a lawi turin mi thar pakhat bialtu Pastor Rev.H.Rothuama chuan a lawm lut. (Pic,Mi thar)

———-
———-

NORTH MIZORAM DISTRICT

Bial PYD Conference tluang takin hmang zo:

North Mizoram District huam chhunga Bial 30 ten, Jan ni 28 zirtawpni atanga ni 30 Pathianni thleng, Bial PYD Confernece an neih chu tluang taka zovin,  Bial tam zawk te chuan Jan ni 29 Inrinni khan Rorel inkhawm neiin; a tuk Pathianni-ah sermon inkhawm tum hnih neiin hun an hmang a, Bial thenkhat chuan Zirtawp zan atanga tannin sermon inkhawm nei an awm bawk.
Bial PYD Conference hi District Kohhranpui hruaitu leh District PYD hruaitute’n hetiang hian an hmanpui bawk.
Dist. Secretary Rev. Chhiarpuian – Headquarters Bial
District PYD President Evan. J. Vanlalruata – Bilkhawthlir Bial . (Pic. Bial Confe )
District PYD Secretary Evan. K. Rotluanga – Phainuam Bial leh
District PYD Treasurer Evan. C. Lalruatsanga – Vairengte Bial te an hmanpui hlawm a ni.

Kum 2022 Bial khawmpui a ruala nei te hian 2022 chhunga Bial hma lak dan tur leh rawngbawl dan tur hmachhawp chi hrang hrang te relin, PYD motto Krista tana sengkhawm a nih angin, Bial tam zawk ten Missionary chawm an passed bakah, District PYD bila Kawrthah hmuna rawngbawl an bawl mekna pualin Appeal te neih a ni bawk a, hemi pual hian sum thahnem tak an hmu chhuak bawk a ni.

Dampangrengpui Bial te chuan Bial PYD Khawmpui vawi-na an hman chhungin mithar 1 lawmluh a ni a, mi 3 in sual ngaihdamna Baptisma Bialtu Pastor kutah a chang bawk a ni (Pic. Baptisma)

———-

UPC, NMD Sunday School Dept chuan, a enkawl Library chu District Kohhranpui kutah a hlan:

Jan ni 31 Thawhtanni chawhma dar 11:00 khan, NMD SS Conf in a lo rel tawh leh Dist SS Board in ruahmanna a lo siam angin, NMD SS Dept Library chu Kohhranpui Library-ah chhun luh a ni.
Library Dist Kohhranpuia hlanna inkhawm hi NMD Office, Supdt Chamber-ah neiin, Inkhawm hlanna Upa Lalrinzama Dinthar Bial SS Director in a nei.

Dist SS Director Rev C. Lalramthanga chuan SS Library hruaitu hmasa tena theihtawp chhuaha bul an lo tan leh an lo kalpui, a hunlaia Kohhranpui kuta hlan, Dist SS Board in a rel ta chu NMD in Library lian leh hmasawn, kawng engkima a changtlung zawk kan neihna leh Kohhran mite tan pawha malsawmna tling a nih zawk dan tur  thu sawiin, Library hlanna lehkhaah Dist SS Director chuan Signature pein Dist Supdt Rev Laltluanga kutah Library hlanna a nei a, He mi hnu hian SS Library enkawl hna lo thawktu Dist SS Secretary Evan. H. Lalrinngheta hnen atangin  Dist. SS-in Library an lo kalpui tawh dan leh enkawl dan tlangpui report pein lehkhabu 1016 a awm thu te, lehkhabu SS in a neih ang te chu Pathian thu lam chhuina, History, Politics, Cultural etc a a nih thu te sawiin, ani pawh hian Library Chahbi leh Register bu pawimawh dang te, Dist Kohhranpui Librarian Rev. C. Lalthantluanga kutah a hlan bawk.

He inkhawmah hian District aiawhin District Treasurer Rev. K. Lalduhsanga’n lawmthu sawiin; lehkhabu rotling man to tak tur, lehkhabu 1016 lai District Sunday School in Kohhranpui-ah a chhung lut chu thil lawmawm a nih thu sawiin, Library pawhin hmasawn lam a pan zel tur thu a sawi a, kohhranpui Librarian Rev C. Lalthantluanga hnen atangin Kohhranpuiin Library a kalpui dan report pein, Kohhranpui Library-ah pawh lehkha bu rotling, Thuziakmite tan pawh behchhan tur thahnem tak a awm thu bakah tun thlenga tangkai taka kalpui a nih mek thute leh Library hmasawn zelna tur kawngah ke penna tur awm hmachhawp te a tarlang bawk.

Aizawl khaw chhung atangin Dinthar Bial, Chaltlang Bial, Maubawk Bial, Tlangnuam Bial leh Hunthar Bial te telin, Chaltlang  Bial Director Rev. C. Lalrosanga leh Maubawk Bial SS Dir Upa H.Zopara te hnen atangin Thu tawi ngaihnawm tak ngaihthlak a ni bawk.
Rev. Chhiarpuia Dist Secy chuan Library changtlung zawk Dist in a neih zel chungchangah a lawmthu sawiin,  tawngtaina neiin Inkhawm tihtawp a ni. (Pic: Library hlan)

———-

PSM Exam zo:

UPC, NEI, North Mizoram District hnuaia Bible zirna Pentecostal School of Ministry 2021 session Jan ni 5 Nilaini-a Registration Day hman chu, harsatna tenau eng eng emaw karah kalpui a nih hnuin January Ni 28 Zirtawpni khan exam an zova, Zirtirtu Rev. C. Lalthantluanga kaihhruaiin farewell function Camping Center hmunah an hmang.

Tarlan tawh angin PSM 2021 session hi nikum 2021 June thlaa neih tur niin; hrilengin harsatna a thlen avangin 2021 PSM session chu kumin Jan ni 5 atanga ni 28 chhung khan neih a ni ta a ni. PSM 2021 Session Graduation Day hi Feb ni 6-a hman tura ruahman tawh a ni chungin, PSM Board hruaitute chuan hun dang remchang dap nise an tib awk. (PSM zirlaite)

———-

Missions Field tan fehchhuak:

Bro.C.Lalnunhlima Lengpui Bial Missions Dept. Secy hovin T.Upa Lalrochanga leh Malsawmkima Rawpuichhip  te chuan Jan ni  31 thawhtanni atang khan West Phulpui Mission Field biak in sak mekah inchhun te siama, a chung an chih zawh hma, Work camp-a hna thawk turin an inbuatsaih a, an inpeknaah District Missions hruaitute leh W. Phulpui MF Kohhran member te an lawm hle.

Vawngawnzo Missionary Quarters sak lungphum phum leh tun dinhmun: Jan ni  25 thawhlehni khan, Mamit Bial chhunga awm Vawngawnzo Missionary Quarters sak tur Lungphum Programme hman a ni. Vawngawnzo Missionary Qtrs sak tur lungphum chu Vawngawnzova MF-a Missionary hna thawka awm mek Sist. Esther Lalrawngbawlin lungphum phumin;  Chaltlang Bial Mission Director in ṭawngṭaiin  a hlan a. Lungphum phum ni Jan ni 25 atangin Quarters ban tur hi phun tan nghal a ni.

Vawngawnzo MF Quarters hi Mamit Bial hruaitute leh Chaltlang Bial Missions Director Evan. C. Hmingchungnunga te leh District Missions hruaitute ruahman angin a theih ang ang a sak chhoh mek zel a ni a, District hruaitute ruahman angin March thla chhunga luah theiha peih an beisei. (Pic: Qtrs Lungphum phum)

———-

District PYD Hruaituten Kawrthah rawngbawlna hmun an tlawh:
NMD Dist PYD ten  Tirhkoh ruaia rawng an bawl mekna  Rengdil Bial Kawrthah chu Jan ni  26 NIlaini khan an tlawh.

Kawrthah tlawhnaah hian Dist.PYD Secretary Evan K Rotluanga leh Treasurer Evan C Lalruatsanga ten ho vin Dist.PYD Board Member Mi pa 4 leh  Hruaitu thenkhatten an zui bawk.

Dist.PYD Hruaitute fehchhuak hi Rengdil Bial PYD hruaituten lo dawngsawngin Kawrthah kohhran Biakin hmun hungna siam dan tur leh rawngbawlna atana thil pawimawh dangte an sawi ho a ni. (Pic Kawrthah tlawh)

———-

Maicham thar pe:

District Kohhranpuiin Tirhkoh ruaia rawng a bawl mekna hmun, Lengpui Bial Dapchhuah kohhrante tanah Bro Vanlalfaka Rengdil chuan Rs. 25000 pe in, he sum hlu tak hmang hian Dapchhuah kohhrante chuan Pulpit, maicham leh lectern an siam a, Heng Biak in bungraw zahawm tak tak te hi, Mamit-a awm Unaupa Siama a thlawnin kohhran tan hian a siamsak a, Dapchhuah kohhran te hi thilpek hlu tak petu Bro. Vanlalfaka leh Pulpit, Maicham leh Lectern siamsak tu Bro. Siam ate chungah lawmthu an sawi a ni. (Dapchhuah Maicham)

———-

Aibawk Biak in hawn a ni:

Jan ni 15  khan Aibawk Bial, Aibawk Kohhrante chuan  biak in sak thar hawngin, Biak in hawn inkhawm pawn lam programme Upa. C.Zairemtluanga, Vice Chairman Aibawk UPC in kaihruaiin, Pathian thu chhiarna leh ṭawngṭaina a neih hnuah. Rev. Laltluanga, District Superintendent in Ribbon chep chatin Biak in hi a hawng a ni.

Biak in chhung inkhawmah kaihhruai hna Aibawk Bialtu Pastor leh Aibawk kohhran chairman ni bawk Pastor Pc Lalrokima’n thawkin, Biak in sak thar hawnna inkhawma local kohhran mite leh Aibawk kohhran leh pawn lam te, kohhran dang chhimtute lawmna thu Evan.Laldawla’n neiin;  Technical Report Upa C.Hmingsangzuala, Treasurer in a pek baka Sis. F. Lalhriatchhungi, Sis. Lalfakzuali leh Sis. R. Lalpianfeli te hnen aṭangin Pathian fakna ngaihthlak a ni a. Bialtu Pastor lo ni tawh te Rev. C.Lalramthanga leh Rev. K.Vanlaldika ten thutawi an sawi bawk.

Biak in chhung inkhawmah hian thuhrilh rawngbawlna Rev. Laltluanga, District Superintendent chuan neiin, Aibawk lo bial tawh tu leh, Biak in sak bul lo tan tu Rev. C.Lalramthanga, Distict SS Director in malsawm ṭawngṭainain inkhawm a tin a ni.

Aibawk Biak in hi kum 2013 Sept. ni 13 khan sak bul ṭan niin, feet 60 x feet 30 a liana sak a ni a. Kawngkapui lian 2 leh kawngkapui 3 awmin tukverh 21 leh ventilation 10 a awm a. Gallery nen mi 400 vel leng tura duan a ni. A sak nan hian sum ₹ 31,20,650 sen ral niin chhinchhiah theih chian tha  2458 sen a ni. (Aibawk Biak in hawn)

———-

Sunday school Exe thukhawm:

Jan ni 18 Thawhlehni khan N. Mizoram District Sunday School Executive Committee, Rev. C. Lalramthanga Dist. SS Director kaihhruaiin District Office-ah thukhawmin, Kumin  chhunga SS Hall sak tanpuina dil mi 10 Phaizau, Tumpanglui, Hriphaw, Kol Diakkawn, Vairengte IOC, Kelsih, Khatla, Samtlang leh Kanghmun tanpuina pek an rel a, Hall sak tanpuina hi Kum 2022 January thlaa ruahman fel an passed bawk. (SS Exe Committee)

———-

Missionary Induction thawh hnihna nei zo :

North Mizoram District huam chhunga Missionary Post thar luah induction thawh hnihna chu Jan ni 16 Pathianni khan neih leh niin; hetah hian Marpara Missions Field-a awm thar Evan. Isak Lalrohlua leh W.Phulpui Missions Field-a awm Evan. H. Lalnunzira te induction neih a ni. Evan. Isak Lalrohlua hi Dist. Missions Secy Evan. JH Malsawmdawngliana’n induction neiin; West Phulpuia awm Evan. H. Lalnunzira hi Maubawk Bial Director Upa B. Vanlalenga’n a nei thung a ni. (Missionary induction)

———-

LADIES TAILORING CENTRE -AH ZIRNA TLUANG TAKIN A KAL ZEL:

North Mizoram District LAD te hmalaknaa Jan ni 17, Thawhtanni chawhma dar 11:00 -a hawn a thlawna puanthui zirna ‘Ladies Auxialliry Tailoring Centre’ -ah puanthui zirna tluang takin a kal zel.

Ladies Auxilliary Tailoring Centre hi District LAD ten miten eizawnna ngialnghet zawk leh thiamna an neih theihna tura ruahman niin; tunah hian Sist. Mary Remruatkimi, Mater of Fashion Designing, Mission Vengthlang-a cheng chuan zirtir hna thawkin zirlai 9 te hneh takin zirtirna an pe chho mek zel a, Zirlaite pawhin hma an sawn pui hle a ni. (Tailoring Centre)

———-

Rawngbawlna Report

Missions Campaign thawhhnihna fehchhuahpui:

North Mizoram District, Missions Dept. ruahman angin vawiin Feb ni 6 Pathianni hian Missions campaign neiin District huam chhung Bial 21 -ah rawngbawltute an fehchhuak, rawngbawltute hian heng Bial hrang hrang:- 1) Bairabi 2) Bilkhawthlir 3) Kolasib Diakkawn 4) Kol Venglai Bial 5) Vairengte 6) Phainuam 7) Kawnpui 8) Rengdil 9) Mamit 10) Sialsuk 11) Sumsuih 12) Maubawk 14) Zawlnuam 15) Lengpui  16) Tlangsang 17) West Phaileng 18) Kanghmun 19) Reiek 20) Bukpui 21) THenzawl  Bial-ah te fehchhuakin Missions Campaign an nei ang a, heng rawngbawltu fehchhuak te hian Missions rawngbawlna kawnga kohhran a hmasawn zel theihna tur bakah Kohhran mipuite zingah Missionary chawmna leh Support an zawng dawn a ni. Rawngbawltu fehchhuak te hian Kohhran 84 thuam tura ruahman niin; heng zinga kohhran thenkhat te erawh hrilengin rokhawlhna a siam avanga a hun sawn te pawh an awm a ni.

———-
———-

AIZAWL EAST DISTRICT

Bial PYD Inkhawmpui:

Aizawl East District chhunga Bial hrang hrangte chuan January 28 atanga 30 chhung khan Bial PYD Inkhawmpui an hmang a, Bial thenkhat erawh chuan hrileng avangin a hun takah Bial PYD Inkhawmpui hi an hmang thei lo thung.

Bial hrang hrangte hian Covid-19 hrileng avanga Sawrkarin Dan a siamte zawm chungin Bial PYD Inkhawmpui hi an hmang hlawm a, January 29, Inrinni khan Bial hrang hrangte hian Kum 2022 chhunga Bial hmalakna tur hrang hrang leh District-a thehluh tur ngaihtuahin rorel inkhawm an nei hlawm a bial thenkhatah Zan lamah inkhawm neih a remchan loh avangin Pathianni chawhma leh chawhnu-ah chauh inkhawm an nei thei hlawm a ni. Bial thenkhatah erawh Pathianni khan rorelna an nei thung a ni.

Bial PYD Inkhawmpui hi District PYD hruaitute pawhin Bial hrang hrangah hetiang hian an hmanpui a ni:
President, Rev C.Lalmalsawma chuan Zohmun Bial-ah a hmanga, Speaker-ah tangin rawngbawlna a nei. Inkhawmpui neih chhung hian mi 3 in sual ngaihdamna baptisma an chang a ni.
Vice President, Upa F.Lalthlangliana chuan Bethlehem Bial leh Bazar bial hmanpuiin
Evabn R.Vanlalpeka, Secretary leh Evan K.Lalbiaknunga, Treasurer ten Bawngkawn Bial an hmanpui a,
Evan Zothansiama, Fin. Secretary in Thuampui Bial a hmanpui bawk a ni.

Aizawl East District chhungah hian Bial 31 awm mekin Kum 2021 District Conference report bu-a a lan danin PYD hi member 6754 awmin Mipa 4247 leh Hmeichhia 2507 an awm mek a ni.

———-

Audit:

Aizawl East District hnuaia Kohhranpui leh Department hrang hrangte sum chu February 8, Thawhlehni atang hian endikna, Audit neih tura ruahman a ni. Heng sum te hi District Board in alo ruat tawh angin Rev H.Lalropuia,  Pastor Lalhmangaihawma Parte bakah Rev B.Lalengzauva leh Upa Joseph Lalhruaitluanga te chu endikna, Audit hna an thawk dawn a ni.

———-

Missions Executive meeting:

January 28, Zirtawpni khan District Missions Executive meeting, Rev KVL Hmangaihkima, Director kaihhruaiin neih a ni. He hunah hian thu pawimawh tak tak ngaihtuah niin District Kohhranpui hruaitute pawh an telkim thei a ni. An thu passed langsar zualte:
1. District Missions Evangelist  2 lak belh tura tih niin Advertisement chhuahin February 13, Pathianni thleng dil theih hun chhung hawn ni se February 17, Ningani-ah Interview neiin February 18, Zirtawpni-ah Training neih tura tih a ni. Training hi District Missions hruaituten neihpui ni se tih a ni.
2. February 6, Pathianni hmang  hian Serchhip Bial leh Serchhip Dinthar Bial-ah District Missions Support zawn tura tih a ni.

———-

Mithar:

January 30, Pathianni khan Khawhai Bial, Riangtlei hmunah Bialtu Pastor K.Lalmuanpuia chuan mithar 2 Kohhranah sengluhna a nei. Bialtu pastor hi Khawhai Bial a luh atanga a bial fan vawi khatna  a ni a, hetianga member thar an nei hi Kohhrante an lawm hle a ni.

———-

Hruaitute Programme:

Rev Vanlalfela Ramtiam, District Superintendent chuan Pathianni hmang hian Sakawrdai Bial-ah District Missions Support zawngin rawngbawlna a nei ang.

Rev VL.Hnemtluanga, District Secretary, Rev KVL Hmangaihkima, District Missions Director leh District Missions hruaitute dangte chuan Pathianni hmang hian Serchhip Bial leh Serchhip Dinthar Bial-ah District Missions Support zawngin rawngbawlna an nei ang.